ভারতকী প্রধানমন্ত্রী

য়ুনাইতেদ অরব ইমিরেতসকী মপাল থৌরম পুবা মন্ত্রী শৈখ অবদুল্লা বিন জায়েদ নাহয়ান্না, ওফিসিয়েল ওইবা খোংচৎ অমদা ভারত্তা লাক্তুনা ঙসি অঙনবদা প্রধান মন্ত্রী শ্রী নরেন্দ্র মোদীগা উনখ্রে।

মপাল থৌরম পুবা মন্ত্রীনা য়ু.এ.ই.গী রাস্ত্রপতি অমসুং ক্রাউন প্রিন্সকী মায়কৈদগী নুংঙাইবা ফোংদোকপা অমসুং য়াইফ–পাওজেলশিং পাওদমখি।

য়ু.এ.ই.দা মহাক্কী মমাংগী খোংচৎ মনুংদা মহাকপু তরাম্না ওকপীখিবা অদু নৌহৌনা নীংশিংলদুনা প্রধান মন্ত্রীনা মপাল থৌরম পুবা মন্ত্রীবু রাস্ত্রপতি অমসুং ক্রাউন প্রিন্সকী মফমদা হকচাং ফবা, নুংঙাইবা অমদি হিরম খুদিংমক্তা মায় পাক্নবা মহাক্কী য়াইফ–পাওজেল পাওদমবীনবা হায়জখি। হৌখিবা চহী মঙাদা লৈবাক অনিগী লৈনরিবা মরী হেঙ্গৎলকপদসু মহাক্না নুংঙাইবা ফোংদোকখি।

মপাল থৌরম পুবা মন্ত্রীনা হায়খি মদুদি ভারত – য়ু.এ.ই.গী মরী অসি কৈদৌনুংদা ফনা লৈরক্ত্রি। মহাক্না লৈবাক অনিমক্কী মীয়ামগী মরক্তা কান্নবা পুরক্নবগীদমক অমনা অমগী তেংবাং পীনবা হেঙ্গৎহনবা অমসুং লমদম অসিদা শান্তি, চাউখৎপা অমসুং তংদু লৈতাবা পুরক্নবা য়ু.এ.ই.না য়েংলিবা মিৎয়েং অদুসু খঙহনখি।

য়ু.এ.ই.না লুচিংদুনা ললোন–ইতিক অমসুং ইকোনোমী, ইনর্জী, তুরিজম অমসুং মীয়ামগী মরক্তা মরী লৈনহনবা য়াওনা মখল খুদিংদা তেংবা পীননবা অসি অৱাংবা থাক্তা পুখৎনবা মহাক্কী অচেৎপা ৱাফমশিং অদু প্রধান মন্ত্রীনা অমুক হন্না ফোংদোকখি।