ভারতকী প্রধানমন্ত্রী

মন্ত্রীমন্দলদা ঐহাকপু তেংবাংলিবা,

শ্রী থাৱরচন্দ গেহলোৎজী,

শ্রী রাম বিলাস পাসৱানজী,

দাক্তর হর্শবর্ধনজী,

শ্রী রামদাস আথৱলেজী,

শ্রী কৃষ্ণ পালজী,

শ্রী বিজয় সম্পালাজী

মফম অসিদা তিনবীরিবা অতৈ শক্নাইরবশিং, ইচল-ইচে অমসুং মরূপ মপাংশিং, অহানবা মক্তদা ঐহাক্না লৈবাক অসিগী মীয়ামদা নুংঙাইবা ফোংদোকচরি মদুদি ঙসি মখোয়না দাক্তর অম্বেদকর নেস্নেল মেমোরিয়েলগী মওংদা মমল নাইদবা খুদোল অমা ফংলে।

ঙসি বাবা সাহেবকী মোনুমেন্তা শাগৎলিবা নেস্নেল মেমোরিয়েল অসি লৈবাক মীয়ামদা কত্থোকচবা ফংজবা অসি ঐহাক্কী লাইবক ফবনি। লৈবাক অসিদা বৈসাখীগী থৌরমসু পাংথোক্লি। মসি ঐখোয়গী পীনহৈবা- ঐখোয়গী লৌমীগী শুবা নোম্বা অদু ইকায় খুম্নবগী নুমীৎ অমনি। ঐহাক্না লৈবাক মীয়ামদা বৈসাখীগীসু নুংঙাইবা ফোংদোকচরি। ঙসিগী নুমীৎ অসিদা জলিয়নৱালা বাঘকী মীয়াম হাৎখিবা অদুগী কুমওনসুনি। মদু মীওইবা খুন্নাইগী পুৱারীগী খ্বাইদগী থমোয় শোকপা থৌদোকশিংগী মরক্তা অমনি। জলিয়নৱালা বাঘকী নোংমৈ কাপ্পা থৌদোক্তা লৈখিদ্রবা অথৌবশিংগী মফমদা ইকোক নোন্না খুরুমজরি।

 মরূপশিং,

নীং তম্বা ফংলবা মতুংদগী সরকার কয়া অমা লাকখ্রে, মতম কয়া অমা হৌখ্রে, অদুবু মতম কয়াগী মমাংদা তৌরম্বা য়াবা থবক অদু হৌজিক্তা তৌরি। মরম অদুনা ঐহাক্না মফম অসিদা লাক্লিবা, থৌরম অসিদা শরুক য়ারিবা, বাবা সাহেবনা অরোইবা মতম লেনখিবা মফম অসিদা লেপচবা অসিদা পুক্নীংদা নুংশিবা ফাওই। বাবা সাহেবকী মিংদা, মহাকপু নীংশিংদুনা শাগৎলিবা নেস্নেল মোনুমেন্ত অসি, লৈবাক অসিনা মফমদা কৎচরিবা শ্রদ্ধানজলিনি।

হয়েং অসি মহাক্কী মপোক নুমীৎনি অমদি মদুগী নোংমা ৱাৎলিঙৈ মফম অসিদা থৌরম পাংথোক্লিবা অসি ঐখোয়গী সরকার অসিনা বাবা সাহেবকী মফমদা ইকায় খুম্নবা উৎচবনি।

শেংলবা থৌরম অসি মপুং ফানা পাংথোকপগীদমক ঐহাক্না সোসিয়েল জজতিস অমসুং এম্পৱার্মেন্তকী মন্ত্রালয় অমসুং ভারত সরকারগী অতোপ্পা মরি লৈনবা দিপার্তমেন্ত পুম্নমক্কী মফমদা থমোয় শেংনা থাগৎপা ফোংদোকচরি। মেমোরিয়েল অসি শাবদা শরুক য়াখিবা শিন্মী অমমমগী মফমদা ইকোক নোন্না খুরুমজরি।

ইচল-ইচে অমসুং ইচিল-ইনাওশিং, ঙসিদগী ২৬ অলিপুর রোদতা শারিবা মেমোরিয়েল অসি দিল্লী খক্তদা নত্তনা লৈবাক অসিগী মেপতা মতম পুম্নমক্কী ওইনা য়াওরগনি।

প্রজা মীয়াম্না মফম অসিদা লাক্তুনা বাবা সাহেবকী পুন্সিগা মরি লৈনবা ৱাফমশিং হেন্না মমুৎ তানা খঙবা ঙম্লগনি।

• মোনুমেন্ত অসি, তোপ তোপ্পা মীওই অমগী তোপ তোপ্পা পুন্সিগী খুদম্নি।  

• মোনুমেন্ত অসি, ভারত ইমাগী অফবা মপারীগী অরোইবা মতমগী মেমোরীনি।

ইচল–ইচে অমসুং ইচিল ইনাওশিং, 

মোনুমেন্ত অসি লাইরিক্কী মওং মতৌ লৌদুনা শেম্বনি। দাক্তর অম্বেদকরনা লেংবীরম্বা, ভারতকী সংবিধান ওইরিবা অদুগুম্লবা লাইরিক অদুনি।

সংবিধান অদু লেংলদুনা,

বাবা সাহেবনা মালেম অসিগী খ্বাইদগী চাউবা লোকতন্ত্র অসিবু, লোকতন্ত্রীক ওইনা লৈনবা লম্বী অদু উৎপিখি। 

ঙসিগী অনৌবা মীরোলনা, মেমোরিয়েল অসিদা লাকপা মতমদা, মফম অসিদা উৎলিবা একজিবিসন অসি উবদা, ম্যুজিয়ম অসিদা লৈরিবা অনৌবা তেক্নোলোজীগী খুত্থাংদা মহাক্কী পুন্সিগী মরুওইবা তাঙ্ককশিং অদু উরগা, বাবা সাহেবকী পুন্সিদা থেংনরকখিবশিং অদু ময়েক শেংনা খঙবা ঙম্লগনি।

মরূপশিং,

বাবা সাহেব অম্বেদকরগা শাগোন্নরম্বা মফম মঙাবু তীর্থগী মফম মঙাদা ওন্থোকচনবা তঞ্জা ফংজখিবা অসি ঐখোয়গী সরকারগী ওইনা লাইবক ফবা ৱাফম্নি।

মধ্য প্রদেশকী মহুদা বাবা সাহেবকী পোক্নফম লমদম,

লন্দনদা দাক্তর অম্বেদকর মেমোরিয়েল-মহাক্না মহৈ তমখিবা মফম,

নাগপুরদা দীক্ষাভুমী,

মুম্বাইদা চৈত্য ভুমী অমসুং

দিল্লীদা নেস্নেল মেমোরিলগী মওং মতৌদা মহাক্কী মহাপরিনির্বান ভুমীনি।

মরূপশিং,

অতলজী গী সরকার লৈরিঙৈ মতম অদুদা, মফম অসিদা নেস্নেল মেমোরিয়েল শানবা ৱাফম পুখৎলম্মি। অদুবু মহাক্কী সরকারনা চৎখ্রবা মতুংদদি কংগ্রেস সরকারগী মতমদা থবক লেপখিরম্মি। ইং ২০১৪দা ঐখোয়গী সরকার শেম্লবা মতুংদা অমুক হন্না ২৬ অলিপুর রোদকী ফাইল অদু থিদোক্তুনা পুথোকলম্মি। ফাইল ফংলবা মতুংদগী অমুক হন্না খোংলৈ থুনা থবক হৌখি।

ইং ২০১৬কী মার্চ ২১দা মেমোরিয়েল অসিগী উরেপ উয়ুং তম্লদুনা ঐহাক্না হায়খি মদুদি, ইং ২০১৮কী বাবা সাহেবকী মপোক নুমীৎতা মসিবু শঙ্গাবা লাক্কনি।

মরূপশিং,

হৌখিবা চহি মরিদগী ঐখোয়গী সরকার অসিনা চহি কয়াদগী লোয়শিনবা নাইদনা লৈরক্লবা প্রোজেক্তশিং অদু থিদোক্তুনা মপুং ফানা লোইশিনবগী থবক চত্থরি।

প্রধান মন্ত্রীগী ওফিসতগী মীৎয়েং থম্দুনা চত্থরিবা দিবেলপমেন্তকী মীফমশিংগী খুত্থাংদা লুপা কোতি লাখ মাপল মখায়গী লোইশিন্দনা লৈরম্লবা প্রোজেক্তশিং খোংজেল থুনা মাংলোমদা পুখৎপগী থবক চত্থরি।

ইচল-ইচে অমসুং ইচিল-ইনাওশিং,

ঙসিদগী থারগী থা অমগী মমাংদা, দিল্লী অসিমক্তদা থৌরম অমা পাংথোকখি। মালেমগী মফম পুম্বদগী মীয়াম তিল্লম্মি। থৌরম অদুদা মতৌ করম্না তি বি অসি ইং ২০৩০ ফাওবদা মুত্থৎকদগে হায়বা ৱাফম মালেমগী অতৈ লৈবাকশিংনা থম্বিরম্মি। মীফম অদুদা ভারতনা লাওথোকখি মদুদি ইং ২০২৫ ফাওবদা তি বি অসি মপুং ফানা মুত্থৎনবা থবক তৌগনি। হায়বদি ঐখোয়গী ওইনা পান্দম অদু ফংনবা হোৎনরিবা মতম অদু অতোপ্পা লৈবাকশিংগা য়েংনরুবদা চহি মঙা তেনশিল্লে।

মরূপশিং,

বাবা সাহেবকী আইদোলোজীদা ইক্বেলিতী অসি তোঙান তোঙানবা মওং মতৌদা উবা ফংই।

ইকায় খুম্নবগী ইক্বেলিতী,

লোগী ইক্বেলিতী,

অধিকারগী ইক্বেলিতী,

হ্যুমেন দিগনিতিগী ইক্বেলিতী,

খুদোং চাবগী ইক্বেলিতীনি।

অসিগুম্বা মখলগী য়ামখ্রবা হিরমশিংবু বাবা সাহেবনা মশাগী পুন্সিদা লেপ্পা লৈতনা পুখৎপীরম্মি। মহাক্না মতম পুম্নমক্তা এক্সপেক্ত তৌরম্মি মদুদি ভারত্তা সরকারশিংনা সংবিধানগী পালন তৌদুনা , জাতিগী খেৎনবা থম্দনা মথৌ পাংথোক্কনি। খুদম ওইনা জনধন য়োজনা। নীং তম্বা ফংলবা অসুক কুইবা মতম অসি মীওই কোতি কয়ানা মশাগী ওইবা বেঙ্ক একাউন্ত লৈতবা অসি সমাজগী ওইনা য়াম্না চাউবা ইনজস্তিজ অমা ওইরম্মি। মসি কোকহন্নবা থবক ঐখোয়না পায়খৎলে। জনধন য়োজনাগী খুত্থাংদা হৌজিক ফাওবদা লৈবাক অসিদা বেঙ্ক একাউন্ত কোতি ৩১ হেন্না হাংদোকহনখ্রে। মতৌ অসুম্না লৈবাক অসিগী য়ুমথোং কয়াদা অমাংশঙ লৈতবা অসিসু খুন্নাইগী ওইবা অচৌবা ইনজস্তিজ অমনি। লৈবাক অসিদা সরকার অসিনা স্বচ্ছ ভারত মিসনগী খুত্থাংদা অমাংশঙ কোতি ৭ শারে। মসিগী মনুংদা চাউরাক্না অমাংশঙ কোতি ২ লাখ ২৫দি খুঙ্গং লমদমদা লৈরিবা দলিৎ অমসুং ত্রাইবেলশিংগী ইমুং মনুংশিংদা শাখি। মতৌ করম্না অমাংশঙ লৈবনা ইকায় খুম্নবা ফংবা ঙম্মি হায়বা অদু হৌখিবা চহি মরি অসিদা লৈবাক অসিনা উবা ফংলে ।

ইচল-ইচে অমসুং ইচিল ইনাওশিং,

ঙসিগী অসিগুম্লবা চাউখৎলবা মতম অসিদা কনাগুম্বা অমগী য়ুমদা মৈ ফংদবা অসিসু খুন্নাইগী ওইবা অচৌবা ইনজস্তিজ অমনি। ঐখোয়গী লমদম অসিদদি ইং ২০১৪ ফাওবদা মৈ ফংদবা খুঙ্গং লিশিং ১৮ লৈরম্মি। মখোয় অদু ১৮সুবা চহিচাদা হিংলম্মি। ঐখোয়গী সরকার অসিনা লাল কিলাদগী লাওথোক্তুনা খুঙ্গংশিং অসি ফাওবা মৈ ফংহনবগী থবক চত্থরি। হৌজিক ফাওবদা খুঙ্গং লিশিং ১৬ হেনবদা মৈ ফংহনখ্রে। হৌজিক্তি ঐখোয়না য়ুমথোং খুদিংদা মৈগী কনেক্সন ফংহন্নবা থবকসু পায়খৎলে।

প্রধান মন্ত্রী সৌভাগ্য য়োজনাগী খুত্থাংদা লৈবাক অসিগী ইমুং কোতি ৪দা লেম্না মৈগী কনেক্সন পীরে। মশানা মশাবু থবক পীজবদা পুক্নিং থৌগৎলিবা মুদ্রা য়োজনা অসিনসু চহি কয়াদগী চত্থরক্লিবা ইনজস্তিজ অদু মুত্থৎনবা থবক পায়খৎলি। অচৌ অচৌবা প্রোজেক্তশিং শেম শারিবা মীওইশিং অদু খক্তদা বেঙ্ককী লোন ফংবা, ইশানা হোৎনদুনা করিগুম্বা খরা তৌনীংবগী মঙ মঙলিবা নহাশিং অদুনা বেঙ্ককী গরেন্তীগী মিংদা ককঙাওনদুনা লৈরিবা ফিভম অদু অচুম্বা নত্তে। মরম অদুনা ঐখোয়গী সরকার অসিনা বেঙ্ককী গরেন্তী য়াওদনা লোন লৌনবা ওপ্সন পীরে। মুদ্রা য়োজনাগী খুত্থাংদা হৌজিক ফাওবদা লোন কোতি ১২ হেন্নে অয়াবা পীখ্রে। মসিনা খুঙ্গং অমসুং সহরগী লমদমদা মশানা মশাবু থবক পীজনবা থোং হাংলে। মুদ্রা য়োজনাগী খুত্থাংদা দলিৎ বেনিফিসরী কোতি ২গা লাখ ১৬সু কান্নবা ফংলে।

মরূপশিং,

 হন্দক্কী বজেৎতা সরকার অসিনা অচৌবা স্কিম অমসু লাওথোকখ্রে। মালেম পুম্বদা স্কিম অসিগী মতাংদা খন্ন-নৈনরি। খুন্নাইগী ওইবা মান্নদবা লৈরিবশিং অসি কোকহন্নবগী মায়কৈদা স্কিম অসিনা চাউনা থবক পাইখৎলি। স্কিম অসিগী মমিংনি- আয়ুশ্মান ভারত। স্কিম অসিগী খুত্থাংদা সরকার অসিনা লৈবাক অসিগী লাইরবা ইমুং কোতি ১১দা হায়বদি চাউরাক্না প্রজা কোতি ৪৫দগী ৫০ ফাওবদা হেল্থ ইন্সুরেন্স ফংহল্লগনি। লাইরবা ইমুং অমদা কনাগুম্বা অমা নারক য়েকলকপা মতমদা লুপা লাখ ৫ ফাওবগী লেম্না লায়েংলগনি।

মরূপশিং,

ঙসি লৈবাক অসিগী কাচিন কোয়া অমা হেক্তদা চৎলুবা মতমদা মফম অদুদা খুঙ্গংগী নুপীশিংনা খ্বাইদগী য়াম্না খন্ন-নৈনরিবা স্কিম অদু উজ্জ্বলানি। গ্যাস কনেক্সন লৈতবা ইমুং অদু খুন্নাইগী ওইবা ইনজস্তিজকী খুদম অমা ওইরম্মি। উজ্জ্বলা য়োজনাগী খুত্থাংদা সরকার অসিনা গ্যাস কনেক্সন কোতি অহুম মখায় হেন্না লেম্না পীখ্রে। হৌজিক্তি মসি হেঙ্গৎহন্দুনা কনেক্সন কোতি ৮ ওইহন্নবা পান্দম থম্লে। 

ইচল-ইচে অমসুং ইচিল ইনাওশিং,

ঙসি ঐহাক্ননা লৈবাক মীয়ামদা শেংদোকপা পাম্লি মদুদি বাবা সাহেবকী অচুম্বগীদমক লেপ্পা, মথৌ নীংথিনা পাংথোকপা অমসুং খুন্নাই অসি শেমগৎপদা মহাক্না লৌখিবা থৌদাং অদুগীদমক মহাক অসি ভারত মচাশিংগী থমোয়দা লৈরিবনি।

লৈবাক অসিগী পুৱারীদগী মহাক্কী মমিং মথা মুৎখিনবা কংগ্রেসনা অকনবা মওংদা হোৎনখি। বাবা সাহেবনা হিংলিঙৈ মতম অদুদা ফাওবা কংগ্রেসনা মহাকপু খোংগাওনখি হায়বসি পুৱারীদা ককপা য়াদনা লৈরগদবা ৱাফমনি।

মরম অদুনা ইচল-ইচে অমসুং ইচিল ইনাওশিং,

• বাবা সাহেবনা হিংলিঙৈ মতম অমসুং লৈখিদ্রবা মতুং ফাওবা মতৌ করম্না কংগ্রেসনা ইকায়বা পীখিবগে হায়বা অদু ঙসিগী মীরোলনা খঙবা মথৌ তাই। 

• মতৌ করম্না বাবা সাহেবনা কংগ্রেসকী অশেংবা করেক্তর অদু লৈবাক মীয়ামদা খঙহনখিবগে হায়বা অদুসু ঙসিগী মীরোলনা খঙবা মথৌ তাই।

কংগ্রেস অমসুং বাবা সাহেবকী মরক্তা লৈনরিবা মরি অদু পুমতৎ তৎনরমদাই মতম অদুগী মতাংদা শন্দোক্না হায়জনীংলি। ৱাফমশিং অসি নীংশিংবা মথৌ তারিবগী মরমদি মসিনা কংগ্রেসকী অশেংবা শক্তম অদু তাক্লি।

মরূপশিং,

অৱায় অখুম কয়া তৌনবনা মরম ওইদুনা বাবা সাহেবনা নেহরুগী মন্ত্রীমন্দলদগী ফম থাদোক্লম্মি। মহাক্কী ৱারোলদা বাবা সাহেবনা অমমমতা ওইনা মহাক্কী ওইবা নুংঙাইতবশিং অদু পল্লমী।

মহাক্না ফম থাদোকখিবগী মরমশিং অদু শন্দোক্না হায়রম্মি। ৱারোলশিং অদুগী পরেং খরা ময়ামদা ঐহাক্না খঙহনবা পামজৈ।  

মসি হায়দোকপা য়াম্না মরু ওইরিবগী মরমদি, লৈবাক অসিদা ইমার্জেন্সি চৎনহনখিবা কংগ্রেসনা সংবিধান ইবীখিবা অদুগা লোইননা করম্বা মখলগী লমচৎ শাজৎ চৎখিবগে হায়বা অদু লৈবাক অসিগী দলিৎ খুন্নাই, লৈবাক অসিগী ত্রাইবশিং, শোত্থরবা কাংলুপ, ভারত মচা খুদিংমক্না খঙনবনি।

মরূপশিং, বাবা সাহেবনা ইবীরম্মি–

“ঐহাকপু কেবিনেৎকী কমিতী অমত্তদা য়াওহনখিদে।

ফোরেন এফিয়র্সকী কমিতীদসু য়াওহন্দে

দিফেন্স কমিতীদসু য়াওহন্দে।

ইকোনোমিক এফিয়ার্সকী কমিতী শেম্বা মতম অদুদা ঐহাকপু শোয়দনমক্কী য়াওহল্লগনি হায়না খনলুই মরমদি ঐহাক ইকোনোমী অমসুং কমর্সকী মহৈরোই ওইরকপনা। অদুবু মদুদসু ঐহাকপু চিত্থবীরম্মি।” 

বাবা সাহেবকী মফমদা কংগ্রেসনা খল্লিবা অসি করিনো হায়বা চহি ৭০ মমাংদা উৎখ্রে।

মালেম অসিগী খ্বাইদগী ফরবা য়ুনিবর্সিতীদা তমলকখিবা মীওই অদুবু কংগ্রেসনা মীকুপ খুদিংগী ইকায়বা পীবীরম্মি।

থবক য়াম্না লৈতবা মন্ত্রালয় অমখক ইফমদা শিন্নবীরম্মি হায়না বাবা সাহেব মশামক্না হায়বীরম্মি। স্কিমশিং শেম্বগী থবক্তা শরুক য়ারগনি, মহাক্না খঙ হৈরুবা হিরম অদুগী কান্নবা লৈবাক অসিদা ফংহনগনি হায়না মহাক্না খনজরম্মি, অদুম ওইনমক মহাকপু ময়াম অসিদগী লাপ্না থম্বীরম্মি। মন্ত্রীমন্দল পাকথোক চাউথোকপা মতম অদুদা ফাওবা মন্ত্রালয় অমা হেক্তগী অহেনবা থবক  ফাওবা বাবা সাহেবকী মফমদা পীখিদে।

মরূপশিং,

বাবা সাহেবনা ফম থাদোকখিবগী অচৌবা মরম অমগা লৈরি। কংগ্রেসনা লৈবাক অসিগী দলিৎশিং, লৈবাক অসিগী শোত্থরবশিংগা লোয়ননা করি করম্বা মওং মতৌ উৎলিবগে হায়বা অদু মরম অসিনা তাক্লি।

মহাক্কী ৱারোলদা বাবা সাহেবনা ইবীরম্মি-

“সরকারদগী ঐহাক্না নীংবা কায়খিবগী মরম অদু হৌজিক ময়ামগী মফমদা পাউদমজগে। মসি শোত্থরবা অমসুং দলিৎশিংদা চৎথরিবা লমচৎ-সাজৎ অদুগা মরি লৈনৈ।

সংবিধানদা শোত্থরবা জাতিশিংগী ইন্তরেস্ত ঙাক শেন্নবা মতিক চাবা প্রোবিজন লৈতবা অসিগীদমক ঐহাক পেন্দবা ফাওই। থবক অসি কমিসন অমগী হায়জরকপগী খুত্থাংদা চত্থগদবনি।

সংবিধান চৎনখিবদি চহি অমা হেল্লক্লে অদুবু হৌজিক ফাওবা সরকারনা কমিসন এপোইন্ত তৌবগী মতাংদা করিগুম্বা অমত্তা খন্নবা লৈত্রি।” 

মরূপশিং,

 মতম অদুদগী হৌরগা ঙসি ফাওবা কংগ্রেসগী ৱাখল্লোনদা অহোংবা লৈত্রি। দাক্তর অম্বেদকর ফাওবা ফম থাদোকপা তাখি।

বাবা সাহেবনা ফম থাদোকখিবগী মরমদা ঐহাক্না ময়ামগী মফমদা শন্দোক্না হায়খিবগী মরমদি বাবা সাহেবপু লৈবাক অসিগী আইন মন্ত্রী ওইহনখি হায়না কংগ্রেসনা মীৎ থকহন্নীংঙাই ওইবা ৱাফমশিং শন্দোক্লি।

লো মন্ত্রী ওইহল্লবা মতুং কংগ্রেসনা বাবা সাহেবতা চৎখিবা লমচৎ-সাজৎ অদু ভারত মচা খুদিংমক্না খঙগদবনি। মরমদি, নীং তম্বা ফংলবা মতুংদগী কংগ্রেসকী ইকো-সিস্তেম অসি মওং অমদা শেমগৎলম্মি মদুনা ইমুং মনুং অমগী অকোয়বদা লৈখিরম্মি।

কংগ্রেসকী ইকোসিস্তেমগী মাংদা নোঞ্জখিদবা মখোয় অদু লাইরিকশিংদা ফাওবা মফম ফংখিদে।

মরুপশিং,

ইং ১৯৫১দা মন্ত্রীমন্দলদগী ফম থাদোক্লবা মতুং বাবা সাহেবনা ইং ১৯৫২দা লোক সভাগী মীখল থেংনখি।

মতম অদুদা কংগ্রেসনা মহাক্কী মায়োক্তা মীরেপ থাগৎপদা নত্তনা নেহরু মশামক্না বাবা সাহেবকী মায়োক্তা পব্লিসিতী তৌবা চৎখি। কংগ্রেসনা অরৈবা শক্তি শিজিন্নখিবনা মরম ওইদুনা বাবা সাহেব মায়থিবগী ইকায় ফিরুপ খুম্বা তাখি। 

মসিগী মতুং মহাক্না ইং ১৯৫৩দা ভন্দারা সীত্তা লোক সভাগী বাই ইলেক্সন থেংনখি। কংগ্রেসনা অমুক হন্না মহাক্কী মায়োক্তা মীরেপ থাগৎলম্মি। বাবা সাহেবপু অমুক হন্না লোক সভা য়ৌবদগী থিংলম্মি। লেপ্পা লৈতনা ইকায়বা ফংখিবা মতম অসিদা মহাক্কা লোয়নখিবা মীশক অদুদি দাক্তর শ্যামা প্রসাদ মুখর্জীনি। মহাক্না হোৎনবদগী বাবা সাহেব রাজ্য সভা য়ৌখি।

মরূপশিং,

ঐহাক্না কংগ্রেসকী মফমদা শিংনরিবা অসিনি।

বাবা সাহেবকীদমক মখোয়না তৌখিবা থবক অমত্তা হাইরকউ।

মখোয়না বাবা সাহেবপু ইকায় খুম্নদুনা পাংথোকখিবা থবক অমত্তা হাইরকউ।

 ইচল–ইচে অমসুং ইচিল ইনাওশিং,

কংগ্রেসকী নাক্তা মসিগী পাউখুম অমত্তা লৈতে হায়বা নখোয় ঐখোয়না খঙলে। পাউখুমগী মিংদা মখোয়না হায়গদবা অসি ওইদবা ঙাক্তনি। তশেংবদি বাবা সাহেবনা লৈখিদ্রবা মতুং লৈবাক অসি শেমগৎ শাগৎপদা মহাক্না লৌরম্বা থৌদাং অদু মুথৎনবা কংগ্রেসনা হোৎনরম্মি। নেহরুদগী হৌরগা রজীব গান্ধি ফাওবগী মতমদা কংগ্রেসনা মীওই কয়াবু ভরত রত্ন পীদুনা ইকায় খুম্নখ্রে, অদুবু মখোয়না কৈদৌনুংদা বাবা সাহেবপু ভারতকী রত্ন ওইনা খনখিদে।

বাবা সাহেবনা ভারত রত্ন ফংখিবা অসি ভি পি সিংহগী সরকার লৈরবা মতমদা, অতলজী, আদবানীজীনা মফমদা বাবা সাহেবপু ভারত রত্ন পীনবা আপিল তৌরবা মতম অদুদনি।

বি জে পিনা হোৎনদুনা সংসদকী সেন্ত্রেল হোলদা বাবা সাহেবকী অয়েকপা লাই থেৎলে। কংগ্রেসনা পাল্লিঙৈ মতমদা সেন্ত্রেল হোলদা বাবা সাহেবকী মফম অমত্তা লৈরমদে।

মরূপশিং,

করিগুম্বা ঐহাক লাইরবা অমসুং শোত্থরবা ইমুংদা পোক্লমদবা তারগদি বাবা সাহেবপু অসুক ময়েক শেংনা খঙবা ঙম্লমলোই। ঐহাক লাইরনা হৌরকই, জাৎ বিজাৎকী অথিবা ৱাহৈশিং তারক্লে। মরম অদুনা মতম অদুদা বাবা সাহেবনা করি করি মায়োক্নরমগনি হায়বা অদু ঐহাক খঙই। বাবা সাহেবকী মপাউখোলদগী, হয়েংদগী, হায়বদি মহাক্কী মপোক নুমীত্তগী, লৈবাক অসিদা গ্রাম স্বরাজ অভিয়ান হৌদোক্কদৌরে। ঐহাক ইশামকসু ছত্তীসগরগী বীজাপুরদা লৈগনি। হয়েংদগী লৈবাক অসিগী দিবেলপমেন্তা লৈরিবা খল মান্নদবা, হকশেলদা লৈরিবা খল মান্নদবা অদু মুথৎনবা অনৌবা পন্দুপ অমা হৌরগনি।

মরূপশিং,

হৌখিবা নুমীৎ নিনিদগী খন্ন-নৈনরিবা ৱাথোকশিং অদু তশেংনমক অফবা খুন্নাই অমগীদমক ইকায়নীংঙাইনি। ঐখোয়গী ফ্রীদম ফাইতরশিংনা লৈবাক অসিগী তুংগী য়াইফনবগীদমক কত্থোকপীরম্মি, মখোয়না কত্থোকপীরম্বা অদুদা ইকায়বা পীবনি।

সমাজ অমা ওইনা, লৈবাক অমা ওইনা ঐখোয় পুম্নমক মসিগীদমক ইকায়বা নংলে। লৈবাক অসিগী রাজ্য অমা হেক্তদা, রিজন অমা হেক্তদা থোক্লিবা অসিগুম্লবা থৌদোকশিং অসিনা ঐখোয়বু থুক লাওবা ফাওহল্লি। মরাল লৈবা অমত্তা লেম্না থারোই, অচুম্বা ফংগনি হায়না ঐহাক্না লৈবাক মীয়ামদা থাজবা পীজরি। ঐখোয়না সোসিয়েল ভেল্যুদগী হৌরগা লো অমসুং ওর্দর ফাওবা, পুম্নমকপু মসিগীদমক মপাঙ্গল কলহনবা তাই।

মতম অদুদতা ঐখোয়না বাবা সাহেবকী ভারত অদু ওইহনবা ঙমগনি, অনৌবা ভারত শেম্বা ঙমগনি।

ময়াম পুম্নমকপু বাবা সাহেবনা থৌজানবীবা ওইসনু, মহাক্কী ৱাখল্লোন অদুদগী ময়ামসু লেপ্পা লৈতনা পুক্নীং থৌগৎপা ওইবিয়ু। ৱাফম অসিগা লোয়ননা ঐহাক লোইশিনজরে।

ময়াম পুম্নমকপু, লৈবাক অসিগী মীপুম খুদিংমকপু অমুক হন্না দাক্তর অম্বেদকর নেস্নেল মেমোরিয়েলগীদমক য়াইফ পাউজেল পীজরি।

থাগৎচরি!!!