ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা হান্নগী প্রধান মন্ত্রী দোক্তর মনমোহন সিংহ নিংশিংদুনা অৱাবা ফোঙদোকপগী ৱারেপ অমা লৌখ্রে। মন্ত্রীমন্দলনা মিনিত অনি তুমিন্না লেপতুনা দোক্তর মনমোহন সিংহগী মফমদা ইকায়খুম্নবা উৎখ্রে।

নুমিৎ তরেৎনি 01.01.2025 ফাওবা সরকারনা অৱাবা ফোঙদোক্না লাউথোক্লে।

অৱাবা ফোঙদোক্লিঙৈ মনুংদা, ভারত শীনবা থুংনা জাতিগী ফিরাল তঙ্খায় চিংথদুনা পাইহনগনি।

নুমিৎ তরেৎনি 01.01.2025 ফাওবা মপান লৈবাকশিংদা লৈরিবা ভারতকী মিসনশিং/হায় কম্মিসনশিংদা জাতিগী ফিরাল তঙ্খায় চিংথদুনা পাইহনগনি।

দোক্তর মনমোহন সিংহ লৈঙাক্না ইকায়খুম্নবা উৎতুনা অরোইবা মথৌ-মঙম পাংথোক্কনি। লৈঙাক্না ইকায়খুম্নবা উৎতুনা অরোইবা মথৌ-মঙম পাংথোকপা নুমিত্তা কেন্দ্র সরকারগভী ওফিসশিং অমসুং সি.পি.এস.য়ুশিং ছুতি লাউথোক্কনি।

ৱারেপকী মপুংফাবা ৱারোল মখাদা পীরি:-

দিশেম্বর 26, 2024 দা নিউ দিল্লিগী ওল ইন্দিয়া ইন্সতিতুৎ ওফ মেদিকেল সাইন্সেসতা ভারতকী হান্নগী প্রধান মন্ত্রী দোক্তর মনমোহন সিংহ লৈখিদবদা মন্ত্রীমন্দলনা অৱাবা ফোঙদোক্লি।

⁠ভারত খায়দোক্নদ্রিঙৈদা সেপ্তেম্বর 26, 1932 দা পঞ্জাব প্রোভিন্সকী ৱেস্ত পঞ্জাবকী গাহ খুঙ্গংদা পোকখিবা দোক্তর সিংহ লাইরিক য়াম্না ফনা হৌরকখি। মহাক 1954 দা পঞ্জাব য়ুনিভর্সিতিদগী ইকোনোমিক্সতা  মাস্তর দিগ্রি পায়খি অমসুং 1957 দা ফার্স্ত ক্লাস ওনরসতা কেমব্রিজ য়ুনিভর্সিতিদগী ইকোনোমিক্সতা মহাক্কী ত্রাইপোস ফংখি। মহাক 1962 দা ওক্সফোর্দ য়ুনিভর্সিতিনা দি.ফিল দিগ্রি অমা পীখি।

⁠দোক্তর সিংহ পঞ্জাব য়ুনিভর্সিতি, চান্দিগরদা সেনিয়র লেকচরর অমা ওইনা থবক তৌবা হৌরকখি অমসুং হায়রিবা য়ুনিভর্সতিসি অসিদা ইকোনোমিক্সকী প্রোফেসার ওইখি। 1969 দা, মহাক দিল্লি য়ুনিভর্সিতিগী দিল্লি স্কুল ওফ ইকোনোমিক্সতা ইন্তরনেসনেল ত্রেদকী প্রোফেসার অমা ওইখি। দোক্তর সিংহ 1971 দা মতম অদুগী ফোরেন ত্রেদ মিনিস্ত্রিদা ইকোনোমিক এদভাইজর ওইখি। মহাক ফাইনান্স মিনিস্ত্রিগী চীফ ইকোনোমিক এদভাইজর (1972-76), ইকোনোমিক এফেয়ার্স দিপার্তমেন্তগী সেক্রেতরি (নবেম্বর 1976 দগী এপ্রিল 1980 ফাওবা), প্লান্নিং কম্মিসনগী মেম্বর সেক্রেতরি (এপ্রিল 1980 দগী সেপ্তম্বর 1982 ফাওবা) অমসুং রিজার্ব বেঙ্ক ওফ ইন্দিয়াগী গভর্নর (সেপ্তম্বর 1982 দগী জনুৱারি 1985 ফাওবা ) ওইখি।

⁠দোক্তর সিংহদা মনা কয়া অমসুং ইকায়খুম্নবা কয়া পীখ্রে, মশক নাইবা মনাশিংগী মনুংদা ভারতকী অনিশুবা খ্বাইদগী চাউবা মীচমদা পীবা ইকায়খুম্নবা, পদ্ম বিভুষন(1987), ইন্দিয়ান সাইন্স কংগ্রেসকী জৱাহরলাল নেহরু বার্থ সেন্তেরনরি এৱার্দ (1993) অমসুং কেমব্রিজ য়ুনিভর্সিতিগী অদম স্মিৎ প্রাইজ(1956) য়াওরি।

দোক্তর মনমোহন সিংহ 1991 দগী 1996 ফাওবা ভারতকী ফাইনান্স মিনিস্তর ওইখি। শেন-থুমগী অওনবা পুরক্নবা থৌশিল অমা চৎনবগীদমক মহাক মীয়াম্না খঙনখি। দোক্তর সিংহ মে 22, 2004 দা ভারতকী প্রধান মন্ত্রী ওইখি অমসুং মে 2009 ফাওবা প্রধান মন্ত্রী ওইখি। মহাক অনিশুবা তার্মদা মে 2009 দগী 2014 ফাওবা প্রধান মন্ত্রী ওইখি।

⁠ঐখোয়গী লৈবাক্কী পুন্সিদা দোক্তর মনমোহন সিংহনা মহাক্কী মমি তাহল্লমখি। মহাক লৈখিদবা অসিদা, লৈবাক অসিনা শক্নাইরবা রাজনিতিৱালা অমা, শক্নাইরবা ইকোনোমিস্ত অমা অমসুং শক্নাইরবা লুচিংবা অমা মাঙজরে।

সরকার অমসুং লৈবাক্কী মহুৎশীন্দুনা লৈখিদ্রবগী ইমুংগী অৱাবদা মন্ত্রীমন্দলনা অৱাবা ফোঙদোকচরি”।    

***