ভারতকী প্রধানমন্ত্রী

য়োর এক্সেলেন্সী, প্রধান মন্ত্রী বোরিস জোন্সন,

শক্নাইরবা মীথুংশিং,

মেদিয়াগী মরুপ মপাঙশিং

খুরুমজরি!

অহানবমক্তদা ঐনা প্রধান মন্ত্রী বোরিস জোন্সন অমসুং মহাক্কী খোঙবুশিংবু ভারত্তা তরাম্না ওকচরি‍।

হন্দক্কী অসি প্রধান মন্ত্রী অমা ওইনা ভারত্তা লাকপা মহাক্কীদমক্তা অহানবা ওইরমবদি য়াই, অদুবু ভারতকী অরিবা মরূপ অমা ওইনা, মহাক্না ভারতপু নীংথিনা খঙই‍। হৌখিবা চহি কয়াসিদা, প্রধান মন্ত্রী জোন্সন্না ভারত অমসুং য়ু.কে.গী মরী চেৎশিনহনবদা য়াম্না মরুওইবা থৌদাং অমা লৌদুনা লাক্লি‍।

ভারতনা নীং তমবগী অমৃৎ মহোতসব পাঙথোক্লিবা মতমসিদা, প্রধান মন্ত্রী বোরিস জোন্সনগী খোঙচৎ অসি তশেংনমক পুৱারী ওইরবা পুংফম অমা ওইরি‍। অদুগা ঙরাং, অদোম্না অদোমগী ভারতকী খোঙচৎ সাবরমতি আশ্রমদা মহাত্মা গান্ধীগী মফমদা শ্রদ্ধাঞ্জলি কত্তুনা হৌরকখিবা ভারত পুমবনা উখ্রে‍।

মরূপশিং,

মমাঙ চহিদা ঐখোয়না লৈবাক অনিগী মরক্তা কম্প্রিহেন্সিব স্ত্রেতেজিক পার্ত্নরসিপ শেমখি‍। চৎলিবা চহি তরাসিদা ঐখোয়গী মরীগী মায়কৈ তাক্নবগীদমক ঐখোয়না অশা চাউরবা ‘রোদমেপ ২০৩০’সু হৌদোকখ্রে‍। ঙসি ঐখোয়না ৱারী ৱাতায় শানবা মতমদা, হায়রিবা রোদমেপ অসিগী লৈরিবা খোঙজেলগী মতাঙদা ঐখোয়না নৈনখি অমদি তুংগীদমক পান্দম খরসু থমখি‍।

লৈবাক অনিগী কাঙলুপশিংনা ফ্রী ত্রেদ এগ্রীমেন্ত হায়বা হীরমসিদা থবক তৌরি‍। হায়রিবা ৱাফমসিদা খোঙজেল য়াঙনা চঙশিল্লি‍। অদুগা ঐখোয়না হায়রিবা এফ.তি.এ. অসিবু চৎলিবা চহিসিগী লোইশিল্লকপা ফাওবদা মপুং ফাহন্নবা মপুং ফানা হোৎননবা ফীরেপ লৌরে‍। হৌখিবা থা খরসিদা, ভারতনা য়ু.এ.ই. অমসুং ওস্ত্রেলিয়াগা ফ্রী ত্রেদ এগ্রীমেন্ত পুরকখ্রে‍। হায়রিবা খোঙজেল অসিমক অমদি মান্নবা ফিরেপকা লোয়ননা ঐখোয়না য়ু.কে.গা লোয়ননা এফ.তি.এ. পুরক্নবগী লমদা চঙশিনবা পাম্লি‍।

ঐখোয়না ঙাকশেলগী লমদসু তেংবাংনবা হেনগৎহন্নবা ৱাফম য়ানরে‍। দিফেন্স সেক্তরদা মেনুফেকচরিং, তেক্নোলোজী, দিজাইন অমসুং দেভেলপমেন্তকী হীরম পুমবদা ‘আত্মনিরভর ভারত’ পুরক্নবা থৌরাংদা য়ু.কে.গী ঙাক্লৌ ঐখোয়না তরাম্না ওক্লি‍।

মরূপশিং,

ঐখোয়না ভারত্তা চঙশিল্লিবা পুম্নমক কোনশিন্দুনা অহোংবা পুরক্নবা থৌরাং, ঐখোয়গী ইনফ্রাস্ত্রকচর মোদর্নাইজেসনগী থৌরাং অমসুং নেস্নেল ইনফ্রাস্ত্রকচর পাইপলাইনগী মরমদসু খন্নখি‍। ঐখোয়না য়ু.কে. কম্পেনীশিংনা ভারত্তা শেল থাদবা হেনগৎলক্লিবসিবু তরাম্না ওক্লি‍। অদুগা মসিগী ফজরবা খুদম অমা ঙরাং গুজরাৎকী হালোলদা ঐখোয়না উবা ফংখ্রে‍।

য়ু.কে.দা লৈরিবা ভারত্তগী হৌখিবা মীওই মিলিয়ন ১.৬না খুন্নাইদা অমদি শেন্মিৎলোনগী হীরম খুদিংদা অফবা মওংদা থৌদাং য়ারি‍। মখোয়গী মায় পাকপদা ঐখোয়না চাউথোকচৈ‍। অদুগা ঐখোয়না অসিগুম্বা অহিংবা থোং অসি হেন্না মপাঙ্গল কলহনবা পাম্মি‍। প্রধান মন্ত্রী জোন্সন মশামক মায়কৈ অসিদা য়াম্না চাউনা থৌদাং লৌরিবনি‍। মসিগীদমক মহাক্কী মফমদা ঐনা নুংঙাইবা ফোঙদোকচরি‍।

মরূপশিং,

গ্লাস্গোদা পাঙথোকখিবা সি.ও.পি.-২৬দা লৌখিবা ৱারেপশিং মপুং ফানা থবক্তা ওন্থোক্নবা ঐখোয়গী ফিরেপ ময়ামগী মফমদা থম্লি‍। ঙসি ঐখোয়না ঐখোয়গী অইং-অশা অমসুং ইনর্জীগী খোঙবু ওইবগী মরী হেন্না মরা চেৎশিলহন্নবা লেপ্লি‍। ঐখোয়না য়ু.কে.বু ভারতকী নেস্নেল হাইদ্রোজেন মিসন্দা শরুক য়ারনবা পাউকৎ পীজরি‍। অদুগা ঐনা ঐখোয়গী মরক্তা স্ত্রেতেজিক তেক দাইলোগ শেমগৎলবসিবু পুকচেল শেংনা তরাম্না ওকচরি‍।

মরূপশিং,

ঙসি ঐখোয়গী মরক্তা গ্লোবেল ইন্নোভেসন পার্ত্নরসিপকী শিল্লি-লাংলিবশিং থবক ওইনা পায়খৎপা লোইশিনবসি য়াম্না মরুওইবা থৌরাং অমা শোয়দনা ওইরক্কনি‍। মসিনা অতোপ্পা লৈবাকশিংগা ঐখোয়গা লৈনরিবা চাওখৎপগী মরী অসিবু হেন্না মপাঙ্গল কনখৎহল্লগনি‍। থৌরাংসিগী মখাদা ভারত অমসুং য়ু.কে.না অতোপ্পা লৈবাকশিংদা ‘মেদ ইন ইন্দিয়া’ ইনোভেসন য়ৌহন্নবা অমদি চাওথোকহন্নবগীদমক দোলর মিলিয়ন ১০০ পুন্না থাদমিন্ননগনি‍। মসিনা সস্তেনেবল দেভেলপমেন্ত গোলশিং ফংবদা অমদি অইং অশাগী খল কায়থরকপগী ৱাফমশিংগী ৱাখৈ পুরকপদা মতেং ওইগনি‍। মসিনা ঐখোয়গী স্তার্ত-অপশিং অমসুং এম.এস.এম.ই. সেক্তরনা অনৌবা কৈথেলদা চঙশিনবদা অমদি মখোয়গী ইনোভেসনবু মালেমগী থাক্তা পুথোকপদা য়াম্না কান্নহনগনি‍।

মরূপশিং,

লমদমসিগী অমদি মালেমগী থাক্তা চাউখৎলক্লিবসিগী মতাঙদসু ঐখোয়না খন্নখি‍। অপনবা লৈতবা, পুম্নমক্কী ওইবা, পুম্নমক কোনশিনবা অমদুং চৎন-কাঙলোন্দা য়ুম্ফম ওইবা থৌওং অমদা য়ুম্ফম ওইবা ইন্দো-পেসিফিক রিজন অমা শেম্নবগী ৱাফমদা ঐখোয়না মরুওইনা খন্নখি‍। ইন্দো-পেসিফিক ওসীন ইনিসিএতিবতা য়াওনবা য়ু.কে.না লৌরিবা ফিরেপ ভারতনা তরাম্না ওক্লি‍।

ঐখোয়না য়ুক্রেন্দা খুদক্তা লান লেপ্নবা অমসুং ৱাথোক অসিগী ৱাখৈ পুরক্নবগীদমক ৱারী শানদুনা অমদি দিপ্লোমেসীগী লম্বীদা চঙশিন্নবা ৱাফম খন্নখি‍। ঐখোয়না লৈবাক পুম্নমক্কী ঙমখৈ কায়হন্দনবা অমদি মশাগী শক্তমবু ঙাক্তুনা থমবগী মরুওইবা ৱাফমসু অমুক হন্না নৈনখি‍।

ঐখোয়না ইং-তপ্পা, মরা চেৎপা অমসুং শাফবা অফঘানিস্তান অমগীদমক অমসুং পুম্নমক কোনশিল্লবা অমদি মীহুৎশিংগী ওইবা লৈঙাক অমা লৈহন্নবা হোৎনবদা ঐখোয়না শৌগৎলি হায়বা ৱাফম হন্না ফোঙদোকখি। অফঘান লমদমবু অতোপ্পা লৈবাকশিংদা হিংশাগী থবক চত্থনবগী মকোন ওইহন্দবা হায়বসি মরুওই‍।

এক্সেলেন্সী,

অদোম্না ভারত অমসুং য়ু.কে.গী মরী মপাঙ্গল কনখৎহন্নবা অখন্নবা থৌদাং মতম পুম্নমক্তা লৌদুনা লাক্লি‍। মসিগীদমক্তা ঐখোয়না অদোমবু থাগৎচরি‍।

অমুক্কা হন্না, অদোম অমসুং অদোমগী খোঙবুশিংবু ভারত্তা তরাম্না ওকচরি‍।

অদোমবু হন্না হন্না থাগৎচরি‍!

দিসক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। মহাক্কী অশেংবা ৱারোলদি হিন্দিদা পীখিবনি‍।

*****