ভারতকী প্রধানমন্ত্রী

অমুক হন্না খুরুমজরি!

রাজ্যাভিযেক্কী চহি ৩৫০শুবা কুমওন থৌরমদা মীয়ামগী মফমদা য়াইফ-পাউজেল পীজরি!

ছত্রপতি শিবজী মহারাজ, শেংলবা লমদম মহারাস্ত্রা, ঐগী মহারাস্ত্রা, ইচিন-ইনাওশিং অমসুং ইচন-ইচেশিং, ঐনা অদোমগী মফমদা কোক নোঞ্জরি!

নিংতম্বগী অমৃত কাল অসিদা ছত্রপতি শিবজী মহারাজ ফম্বাল তোংখিবা নুমিৎ অসিনা ঐখোয় খুদিংমক্তা অনৌবা ৱাখল অমসুং অনৌবা থৌনা পীরে। মীয়াম পুম্নমক ঐনা য়াইফ-পাউজেল পীজরি। চহি ৩৫০গী মমাঙদা থোকখিবা ছত্রপতি শিবজী মহারাজ ফম্বাল তোংখিবা অসি অঙকপা অমসুং অখন্নবা তাঙ্কক অমনি।

পুৱারিগী তাঙ্কক অদুদগী লাকখিবা শ্বারাজ, অফবা লৈঙাক অমসুং নুংঙাই-য়াইফবা অদুনা ঙসি ফাওবদা ঐখোয়দা ইথিল পীরি। লৈবাক্কী য়াইফনবা অমসুং মীয়ামগী য়াইফনবা থবক পায়খৎপা হায়বসি মহাক্কী লৈঙাক্কী মরুওইবা য়ুম্ফম্নি। ঐনা ছত্রপতি শিবজী মহারাজগী খুয়াদা চঙজরি। শ্বারাজ্যাগী অহানবা কোনুং ওইখিবা রাইগর ফোর্তকী শুমাংদা ঙসি অচৌবা থৌরম অমা পাংথোক্লি। ঙসি মহারাস্ত্রা শীনবা থুংনা কুহ্মৈ অমা ওইনা থৌরম পাংথোক্লি। অসিগুম্বা থৌরমশিং চহি চুপ্পা মহারাস্ত্রাদা পাংথোক্কনি। মসিগীদমক ঐনা মহারাস্ত্রা সরকার থাগৎপা ফোঙদোকচরি।

মরুপশিং,

চহি ৩৫০গী মমাঙদা ছত্রপতি শিবজী মহারাজ ফম্বাল তোংখিবা মতমদা, মদুদা শ্বারাজ্যা অমসুং লৈবাক নিংবগী ৱাফম য়াওরে। মহাক্না মতম পুম্নমক্তা ভারতকী অপুনবগী শক্তম মরুওইনা লৌখি। ঙসি ছত্রপতি শিবজী মহারাজগী ৱাখল্লোনশিংগী মমি এক ভারত শ্রেস্থা ভারতকী পান্দমদা উবা ফংলে।

মরুপশিং,

পুৱারিগী অথৌবশিংদগী হৌরগা লুচিংবগী মতাংদা থিজিল্লিবা মেনেজমেন্ত গুরুশিংগী মতম অসিদা, লুচিংবা অমগী খ্বাইদগী মরুওইবা থৌদাং অসি মহাক্কী লৈবাক্কী মীয়াম পুক্নিং থৌগৎপা অমসুং থাজবা লৈহনবনি। ছত্রপতি শিবজী মহারাজগী মতম অদুদা ওইরমগদবা লৈবাক্কী ফিবম অদু অদোম্না ৱাখলনা শাগৎপা য়াই। চহি কয়া মীনাই ওইরকপা অমসুং লান্দারকপা মরম্না লুচিংবশিংগী মফমদা লৈবাক মীয়াম্না থাজবা থমখিদে। লান্দারকপশিংনা নৈহৎখি অমসুং লায়রহন্দুনা খুন্নাই মপাঙ্গল শোন্থহনখি। ঐখোয়গী নাৎকী মফমশিং থুগাইদুনা মীয়ামগী মোরেল শোকহনখি। অদুগুম্বা মতম অদুদা, মীয়াম মরক্তা মশানা মশাবু থাজবা লৈহনবা হায়বসি অরুবা অমা ওইখি। অদুবু ছত্রপতি শিবজী মহারাজনা য়েক্নবশিং লান্থেংনবা খক নত্তনা মশানা মশাবু লৈঙাকচনবা ওইথোকপগী থাজবা মীয়ামগী মফমদা লৈহনখি। মীনাই ওইবগী ৱাখল্লোন থাদোকহন্দুনা লৈবাক শেমগৎনবা মহাক্না মীয়ামদা ইথিল পীখি।

মরুপশিং,

লানগী ওইনা য়াম্না মপাঙ্গল কনবা অদুবু লৈবাক ঙাকপদা য়াম্না শোনবা লৈঙাকপা কয়া ঐখোয়না পুৱারিদা থেংনরে। মসিগা চপ মান্নবা মওংদা, মখোয়গী লৈবাক ঙাকপদা য়াম্না হৈবা অদুবু লান্মীগী লুচিংবা ওইবদা শোনবা লুচিংবা কয়া লৈরি। অদুবু ছত্রপতি শিবজী মহারাজগী মগুন অসি অঙকপনি। মহাক্না শ্বারাজ লিংখৎখি অমসুং শ্বারাজ অসি থবক ওইনা পাংথোকখি। মহাক থৌনা ফবা অমসুং অফবা লৈঙাক্লোন অমা পুরকপগীদমক মমিং চৎলি। মহাক্না য়াম্না নহা ওইরিঙৈদা, লানবন্দসিং লৌশিন্দুনা অমসুং য়েক্নবশিং মাইথিবা পীদুনা মহাক্কী লান্মীগী লুচিংবা ওইবা ঙম্বগী মতিক মগুন অদু মহাক্না উৎথোকখি। অমরোমদা, নিংথৌ অমা ওইনা,লৈবাক ঙাকপা হৈবগী মগুন অদুসু মহাক্না উৎখি।

অমরোমদা, মহাক্না মহাক্কী লৈবাক অমসুং কলচর লান্দারকপশিংদগী ঙাক-শেনখি অমসুং অমরোমদা, লৈবাক শেমগৎনবা মহাক্না অপুনবা পান্দম অমা থমখি। মহাক্কী মঙলান অসিনা মরম ওইদুনা পুৱারিগী অতোপ্পা অথৌবশিংদগী মহাক্না তোঙানখি। মসিগা লোয়ন্না শ্বারাজ, লাইনিং,কলচর অমসুং হেরিতেচ মাঙহন্নবা হোৎনবশিং মহাক্না মফম লৌথোকখি। মসিনা মরম ওইদুনা, মীয়াম মরক্তা মহাক য়াম্না থাজখি অমসুং লৈবাক ইকায়খুম্নবা উৎপা হেনগৎলকখি। লৌমীশিংগী য়াইফনবা, নুপীশিং শক্তি পীনবা, মীচম মীয়াম্না ইরাই লাইনা লৈঙাক্কী থবকশিং ফংহন্নবা, মহাক্কী থবকশিং অমসুং মহাক্কী থৌশিলশিং ঙসি ফাওবা চুশিন্নরি।

মরুপশিং,

মওং অমা নত্ত্রগা মওং অমদা মহাক্কী পুন্সিনা ঐখোয়দা ইথিল পীবা ছত্রপতি শিবজী মহারাজগী  গুন কয়া লৈরি। মহাক্না ভারতকী নেভি পাকথোক চাউথোকহনখি। অকনবা ইথক ইরৈ মরক্তা, মহাক্না শারম্বা লানবন্দশিং হৌজিক ফাওবা সমুদ্র ময়াইদা চাউথোকচনা লেপ্লি। মহাক্না সমুদ্র মপান্দগী হৌরগা চীঙজাউ ফাওবা লানবন্দশিং শেমগৎখি অমসুং মহাক্কী লৈবাক চাউথোকহনখি। মতম অদুদা ঈশিং পীনবা থবক ফজনা পায়খৎখি। হৌখিবা চহিদা ঐখোয়গী সরকারনা ছত্রপতি শিবজী মহারাজদগী  ইথিল ফংখিবা অসি লাইবক ফবনি। ভারতনা নেভি অসি মীনাই ওইবদগী কল্লে। ভারত নেভিগী ফিরাল অসি শিবজী মহারাজগী ইমব্লেম্না মহুৎ শিল্লে। হৌজিক মসিগী ফিরাল অসি অনৌবা ভারতকী সমুদ্র অমসুং অতিয়াদা চিংখৎলে।

মরুপশিং,

ছত্রপতি শিবজী মহারাজগী থৌনা, ফিদম অমসুং অচুম্বা অসিনা মীরোল কয়া পুক্নিং থৌগৎলে। মহাক্কী থৌনা ফবা থবক, লাল্লোং হৈবা অমসুং শান্তি লৈবা রাজনিতিগী কাংলোন অসি ঙসি ফাওবা ঐখোয়দা ইথিল পীরি। ঙসি ফাওবা মালেমগী লৈবাক কয়াদা ছত্রপতি শিবজী মহারাজগী থৌশিলশিং খন্নরি অমসুং মসিদা থিজিল্লি। থা অমগী মমাংদা, মাউরিসিয়সতা ছত্রপতি শিবজী মহারাজগী মীতম অমা খিনখ্রে। ছত্রপতি শিবজী মহারাজ ফম্বাল তোংখিবা চহি ৩৫০ মপুংফারকপগী থৌরম অসি পু্ক্নিং থৌগৎপা থৌরম অমনি। চহি কয়াগী মতুংদা ফাওবা, মহাক্কী গুনশিং অসিনা ঐখোয়গী মাঙলোমদা চৎনবা লম্বী তাক্লি। হায়রিবা গুনশিং অদুদা য়ুম্ফম ওইদুনা, ঐখোয়না অমৃত কালগী চহি ২৫গী খোঙচৎ মপুংফাহনগদবনি। মসিগী খোঙচৎ অসিনা ছত্রপতি শিবজী মহারাজগী মঙলানগী ভারত অদু শেমগৎকনি,মসিগী খোঙচৎ অসি শ্বারাজ ওইগনি।

অফবা লৈঙাক অমসুং অত্মানির্ভর ভারত অসি, চাউখৎলবা ভারতকী খোঙচৎ অমা ওইগনি।

শিবজী রাজ্যাভিযেক অমসুং সোহোলয়াগী চহি ৩৫০ মপুংফারকপগী থৌরম অসিদা অমুক হন্না মীয়াম পুম্নমক য়াইফ-পাউজেল পীজরি!

জয় হিন্দ, ভারত মাতা কি জয়!

****