ভারতকী প্রধানমন্ত্রী

ইং ২০১৯গী সেপ্তেম্বর ২৩দা য়ুনিবর্সেল হেল্থ কোভরেজদা পাংথোকপা অহানবা য়ুনাইতেদ নেসন্স জেনরেল এসেমব্লিগী অৱাংবা থাক্কী মীফমদা প্রধান মন্ত্রী শ্রী নরেন্দ্র মোদীনা ৱা ঙাংখ্রে।

প্রধান মন্ত্রীনা মহাক্কী ৱারোলদা য়ুনিবর্সেল হেল্থ কোভরেজ ফংনবা ভারতনা লৌখৎলিবা অচৌবা খোংথাংশিং অদু পাউদমখি। মহাক্না হায়খি মদুদি হকচাং ফবা হায়বসি লৈনা-তিন্নাদগী নান্থোকপা অদু খক্তা নত্তে। হকচাং ফবা পুন্সি অমা হায়বসি মীপুম খুদিংমক্কী অধিকারনি।

মহাক্না হায়খি মদুদি ভারতনা হিরম অসিগী মায়কৈদা অচৌবা খোংথাং অমা লৌখৎলে অমসুং হেল্থকেয়ারগী মরুওইবা য়ুম্বী মরিদা থবক তৌরি:

– ঙাকথোকপা ঙম্বা হেল্থকেয়ার

– অহোংবা মমলগী হেল্থকেয়ার

– সপ্লাই হেঙ্গৎহনবা

– মিসন মোদ চৎনহনবা

প্রধান মন্ত্রীনা হায়খি মদুদি যোগ, অয়ুরবেদ অমসুং ফিৎনেসতা অখন্নবা মীৎয়েং চংলি অমদি ৱেলনেস সেন্তর ১,২৫,০০০ হেন্না শেমগৎপনা ঙাকথোকপা ঙম্বা হেল্থকেয়ার প্রমোৎ তৌবদা মতেং ওইরি, দাইবেতিজ, ব্লদ প্রেসর, দিপ্রেসন অসিনচিংবা লাইফ স্তাইল লাইনাশিং কন্ত্রোল তৌবদা মতেং পাংলি। ই-সিগরেতশিং থিংবা, ক্লিন ইন্দিয়া কেম্পেনগী খুত্থাংদা এৱারনেস হেঙ্গৎপা অমসুং তিকা থাবগী কেম্পেনশিংনসু হকচাং ফগৎহনবদা থৌদাং লৌরি।

প্রধান মন্ত্রীনা হায়খি, “অহোংবা মমলগী হেল্থকেয়ার ফংহন্নবা, ভারতনা মালেমগী খ্বাইদগী চাওবা হেল্থ ইন্সুরেন্স স্কিম আয়ুশ্মান ভারত পায়খৎলি। স্কিম অসিগী মখাদা, লাইরবা মিলিয়ন ৫০০বু চহীগী ওইনা লুপা ৫,০০,০০০ ফাওবা লেম্না লায়েংবগী খুদোংচাবা পীরি। অখন্নবা ফার্মাসী ৫,০০০ হেন্না হাংদোক্তুনা মরুওইবা হিদাক লাংথক মখল ৮০০ হেন্না অহোংবা মমলদা ফংহল্লে।”

মগুন লৈবা মেদিকেল এদজুকেসন অমসুং মেদিকেল ইনফ্রাস্ত্রকচর দিবেলপমেন্ত ফংহন্নবা ভারতনা লৌখৎলিবা পুৱারী ওইরবা খোংথাং কয়াসু মহাক্না পনখি।

হেল্থ সেক্তরদা মিসন মোদ ইন্তরবেন্সশিংগী মতাংদা, প্রধান মন্ত্রীনা মমা অমসুং অঙাংগী মচী ওইবা চিঞ্জাক্কী চাং হেঙ্গৎহনবদা নেস্নেল ন্যুত্রিসন মিসন্না লৌরিবা থৌদাংগী মতাংদা ঙাংখি। ইং ২০৩০ ফাওবদা ত্যুবরক্যুলোসিস মুথৎনবা মালেমনা থমখিবা পান্দম অদুদগী চহী মঙা ঙনখৎনা ইং ২০২৫ ফাওবদা ত্যুবরক্যুলোসিস মুথৎনবা ভারতকী ফিরেপ অদু মহাক্না পাউদমখি।

ভারতনা হোৎনরিবশিং অসি ঙমখৈ লৈতে। ভারতনা অতোপ্পা লৈবাক কয়ামরুমদা, অখন্ননা আফ্রিকা লৈবাকশিংদা তেলে-মেদিসিনগী লম্বী য়াওনা অহোংবা মমলগী হেল্থ কেয়ার ফংহন্নবা তেংবাংলি।

“য়ুনিবর্সেল হেল্থ কোভরেজ : মুভিং তুগেদর তু বুইল্দ এ হেল্দিয়র ৱর্ল্দ” হায়বা হিরম অসিগী মখাদা মীফম অসি পাংথোকখি, মদুনা য়ুনিবর্সেল হেল্থ কোভরেজকী মায়কৈদা খোংজেল হেঙ্গৎহন্নবা পান্দম থম্লি। য়ুনাইতেদ নেসন্স মেম্বর স্তেতস চাউরাক্না ১৬০না মীফম অসিদা ৱা ঙাংগনি।

ইং ২০১৫দা লৈবাকশিং অমসুং সরকারশিংগী মকোকথোংবশিংনা ইং ২০৩০ ফাওবদা য়ুনিবর্সেল হেল্থ কোভরেজ ফংনবগীদমক ৱারেপ অমা লৌখি।