ভারতকী প্রধানমন্ত্রী

ঐগী নুংশিরবা ইরৈচাশিং, ঙসি নীংখা তম্বা নুমিৎকী শেংলবা থৌরম অসিদা অদোম ময়ামদা ঐগী য়াইফ-পাউজেল পীজরি। ঙসিদি লৈবাক অসি মশা মরোমদোম লেপচবা ঙম্লে। লৈবাক অসিগী মঙলানশিং মঙফাওননবা অকনবা ৱারেপ লৌদুনা থবক কন্না শুদুনা লৈবাক অসি অৱাংবা থাক অমা য়ৌবা ঙম্লে। ঙসিগী ওইরিবা মতম অসিনা অনৌবা থৌনা, অনৌবা হৈনীংবা, অনৌবা ইনোৎ অমসুং অনৌবা পাঙ্গল পুরক্লে।

ঐগী নুংশিরবা ইরৈচাশিং, ঐখোয়গী লৈবাক অসিদা, চহি ১২গী মনুংদা অমুক খক্তং শাৎপা নীলকুরিঞ্জী কৌবা লৈ অমা লৈরি। চহি অসিদা খা থংবা নীলগিরীগী চীংশিংদা নীলকুরিঞ্জী অসি মচু অহুমগী অশোক চক্রগুম্না নীংখা তম্বা নুমিৎ অসিদা শাৎলি।

ঐগী নুংশিরবা ইরৈচাশিং, উত্তরাখন্দ, হিমাচল, মণিপুর, তেলঙ্গনা অমসুং আন্ধ্রা প্রদেশকী ঐখোয়গী ইচানুপীশিংনা সমুদ্রা তরেৎ লান্দুনা মালেম শীনবা থুংনা কোইরুরবা মতুংদা ঐখোয়না মসিগী নীংতম্বগী কুম্মৈ অসি পাংথোক্লি। মখোয়না সমুদ্রা তরেৎতা মচু অহুমগী ফিরাল পাইহন্দুনা সমুদ্রা তরেৎ অদু মচু অহুম ওন্থোক্লবা মতুংদা মখোয় ঐখোয়গী নাক্তা হল্লক্লে।

ঐগী নুংশিরবা ইরৈচাশিং, মাউন্ত এভরেস্ত অসি কয়ারক কারুরবা, ঐখোয়গী থৌনা ফরবী ইচানুপীশিংনা মাউন্ত এভরেস্ত মতোন্দা মচু অহুমগী ফিরাল পাইহল্লুরবা মতুংদা ঐখোয়না নীংখা তম্বা নুমিৎগী কুম্মৈ অসি পাংথোক্লি। অদুবু, মসিগী নীংতম্বগী কুম্মৈ মনুং অসিদা ঐনা মনুং-হুঞ্জিনবা ঐখোয়গী উমংশিংদা লৈবা ঐখোয়গী ত্রাইবেল অঙাংশিংনা, মখোয়না মাউন্ত এভরেস্তা মচু অহুমগী ফিরাল পাইহনখিবা অদু নীংশিংলি।

ঐগী নুংশিরবা ইরৈচাশিং, হন্দক্তা রাজ্য সভা অমসুং লোক সভাগী মীফমশিং লোইশিনখ্রে অমসুং মীফমশিং য়াম্না মওং তানা চৎথবা অদোমনা উখ্রে অমসুং মীফম অদু খুন্নাইগী অচুম্বশিং পুরক্নবা কৎথোকখি।

য়াম্না মীৎশিং নাশিংবা উৎতুনা, ঐখোয়গী সংসদনা খুন্নাইগী শোৎথরবশিং য়াইফনবা খুন্নাইগী অচুম্বগী ঙাক্লৌ শেমগৎলে- মসি দলিৎ অমা ওইবা য়াই, তোল্লবা অমা ওইবা য়াই নৎত্রগা নুপী ওইবা য়াই।

চহি কয়াগী মমাংদগী ও বি সি কম্মিশন সংবিধানগী থাক্তা শক খঙনবা তকশিন্দুনা লাক্লি। হৌজিক ঐখোয়গী সংসদনা শোৎথরবা কাংলুপশিং অমসুং শাথিনা শোৎথরবা কাংলুপশিংগী য়াইফনবা ও বি সি কম্মিশন সংবিধানগী থাক্তা শক খঙলে।

নৌনা ৱাখল তারবা লৈবাক অমদা অনৌবা পাউ কয়া তাররবা মতমদা ঙসি ঐখোয়না নীংতম্বা নুমিৎকী কুম্মৈ পাংথোক্লি। ঙসিদি মালেমগী কাচিন কোয়াদা লৈবা ভারত মচাশিংনা ভারত অসি মালেমগী খ্বাইদগী চাউবা তরুকশুবা ওইরকপদা চাউথোকচবা পোক্লি। অসিগুম্বা অফবা থৌদোকশিংগী মরক্তা নুংঙাইবা মতম অমদা ঐখোয়না নীংখা তম্বা নুমিৎ পাংথোক্লি।

ইকাইখুম্নরবা বাপুগী লুচীং মখাদা, মীওই লাখ কয়া থৱায় কৎখি অমসুং মখোয়গী নহা ওইরিঙৈগী মতম ঐখোয়গী লৈবাক্কী নীংখা তম্বা ফংনবা জেলা লেনখি। অচৌবা য়াওল্লোই কয়া থৌনা ফনা শঙলিংবগী খুৎতা তাখি। ঙসি লৈবাক মীয়ামগী মহুৎ শীন্দুনা, ঐনা থৌনা ফরবা নীংতম লান্মীশিংদা ইকাইখুম্নবা উৎচরি অমসুং ঐগী থম্মোইনুংদগী মখোয়দা সেলুৎ পীজরি। মচু অহুমগী চিংলেম্বা ঙাক্নবা ঐখোয়গী লান্মীশিং অমসুং পেরামিলিতরী ফোর্সশিংনা মখোয়গী থৱায় কৎখিবা অদুনা হিংবা অমসুং শিবা ফাওবদা ঐখোয়গী ঙক ৱাংনা থাংগৎনবা ইথিল পীখি। মীয়াম্বু অশোই-অঙাম থোক্তনবা ঐখোয়গী পুলিসশিংনা অহিং-নুংথিল নাইদনা লৈবাক্কী থবক তৌরি।

লাল কিলাদগী মচু অহুম্না শাখি ওইদুনা, ঐনা লান্মীশিং, পেরা-মিলিতরী ফোর্সশিং অমসুং পুলিসশিংদা মখোয়গী কৎথোকপশিং অদুগীদমক সেলুৎ পীজরি। ঐগী য়াইফ-পাউজেল অসি মখোয়গা মতম চুপ্পা লোইনদুনা লৈসনু।

হৌজিক ঐখোয়না লৈবাক্কী মফম কয়াদা নোং ফজনা চুবা অমসুং ঈশিং ঈচাও থোকপগী পাউ তারি। মখোয়গী নুংশিজরবা মীওইশিং লৈখিদ্রবশিংদা মখোয়গীদমক লৈবাক অসিনা লেপ্লি হায়না ঐনা থাজবা পীরি। মসিগী মহৌশাগী খুদোংথিবা অসিদা মখোয়গী নক্নবা মীওইশিং লৈখিদ্রবশিংগী অৱাবদা ঐনা শরুক য়াজরি।

ঐগী নুংশিরবা ইরৈচাশিং,

মথং চহিদা জালিয়াংৱালাবাগ মীহাৎ চহি ১০০ মপুং ফারগনি। লৈবাক অসিগী নীংখা তম্বা পুরক্নবা অমসুং নৈহৎপীরবশিংগীদমক মীয়াম্না মখোয়গী থৱায় কৎখি। জালিয়াংৱালাবাগকী থৌদোক অসিনা থৱায় থাখ্রবা অথৌবশিং অদু ঐখোয়না নীংশিংহল্লি। অথৌবশিং অদু ঐগী থম্মোইনুংদগী ইকাইখুম্নবা উৎচরি।

ঐগী নুংশিরবা ইরৈচাশিং,

কন্না হোৎনরবা মতুংদা ঐখোয়গী নীংখা তম্বা ফংলকখিবনি। বাপুগী লমজিং মখাদা অমসুং য়াওল্লোইশিং, অথৌবশিং, সৈত্যগ্রহিশিং, অথৌবা নুপা অমসুং নুপীশিং অমসুং নহারোলশিংনা লৈবাক্কী নীংতম ইহৌদা শরুক য়াখি। লৈবাক্কী নীংখা তম্বা ফংনবা হোৎনবদা, মখোয় ফাদোক তাখি অমসুং মখোয়গী নহা ওইরিঙৈগী মতম কয়া কৈশুমশঙদা লেনখি অমসুং অৱা-অনা মরক্তা মখোয়না নুংঙাইবা ভারত অমগী মঙ মঙখি।

চহি কয়াগী মমাংদা, তামিলনাদুগী কবি, সুব্রমনিয়ম ভারতীনা মহাক্না লৈবাক্কীদমক খনজবা মঙ অদু ৱাহৈ ওইনা ইথোকখি –

“ইল্লারম অমরনিল্লাই এদুমনান

মুরাইয়ি ইন্দিয়া উলাগিরাক্কু আল্লিকুম”

নীংখা তম্বা ফংলবা মতুংগী নহাক্না করি মঙ মঙবগে? সুব্রমনিয়ম ভারতীনা হায়খি, মালেম পুম্বা অৱা-অনাদগী ঙাকথোক্নবা লম্বী অদু ভারতনা তাক্কদবনি।

ঐগী নুংশিরবা ইরৈচাশিং,

নীংখা তম্বা ফংলবা মতুংদা, অসিগুম্বা অচৌবা মীওইশিংগী মঙ মঙফাওননবা, নীংতম লান্মীশিংগী অনীংবশিং থুংনবা অমসুং লৈবাক্কী মীয়ামগী অপাম্বশিং ফংহন্নবা, ববা সাহেব অম্বেদকরগী লমজিং মখাদা খুদিংমক কোনশিনবা সংবিধান অমা ভারতনা শেম্লে। অপুনবা সংবিধান অসি অনৌবা ভারত অমা শেমগৎনবগী খুৎলায় অমনি। মসিনা ঐখোয়দা থৌদাং খরা শীন্নরে। ভারতকী কাংলুপ খুদিংমক অমসুং মফম খুদিংমক খুদোংচাবা চপ মান্ননা ফংনবা ঐখোয় খুদিংমক লমজিংলি।

নুংশিরবা ইচিন ইনাওশিং,

ঐখোয়গী মচু অহুমদগী ইথিল লৌনবা সংবিধান্না ঐখোয় লমজিংলি। মসিনা ঐখোয়না লাইরবশিংদা খুন্নাইগী অচুম্বা ফংহনগদবনি লাইরবশিং, ময়াই ওইরপ লাইরবশিং অমসুং অৱাংবা থাক্কী মীওইশিংনা চাউখৎলকপদা অপনবা পীরোইদবনি, খুন্নাইগী থবকশিংনা মখোয়গী মঙলানশিং থুগাইরোইদবনি। মখোয়গী খুদোংচাবশিং মপুং ফানা শাৎকাইনবা খুদোংচাবা ফজনা ফংহনগদবনি।

ঐখোয়গী অহলশিং ওইসনু, শোইনাইরবশিং, ঐখোয়গী নুপীশিং, তোল্লবশিং, লাইরবশিং, ঐখোয়গী অদিবাসীশিং ওইসনু মখোয়গী অনীংবশিং অদু ফংনবা খুদিংমক খুদোংচাবা ফংহনগদবনি। ঐখোয়না মশা মরোমদোম লেপচবা ঙম্বা, লেপ্তনা চাউখৎপা লৈবাক অমা ওইহনবা পাম্লি, মালেমদা অৱাংবা থাক্তা লৈবা ভারত অমা পাম্লি। মসি খক নত্তনা, মালেমদা ভারত অসি মীথোই মীহেনবা পাম্লি।

ঐগী নুংশিরবা ইরৈচাশিং, ঐনা মমাংদা তীম ইন্দিয়াগী মঙ অমা মীয়ামদা খঙহনখ্রে। ইরৈচা ক্রোর ১২৫গা পুন্না চৎমিন্নবা মতমদা, ঐখোয় খুদিংমক অমসুং নাগরিক খুদিংমক লৈবাক অসিগী চাউখৎপদা শরুক য়ামিন্নগনি। মঙলান ক্রোর ১২৫, ৱারেপ ক্রোর ১২৫, থবক ক্রোর ১২৫না মাংলোমদা অচুম্বা লম্বীদা চৎলবদি অপাম্বা পান্দম অদু ফংনবা হোৎনবদা ঙমলোইদবা লৈতে।

মরূপশিং, ঐনা খঙহনবা পাম্মি মদুদি, ২০১৪দা মীওই ক্রোর ১২৫দা সরকার শেম্নবা ভোৎ থাদরবা মতুংদা তুমিন্না লৈথোক্তে। সরকার শেম্বদা মীয়াম্না অপনবা পীদে, অদুবু মখোয় লৈবাক শেমগৎনবা থবক তৌখি। মখোয় অমত্তা ওইখি অমসু মখা তানা পুন্না থবক তৌখিগনি। খুঙ্গং লাখ ৬ হেনবগী নাগরিক ক্রোর ১২৫ অসিগী অপুনবা পাঙ্গল অসিগী ঐঙোন্দা ইথিল ফংলিবা অসি লৈবাক অসিগী অশেংবা পাঙ্গলনি। ঙসি ঐখোয়না শ্রী ঔরোবিন্দ্রোগী মপোক কুমওন থৌরম পাংথোক্লি। মহাক্না য়াম্না মরুওইবা অমা হায়খি, লৈবাক অমা হায়বসি করিনো? ঐখোয়গী ইমা লৈবাক হায়বসি করিনো?  মসি শুপ্নগী লম মচেৎ অদু নত্তে, মশক অদু নত্তে মসি ৱাখলনা শাজিনবা নত্তে। লৈবাক অমা হায়বসি মওং-মরিল তানা শেমগৎলবা খুজিংশিংগী অপুনবা পাঙ্গল অমনা চপ চাবা মওং অমা লৈহনবা অদুনি। শ্রী ঔরোবিন্দ্রোগী মসিগী ৱাখল অসিনা লৈবাক অসি অমত্তা ওইহল্লিবনি অমসুং লৈবাক অসি মাংদা পুখৎলিবনি। ঐখোয় কদাইদগী হৌরকপগে হায়বা খঙদ্রবদি ঐখোয় মাংলোমদা চংশিনবা ঙম্লোই। ঐখোয়গী খোঙচৎ কদাইদগী হৌরকখিবগে হায়বা ঐখোয়না য়েংদ্রবদি, ঐখোয় কয়া য়াম্না চৎলবগে হায়বা খঙবা ঙম্লোই। মসিনা মরম ওইদুনা, ২০১৩ অসি ঐখোয়না অহৌবা চহি ওইনা লৌনবা খন্নরি অমসুং হৌখিবা চহি ৪দা পায়খৎখিবা থবকশিং খন্নরি। হায়রিবা মতম অসিদা লৈবাক অসি কয়া য়াম্না চাউখৎলবগে হায়বা উবদা নহাক অঙকপা পোক্কনি। অমাংশঙগী থবকশিং য়েংশি। করিগুম্বা ঐখোয়না অমাংশঙশিং শাবগী থবক অসি ২০১৩গী থবক মওংদা পায়খৎলবদি, চাদা ১০০ ফংনবা হোৎনবদা চহি কয়া চংগনি।

করিগুম্বা ঐখোয়না ২০১৩গী থবক খুৎসুদা য়ুমফম ওইরগা খুঙ্গংশিংদা মৈ ফংহন্নবা হোৎনরবদি, মদু চহি ২০ হেন্না চংগনি। ২০১৩গী চাংদা ঐখোয়না য়ুমথোং খুদিংদা লেম্না এল পি জি গ্যাস পীনবা হোৎনরবদি মদু চহি ১০০গী মনুংদা লোইশিনবা ঙম্লোই। খুঙ্গংশিংদা ওপ্তিকেল ফাইবর তিংবগী থবক অসি ২০১৩গী থবক মওংদা পায়খৎলবদি থবক অসি মীরোল কয়া চংনা লোইশিনবা ঙম্লোই। হৌজিক লৈরিবা চাউখৎপগী খোংজেল অসিদা চৎনবা হোৎনগনি।

মরূপশিং, লৈবাক অসিগী দরকার ওইবা কয়া লৈরি, মসি মেনখৎনবা  কেন্দ্র সরকার অমসুং রাজ্য সরকার অনিমক্না লেপ্তনা পুন্না থবক তৌমিন্নবা অমা দরকার ওইরি। লৈবাক অসি চপ মান্নরবসু, লৈবাক-লৈহাও অমত্তা ওইরবসু, নুংশিৎ চপ মান্নরবসু, অতিয়া চপ মান্নরবসু, সমুদ্রা চপ মান্নরবসু, সরকারগী ওফিসশিং চপ মান্নরবসু, ফাইলশিং অমসুং ৱারেপ লৌবগী থৌওংশিং চপ মান্নরবসু ঙসিদি লৈবাক অসিদা য়াম্না চাউনা অহোংবা লাকপা উরে। অদুবু, লৈবাক অসি হৌখিবা চহি ৪ অসিদা অহোংবা লাকখিবনি। অনৌবা থৌনা, অনৌবা শক্তি, অনৌবা ৱারেপ, অনৌবা ফিরেপ অমসুং অনৌবা ইথিলনা লৈবাক অসি মাংদা পুদুনা চৎলি। মরম অসিননি লৈবাক অসিদা হায়ৱে শেম্বা শরুক অনি হেনগৎলিবা। খুঙ্গংশিংদা য়ুম শাবা শরুক মরি হেনগৎলে। লৈবাক অসিদা চানবা মহৈ-মরোং পুথোকপা খ্বাইদগী ৱাংলে। মোইবাইল ফোনশিং অমসুং ত্রেক্তর পুথোকপা হেনগৎলে। অমরোমদা, ঙসিদি ঐখোয়গী লৌমীশিংনা ত্রেক্তর মশীং য়াম্না লৈরে, মসিগা লোয়ননা লৈবাক অসিনা নীংখা তম্বা ফংলকপদগী এরোপ্লেন মশিং খ্বাইদগী য়াম্না লৈরে। স্কুলশিংদা অমাংশঙশিং শারে, অনৌবা আই আই এমশিং, অনৌবা আই আই তিশিং, অনৌবা এ আই আই এমশিং লিংখৎলে। লৈবাক অসিদা স্কিল দিবেলপমেন্ত মিশন পায়খৎতুনা অপীকপা শহরশিংদা অনৌবা সেন্তরশিং লিংখৎলে। তয়র ২ অমসুং তয়র ৩গী শহরশিংদা স্তার্তঅপশিংগী ঈচাউ থোক্লে।

মরূপশিং, হৌজিক দিজিতেল ইন্দিয়া অসি ঐখোয়গী খুঙ্গংশিং য়ৌরে। মীয়ামগী দরকার ওইবশিং সরকারনা খঙলদুনা, দিজিতল ইন্দিয়া অসি তশেংনা পায়খৎনবা কন্না হোৎনরি। ঐগী মীমান্নদ্রবা ইনাওশিং, ইচলশিংগী মীয়াম্না য়ানরবা খুদমশিংগী দিক্সনারী অমা পুথোক্নবা হোৎনরি। ঐখোয়গী লৌমীশিংনা মতমগা চুনরবা মাইক্রো ইরিগেসন, দ্রিপ ইরিগেসন অমসুং স্প্রিঙ্কলর শীজিন্নরে, অচৌবা ইরিগেসনগী প্রোজেক ৯৯সু অমুক শেমগৎলে। মহৌশাগী খুদোংথিবা থোকপা মতমদা ঐখোয়গী লান্মীশিংনা তেংবাং পীবা অমসুং মী কনবগী থবক্তা শরুক য়ারি। ঐখোয়গী লান্মীশিংনা খুদোংথিবা নংলবশিংদা মতেং পাংবগী থৌনা উৎপগা লোয়ননা মখোয়না অকনবা ৱারেপ লৌদুনা সর্জিকেল স্ত্রাইক পাংথোক্তুনা ঐখোয়গী য়েক্নবশিং মাঙহল্লি।

ঐখোয়গী লৈবাক্কী চাউখৎপশিং অসি মফম অমদগী মফম অমা ফাওবা য়েংবদা, লৈবাক অসি অনৌবা শক্তি অমগা লোয়ননা চাউখৎপা কনাগুম্বা অমনা উবা ফংগনি। ঐ গুজরাৎতগী হৌরকখিবনি। গুজরাতিদা হায়নবা অমা লৈ, ‘মীওই অমগী পান্দম অমসুং অনীংবা য়াম্না চাউগদবনি’। অদুবু মদুগীদমক কনাগুম্বা অমনা থবক কন্না শুগদবনি অমসুং ঙম্নবা থবক তৌগদবনি। করিগুম্বা ঐখোয়গী পান্দম অদু চাউদ্রবা,পান্দমশিং উবা ঙমদ্রবদি ,ৱারেপশিং লৌদ্রবদি । চাউখৎপা থিন্থগনি। ঐগী নুংশিরবা ইরৈচাশিং, মরম অদুনা ঐখোয় অচৌবা পান্দমগা লোয়ননা মাংদা চংশিনবা মথৌ তাই। ঐখোয়গী পান্দমশিং ময়েক শেংদ্রবা, ঐখোয়গী থৌনা লৈত্রবা, অদুদগী  ঐখোয়গী খুন্নাইগী মরুওইবা ৱারেপশিং লৌবদা চহি কয়া চংগনি। ইকনোমীস্তশিং, লৌমীশিংগী লুপশিং , লৌমীশিং অমসুং রাজনিতি দলশিংনা লৌমীশিংগী এম এস পি অসি মখোয়না থাদখিবা শেনফমগী শরুক ১.৫ ওইহনগদবনি হায়না তকশিন্দুনা লাক্লি। ৱাফম অসি চহি কয়া মরৈ য়েৎনদুনা লাকখি। কাইনথংদা ঐখোয়না ৱারেপ লৌরে। লৌমীশিংদা মখোয়না থাদখিবা শেনফমগী শরুক ১.৫ এম এস পি পীনবা ঐখোয়না অচৌবা ৱারেপ অমা লৌরে।

ময়াম্না জি এস তি য়ানরে। মী খুদিংমক্না জি এস তি য়ানরবসু মখোয় খরনা মশাগী খনবা অমসুং মসি মীখলগী খুদোংচাবা লৌনবা হোৎনবা য়াওরি। ঙসিদি অপীকপা  ললোনবশিংনা জি এস তি অসি থম্মোই শেংনা চৎনরে। ললোন-ইতিক তৌবশিংদা অনৌবা থাজবা অমা লৈরে। অপীকপা ওন্ত্রেপ্রেনিউয়রশিং, অপীকপা ললোনবশিংনা জি এস তি চৎনবদা থেংনবা খুদোংচাদবশিং মায়োক্নদুনা জি এস তি চৎনরি অমসুং লৈবাক অসি মাংলোমদা চৎখৎলি।

ঙসিদি, ঐখোয়না বেঙ্কিং সেক্তর চাউখৎনবা ইন্সোলভেন্সি অমসুং বেঙ্করপসিগী লোশিং চৎনহল্লে। মমাংদা মসিগী মাইয়োক্ত কননা লৈখি ? ৱারেপ অমা লৌবা মতমদা ফজনা থাজবা অমসুং  মীচম মীয়ামগী খনবা অমা দরকার ওই। করিগীদমক মমাংদা বেনামি প্রোপরতি এক্ত চৎনরমদ্রিবনো ? লৈবাক্কীদমক করিগুম্বা খরা তৌরে হায়বগী থৌনা লৈরবা অমসুং ফিরেপ লৌরবা মতমদা বেনামি প্রোপরতি এক্ত অসি চৎনহনখিবনি। ঐখোয়গী লান্মীশিংনা চহি কয়াগী মমাংদগী ৱান রেঙ্ক ৱান পেন্সন তকশিন্দুনা লাক্লি। মখোয় থকশি-খাশি লৈবা মরম্না মখোয়না খোঙজং চংশিনখিদে , অদুবু মখোয়গী খোল্লাউ কনা অমত্তানা তাবীখিদে। হিরম অসিগী মতাংদা কনাগুম্বা অমনা ৱারেপ অমা লৌবা দরকার ওই। মসিগী ৱারেপ লৌনবা অদোমনা ঐখোয়দা থৌদাং শীন্নরে অমসুং মসি ঐখোয়না মপুং ফাহল্লে।

মরূপশিং,

ঐখোয়গী দলগী য়াইফনবদা খলবা অদুগুম্বা মখলগী মীওই অদু নত্তে। লৈবাক্কী য়াইফনবনা মরুওইনা লৌদুনা ঐখোয়না মরুওইবা অরুবা ৱারেপ কয়া লৌরি।

মরূপশিং,

মালেমগী শেন-থুমগী মতম অসিদা, মালেম পুম্নমক্না অপীকপা নৎত্রগা অচৌবা ওইগেরা ভারতকী চাউখৎপদা থৱায় য়াওনা অমসুং য়াম্না থাজনা য়েংলি। হিরম অসিদা মচিন চৎপা মালেমগী লুপশিংনা  অমসুং অচৌবা ইকনোমীস্তশিংনা  ২০১৪ গী মমাংদা ভারতকী মরমদা হায়খিবা ৱাফমশিং অদোম্না হৌজিক ফাওবা নীংশিংলমগনি। ভারতকী শেন-থুম অসি য়াম্না খুদোংথিনীংঙাই ওই হায়না অখঙ-অহৈশিংনা হায়নবা মতম অমা লৈখি। অদুবু হৌজিক্তি চপ মান্নবা অখঙ-অহৈশিং অমসু লুপশিং অদুনা ঐখোয়গী অওনবশিং অসিদা থাজবা থম্লে। অহোংবশিং অসি কমদৌনা লাকখিবনো?  মতম অমদা মালেম্না ভারতকী রেৎ তেপকী মতাংদা ঙাংনবা অমা লৈখি অদুবু হৌজিক মখোয়না রেৎ কারপেৎকী মরমদা ঙাংনরে। ললোন-ইতিক তৌবা নুংঙাইবগী রেঙ্কতা হৌজিক ঐখোয় রেঙ্ক ১০০ শুবা মফমদা লৈরে। ঙসিদি, মালেম পুম্নমক্না মাইপাকপা অসিদা কল্লকপগা লোয়ননা য়েংলি। মতম অমদা ভারত অসি থৌশিল হৈতবা অমসুং অওনবা পুরকপদা থেংবা লৈবাক অমনি হায়না মালেম্না লৌনরম্মি। মসি অরিবা পাউচেশিংদগী উবা ফংগনি। অদুবু ঙসিদি, মালেমনা ভারত্তা য়েংলিবা মীৎয়েং অসি হোংলে অমসুং মখোয়না ঐখোয়গী অওনবা, থবক অমসুং অহোংবশিংদা মীৎয়েং থম্লি। মসি অকক্নবা মতমগী মনুংদা ৱারেপ কয়া মথং মথং লৌরকপদগী ওইরকপনি। ভারত অসি মচেৎ তারবা মঙাগী মনুংদা য়াওরে হায়না মালেম্না হায়নবা মতম অমা লৈরম্মি। ভারতনা মালেমগী শেন-থুম চাউখৎপদা খুরৌ থাংলে হায়নরম্মি অদুবু হৌজিক মখোয়গী ৱাখল অদু হোংলে অমসুং ভারত অসি দোল্লর ত্রিলিয়ন কয়া থাদফম ওইরে।

নুংশিরবা মরূপশিং,

ভারত্তা শেল থাদরমদাইদা ইনভেস্তরশিংনা মচাক-মথুমশিংগী অৱাৎপশিং, মৈগী অৱাৎপশিং অমসুং খুদোংচাদবা কয়া পুথোরকখি। মমাংদা ভারত অসি অতুম্বা শামু অমনি হায়খিবা অখঙ-অহৈশিং অদুনা হৌজিক ভারত অসি মিকপ থোরক্লবা অতুম্বা শামু অমনি অমসু চেনবা হৌরকলে হায়রি। লাক্কদৌরিবা চহিশিংদা ভারতনা মালেমগী শেন-থুমদা অচৌবা ইনোৎ পীগনি হায়না ইকনোমীস্তশিং অমসুং মালেমগী লুপশিংনা হায়রি।

ঙসিদি, মালেমগী থাক্তা ভারতকী ফিবম য়াম্না ফগৎলে। লৈবাক অসিনা মেম্বর ওইরিবা মালেমগী লুপশিংনা ভারতকী ৱা তারে। হায়রিবা লুপশিং অসিদা ভারতনা লমজিংবদা অমসুং ৱা তানবদা মরুওইবা থৌদাং লৌরি। মালেমগী থাক্ত ঐখোয় মচিন চৎপা হেনগৎলক্লি।

ঐগী নুংশিরবা ইরৈচাশিং, চহি কয়া ঐখোয়না মালেমগী লুপ খরগী মেম্বর ওইনা ঙাইদুনা লাকখি, অদুবু ঙসিদি, ঐখোয়গী লৈবাক অসি মশিং খঙদবা লুপশিংগী মেম্বর ওইরে। মালেমগী ওইনা শাবা হেনগৎলকপা অমসুং অকোইবগী ফিবমগী মতাংদা নুংনাংবা পোক্লিবশিংদা ভারতনা থাজবা পীরি। ঙসিদি ভারতনা মালেমদা ইন্তরনেসনেল সোলার এলাইন্সগী মকোক ওইরে। ঙসিদি মালেমগী লৈবাক খুদিংমক্না মখোয়গী লমদা ভারত মচা অমা হেক্তা লাকহন্নিংবগী অপাম্বা লৈরে। অনৌবা হোংলক্লিবা অসি মখোয়না ভারতরোমদা য়েংলকপা মতমদা মখোয়গী মীৎতা উবা ফংই। ভারতকী পাসপোর্তকী মপাঙ্গল অসি শরুক কয়া হেনগৎলে।

ঐগী নুংশিরবা ইরৈচাশিং, করিগুম্বা মালেমগী মফম অমা লৈরিবা ভারত মচাশিংনা খুদোংথিবা তারকপা মতমদা, মহাক্কীদমক মহাক্কী লৈবাক লৈরি হায়বা মহাক্না খঙদবনি। মসিগী থবক অসি হন্দক থোকখিবা থৌদোকশিং অদুনা উরবনি।

ঐগী নুংশিরবা ইরৈচাশিং, মালেম্না ভারত্ত য়েংলিবা মীৎয়েং হোংলকপগা লোয়ননা, মসিগা চপ মান্ননা ভারতকী অৱাং-নোংপোক্কী পাউনা পুমথন থনবা মতম অমা লাক্লে। ঙসিদি অৱাং-নোংপোক্কী অফবা অমসুং নুংঙাইবা ৱারি কয়া থোরক্লে। ঙসিদি, অৱাং-নোংপোক অসি শান্ন-খোৎনবদা মশেক-মঙাল থোক্লে।

ঐগী নুংশিরবা মরূপশিং, ঙসিদি ঐখোয়না অৱাং-নোংপোক্কী ইকোন কোনবা খুঙ্গং মৈ ফংহনখিবা অমসুং খুঙ্গং অদু অহিং চুপ্পা হরাওনা জগোয় শাখিবগী পাউ তারে। অসিগুম্বা পাউশিং ঐখোয়না অৱাংন-নোংপোক্তগী হায়ৱেজগী মরমদা, রেলৱেজগী মরমদা, ঈশিং লম্বীগী মতাংদা, মৈ ফংহনবগী মতাংদা তারি। ঙসিদি অৱাং-নোংপোক্কী নহারোলশিং মখোয়গী লমদা বি পি ওশিং লিংখৎলে। ঙসিদি, অৱাং-নোংপোক্তা অনৌবা মহৈ তমফমশিং লিংখৎলে অমসুং অৱাং-নোংপোক ভারত অসি ওর্গানিক ফারমিংগী মফম অমা ওইরে। অৱাং-নোংপোক্তা ইস্পোর্ত য়ুনিভর্সিতি লিংখৎলগনি।

মরূপশিং, অৱাং-নোংপোক্না দিল্লি অসি য়াম্না লাপ্না খনবা মতম লৈরম্মি। চহি মরি অসিগী মনুংদা, ঐখোয়না দিল্লি অসি অৱাং-নোংপোক্কী থোঙ্গালদা থম্লে।

মরূপশিং, লৈবাক অসিগী অপুনবা মীশিংগী চাদা ৬৫ দি চহি ৩৫ মখাগী মীওই ঙাক্তনি। ঐখোয়গী লৈবাক্কী নহারোলশিং অসিগীদমক ঐখোয়না চাউথোকচৈ। ঐখোয়গী নহারোলশিংনা শেন-থুমগী ৱাহন্থোক অসি মপুংফানা  অওনবা পুরকপা ঙম্লে। লৈবাক অসিগী চাউখৎপদা মখোয়না অনৌবা মচুশিং হাপচিল্লে। মতম অমদা অচৌবা শহরশিং খক্তদা চাউখৎপগী ফিবম অমা লৈরম্মি। হৌজিক্তি ঐখোয়গী লৈবাক অসিনা তয়র ২ অমসুং তয়র ৩গী শহরশিংগী ৱারি শানবা হৌরে অমসুং খুঙ্গংগী নহারোলশিংনা অনৌবা মতমগী লৌউ-শিংউগী থবক পায়খৎলক্লিবা অসিদা মীৎয়েং থম্লি। ঐখোয়গী নহারোলশিং অসিনা থবক ফংবগী মওং অসি ফজনা হোংদোক্লে।

ঙসিদি লৈবাক অসিগী নহারোলশিংনা ষ্টার্দ-অপশিং, বি পি ওশিং,ই-কর্ম্মসশিং পায়খৎতুনা লৈবাক অসি অৱাংবা থাক অমদা পুখৎলে।

ঐগী নুংশিরবা ইরৈচাশিং, মুদ্রা লোন ক্রোর ১৩ অসি অচৌবা মাইপাকপা অমনি। মসিগী মনুংদা নহারোল ক্রোর ৪দি পুন্সিগী অহানবা ওইনা মশা মরোমদোম লেপচবা ঙম্নবা পান্দমদা লোন লৌবনি। মসিমক শেন-থুমগী ফিবম ফগৎলকপগী অচৌবা খুদম অমনি। দিজিতেল ইন্দিয়াগী মঙলান অদু মঙফাওননবা নহাওইরিবা নুপামচা অমসুং নুপীমচা কয়ানা খুঙ্গং লাখ ৩ হেনবদা কম্মন সর্বিস সেন্তরশিং লিংখৎলে। হায়রিবা সেন্তরশিং অসিনা ইনফোরমেসন তেক্নোলোজিগী মতেংনা মালেমগী মফম অমগা মতম অমদা হেক্তা খুঙ্গংশিংগী মীয়ামগা শম্নবা ঙমহল্লে।

রেল, হায়ৱেজ, আই-ৱেজ নৎত্রগা অনৌবা এয়রপোর্ত অমা ওইগেরা মচাক –মথুমশিং শেমগৎপগী থবক্তা ঐখোয়গী লৈবাক অসি য়াংনা চাউখৎলি।

মরূপশিং, ঐখোয়গী লৈবাক্কী মীংচৎ পুরক্নবা ঐখোয়গী সাইন্তিস্তশিংনা হোৎবা য়াবা পুম্নমক হোৎনরি। মালেমগী ওইনা য়েংবদা, অমদি ঐখোয়গী দরকারগী মতুংইন্না, য়াম্না চাউথোকচনীংঙাই ওইবা মওংদা মালেম পুমঙক ঙকহন্দুনা ঐখোয়গী সাইন্তিস্তশিংনা অমুক্তদা সেতিলাইদ ১০০ থাগৎখ্রে।  ঐখোয়গী সাইন্তিস্তশিংগী তৌবা ঙম্বা অসিদা মালেম পুম্বনা থাগৎনখি। অহানবা হোৎনবদা মাইপাক্না মঙ্গালয়ান থাগৎখিবা অসিনা ঐখোয়গী সাইন্তিস্তশিংগী হৈশিংবা অদু খঙবা ঙম্লে। ঐখোয়গী সাইন্তিস্তশিংনা অহানবা ওইনা এন এ ভি এল সি – ইন্দিজিনস ইন্দিয়ান রিজনেল নেভিকেসন সেতিলাইত সিষ্টেম (আই আর এন  এস এস ) থাগৎনবা থৌরাং তৌরিবা অসিদা থাজবা থম্লি। মসিগী নেভিকেসন সিস্তেম অসিনা সেতলাইতগী মতেংনা ঐখোয়গী ঙামীশিং অমসুং মীয়াম লমজিংলগনি।

ঐগী নুংশিরবা ইরৈচাশিং, ঙসি ঐনা রেৎ ফোর্ত অসিদগী নুংঙাইবা পাউ অমা তাহন্নিংই। ঐখোয়গী লৈবাক অসি স্পেসকী মিশনশিংদা চিংননীংঙাই লৈতনা খুমাং চাউশিল্লি। অদুবু ঐখোয়গী সাইন্তিস্তশিংগী মঙ অমা লৈরি, ঐখোয়গী মঙ অমা লৈরি। ঐখোয়না ৱারেপ লৌরে মদুদি, ২০২২দা ভারতনা ৭৫শুবা নীংখা তম্বা নুমিৎ পাংথোকপদা নৎত্রগা মসিগী মমাংদা ঐখোয়গী নহাওইরিবা নুপামচাশিং অমসুং নুপীমচাশিংনা সুন্দ্রংদা মচু অহুম পাইহনগনি। ঐখোয়গী সুন্দ্রংদা মী থাবগী মিশনগী শরুক অমা  ওইনা  য়াম্না থুনা ঐখোয়না সুন্দ্রংদা ভারতকী মী অমা থারগনি। মসি ঐখোয়গী সাইন্তিস্তশিংনা হোৎনবদগী পাংথোক্কদবনি অমসুং ঐখোয় চাউথোক্না সুন্দ্রংদা মী থাবা ঙম্বা মালেমগী মরিশুবা লৈবাক ওইরগনি।

মরূপশিং, অসিগুম্বা মাইপাকপা অসিগীদমক ঐনা ঐখোয়গী সাইন্তিস্তশিং অমসুং তেক্নিসিয়ানশিং থাগৎলি। ঙসিদি ঐখোয়গী কৈ কয়া  মহৈ-মরোংনা পীক থল্লে। চহি কয়া গ্রিন রিভোলুসন মাইপাক্না পায়খৎপগীদমক ঐনা থম্মোই শেংনা ঐখোয়গী লৌউ-শিংউগী সাইন্তিস্তশিং অমসুং লৌমীশিং থাগৎলি।

মরূপশিং, হৌজিক মতম অসি হোংলে। ঐখোয়গী লৌমীশিং অমসুং লৌউ-শিংউগী সাইন্তিস্তশিং মালেমগী শিংনরকপা অমসুং চাংদম্নবশিং মায়োক্নবা তাবনি। মীশিং হেনগৎলক্লি অমসুং লম পীকশিল্লক্লি। মরম অদুনা ঐখোয়গী লৌউ-শিংউবগী মওংশিং মতমগা চুনবা অমদি সাইন্তিফিক ওইবা মওংদা পায়খৎপা দরকার ওইরি। ঐখোয়না থৌরাং অসি তেক্নোলোজিগা লোয়ননা পায়খৎকদবনি। মসিনা মরম  ওইদুনা ঐখোয়না লৌউ-শিংউবগী লমদা মতমদা চুনবা পাম্বৈশিং পায়খৎনবা মীৎয়েং থম্লি।

৭৫শুবা নীংখা তম্বা চহিদা লৌমীশিংগী শেন্থোক শরুক অনিদা হেনগৎহন্নবা ঐখোয়না পান্দম থম্লি। মীওই খরনা চিংনবা লৈরি, মসি মহৌশানি, অদুবু ঐখোয়গী অচেৎপা ফিরেপ লৈরি। ঐখোয়না ইরাই লাইনা ৱাশক্তে। ঐখোয়না ঐখোয়গী হায়দোকখিবা ৱা ঙাক্কনি। ঐখোয়গী ৱাশক ঙাক্নবা, ঐখোয় থবক কন্না শুগনি, ঐখোয়না থৌরাং তৌগনি অমসুং মসি ফংনবা ঐখোয়না থৱায় হকচাং য়াওনা থবক তৌগনি। নীংখা তম্বা চহি ৭৫ শুবা মতমদা ৱাশকশিং অসি ঙাকপা ঙম্নবা লৌউ-শিংউগী লমদা মতমগা চুনবা থবক পায়খৎতুনা লৌমীশিংগা লোয়ননা পুন্না থবক তৌমিন্নগনি। মরুদগী হৌরগা কৈথেল ফাওবদা ঐখোয়না মগুন হেনগৎহনবা পাম্মি। অনৌবা মহৈ-মরোং খর পোৎথোক য়াম্না পুথোকলে। ঐখোয়গী লৌমীশিংনা মালেমগী  চাংদম্নবা অসি ঙম্নবা অহানবা ওইনা ঐখোয়না এগ্রিকলচর এক্সপোর্ত পোলিসি শেম্নবা থৌরাং তৌরি। ঙসিদি ঐখোয়না অনৌবা লৌউ-শিংউগী অওনবা অমা উবা ফংলে। ওর্গানিক ফারমিং, ব্লূ রিভোলুসন, স্বিৎ রিভোলুসন অমসুং সোলর ফার্মিংনা অনৌবা ৱাখলশিং পুথোক্লে।

অচৌবা অপেনবা অমা ওইনা ঙসিদি ঐখোয়গী লৈবাক্না মালেমদা অনিশুবা খ্বাইদগী য়াম্না ঙা পুথোকপা ওইরে অমসুং মকোক থাগদবা খজিক্তা ঙাইরে। খোইহি পুথোকপা শরুক অনি হেনগৎলে।  ইথানোল পুথোকপা শরুক অহুম হেনগৎপদগী চু থাবা লৌমীশিং হরাওরে।  লৌউ-শিংউবগা মরি লৈনবা ললোন-ইতিক্কী থবকশিং অসি খুঙ্গংগী ইকনোমীগী শরুক অমা ওইনা য়াম্না মরুওইরে। নুপী সেল্ফ হেল্প গ্রূপশিংগী খুৎথাংদা লুপা ক্রোর কয়া থাদদুনা ঐখোয়না খুঙ্গং শেমগৎলি।

খাদি অসি বাপুগী মিংগা লোয়ননা চৎমিন্নরি। নীংখা তম্বা ফংবদগী খাদি য়োনবা শরুক অনি হেনগৎলে হায়না ঐনা মীয়ামদা খঙহনবা পাম্মি। মসিনা লাইরবশিংদা থবক ফংহল্লে।

মরূপশিং, ঐগী লৈবাক্কী লৌমীশিং হৌজিক নুমিৎকী মৈশাদগী মৈ পুথোকপা হৌরে। মৈ পুথোকপা খক নত্তনা , মখোয়না নুমিৎতগী পুথোকপা মৈ য়োন্দুনা শেন তানবা হৌরে। তরেং লৈরিবশিং, য়োংখমদা ফি শারিবশিং মখোয়গী হিংনবা পুকচাক তাল্লি।

মরূপশিং, ঐখোয়গী লৈবাক্তা শেন-থুম চাউখৎপা অসি য়াম্না মরুওই। মসিদগী হেন্না মরুওইবদি মীওইবগী চিংলেম্বা অসিনি। মীওইবগী চিংলেম্বা য়াওদনা, লৈবাক অমনা চাং মান্ননা চাউখৎপা ওইথোক্লোই। মরম অদুনা মীওইবগী চিংলেম্বা ঙাক্নবা ঐখোয়না স্কিম কয়া হৌদোকতুনা মীয়ামগী পুন্সি ইকাইখুম্ননা হিংবা ঙমগনি। পায়খৎলিবা থৌশিলশিং অসি মীচম মীয়াম, লাইরবশিংদগী খ্বাইদগী লাইরবশিং চিংলেম্না হিংনবা খুদোংচাবা ফংগদবনি।

মরম অদুনা ঐখোয়না উজ্জৱালা স্কিমগী খুৎথাংদা লাইরবশিংদা গ্যাস কন্নেক্সন পীরে। শৌভাগ্য স্কিমগী খুৎথাংদা ঐখোয়না লাইরবশিংদা মৈ ফংহল্লে। ‘সরমেভা জয়াতে’ হায়বা ৱাখল্লোন অসিদা মাংলোমদা চৎখৎনবা ঐখোয়না থবক পায়খৎলি।

ঙরাং, ঐখোয়না রাষ্ট্রপতিনা লৈবাক্কী মীয়ামদা পীবা পাউজেল তারে। মহাক্না গ্রাম শ্বারাজ অভিয়ানগী মরমদা কুপ্না ফোংদোকখি। সরকারগী মতাংদা ৱারি শানরকপা মতমদা, থৌশিলশিং শেম্লগা মদু থবক ওইনা পাংথোক্তবগী ৱারি লিনরি। দিল্লিদা হৌদোকখিবা খোঙজং অসিনা ফগৎলক্লিবা জিলাশিংগী খুঙ্গং ৬৫০০০দা হৌজিক শন্দোক্লে, মসিনা লাইরবশিং য়ুমশিং অমসুং চাউখৎত্রিবা খুঙ্গংশিংদা মতৌ করম্না থবক তৌবগে হায়না রাষ্ট্রপতিনা শন্দোক্না তাকখি।

ঐগী নুংশিরবা ইরৈচাশিং, ২০১৪দা ঐনা রেৎ ফোর্ত্তগী লু-নানবগী মতাংদা ৱা ঙাংবা মতমদা মী খরনা নোক্নখি। কনাগুম্বা খরনা হায়খি, সরকারনা তৌগদবা থবক য়াম্না লৈরি, করিগী লু-নানবগী মতাংদা ৱা ঙাংদুনা ইনর্জি মাংহল্লিবনো । নুংশিরবা মরূপশিং, হন্দক দব্লিউ ঐচ ওগী পাউদম অমগী মতুংইন্না লু-নানবগী খোঙজং অসিনা মরম  ওইদুনা অঙাং লাখ ৩গী পুন্সি কনবা ঙম্লে হায়রি। অঙাং লাখ ৩গী পুন্সি কনবগী মনা অসি খোঙজং অসিদা শরুক য়ারিবা ভারত মচা

খুদিংমক্তা পীজরি। লায়রবা অঙাং লাখ ৩গী পুন্সি কনবা হায়বসি মীওইবগী মীনুংশিংগী অচৌবা থবক অমনি অমসুং মালেমগী লুপশিংনা মসি মশক খঙলে।

মরূপশিং, মথং চহিদা মহাত্ম গান্ধীগী চহি ১৫০ শুবা মপোক কুমওন থোক্লে। বাপুনা মহাক্কী মতমদা নীংতম্বগী লু-নানবনা হেন্না মরুওইনা লৌখি। মহাক্না ঐখোয়দা হায়গনি মদুদি সৈত্যগ্রহি অমসুং শ্বাচচতা অনিনা ঐখোয়গী নীংখা তম্বা ফংলকখিবনি। গান্ধীজিনা সৈতয়গ্রহিশিং ত্রেনীং পীখি অমসুং মসিনা ঐখোয়দা শ্বাচগ্রহিশিং শেম্নবা ইথিল পীখি। মথংদা ঐখোয়না মহাক্কী চহি ১৫০ শুবা মপোক কুমওন পাংথোক্কনি, চগ্রহি ক্রোর কয়ানা বাপু নীংশিংবা ওইনা থবক ওইনা কৎকনি। মসিগী মওং অসিনা  ঐখোয়না হৌজিক ভাব তারক্লিবা মহাক্কী মঙলানশিং অদু মঙফাওনহনগনি।

মরূপশিং, লু-নানবনা মরম ওইদুনা অঙাং লাখ ৩গী পুন্সি কল্লে হায়বসি অচুম্বা অমনি। ইনাকখুনবা ইমুং ওইগেরা নৎত্রগা লায়রবা ইমুং ওইগেরা, করিগুম্বা ইমুং অমগী মীওই অমা নারকপদা ইমুং পুম্বা ৱাই। থৌদোক খরদা মীরোল কয়া নাবা য়াওই।

মীচমশিং অমসুং লাইরবশিং অরুবা অনাবশিং লেম্না লায়েংনবা অমসুং অচৌবা হোস্পিতালশিংদা লেম্না মিং চন্নবা প্রধান মন্ত্রী জন অরোগয়া অভিয়ান হৌদোক্নবা সরকারনা ৱারেপ লৌরে। প্রধান মন্ত্রী জন অরোগয়া অভিয়ান অমসুং অয়ুসমান ভারতনা লৈবাক অসিগী ইমুং ক্রোর ১০ কোনশিনগনি। লাক্কদৌরিবা নুমিৎ খরনিগী মনুংদা, য়াম্না লাইরবশিং, খর লাইরবশিং অমসুং ইনাক খুনবা ইমুংশিং  হায়রিবা স্কিম অনি অসিগী কান্নবা ফংলগনি। ইমুং অমদা চহি অমদা লুপা লাখ ৫ ফাওবগী  হেল্থ ইন্সুরেন্স পীবগী খুদোংচাবা ফংগনি। হায়বদি ইমুং ক্রোর ১০গী মীওই ক্রোর ৫০ কান্নবা ফংলগনি। মসিগী কান্নবা অসি লৈবাক অসিগী মীয়ামদা ফংহনগনি। মসি তেক্নোলোজিদা য়ুমফম ওইবা অরোনবা লৈতবা অমনি। মসিগীদমক তেক্নোলোজিগী খুৎলায়শিং শেমবনা মীচম অমনা খুদোংচাদবা অমত্তা থেংনরোই।

ঙসিগী চয়োল ৪, ৫, ৬গী মতুংদা, মসি নমথাক তৌবা য়াদনবা লৈবাক শীনবা থুংনা চাংয়েং তৌরগনি। সেপ্তেম্বরগী ২৫, পন্দিৎ দিন দয়াল উপধ্যগী মপোক কুমওন থৌরমদা প্রধান মন্ত্রী জন অরোগয়া অভিয়ান হৌদোককনি। লৈবাক অসিদা লৈরিবা লায়রবা মীওই অমত্তা লায়েংবদা খুদোংচাদবা থেংনররোই। মহাক্না শেন্দোই পীদুনা শেন অমত্তা পুররোই। মসিনা হেল্থ সেক্তরদা নহারোলশিং অমসুং ইনাক খুনবা ইমুংগী মীওইশিং থবক ফংহনবগী অনৌবা খুদোংচাবা ফংহল্লগনি। তয়ার ২ অমসুং তয়র ৩গী শহরশিংদা অনৌবা লায়েঙশঙশিং শারগনি। মখোয়গী মশিং য়াম্না মেদিকেল ষ্টাপশিং দরকার ওইরগনি। মসিদা মীওই কয়া থবক ফংহল্লগনি।

মরূপশিং, মীওই অমত্তা লায়রনা হিংনীংদে। মীওই অমত্তা লায়রনা শিবা পামদে। কনাগুম্বা মীওই অমত্তানা মহাক্কী লায়রবা অদু মচা-মসুদা থাংথনীংদে। মহাক্কী মপুন্সি চুপ্পা মহাক্না লায়রবা কোক্নবা হোৎনরি। মসি কোক্নবগী উপায়দি লাইরবশিংদা শক্তি পীবনি।

হৌখিবা চহী মরি অসিদা ঐখোয়না লাইরবশিংদা শক্তি পীনবা থবক পায়খৎলি। লাইরবশিং ফিবম ফগৎহনবা হায়বসি ঐখোয়গী পান্দমনি। মালেমগী লুপ অমনা হন্দক য়াম্না ফবা পাউদম অমা ফোঙলে। পাউদম অদুগী মতুংইন্না, ভারত্তা হৌখিবা চহি ২ অসিদা মীওই ক্রোর ৫ লায়রবা কোক্লে।

মরূপশিং, ঐখোয়না লাইরবশিংদা শক্তি পীনবা অমসুং ঐনা অয়ুসমান ভারতকী মতাংদা ৱারি শারকপা মতমদা মীওই খরনা স্কিম অসিগী পাক-চাউবা খঙখি-  ইমুং ক্রোর ১০ নৎত্রগা মীওই ক্রোর ৫০, মসি করিনো হায়বা মী অয়াম্বনা খঙখিদে। য়ু এস এ, কনাদা অমসুং মেক্সিকোগী অপুনবা মীশিং পুনশিল্লবদি অয়ুসমান ভারতকী কান্নবা ফংগদৌরিবা মীশিংগা মান্নগনি। অয়ুসমান ভারতকী কান্নবা ফংগদৌরবা মীওইশিংগা য়ুরোপকী অপুনবা মীশিংগা মান্নগনি।

মরূপশিং, লাইরবশিংগী ফিবম ফগৎহন্নবা ঐখোয়না স্কিম কয়া পায়খৎলে। অদুবু মমাংদা পায়খৎখিবা স্কিমশিংদা মরক্কী মীওইশিংনা স্কিম অদুগী কান্নবশিং লৌথোকখি। লাইরবশিং মখোয়না ফংফম থোকপশিং ফংখিদে। সরকারগী শেঙ্গাউদগী শেন চৎখি, স্কিমশিং চে খক্তদা লৈখি অমসুং লৈবাক অসি শগুন তৌখি। মসিদা সরকারনা মীৎ উইশিন্দুনা লৈথোক্লোই। অসিগুম্বা থবক অসিদা ঐ মীৎ উইশিনবা ঙমখিদে।

মরূপশিং, মরম অদুনা ঐখোয়গী থবকশিংদা লৈরিবা অশোয়বশিং চুমথোক্তুনা মীচম মীয়ামগী ৱাখলদা থাজবা লৈহনবা অসি য়াম্না দরকার ওইরে। মসিগীদমক কেন্দ্র সরকার নৎত্রগা রাজ্য সরকারশিংনা পুন্না থবক তৌমিন্নগদবনি। অমোৎপশিং শেংদোক্নবা ঐখোয়না থবক পায়খৎলকপদগী শাশিন্নবা বেনিফিসরি ক্রোর ৬, মালেম অসিদা লৈতবা অদুবু মখোয়গী মিংদা শেন পীখি – মীওই খরনা উজ্জৱালা স্কিমগী কান্নবা ফংলবশিং, মীওই খরনা দুপ্লিকেস গ্যাস কন্নেসক্সন পীরমখি, মীওই খরনা শাশিন্ননবা রেসন কার্দ শীজিন্নদুনা কান্নবা লৌখি, কনাগুম্বা খরনা স্কোলারসিপকী কান্নবা লৌখি, কনাগুম্বা খরনা পেন্সন স্কিমগী কান্নবা ফংখি। অসিগুম্বা মীওই ক্রোর ৬গী মমিং লৌথোকপদা কয়া য়াম্না ৱারমগনি। মসিনা মরম ওইদুনা মীওই কয়া খুদোংচাদবা মায়োক্নরমগনি। পোকত্রিবা মীওইশিং, মালেম অসিদা লৈতবা মীওইশিংদা মখোয়গী মিংদা শাশিন্নবা মিং শীজিন্নদুনা শেন নারোনদা লৌথোকখি।

মসিগী থবক অসি সরকার অসিনা থুপচিল্লে। ঐখোয়না শেঞ্জা -থুমজা অমসুং অরোনবা শেন মপুং ফানা মুৎথৎনবা থবক কয়া পায়খৎলে।

মরূপশিং, মসি ফল করি ওইরক্কনি? লুপা ক্রোর ৯০,০০০ অসি অপীকপা শেনফম অমা নত্তে। লুপা ক্রোর ৯০,০০০গী শেনফম অসি অরানবা মীওইশিংগী মখুৎতা অরানবা থবকশিংদা শীজিন্ননবা পায়রম্বা অদু হৌজিক লৈবাক্কী লন ওইরে, হৌজিক মীচম মীয়াম য়াইফনবা থবক্ত শীজিন্নরে।

মরূপশিং, মসি কমদৌনা থোকলিবনো? ঐখোয়গী লৈবাক্না লাইরবশিংগী য়াইফনবা থবক পায়খৎলি, অদুবু মরক্কী মীওইশিং অসিনা তৌরিবা অসিনা করিনো? নহাক্না খঙলিবা অদুনি কৈথেলদা কিলোদা লুপা ২৪-২৫ পীবা গেহু অসি সরকারনা রেসন কার্দ পায়বা মীয়ামদা লুপা ২দা ফংহল্লি, মসি সরকারনা লুপা ২৪-২৫দা লৈরগা ফংহনবনি। মসিগা চপ মান্ননবা কৈথেদা কিলোদা লুপা ৩০-৩২ পীবা চেং অসি সরকারনা লৈরগা লাইরবশিংদা কিলোদা লুপা ৩দা ফংহল্লি। কনাগুম্বা মীওই অমনা শাশিন্নবা রেসন কার্দ পায়দুনা গেহু কিলো অমা হুরাল্লবদি মহাক লুপা ২০-২৫ তোংবা তাবনি। চেংদসু অসুম্না তৌরবদি লুপা ৩০-৩৫ ফংগনি। মরম  অসিননি শাশিন্নবা মিং ময়াম অমা থোরক্লিবসি। লায়রবা মীইও অমনা রেসন কার্দ পায়রগা দুকানদা চৎলুবা মতমদা চেং লৈত্রে হায়রক্কনি। চেং অদু অতোপ্পা দুকান অমদা থৈদোকখিনি অমসুং লাইরবশিংনা কিলোদা লুপা ২দা লৈবা চেং অদু অতোপ্পা দুকানদগী লুপা ২০-২৫দা অমুক লৈগনি। লাইরবশিংগী হক অদু মৎপীখি। মরম অদুনা শাশিন্নবগী থবক অসি মরু ফংনা মুৎথৎলে।

মরূপশিং, ঐখোয়গী লৈবাক্কী লায়রবা মীওই ক্রোর কয়া লুপা ২ অমসুং লুপা ৩দা চানবা ফংলি। মসিগীদমক সরকারনা পুকচেল চাউনা খরচ তৌরি অমসুং মসিগী মনাসি সরকারনা ফংদে। হায়রিবা স্কিমশিং অসি পুকচেল শেংনা তেক্স থিরিবা মীওইশিংগী শেনদগী শীজিন্নবনি। ঐনা মখোয় থাগৎচরি। ঐনা পুকচেল শেংনা তেক্স থিরিবা মীওইশিংদা থাজবা পীরি মদুদি স্কিম খুদিংমক অদোমগী শেনদগী থবক তৌবা ঙাক্তনি। পুকচেল শেংনা তেক্স থিরিবা মীওইশিং অফবা ঙাক্তা ওই মরমদি মখোয়গী শেনদগী লায়বশিং চাবা ফংবনি। মরম অদুনা নহাক্না পুকচেল শেংনবা তেক্স থিবা মতমদা নহাক্না  ইমুং-মনুংগী মীওইশিংগা চাক চাবা মতমদা, লায়রবা ইমুং অহুমসু মখোয় চাবা ফংলিবনি।

মরূপশিং, তেক্স পীদবগী মতম অমা লৈরম্মি। অদুবু মীওই অমনা, মহাক এ সিগী কাদা ফমবা মতমদা, মহাক্কী তেক্সনা  লায়রবা ইমুং অহুম থাক্লিবনি হায়বা খঙলকখি, মসিদা মহাক্কী থৱায়দা অপেনপা পোকখি। মসিনি মী অমা ওইবগী খ্বাইদগী ধর্ম্ম লৈবা থবক হায়বদু। মরূপশিং, ঙসিদি পুকচেল শেংবগী কুম্মৈ পাংথোক্তুনা লৈবাক অসি মাংলোমদা চংশিল্লি। ২০১৩ ফাওবা, চহি ৭০ চুপ্না মীওই ক্রোর ৪ খক দাইরেক্ত তেক্স থিরমখি। অদুবু ঙসিদি তেক্স থিবা মীশিং অসি হৌজিক ক্রোর ৬.৭৫ য়ৌরে। য়েংসি ঐখোয় ক্রোর ৩, ৩.৫ নৎত্রগা ক্রোর ৩.৭৫দগী ক্রোর ৬.৭৫ মতৌ করম্না য়ৌরকখিবগে হায়বা। মখোয় অসি পুকচেল শেংবগী খুদম অমা নত্তবরা? মসি লৈবাক অসি পুকচেল শেংবগী লম্বীদা চংশিনবগী খুদম অমনি। হৌখিবা চহি ৭০দা ফার্ম লাখ ৭০ ইন্দাইরেক্ত তেক্স থিখি। অদুবু হৌখিবা চহি মথন্তদা, জি এস তি চৎনরবা মতুংদা মসি ক্রোর ১গা লাখ ১৬ য়ৌখি। ঙসিদি লৈবাক অসিগী মীওই খুদিংমক পুকচেল শেংবগী কুম্মৈ অসিদা শরুক য়ারি। অরোনবা থমদ্রিবা অমসুং পুকচেল শেংবা খুদিংমক ঐনা থাগৎচরি। মাংদা চৎখৎনীংবা পুম্নমক ঐনা থাজবা পীজরি। লৈবাক অসি চাউখৎপদা অদোমনা মতেং পাংলি। অদোমনা খুদোংচাদবা থেংনরিবা অদু ঐখোয়না খঙই। মীপুম খুদিংমক্কী মতেং অদুগা লোয়ননা লৈবাক অসি মাংলোমদা পুখৎনবা ঐখোয়না অদোমগীদমক লেপ্লি। মরম অদুনা ঐখোয়না অরোনবা শেন অমসুং শেঞ্জা-থুমজা তুমিন্না খাংদুনা লৈথোক্লোই। ওইনীংবা ওইজসনু, ঐখোয়না পুকচেল শেংবগী লম্বী অসিদগী নাথৈদুনা চৎলোই, মসিনা লৈবাক অসি কয়া য়াম্না মাংহল্লবগে হায়বা ঐখোয়না উরবনি। অসুম্না, দিল্লিগী ফম্নাইবশিংদা থোঙ্গালদা পৱার-ব্রোকরশিং কোইহা হাবা অদু নহাক্না উররোই।

মরূপশিং, মতম অসি হোংলে। মীওই খরনা মখোয়গী কাদা ফমদুনা লৈরগা মখোয়না সরকারগী থৌশিলশিং হোংদোক্কনি হায়না ক্লেম তৌরি। মখোয়গীদমক ঐখোয়গী থোঙশিং থিংজিল্লে।

নুংশিরবা ইরৈচাশিং, ঐখোয়না অচান-মীরান নাইবা অমসুং শঙ্গ-পঙ্গগী থবক মরু ফুক্তোকখ্রে। ঐখোয়না মীচং-মীখাই নাইবগী থবক্কী মায়োক্ত লৈরি। শেঞ্জাবা ওফিসরশিংগী মথক্তা অকনবা থবক পায়খৎলে। চিংননীংঙাই ওইবা কম্পেনী লাখ ৩ হেন্না থিংজিল্লে অমসুং মখোয়গী দিরেক্তরশিংগী মথক্তা অথিংবা থম্লে। অরোনবা লৈতনবা ঐখোয়গী ওনলাইন ত্রান্সসেক্সনশিংদা আই তিনা খুৎ থিংজিল্লে। মতম অমদা ইনভাইরনমেন্তগী ক্লিয়ারেন্স লৌবদা শেঞ্জা -থুমজা কন্না তৌনরম্মি। ঐখোয়গী মসিগী থবক অসি চুম্না ওইনলাইনদা পায়খৎলে। মীওই অমনা হেক্ত মসি য়েংবা য়ারগনি। লৈবাক্কী লন-থুমশিং হৈশিংনা শীজিন্ননবা থবকশিং ঐখোয়না পায়খৎলি। লৈবাক অসিদা অচুম্বা ফংহন্নবা সুপ্রিম কোর্ত্তা নুপী জর্জ অহুম লৈরিবা অসি লৈবাক অসিগী নুপীশিংগী য়াম্না চাউথোকচবা অমনি। নীংতম্লবা মতুংদা অহানবা ওইনা কেন্দ্রগী মন্ত্রী মন্দলদা খ্বাইদগী য়াম্না নুপী মন্ত্রী য়াওরি।

নুংশিরবা ইরৈচাশিং, ঙসি ঐনা ঐগী থৌনা ফরবী ইচানুপীশিংগী অঙকপা পাউ খরা তম্বা পাম্মি। মসিগী থৌরম অসিদা, ভারতকী ফোর্সশিংদা সোর্ত সর্বিস কম্মিশনগী নুপী ওফিসরশিং পর্মিনেন্ত কম্মিশন পীরে হায়না ঐনা লাউথোক্লি। মসিগী থবকশিং চুম্না পাংথোক্কনি অমসুং নুপা ওফিসরশিং খনবগী মওং অদুগা মান্নগনি। মসি ঐগী মাইকৈদগী রেৎ ফোর্ত্তগী, লৈবাক অসিগীদমক কৎথোক্লিবী অমসুং য়ুনিফোর্ম সর্বিসদা লৈরিবী ইচানুপীশিংদা পীবা খুদোলনি। ঐখোয়গী লৈবাক্কী চাউথোকচনীংঙাই ওইরিবী নহা ওইরিবী নুপীমচাশিংদা লৈবাক অসিনা সেলুৎ পীজরি। মপাঙ্গল কনবা ভারত  অমা শেমগৎপদা নুপীশিংনা অচৌবা থৌদাং লৌরি। লৈবাক অসিনা ঐখোয়গী ইমাশিং অমসুং ইচলশিংগী চাউথোকচবা, মখোয়গী থবকশিং অমসুং তৌবা ঙম্বশিং খঙলে।

লৌউ-শিংউবদগী হৌরগা শান্ন-খোৎনবগী লমদা ঐখোয়গী নুপীশিংনা ভারতকী মচু অহুম ৱাংনা পাইহল্লি। প্রধান্দগী হৌরগা পার্লিয়মেন্ত ফাওবা ঐখোয়গী নুপীশিংনা লৈবাক্কী চাউখৎ-থৌরাংদা মতেং পাংলি। স্কুলদগী হৌরগা লান্মী ফাওবদা ঐখোয়গী লৈবাক্কী নুপীশিংনা মাংজিল থারি। মশিং য়াম্লবা ঐখোয়গী নুপীশিংনা মাংজিল থাদুনা লৈরিঙৈ চৈরক অসিদা ঐখোয়না মথোং হুকতবা থবক কয়া থেংনরি। ঐখোয়না করিগুম্বা মতমদা হিংচা-য়াইতম্বা থবকশিংনা নুপীশিংগী শক্তিদা শিংনররি। নমজা-নমথেক্নবা অসি অৱাবগী মশক্নি, চৈথেং ফংলবা অমনা থেংনরিবা অৱাবা অদুদগী লৈবাক অসিগী মীয়াম্না হেন্না শরুক কয়া অৱাবা নংলি। মরূপশিং, খুন্নাই অসি অসিগুম্বা তমথিরবা ৱাখল্লোন অসিদগী নান্থোক্নবা হোৎনগদবনি। আইনগী মশাগী ওইবা লম্বী লৈজরি। ইকুই কুইদনা, মৈধ্য প্রদেশকী কাতনীদা সুপ্নগী নুমিৎ মঙানি খক ৱায়েল্লগা নমজা-নমথেক্নবদা চেন্নবা মীওইশিং শীবগী চৈরাক পীখ্রে। মসিগা চপ মান্ননা রাজাস্থানদা নমজা-নমথেক্নবশিং নুমি খরনি ৱায়েল্লবা মতুংদা শিবগী চৈরাক ফংহনখ্রে। অসিগুম্বা পাউশিং ফোংলিবমখৈ, অসিগুম্বা শাগী ৱাখল চেনবা মীওইশিং অসি কিগনি। ঐখোয়না অসিগুম্বা পাউশিং ফোঙগদবনি। মীয়াম্না খঙগদবনি মদুদি ফম্লানবশিং শঙলিংবগী খুৎতা শীন্নগদগবনি।

মসিগী ৱাখল্লোন অসি নমথবা দরকার ওইরি, মসিগী ৱাখল অসি লাকশিনবা মথৌ তারি, মসিগী থবক অসি লেপহনবা দরকার ওইরি। মরূপশিং, মসিগী ৱাখল্লোন অসিনা ঙাকপীফম থোক্তবা মীহাৎ-মীপুনশিং থোকহল্লি। আইনগী ৱায়েল লৈরিবা অসি ঐখোয়গী খ্বাইদগী মকোক্নি মসিদা করিগুম্বা অমত্তা শন্দাইনবা য়ারোই। কনাগুম্বা অমত্তনা মখোয়গী মখুৎতা আইন পায়বা য়ারোই। ইমুংদা, স্কুলদা, ঐখোয়গী নহারোলশিংবু, ঐখোয়গী অপীকপা অঙাংশিং অফবা অমা ওইনবা তাকপী তম্বীগদবনি। মখোয়দা নুপীবু ইকাইখুম্নবা তম্বীগদবনি। মসি অচুম্বা লম্বীনি হায়বদু মখোয়দা তাকপীগদবনি। মসিগী ৱাখল্লোন অসি অমসুং গুনশিং অসি ঐখোয়গী ইমুংশিংদা ঙাক্না চৎকদবনি।

মরূপশিং, ঐগী মুস্লমি ইচলশিংদা ঐনা থাজবা পীবা পাম্মি। ত্রিপল তলাক্না ঐখোয়গী লৈবাক্কী মুস্লিম ইচানুপীশিংগী পুন্সি মাঙহল্লে। তলাক মায়োক্নদবশিংসু মখোয়গী পুন্সি ৱানা খাংলি। ফত্তবা চৎনবগী অসিদগী মুস্লিম নুপীশিং কন্নবা সংসদকী চৎলিবা মীফম অসিদা ঐখোয়না আইন অমা শেম্বা পাম্মি। অদুবু মীওই খরনা বিল অসি পাস তৌবদা অপনবা পীরি। অদুবু, ঐনা মুস্লিম ইমাশিং, ইচলশিং অমসুং ইচানুপীশিংদা থাজবা পীরি মদুদি, মখোয়না অচুম্বা ফংদ্রি ফাওবা ঐ লেপ্পোই। অদোমগী অপাম্বশিং ঐনা ফংহনগনি।

ঐগী নুংশিরবা ইরৈচাশিং, ঐখোয়গী লৈবাক মনুংগী ঙাকশেনগী থবকশিংদা ঐখোয়গী লান্মী, পেরামিলিতরী ফোর্সশিং, পুলিস, ইন্তিলিজেন্স এজেন্সিশিংনা পাঙ্গল ওইরি। মখোয়না ঐখোয়দা অশোয়-অঙাম থোক্লোই হায়বা ফাওহল্লি। শান্তি পুরকপদা মখোয়না অচৌবা থৌদাং লৌরি। মখোয়গী কৎথোকপা, থবক কন্না শুবা অসিনা অনৌবা থাজবা অমা পোকহল্লে।

মরূপশিং, ঐখোয়না অৱাং-নোংপোক্ত মীহাৎ-মীপুনগী থৌদোকশিং থোকপগী পাউ তারম্মি। ঐখোয়না বোম্ব পোকখায়বা অমসুং নোংমৈ কাপ্পগী পাউ তারম্মি। চহি ৩০/৪০ হেন্না থম্লক্লবা আমর্দ ফোর্সেস স্পিসিয়েল পৱার এক্ত (অফস্পা) ঙসিদি মেঘলয় অমসুং ত্রিপুরাদগী লৌথোক্লে। মসি ঐখোয়গী লান্মীশিংনা থবক তৌবা অমসুং রাজ্য সরকারশিং অমসুং কেন্দ্র সরকারনা চাউখৎ-থৌরাংগী থবকশিং পায়খৎপদগী ওইরকপনি। মেঘলয় অমসুং ত্রিপুরাদা হৌজিক আমর্দ ফোর্সেস স্পিসিয়েল পৱার এক্ত থমদরে। অরুনাচল প্রদেশকী জিলা খরদা আমর্দ ফোর্সেস স্পিসিয়েল পৱার এক্ত লৌথোক্লে। হৌজিক রাজ্য অসিদা জিলা খর খক্তদা থম্লি।

মাও-ইজম্না লৈবাক অসি ইহিং-নাইহিং তাহল্লে। মীহাৎ-মীপুনগী থৌদোকশিং, মীয়াম্না ময়ুম থাদোক্তুনা চেল্লকপা অমসুং উমংদা লোৎপগী থৌদোকশিং নুমিৎ খুদিংগী থোক্লি। অদুবু ঙসিদি ঐখোয়গী সেক্যুরিতী ফোর্সশিংনা কন্না হোৎনবদগী, চাউখৎ-থৌরাংগী থবকশিং পায়খৎপদগী অমসুং মীয়াম জাতিগী ইচেলদা পুরক্নবা হোৎনবদগী মাও-ইজম্না শোকহল্লম্বা জিলা ১২৬ হৌজিক জিলা ৯০দা হন্থরে। হায়রিবা জিলাশিং অসিদা মাও-ইজমগী থবক লোইশিন্নবা থবক য়াংনা পায়খৎলি।

মরূপশিং, জম্মু অমসুং কশ্মীরগী মতাংদা অতল বিহারী বাজপেয়ীনা তাকপীরম্বা লম্বী অসি অচুম্বনি। ঐখোয়না লম্বী অদুদা চংশিনবা পাম্মি। বাজপেয়ীনা হায়খি, মীওইবগী, গনতন্ত্রগী অমসুং কাশ্মীরিয়ত হায়বা অহুম অসিদা য়ুম্ফম ওইরগা ঐখোয়না জম্মু অমসুং কশ্মীর চাউখৎহনবা পাম্মি। মসি লদাখ ওইবা য়াই নৎত্রগা জম্মু ওইবা য়াই নৎত্রগা শ্রীনগর ওইবা য়াই। মীচম মীয়ামগী অনীংবা থুংগদবা মওংদা ঐখোয়না থোং মান্ননা চাউখৎহনবা পাম্মি। ঐখোয়না নোংমৈ মরু অমসুং হাৎনবগী লম্বীদা চৎপা পামদে। মমা লৈবাক নুংশিবগা লোয়ননা হিংলিবা কশ্মীরগী মীয়ামগা লোয়ননা নুংশি চান্না মাংলোমদা চৎখৎপা পাম্মি।

মরূপশিং, ইথৈ পীবগী স্কিমশিং চাউখৎলক্লি। আই আই তি, আই আই এম অমসুং এ আই আই এম এস শাগৎপগী থবক য়াংনা চৎথরি। দাল পাৎ অমুক শেমগৎপগী থবক চৎথরি। য়াম্না মরুওইবা অমনা হৌখিবা চহিদা জম্মু অমসুং কশ্মীরগী খুঙ্গংশিংগী মশীং য়াম্লবা লুচীংবশিংগা ঐগা উনখি অমসুং মখোয়না মফম অদুদা পঞ্চায়ত মীখল পাংথোক্নবা তকশিনখি। ঐনা হরাওই মদুদি মথংগী থা খরদা জম্মু অমসুং কশ্মীরগী মীয়াম্না মসিগী খুদোংচাবা ফংলগনি। হৌজিক ভারত সরকারনা খুঙ্গংশিংদা য়াম্লবা শেনফমশিং হকথেংননা পীরে অমসুং মসিনা খুলগী লুচীংবশিংনা মখোয়গী খুঙ্গংশিং শেমগৎপা ঙম্লগনি। মরম অসিনা ঐখোয়না পঞ্চায়ত অমসুং সিতি কাউন্সিলগী মীখলশিং পাংথোক্নবা থৌরাং তৌরিবা।

মরূপশিং, ঐখোয়না লৈবাক অসি অৱাংবা থাক্ত পুখৎকদবনি। ঐখোয়গী পান্দমদি “সব কা সাথ সব কা বিকাস”নি। অদোমগী নৎত্রগা ঐগী হায়বা অসিদা য়ুমফম ওইদুনা অচান-মীরান নাইবগী থবক লৈতে। মরম অদুনা ঐখোয়না মসিগী পান্দম অসিদা চংশিল্লিবনি অমসুং ঙসি মচু অহুমগী মখাদা লেপ্লিবনি।

ভারমচা খুদিংমক মশাগী য়ুম লৈহল্লসি। মশাগী য়ুম মৈ থান্নিংবশিংগীদমক, খুঙ্গংশিংদা মৈ য়ৌহল্লে। ভারত মচা খুদিংমক্না চাকখুমদা মৈখু খুহনবা পামদে। মসি য়ানবা ঐখোয়না চাকশঙ খুদিংদা গ্যাস ফংহল্লে। ভারত মচা খুদিংমক অফবা থক্নবা ঈশিং দরকার ওই। মরম অদুনা ঐখোয়না মীপুম খুদিংমক্ত ঈশিং ফংহল্লে। ভারত মচা খুদিংমক অমাংশঙ দরকার ওই, মরম অদুনা খুদিংমক অমাংশঙ লৈহনবা হায়বসি ঐখোয়গী পান্দমনি। ভারত মচা খুদিংমক স্কিল হেনগৎহন্নবা ঐখোয়না স্কিল দিবলপমেন্ত স্কিম পায়খৎলে। মীপুম খুদিংমক অফবা অনা-লায়েংগী খুদোংচাবা ফংনবা থবক পায়খৎলে। ভারত মচা খুদিংমক হেল্থ ইন্সুরেন্স কবরেজ দরকার ওই। মসি ফংনবা ঐখোয়না খুদিংমক্কী ইন্সুরেন্স পীরি। ভারত মচা খুদিংমক ইন্তর্নেত দরকার ওই। মসি ফংনবা ঐখোয়না থবক পায়খৎলে। কন্নেকতিবিতীগী লাইৱা অসিনা ঐখোয়গী লৈবাক অসি চাউখৎহনবা ঐখোয়গী অপাম্বনি।

ঐগী নুংশিরবা মরূপশিং, মীয়াম্না ঐঙোন্দা ৱাফম কয়া হায়রকই অমসুং ঙসিদি ঐনা মদু মীয়াম মমাংদা য়াজরি। লৈবাক কয়ানা ঐখোয়দগী মাং থানা চৎখিবদা ঐ তুমিন্না লৈথোকপা ঙমদে, ঐ পোত্থাবা ঙমদে অমসুং ঐগী লৈবাক অসি মাংলোমদা পুখৎনবা ঐ ঙাইঙমদে।

নুংশিরবা মরূপশিং, ঐখোয়গী লৈবাক্কী অঙাংশিং চাউখৎহনবদা মচি ওইবা চিঞ্জাক চাদবা অসিনা অচৌবা চৈথেং অমা ওইরিবা অসিদা ঐ লৈতাদে। ঐগী লৈবাক অসি মচি ওইবা চিঞ্জাক চাবা ঙমদবগী অৱাবা অসি কোকহন্নবা ঐ লৈতাদে।

ঐগী ইরৈচাশিং, লাইরবশিংনা মতিক চাবা হকশেলগী কভর ফংদবা অসিদা ঐ লাংতক্নবা পোকই।  ঐগী লৈবাক্কী ইচম চম্বা মীওই অমনা লায়নাশিং ঙাকথোক্নবা অমসুং মশা ফনা লৈনবা ঐ লাংতক্নরি।

মরূপশিং, ঐখোয়গী নাগরিকশিং মগুন লৈবা পুন্সি মহিং ফংহন্নবা, মখোয় হিংবদা লাইহন্নবা অমসুং হিরম খুদিংমক্তা চাউখৎনবা ঐ লাংতক্নরি।

ঐগী নুংশিরবা ইরৈচাশিং, ঐ লৈতাদ্রে, ঐ লাংতক্নরি অমসুং ঐ ঙাইঙমদ্রে, ঐখোয়গী লৈবাক অসিনা মরিশুবা ইন্দস্ত্রিয়েল রিভোলুসন মাংজিল থানবা হোৎনবদা। হায়রিবা রিভোলুসন অদু লৌশিংদা য়ুম্ফম ওইবনি, রিভোলুসন অসি আই তি হৈবশিংনা লমজিংগনি। ঐগী লৈবাক্না মসি লমজিংবা ঐ ঙাইঙমদ্রে।

ঐগী নুংশিরবা ইরৈচাশিং, ঐখোয় মাংলোমদা চৎপা পাম্মি। ঐখোয়না মচি লেংদনা লৈবা য়ারোই, ঐখোয় চপ লেপ্তুনা লৈবা য়ারোই অমসুং কনাগুম্বা অমগী মমাংদা নোঞ্জবা অসি ঐখোয়গী চৎনবী নত্তে। লৈবাক অসি কৈদৌঙৈদা চপ লেপ্তুনা লৈরোই, নৎত্রগা নোঞ্জরোই অমসুং চোকথরোই। ঐখোয় অৱাংবা থাক্তা কাখৎকদবনি।

মরূপশিং, ঐখোয়গী বেদগী ইনাকখুল্লবা অরিবা মচাকশিং ফংলি। মসিগী মচাকশিং অসিনা ঐখোয়দা  ইশান ইশাবু থাজবা পোকহল্লি অমসুং মসি ঐখোয়না মাংলোমদা পুখৎপা পাম্মি।

ঐগী নুংশিরবা ইরৈচাশিং, ঐখোয়না মতোল য়ৌনবা মঙলান অমগা লোয়ননা মাংলোমদা চংশিনগদবনি। মরম অদুনা ঐগী নুংশিরবা ইরৈচাশিং, ঐনা অনৌবা অশা অমা, অনৌবা থৌনা অমসুং অদোমগী অনৌবা থাজবশিং পাম্মি। মরমদি মদুনা লৈবাক অসিগী মঙলানশিং মঙফাওনবা ঙমগনি।

ঐগী নুংশিরবা ইরৈচাশিং,

শেংলবা নীংখা তম্বা নুমিৎ অসিদা অমুক হন্না ঐনা ঐগী য়াইফ-পাউজেল পীজরি। ঐখোয়না হৌনা  ‘জয় হিন্দ’ লাইৱা অসি লাওমিন্নরসি!

জয় হিন্দ! জয় হিন্দ!  জয় হিন্দ!

ভারত ইমানা  য়াইফরে!

ভারত ইমানা  য়াইফরে!

ভারত ইমানা  য়াইফরে!

বন্দে মাতরম! বন্দে মাতরম! বন্দে মাতরম!