ভারতকী প্রধানমন্ত্রী

ঐনা ময়ামদা গুরু পুরাবগী য়াইফ-পাউজেল পীজরি । গুরু নানক দেব জিগী থৌজাল অমসুং অচৌবা গুরু পরম্পারানা মরম ওইদুনা ঐগুম্বা মীচম অমনা অফবা থবক কয়া তৌনবা খুদোংচাবা ফংবনি হায়না লৌই । মরম অদুনা, ঙসি পাংথোক্লিবা অফবা থবক খর অসি অহল-লমনশিংগী অমসুং লাই-গুরুশিংগী থৌজাল ফংবদগীনি । ঐখোয় য়াম্না মরুওইবা নত্তে । মরম অদুনা মসিগী ইকায়খুম্নবা অসি ঐনা ফংফম থোক্তে । চহি কয়া চংনা লৈবাক অসি শেমগৎলম্বা অমসুং কৎথোকপগা লোয়ননা লৈবাক অসি কল্লম্বা অচৌবা মীওইশিং অমসুং অহল-লমনশিংনা মসিগী ইকায়খুম্নবা অসি ফংফম থোকই ।

গুজরাত্তা য়ুহা হাবা মতমদা , গুরু নানক দেব জিনা লৈরম্বা লাখপাতগী কুতচ লমদম অসি শোকখি । মহাক্কী উগী খোঙউপ অদু মফম অদুদা হৌজিক ফাউবা লৈরি । য়ুহা হাবা অদুনা মরম ওইদুনা গুরুদ্বারা অদু অমাং-অতা থোকখি । ঐনা গুজরাতকী চীফ মিনিস্তর ওইরবা মতুংদা, অহানবা থবক য়ুহা হাবদগী অৱাবা নংলবা কুতচকী মীয়াম শেমগৎ-শাগৎপগী থবক ওইখি । শাথিনা শোক্লবা গুরুদ্বারা অদু ঐ চৎতুনা য়েংশিনখি । পারম্পারাগী থৌজালদগী ,ঐ মফম অদুদা চংশিনদুনা ঐঙোন্দা করিগুম্বা পাংথোক্নবা হায়রকখি অমসুং মদু অমুক হন্না শানবা ঐনা ৱারেপ লৌখি । অদুবু মদুদা ৱাফম অমা লাকখি । গুরুদ্বারা অদু হান্নগী ফিবমদা শেমজিন্নবা ঐখোয়না চুনবা মীওই অমসুং চপ মান্নবা মচাকশিং থিবা দরকার ওইরম্মি । ঙসিদি মদুগী মফম অদু ৱার্ল্ড হেরিতেজ সাইতশিংগী মরক্তা য়াওরে ।

অহোংবা মমলদা নোংথক্তা চৎনবা ঐখোয়না উরান স্কিম হৌদোক্লবা মতুংদা, স্কিম অসিনা অহানবা ওইনা কোনশিনবা মফম অনিগী মনুংদা নান্দেদ সাহিব অসিসু অমনি । নান্দেদ সাহিবকী থৌজাল ফংগনি হায়না ঐনা থাজবা থম্লি । ঐ পন্জাবতা চহি কয়া থবক তৌবগী খুদোংচাবা ফংখি অমসুং পন্জাবতা লৈবগী থবক কয়া খঙবা ঙমখি অমসুং বাদল জিগী ইমুংগা নক্না লৈমিন্নবগী খুদোংচাবা ফংখি ।মসি ঐনা গুজরাত্তা লৈবা মতমদা ফংখিদে । গুজরাতকী দ্বারিকাদা লৈরবা ‘পুন্জ-প্যারে’ অসিনা মরম ওইদুনা গুজরাত অমসুং পন্জাবগী মরক্তা অখন্নবা মরি অমা লৈনরি হায়না ঐনা খল্লি ।

মরম অদুনা ঐখোয়না জামনগর জিলাদা গুরু গোবিন্দ সিংহগী মিংদা হোস্পিতাল অমা শারে । লৈবাক অসিগী মফম কয়াগী অচৌবা মীওইশিংনা ঐখোয়গী লৈবাক অসি পুনশিন্নবগী লাইৱাশিং তাক্লি অমসুং ঐখোয়গী লৈবাক অসিগী কলচরগী লোনচৎশিংদা গুরু নানক দেব জিগী পাউতাকশিং মফম অমা লৈরি । মসি ঐখোয়না গুরবানিদা ফংবা ঙম্মি । ঐখোয় অমত্তনি হায়বা ফাওহল্লি । ৱাহৈ খুদিংমক্না ঐখোয়গী লম্বী তাক্লি অমসুং লমজিংলি । মসিনা খুন্নাইগী অমোৎপশিং শেংদোক্লি অমসুং অনেম-অৱাংগী খেন্নবশিং হন্থহল্লি । মসিনা জাৎকী খেন্নবা লৈহন্দে অমসুং অপুনবগী শক্তম অমা শাগৎপদা মতেং ওই অমসুং মী খুদিংমক ঈশ্বরদা কৎথোকপগা লোয়ননা থবক তৌহল্লি । গুরবানি, গুরু নানক জিগী পাউতাকশিংদগী হেন্না ফবা অমা লৈতে । লৈবাক অসিগী অপুনবগী শক্তম শাগৎনবগী ঐখোয়গী অকনবা পাউজেল লৈরি ।

১৯৪৭দা কারতারপুরদা থোকখিবা থৌদোক অদু ওইনিংবা ওইজসনু ঐ থাজবা থম্লি । সরকার অমসুং মিলিতরিশিংগী মরক্তা করিগুম্বা খর থোকখি । মীগা মীগা শম্নবা অসি য়াম্না মরুওইবা অমনি । বর্লিনগী চেকপল অদু তুগনি হায়বা কননা খনখিবগে ? কননা খঙবা ঙমগনি, গুরু নানক জিগী থৌজালদগী কারতারপুর কোরিদোর অসি চুম্নগী কোরিদোর অমা ওইদবা য়াই অদুবু মসিনা মীওই কয়া শম্নহনবা ঙম্বা য়াই । গুরবানিগী ৱাহৈ খুদিংমক্না ঐখোয়দা থৌনা হাপ্লি । ঐখোয় অসি ‘মালেম অসি ইমুং অমনি’ হায়বা ৱাখল্লোন অসিদা য়োক্লকপা মীওইনি । ঐখোয়না মীগী ফত্তবা তৌনবা কৈদৌঙৈদা খন্দবা মীওইনি । খন্দুনা য়েংউ , চহি ৫৫০গী মমাংদা গুরু নানক দেব জিনা অফবা চৎথোক-চৎশিনগী পাম্বৈ অমত্তা লৈত্রিঙৈ মতমদা অসামদগী কুতচ ফাওবা লৈবাক শীনবা থুংনা খোঙনা চৎখি । মসি মহাক্কী ধ্যান অমসুং খাংবা কনবনি । ঙসি মসিগী গুরুপুরাব অসিনা ঐখোয় পুম্নমক্তা লৈবাক অসিগী অপুনবগী শক্তম শাগৎনবা থৌনা ,হৈনিংবা অমসুং ইথিল পীবা ওইরসনু ।

অপুনবদা মপাঙ্গল লৈ । লাঙ্গরগী চৎনবী অসি চুম্নগী চাক পীজবগী চৎনবী অমা নত্তে মসি ভেলু অমসুং ঐখোয়গী হেরিতেজনি । মসিদা হন্থনা য়েংবগী ৱাফম য়াওদে । অসিগুম্বা অচৌবা থবক অসি য়াম্না চম্না পাংথোক্লি । ঙসিগী শেংলবা থৌরম অসিদা ,গুরু গ্রান্দ সাহিব য়াওদুনা গুরুশিংগী কৎথোকপশিং অদু ইকায়খুম্নবা উৎলি, নখোয়না ঐঙোন্দা উৎলিবা ইকায়খুম্নবা অদু ঐগী নত্তে । মসিগী ইকায়খুম্নবা অসি মসিগী অচৌবা চৎনবী অসিদনি । ঐখোয়না কৎলিবা অসি অচৌবা ওইদুনসু মসিনা মতিক চাবা নত্তে । মসিদগী হেন্না ফবা থবক তৌনবা ঐখোয়দা থৌনা পীবা ওইসনু । অমুক হন্না ঐনা ময়াম পুম্নমক থাগৎচরি ।