ভারতকী প্রধানমন্ত্রী

ইকায়খুম্নরবা স্পিকর সার,

তাঞ্জা অসি ঐখোয় খুদিংমক অমসুং লৈবাক অসিগী মীয়াম খক্তগী চাউথোকচবা খক নত্তনা মালেমগী গনতন্ত্রবু নুংশিজবা মীয়ামগীশু য়াম্না চাউথোকচবা মতম অমনি। মসি য়াম্না চাউথোকচবগা লোয়ননা গনতন্ত্রগী কুহ্মৈ হরাওবা ফোঙদোকপা থৌরম অমনি। সংবিধানগী চহি ৭৫ গী খোঙচৎ অসি নিংশিংদুনা লৈহৌরগদবা খোঙচৎ অমনি অমসুং মালেমদা খ্বাইদগী মপাঙ্গল কনবা অমসুং খ্বাইদগী চাউবা লৈবাক অমগী খোঙচৎনি। খোঙচৎ অসিদা ঐখোয়গী সংবিধান শেমখিবশিং, ঐখোয়গী সংবিধান শেমখিবশিংনা পাংথোকখিবা থবকশিংগী পান্দম অদু খোঙচৎ অসিদা উবা ফংলে অমসুং মসিগা লোয়ননা ঙসি ঐখোয় মাঙলোমদা চঙশিল্লি, মসি চহি ৭৫ মপুংফারকপগী হরাওবা ফোঙদোক্নবা তাঞ্জা অমনি। হরাওবা ফোঙদোকপা অসিদা সংসদশু শরুক য়াদুনা মসিগী অনিংবা ৱাখল্লোনশিং ফোঙদোকপা অসিদা ঐ হরাওই। ইকায়খুম্নরবা মেম্বরশিংদা ঐনা ঐগী তৌবীমল খঙবা উৎচরি। থৌরম অসিদা শরুক য়ারিবা মীওই খুদিংমক ঐনা থাগৎপা ফোঙদোকচরি।

ইকায়খুম্নরবা স্পিকর সার,

চহি ৭৫ গী মাইপাকপা অসি ইচম চম্বা নত্তে, মসি তোপ-তোপ্পা মাইপাকপনি অমসুং লৈবাক অসিনা নিংতম্লবা মতুংদা অমসুং মখা তারকপদা থেংনরকপা য়াবা খুদোংচাদবশিং, ভারতনা মায়োক্নবা য়াবা মাঙজৌননা খঙখিবশিং অদু সংবিধান্না লাকশিনখি। মরম অদুনা মসিগী অচৌবা মাইপাকপা অসিগীদমক, সংবিধান শেমখিবশিংগা লোয়ননা, অনৌবা লৈঙাক অমদা মসিগী গনতন্ত্রগী থৌনাগা লোয়ননা হিংখিবা লৈবাক অসিগী মীওই মিল্লিয়ন কয়াগী মফমদা ঐনা কোক নোঞ্জরি। সংবিধান শেম্লম্বশিংনা পান্দম থমখিবা সংবিধানগী মগুনশিং ঙাক্নবা অমসুং মাইপাক্না চৎননবা হৌখিবা চহি ৭৫ দা পাংথোকখিবা চাংয়েং খুদিংমক ভারতকী মীয়াম্না মাইপাক্লে। মরম অদুনা মসিগীদমক ভারতকী মীয়াম থাগৎফম থোকই।

ইকায়খুম্নরবা স্পিকর সার,

সংবিধান শেম্বশিংনা মসি মমুৎ তানা খঙখি। ভারত ১৯৪৭ দা পোকখি হায়বা মখোয়না থাজখিদে, ১৯৫০দগী ভারত্ত গনতন্ত্র চৎনবা হৌখি হায়বা মখোয়না থাজখিদে, মখোয়না চহি লিশিং কয়াগী খোঙচৎকী, অচৌবা নাত-চৎনবীশিংদা থাজবা থমখি। মখোয়না মসি মপুংফানা খঙখি।

ইকায়খুম্নরবা স্পিকর সার,

থায়না মমাংঙৈদগী হৌনা ভারতকী গনতন্ত্র অমসুং ভারতকী মীয়াম্না লৈবাক ঙাকচবা অসি য়াম্না ইনাকখুনখি। মসিনা মালেমগী ইথিল অমা ওইখি অমসুং মরম অদুনা ঙসি ফাওবা ভারত অসি গনতন্ত্রগী মমানি হায়নরিবনি। ঐখোয় খ্বাইদগী চাউবা গনতন্ত্র চৎপা লৈবাক ওইবা খক নত্তনা, ঐখোয় গনতন্ত্রগী মমানি।

ইকায়খুম্নরবা স্পিকর সার,

ঐনা ৱাফম অসি ফোঙদোকপা মতম অসিদা, হাওস অসিগী মমাঙদা শক্নাইরবা মীওই অহুমগী ৱারোলশিং থম্বা ঐনা পাম্মী। সংবিধান খন্নবা কয়াদা রাজর্ষি পুরুসোত্তম দাস তন্দন জিনা ফোঙদোকখিবা ৱাফম ঐনা পল্লে। মহাক্না হায়খি চহি চা কয়াগী মতুংদা অমুক হন্না ঐখোয়গী লৈবাক অসিদা অসিগুম্বা মীফম অমা পাংথোক্লে, মসিনা ঐখোয়গী হৌখ্রবা নুংঙাই-য়াইফবা মতম অদু নিংশিংহল্লে। ঐখোয়না নিংতম্বা মতমদা, মীফমশিং পাংথোকখি, অখঙ-অহৈশিংনা লৈবাক্কী মরুওইবা ৱাফমশিং খন্নখি। অনিশুবদা ঐনা দোক্তর রাধাকৃষ্ণন জিগী ৱারোল পাথোক্লি। মহাকশু কন্সতিতুয়েন্ত এশেমব্লিগী মেম্বর অমনি। মহাক্না হায়খি মদুদি মীয়াম্না খনবা লুচিংবশিংনা লৈবাক ঙাকপগী থবক অসি লৈবাক অনিগী ওইনা অনৌবা নত্তে। ঐখোয়না মসি পুৱারি হেক হৌরকপদগী চৎনদুনা লাক্লে। অহুমশুবদা ঐনা সভা অসিদা বাবা সাহেব অম্বেদকারগী ৱারোল পল্লি। মতম অমদা ভারত্ত মনিংতম্বা লৈবাক কয়া লৈরমখি।

ইকায়খুম্নরবা স্পিকর সার,

ঐখোয়গী সংবিধান শেম্বগী থবক্ত, ঐখোয়গী লৈবাক্কী নুপীশিংগী থৌননা অচৌবা থৌদাং অমা লৌখি। কন্সিতুতুয়েন্ত এশেমব্লিদা নুপী মেম্বর ১৫ য়াওখি অমসুং মখোয় থৱায় য়াওবা মেম্বরশিংনি। অনৌবা ৱাখল্লোন্দা য়ুম্ফম ওইদুনা মখোয়না কন্সতিতুয়েন্ত এশেমব্লিগী খন্ন-নৈনবা শরুক য়াখি অমসুং নুপীশিং অদু তোঙান-তোঙানবা মফমশিংদগী, তোঙান-তোঙানবা হিরমশিংদগীনি। সংবিধানদা মখোয়না পীখিবা পাউতাকশিং অদুনা সংবিধান শেম্বদা য়াম্না চাউনা কান্নবা পীখি। মালেমগী লৈবাক কয়া নিংতম্বা ফংখি, সংবিধানশিং শেমখি, গনতন্ত্র চৎনবা হৌখি, অদুবু নুপীশিংদা হকশিং পীবদা চহি কয়া চঙখি। অদুবু ঐখোয়গী লৈবাক্ত, হেক হৌরকপদগী সংবিধান্দা নুপীশিং ভোৎ থাদবগী হক পীরে। 

ইকায়খুম্নরবা স্পিকর সার,

ঐখোয়না জি-২০ মীফম পাংথোকপা মতমদা, ঐখোয় সংবিধানগী ৱাখল্লোন্দা হিংবা মীওইশিং ওইবা মরম্না মসিগী ৱাখল অসি ঐখোয়না মাঙলোমদা পুখৎখি। ঐখোয়না জি-২০ গী প্রসিদেন্ত ওইবা মতমদা, ঐখোয়না নুপীশিংনা লমজিংবা চাউখৎপগী অনৌবা ৱাখল্লোন মালেমদা উৎখি। মালেমদা নুপীশিং চাউখৎহনবদগী হেন্না মরুওইবা খোঙথাং অমা লৈরি অমসুং মরম অদুনা ঐখোয়না নুপীশিংনা লমজিংবা চাউখৎপগী মতাংদা খন্ন-নৈনবা পাংথোকখ্রে। মসি খক নত্তনা, ভারতকী গনতন্ত্রদা ঐখোয়গী নুপীশিং শরুক য়ানবা থবক কয়া পায়খৎতুনা অমসুং খোঞ্জেল অমগা লোয়ননা ঐখোয়গী এম.পিশিংনা নারী শক্তি বন্দন এক্ত পাস তৌরে।

ইকায়খুম্নরবা স্পিকর সার,

ঙসি ঐখোয়না অচৌবা স্কিম খুদিংমক্কী ময়াইদা নুপীশিং থম্লে অমসুং মসি ঐখোয়না সংবিধানগী চহি ৭৫শুবা থৌরমশিং পাংথোকপদা থবক ওইনা উৎলে। ত্রাইবেল নুপী অমনা ভারতকী রাস্ত্রপতি ওইবা অসি অফবা মপা চানবা অমনি। মসিদা ঐখোয়গী সংবিধানগী থৌনা মশক তাকপা অমনি।

ইকায়খুম্নরবা স্পিকর সার,

হাওস অসিদশু, ঐখোয়গী নুপী এম.পি মশিং লেপ্তনা হেনগৎলক্লি অমসুং মখোয়গী থৌদাংশু হেনগৎলক্লি।  মিনিস্তরশিংগী কাউন্সিলদা মখোয়গী থৌদাংশু হেনগৎলক্লি। ঙসি, খুন্নাই, রাজনিতি, লাইরিক-লাইশু, শান্নবা, হরাও-কুম্মৈগী লমদা ওইবা য়াই, পুন্সিগী হিরম খুদিংমক্ত নুপীশিংনা পাংথোক্লিবা থবকশিং অসি লৈবাক অসিগী চাউথোকচনবা মচাক অমনি। সাইন্স,স্পেস তেক্নোলোজিগী লমদা মখোয়না পাংথোক্লিবা থবকশিং ভারতমচা খুদিংমক্না থাগৎপা ফোঙদোক্লি। পুম্নমক অসিগী মখোয়গী ইথিল অসি ঐখোয়গী সংবিধান্নি।

ইকায়খুম্নরবা স্পিকর সার,

হৌজিক ভারত য়াম্না য়াংবা খোঙজেল অমদা চাউখৎলক্লি। অথুবা মতমদা মালেমদা অহুমশুবা খ্বাইদগী চাউবা ইকোনোমি ওইরক্নবা মাইকৈদা হৌজিক ভারতনা অকনবা খোঙথাংশিং থাংজিল্লি অমসুং মসি খক নত্তনা, ঐখোয়না নিংতম্বগী চহি ১০০শুবা থৌরম পাংথোকপা মতমদা, ঐখোয়না ভারত অসি চাউখৎলবা লৈবাক অমা ওইহনবা হায়বসি ভারতমচা করোর ১৪০গী ৱাশক্নি। মসি ভারতমচা খুদিংমক্কী ৱাশক্নি, মসি ভারতমচা খুদিংমক্কী মঙলান্নি। মসিগী ৱাশক অসি থবক ওইনা পাংথোক্নবা খ্বাইদগী দরকার ওইবা অসি ভারতকী অপুনবনি। সংবিধান অসি ভারতকী অপুনবগী য়ুম্ফমনি। ঐখোয়গী সংবিধান শেম্বগী থবক্ত, লৈবাক অসিগী শক্নাইরবা কয়া য়াওখি, নিংতম লান্মীশিং য়াওখি, অইবশিং য়াওখি, নৈনবা মীওইশিং য়াওখি, মীয়ামগী থবক তৌবা মীওইশিং য়াওখি, লাইরিক-লাইশুগী লমদা থবক তৌবশিং য়াওখি, হিরম কয়াদা থবক তৌবা মীওইশিং য়াওখি, শিন্মীশিংগী লুচিংবশিং য়াওখি, লৌমীশিংগী লুচিবশিং য়াওখি, খুন্নাইগী কাংলুপ খুদিংমক্কী মীহুৎশিং শরুক য়াখি অমসুং মখোয় পুম্নমক ভারতকী অপুনবা শক্তম অদু মরুওইনা লৌখি। তোঙান-তোঙানবা শীনফমশিংগী মীওইশিং, লৈবাক অসিগী তোঙান-তোঙানবা মফমশিংদগী লাকপা মীওইশিং অমসুং বাবা সাহেব অম্বেদকাআর জিনা চেকশিনৱা হায়খি, ঐনা বাবা সাহেবকী ৱারোল পল্লি। বাবা সাহেবনা হায়খি- খুদোংচাদবদি কমদৌনা তোঙান-তোঙানবা ভারতমচাশিং পুনশিনগনি হায়বা অসিনি। অমগা অমগা নুংশিন্ননা হিংমিন্ননবা ৱারেপশিং লৌনবা কমদৌনা ভারতকী মীয়ামদা ইথিল পীগনি। মরম অদুনা লৈবাক অসিদা অপুনবগী ৱাখল্লোন অমা শেমগৎলে।

ইকায়খুম্নরবা স্পিকর সার,

ঐনা অৱাবগা লোয়ননা হায়রি মদুদি নিংতম্বা মতুংদা, সংবিধান শেম্লিবশিংগী থৱায় অমসুং হকচাংদা অপুনবা লৈখি। অদুবু নিংতম্বা মতুংদা, ফত্তবা ৱাখল খল্লকপা নত্ত্রগা মশাগী ওইজবা থিরকপদগী, লেবাক অসিগী অপুনবগী ৱাখল্লোন্দা অচৌবা শিংনরকপা অমা থোকখি। খেন্নবশিংনা অপুনবা শক্তম অমা শাগৎপা অসি ভারতকী অখন্নবনি। ঐখোয়না ভারতকী খেন্নবা অমসুং চাউখৎপা হরাওবা ফোঙদোকপা অসি খেন্নবশিং হরাওবা ফোঙদোকপদা লৈরে। অদুবু মীনাইগী ৱাখল্লোন্দা হৌরকখিবা মীওইশিংনা ভারতকী অফবা উবা ঙমখিদে অমসুং ১৯৪৭ দা হিন্দুস্থান পোকখি অমসুং খেন্নবা অসিদা মত মান্নবা কয়া লাকখি। মসি খক নত্তনা, মসিগী খেন্নবশিংগী মমল নাইদ্রবা লন অসি হরাওবগী মহুত্ত, খেন্নবা অসিদা ঐখোয়না হু চাইশিন্নবা হোৎনখি, মরম অদুনা লৈবাক অসিগী অপুনবগী শক্তমদা অকায়বা পীখি।

ইকায়খুম্নরবা স্পিকর সার,

খেন্নবশিং হরাওবা ফোঙদোকপা অসি ঐখোয়না ঐখোয়গী পুন্সিগী শরুক অমা ওইহনগদবনি অমসুং মসিনা বাবা সাহেব অম্বেদকারগী মফমদা অশেংবা ইকায়খুম্নবা উৎপা ওইগনি।

ইকায়খুম্নরবা স্পিকর সার,

হৌখিবা চহি ১০ থবক তৌনবা লৈবাক অসিগী মীয়াম্না ঐখোয়দা খুদোংচাবা পীরে। করিগুম্বা অদোম্না ঐখোয়গী ৱারেপশিং লৌবগী থবকশিং য়েংলবদি, ঐখোয়না লেপ্তনা ভারতকী অপুনবা মপাঙ্গল কনখৎহন্নবা হোৎনরি। আর্তিকল ৩৭০ অসি লৈবাক অসিগী অপুনবদা খুরৌ থাংখি, মসিনা ফক্লাং অমা ওইখি। ঐখোয়গী সংবিধানগী থৌনা ওইরিবা লৈবাক অসিগী অপুনবা অসি ঐখোয়না মরুওইনা লৌরি অমসুং মরম অদুনা ঐখোয়না আর্তিকেল ২৭০ মুৎথৎলে। মরমদি লৈবাক অসিগী
অপুনবা অসি ঐখোয়না মরুওইনা লৌরি।

ইকায়খুম্নরবা স্পিকর সার,

করিগুম্বা ঐখোয়না অচৌবা লৈবাক অমদা ঐখোয়গী থবকশিং শেন-থুমগী ওইনা চাউখৎহল্লবদি, মালেম্না লৈবাক অসিদা শেন থাদনবা লাক্কনি, মতম অদুদা ভারতনা অফবা লৈঙাক অমা দরকার ওইগনি অমসুং মদুগীদমক ঐখোয়গী লৈবাক অসিদা জি.এস.তিগীদমক মতম শাংনা খন্ন-নৈনখি। শেন-থুমগী অপুনবা অমা পুরকপদা জি.এস.তিনা অচৌবা থৌদাং অমা লৌখি হায়না ঐনা খল্লি। মসিদা মমাঙগী সরকারশিংনশু অচৌবা থৌদাং লৌখি। হৌজিক, মসি চাউখৎহন্নবা খুদোংচাবা অমা ঐখোয়না ফংলে অমসুং মসি ঐখোয়না থবক ওইনা পাংথোক্লে অমসুং ৱান নেসন ৱান তেক্সনা থৌদাং অমা লৌরে।

ইকায়খুম্নরবা স্পিকর সার,

ঐখোয়গী লৈবাক্ত, রেসন কার্দ অসি লায়রবগী য়াম্না মমল য়াম্লবা চে অমনি। করিগুম্বা লায়রবনা অতোপ্পা রাজ্য অমদগী রাজ্য অমদা চৎপদা, মহাক খুদোংচাবা অমতা ফংদে। অচৌবা লৈবাক অমদা, মফম অমদা হেক্ত চৎনবগী মহাক্কী হক লৈ। অপুনবগী ৱাখল্লোন অসি মপাঙ্গল কনখৎহন্নবা, ঐখোয়না ৱান নেসন ৱান রেসন কার্দগী ৱাখল্লোন মপাঙ্গল কনখৎহল্লে।

ইকায়খুম্নরবা স্পিকর সার,

করিগুম্বা লৈবাক অসিগী লায়রবশিং, লৈবাক অসিগী মীচম মীয়াম, লেম্না লায়েংবা ফংলবদি, মহাক্না লায়রবা থেংননবা মপাঙ্গল শরুক কয়া হেনগৎকনি। মদুগীদমক, মসিগী খুদোংচাবা অসি মহাক্না থবক শুরিবা মফম অদুদা মহাক্না ফংগনি। অদুবু মহাক্না থবক শুনবা চৎখিবা মতমদা, মহাক্না হিংবা অমসুং শিবগী লানফম অমা মায়োক্নগনি, অদুগুম্বা মতম অদুদা করিগুম্বা মহাক্না খুদোংচাবা ফংদ্রবদি, মতম অদুদা লৈঙাক লৈবগী করি কান্নগনি অমসুং মরম অদুনা ঐখোয়না, লৈবাক অসিগী অপুনবগী লাইৱাগা লোয়ননা লৈবাক অমা হকশেলগী কার্দ অমা লৈনবা ৱারেপ লৌরে অমসুং ঐখোয়না অয়ুস্মান ভারত লাউথোক্লে। ঙসি, করিগুম্বা বিহারগী মনুং-হুঞ্জিনবা মফম অমদগী মীওই অমা পুনেদা থবক শুবা মতমদা অমসুং মহাক খঙহৌনা নারকপা মতমদা, অয়ুস্মান কার্দ অমা পায়বা অসি মহাক্কী মতিক চারে, মহাক লায়েংবগী খুদোংচাবা ফংগনি।

ইকায়খুম্নরবা স্পিকর সার,

লৈবাক অসিগী মফম অমদা ইলেক্ত্রিসিতি ফংলগা, ইলেক্ত্রিসিতি মরাংকাইনা ফংদবদগী লৈবাক অসিগী মফম খর মম্বা লৈবাক অসিদা ঐখোয়না কয়ারক উখ্রে অমসুং মৈ মম্বগীদমক মালেমদা ভারতকী মিংচৎ য়াম্না থিখি। হায়রিবা মতম অদু ঐখোয়না উরে অমসুং হৌজিক সংবিধানগী ৱাখল্লোন ঙাক্তুনা অমসুং অপুনবগী লাইৱাগা লোয়ননা লৈবাক অমা গ্রিদ অমা মপুংফানা পায়খৎলে অমসুং ঙসি লৈবাক অসিগী  মফম খুদিংমক অপনবা লৈতনা ইলেক্ত্রিসিতি ফংলে।

ইকায়খুম্নরবা স্পিকর সার,

মতম অমদা ঐখোয়গী লৈবাক্ত ইনফ্রাস্ত্রকচরদা মীচং-মীখাই নাইবা মতম অমা লৈরমখি। ঐখোয়না মসি মুৎথৎলে অমসুং মদুগী মীচং-মীখায় নাইবা অদু কোকহন্দুনা অপুনবা মপাঙ্গল কনখৎহল্লে অমসুং লৈবাক অসিগী অপুনবা অমসুং থোং মান্ননা চাউখৎপদা পুক্নিং চঙলে। অৱাং-নোংপোক নত্ত্রগা জম্মু অমসুং কাস্মির ওইগেরা, হিমায়লগী লমদমশিং ওইগেরা নত্ত্রগা মরুভুমিগা নক্নবা মফমশিং ওইগেরা, ইনফ্রাস্ত্রকচর ফগৎনবা ঐখোয়না থবক পায়খৎলে। চাউখৎপা ৱাৎপদগী থাপ্পা হায়বা লৈতনবা অমসুং অপুনবগী ৱাখল্লোন্দা অহোংবা পুরক্নবা ঐখোয়না থবক তৌরে।

ইকায়খুম্নরবা স্পিকর সার,

মতম অসি হোংলে অমসুং দিজিতেলগী হিরমদা অরৈবা অমসুং লৈতবশিংগী ফিবম অমা লৈহনবা ঐখোয়না পামদে। লৈবাক অসিগী অপুনবা অমা ওইনা অমসুং মালেমদা য়াম্না চাউথোকচবগা লোয়ননা, দিজিতেল ইন্দিয়াগী ভারতকী মাইপাকপগী ৱারি অমনি। দিজিতেল তেক্নোলোজি অসি মীয়ামদা ফংহনবদগী মসিগী মাইপাকপা অসি পুরকপনি অমসুং ঐখোয়গী সংবিধান শেম্লম্বশিংনা ঐখোয়দা মাইকৈ অদু তাকখি। লৈবাক অসিগী অপুনবগী শক্তম মপাঙ্গল কনখৎহন্নবা ভারতকী পঞ্চয়ত খুদিংমক্ত ওপ্তিকেল ফাইবর য়ৌহন্নবা ঐখোয়না থবক পায়খৎলেল

ইকায়খুম্নরবা স্পিকর সার,

ঐখোয়গী সংবিধান্না অপুনবদা থাজবা লৈখি অমসুং মসিগী ৱাখল অসিদা, মমা লোলগী মরুওইবা অদু ঐখোয়না খঙলে। ঐখোয়না মমা লোল নমথবনা লৈবাক অসিগী মীয়ামগী নাত-চৎনবী চাউখৎপা ঙম্লোই অমসুং মরম অদুনা অনৌবা ইজুকেসন পোলিসিদা ঐখোয়না মমা লোলগী মরমদা ঐখোয়না য়াম্না কন্না ৱা ঙাংলে। ঐখোয়গী সংবিধান্না মীওই খুদিংমক্কী তুংদা লৈবদগী হৌজিক ঐগী লৈবাক্কী লায়রবা অঙাং অমা ফাওবা মহাক্কী মমা লোলদা দোক্তর অমা নত্ত্রগা ইঞ্জিনিয়ার অমা ওইবা য়ারে। মসি খক নত্তনা, ক্লাসিকেল লোলশিং ওইনা শক খঙদুনা মখোয়গী ফিদা অমা পীদুনা ঐখোয়না লোল কয়া ইকায়খুম্নরে। লৈবাক অসিগী অপুনবগী শক্তম মপাঙ্গল কনখৎহন্নবা লৈবাক শীনবা থুংনা এক ভারত শ্রেস্থা ভারতগী কেম্পেন অমা চৎথরি।

ইকায়খুম্নরবা স্পিকর সার,

ঙসিদি কাসি তামিল সঙ্গমম অমসুং তেলুগু কাসি সঙ্গমম অচৌবা লুপ অমা ওইরে অমসুং খুন্নাইদা নকশিন্নবা হেনগৎহন্নবা ঐখোয়না নাতকী ওইবা অচৌবা থবক অমা পায়খৎলে। মসিনা মরম ওইদুনা সংবিধানগী ইচেলদা য়ুম্ফম ওইদুনা ভারতকী অপুনবগী মরুওইবা অদু য়ানরে অমসুং ঐখোয়না মসিগী মরমদা ৱা ঙাংগদবনি।

ইকায়খুম্নরবা স্পিকর সার,

ঙসি সংবিধান চহি ৭৫ মপুংফারে, অদুবু ঐখোয়গী লৈবাক্ত চহি ২৫ ফাওবা মরুওই, চহি ৫০ মরুওই, চহি ৬০শু মরুওই। সংবিধানগী খোঙচৎকী হায়রিবা মরুওইবা তাঙ্ককশিং অসিদা করি থোকখিবগে হায়বা পুৱারিদা ঐখোয় য়েংলসি। লৈবাক অসিগী সংবিধান চহি ২৫ মপুংফারকপা মতমদা, মতম অদুদা লৈখোয়গী লৈবাক অসিদা সংবিধান শেখায়খি। ইমর্জেন্সি থমখি, সংবিধানগী থবকশিং লেপখি, লৈবাক অসি জেল অমা ওন্থোকখি, মীয়ামগী হকশিং মৎখি, প্রেসকী মনিংতম্বা থিংজিনখি অমসুং মসিগী কাংগ্রেসকী পাপ অসি কৈদৌঙৈদা কোক্লরোই, কৈদৌঙৈদা চামথোকপদা চৎলরোই। মালেমদা গনতন্ত্রগী মরমদা খন্নরকপা মতমদা, কংগ্রেসকী মসিগী পাপ অসি কোক্লরোই। মরমদি গনতন্ত্র অসি চরম মেৎখি। ভারতকী সংবিধান শেমখিবশিংগী কৎথোকপা অদু মাঙহন্নবা হোৎনখি।

ইকায়খুম্নরবা স্পিকর সার,

করম্বা মতমদা চহি ৫০ মপুংফাখিবগে হায়বা কাউরবরা? কাউদে, অতল বিহারি বাজপায়না প্রধান মন্ত্রী ওইখি অমসুং নবেম্বর ২৬,২০০০ দা লৈবাক শীনবা থুংনা সংবিধানগী চহি ৫০শুবা থৌরম পাংথোকখি। প্রধান মন্ত্রী অমা ওইনা, অতল বিহারি বাজপায়না লৈবাক মীয়ামদা অখন্নবা পাউজেল অমা পীখি। অপুনবা, মীয়াম শরুক য়াবা অমসুং পুন্না থবক তৌমিন্নবদা মরুওইবা মীৎয়েং থমখি অমসুং সংবিধানগী থৌনা হিংহন্নবা মহাক্না হোৎনখি অমসুং মীয়াম মিকপ থোক্নবা হোৎনখি। লৈবাক অসিনা সংবিধানগী চহি ৫০শুবা থৌরম পাংথোকপদা মতমদা ঐ চীফ মিনিস্তর ওইনবা খুদোংচাবা ফংখি অমসুং ঐনা চীফ মিনিস্তর ওইরিঙৈ মনুংদা সংবিধানগী চহি ৬০শুবা থৌরম পাংথোকখি অমসুং মতম অদুদা চীফ মিনিস্তর ওইনা গুজরাত্ত সংবিধানগী চহি ৬০শুবা থৌরম পাংথোক্নবা ঐনা ৱারেপ লৌখি অমসুং পুৱারিদা অহানবা ওইনা শামু মথক্ত দোলাই অমা শারগা সংবিধানগী কপি অমা পুহনখি। শামু অমদা সংবিধান গৌরব যাত্রা পাংথোকখি অমসুং রাজ্য অদুগী চীফ মিনিস্তরনা খোঙনা শামুগী মনিংদা চৎখি অমসুং লৈবাক অসিদা সংবিধানগী মরুওইবা অদু খঙহন্নবা থবক ওইহনখি। ঐখোয়গী ওইনা সংবিধান অসি মরুওইবা মরম্না ঐশু মসিগী খুদোংচাবা অসি ফংলে অমসুং নবেম্বর ২৬ দা সংবিধান নুমিৎ পাংথোক্লবা মতুংদা লোক সভাগী অরিবা হাওসতা ঐনা হায়খিবা অদু ঐ নিংশিংলি। জনুৱারি ২৬ পাংথোক্লিঙৈ অসিদা, নবেম্বর ২৬ থৌরম পাংথোকপগী মরুওইবা করিনো হায়না অহল ওইরবা লুচিংবা অমনা মহাক্কী ৱাফম ফোঙদোরকখি।

ইকায়খুম্নরবা স্পিকর সার,

অখন্নবা মীফম পাংথোকপা অসিদা য়াম্না হরাওই, করিগুম্বা সংবিধানগী শক্তি অমসুং সংবিধানগী খেন্নবা খন্নরবদি, মসিনা তুংগী মীরোলশিংদা য়াম্না কান্নগনি। মীওই খুদিংমক মখোয় মশাগী নুংঙাইতবশিং লৈ। মীওই খুদিংমক মওং অমা নত্ত্রগা মওং অমদা মখোয়গী অৱাবশিং ফোঙদোকই। মীওই কয়ানা মখোয়গী মাইথিবশিংগী অৱাবা ফোঙদোকই। দলগী খেন্নবা লৈতনা লৈবাক অসিগী য়াইফনবা করিগুম্বা সংবিধান খন্ন-নৈনরবদি হেন্না ফগনি, মতম অদুদা লৈবাক অসিগী নৌবা মীরোলশিং নুংঙাই-য়াইফগনি।

ইকায়খুম্নরবা স্পিকর সার,

সংবিধানগীদমক ঐগী অখন্নবা ইকায়খুম্নবা অদু ফোঙদোকপা ঐনা পাম্মী। সংবিধানগী থৌনাদগী ঐগুম্বা মীওই কয়া মফম অসিদা য়ৌরকপা ঙমখিবনি। শৌগৎনবা লৈতবা ঐখোয় কমদৌনা মফম অসিদা য়ৌরক্কনি, মসি সংবিধানগী শক্তি, মীয়ামগী থৌজালদগী ওইথোকখিবনি। মসি অচৌবা থৌদাং অমনি অমসুং অসিগুম্বা বেকগ্রাউন্দ লৈতবা ঐগুম্বা মীওই কয়া মফম অসিদা লৈরে। মসি ইচম চম্বা ইমুং অমনা পাম্লিবা অদুনি অমসুং ঙসিদি সংবিধান্না ঐখোয় মফম অসিদা পুরক্লে অমসুং লৈবাক অসিনা ঐখোয়দা অশুক্কী মতিক নুংশিবা, অমুক খক নত্তবা, অনিরক নত্তবা, অহুমলক নুংশিবা অসি লাইবক য়াম্না ফবা অমনি। মসি ঐখোয়গী সংবিধান য়াওদনা ওইথোক্লোই।

ইকায়খুম্নরবা স্পিকর সার,

অকা-অকুমশিং লৈখি, খুদোংচাদবশিং লৈখি, অপনবা কয়া লৈখি, মখোয়ঘী অপুনবা মপাঙ্গলগা লোয়ননা ভারতকী সংবিধানগীদমক মখোয়না লেপ্পগীদমক ঐনা অমুক হন্না লৈবাক অসিগী মীয়াম থাগৎপা ফোঙদোকচরি।

ইকায়খুম্নরবা স্পিকর সার,

ঙসি ঐনা মফম অসিদা কনাগুম্বা অমতা লনাই ওইনা হুন্দুনা ঙাংবা পামদে অদুবু লৈবাক মীয়াম মমাঙদা অচুম্বশিং থম্বা অসি মরুওই অমসুং মরম অদুনা মখোয়গী মমাঙদা অচুম্বা খর থম্বা পাম্মী। কংগ্রেসগী ইমুং অমনা সংবিধান মাঙহন্নবা হোৎনবা য়াবা হোৎনখি। চহি ৭৫ গী ঐখোয়গী খোঙচৎ অসিদা, ইমুং অমনা চহি ৫৫ পানখিবা মরমনা ঐনা ইমুং অসি পল্লিবনি। মরম অদুনা, ইমুং অসিগী ফত্তবা ৱাখলশিং, ফত্তবা চৎনবীশিং অমসুং ফত্তবা থৌশিলশিং মখা চৎথবগী চৎনবী অমসুং মসিনা করি থোকহনবগে হায়বা খঙনবগী লৈবাক অসিগী হক লৈ। থাক খুদিংমক্ত ইমুং অসিনা সংবিধান শিংনখি।

ইকায়খুম্নরবা স্পিকর সার,

১৯৪৭ দগী ১৯৫২ ফাওবদা লৈবাক অসিদা মীয়াম্না খনবা সরকার লৈখিদে, মতম খরগী সরকার লৈখি, খনগৎলবা সরকার অমা লৈখি অমসুং মীখল অমতা পাংথোকখিদে। ১৯৫২ গী মমাঙদা রাজ্য সভা লৈখিদে। রাজ্যশিংদা মীখলশিং পাংথোকখিদে। মীয়ামগী চৎন-কাংলোন অমতা লৈখিদে। ১৯৫১ দা মীয়াম্না খনবা সরকার অমতা লৈখিদে। ওর্দিনান্স অমা চৎনদুনা মখোয়না সংবিধান শেমদোকখি অমসুং নিংতম্না ফোঙদোকপা অথিংবা থমখি অমসুং মসি সংবিধান শেমখিবশিংদা ইকায়বা পীবা অমনি অমসুং অসিগুম্বা ৱাফমশিং কন্সতিতুয়েন্ত এশেমব্লিদা খন্নখিদে। মখোয়না খুদোংচাবা ফংবা মতমদা, মখোয়না নিংতম্না ফোঙদোক্নিংবা অসি অথিংবা পীখি অমসুং মসি সংবিধান শেম্বশিংদা ইকায়বা পীবনি। কন্সতিতুয়েন্ত এশেমব্লি মুংদা মখোয়না পাংথোক্তবা থবকশিং, মখোয়না মনিং থোংদগী চঙলক্লগা পাংথোকখি অমসুং মখোয় মীয়াম্না খনবা সরকার অমগী প্রধান মন্ত্রী নত্তে, মখোয়না পাপ অমা পাংথোকখি।

মসি খক্ত নত্তে, ইকায়খুম্নরবা স্পিকর সার,

মতম অদুদা, প্রধান মন্ত্রী পন্দিৎ নেহরুনা চীফ মিনিস্তরদা চিথি অমা ইখি। চিথি অদুদা, নেহরু জিনা ইখি মদুদি করিগুম্বা সংবিধান্না ঐখোয়দা অপনবা পীরবদি, উপায় অমা তৌদুনা সংবিধান শেমদোক্কনি। মসিগী চিথি অসি নেহরুনা চীফ মিনিস্তরদা ইখি।

ইকায়খুম্নরবা স্পিকর সার,

য়েংউ, মসিগী পাপ অসি ১৯৫১ দা পাংথোকখি অমসুং লৈবাক অসি তুমিন্না লৈখিদে। মতম অদুদা, রাস্ত্রপতি দোক্তর রাজেন্দ্র প্রাসাদনা মসি অরানবনি হায়না চেকশিনৱা পীখি। মতম অদুদা ঐখোয়গী স্পিকরশু মহাক্না তৌরিবা অদু অরানবনি হায়না পন্দিৎ জিদা হায়খি। মসি খক নত্তনা মসি তোক্নবা অচার্য়া কৃপালানি, জয় প্রকাস নারায়নগুম্বা শক্নাইরবা কংগ্রেস লুচিংবশিংনা পন্দিৎ নেহরুদা হায়খি, অদুবু পন্দিৎজিন মশাগী সংবিধান শেমখি। অসিগুম্বা অহল ওইরবা মীওইশিং অসিগী পাউতাক মহাক্না তাখিদে অমসুং থওইখিদে।

ইকায়খুম্নরবা স্পিকর সার,

সংবিধান শেমদোক্নবা কংগ্রেসনা অশুক্কী মতিক মীহৌখি অমসুং মতম মতমগী ওইনা সংবিধান শেমদোক্নবা দল অসিনা হোৎনখি। মসিদা মখোয় ইকায়বা নঙখি। মসি খক নত্তনা, মসিনা সংবিধান খোঙ্গোইনখি।

ইকায়খুম্নরবা স্পিকর সার,

চহি ৬০ রোমদা সংবিধান ৭৫ রক শেমদোকখি।

ইকায়খুম্নরবা স্পিকর সার,

লৈবাক অসিগী অহানবা প্রধান মন্ত্রীনা হুল্লম্বা মরু অদু শ্রীমতি ইন্দিরা গান্ধী কৌবী অতোপ্পা প্রধান মন্ত্রী অমনা হার হাপখি অমসুং ঈশিং চাইখি। অহানবা প্রধান মন্ত্রীনা পাপ পাংথোকখি অমসু ঈ তাখি। ১৯৭১ দা সুপ্রিক কোর্তকী ৱারেপ অমা লৈখি। সংবিধান শেমদোক্তুনা অমসুং ১৯৭১ দা সংবিধান এমেন্দ তৌদুনা সুপ্রিম কোর্তকী ৱারেপ অদু ইনখিদে।

মখোয়না ঐখোয়গী লৈবাক অসিগী কোর্তকী মশাশিং ককথৎখি অমসুং সংবিধানগী আর্তিকল অমদা সংসদনা মখোয়না অপাম্বা পাংথোকপা য়াগনি হায়খি অমসুং মসিদা কোর্তনা য়েংশিনবা য়ারোই হায়খি। কোর্তকী হক খুদিংমক মৎখি। মসিগী পাপ অসি ১৯৭১ দা প্রধান মন্ত্রী শ্রীমতি ইন্দিরা গান্ধীনা পাংথোকখি। মসিগী অহোংবা অসিনা তঙাইফদবা হকশিং মুন্নবা অমসুং জুদিসিয়ারি লাকশিন্নবা ইন্দিরা জি সরকারদা হক পীখি।

ইকায়খুম্নরবা স্পিকর সার,

ইন্দিরা জি কোর্ত কাবদগী থিংনবা কনা অমতা লৈখিদে অমসুং মরম অদুনা আইন্না য়াদনা অমসুং সংবিধানগী ৱাংমদা মীখলশিং থেংনবগী মহাক্কী কোর্তনা চৎনহনখিদবা মতমদা অমসুং মহাক এম,পিদগী রিজাইন তৌবা তারকপদা, মহাক শাওখি অমসুং লৈবাক অসিদা ইমর্জেন্সি থমখি, মহাক্কী চৌক্রি কন্নবা মহাক্না ইমর্জেন্সি থমখি অমসুং মসি খক নত্তনা, মহাক্না সংবিধান লান্না শীজিন্নখি, মহাক্না ভারতকী গনতন্ত্র চরম মেৎখি। মহাক্না ১৯৭৫ দা ৩৯শুবা এমেন্দমেন্ত পাংথোকখি অমসুং রাস্ত্রপতি, উপ-রাস্ত্রপতি, প্রধান মন্ত্রী অমসুং স্পিকরগী মীখলশিংগী মায়োক্ত কনা অমতা কোর্ততা চৎপা য়াদনবা মহাক মসি পাংথোকখিবনি। মসি তুংগীদমক পাংথোকখিবা নত্তে, মহাক্না পাংথোকখিবা ফত্তবা থবকশিংগী পাংথোকখিবনি।

ইকায়খুম্নরবা স্পিকর সার,

ঐনা হায়রিবা অসি সংবিধানগী মরমদনি। ঐনা সংবিধানগী মায়োক্ত করিগুম্বা অমতা হায়খিদে।

ইকায়খুম্নরবা স্পিকর সার,

ইমর্জেন্সি মনুংদা মীয়ামগী হকশিং মৎখি। লৈবাক অসিগী মীওই লিশিং কয়া জেলদা থমখি। জুদিসিয়ারি চরম মেৎখি। পাউ-চেশিংগী মনিংতম্বা থিংজিনখি। মসি খক নত্তনা, জুদিসিএলগী মনিংতম্বা নমথখি। সংবিধান য়োকখৎলিবা জজ অমা ওইখিবা, ঐচ.আর খান্নানা শ্রীমতি ইন্দিরা গান্ধীগী মায়োক্ত ৱায়েল অমা তাখি অমসুং খ্বাইদগী সেনিয়র ওইবা জজ ওইরবশু থওইনা ভারতকী সুপ্রিম কোর্তকী চীফ জজতিসকী ফম পায়হনখিদে। মসি সংবিধান অমসুং গনতন্ত্রগী চৎন-কাংলোনশিং খোঙ্গাউনবনি।

ইকায়খুম্নরবা স্পিকর সার,

ঙসি হাওস অসিদা শরুক য়ারিবা দলশিং য়াওনা রাজনিতিগী লুচিংবা কয়া মতম অদুদা জেলদা থমখি। মরাল লৈজদ্রবা মীয়াম ওৎখি, পুলিসকী মীওৎ-মীনৈ ফংখি অমসুং মীওই কয়া জেলদা শিখি। তমথিরবা সরকার অমনা সংবিধান শেগায়খি।

ইকায়খুম্নরবা স্পিকর সার,

সংবিধান খোঙ্গোইনবগী থবক মফম অসিদা লোইখিদে। নেহরুনা হৌরম্বা থবক অদু ইন্দিরা গান্ধীনা মখা চৎথখি, তুংদা রজিব গান্ধীনা চৎথখি। রজিব গান্ধীনা সংবিধানদা অচৌবা শাফু অমা পীখি। সাহ বানো কেসতা সুপ্রিম কোর্তকী ৱায়েল নমশিন্দুনা থমখি আমসুং অহল ওইরবী নুপী অমদা পীবা মহাক্কী হকশিং তান্নবগী হক অদু নমশিনখি। অদুবু রজিব গান্ধীগী সরকারনা সংবিধানগী গুনশিংদগী ভোৎ-বেঙ্ক রাজনিতিনা হেন্না লুম্না লৌখি, লেজিসলেসনগী খুৎথাংদা ৱায়েল অসি নমশিনখি, ফন্দামেন্তালিস্তশিংগী প্রেসরদা কোক নোনখি।

ইকায়খুম্নরবা স্পিকর সার,

সংবিধান খোঙ্গোইনবগী থবক মখা চৎথখি। নেহরুনা হৌরম্বা অদু ইন্দিরানা মপাঙ্গল কনখৎহনখি অমসুং রাজিবনা মপাঙ্গল হাপখি। অশুম্না রজিব গান্ধীনা প্রধান মন্ত্রী ওইরকখি। মহাক্না সংবিধানদা অতোপ্পা শাফু অমা পীখি। মীওই খুদিংমক মান্নবা, অচুম্বা ৱায়েল ফংবা হায়বা ৱাখল্লোল অসি মহাক্না শোকহনখি।

ইকায়খুম্নরবা স্পিকর সার,

মসিগী অরানবা থবক অসিনা মখোয় লেপহনখিদে। মথংগী মীরোলগী লুচিংবনা হেন্না শাথিখি। ঐগী মমাঙদা লৈরম্বা হান্নগী প্রধান মন্ত্রী অমগী ৱারোল অমা পনখিবা লাইরিক অমদগী ৱাহৈ খর লৌখৎপা ঐ পাম্মী। লাইরিক অদুদা, মনমোহন সিংহ জিনা হায়খি, “দলগী প্রসিদেন্দনা শক্তিগী হৌরকফমনি হায়বা অসিদা ঐ য়াই। সরকার অসি দলনা য়ানবা চৎগদবনি”।

ইকায়খুম্নরবা স্পিকর সার,

পুৱারিদা অহানবা ওইনা, অসিগুম্বা ফিবম অমদা, সংবিধান নমথখি। মীয়াম্না খনবা সরকার অমসুং অমসুং মীখলদা খনবা প্রধান মন্ত্রীগী ফজরবা ৱাখল অসি নমহৎখি। ঐখোয়গী সংবিধান অমা লৈরিঙৈদা, প্রধান মন্ত্রীগী মথক্ত সংবিধানগী ৱাংমদা অমসুং ৱাশক লৌদবা নেসনেল এদভাইজরি কাউন্সিল অমা থমখি অমসুং প্রধান মন্ত্রীগী ওফিসকী মথক্ত ফাওবা লৈখি। মসিনা প্রধান মন্ত্রীগী ওফিস লাওথোক্তবা, হন্থবা ফিবম অমদা থমখি, ঐখোয়গী সংবিধান্না লৈবাক ঙাকপগী ফিদমশিং মপুংফানা নমশিনখি।

ইকায়খুম্নরবা স্পিকর সার,

ভারত সংবিধানগী মখাদা, মীয়াম্না সরকার খল্লি অমসুং সরকার অদুগী লুচিংবনা কেবিনেত শেম্মী। অদু তঙাইফদবা সংবিধানগী থবকনি। অদুবু, মসিগী কেবিনেত অসিনা  লৌখিবা ৱারেপ অমা সংবিধান ইকায়খুম্নবা উৎতবা মীওই খরনা পাউমীশিংগী মমাঙদা শেগায়খি। মখোয়না দরকার ওইরকপা মতমদা সংবিধান খোঙ্গোইনবা অমসুং শেমদোকপা হায়বসি মখোয়গী হৈনবীনি। ফিবম চাদনা, মঙক কনবা মীওই অমনা কেবিনেতকী ৱারেপ শেগায়খি অমসুং ৱারেপ অদু হন্দোক্নবা কেবিনেত্ত তকশিনখি। ফিবম অসিদা করম্বা মখলগী সরকারনা থবক তৌগনি?

ইকায়খুম্নরবা স্পিকর সার,

ঐনা ফোঙদোক্লিবা ৱাফম খুদিংমক সংবিধান্দা করি পাংথোকখিবগে হায়বা অদুনি। মতম অদুদা লনাই মীওইশিংগী থবক অদু কনাগুম্বা অমনা খন্নবা য়াই, অদুবু মফম অসিদা সংবিধানদা মীৎয়েং থম্লে। ঐনা লনাই ওইবা ৱাফমশিং শরুক য়াবা নত্তে পুৱারিগী অচুম্বশিং অদু পুথোকপনি।

ইকায়খুম্নরবা স্পিকর সার,

কংগ্রেস দলনা হঞ্জিন হঞ্জিন সংবিধান ইকায়বা পীরে। কংগ্রেসনা সংবিধানগী ইন্সিতুতুসনশিং মৱা লৌখিদে। মীয়াম্না আর্তিকল ৩৭০ পাক-শন্না খঙনরবশু, মীয়াম্না আর্তিকল ৩৫এ পাক খঙনদে। মসি সংসদতা পুথোক্তনা, লৈবাক অসিদা আর্তিকল ৩৫এ চৎনখি। মসিগী এক্ত অসিনা, ঐখোয়গী সংবিধানগী য়ুম্ফম ওইরিবা সংসদ কান্দুনা চৎখি। সংসদ অসিমক নাকলদা থমখি, মসিগী শক্তি চরম মেৎখি। লৈবাক অসিগী সংসদ অমম্বদা থম্লগা, রাস্ত্রপতিগী ওর্দর অমগী খুৎথাংদা, সংসদকী অয়াবা য়াওদনা আর্তিকল ৩৫এ চৎনখি। করিগুম্বা আর্তিকল ৩৫এ নমদুনা চৎনহল্লমদ্রবদি, জম্মু অমসুং কাস্মিরগী ফিবম অসুক য়ৌনা শোকজিল্লম্লোই। মসিগী মীয়াম্না য়াদবা এক্ত অসিনা গনতন্ত্রগী ফিদমশিং খোঙনেৎনখি অমসুং লৈবাক অসিদা মতম শাংনা খুদোংচাদবা ওইহনখি।

ইকায়খুম্নরবা স্পিকর সার,

মসি সংসদকী ফংফম থোকপা হকনি অমসুং অসিগুম্বা ৱাফমশিং কনাগুম্বা অমনা মীচং-মীখায় নাইনা থবক তৌরোইদবনি। অদুবু মেজোরিতি অমা লৈরবশু, মখোয়না মদুদগী লাপ্না লৈখি। মখোয়গী থবকশিং অদু লৈবাক অসিগী মীয়ামদগী লোৎশিন্নবা মখোয়না হোৎনখি।

ইকায়খুম্নরবা স্পিকর সার,

অদুবু ঙসি ঐখোয়না ইকায়খুম্নবা উৎলিবা বাবা সাহেব অম্বেদকারনা ঐখোয়গী অখন্নবা মফম অমা কল্লমখি। ঐখোয়গী পুন্সি কয়াগী চাউখৎপগী লম্বীশিং মহাক্না থোল্লম্বনি।

ইকায়খুম্নরবা স্পিকর সার,

মহাক্কী মতমদা বাবা সাহেব অম্বেদকারগী মথক্ত নুংশিদবা অমসুং অখাবা মীৎয়েং য়েংবা লৈরমলোই হায়না ঐনা খল্লি। অদুবু, অতল জিনা শক্তি পায়রকপা মতমদা, বাবা সাহেব ইকায়খুম্নবা উৎনবা মেমোরিএল অমা লিংখৎনবা ৱারেপ অমা লৌখি। লাইবক থিবদি, চহি ১০ গী য়ু.পি.এ লৈঙাক মনুংদা, মসিগী থবক অসি পায়খৎখিদে নত্ত্রগা মখা চৎথবগী অয়াবা পীখিদে। ঐখোয়না সরকার পায়রকপা মতমদা, ঐখোয়না বাবা সাহেব অম্বেদকার ইকায়খুম্নবা অদুনা লমজিংদুনা, ঐখোয়না অলিপুর রোদতা বাবা সাহেব মেমোরিএল শাখি অমসুং প্রোজেক অদু মপুংফানা লোইশিল্লে।

ইকায়খুম্নরবা স্পিকর সার,

১৯৯২ দা, দিল্লিদা বাবা সাহেব অম্বেদকার ইকায়খুম্নবা উৎনবা ৱারেপ অমা লৌখি, মতম অদু চন্দ্রসেখর জিনা শক্তি পায়রি। জনপথ ময়াদা অম্বেদকার ইন্তরনেসনেল সেন্তর লিংখৎনবা খন্নখি। অদুবু, চহি ৪০, মসিগী ৱাখল অসি চেদা নমশিন্দুনা থমখি অমসুং থবক অমতা পায়খৎখিদে। ঐখোয়গী সরকার লাকপা মতমদা, ২০১৫ দা ঐখোয়না থবক অসি পাংথোকখি অমসুং থবক অদু লোইশিল্লে। কংগ্রেস সরকার লৈত্রবা মতম খক্তদা বাবা সাহেব অম্বেদকারদা ভারত রত্ন পীনবা ৱারেপ থবক ওইনা পাংথোকখি।

ইকায়খুম্নরবা স্পিকর সার,

ঐখোয়না লৈবাক শীনবা থুংনা লৈবাক ১২০ দা বাবা সাহেব অম্বেদকারগী চহি ১২৫ শুবা থৌরম পাংথোকখি। বাবা সাহেব অম্বেদকারগী চহি ১০০ শুবা থৌরম মনুংদা, মধ্য প্রদেসতা চীফ মিনিস্তর সুন্দরলাল পাতৱানা লুচিংবা বি.জে.পি সরকার অমা লৈখি অমসুং মখোয়না বাবা সাহেব অম্বেদকারগী পোক্নফম হাও অসি মেমোরিএল অমা ওইনা অমুক হন্না শেমগৎখি। মহাক্কী লৈঙাক মতমদা মসিগী ইকায়খুম্নবা অসি উৎপগী থবক অসি পাংথোকখি।

ইকায়খুম্নরবা স্পিকর সার,

বাবা সাহেব অম্বেদকার তুংগী মীৎয়েং শানবা, খুন্নাইগী তোল্লবা কাংলুপশিংগী ফিবম ফগৎনবা কৎথোকখিবা অমসুং জাতিগী ইচেলদা মখোয় য়াওহনখিবা লুচিংবা অমনি। ভারত চাউখৎহন্নবা অমসুং লমদম অমা নত্ত্রগা কাংলুপ অমা নাথৈদুনা থমহৌদনবা মহাক্না য়াম্না চেৎনা থাজখি। মসিগী পান্দম অসিনা লমজিংদুনা ঐখোয়গী লৈবাক অসিদা রিজার্বেসনগী থবক হৌদোকখিবনি। অদুবু ভোৎ-বেঙ্ককী থবক পাংথোকপশিংনা লাইনিংদা য়ুম্ফম ওইদুনা পেনহন্নবা হোৎনবদগী রিজার্বেসন মাঙহনখি অমসুং এস.সি.এস.তি অমসুং ও.বি.সি ফুরুপশিংদা অচৌবা মাঙজবা ওইহনখি।

ইকায়খুম্নরবা স্পিকর সার,

রিজার্বেসনগী ৱারি অসি য়াম্না শাংই অমসুং শিংনবা কয়া মায়োক্নখি। নেহরু জিদগী রজিব গান্ধী ফাওবদা, কংগ্রেসকী প্রধান মন্ত্রীশিংনা রিজার্বেসনগী মায়োক্ত লৈখি। পুৱারিগী রোকোর্দশিংনা ফোঙদোকপগী মতুংইন্না, নেহরু জি মশামক্না চীফ মিনিস্তরশিংদা অকনবা চিথিশিং ইদুনা রিজার্বেসনগী মায়োক্ত লৈনবা খঙহনখি। মখা তানা, মখোয়না হাওস অসিদা রিজার্বেসনগী মায়োক্ত শাংলবা ৱারোল পীখি। থোং মান্নবা লৈহন্নবা অমসুং ভারত থোং মান্ননা চাউখৎনবা বাবা সাহেব অম্বেদকারনা রিজার্বেসন হৌক্লিঙৈ চৈরক্ত, কংগ্রেসকী লুচিংবশিংনা মসিগী মায়োক্ত লৈখি। হায়রিবা খুদোংচাদবশিং অসি কোকহন্নবা শেমখিবা মন্দল কম্মিসনগী রিপোর্ত চহি কয়া নমশিন্দুনা থমখি। মসি কংগ্রেসনা সরকার পায়দ্রবা মতমদা ও.বি.সিশিংদা রিজার্বেসন পীখিবনি। মফম অদু ফাওবা, ও.বি.সি ফুরুপকী মীওইশিং তোঙান-তোঙানবা থবকশিংদা লৈবাক অসিগী থবক তৌনবগী মখোয়গী ফংফম থোকপা হকশিং মৎখি। মসি কংগ্রেসনা পাংথোকখিবা অচৌবা অরানবা অমনি। করিগুম্বা রিজার্বেসন অসি ঙনখৎনা চৎহল্লম্লবদি, তোঙান-তোঙানবা ফমশিংদা লৈবাক শেমগৎনবা থবকশিংদা ও.বি.সি ফুরুপনা শিংথাবা য়ানা মতেং পাংলমগনি। অদুবু কংগ্রেসনা মসি থবক ওইনা পাংথোকখিদে। মসি কংগ্রেসনা পাংথোকখিবা অতোপ্পা পাপ অমনি অমসুং লৈবাক অসিনা মখা তানা মখোয়না পাংথোকপা থবকশিংগী চৈথেং ফংখি।

ইকায়খুম্নরবা স্পিকর সার,

ঐখোয়গী লৈবাক্কী সংবিধান শেম্বা হৌরকপা মতমদা, লাইনিংদা য়ুম্ফম ওইরগা  রিজার্বেসন পীগদরা হায়বগী মতাংদা পুং কয়া অমসুং নুমিৎ কয়ানি ফাউন্দিং মেম্বরশিংনা খন্নখি। নিংথিনা খন্নরবা মতুংদা, অপুনবা ৱারেপ অমা লৌখি, ভারতগুম্বা লৈবাক অমগী অপুনবা অমসুং ঙমখৈগী অপুনবগী শরুক্কীদমক, লাইনিংদা য়ুম্ফম ওইরগা রিজার্বেসন থম্লোই হায়না। মসি ৱাখল ফজনা খল্লগা লৌখিবা ৱারেপনি অমসুং মসিদা অরানবা অমতা লৈখিদে। মসি ফজনা খন্নরবা মতুংদা লৌখিবা ৱারেপনি অমসুং অসিগুম্বা খুদোংচাবশিং অসি লাইনিংদা য়ুম্ফম ওইরগা পাংথোক্লোইদবনি। অদুবু কংগ্রেসনা শক্তি মীহৌবদগী অমসুং মসিগী ভোৎ বেঙ্কশিং পেনহন্নবা, লাইনিংদা য়ুম্ফম ওইদুনা রিজার্বেসন পীনবা অনৌবা থৌরাং অমা হৌদোকখি। মসি সংবিধানগী মায়োক্তনি। মখোয়না মসি মফম খরদা থবক ওইনা পাংথোকখি, অদুবু সুপ্রিম কোর্ততা মাইথিবা ফংখি। হৌজিক মখোয়না মসি চৎনগনি হায়না লাউরি, অদুগা লাইনিংদা য়ুম্ফম ওইদুনা রিজার্বেসন পীবা মখোয়না পাম্লিবা অদু উৎথোক্লে। মসি সংবিধান শেমখিবশিংগী ৱাখল্লোন্দা অচৌবা চৈনা অমা পীনবা ইকায়বা খঙদনা হোৎনবা অমনি।

ইকায়খুম্নরবা স্পিকর সার,

ঐনা খন্নবা পাম্বা মরুওইবা ৱাফম অমা লৈরি অমসুং মদু য়ুনিফোর্ম সিবিল কোদনি। কন্সতিতুয়েন্ত এশেমব্লিনা য়ুনিফোর্ম সিবিল কোদকী মতাংদা নিংথিনা খন্নখ্রে। ফজনা মরৈ য়েৎনরবা মতুংদা, তুংদা লাক্নিংবা সরকার অমা লাকপা মতমদা লৈবাক অসিদা য়ুনিফোর্ম সিবিল কোদ চৎন্নবা ৱারেপ লৌনবা মখোয়না ৱারেপ লৌখি। মসি কন্সতিতুয়েন্ত এশেমব্লিগী য়াথং অমনি অমসুং মসি দোক্তর বাবা সাহেব অম্বেদকার মশামক্না হায়খি। অদুবু সংবিধান নত্ত্রগা লৈবাক অসি মশক খঙদবশিং অমসুং মখোয়গী শক্তি পাম্বদগী হেন্না উবা ফংদবশিংনা বাবা সাহেবা করি হায়খিবগে হায়বা খঙদে। বাবা সাহেবনা হায়খিবা অদু ঐ মীয়ামদা হায়জগে: সংবিধানগী ৱারোলদগী মসি লৌথোক্কনু অমসুং অখন্নবা ভিদিওশিং শন্দোক্তুনা অমসুং কক্তুনা মসি অরানবা পাউ শন্দোক্নবা হোৎনগনু।

ইকায়খুম্নরবা স্পিকর সার,

লাইনিংদা য়ুম্ফম ওইবা লনাই মীওইশিংগী লোশিং মুৎথৎনবা বাবা সাহেব অম্বেদকারনা কন্না লাউখি। মতম অদুদা মরৈ য়েৎনবদা,কন্সতিতুয়েন্ত এশেমব্লিগী মেম্বর অমা ওইখিবা, কে.এম মুন্সিনা হায়খি মদুদি লৈবাক অসিগী অপুনবা অমসুং মতমগা চুন্না চাউখৎনবা য়ুনিফোর্ম সিবিল কোদ দরকার ওই। সুপ্রিম কোর্তনা তোঙান-তোঙানবা থৌরমশিংদা, অথুবা মতমদা লৈবাক অসিদা য়ুনিফোর্ম সিবিল কোর্দ চৎনবগী তঙাইফদবা অদু ফোঙদোকখি অমসুং মসি থবক ওইনা পাংথোক্নবা সরকারশিংদা পাউতাক পীখ্রে। সংবিধানগী ৱাখল্লোন অমসুং সংবিধান শেমখিবশিংগী ইহুল খঙদুনা সেকুলার সিবিল কোদ অমা লৈনবা ঐখোয়না থবক পায়খৎলে। অদুবু ঙসি কংগ্রেসনা সংবিধান শেমখিবশিংগী ৱাখল্লোন ইকায়বা পীবা খক নত্তনা সুপ্রিম কোর্তকী য়াথংশিংশু ইকায়বা পীরে। মসি মখোয়গী রাজনিতিগী পান্দম অদুগা মান্নদবদগী ওইরকপনি। মখোয়গী ওইনা, সংবিধান অসি শেংলবা লাইরিক অমা নত্তে, মসি রাজনিতিগী অরানবা পাংথোক্নবা খুৎলায় অমা ওইরে। রাজনিতি শানদুনা মসি মখোয়না খুৎলায় অমা ওন্থোক্লে অমসুং মসিনা মীয়ামদা কিহল্লে।

ইকায়খুম্নরবা স্পিকর সার,

সংবিধান হায়বা ৱাহৈ অসি ফাওবা কংগ্রেস দলগী চিম্বালশিংগা পক্নদে। দল অসিগী মশাগী সংবিধান ফাওবা ইকায়খুম্নদবা দল অমনা, মশাগী অচুম্বা ফিদমশিং ফাওবা ঙাক্না চৎতবা দল অমনা, লৈবাক অসিগী সংবিধান ইকায়খুম্নগনি হায়বা থাজবা লৈতে। সংবিধান অমা য়ানবা অমসুং ইন্নবা গনতন্ত্রগা ৱাখল্লোন অমা দরকার ওই। মখোয়গী শিংলিশিংদা শাগৈগী রাজনিতিনা পীক থল্লে। মখোয়গী থবক তৌবদা চরাংনবা অমসুং গনতন্ত্রগী গুনশিং ৱাৎপা অদু য়েংউ। ঐনা হায়রিবা অসি কংগ্রেসকী মতাংদনি। সারদার পতেলনা প্রধান মন্ত্রী ওইবদা প্রোভিন্সিএল কংগ্রেস কম্মিতি ১২ না শৌগৎখি। কম্মিতি অমতনা নেহরু শৌগৎখিদে। মখোয় মশাগী সংবিধান মতুংইন্না, সারদার পতেলনা লৈবাক অসিগী অহানবা প্রধান মন্ত্রী ওইগদবনি। অদুবু মদু করি থোকখি? গনতন্ত্রদা থাজবা ৱাৎপা, মখোয় মশাগী দলগী সংবিধান থওইদবদগী সারদার পতেল নাথৈদুনা থমখি অমসুং মখোয় মশামক্না শক্তি পায়খি। দল অসিগী মশাগী সংবিধান ফাওবা য়োকখৎতবা দল অমনা কমদৌনা লৈবাক অমগী সংবিধান ইকায়খুম্নগনি?

ইকায়খুম্নরবা স্পিকর সার,

মখোয়গী দলগী পুৱারিদগী ৱারি অমা মখোয়গী মফমদা ঐ নিংশিংজগে। মতম অমদা কংগ্রেস দলদা খ্বাইদগী তোল্লবা কাংলুপ অমগী মীওই অমনা প্রসিদেন্ত ওইখি। মহাক্কী মমিং সিতারাম কেসরি জি কৌই। কমদৌনা মহাক লোয়নখিবগে? মহা তাথি-তাওইনা তৌখি। মসি বাথুরুমদা শো লোনশীন্দুনা থমখি অমসুং লম্বীদা লংথোরকখি। অসিগুম্বা মীনুংশিং খঙবা থবক অসি মখোয়গী দলগী সংবিধান্দা কৈদৌঙৈদা ইখিদে, মসি মখোয়না নাথৈখি। মখোয়না মশাগী দলগী সংবিধান য়াওরিবা গনতন্ত্রগী থবকশিং অমদা পাংথোকখিদে। মতমগী মতুংইন্না, কংগ্রেস দল অসি ইমুং অমগী মখাদা লৈখি, গনতন্ত্রগী গুনশিং নাথৈখি।

ইকায়খুম্নরবা স্পিকর সার,

সংবিধান শান্নবা অমসুং মসিগী ফজবা মাঙহনবা অসি কংগ্রেসকী চৎনবীনি। ঐখোয়গী ওইনা, সংবিধান, মসিগী অচুম্বা অমসুং মসিগী ইন্তেগ্রেতি অসিনা খ্বাইদগী মকোক্নি। মসি শুপ্নগী ৱারি খক নত্তে, মসি ঐখোয়গী থবকশিংনা উৎলে। চাংয়েং তৌবা খুদিংগী, ঐখোয়না মাইপাক্লে। ঐ খুদম অমা পীগে। ১৯৯৬ তা, বি.জে.পি মীখলদা খ্বাইদগী য়াম্না কাবা দল অমা ওইখি। সংবিধানগী কাংলোন মতুংইন্না, মশিং খ্বাইদগী য়াম্বা দলদা সরকার শেম্নবা রাস্ত্রপতিনা বার্তন তৌরকখি। সরকার অদু নুমিৎ ১৩ খক চৎখি। করিগুম্বা ঐখোয়না সংবিধানগী অচুম্বা অদু ঙাকলমদ্রবদি, মেজোরিতি অমা ফংনবা অমসুং সরকার পায়বগী নুংঙাইবা ফংনবা, ফমশিং পীদুনা, দিপুতি প্রাইম মিনিস্তর পীদুনা ঐখোয়না মন্তিক্নবা ঙমগনি। অদুবু অতল জিনা অদুগুম্বা হুন্নবগী থবক অদু য়াখিদে অমসুং মদুগী মহুত্ত সংবিধান ইকায়খুম্নখি। মহাক নুমিৎ ১৩ গী  মতুংদা ফম থাদোকখি। মসি গনতন্ত্রগী গুনশিংগী অয়ৌবা থাক্নি। অমুক হন্না, ১৯৯৮ দা এন.দি.এগী মখাদা ঐখোয়না মরা চেৎপা সরকার অমা শেমখি। অদুবু, মখোয়না অতল জিগী সরকার তুনবা মহৌশাগী মখোয়গী লিলা কয়া শান্নখি। থাজবগী ভোৎ লৌনখি। মতম অদুদা, হোর্স-ত্রেদিং; ভোৎশিং লৈবা অমসুং য়োনবা য়াম্না কন্না চৎনখি। অদুবু অতল জিনা সংবিধান থাজখি অমসুং অচুম্বা ফিদমশিংদা য়াশিন্নবা পুরকপগী মহুত্তা ভোৎ অমদা মাইথিখি। সরকার তুখি অদুবু ঐখোয়না গনতন্ত্র অমসুং সংবিধানগী কাংলোনশিং ঙাকখি।

মসি ঐখোয়গী পুৱারিনি, ঐখোয়গী গুনশিংনি অমসুং ঐখোয়গী চৎনবীনি। অমরোমদা, মখোয়গী মাইনোরিতি সরকার কান্নবা মখোয়না মমিং লৈরবা কেস-ফোর-ভোৎস ৱাথোক থোকহনখি। ভোৎ লৈনবা সংসদতা শেন মপুন কয়া পুরকখি। মসি গনতন্ত্র খোঙ্গোইনবনি হায়না জুদিসিয়ারিনা ফোঙদোকখি। মখোয়না ভারতকী শেংলবা সংসদ অসি শেন্না ভোৎ লৈনবা কৈথেল অমা ওন্থোকখি। বি.জে.পিনা গনতন্ত্রদা থম্লিবা থাজবা অসিগা ওন্ন-তৈনখি অমসুং কংগ্রেসনা মসিগী গুনশিং শেমদোকখি অমসুং মখোয়না সংবিধান মীরাইখি।

ইকায়খুম্নরবা স্পিকর সার,

১৯৯০ গী মতমদা, এম.পিশিংদা শেন পীজবগী ইকায়রবা থৌদোক কয়া থোকখি অমসুং সংবিধানগী অচুম্বা খোঙনেৎনবগী ঙাকপীবা য়াদ্রবা ফত্তবা থবকশিং অদু ভারতমচা করোর ১৪০দা মমি তাখি। কংগ্রেসকী ওইনা, শক্তি পায়নবা হোৎনবা অসি খক্তনা পুৱারিনি অমসুং দল অসিনা হৌজিক পাংথোক্লিবা থবকনি।

ইকায়খুম্নরবা স্পিকর সার,

২০১৪ গী মতুংদা, মীয়ামগী থবক তৌনবা এন.দি.এদা খুদোংচাবা পীখি। সংবিধান অমসুং গনতন্ত্র মপাঙ্গল কনখৎহল্লে। লৈবাক অসি অরিবা অনাবশিংদগী মনিং তম্নবা ঐখোয়না কেম্পেন অমা হৌদোক্লে। হৌখিবা চহি ১০ দা, ঐখোয়না সংবিধান শেমদোক্লে। অদুবু, লৈবাক অসিগী অপুনবা শক্তম, ঙমখৈগী অপুনবা শক্তম অমসুং লৈবাক অসিগী তুংগী য়াইফনবা, সংবিধানগী অচুম্বদা মপুংফানা কৎথোক্তুনা ঐখোয়না সংবিধান শেমদোকপনি। করিগীদমক ঐখোয়না এমেন্দমেন্তশিং পাংথোক্লিবনো? চহি ৩০ হেন্না, লৈবাক অসিগী ও.বি.সি ফুরুপনা ও.বি.সি কম্মিসন সংবিধান্না শক খঙনবা তক্নদুনা লাক্লি। ও.বি.সি ফুরুপ ইকায়খুম্নবা উৎপা ওইনা, মসি সংবিধান্না শক খঙনবা ঐখোয়না সংবিধান শেমদোক্লে অমসুং মসি থবক ওইনা পাংথোকপদা ঐখোয় চাউথোকচৈ। খুন্নাইগী নৈহৎপীরবা অমসুং তোল্লবা কাংলুপশিংগী লেপ্পা অসি ঐখোয়গী থৌদাংনি অমসুং মরম অদুনা সংবিধান শেমদোকপনি।

ইকায়খুম্নরবা স্পিকর সার,

মখোয়না পোকখিবা জাতি অদুগী ৱাফম নত্তনা, মখোয় লায়রবনা মরম ওইদুনা খুদোংচাবশিং ফংদবা মশিং য়াম্লবা মীওই কাংলুপ অমা লৈবাক অসিদা লৈরি। মখোয় পুন্সিদা খুমাঙচাউশিনবা ঙমখিদে আমসুং মসিনা মখোয় পেন্দবা অমসুং লৈতাবা ওইখি। মখোয়না তকশিনখি, অদুবু কনা অমতনা চপ চাবা থবকশিং পায়খৎখিদে। জেনেরেল কেতেগোরিদা লায়রবশিংগী চাদা ১০ রিজার্বেসন থম্নবা ঐখোয়না সংবিধান শেমদোক্লে। মসি লৈবাক অসিদা রিজার্বেসনগীদমক অহানবা ওইনা সংবিধান শেমদোকপনি অমসুং মসিদা কনা অমতনা অপনবা পীখিদে। সংসদনা মসি অমতা ওইনা পাস তৌখি। মীওই খুদিংমক্না শৌগৎখি অমসুং মসিনি কমদৌনা মসিগী সংবিধান শেমদোকপা অসি পাংথোকখিবগে হায়বা।

ইকায়খুম্নরবা স্পিকর সার,

ঐখোয়না নুপীশিংদা শক্তি পীনবা সংবিধান শেমদোক্লে। সংসদ অমসুং রাজ্যগী এশেমব্লিশিংদা নুপীশিংগী সিত খাক্নবা লৈবাক অসিনা থবক পায়খৎপা মতমদা অরিবা সংসদকী বিল্দিংনা শাখি ওইরে অমসুং বিল অসি পুথোকপা মতমদা, মখোয়গা চৎমিন্নবা দলশিংগী মনুংদা অমনা ৱেলদা লাকখি, চে-চাংশিং মুনখি, চেশিং অদু শেগায়খি অমসুং হাওসকী মীফম য়ৈথোকখি। মসিদগী ৱাফম অসি চহি ৪০ নমশিন্দুনা থমখি। ঙসিদি, নুপীশিংগী হকশিং ফংনবা হোৎনবদা অপনবা পীখিবা মীওইশিং অদু নুপীশিংনা লমজিংবনি হায়না খন্নরে। লৈবাক অসিগী নুপীশিংদা অরানবা চৎথখিবা মীওইশিং অদু হৌজিক নুপীশিংগী ওজাশিং ওইরে।

ইকায়খুম্নরবা স্পিকর সার,

লৈবাক্কী অপুনবা পুরক্নবগীদমক ঐখোয়না সংবিধান শেমদোকখি। আর্তিকল ৩৭০না মরম ওইদুনা দোক্তর বাবা সাহেব অম্বেদকারগী সংবিধান অসি জম্মু অমসুং কাস্মির ফাওবা য়ৌবা ঙমখিদে। ভারতকী মফম খুদিংমক অম্বেদকারগী সংবিধান চৎনবা ঐখোয়না পামখি। বাবা সাহেব ইকায়খুম্নবা উৎনবা অমসুং লৈবাক অসিগী অপুনবগী শক্তম মপাঙ্গল কনখৎনবা, ঐখোয়না সংবিধান শেমদোক্লে অমসুং থৌনা ফনা আর্তিকল ৩৭০ লৌথোক্লে। হৌজিক ভারতকী সুপ্রিম কোর্তনা ৱারেপ অসিদা অয়াবা পীরে।

ইকায়খুম্নরবা স্পিকর সার,

লৈবাক অনি থোক্না খায়দোক্নবা মনুংদা, মহাত্মা গান্ধী য়াওনা সেনিয়র লুচিংবশিংনা, য়ুম্লোন্নবা লৈবাকশিংদা লৈরিবা মাইনোনিতিশিংনা অৱাবা তারকপা মতমদা লৈবাক অসিনা য়েংশিনগনি হায়না মীয়াম মমাঙদা ফোঙদোকখি। মহাক্কী মিংদা সরকার পায়রকপা মীওইশিংনা কৈদৌঙৈদা গান্ধীজিগী ৱাশক থবক ওইনা পাংথোকখিদে। সিতিজনসিপ এমেন্দমেন্ত এক্ত (সি এ এ)গী খুৎথাংদা ঐখোয়না ৱাশক অমা ঙাক্লে। মসি ঐখোয়না পুখৎলকপা, ঙসি ফাওবা ঐখোয়না মখা তানা ঙাক্তুনা থম্লিবা লো অমনি। ঐখোয়না মসিদগী লৈদুনা চেল্লোই, মরমদি লৈবাক অসিগী সংবিধানগী অচুম্বদা ঐখোয়না চেৎনা থাজবা থম্লি।

ইকায়খুম্নরবা স্পিকর সার,

হৌখিবা অশোয়বশিং চুমথোক্নবা অমসুং তুংগী য়াইফনবা লম্বী অমা শেম্নবা সংবিধান শেমদোকপনি। ঐখোয়না লেপ্পরা নত্ত্রগা লেপ্তবরা হায়বা মতমনা পুরক্কনি। সংবিধান শেমদোকখিবশিং অসি মশাগী ওইজনবা পাংথোকখিবা নত্তে-লৈবাক অসিগী য়াইফনবা অফবা থবক অমা ওইনা মখোয় পাংথোকখিবনি। মরম অদুনা, হায়রিবা ৱারেপশিং অসিদা ৱাহং হংখিবা মীওইশিংনা খঙগদবদি লৈবাক অসিগী য়াইফনবা খন্দুনা সংবিধান শেমদোকখিবনি।

ইকায়খুম্নরবা স্পিকর সার,

মফম অসিদা সংবিধানগী মতাংদা ৱা কয়া ঙাংখ্রে অমসুং ৱাফম কয়া পুখৎখ্রে। মীওই খুদিংমক মখোয় মশাগী খুদোংচাদবশিং লৈ অমসুং রাজনিতিদা, পান্দম খরগীদমক মীয়াম্না থবক খর পাংথোকই। অদুবু, ইকায়খুম্নরবা স্পিকর সার, ঐখোয়গী সংবিধানগী খ্বাইদগী মরুওইবা ৱাফমদি ভারতকী মীয়ামনি। ঐখোয় মীয়াম, ভারতকী মীয়াম, সংবিধান অসি মখোয়গীনি, মখোয়গী য়াইফনবা অমসুং মখোয়গী ইকায়খুম্নবা ঙাক্নবনি। মরম অদুনা নুংঙাই-য়াইফবা লৈবাক অমগী মাইকৈ সংবিধান্না তাক্লি, নুংঙাই-য়াইফবা লৈবাক হায়বদি মীয়ামগী ইকায়খুম্নবা পুন্সি অমা ফংহনবা অদুবুনি। ঐখোয়গী কংগ্রেসকী মরুপশিংনা য়াম্না পাম্না শীজিন্নবা ৱাহৈ অমা লৈরি। মখোয়না য়াম্না পামজবা, ৱাহৈ অদু য়াওদ্রবদি মখোয় হিংবা ঙমদবা ৱাহৈ অদুদি ‘জুমলা’নি। ঐখোয়গী কংগ্রেসকী মরুপশিংনা অহিং অমসুং নুংথিলদা জুমলাগী মরমদা ৱা ঙাংখি অদুবু ভারত্তা খ্বাইদগী চাউবা মীরোল মরি হেন্না চৎখিবা জুমলাদি : “গরিবি হাতাউ” (লায়রবা কোকহনবা) অসিনি। মসি লায়রবা কোকহন্নবা জুমলানি। মসিনা মখোয়গী রাজনিতিগী য়াইফনবা থবক তৌখি অদুবু কৈদৌঙৈদা লায়রবশিংগী ফিবম ফগৎলকখিদে।

ইকায়খুম্নরবা স্পিকর সার,

নিংতম্বা ফংলবা চহি কয়াগী মতুংদা ইমুং অমা তোইলেত ফাওবা লৈরম্লোই হায়বা কনাগুম্বা অমনা হায়বা ঙম্বরা? মসি কোকহন্নবা অদোমগী মতম লৈতবরা? মতম অমদা লায়রবশিংগী মঙ অমা ওইরম্বা, তোইলেতশিং শানবা ঐখোয়গী লৈবাক অসিদা অচৌবা কেম্পেন অমা চৎথরি। মসিগী থবক অসি ঐখোয়না পায়খৎলে অমসুং চোকথবা লৈতনা থবক তৌরি। মসি নোক্নখি হায়বা ঐ খঙই, অদুবু মীচম মীয়ামগী ইকায়খুম্নবা অদু ঐখোয়গী পুক্নিং অমসুং হকচাংদা লৈদুনা, ঐখোয় চেৎনা লেপখি, অমসুং থবক অসি খুমাংচাউশিনখি। ইমাশিং অমসুং ইচলশিং নুমিৎ থোক্ত্রিঙৈ নত্ত্রগা নুমিৎ তাবগা লমহাংদা খোঙহাম্বা থোকখি অমসুং মসিগী নুংঙাইতবা অদোম কৈদৌঙৈদা ফাওখিদে। মসিনা মরম ওইদুনা তি.ভি নত্ত্রগা পাউ-চেশিংদা লায়রবগী ফিবমগী মতাংদা পাউশিং অদোম উরে, অদুবু অদোম্না মখোয়গী পুন্সিগী অশেংবা মশক খঙখিদে।

ইকায়খুম্নরবা স্পিকর সার,

লৈবাক অসিগী অপুনবা মীশিংগী চাদা ৮০ অফবা থক্নবা ঈশিং থবক ফংদ্রি। ঐগী সংবিধান্না মখোয় অফবা থক্নবা ঈশিং ফংহনদবরা? মীচম মীয়ামদা তঙাইফদবা খুদোংচাবশিং ফংহন্নবা পুক্নিং চঙনবা সংবিধান্না পান্দম থম্লি।

ইকায়খুম্নরবা স্পিকর সার,

কৎথোকপা অমসুং থাজবগা লোয়ননা মসিগী থবক অসি ঐখোয়না মাঙলোমদা পুখৎলি।

ইকায়খুম্নরবা স্পিকর সার,

লৈবাক অসিগী ইমা মিল্লিয়ন কয়া স্তোভশিংদা চাক থোংবদগী মখোয়গী মীৎশিং ঙাংখি। মৈখু মরক্ত চাক থোংবা অসি চুরুদ মচৈ ১০০গী মৈখু হকচাংদা চিংশিনবগা মান্নৈ হায়রি। মখোয়গী হকচাংগী ফিবম শোকচিনখি। মখোয় মৈখুদগী মনিংতম্নবা ঐখোয়না থবক পায়খৎলে। ২০১৩ ফাওবা সিলিন্দর ৯ নত্ত্রগা সিলিন্দর ৬ পীগদরা হায়না খন্নখি, অদুবু লৈবাক অসিদা ইমুং অমদা গ্যাস সিলিন্দর অমা ফাওবা য়ৌখিদে। চহি ৭০ গী মতুংদা, ঐখোয়না মীওই খুদিংমক তঙাইফদবা খুদোংচাবশিং ফংহল্লে।

ইকায়খুম্নরবা স্পিকর সার,

করিগুম্বা ঐখোয়গী লায়রবা ইমুংশিংনা লায়রবা কোক্নবা অহিং-নুংথিল থবক শুরবা অমসুং মখোয়গী মচাশিং লাইরিক তমহনবা পাম্লবা, মতম অদুদা অনাবনা মখোয়গী ইমুংদা চৈথেং পীগনি, মখোয়গী থৌরাংশিং অরেম্বা তাগনি অমসুং ইমুং অমগী শুবা-নোম্বা অদু অরেম্বা তাগনি। মীওই করোর ৫০ দগী ৬০ ফাওবা লেম্নবা লায়েংবগী খুদোংচাবা পীনবা ঐখোয়না অয়ুস্মান ভারত য়োজনা পায়খৎলে। ঙসি ঐখোয়না মখোয়গী থাকশিং থিদনা চহি ৭০গী মথক্ত লৈবা অহলশিংদশু লেম্না লায়েংবগী খুদোংচাবা পীরে।

ইকায়খুম্নরবা স্পিকর সার,

লায়রবশিং চেঙ পীনবা ঐখোয়না হৌদোরকপা মতমদা, মসি ফাওবা নোক্নখি। লায়রবা মীওই করোর ২৫ লায়রবা কোকহল্লে হায়না ঐখোয়না হায়বা মতমদা, ঐখোয়দা হংখি. “করিগী অদোম্না হৌজিক ফাওবা লায়রবদা চেঙ পীরবনো”?

ইকায়খুম্নরবা স্পিকর সার,

লায়রবা কোক্লবা মীওইশিং খক্তনা অচুম্বা অদু খঙই। অনাবা অমা ফরবা মতুংদা হোস্পিতালদগী দিসচার্জ তৌরকপদা, দোক্তরনা পাউতাক পীখি, “ য়ুমদা চৎলো, অদোমগী হকচাং ফরে, মাইপাক্না সর্জরি পাংথোকখ্রে। মথংগী থাদা, চেকশিল্লু, অদোম অমুক হন্না নাদনবা থবক খর তৌরোইদবনি”। মসিগা চপ মান্ননা, মখোয় অমুক হন্না লায়রদনবা মখোয়গী মতেং পাংবা দরকার ওই। মরম অদুনা ঐখোয়না মখোয়দা লেম্না চেঙ পীরিবনি। মসিগী থবক অসি করেম্নবীগনু, মরমদি ঐখোয়না মখোয় লায়রবা কোকহল্লে অমসুং মখোয় অমুক হন্না লায়রবা পামদে। হৌজিক ফাওবা লায়রদুনা লৈরিবশিং লায়রবা কোকহন্নবা ঐখোয় থবক তৌবা দরকার ওইরি।

ইকায়খুম্নরবা স্পিকর সার,

ঐখোয়গী লৈবাক অসিদা লায়রবগী মিংদা খোল্লাউশিং লাউখি। লায়রবশিংগী মিংদা বেঙ্কশিং সরকারনা লৌশিনখি। অদুবু ২০১৪ ফাওবা, লৈবাক অসিগী মীওই করোর ৫০ কৈদৌঙৈদা বেঙ্ক অমগী থোং ফাওবা উবা ফংখিদে।

ইকায়খুম্নরবা স্পিকর সার,

লায়রশিং বেঙ্ক মনুংদা ফাওবা চঙহনখিদে। মসিগী অরানবা অসি অদোম্না চৎথখিবনি। ঙসি লায়রবা মীওই করোর ৫০ গী বেঙ্ক একাউন্তশিং হাংদোক্তুনা ঐখোয়না লায়রশিংগীদমক বেঙ্কশিংগী থোং হাংদোক্লে। প্রধান মন্ত্রী অমনা হায়খি মদুদি দিল্লিদগী লুপা ১ থাখিবদা, শেন ফংলিবা মীওই অদুদা পৈশা ১৫ খক ফংখি। মসি কোক্নবা পাম্বৈ মখোয়না কৈদৌঙৈদা পীখিদে। ঙসি ঐখোয়না দিল্লিদগী লুপা ১ থাখিবদা, লায়রবগী একাউন্তদা লুপা ১ ফংলে। করিগী? কমদৌনা বেঙ্ক শীজিন্নগনি হায়বা, মসি কমদৌনা চুম্না শীজিন্নগনি হায়বা ঐখোয়না তাকপদগীনি।

ইকায়খুম্নরবা স্পিকর সার,

গরেন্তি য়াওদনা বেঙ্কগীশিংদা চঙবা য়াহনখিবদা মীওইশিং ঙসি সরকার অসিগী মখাদা, সংবিধানদা ঐখোয়না থাজবা পীদবদগী, হৌজিক মখোয়না গরেন্তি অমতা য়াওদনা বেঙ্কদগী লোন লৌবা য়ারে। মসিগী শক্তি অসি ঐখোয়না লায়রবদা পীবনি।

ইকায়খুম্নরবা স্পিকর সার,

মসিনা মরম ওইদুনা “লায়রবা কোকহনবা” হায়বা খোল্লাউ অসি শুপ্নগী খোল্লাউ অমা ওইদুনা লৈবনি। ঐখোয়গী পান্দমদি লায়রবশিং অৱাবা অসিদগী কোকহনবনি অমসুং মসিগী পান্দম অসি ফংনবা ঐখোয়না অহিং-নুংথিল থবক তৌরি। কনা অমতনা তাবীদ্রবা মীওইশিং, মোদীনা তারি অমসুং চেকশিন্না শেন্নরি।

ইকায়খুম্নরবা স্পিকর সার,

ঙসি ঐখোয়গী দিবয়াংজনশিং চৎথোক-চৎশিন হেন্না নুংঙাইবা ইনফ্রাস্ত্রকচর ফংলে, মখোয়গী হুইলচিয়ারশিং ত্রেন কমপার্তমেন্তশিং ফাওবা য়ৌবা য়ারে। মখোয়গী য়াইফনবা থবক তৌবা অসি ঐখোয়গী থৌদাং ওইবদগী অহোংবা অসি লাকপনি।

ইকায়খুম্নরবা স্পিকর সার,

তাবা ঙমদবা অমসুং ৱা ঙাংবা ঙমদবা মীওইশিংগী সাইন লেঙ্গোইজগী সিস্তেম লৈরি। অসামদা, সাইন লেঙ্গোইজগী ভর্সন অমা তমখি, উত্তর প্রদেসতা অমা তমখি অমসুং মহারাস্ত্রাদা অমা তমখি। ঐখোয়গী দিবয়াংজনশিংগী চপ মান্নবা সাইন লেঙ্গোইজ অমা লৈবা অসি য়াম্না লুই। নিংতম্বা চহি ৭০ গী মতুংদা, কনাগুম্বা অমতনা মসিগী মরমদা খনখিদে। লৈবাক অসিগী দিবয়াংজন খুদিংমক্কী খুদোংচানবা অপুনবা সাইন লেঙ্গোইজ সিস্তেম অমা শেম্নবা ঐখোয়না থবক পায়খৎলে।

ইকায়খুম্নরবা স্পিকর সার,

নোমেদি অমসুং সেমি-নোমেদিক ফুরুপশিং ঐখোয়গী খুন্নাইনা মীরাইখি। হায়রিবা মীওইশিং অসি শেন্নবা অসি ঐখোয়গী সংবিধানগী মরুওইবা থবক ওইবনা, মখোয়গী য়াইফনবা ৱেলফিয়ার বোর্দ অমা লিংখৎনবা ঐখোয়না থবক পায়খৎলে। মখোয় মশক খঙনবা ঐখোয়না থবক পায়খৎলে।

ইকায়খুম্নরবা স্পিকর সার,

লম্বী নাকলদা পোৎ-চৈ য়োল্লিবা মীওইশিং নোংমদা পুং ১২ চোকথবা লৈতনা থবক শুই, করিগুম্বা মতমদা মখোয়গী গারিশিং ৱাইখি, শেন্দোয় য়াম্না চাউনা শেন পুই অমসুং মসিনা পোৎ-চৈ লৈ। নুমিদাংৱাইরমদা, মখোয়না পুরুবা শেনফম অদু শিংদোকখি অমসুং মখোয়গী মচাশিংগী তল মচেৎ অমা লৈনবা হোৎনৈ। মসি মখোয়গী ফিবমনি। গরেন্তি য়াওদনা লম্বী নাকলদা পোৎ-চৈ য়োল্লিবা মীওইশিংনা বেঙ্কশিংদগী লোন লৌবা য়ানবা ঐখোয়গী সরকারনা পি.এম শ্বানিধি স্কিম হৌদোক্লে। মসিগী ফল ওইনা, মখোয় স্কিম অসিগী অহুমশুবা রাউন্দ য়ৌরে অমসুং হৌজিক বেঙ্কতগী হকথেংননা খ্বাইদগী য়াম্বা লোনশিং ফংলে, মখোয়গী মিংচৎ, চাউখৎপা অমসুং ললোন-ইতিক হেনগৎলে।

ইকায়খুম্নরবা স্পিকর সার,

লৈবাক অসিদা, বিশ্বাকর্মাগী থবক দরকার ওইদবা মীওই লৈরম্লোই। চহিচা কয়া খুন্নাই অসিগী য়াম্না মরুওইবা থবক অমা পাংথোক্লিবা বিশ্বাকর্মা ফুরুপশিংগী কৈদৌঙৈদা খন্নখিদে। বিশ্বাকর্মা ফুরুপ য়াইফনবা ঐখোয়না থৌরাং অমা শেম্লে, বেঙ্কশিংদগী লোন লৌনবা শীল্লে, মখোয়দা অনৌবা ত্রেনিং পীরে, মখোয়দা অনৌবা খুৎলায়শিং পীরে অমসুং অনৌবা দিজাইনশিং পুথোক্নবা মখোয়গী মতেং পাংনবা মীৎয়েং চঙলে।

ইকায়খুম্নরবা স্পিকর সার,

মখোয়গী ইমুং-মনুংশিং অমসুং খুন্নাইনা মীরাইবীরবা ত্রান্সজেন্দরশিং হৌজিক ঐখোয়গী সরকারনা মশক খঙলে। ঐখোয়গী সরকারনা মখোয়দা ভারত সংবিধানগী হকশিং ফংহল্লে। মখোয়গী ইকায়খুম্নবা অমসুং ঙাক-শেনবা পুন্সি অমা ফংনবা মখোয়গী হকশিং অমসুং ইকায়খুম্নবা ফংনবা লিগেল প্রোবিজনশিং অমসুং সিস্তেমশিং শেম্নবা ঐখোয়না থবক পায়খৎলে।

ইকায়খুম্নরবা স্পিকর সার,

ঐখোয়না অদিবাসি ফুরুপকী মতাংদা য়াম্না তোইনা ঙাংনরি। ঐনা গুজরাতকী চীফ মিনিস্তর ওইরিঙৈদা, গুজরাতকী নোংপোক থংবা শরুক অদিবাসিগী লমদম অমা ঐ নিংশিংলি। কংগ্রেসকী চীফ মিনিস্তর অমা, মহাক মশামক অদিবাসি অমা ওইরবশু, চহি কয়া পাল্লবশু, লমদম অদুদা সাইন্স তম্বা য়াবা স্কুল অমা ফাওবা লৈরমদে। ঐ লাক্ত্রিঙৈদা, সাইন্স স্ত্রিমগী স্কুল অমা ফাওবা লৈরমখিদে।  সাইন্স স্ত্রিমগী স্কুল অমা ফাওবা লৈতনা, অদোম্না রিজার্বেসনগী ঙাংলবশু, কমদৌনা অঙাংশিং ইঞ্জিনিয়ারশিং নত্ত্রগা দোক্তরশিং ওইবা ঙমগনি? ঐনা লমদম অসিগী থবক তৌখি অমসুং হৌজিক সাইন্স স্ত্রিমগী স্কুলশিং লৈরে অমসুং মফম অসিদা য়ুনিভর্সিতি ফাওবা লিংখৎলে। রাজনিতিগী মরমদা ৱার শানবা অসি য়াম্না লাই অদুবু সংবিধানগী মতুংইন্না থবক তৌদবা অসিদি সরকার পায়রিবা মীওই খক্তনা পাম্বদা থবক পাংথোকপগী ফলনি। অদিবাসি ফুরুপকী য়াইফনবা থবক পায়খৎপদা ঐখোয়গী রাস্ত্রপতিগী লমজিং অসিগীদমক ঐনা রাস্ত্রপতিদা তৌবীমল খঙবা উৎচরি। অতোপ্পশিংনা য়েংশিনবীদনা লাক্লবা অপীকপা অমসুং ফিবম চাদবা অদিবাসি ফুরুপশিং য়াইফনবা পি.এম জনমন স্কিম হৌদোক্লে। মখোয় মশিং য়ামদ্রবশু অমসুং রাজনিতিনা মখোয় মীরাইরবশু, পি.এম জনমন স্কিমগী খুৎথাংদা মখোয় চাউখৎনবা মোদীনা মখোয়গীদমক থবক পায়খৎলে।

ইকায়খুম্নরবা স্পিকর সার,

চাউখৎ-থৌরাংগী থবকশিংদা লমদম অমতা হুন্দোক্লম্লোইদবনি। মমাঙদা ঐখোয়গী লৈবাক অসিদা করি তৌখি? চহি ৬০ অসিদা, জিলা ১০০ খ্বাইদগী চাউখৎতবা জিলাশিংনি হায়না লাউথোকখি অমসুং ত্রান্সফর থোকপা মতমদা মসি চৈরাক পীবগী পোস্তিং ওইনা লৌনখি। দাইত্ব লৈবা ওফিসার অমতা মফম অদুদা চৎপা পামখিদে। ফিবম অদু ঐখোয়না অহোংবা পুরক্লে। ঐখোয়না “এস্পিরেসনেল দিস্ত্রিক্স”কী ৱাখল্লোন হৌদোক্লে অমসুং পেরামিতর ৪০ দা য়ুম্ফম ওইদুনা ওনলাইন্দা মখোয় চাংনাইনা মোনিতর তৌরে। ঙসিদি হায়রিবা জিলাশিং অদু মখোয়গী রাজ্যশিংদা খ্বাইদগী ফবা জিলাশিং ওইরে অমসুং জিলা খরদি জাতিগী চাংচৎকা চাংম্নরে। হৌজিক ঐখোয়না ব্লোক ৫০০ মখোয় এস্পিরেসনেল ব্লোকশিং হায়না মমিং থোন্দুনা চাউখৎনবা থবক পায়খৎলি।

ইকায়খুম্নরবা স্পিকর সার,

১৯৪৭ গী মতুংদা লৈবাক অসিদা অদিবাসি লৈরকখিবনি হায়বা ৱারিশিং তাবদা ঐ অঙকপা ফাওখি। রাম অমসুং কৃষ্ণগী মতমদা অদিবাসি খুন্নাই মীরাইখিবরা? ঐখোয়না “অদিপুরুস” হায়না খঙনরিবা অদিবাসি খুন্নাই অসি হান্নদগী লৈরক্লে। অদুবু নিংতম্বা ফংলবা চহি কয়াগী মতুংদা, অসিগুম্বা অচৌবা অদিবাসি ফুরুপকী তোখায়বা মিনিস্ত্রি অমা ফাওবা লৈরমদে। অতল বিহারি বাজপায়গী সরকার লাকপদগী ত্রাইবেল এফেয়ার্সকী তোখায়বা মিনিস্ত্রি অমা শেমখি। ত্রাইবেলশিং চাউখৎনবা অখন্নবা বজেত অমা কাইথোক্লে।

ইকায়খুম্নরবা স্পিকর সার,

ঐখোয়গী ঙামীশিং হন্দক খর থোক্লকপরা? অদোম্না মখোয়গী অৱাবা খঙখিবরা? ঙামীশিংগী য়াইফনবা ঐখোয়গী সরকারনা ফিসিরিজগী তোখায়বা মিনিস্ত্রি অমা অহানবা ওইনা লিংখৎলে। মখোয় চাউখৎনবা অমসুং মখোয়গী অৱাবশিং কোকহন্নবা ঐখোয়না তোখায়বা বজেত অমা থম্লে।

ইকায়খুম্নরবা স্পিকর সার,

লৈবাক অসিগী লায়রবা অমসুং লম য়াম্না লৈজদবা লৌমীশিং কোওপরেতিপশিংগী মখা য়াম্না পোন্না লৈরি। লায়রবা লৌমীশিংগী ফিবম ফগৎনবা, কোওপরেতিপ সেক্তর ফগৎহনবগী মরুওইবা অদু ঐখোয়না খঙলে অমসুং মসি হেন্না থবক তৌহল্লে অমসুং মপাঙ্গল কনখৎহল্লে। ঐখোয়গী থম্মোয়দা অপীকপা লৌমীশিংগী মফম অমা লৈবদগী, ঐখোয়না কোওপরেসনগী তোখায়বা মিনিস্ত্রি অমা শেম্লে। ঐখোয়গী লৈবাক্কী নহারোলশিংগী থৌনা অসি ঐখোয়গী পাঙ্গলনি হায়বা ঐখোয়না খঙলে। মালেম শীনবা থুংবনা থবক শুবা ঙম্বা মীওইশিং শেমগৎনবা হোৎনরিঙৈদা, মখল কয়াগী মীওইশিং অসিনা অচৌবা খুদোংচাবা অমা ওইরে। মালেমগী থবক শুনবা মীওইশিংগীদমক ঐখোয়গী নহারোলশিং থৌরাং তৌনবা, ঐখোয়গী নহারোলশিং মালেমগী দরকার ওইবশিংগা চুনবা স্কিলশিং লৈহন্নবা ঐখোয়না স্কিল দিবলপমেন্তগী তোখায়বা মিনিস্ত্রি অমা লিংখৎলে।

ইকায়খুম্নরবা স্পিকর সার,

ভোৎ মশিং য়ামদবা নত্ত্রগা সিত মশিং য়ামদবদগী কনা অমতনা অৱাং-নোংপোক অসি লুম্না লৌখিদে। অতল জিগী সরকারনা অহানবা ওইনা, অৱাং-নোংপোক্কী য়াইফনবা তোখায়বা মিনিস্ত্রি অমা লিংখৎখি। অৱাং-নোংপোক্ত চাউখৎপগী অনৌবা মফমশিং উবা ফংবদগী হায়রিবা থবকশিং অদুগী ফলশিং ঙসি ঐখোয়না উবা ফংলে। মসিগী ফল ওইনা, লমদম অসিদা রেলৱেশিং, লম্বীশিং, হিথাংফমশিং অমসুং এয়রপোর্তশিং শেমগৎলে।

ইকায়খুম্নরবা স্পিকর সার,

ঙসি মালেমগী লৈবাক কয়া, চাউখৎলবা লৈবাকশিং য়াওনা লমগী রেকোর্দশিংগী খুদোংচাদবা মায়োক্নরি। ঐখোয়গী খুঙ্গংশিংদা, মীচম অমনা মখোয়গী লম নত্ত্রগা য়ুমগী মপু ওইবগী চে-চাংশিং পায়দে। মসিগী ফল ওইনা, বেঙ্কশিংদগী লোন লৌবা নত্ত্রগা মখোয়গী লম খোপচিনবদগী ঙাকথোকপদা খুদোংচাদবা কয়া মায়োক্নৈ। মসিগী অৱাবা অসি কোকহন্নবা ঐখোয়না শ্বামিতভা য়োজনা হৌদোক্লে। য়োজনা অসিগী মখাদা, খুঙ্গংশিংদা লৈরিবা মীয়ামদা ঐখোয়না মখোয়গী লমশিংগী মপু ওইবগী চে-চাংশিং ফংহল্লে অমসুং মখোয়দা আইনগী ওইনা মপু ওইবগী হকশিং ফংহল্লে। অসিগুম্বা মীওইশিংদা শক্তি পীদুনা অনৌবা মাইকৈ অমা তাকপা অমসুং খুমাঙচাউশিনহনবদা য়োজনা অসিনা খুদোংচাবা পীরে।

ইকায়খুম্নরবা স্পিকর সার,

হৌখিবা চহি ১০ দা পায়খৎখিবা অসিগুম্বা থবকশিং অসিনা, লায়রবশিংগী ফিবম ফগৎনবা ঐখোয়না চোকথবা লৈতনা থবক তৌরে। লায়বশিংদা মশানা মশাবু থাজবগী অনৌবা ৱাখল অমা ঐখোয়না ফাওহল্লে অমসুং অচুম্বা লম্বীদা মখোয় লমজিংলে। তেনখ্রবা মতম অমদা, ঐগী লৈবাক অসিগী মীওই করোর ২৫ লায়রবা কোকহল্লে। মসিগী মাইপাকপা অসিগীদমক ঐখোয়না চাউথোকচবা ফাওরি অমসুং সংবিধান শেমখিবশিংগী মফমদা ঐনা কোক নোঞ্জরি। সংবিধানগী লমজিং মখাদা মসিগী থবক অসি ঐখোয়না পাংথোকপনি অমসুং মসিগী মিসন অসি ঐনা মখা চৎথগনি।

ইকায়খুম্নরবা স্পিকর সার,

সবকা সাথ, সবকা বিকাস অসি ইচম চম্বা শ্লোগান অমা নত্তে। মসি থাজবগী ঐখোয়গী আর্তিকলনি। মরম অদুনা সংবিধান্না মীচং মীখায় নাইবা য়াদবগুম, তাথি-তাওইনা তৌবা অমতা লৈতনা সরকারগী স্কিমশিং পায়খৎনবা ঐখোয়না থবক তৌরিবনি। স্কিম খুদিংমক্কী কান্নবশিং মতিক চাবা বেনিফিসরিশিংদা চাদা ১০০ য়ৌহন্নবা মসিগী ৱাখল্লোন অসিদা ঐখোয়গী সরকারনা থবক তৌরি। করিগুম্বা অশেংবা সেকুলারিজম লৈরবদি, মসি চাদা ১০০ খুদোংচাবা ফংহনবা অসিদা লৈরে। করিগুম্বা অশেংবা খুন্নাইগী অচুম্বা লৈরবদি, মীচং-মীখাই নাইদনা মীওই খুদিংমক মখোয়গী ফংফম থোকপা চাকথুং ফংগনি। মসিগী ৱাখল্লোন অসিগা লোয়ননা, ঐখোয় থবক তৌরি অমসুং হিংলি-অচুম্বা সেকুলারিজম অমসুং অশেংবা খুন্নাইগী অচুম্বদা কৎথোক্লে।

ইকায়খুম্নরবা স্পিকর সার,

ঐখোয়গী সংবিধানগী অতোপ্পা মরুওইবা ৱাখল্লোন অমদি মসিনা ঐখোয়গী লৈবাক লমজিংবা ঙম্বা অসিনি। লৈবাক অসিগী মাইকৈ তাকপদা রাজনিতিনা তোইনা অচৌবা শাফু অমা ওইরি। ঙসিদি, ঐখোয়গী গনতন্ত্রনা চৎলিবা মাইকৈ অদুগী মমি ঐখোয়না তাহনগনি অমসুং তুংগী চহিশিংগী ঐখোয়গী রাজনিতিগী লম্বী শেমগনি।

ইকায়খুম্নরবা স্পিকর সার,

মখোয় মশাগীতা খনবা অমসুং শক্তি পাম্বা রাজনিতি দল খরনা, গনতন্ত্রগী অশেংবা ৱাখল্লোন্দা মকশিনহনবা ফিবম অমা শেম্লে। রাজনিতি দল খুদিংমক্ত ঐনা ৱাহং অমা হংবা পাম্মী- মখোয়গী ইমুং-মনুংগী হৌরকফম থিদনা, মতিক চাবা লুচিংবশিং লৈবাক অসিদা খুদোংচাবা অমা পীরোইদরা? রাজনিতিগী ইমুংশিংদগী লাক্তবা মীওইশিংদা রাজনিতিগী থোং থিংজিনগদরা? শাগৈদা য়ুম্ফম ওইবা রাজনিতিনা ভারতকী গনতন্ত্র শোকহল্লোইদরা? ভারতকী গনতন্ত্র শাগৈগী রাজনিতিদগী নান্থোক্নবা ঐখোয়গী সংবিধানগী থৌদাং লৈতবরা? গনতন্ত্র মপাঙ্গল কনখৎহন্নবা অমসুং থবক ঙম্বা অমসুং হৈশিংবা নহারোলশিং শরুক য়াবা পুক্নিং থৌগৎনবা, রাজনিতিগা শম্নদবা মীওইশিং তরাম্না ওক্নবা রাজনিতি দলশিংনা থবক পায়খৎকদবনি। ঐনা ৱাফম অসি লাল কিলাদগী কয়ারক হায়খ্রে। ঐগী পান্দমদি রাজনিতিগা মরী লৈনদবা ইমুংশিংগী নহারোল ১০০,০০০ রাজনিতি শরুক য়াহনবনি। লৈবাক অসিনা অনৌবা নুংশিৎ,অনৌবা থৌনা, লৈবাক অসি চাউখৎনবা অনৌবা ৱাশকশিং শকপা নহারোলশিং দরকার ওইরে। ঐখোয়গী সংবিধান চহি ৭৫ মপুংফারকপগা লোয়ননা, ঐখোয় মসিগী মাইকৈ অসিদা চঙশিল্লসি।

ইকায়খুম্নরবা স্পিকর সার,

ঐখোয়গী সংবিধান্না পীরিবা থৌদাংশিংগী মতাংদা ঐনা লাল কিলাদগী ৱা ঙাংখিবা অদু ঐ নিংশিংলি অমসুং থৌদাংশিংগী ৱাখল্লোন অসি মীওই খরনা করেম্নখিবা অদু উবদা ঐ অঙকপা ফাওখি। কনাগুম্বা অমগী থৌদাং পাংথোক্নবা অনৌবা ৱাখলদা মালেম অসিদা কনাগুম্বা অমনা অশোইবা থিগনি হায়বসি ৱাখলনা শাগৎপদা খর ৱানা থোকই। অদুবু মসিগী শোইফদ্রবা ৱাফমশিং অসিদা করেম্নবা মীওই লৈখি।  ঐখোয়গী সংবিধান্না মীওই খুদিংমক্কী হকশিং পীরি, অদুবু ঐখোয়গী থৌদাংশিং পাংথোক্নবা সংবিধান্না থাজবা থম্লি। ঐখোয়গী সভেত্যগী ফজবা অসি ধর্ম, ঐখোয়গী থৌদাংশিং অমসুং ঐখোয়গী মথৌ মশক খঙবগী মখা পোল্লি। মতম অমদা মহাত্মা গান্ধীনা হায়খি অমসুং ঐনা পল্লি-“ ঐগী লাইরিক হৈতবদগী ঐনা তমখি অদুবু কনাগুম্বা থৌদাংশিং থাজবগা লোয়ননা পাংথোকপদগী হকশিং মশা মরোমদো চেন্থরকপা অদুদগী অশিংবা মমানা তমখি”। ঐনা চেৎনা থাজৈ মদুদি করিগুম্বা ঐখোয়না থৱায় য়াওনা ঐখোয়গী থৌদাংশিং পাংথোক্লবদি, লৈবাক অসি বিকসিত ভারত অমা ওন্থোকপদা কনা অমতনা ঐখোয় থিংবা ঙম্লোই। ঐখোয়গী সংবিধান চহি ৭৫ মপুংফারকপগী থৌরম ঐখোয়না পাংথোকপগা লোয়ননা, মসিগী মাইপাকপা অসিনা ঐখোয়গী থৌদাংশিং পাংথোক্নবা ঐখোয়গী কৎথোকপা হেনগৎহল্লসি। মসি তঙাইফদবনি।

ইকায়খুম্নরবা স্পিকর সার,

সংবিধান্না ইথিল পীদুনা, ভারতকী তুংগীদমক হাওস অসিগী মমাঙদা ঐনা ৱারেপ ১১ পুথোকপা পাম্মী:

1. অহানবা ৱারেপ: মীয়াম ওইগেরা নত্ত্রগা সরকার ওইগেরা মখোয়গী থৌদাংশিং পাংথোক্কদবনি।

2. অনিশুবা ৱারেপ: সবকা সাথ, সবকা বিকাস থবক ওইনা পাংথোক্তুনা লমদম খুদিং অমসুং কাংলুপ খুদিং চাউখৎপগী কান্নবা ফংগদবনি।

3. অহুমশুবা ৱারেপ: শেঞ্জা-থুমজা খাংদুনা লৈরোইদবনি অমসুং শেঞ্জা-থুমজা তৌবা মীওইশিং খুন্নাইনা য়ারোইদবনি।

4. মরিশুবা ৱারেপ: লৈবাক অসিগী আইনশিং, নিয়মশিং অমসুং চৎনবীশিং ঙাকপদা লৈবাক অসিগী মীয়াম চাউথোকচবা ফাওগদবনি।

5. মঙাশুবা ৱারেপ: ঐখোয় মীনাই ওইবগী ৱাখল্লোন্দগী মনিংতমগদবনি অমসুং ঐখোয়গী হেরিতেচগী চাউথোকচগদবনি।

6. তরুকশুবা ৱারেপ: লৈবাক অসিগী রাজনিতি শাগৈগী রাজিনিতিদগী মনিংতমগদবনি।

7. তরেৎশুবা ৱারেপ: সংবিধান ইকায়খুম্নগদবনি অমসুং মসি রাজনিতিগী খুৎলায় অমা ওইনা শীজিন্নরোইদবনি।

8. নিপালশুবা ৱারেপ: সংবিধানগী ফজবা ঙাকপগা লোয়ননা, রিজার্বেসন ফংলিবশিংগী হকশিং মুল্লোইদবনি অমসুং লাইনিংদা য়ুম্ফম ওইদুনা রিজার্বেসন শেম্বা হোৎনবা লেপকদবনি।

9. মপানশুবা ৱারেপ: নুপীশিংনা লুচিংদুনা চাউখৎপদা ভারতনা মালেমগী খুদম অমা ওইগদবনি।

10. তারাশুবা ৱারেপ: রাজ্যশিং চাউখৎপনা লৈবাক অসি চাউখৎকনি। মসি চাউখৎনবা ঐখোয়গী লাইৱা ওইগদবনি।

11. তারামাথোইশুবা ৱারেপ: এক ভারত শ্রেস্থা ভারতকী পান্দম মকোক্ত লৈগদবনি।

ইকায়খুম্নরবা স্পিকর সার,

মসিগী ৱারেপশিং অসিগা লোয়ননা, করিগুম্বা ঐখোয় পুন্না মাঙলোমদা চঙশিল্লবদি, সংবিধানগী ৱাখল্লোনগা লোয়ননা, ‘ঐখোয় মীয়াম’ অমসুং ‘সবকা প্রয়াস’ না বিকসিত ভারত অমগী মঙলান্দা ঐখোয় লমজিংগনি। লৈবাক অসিগী মীওই করোর ১৪০ অমসুং হাওস অসিদা লৈরিবা মীওই খুদিংমক্ত মসিগী মঙ অসি শরুক য়াগনি। লৈবাক অসিনা অচেৎপা ৱাশক অমগা লোয়ননা থবক তৌরকপা মতমদা, লৈবাক অসিনা পাম্লিবা ফলশিং অদু ফংবা ঙমগনি। যুব শক্তি অমসুং নারী শক্তিগীদমক, মখোয়গী থৌনাগীদমক ঐনা ঐখোয়গী লৈবাক্কী মীওই করোর ১৪০ ইকায়খুম্নবা উৎচরি। মসিগা লোয়ননা ২০৪৭ দা ঐখোয়না লৈবাক অসি নিংতম্বা চহি ১০০ শুরকপগী থৌরম পাংথোক্কনি, মসি ঐখোয়না বিকসিত ভারত অমা ওইনা থৌরম পাংথোকসি। মসিগী ৱাশক অসিগা লোয়ননা ঐখোয় মাংলোমদা চঙশিল্লসি। ঐনা অমুক হন্না ঐগী য়াইফ-পাউজেল পীজরি। মতম পীবীবগীদমক ঐনা অমুক হন্না ইকায়খুম্নরবা স্পিকর ঐগী তৌবীমল খঙবা উৎচরি অমসুং অদোম থাগৎপা ফোঙদোকচরি।

অদোম ঙমখৈ লৈতনা থাগৎচরি।

***