ভারতকী প্রধানমন্ত্রী

খুরুমজরি,

শ্রীরামচন্দ্র মিসন্না চহী ৭৫ মপুং ফারকপদা ময়াম পুম্নমক্কী মফমদা নুংঙাইবা ফোঙদোকচরি‍। য়াইফ-পাউজেল পীজরি‍। লৈবাক শেম্লকপদা, খুন্নাইবু মপাঙ্গল কন্না মাঙদা পুখৎলকপদা চহী ৭৫গী খোঙফম অসি য়াম্না মরু ওই‍। পান্দমগীদমক অদোম্না পুক্নিং লুপখিবগী মহৈনা ঙসি খোঙচৎ অসি লৈবাক ১৫০ হেনবদা শন্দোকখ্রে‍। বসন্ত পঞ্চমিগী য়াইফরবা তাঞ্জা অসিদা ঙসি ঐখোয়না গুরু রামচন্দ্র জীগী মপোক কুমওন থৌরম পাঙথোক্লি‍। ময়াম পুম্নমক্কী মফমদা নুংঙাইবা ফোঙদোকচবগা লোয়ননা ঐনা বাবু জীবু কোক নোন্না শ্রদ্ধাঞ্জলি কৎচরি‍। ঐনা অদোমগী মশক নাইরবা খোঙচৎ অসিগা লোয়ননা অদোমগী অনৌবা হেদক্বার্তর কান্হা শান্তিবনগীদমকসু নুংঙাইবা ফোঙদোকচরি‍। কান্হা শান্তিবন শারিবা মফমসিদা হান্না লমগং ওইনা লৈরম্মি হায়না ঐঙোন্দা তম্লকই‍। অদোমগী হোৎনজমল অমসুং পুক্নিং চেৎপনা লমগং অসিবু কান্হা শান্তিবনগী শক্লোন পুরকপনি‍। শান্তিবন অসি বাবু জীনা তাকপী তম্বিরম্বশিংগী অহিংবা খুদম্নি‍।

মরূপশিং,

অদোম পুম্নমক্না বাবু গীদগী ফংহৌবা ইথিলবু নক্না থেংনহৌখি‍। মশক থোকপা পুন্সি ফংননবা মহাক্না পায়খৎলম্বা, পুক্নিং ইং-চিকপা ফংনবগীদমক মহাক্না হোৎনরম্বশিংনা ঐখোয় পুম্নমকপু চাউনা পুক্নিং থৌগৎলি‍। ঙসিগী ২০-২০গী তাইবং অসিদা খোঙজেল য়াম্না য়াঙনা চেন্নরি‍। মীয়ামগী মফমদা মতম য়াম্না লীক্না ফংনরি‍। ফীভমসিদা অরায়বা মহৌশাগী ওইবা পাম্বৈদা মীয়ামগী পুক্নিং হকচাঙ ফনা থম্বদা অদোমগী থৌদাং য়াম্না চাউই‍। অদোমগী ভোলুন্তিয়র অমসুং ত্রেনর লিশিং কয়ানা মালেমসিদা য়োগ অমসুং হিরি কোনববু য়োকখৎলি‍। মসি মীওইবা খুন্নাইগীদমক অচৌবা থৌগল অমনি‍। অদোমগী ত্রেনর অমসুং ভোলুন্তিয়রশিংনা ৱাখল লৌশিংগী তশেংবা ৱাহন্থোক শন্দোক্লি‍। ঐখোয়গী কমলেস জীদি হিরি কোনবা অমসুং স্পিরিচুএলিজমগী লম দা ‘দা জী’ হায়না মমিং চৎলি‍। কমলেস জীগী মরমদদি মহাক নোংচুপ অমসুং ভারতকী অফবশিংগী তুংনফম্নি হায়না হায়বা য়াই‍। অদোমগী পুক্নিং ৱাখলগী ওইবা লমজিং মখাদা শ্রী রাম চন্দ্র মিসন্না মালেম পুম্বদা মরুওইনা নহাশিংগী হকচাঙ অমদি পুক্নিং ৱাখল ফনা থম্বদা মালেম পুম্ববু পুক্নিং থৌগৎলি‍।

মরূপশিং,

ঙসি মালেম অসিনা হাথু-হাথুবা পুন্সি মরেলদগী হৌরগা অরুবা অনাবা অমদি লাইচৎ ফাওবগী অমসুং পুক্নিং ৱাখল শোন্থবদগী হৌরগা তেরোরিজম ফাওবগী অৱাবা কয়া মায়োক্নরি‍। অসিগুম্বা ফীভমসিদা মহৌশাগী ওইবা পরিংদা, হার্তফুলনেস থৌরমশিং অমসুং য়োগ, মালেমগীদমক্তা মঙলান অমগী মঙালগুম্বনি‍। হন্দক্তা পুন্সিদা অপীক-অপীকপা চেকশিন থৌরাং কয়া লৌখৎহৌবনা অচৌবা লাংফমশিংদগী কমদৌনা ঙাকথোকপগে হায়বদু মালেম পুম্বনা উনখ্রে‍। কমদৌনা ভারত মচা ১৩০গী চেকশিন থৌরাংনা কোরোনাগী লান্থেংদা মালেমসিগী তমজনফম ওইখিবগে হায়বদু ঐখোয় পুম্নমক্না খঙনরবা ৱাফম্নি‍। লান্থেং অসিদা ঐখোয়গী য়ুমদা তাকপি তম্বিখিবা ৱাফমশিং, হৈনবীশিং অমসুং য়োগ-অয়ুর্বেদনা অচৌবা থৌদাং লৌখি‍। লাইচৎ অসি হৌরকপদা ভারতকী ফীভম য়েংলগা মালেম পুম্বনা মিপাইনখি‍। অদুবু ঙসিদি ভারতনা কোরোনাগা লান্থেংনরিবা অসিনা মালেম পুম্ববু পুক্নিং থৌগৎলি‍।

মরূপশিং,

ভারতনা মালেমসিদা য়াইফবা পুরক্নবগীদমক মীওইবগী ওইবা য়ুম্ফম পরিংদা চঙশিল্লি‍। মীওইবগী ওইবা য়ুম্ফম পরিং অসি মশা মউ ফবা বেলেন্স: য়াইফবা তিঞ্জঙ কায়জঙদবা লনথুম হায়বসিদা য়ুম্ফম ওইবনি‍। হৌখিবা চহী তরুকসিদা ভারতনা মালেমগী খ্বাইদগী চাউবা মীয়ামগী য়াইফ-থৌরাংশিংগী মনুং চনগদবা থবকশিং পায়খৎলি‍। থৌরাংশিং অসি লায়রবশিংবু পুন্সিগী মশক অমসুং খুদোংচাবা পীননবগীদমক্নি‍। মীপুম খুদিংদা সেনিতেসন ফংহন্বদগী হৌরগা খুন্নাইগী য়াইফ-থৌরাং স্কিমশিং ফাওবা, মৈখু চেন্দ্রবা চাকখুমদগী হৌরগা বেঙ্ককা শম্নদ্রিবশিংবু শম্নহনবা ফাওবা, তেক্নোলোজী ফংহনবদগী হৌরগা হাউজিং ফোর ওল ফাওবদা লৈরিবা ভারতকী মীয়ামগী য়াইফনবা স্কিমশিং অসিনা মীওই কয়াগী পুন্সিদা কান্নবা ফংহল্লি‍। মালেমগী লাইচৎ অসি লাক্ত্রিঙৈ মমাঙদসু ঐখোয়গী লৈবাকসিনা তিঞ্জঙ কায়জঙদবা পুন্সিদা মীৎয়েঙ চঙবা হেনগৎহনখি‍।

মরূপশিং,

তিঞ্জঙ কায়জঙদবা হায়বসিদা লৈরিবা ঐখোয়গী ৱাখল্লোন লায়না ফহনবদগী হেনবা ৱাফম্নি‍। মসিদা লায়না কয়াবু মাঙজৌননা ঙাকথোক্নবগী হকশেলগী থৌরাং পাক শন্না য়াওরি‍। ভারতকী মাঙজিল থাবা হেল্থকেয়র স্কিম ওইরিবা অয়ুস্মান ভারতকী বিনিফিসিয়রি মশিংনা অমেরিকা অমসুং য়ুরোপিয়ন লৈবাক কয়াগী মীশিংদগী হেল্লি‍। মসি মালেমগী খ্বাইদগী চাউবা হকশেলগী স্কিম্নি‍। হিদাক লাংথক অমসুং খুৎশু খুৎলায়গী মমল হন্থহনখি‍। য়োগবু মীয়াম্না পাম্নরিবা অসি অদোম্না খঙবিরবনি‍। অসুম্না তিঞ্জঙ কায়জঙদবা পুন্সিদা মরুওইবা মীৎয়েঙ চঙলিবসিগী পান্দমদি অদোমবু তিক তিক লাউনা থম্বনি‍। অদুগা মখোয়না পুন্সি মহিংগা মরী লৈনবা লায়নাশিং থেংনদনবনি‍। মালেম অসিনা কোবিদ-১৯গী হিদাক মথৌ তারকপদা ভারতনা মফম শিনবা থুংনা থাখিবদা চাউথোকচরি‍। হৌজিক্তি ভারতনা মালেমগী ওইনা তিকা থাবদা মকোক থোংবা থৌদাং লৌরি‍। তিঞ্জঙ কায়জঙদবা পুন্সিগী লৈরিবা ঐখোয়গী মঙলান অসি লমদমসিগী ওইরিবসিগুম মালেম পুম্বগীসু ওইরি‍।

মরূপশিং,

মালেম অসিনা মরুওইনা কোবিদ-১৯ মতুংদগী হকশেল অমসুং তিঞ্জঙ কায়জঙদবা পুন্সি হায়বসিদা মীৎয়েঙ চঙনরক্লি‍। হীরম অসিদা ভারতনা পীবা য়াবা কয়া লৈরি‍। ঐখোয় ভারতপু স্পিরিচুএল অমসুং ৱেলনেস তুরিজমগী মকোন ওইহল্লসি‍। ঐখোয়গী য়োগ অমসুং অয়ুর্বেদনা মশা মউ ফবা প্লানেত অমগীদমক থৌদাং য়াবা ঙমগনি‍। হায়রিবশিং অসিবু মালেমসিগী মফমদা মখোয়না খঙবা লোন্দা খুদোল তম্বা হায়বসি ঐখোয়গী পান্দম্নি‍। মসিগী কান্নবশিংগী মরমদা ঐখোয়না মচা খায়না তাক্কদবনি অমসুং মালেমবু ভারত্তা লাক্তুনা মশা মউ ফগৎহন্নবা কৌগদবনি‍। অদোমগী হর্তফুলনেস ওইবা হিরি কোনবগী থৌওং অসি মায়কৈ অসিদা চঙশিল্লিবা খোঙফম অমনি‍।

মরূপশিং,

কোরোনা মতুংগী মালেম অসিদা হৌজিক্তি য়োগ অমসুং হিরি কোনবগী তাইবঙসিদা পুক্নিং লুপশিন্নরক্লি‍। শ্রীমদভগবত গীতাদা ইরম্মি – সিদ্ধ্য সিদ্ধ্যো: সমো ভুত্বা সমন্ত্ব য়োগ উচ্যতে‍।‍ মসিনা হায়রিবদি মপুং ফারবসু অমদি মপুং ফাদ্রবসু য়োগবু শান্নদুনা থবক তৌ হায়বনি‍। থৌওং অসিবু য়োগ হায়না কৌনৈ‍। য়োগগা লোয়ননা হিরি কোনবসু ঙসিগী মালেম অসিনা য়াম্না মরু ওইরে‍। পুক্নিং ৱাখল ৱাবনা মীওইবগী পুন্সিদা অচৌবা শিংনবা অমা ওইরক্লি হায়না মালেমগী অচৌ অচৌবা লূপশিংনা লৌনরি‍। মসিগুম্বা ফীভমসিদা ঐখোয়গী হার্তফুলনেস থৌরম্না য়োগ অমসুং হিরি কোনবগী খুত্থাঙদা ৱাফম অসিবু কোকহন্দুনা মীওইবা খুন্নাইগী মতেং তৌবা ঙমগনি হায়না ঐনা থাজৈ‍।

মরূপশিং,

ঐখোয়গী ভেদশিংদা হায়রম্মি – য়থা দয়োশ চ, পৃথিবী চ, ন বিভীতো, ন রিশ্যত:‍। এৱা মে প্রান মা বিভে:‍। মসিনা হায়রিবদি অতিয়া অমসুং মালেম অসি অকিবগী মশক ওইদবা অমদি মাঙ তাক্তবগুম্না ঐগী থৱাইসু ওইরি! নহাকসু অকিবা য়াওদনা লৈয়ু হায়বনি‍। অকিবা য়াওদবা হায়বসি মনিং তম্না লৈবদুবুনি‍। মহৌশাগী ওইবা পরিংসিদা চৎপনা অদোম পুম্নমকপু হকচাঙ অমসুং ৱাখলদা অকিবা য়াওদবা ওইহনগনি হায়না ঐনা মপুং ফানা থাজৈ‍। লায়না চেন্দবা মীয়াম, পুক্নিং ৱাখল ফবা মীয়াম্না ভারতপু অনৌবা পন্দোল লোমহনগদৌরিবনি‍। চহী অসিদা ঐখোয় ভারতকী নীং তম্বগী ৭৫শুবা চহীদা খোঙ থাংজিল্লিবনি‍। অদোমগর হোৎনজমলনা লৈবাকসিবু মাঙদা পুদুনা চৎকদৌরিবনি হায়বা ৱাফমসিগা লোয়ননা অমুক্কা হন্না অদোম পুম্নমক্কী মফমদা য়াইফ-পাউজেল পীজরি‍।

থাগৎচরি‍!

***