ভারতকী প্রধানমন্ত্রী
ইকায়খুম্নরবা রাস্ত্রপতি বাইদেন,
ঙসিগী মীফম অসিদা সপ্লাই চেন রেজিলিএন্স হায়বর মরুওইবা হীরম অসি লৌখৎপিবগীদমক্তা ঐনা অদোমবু থাগৎচরি। অদোম্না হেক ৱাশক লৌবগা “অমেরিকা হল্লক্লে” হায়না অদোম্না হায়বিখি। অদুগা য়াম্না তেনখ্রবা মতমসিদা ঐখোয় পুম্নমক্না মসিবু উবা ফংলি অমদি মরম অসিনা ঐনা তরাম্না ওকচরি হায়না হায়জনিংই!
ইকায়খুম্নরবশিং,
লাইচৎ হৌরকপা মতমদা ঐখোয় পুম্নমক্না ভেক্সিন, হকশেলগী খুৎশু খুৎলায় অমসুং মরুওইবা হিদাক লাংথকশিং পুথোক্নবা মচাক ৱাৎপগী ফীভম থেংনখি। হৌজিক মালেম অসিনা শেন্মিৎলোন হিঙ্গৎহন্নবা শেম শানরকপা মতমসিদা সেমিকন্দক্তর অমসুং অতৈ পোৎলমশিংগী সপ্লাইদা লাক্লিবা ৱাফমসিনা শেন্মিৎলোন ফীভম ফগৎহনবদা অপনবা ওইররি। সিপ্পিং কন্তেনর মশিং ৱাৎলক্কনি হায়না মালেমদা কনানা খন্নরুবগে?
ইকায়খুম্নরবশিং,
ভেক্সিনগী মালেমগী সপ্লাই চেন ফগৎহন্নবা ভারতনা ভেক্সিন মপান্দ থাদোকপা হেনগৎহল্লে। ঐখোয়না ইন্দো-পেসিফিক লমদমদা হেন্না ফবা অমদি পু-থাংবা ঙমবা কোবিদ-১৯ ভেক্সিনগী সপ্লাই লৈহন্নবগীদমক ঐখোয়গী ক্বাদ খোঙবুশিংগা পুন্না থবক পায়খৎমিন্নরি। ভারতনা মথঙ চহিদা মালেমগীদমক্তা ভেক্সিন দোজ বিলিয়ন ৫ পুথোক্নবা শেম শারি। ফীভমসিদা মচাক সপ্লাই তৌবদা অপনবা অমত্তা লৈহন্দবা হায়বসি য়াম্না মরুওই।
ইকায়খুম্নরবশিং,
ঐনা থাজবদা মালেমগী সপ্লাই চেন ফগৎহন্নবগী খ্বাইদগী মরুওইবা ৱাফম অহুমদি – থাজবা সোর্স, লৌথুপ লৌকোই লৈতবা অমদি অকক্নবা মতম থমবা হায়বসিনি। ঐখোয়গী সপ্লাই চেন থাজবা সোর্সতগী ওইহনবা হায়বসি মরুওই। ঐখোয়গী সিক্যুরিতী তাথোক তাশিন তৌনবা হায়বসিসু মরুওই। সপ্লাই চেনবু করিগুম্বা অমগী পাউখুম ওইনা থদৎপদগী ঙাকথোক্নবা থাজবা সোরস হায়বসি রিএক্তিব ওইবগী হৈনবী লৈতবা মফম অমদগী ওইহনগদবনি। সপ্লাই চেনদা থাজবা লৈহন্নবগীদমক মদুদা লৌথুপ লৌকোয় লৈতবা ওইহনবা মথৌ তাই। লৌথুপ লৌকোয় লৈবা মরম্না লৈবাকসিদা লৈবাক কয়ানা পোৎলম মচা মচা কয়াগী অৱাৎপা থেংনবা ঐখোয়না উরি। করিগুম্বা তঙাই ফদনা চঙদ্রবা য়াদ্রবা পোৎলমশিং মতম চানা সপ্লাই তৌদ্রবদি মদুনা হেন্না চাউবা মাঙজবা পুরকপা য়াই। ঐখোয়না ৱাফমসি কোরোনাগী মতমদা ফার্মা অমসুং মেদিকেল সপ্লাইদা ময়েক শেংনা উখ্রে। মরম অসিনা অকক্নবা মতমগী মনুংদা সপ্লাই লৈহন্নবা ঐখোয়গী সপ্লাই চেন দাইভর্সিফাই তৌবা তাই। অদুগা মসিগীদমক, চাওখৎলক্লিবা লৈবাকশিংদা তোঙানবা মেনুফেকচরিং কেপাসিতী শেমগৎপা তাই।
ইকায়খুম্নরবশিং,
ভারতনা ফার্মাসিউতিকেল, আই.তি. অমসুং অতৈ পোৎলমশিংগী থাজবা য়াবা সোর্স অমা ওইনা শেমগৎচরে। ঐখোয়না ক্লীন তেক্নোলোজী সপ্লাই চেনগী লমদসু ঐখোয়গী থৌদাং য়াননবা মীৎয়েঙ থম্লি। ঐখোয়না ঐখোয়গী কাঙবুশিংবু ঐখোয়গী মান্নবা দিমোক্রেতিব ভেল্যুশিংদা য়ুম্ফম ওইরগা অকক্নবা মতমগী মনুংদা মখা তাবা এক্সন প্লান পুথোক্ননবা অথুবদা মীফম পাঙথোক্নবা পাউতাপ পীফম থোকই হায়বা ৱাফম ঐনা থমজরি।
ময়ামবু থাগৎচরি।
দিসক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি। অশেংবা ৱাফমদি হিন্দীদা ফোঙদোকখিবনি।
***
