ভারতকী প্রধানমন্ত্রী

ঙসি লৈবাক অসিগী, গুজরাত লমদমগী অথোইবা মচা অমা ঐখোয় ময়াম পুম্নকপু থাদোক্লম্লগা য়াম্না লাপ্না চৎখ্রে। ঐখোয় খুদিংমক্কী নুংশিজরবা,  ইকাই খুম্ননিংঙাই ওইরবা কেশুভাই পতেলজীনা নোঙ্গাখিবা অসি ঐহাক য়াম্না নুংঙাইজদে, চপ লেপ্তুনা লৈরে। কেশুভাইনা থাদোক্তুনা চৎখিবা অসি ঐহাক্কী ইপামক্না থাদোক্তুনা চৎখিবগুম্লে। মহাক্না লৈখিদবা অসিদা কৈদৌনুংদা অমুক হন্না মপুং ফাবা ঙম্লরোইদবা মাংজবনি। চহি ৬০মুক্কী ওইনা মীয়ামগী ওইনা হিংবা পুন্সি অমদি  অমত্তা ওইবা মওংদা অমত্তা ওইবা পান্দম-লৈবাকপু নুংশিবা, লৈবাক্কী ফনবা অসি ওইরি। 

কেশুভাই অসি অথোইবা মওংদা মীতিক-মীরৌ ফবগী মতিক-ময়াই চেল্লম্মি। মওং অমদা য়াম্না ইং-তপ্পা হৌন-লোনচৎ চৎপা অমদি মায়কৈ অমদনা ৱারেপ লৌনবগীদমক্তা চপ য়ুংনা লেপ্পা ঙম্বগী ৱাখল্লোন চেনবা অসি মহাক্কী থোইদোক-হেন্দোকপা মতিক-ময়াই ওইরম্মি। মহাক্না মহাক্কী পুন্সিগী মিৎকুপ খুদিং খুন্নাইগীদমক্তা, খুন্নাইগী মীওই কাংলুপ খুদিংগী থৌগল তৌবগীদমক্তা কত্থোক্লমখি। মহাক্কী থবক খুদিংমক অসি গুজরাতপু চাউখৎনবগীদমক্তা তৌরম্মি, মহাক্কী ৱারেপ খুদিংমক গুজরাতকী মীওইশিংবু হেন্না ফগৎহন্নবগীদমক্তা ওইরমখি। য়াম্না অচম্বা লৌমীগী ইমুংদগী থোরকপা ঐখোয়গী কেশুভাই অসি, লৌমীগী, লাইরবগী অৱাবা খঙবিরমখি। লৌমীশিংগী য়াইফনবা তৌবনা খ্বাইদগী মরুওইনা লৌরম্মি। এম.এল.এ. ওইরিঙৈদা, সাংসদতা লৈনা-লৈনা মন্ত্রী নত্রগা মুখ্যমন্ত্রী ওইনা-ওইনা কেশুভাইনা মহাক্কী স্কীমশিং শেম্বদা, মাগী ৱারেপ লৌবদা লৌমীশিংগী য়াইফনবা থবকশিংনা খ্বাইদগী হেন্না মরুওইনা লৌখি। খুঙ্গং, লাইরবা, লৌমীগী পুন্সি অসি লায়হন্নবগীদমক্তা মহাক্না থবক তৌখি, মরৈবাক নুংশিবগীদমক্তা অমদি মীবু নুংশিবিবগী ফীদমশিংগা লোয়ননা পুন্সি চুপ্পা হিংলবদি, মীরোল কয়া মথং-মথং ইথীল অদুম্মক পীখিগনি।

কেশুভাইনা গুজরাতপু য়াম্না নিংথিনা অমদি য়াম্না হকচিন্না খঙলম্মি। মহাক্না জনসঙ্ঘ অমদি ভাজপা অসি গুজরাতকী মফম খুদিং য়ৌহল্লম্মি, হিরম খুদিং ফগৎহল্লম্মি। ইমর্জেন্সীগী নুমিৎশিংদা কেশুভাইনা মতৌ করম্না লৈঙাক অসি ঙাক্তুনা থম্নবগীদমক্তা লান্থেংনবদা অঙম্বা থাদুনা হোৎনখিবা অদু ঐহাক নিংশিংলি।  

কেশুভাইনা ঐগুম্বা অচম্বা থৌমী কয়াশিংবু য়াম্না তাকপি-তম্বিরমখি, মতম পুম্নমক্তা লমজিং-লমতাকপিরমখি।  প্রধান মন্ত্রী ওইরবা মতুংদসু ঐহাক্কা মখা তানা পাও ফাওনখি। গুজরাত্তা চৎপা মতমদা তাঞ্জা হেক ফংবগা মহাক্কী য়াইফ-থৌজাল লৌনবা চৎখি।  

হন্দক য়চোল খরগী মমাং অসিমক্তদা সোমনাথ ত্রস্তকী ভর্চুএল ওইবা মীফমদসু য়াম্না কুইনা ৱারী শান্নখি অদুগা য়াম্না হরাওনসু উখি। কোরোনাগী মতম অসিদা ফোন্দা কয়ারক হন্না মহাক্কা ৱারী শান্নখি, ঐহাক্না মহাক্কী হকশেলগী মতাংদা হংখি। চাউরাক্না চহি ৪৫মুক নক্না খঙনদুনা লোইনদুনা লুপ তৌমিন্নরকপা ওইরো, লান্থেংনবা ওইরো, সিস্তেমগী হিরমদা ওইরো, থৌদোক কয়া অমা ঙসি পুল্লপ ওইনা নিংশিংলক্লি। 

ঙসি ভাজপাগী থৌমী খুদিংমক ঐহাক্কুম্না য়াম্না নুংঙাইত্রি। ঐহাক্না কেশুভাইগী ইমুং-মনুংদা মীনুংশি উৎচবগা লোয়ননা মহাক্কীদমক্তা ৱাবিরিবশিংগীদমক্তা লেপচরি। ৱারবা মতম অসিদা ঐহাক্না মহাক্কী ইমুংগা লেপ্তনা পাও ফাওনরি।  

ঐহাক্না ঈশ্বরগী মফমদা কেশুভাইবু মহাক্কী খুয়াখাদা চংজফম পীবিনবা, মহাক্কী থৱাই-মীরেল অদু ইংনা-চিক্না থম্বিনবা খুরুমজরি।

ওম শান্তী!!!

*****