ভারতকী প্রধানমন্ত্রী
প্রধান মন্ত্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা মখাগী ৱাফমশিং অসিদা অয়াবা পীরে:
চাউরাকপা শক্তমশিং:
অকুপ্পশিং:
অনৌবা এ আই আই এম লিংখৎপা অসিদা হোস্পিতাল শাবা, মেদিকেল অমসুং নর্সিং কোর্সশিংগী তিচিং ব্লোকশিং শাবা, লৈনবা য়ুমশিং শাবা, মরি লৈনবা খুদোংচাবশিং শেমগৎপগী থবকশিং ন্যু দিল্লীগী এ আই আই এম এসগী মওংদা শেমগৎকনি অমসুং পি এম এস এস ৱাইগী অহানবা ফেজগী মখাদা অনৌবা এ আই আই এম এস তরুক লিংখৎকনি। অনৌবা এ আই আই এম এস লিংখৎপগী পান্দমদি লমদম অদুদা অফবা মখলগী লায়েংবা, মেদিকেল এজুকেসন, নর্সিং এজুকেসন অমসুং রিসর্সকী খুদোংচাবা ফংহনবনি।
ইন্সতিত্যুৎ অসিদা ফম্মুং ৭৫০ লৈবা হোস্পিতাল অমা লৈগনি অমসুং মসিদা ইমর্জেন্সী/ত্রোমা ফম্মুংশিং, অয়ুশ ফম্মুংশিং, লনাই ফম্মুংশিং, আই সি য়ু, স্পেসিয়েতী অমসুং সুরপ স্পেসিয়েতী ফম্মুংশিং য়াওগনি। মসিগী মথক্ত, মেদিকেল কোলেজ অমা, অয়ুস ব্লোক অমা, ওদিওতোরিয়ম, অহিং লেকফম, গেস্ত হাউস, হোস্তেল অমসুং লৈনবা য়ুমশিং য়াওগনি। হায়রিবা ইন্সতিত্যুৎশিং অসিগী চংগদবা শেনফমশিং হেল্থ এন্দ ফেমিলী ৱেলফিয়র মিনিস্ত্রীগী পি এম এস এস ৱাইগী প্লান বজেৎতগী গ্রান্ত-ইন-এদ ওইনা পীগনি।
কান্নবশিং:
থবক ফংহনবা:
অনৌবা এ আই আই এম এস লিংখৎপদা তোঙান-তোঙানবা ফেকলতী অমসুং নন-ফেকলতী পোস্তশিংদা চাউরাক্না মীওই ৩০০০ রোম থবক পীবা ঙমগনি। মসিগী মথক্ত, অনৌবা এ আই আই এম এসগী অকোইবদা দুকানশিং অমসুং কেন্তিনশিং হাংদোকপগী খুদোংচাবা ফংহনগনি। অনৌবা এ আই আই এম এসগী বিল্দিংশিং শাগৎলকপা মতমদা শিন্মী কয়া থবক মরাং কাইনা পীবা ঙমগনি।
নুংগী ৱারোল:
লৈবাক অসিগী মফম কয়াদা অৱাংবা থাক্কী অনা-লায়েংগী খুদোংচাবশিং থোং মান্ননা ফংদবগী খুদোংচাদবশিং মায়োক্নরিবা অসি কোকহন্নবা প্রধান মন্ত্রী শ্বাস্থ্য সুরকশা য়োজনানা রাজ্যশিংদা মগুন লৈবা মেদিকেল এজুকেসনগী খুদোংচাবশিং হেন্না লৈহন্নবা পান্দম থম্লি। ২০১৯-২০গী মরক্কী বজেৎতা হরিয়নাদা অনৌবা এ আই আই এম এস অমা লিংখৎনবা ফাইনান্স মিনিস্তরনা লাউথোকখিবনি। অনৌবা এ আই আই এম এস অসি শাবদা চংগদবা শেনফমশিং কেন্দ্র সরকারনা পুথো্ক্কনি।
***
