ভারতকী প্রধানমন্ত্রী

গুজরাতকী রাজ্যপাল অচার্য় দেবব্রাতজী, মুখ্যমন্ত্রী বিজয় রুপানীজী, কেন্দ্র অমসুং রাজ্য সরকারশিংগী মরূপশিং, নাইজেরিয়া, ইন্দোনেসিয়া অমসুং মালীগী মীহুৎশিং, মালেমগী তোঙান-তোঙানবা লৈবাকশিংগী মিসনশিংগী মকোকশিং, লৈবাক্কী মফম কয়াদগী লাকপা স্বচ্ছগ্রহীশিং, ঐগী সরপঞ্জ মরূপশিং অমসুং ইচল-ইচেশিং!

ঙসি সাবরমতীগী মপান্দা তিল্লিবা লৈবাক অসিগী ম্যুনিসিপালিতীশিং অমসুং ম্যুনিসিপাল কোর্পোরেসনশিংগী মেম্বরশিং; নখোয় ময়াম্না হৌখিবা চহি ৫ অসিদা কৎথোকপগা লোইননা থবক পাংথোকপদগী বাপুগী মঙলান মঙফাওনবা ঙম্বনি।

মসিগী শেংলবা সাবরমতীগী মপান্দগী ঐনা লৈবাক অসিগী মপা মহাত্মা গান্ধী অমসুং চম্না হিংবগী খুদম অমা ওইরিবা হান্নগী প্রধান মন্ত্রী লাল বহাদুর শাস্ত্রীগী মফমদা ঐগী ইকায়খুম্নবা উৎচরি।

মরূপশিং,

বাপুগী ১৫০শুবা মপোক নুমিৎ, স্বচ্ছ ভারতকী মরুওইবা থৌরম অমসুং নবরাত্রী অসি মতম অমতদা পাংথোকপা অসি য়াম্না তাংনা থোকপা অমনি। লৈবাক্কী মফম কয়াদগী লাকপা ঐখোয়গী সরপঞ্জ ইনাওশিং অমসুং ইচলশিং নখোয় গারবা উবা ফংলবরা? নখোয় গারবা য়েংবা চৎতবরা?

মালেম পুম্বনা বাপুরগী মপোক কুমওন থৌরম পাংথোক্লি। য়ু.এন.না মসিগী অখন্নবা থৌরম অসি নীংশিংদুনা নুমিৎ খরনিগী মমাংদা পোস্তেজ স্তাম্প অমা পুথোকখি। ঙসিসু মফম অসিদা পোস্তেজ স্তাম্প অমসুং শেনয়েক ফোংলে। বাপুগী ইথিল পীখিবা অমসুং ৱারেপ লৌখিবা মফম অসিদগী ঐনা মালেম পুম্নমক থাগৎচরি।

মরূপশিং,

মফম অসিদা লাক্ত্রিঙৈদা ঐ সাবরমতী আশ্রমদা চৎলুরে। ঐনা ঐগী পুন্সিদা মফম অদুদা কয়ারক চৎপগী খুদোংচাবা ফংখ্রে। ঐনা চৎপা খুদিংগী মফম অদুদা বাপু লৈবগী ইথিল ঐঙোন্দা ফাওখি। সাবরমতী আশ্রমদগী মহাক্না স্বচ্ছগ্রহ অমসুং সৈত্যগ্রহ হৌদোকখিবনি। মসিগী সাবরমতীগী মপান্দগী মহাত্মা গান্ধীনা মহাক্কী অচুম্বগী চাংয়েংশিং পাংথোকখিবনি।

ঙসিদি সাবরমতীগী মফম অসিদা স্বচ্ছগ্রহ য়াম্না চাউনা মাইপাকপা উবা ফংলে। থৌরম অসি ঐখোয় পুম্নমক্কী হরাওবা অমসুং চাউথোকচবা অমনি। ঐগী ওইনা সাবরমতী তুরেল মপান্দা মসিগী থৌরম অসি শীনবা অসি হরাওবা অমনি।

মরূপশিং,

ঙসিদি ভারতকী খুঙ্গং মশানা লমহাংদা মাংশিন্দ্রে হায়না লাউথোকচরে। মসি স্বচ্ছ ভারত অভিয়ান মাইপাকপগী হৌরকফম অমনি, মসিদা মীয়াম্না হৈনীংনা শরুক য়াবা, মশা মথন্থ পুক্নিং থৌগৎচবা উবা ফংলি। ঙসিনা ঐনা মরুওইনা লৈবাক অসিগী খুঙ্গংশিংদা লৈরিবশিং, ঐখোয়গী সরপঞ্জশিং অমসুং স্বচ্ছগ্রহীশিং থম্মোয় শেংনা থাগৎচরি। মফম অসিদা স্বচ্ছ ভারত এৱার্দ ফংলিবশিং ঐনা থাগৎচরি।

মরূপশিং,

ঙসি ঐ পুৱারী অসি অমুক হঞ্জিল্লকপগুম ফাওই। বাপুনা নীংতম্বা লৈবাক অমগীদমক কৌবা মতমদা ভারত মচা লাখ কয়ানা সৈত্যগ্রহগী লম্বীদা তুংইল্লকপগুম, মসিগা চপ মান্নবা মওংদা ভারত মচা ক্রোর কয়ানা থৱায়-হকচাং য়াওনা লু-নানবগী থবকশিং শৌগৎলে। চহি মঙাগী মমাংদা, ঐনা লাল কিলাদগী লৈবাক্কী মীয়ামদা অনানবা ভারত অমগী অপীল তৌবা মতমদা, মতম অদুদা মীয়ামগী থাজবা অমসুং বাপুগী মুৎনাইদ্রবা পাউজেলশিং খক্তা লৈখি। বাপুনা হায়রম্বা অমা লৈ মদুদি ঐখোয়না মালেম অসিদা অহোংবা অমা পুরকপা পাম্লবদি, অহানবদা মদু ঐখোয় ইশাদগী পুরক্কদবনি।

মহাক্কী লাইৱা মতুংইন্না, ঐখোয়না শুমজিৎ পায়খৎখি। চহি, খুন্নাই অমসুং শেন-থুমগী অনেম-অৱাংগী খেন্নবা লৈতনা, মীপুম খুদিংমক মসিগী লু-নানবগী থবক অসিদা মতেং পাংখি।

করিগুম্বা ইচানুপী অমনা লুহোংদ্রিঙৈ মমাংদা তোইলেতকী ফিবম হংলবদি, তোইলেত অদু ‘ইজৎঘর’গী থাক অমা ফংলবনি। মতম অমদা তোইলেতকী ৱারী অসি লোন্না শানরম্বা ওইরবসু, লৈবাক অসিগী মরুওইবা ৱাফম অমা ওইরে। মসিগী লু-নানবগী খোঙজং অসি বোল্লীৱুদতগী হৌরগা শান্নবুং ফাওবগী মীওই খুদিংমক্না পুক্নিং থৌগৎলি অমসুং ইথিল পীরি।

মরূপশিং,

ঐখোয়গী মাইপাকপদা ঙসিদি মালেম অসি ঙক্লে। ঙসিদি মসিগীদমক মালেম পুম্নমক্না ঐখোয়দা মনা পীরি অমসুং ঐখোয়দা ইকায়খুম্নবা উৎলি। থা ৬০গী মনুংদা মীওই ক্রোর ৬০দা তোইলেত ফংহনবা অমসুং তোইলেত ক্রোর ১১ হেন্না শাখিবা অসিদা অঙকপা পোক্নরি। ঐনা নুপীমচাশিং চিংনবা অমতা লৈতনা স্কুল চৎপা উবদা, থাগৎপা অমসুং অতৈ মশিংদগী হেন্না অপেনবা পোকই।

ইমা অমসুং ইচল ক্রোর কয়া য়াম্না ৱানা অমম্বা মতম ঙাইবগী অৱাবদগী মনীংতম্বদা ঐ হরাওই। লায়না কয়াদগী মীওই কয়াগী থৱায়শিং কনবা ঙমবদা ঐ অপেনবা পোকই। লু-নানবগী লায়না কয়া লায়েংবদা শেনফম কয়া চাদিং তৌবদগী কন্দুনা লায়রবা হন্থহনবগীদমক ঐনা অপেনবা পোকই। মসিগী খোঙজং অসিনা খুঙ্গং অমসুং ত্রাইবেলশিংনা খুন্দাবা মফমশিংদা মীওই কয়াদা অনৌবা থবকশিং ফংহনবদা ঐ অপেনবা পোকই। মমাংদা, নুপাশিং খক্তনা হেদ মিস্ত্রী ওইরম্বনি, অদুবু হৌজিক ইচলশিংসু হেদ মিস্ত্রী ওইনা থবক শুনবগী খুদোংচাবা পীরে।

মরূপশিং,

স্বচ্ছ ভারত অভিয়ান্না থৱায় কয়া কল্লি অমসুং পুন্সি মহিং ফগৎহল্লি। য়ুনিসেফনা খোৎপা অমগী মতুংইন্না, হৌখিবা চহি ৫ অসিদা স্বচ্ছ ভারতনা মরম ওইদুনা ভারতকী ইকোনোমীদা লুপা ক্রোর লাখ ২০ কনবা ঙমখি। মসিনা ভারত্তা থবক লাখ ৭৫ হেন্না ফংহনখি, মসিগী মনুংদা অয়াম্বা খুঙ্গংশিংগী ইনাওশিং অমসুং ইচলশিংনা ফংখি।

মসিনা অঙাংশিং লাইরিক তম্বা, ঐখোয়গী পোৎথোক-চাথোক হেনগৎহনবা অমসুং ইন্ত্রপ্রিনরশিপ্তা অফবা ইথিল অমা পীখি। মসিনা লৈবাক অসিদা ইচানুপীশিং অমসুং ইচলশিংগী ইকায়খুম্নবা ঙাকপদা অওনবা অমা পুরকলে। মহাত্মা গান্ধীনা মশা-মরোমদোম লেপচবা অমসুং থৌনা লৈবা খুঙ্গং, লায়রবা অমসুং নুপীগী নোমুনা অমা পামখি। মসি মহাত্মা গান্ধীগী স্বরাজগী থৱায়নি। মসিগীদমক মহাক্কী পুন্সি কৎথোকখি।

মরূপশিং,

হৌজিক মাংদা তারিবা ৱাহংদি – মসি ঐখোয়না কয়া য়াম্না মাইপাকপা ঙম্লবগে? পাউখুমদি চম্মি অমসুং অরাইবনি। ঙসি ঐখোয়না ফংলিবা অসি শুপ্নগী অহানবা থাক্নি। লু-নানবা ভারত অমগী ঐখোয়গী খোঙচৎ মখা চৎথগনি।

হৌজিক ঐখোয়না তোইলেতশিং শারে অমসুং মীয়াম তোইলেত শীজিন্নবগী হৈনবী লৈনবা পুক্নিং থৌগৎলি। মসিগী হৈনবী অসি লৈবাক্কী মশিং য়াম্লবা কাংলুপ অমদা লেংদবা অমা ওইহন্নবা হৌজিক ঐখোয়না অহোংবা পুরক্লে। সরকার, লোকেল বোদী, গ্রাম পঞ্চায়তশিংদা তোইলেত ফজনা লৈরে। হৌজিক তোইলেত লৈত্রিবশিং মসিগী মখাদা লৈহল্লগনি।

মরূপশিং,

সরকারনা হন্দক পায়খৎলিবা জলজীবন মিসন্না মসিদা মতেং পাংগনি। ঐখোয়না ঙমজবা মওংদা য়ুমশিংদা, খুঙ্গংশিংদা অমসুং লৈকায়শিংদা ঈশিং অমুক লৈহন্নবা ঈশিং অমুক হন্না শীজিন্নগদবনি। করিগুম্বা ঐখোয়না মসিগী থবক অসি পাংথোক্লবদি মসিনা মীয়াম্না তোইলেত শীজিন্নবদা অচৌবা মতেং পাংগনি। জলজীবন মিসনগীদমক সরকারনা লুপা ক্রোর ৩.৫ চাদিং তৌনবা ৱারেপ লৌরে। অদুবু লৈবাক অসিগী মীয়াম্না থৱায় য়াওনা শরুক য়াদ্রবদি মসি থবক ওইনা পাংথোকপা অরুবা অমা ওইগনি।

মরূপশিং,

লু-নানবা, অকোয়বগী ফিবম ঙাক-শেনবা অমসুং থৱায় পানবশিং ঙাকপা অসি মহাত্মা গান্ধীনা পামজবা হিরম অহুম্নি। হায়রিবা অহুম অসিদা প্লাস্তিক্না অচৌবা শিংনবা অমা ওইরি। মরম অদুনা ২০২২ ফাওবগী মনুংদা লৈবাক অসিদা অমুকখক শীজিন্নবা প্লাস্তিক লৈহন্দনবা ঐখোয়না পান্দম অমা থম্লে। হৌখিবা চয়োল অহুম অসিদা মসিগী খোঙজং অসিদা লৈবাক পুম্নমকনা ইনোৎ অমা পীরে। হায়রিবা মতম অসিগী মনুংদা ফত্তবা প্লাস্তিক তন লিশিং ২০ রোম খোমজিল্লে। হায়রিবা মতম অসিদা পোৎ-চৈ পুবদা শীজিন্নবা প্লাস্তিক খাউ শীজিন্নবা হন্থরে।

ঙসিদি লৈবাক অসিগী মীওই ক্রোর কয়ানা অমুক খক শীজিন্নবা প্লাস্তিক শীজিন্নদনবা ৱারেপ লৌরে হায়বা ঐ খঙলে। মসিনা অকোয়বগী ফিবমদা কান্নবা পীগনি, লম্বীশিং অমসুং ঐখোয়গী শহরশিংগী অমোৎপা পুবা সিৱেজশিং ফুনজিনবগী খুদোংচাদবশিং কোকহনগনি অমসুং ঐখোয়গী শা-শনশিং অমসুং সমুদ্রগী থৱায় পানবশিং ঙাক-শেনগনি।

মরূপশিং,

ঐখোয়গী খোঙজং অসিগী মরুওইবদি লমচৎ-শাজৎ হোংহনবনি হায়বসি ঐনা অমুক হন্না নীংশিংবা পাম্মি। মসিগী অহোংবা অসি মশাদগী হৌগদবনি। মসিগী পারা অসি ঐখোয়না মহাত্মা গান্ধী অমসুং লাল বহাদুর শাস্ত্রীজীদগী তমখি।

লৈবাক অসিদা চীঞ্জাক তাংবা মায়োক্নবা মতমদা, শাস্ত্রীজীনা লৈবাক মীয়ামদা মখোয়গী চাকচা-ইথক হোংনবা খঙহনখি, মদু মহাক্কী ইমুংদগী পাংথোকপা হৌখি। ঐখোয়গী ওইনসু মসিগী লু-নানবগী খোঙচৎ অসি ঐখোয়না পন্থুং য়ৌগদবা খোঙচৎ অমনি।

মরূপশিং,

ঙসিদি মালেম পুম্নমক্না মসিগী স্বচ্ছ ভারত অভিয়ানগী নমুনা অসি তম্বা পাম্লে অমসুং চৎনবা হৌরে। নুমিৎ খরনিগী মমাংদা, অমেরিকাদা ভারত্তী গ্লোবেল গোল কিপ্পর এৱার্দ পীবা মতমদা ভারতকী মাইপাকপা অসি মালেমদা খঙনরে।

ভারতনা মসিগী লৌশিং অসি অতোপ্পা লৈবাকশিংদা পীনবা মতম পুম্নমক্তা থৌরাং তৌদুনা লৈরি হায়না ঐনা য়ুনাইতেদ নেসন্সতা হায়খ্রে। ঙসি ঐখোয়গী ইরক্তা নাইজেরিয়া, ইন্দোনেসিয়া অমসুং মালী সরকারশিংগী মীহুৎশিং য়াওরি। নখোয়গী লু-নানবা অমসুং সেনিতেসনগীদমক মতেং পাংবদা ভারতনা হরাওগনি।

মরূপশিং,

মহাত্মা গান্ধীনা লৈবাক অসিদা অচুম্বা, অহিংসা, সৈত্যগ্রহ অমসুং মশা-মরোমদোম লেপচবগী লম্বী তাকখি। ঙসি ঐখোয়না লম্বী অদু ইন্নরি অমসুং অনৌবা মপাঙ্গল কনবা অনানবা ভারত অমা শেমগৎনবা থবক পায়খৎলি। বাপুনা সেনিতেসন অসি য়াম্না মরুওইনা লৌখি। অশেংবা মনাই অমগুম, ঙসি লৈবাক অসিগী খুঙ্গংনা মহাক্না হায়বা ইন্দুনা লু-নানবা ভারত অমগী থবক পাংথোক্লি। হকচাং ফবনা অশেংবা লন্নি হায়না গান্ধীজীনা থাজখি অমসুং লৈবাক অসিগী মীওই খুদিংমক মশা ফনা লৈহনবা পামখি। মসিগী ৱাখল্লোন অসি লৈবাক অসিনা য়োগগী নুমিৎ, আয়ুশ্মান ভারত অমসুং ফিত ইন্দিয়া মুভমেন্তগী খুৎথাংদা থবক ওইনা পাংথোক্লি।

গান্ধীজীনা ‘বসুধৈব কুতুম্বকম’দা থাজবা থমখি। অকোয়বগী ফিবম কাইহন্দনবা লৈবাক অসিগী অনৌবা থৌরাংশিং অমসুং থবকশিংগী খুৎথাংদা হৌজিক ভারতনা মালেমগী ওইনা শিংনবা কয়া থেংন্নবা মতেং পাংলি। বাপুগী মঙলানদি মনীংতম্বা অমসুং মশা মরোমদোম লেপচবা ঙম্বা ভারত অমা লৈহনবনি। হায়রিবা মঙলানশিং অদু মঙফাওন্নবা মেক ইন ইন্দিয়া, স্তার্তঅপ ইন্দিয়া অমসুং স্তেন্দঅপ ইন্দিয়া স্কিমশিংগী খুৎথাংদা ঐখোয়না থবক পায়খৎলি।

গান্ধীজীনা পামজবদি ভারতকী খুঙ্গং খুদিংমক মশা-মরোমদোম লেপচবা ঙমহনবনি। রাস্ত্রীয়া গ্রাম স্বরাজগী খুৎথাংদা মসিগী ৱারেপশিং অসি থবক ওইনা পাংথোকপা ঙম্নবা ঐখোয়না হোৎনরি।

ৱারেপ অমা লৌবা মতমদা খুন্নাইগী খ্বাইদগী মনিংদা লৈরিবশিংগী খন্ননবা গান্ধীজীনা ফোংদোক্লমখি। ঙসি ঐখোয়না উজ্জ্বালা, প্রধান মন্ত্রী অৱাস য়োজনা, জন ধন য়োজনা, সৌভাগ্যা য়োজনা অমসুং স্বচ্ছ ভারত অভিয়ান স্কিমশিং পায়খৎলে। হায়রিবা স্কিমশিং অসিগী খুৎথাংদা ঐখোয়না মহাক্কী লাইৱা অসি সরকারগী শরুক অমা ওইহল্লে।

তেক্নোলোজী শীজিন্নদুনা মীওই কয়াগী পুন্সি হিংবদা লাইহনবা বাপুনা পামখি। আধার, দাইরেক বেনিফিত ত্রান্সফর, দিজিতেল ইন্দিয়া, ভিম এপ অমসুং দিজী লোক্করগী খুৎথাংদা মীওই কয়া হিংবদা লাইহন্নবা ঐখোয়না হোৎনরি।

মরূপশিং,

মহাত্মা গান্ধীনা হায়রমখি মদুদি মালেম পুম্নমক্না লৈবাক অসিদগী কান্নবা লৌগদবা ভারত অমা শেমগৎপা মহাক্না পাম্মি। কনাগুম্বা অমা মরৈবাক নুংশিবা মীওই অমা ওইদনা মালেমগী মশক নাইবা অমা ওইবা য়ারোই হায়না গান্ধীজীনা ময়েক শেংনা ফোংদোকখি। মসিনা মরম ওইদুনা ঐখোয়না অহানবদা ঐখোয়গী অৱাবশিং কোকহন্নবা পাম্বৈশিং থিরি অমসুং মদুগী তুংদা ঐখোয়না মালেম অসি মতেং পাংবা ঙমগনি। ঙসি মসিগী মরৈবাক নুংশিবা অসিগী ৱাখল্লোন্দা ভারত মাংলোমদা চংশিল্লি।

বাপুনা মঙজবা ভারত; অনৌবা ভারত অমা শেম্লে। বাপুনা মঙজবা ভারত-লু-নানবা অমসুং অকোয়বগী ফিবম ঙাক-শেনবা থবক ওইনা পাংথোক্লে।

বাপুনা মঙজবা ভারত; মী খুদিংমক হকচাং ফগদবনি। বাপুনা মঙজবা ভারত; মমা অমসুং মচা খুদিংমক মচি ওইবা চিঞ্জাক চাগদবনি।

বাপুনা মঙজবা ভারত; নাগরিক খুদিংমক অশোয়-অঙাম থোক্লোইদবনি। বাপুনা মঙজবা ভারত; মীচং-মীখাই নাইরোইদবনি অমসুং নুংশিননা লৈমিন্নগদবনি।

বাপুনা মঙজবা ভারত- ‘সবকা সাথ, সবকা বিকাস, সবকা বিস্বাস’কী ৱাখল্লোনশিং ইনগদবনি। বাপুগী মরৈবাক নুংশিবগী হায়রিবা মচাকশিং অসি মালেম পুম্বগী ওইনা চুনগনি অমসুং ইথিল পীনবগী হৌরকফম অমা ওইগনি।

মীওইবা খুন্নাইগী খল্লগা, ভারত মচা ঐখোয় খুদিংমক, লৈবাক্কী মপাগী গুনশিং অমুক হিঙ্গৎহন্নবা ৱারেপ অমা লৌরসি অমসুং লৈবাক অসিগী ৱারেপ খুদিংমক ফংহল্লসি।

মীওই অমনা ৱারেপ অমা লৌনবা ঙসি ঐনা লৈবাক অসিদা তকশিল্লি। লৈবাক্কী ৱারেপ অমা লৌবা মতমদা মদু লৈবাক্কী কান্নবা ওইগদবনি। ৱারেপ অদু লৈবাক্কী অমসুং খুন্নাইগী য়াইফনবা ৱারেপ অমা ওইগদবনি। য়ামদ্রবদা নহাকনা ৱারেপ অমা লৌনবা অমসুং লৈবাক্কীদমক নহাক্না পাংথোকফম থোকপা থৌদাংশিংগী মতাংদা খন্ননবা ঐনা তকশিল্লি।

পাংথোকফম থোকপা ইথৌ পাংথোকপা, মীওই ক্রোর ১৩০গী পাঙ্গল অমসুং ৱারেপ ক্রোর ১৩০ অসিনা লৈবাক অসিগীদমক থবক কয়া পাংথোকপা ঙমগনি। ঙসিদগী হৌরগা, ঐখোয়না মসিগী মাইকৈ অসিদা মথং চহি অমগীদমক থবক পাংথোক্কদবনি। চহি অমগী থবক শুবা অসিনা করিগুম্বা ঐখোয়গী পুন্সিগী মাইওন ওইরবদি অমসুং ঐখোয়গী পুন্সিগী লম্বী ওইরবদি, মসি বাপুদা পীবা অশেংবা ইকায়খুম্নবা ওইগনি।

মসিগী হায়জবা অসিগী লোয়ননা, ঐনা অতোপ্পা অমগা হায়বা পাম্মি – মসিদা ফংলিবা মাইপাকপা অসি সরকার অমত্তগী মাইপাকপা নত্তে।

মাইপাকপা অসি প্রধান মন্ত্রী অমত্তগী মাইপাকপা নত্তে। ফংলিবা মাইপাকপা অসি মুখ্যমন্ত্রী অমত্তগী মাইপাকপা নত্তে।

মসিগী মাইপাকপা অসি নাগরিক ক্রোর ১৩০না হোৎনবদগী ফংবা ঙম্বনি। মসি খুন্নাইগী অহলশিংনা মতম মতমগী মতুংইন্না লমজিংবদগী মাইপাকপা ঙম্বনি। চহি ৫ চুপ্না মীদিয়ানা লেপ্তনা অফবা মওংদা মতেং পাংবা ঐনা উরে। লৈবাক অসিদা মসিগী ফিবম অসি ওইহল্লকপদা মীদিয়ানা অচৌবা থৌদাং লৌরি।

ঙসি ঐনা মসিগীদমক থবক শুরিবশিং, মীয়াম ক্রোর ১৩০দা ইকায়খুম্নবা উৎলি। ঐনা মখোয় অমুক হন্না থাগৎচরি অমসুং মখোয় ইকায়খুম্নবা উৎচরি।

ৱাহৈশিং অসিগা লোয়ননা ঐ লোইশিঞ্জরগে। অদোম্না ঐগা লোয়ননা হায়মিন্নরসি –

ঐনা হায়গনি – ‘মহাত্মা গান্ধী’, নহাক্না নখুৎ অনিমক থাংগৎতুনা – অমর রহে! অমর রহে! হায়রক্কনি।

মহাত্মা গান্ধী – অমর রহে!

মহাত্মা গান্ধী – অমর রহে!

মহাত্মা গান্ধী – অমর রহে!

অচৌবা ৱারেপ অমা লৌবগীদমক ঐনা অমুক হন্না লৈবাক মীয়াম্বু থাগৎচরি।

ঐগা লোয়ননা হায়মিন্নরসি-

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

পুম্নমকপু থাগৎচরি!