ভারতকী প্রধানমন্ত্রী

মালেমগী ক্লাইমেত মীফম শীনবীবগীদমক ঐনা য়ু.এন.গী জনরেল সেক্রেতরীবু থাগৎচরি।

মমাং চহিদা চেম্পিয়ন ওফ আর্থ এৱার্দ ফংলবা মতুংদা, য়ুনাইতেদ নেসন্সতা ৱা ঙাংবা অসি মসিনা ঐগী অহানবনি। ঐগী ন্যু য়োর্ক খোঙচৎ মনুংদা ক্লাইমেতকী মতাংদা ঐগী অহানবা মীফম পাংথোকপা অসিদা ঐহানবা অপেনবা পোকই।

শক্নাইরবশিং,

অইং-অশাগী খল কাইরকপা থেংননবা তোঙান-তোঙানবা লৈবাকশিংনা থবক কয়া পায়খৎলি।

করিগুম্বা ঐখোয়না অইং-অশাগী খল কাইরকপগী অকিবা অসি মায়োক্নবা তারবদি, হৌজিক ঐখোয়না পায়খৎলিবা অসি খক্না মতি চাবা নত্তে হায়বা ঐখোয়না য়াগদবনি।

ঙসি দরকার ওইরিবা অসিদি, এজুকেসন্দগী হৌরগা ভেল্যু অমসুং পুন্সি মহিংদগী চাউখৎপগী ফিলোসোফী ফাওবা কোনশিনবা অপুনবা থৌরাং অমা পায়খৎপনি। ঐখোয়না মথৌ তারিবা অসিদি ৱাখল্লোন হোংহন্নবা মালেমগী মীয়ামগী খোঙজং অমা চংশিনবনি।

মহৌশাবু ইকায়খুম্নবা, মহৌশাগী লন-থুমশিং লিক্না শীজিন্নবা, দরকার ওইবা হন্থহনবা অমসুং ঐখোয়না ঙমগদবা থাক্তা হিংনবা হোৎনবা পুম্নমক অসি ঐখোয়গী চৎন-লোনচৎশিং অমসুং হৌজিক পাংথোক্লিবা থবকশিংনি। মীহৌ চাউদবা অসি ঐখোয়বু লমজিংলিবা ৱাখল্লোন্নি।

মরম অদুনা ঙসিদি ভারতনা ৱাফম অসিগী মতাংদা মরুওইনা খন্নবদা নত্তনা, থবক ওইনা পাংথোকপা য়াগদবা থৌরাং অমসুং লম্বী অমা উৎলে। ৱা শংবাই অমা ঙাংবদগী থবক মেরুক অমা পাংথোকপনা হেন্না মমল য়াম্মি হায়বা ঐখোয়না থাজৈ।

ভারত্ত, ঐখোয়না নন ফোসিল ফুয়েল শীজিন্নবা হেনগৎহল্লে অমসুং ২০২২ ফাওবদা ঐখোয়না পুথোকপা ঙম্বা রিন্যুয়েবল ইনর্জী গিগাৱাত ১৭৫ হেন্না অমসুং তুংদা গিগাৱাত ৪৫০ ফাওবা পুথোক্নবা ঐখোয়না থৌরাং তৌরি।

ভারত্ত ই-মোবিলিতীগী খুৎথাংদা ঐখোয়গী ত্রান্সপোর্ত সেক্তর মৈখু চেনহন্দনবা ঐখোয়না থৌরাং তৌরি।

পেত্রোল অমসুং দিজলদা বাইওফুয়েল য়ানবগী চাং হেনগৎহন্নবা ভারতসু থবক পায়খৎলি।

ইমুং মিলিয়ন ১৫০দা ঐখোয়না চাক থোংনবা গ্যাস ফংহল্লে।

ঈশিং লোকশিন্নবা, নোংগী ঈশিং লোকশিন্নবা অমসুং ঈশিং ফংফমশিং শেমগৎনবা ঐখোয়না জল জীবন মিসন হৌদোক্লে। মসিগীদমক লাক্লিবা চহি খরা অসিদা ভারতনা বিলিয়ন দোল্লর ৫০ রোম চাদিং তৌগদৌরি।

মালেমগী থাক্তা, ঐখোয়গী ইন্তর্নেস্নেল সোলর এল্লাইন্স কেম্পেন অসিদা লৈবাক ৮০ শরুক য়ারে। ভারত অমসুং সুইদেন্না অতোপ্পা লৈবাকশিংগা লোয়ননা ইন্দস্ত্রী ত্রান্সিসন ত্রেক্কী মখাদা লিদরসিপ গ্রুপ শেমগৎলে। মসিগী থৌরাং অসিনা অনৌবা তেক্নোলোজী পুথোকপগী মতাংদা সরকারশিং অমসুং লনাই কম্পেনীশিং মতেং পীননবা ফিদা অমা পীগনি। মসি ইন্দস্ত্রীগী কার্বোন য়ামদনা পুথোক্নবা লম্বীশিং শেমগৎপদা মতেং পাংগনি।

ঐখোয়গী ইনফ্রাস্ত্রকচরশিং মহৌশাগী অমাং-অতাশিংদগী ঙাকথোক্নবা, ভারতনা অমাং-অতাশিংদগী ঙাকথোকপা ঙম্বা ইনফ্রাস্ত্রকচরশিং শেমগৎনবা চুংশিন্নবা অমা হৌদোক্লে। মসিগী চুংশিন্নবা অসিদা শরুক য়ানবা ঐনা মেম্বর লৈবাকশিংদা খঙহল্লি।

অগস্ত ১৫দা পাংথোকখিবা চহি অসিগী ভারতকী নীংতম্বা নুমিৎ থৌরমদা, অমুক খক শীজিন্নবা প্লাস্তিক শীজিন্নবা লেপ্নবা মীয়ামগী খোঙজং অমা হৌনবা ঐখোয়না তকশিনখি। মসিনা মালেমগী থাক্ত অমুক খক শীজিন্নবা প্লাস্তিক্কী ফত্তবশিং খঙহনগনি হায়না ঐনা থাজৈ।

শক্নাইরবশিং,

ভারতনা দোল্লর মিল্লিয়ন ১ পুথোক্তুনা, য়ু.এন. বিল্দিংগী য়ুমথক্ত সোলর পেনেলশিং হয়েং ঐখোয়না শঙ্গারগনি হায়না লাউথোকপদা ঐ হরাওবা ফাওই।

ৱা ঙাংবগী মতম লোইরে; হৌজিক মালেম অসিনা থবক মথৌ তারি।

অদোম্বু থাগৎচরি। অদোম্বু ঙমখৈ লৈতনা থাগৎচরি।

(দিসক্লেমর: প্রধান মন্ত্রীগী ৱারোল হিন্দী লোন্দা পীখি। মসি ৱারোল অদুদগী চাউরাক্না হন্দোকপনি।)