ভারতকী প্রধানমন্ত্রী

লমহাংদা খোঙহামদনবা পান্দম থমদুনা ২০২৪-২৫গী ওইনা শ্বাছ ভারত মিসন (খুঙ্গং) ফেজ-২ প্রধান মন্ত্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা অয়াবা পীরে , মসিদা লমহাংদা খোঙহামদবা অমসুং মপং অমসুং মহিগী অমোৎপশিং লোইশিনবা য়াওরি । থবক অসিনা মী অমতা চিৎথনবা অমসুং মী খুদিংমক তোইলেত শীজিন্ননবা থবক পায়খৎকনি ।

শ্বাছ ভারত মিসন (খুঙ্গং) ফেজ-২ আসি ২০২০-২১দগী ২০২৪-২৫ ফাওবা মিসনগী মওংদা লুপা ক্রোর ১,৪০,৮৮১ চংনা পায়খৎকনি । মসি তোঙান-তোঙানবা মখলগী শেন্থংশিং পুনশিনবা অনৌবা থৌরাং অমা ওইগনি । শেনফম অসিগী মনুংদা লুপা ক্রোর ৫২,৪৯৭না দ্রিকিং ৱাতর এন্দ সেনিতেসন দিপার্তমেন্তগী ওইগনি অমসুং লেমহৌরিবা ফন্দ অদুনা ১৫শুবা ফাইনান্স কম্মিসন, এম জি এন আর ই জি এস অমসুং অমোৎপা লোইশিনবদগী ফংলকপা শেনফমশিংদগী অপুনবা ওইনা লৌগনি ।

থৌরম অসিগী মখাদা লনাই য়ুম অমগী তোইলেত শাবদা লুপা ১২,০০০ শেন্থং পীগনি । সোলিদ এন্দ লিকুইত ৱেস্ত মেনেজমেন্তগী ফন্দ পীবগী মওংশিং চুমথোক্লে অমসুং য়ুম অমদা লৈরিবা মীওই মশিংদা য়ুমফম ওইরগা পীগনি । গ্রাম পঞ্জায়তশিংনা খুঙ্গংদা কম্মুনিতি মেনেজ সেনিতরি কমপ্লেক্স অমা শাবদা লুপা লাখ ২ পীরম্বা অদু লুপা লাখ ৩দা হেনগৎলে ।
রাজ্যশিংদা অথুবা মতমদা পীরগদবা চৎন-কাংলোনশিংগী মখাদা রাজ্যশিংনা থবক অসি পায়খৎকনি । অৱাং-নোংপোক , জে অমসুং কে অমসুং হিমালায়াগী রাজ্যশিংগী ওইনা ফন্দ পুথোক্নবগী মওং অসি ৯০:১০ ওইগনি অমসুং অতোপ্পা রাজ্যশিংগী ওইনা ৬০:৪০ অমসুং অতোপ্পা য়ুনিয়ন তেরিতোরিশিংগী ওইনা ১০০:০ ওইগনি ।

সোলিদ এন্দ লিকুইত ৱেস্ত মেনেজমেন্ত অসি ও দি এফকী শরুক অমা ওইনা য়েংশিনগনি অমসুং মরুওইবা হিরম মরি হায়বদি –প্লাস্তিক অমোৎপা লোইশিনবা, বাইও-দিগ্রেদিবল সোলিদ ৱেস্ত মেনেজমেন্ত(শা-ষনগী অমোৎপা য়াওনা) লোইশিনবা, গ্রেৱাতর মেনেজমেন্ত অমসুং ফেসেল স্লজ মেনেজমেন্তদা য়ুমফম ওইরগা মোনিতর তৌগনি ।

শ্বাছ ভারত মিসন (খুঙ্গং) ফেজ-২না মখা তানা থবক ফংহনগনি অমসুং য়ুমশিংদা অমসুং লৈকায়শিংদা তোইলেতশিং শাদুনা খুঙ্গংগী শেন-থুমগী ফিবম ফগৎহনগনি অমসুং অমোৎপা মখল কয়া লোশিন্নবা কোমশিং য়াওনা মচাক কয়া শেমগৎনবা খুদোংচাবা ফংলগনি ।

২০১৪দা অহানবা ওইনা শ্বাছ ভারত মিসন হৌদোকপা মতমদা লৈবাক অসিগী খুঙ্গংগী সেনিতেসন কভরেজ অসি চাদা ৩৮.৭ ওইরমখি । মিসন অসি হৌদোকপগী হৌজিক ফাওবদা তোইলেত ক্রোর ১০ হেন্না শারে অমসুং রাজ্য অয়াম্বগী খুঙ্গংগী শরুকশিং ২০১৯গী ওক্তোবর ২দা লমহাংদা খোঙহামদ্রে হায়না লাউথোক্লে । হৌজিক ফাওবদা খুঙ্গংদা তোইলেত লৈতবা য়ুম অমতা লৈত্রে হায়বগী চপ চাবা খঙদোক্নবা দ্রিকং ৱাতর এন্দ সেনিতেসন দিপার্তমেন্তনা রাজ্যশিংদা খঙহনখ্রে । মসিনা থৌরম অসিগী মখাদা তোইলেত শাবদা য়ুম অমতা চিৎথদনবা দরকার ওইবা মতেং পীগনি ।

শ্বাছ ভারত মিসন (খুঙ্গং) ফেজ-২ মন্ত্রীমন্দলনা অয়াবা পীবা অসিনা ভারতকী খুঙ্গংদা অমোৎপা লোইশিনবদা থেংনরিবা খুদোংচাদবশিং মপুংফানা কোকহনগনি অমসুং লৈবাক অসিগী খুঞ্জাশিংগী হকশেলগী ফিবম ফজনা ফগৎহনগনি ।