ভারতকী প্রধানমন্ত্রী

কেন্দ্র মন্ত্রী মন্দলদা লৈরিবা ঐহাক্কী মরুপ, শ্রীমান গিরিরাজ সিংহ, শ্রী অর্জুন মুন্দাজী, শ্রী মনশুখ মন্দাবিয়াজী, লৈবাক্কী তোঙান-তোঙানবা মফমদগী লাক্লিবা মশিং য়াম্লবা মীয়ামগা লোয়ননা ভিদিওগী খুত্থাংদা লৈবাক শিনবা থুংবগী দিদি লাক্ষ কয়া অমনা থৌরমসিদা শরুক য়ারি। ঐহাক্না পুম্নমকপু তরাম্না ওকচরি অমসুং ইকায় খুম্নবশু উৎচরি। তসেংবা ভারত অসি মসিমক্লা হায়না ঐহাক্না ঙসি ফাওজরি। হিন্দুস্তানগী তোঙান-তোঙানবা লোল লোনবা, মফম খুদিংগী মীওইশিংবু ঐহাক্না ঙসি উবা ফংজরি। পুম্নমকপু ঐহাক্না থাগৎচরি।

ঙসিগী নুমিৎ অসিদি নুপীশিংবু মপাঙ্গল হাপ্পগী মতাংদা পুৱারী ওইরগনি। ঙসি, ঐহাক্না নমো দ্রোন দিদি প্রোগ্রামগী খুত্থাংদা মতমগা চুনবা দ্রোন 1000বু নুপীশিংগী সেল্ফ হেল্প গ্রুপকী মফমদা খুৎশিন্নবগী খুদোংচাবা ফংজরি। লৈবাক্কী করোর 1দগী হেনবী নুপী কয়ানা স্কিম অমসুং ঐখোয়না পায়খৎপা খোঙথাং কয়াগী মতেংদগী লাক্ষপতি দিদি ওইনখ্রে। মসিদি অপীকপা মশিং নত্তে। ঐহাক্না হৌজিক মীয়ামগা ৱারী শাজবদা, ইচল কিশোরীনা মহাক্তি থা অমদা লুপা লিশিং 60-70 তাল্লি হায়না পাউদম্লকখ্রে। খুঙ্গংগী ইচল অমনা মহাক্কী হোৎনজমন্দগী থা অমদা লুপা লিশিং 60-70 তানবা ঙম্বগী পাউজেল তাবদা লৈবাক্কী নহাশিংদা ইথিল য়াম্না পীগনি। মহাক্কী মশাদা থাজবগী মতৌসি অমুক্তা য়েংসি, কিশোরী মসিদা ফম্লে, মখুৎশু থাংগৎলি। মসিগুম্বা ৱারোল তাবদা ঐহাক্কী নুংগী থাজবগী চাং য়াম্না হেনগৎলি। অদোমগী মসিগুম্বা তাবদা ঐহাক্না য়াম্না নুংঙাইবা ফাওই। ঐখোয়না হোৎনরিবা খুদিংমক মায়কৈ চুম্না চৎলি হায়না ফাওহল্লি, লৈবাক্কী মফমদা কান্নবা পীরি হায়বা খঙহল্লি। ঐখোয়না শেম্লিবা স্কিম অসিবু অদোম্না নীংথিনা ইন্দুনা চৎপীরবদি, অদোমগী মায় পাকপসু শোইদনা ফংগনি। মসিনা মরম ওইরগা ঐহাক্না লাক্ষপতি দিদিগী মশিং অসি করোর 3 শোইদনা হেলহনগনি হায়না লেপ্লিবনি। মরী লৈনবা থৌওং অমা ওইনা, ঐখোয়না ঙসি লুপা করোর লিশিং 10গী শেনফমশু মখোয়গী বেঙ্ক একাউন্ততা হাপখ্রবনি। মসিগীদমক্তা অদোম পুম্নমকপু থাগৎচরি।

ইমা, ইবেন, ইচে, ইচলশিং,

লৈবাক অমা ওইরো, খুন্নাই অমদা ওইরো, নারী শক্তিগী পুক্নিং থৌগৎলবদি, মদুনা অনৌবা খুদোংচাবা শোইদনা শেমগনি, তুংলমচত্তা খোঙদাবা ঙমগনি। অদুবু লাইবক থীবদি, লৈবাক অসিদা পাল্লম্বা মমাংগী সরকারনা নুপীশিংগী য়াইফ য়ুম্বাল অমসুং মখোয়গী মপাঙ্গল হাপ্পগী হীরমদা মিৎয়েং অমত্তা চঙবীরমদে। ঐহাক্না থেংনজবদি, ঐখোয়গী নুপীশিংদা মতেং খরা পীবা মতমদা, মখোয়না মতেং মথৌ তাবগী মহুত্তা অতোপ্পগী মফমদা তেংবাংবা ঙম্লকই। ঐহাক্না মখোয়বু মপাঙ্গল হাপ্পগী ৱাফম লাল কিলাগী ফম্বাক্তগী থমখিবা মতমদা ৱাখল্লোন অসি ঐহাক্না ফাওবা ঙমখিবনি। ইমা, ইবেন, ইচে, ইচলশিংগী য়ুমদা অমাংশঙ শাবা, মসি লৈতবদগী মখোয়না মাইয়োক্নবা খুদোংচদবা কইয়া অমসুং মখোয়গী হকশেলদা অয়েৎপা পীবগী মতাংদা ৱাফম থমখিবা অহানবা প্রধান মন্ত্রীদি ঐহাক ওইরমগনি।

সেনিতরী পেদকী হীরম্বু লাল কিলাগী ফম্বাক্তগী পাউদমখিবা অহানবা প্রধান মন্ত্রীশু ঐহাক ওইরমগনি। অমাংশঙ, সেনিতরী পেদ, মৈখু খুদবা চাকখুম, খুদোংচাদবা কয়াদগী নুপীশিংবু কনবীনবা তোতি ঈশিং ফংহনবা, নুপী খুদিংগী জন ধন একাউন্ত হাংবা, নুপীশিংদা অথীবা ৱাহৈ শিজিন্নবগী মাইয়োক্তা ৱাফম থমখিবা, অমসুং নারী শক্তিগী মায়কৈদা অফবা লিচত চৎনবা ইমুংগী ইচানুপাশিংবু তাকপী তম্বীবগী হীরম কয়াবু লাল কিলাগী ফম্বাক্তা পুথোকখিবা অহানবা প্রধান মন্ত্রীশু ঐহাক ওইরমগনি। অদুবু লাইবক থীবদি, ঐহাক্কী মসিগুম্বা ৱারোলবু কংগ্রেসনা করেম কথাইনখি।

মরুপশিং,

মোদীনা মীয়ামগী অপাম্বা করিনো খঙলিবা, মোদীনা পুথোক্লিবা স্কিমশিং অসিদি পুন্সিগা মরী লৈনবা থৌওং কয়া গ্রাউন্দ লেভেলদা থেংনবদগী থোকখিবা ঙাক্তনি। অঙাং ওইরিঙৈদা য়ুমদা উরকখিবা ফিভমশিং, কৈরোই লৈকায়দা থেংনখিবা অমসুং লৈবাক্কী খুঙ্গংগী ইমুং কয়াদা লৈদুনা উরকখিবা ফিভম খুদিংমক ঐখোয়গী স্কিমদা মমি তাবনি। মরম অদুনা, স্কিমশিং অসিনা ইমা, ইবেন, ইচে, ইচল, ইচানুপীশিংগী পুন্সি মহিং নুংঙাইহনবা ঙম্লিবনি। মখোয়গী খুদোংচাদবশিং হন্থহনবা ঙম্লিবনি। মশাগী ইমুংগীদা খনবা, শাগৈগী নুংঙাইনবা রাজনীতি তৌবশিংনা মসি কৈদৌনুংদা খঙলোই। লৈবাক মীয়াম করোর অমবু খুদোংচাদবা কয়াদগী মনিং তমহনবগী ৱাখল্লোন অসিদি ঐখোয়গী সরকারদা চেল্লি, মসিনা ঐখোয়গী স্কিমশিংগী য়ুম্ফম্নি।

ঐহাক্কী ইমা, ইবেন, ইচে, ইচলশিং,

মমাংগী সরকারনা স্কিম অমা অনি হৌদোক্লগা মদুবু নুপীশিংগী পাঙ্গল হাপ্পগী পাম্বৈনি হেক্তা হায়খি। মোদীনা মসিগুম্বা রাজনীতিগী ৱাখল্লোন্দা অহোংবা পুরক্লে। ইং 2014দগী সরকার পায়রবা তুংদা, ঐহাক্না অদোম নুপীশিংগী পুন্সিগী থেংখাং খুদিংগা মরী লৈনবা স্কিম শেমখি, মখোয়বু মায় পাক্না চলায়খি। ঙসিদি, ঐহাক্কী অহানবা নিংশা হোনবদগী হৌনা অরোইবা নিংশা হ্নবা ফাওবদা মোদীনা অদোমগী সেবাগীদমক্তা লৈগনি। অঙাং নুপীমচাশিংবু পোক্ত্রিঙৈদা লৌথোকপগী চৎনবী লৈহন্দনবা বেতি বচাও বেতি পরহাও খোঙথাং হৌদোকখি। মীরোনবী মমাশিংদা ন্যুত্রিসন ফংহন্নবা লুপা 6000গী তেংবাং পীবা, এজুকেসনগী মতমদা রিসোর্স ফংহন্নবা পায়খৎপা সুকনয়া সামৃধী, ওন্তোপ্রিনরগী হীরমদা মশাগী ফিবম শেম্বা ঙমজনবা মুদ্র য়োজনাগী তেংবাং, মেতর্নিতী লীব শাংদোকপা, লেম্না লাইয়েংবা, অহোঙবা হিদাক লাংথক ফংহনবা, পি.এম. অৱস য়ুমশিংবু নুপীশিংগী মিংদা পীবগী থৌওংশিংনা পায়খৎপগা লোয়ননা থৌওংশিং অসিনা অরিবা ৱাখল্লোনশিংবু মুত্থৎলি।

ইমা, ইবেন, ইচে, ইচলশিং,

মোদীদি শিংনববু য়ৈথোক্তে, মদুগা মাইয়োক্নদুনা ৱারোইশিন পুরক্না থবক তৌই। ঐখোয়গী ইমা, ইবেন, ইচে, ইচলশিংবু মপাঙ্গল লৈহন্নবগীদমক্তা মখোয়বু শেন্মিৎলোনগী হীরমদা শরুক য়াবা হেনগৎহনবা তাই। অদুনা, ঐখোয়না স্কিম অমা হেক্তা শেম্বা মতমদা হীরম অসিনা খ্বাইদগী হেন্না লুনা লৌরগা চৎলি। ঐহাক খুদম অমা পীজগে। ঐখোয়গী লৈবাক্কী চৎনবী ওইনা, লম-ইংখোল, দুকান নত্ত্রগা লন অমা হেক্তা এপ্পা মতমদা নুপাশিংগী মমিংদা লেপ্নৈ। অদুনা ঐখোয়না পি.এম. অৱসকী য়ুমশিংবু নুপীশিংগী মিংদা রেজিস্তর তৌরিবনি। গারী লৈবা ওইরো নুপীনা মসি থৌবা হৈদৌবা নত্তে মহায়বা, ফোন লৈবা ওইরো নুপীনা শিজিন্নবা হৈদৌ নত্তে, মখোয়না মসিগী মতাংদা খঙদৌবা নত্তে, হীরম খুদিংমক নুপাখক্তনা মপু ওইগদবনি, খঙগদবনি হায়বগী অরিবা ৱাখল্লোনবু ঐখোয়না তুংদা থম্লম্লে। মসিদগী ৱাংমা লান্দুনা থোক্লক্লে। ঙসিগী থৌরম অসিমকশু মসিগী খুদম অমনি, ভারতকী লৌউ-শিংউবু অনৌবা মায়কৈ তাক্কদবা দ্রোন তেক্নোলোজীগী অহানবা পাইলোত্তি ঐখোয়গী ইচানুপী, ইচলশিংনা ওইরে।

দ্রোন শিজিন্নদুনা মতমগা চুননা করম্না লৌ উগনি হায়বা ঐখোয়গী ইচলশিংনা তাকপীগনি। নমো দ্রোন দিদিশিংগী দ্রোন পাইবগী স্কিল ঐহাক্না হৌজিক লম্পাক্তা য়েংলুরে। ঐহাক্না মতম খরগী মমাংদা শন্দোকখিবা মন কী বাতকী তাঙ্কক অমদা দ্রোন দিদি অমগা ৱারী শাবগী তাঞ্জা ফংখি। নোংমদা লবুক মশিং য়াম্না দ্রোন পাইবা ঙম্মি, লবুক মশিং য়াম্বদা থবক তৌবা ঙম্মি, লোয়ননা, শেন্থোকশু মতিক চাবা চাংদা তানবা ঙম্লে হায়না মহাক্না পাউদমখি। ঙসিদি, মশাদা থাজবা অমসুং মশাবু ইকায় খুম্নজবগী চাং য়াম্না হেনগৎলে, লোয়ননা, খুঙ্গংশিংদা মহাক্কী অনৌবা শক্তাক ফংলে হায়না মহাক্না মখা তাখিবনি। সাইকল ফাওবা থৌবা হীরমদবী মহাকপু খুঙ্গংগী মীয়াম্না হৌজিক্তি পাইলোত হায়না কৌনরে হায়না মহাক্না হরাওনা পাউদমখিবনি। লৈবাক্কী নারী শক্তিনা  21শুবা চহি চা অসিগী তেক্নোলোজীগী ইহৌবু লুচিংবা ঙম্লগনি হায়বা ঐহাক্না হৌজিক্তি চেৎনা থাজরে। ঐখোয়না সেক্তর খুদিংদা, আই.তি. ওইরো নত্ত্রগা সাইন্সকী ওইরো, ভারতকী নুপীশিংনা মায় পাকপগী ফিরাল পাইহনবগী থৌওং উরে। ভারতকী নুপীশিংনা কম্মর্সিএল পাইলোতকী হীরমদা মালেমগী মকোক থোংলি। ঐখোয়গী লৈবাক্না নুপী পাইলোত মশিং খ্বাইদগী হেন্না লৈ। অতিয়াদা কম্মর্সিএল পাইলোত ওইনা প্লেন পাইবা ওইরো, লৌউবগীদমক্তা দ্রোন পাইবা ওইরো, ভারতকী নুপীমচাশিংনা কনাদগী তাদ্রে। নারী-নারী-নারী-নারীগী মপাঙ্গল খক্তনা হন্দক্কী জনুৱারী 26কী নুমিত্তা কর্তব্য পথপু পুমথন থনখিবগী মমি অদোমশু তি.ভি.দা শোইদনা উরমগনি।

মরুপশিং,

লাক্কদৌরিবা মতমশিংদা দ্রোন তেক্নোলোজী য়াম্না চাউখৎলকখিগনি। শঙ্গোম, মনা-মশিং নত্ত্রগা অতোপ্পা পোত্থোক কয়া মার্কেত্তা মশিং য়ামদনা থীনবা ওইরো, মসিদা দ্রোন্না মশক থোকপা পাম্বৈ ওইনা তেংবাংবা য়ারক্লগনি। হিদাক, মেদিকেল তেস্তকী সেম্পল পীবদা দ্রোন্না অচৌবা থৌদাং য়ারি। মসিনা হায়বদি, নমো দ্রোন দিদি স্কিমদগী দ্রোন পাইলোত ওইরিবী নুপীশিংগী তুংগী মতমদা অনৌবা খুদোংচাবা কয়া হাংলগনি হায়বনি।

ইমা, ইবেন, ইচে, ইচলশিং,

মমাংগী দিকেদতা লৈবাক্কী সেল্ফ হেল্প গ্রুপশিংনা পাকথোক চাউথোকখিবা অসিদি মশক থোকপা মতৌ অমনি। কাঙলুপশিং অসিনা নুপীবু মপাঙ্গল হাপ্পগী হীরমদা অনৌবা থৌওং অমা হৌদোক্লি। ঐহাক্না ঙসি লৈবাক্কী সেল্ফ হেল্প গ্রুপকী ইচে-ইচল খুদিংবু থাগৎচরি। মখোয়না হোৎনবা কনবগী মতৌনা মখোয়বু লৈবাক শেম্বদা লুচিংবগী থৌদাং লৌবা ঙমহল্লে। ঙসিদি সেল্ফ হেল্প গ্রুপশিংদা শরুক য়ারিবা নুপীশিংগী মশিংনা করোর 10 হেনখ্রে। হৌখিবা চহি 10 অসিদা ঐখোয়গী সরকারনা সেল্ফ হেল্প গ্রুপশিংবু পাকথোক চাউথোকহনখিবগা লোয়ননা গ্রুপশিং অসিগী চাদা 98কী বেঙ্ক একাউন্ত হাংবদা তেংবাংখি। মসিগুম্বা গ্রুপ্তা পীরিবা শেলগী তেংবাংশু লুপা লাক্ষ 20দা হেনগৎখ্রে অমসুং গ্রুপশিং অসিগী একাউন্তশিংদা লুপা করোর লাক্ষ 8 হেন্না হাপখ্রে। মতমগা চুনবা ইনফ্রাস্ত্রকচরগী তঙাই ফদবা লৈরকপদগী, হায়রিবা সেল্ফ হেল্প গ্রুপশিং অসিগী চাগাদশু শরুক অহুম থোক্না হেনগৎখ্রে।

মরুপশিং,

মশাগী অপাম্বা, মঙলানবু অকক্নহনখ্রবা ইচে-ইচলশিংনা ঙসিদি লৈবাক শেম্বগী থৌওংদা মশক থোকপা থৌদাং য়ারি। ঙসি খুঙ্গংশিংদা অনৌবা খুদোংচাবা কয়া হাংদোক্লে, অনৌবা ফম কয়া লৈরক্লে। বেঙ্ক শখী, কৃষি শখী, পশু শখী অমসুং মতস্যা শখী অমসুং সর্ভিস সেক্তরগা মরী লৈনবা নুপী লাক্ষ কয়ানা খুঙ্গংশিংদা মরী লৈনবা সেবা কয়া পীরি। দিদিশিং অসিনা লৈবাক্কী ওইবা হকশেলদগী হৌরগা দিজিতেল ইন্দিয়া ফাওবগী কেম্পেনশিংদা অনৌবা ইনোৎ হাপ্লি। প্রধান মন্ত্রী গ্রামীন দিজিতেল সাকশর্তা অভিয়ান চলায়রিবশিংগী চাদা 50 হেনবদি নুপীশিংনি অমসুং মসিগী বেনেফিশরীশিংগী চাদা 50 হেনবশু নীপা ঙাক্তনি। মসিগুম্বা মায় পাকপগী থৌদোক কয়া অসিনা ঐহাক্কী নারী শক্তিদা লৈবা থাজবগী চাংশু হেনগৎহল্লি। ঐখোয়গী অহুমশুবা তর্মদা ঐহাক্না নারী শক্তিগী মতাংদা অনৌবা পুৱারী অমা শোইদনা শেমগনি হায়না ঐহাক্না ইমা, ইবেন, ইচে, ইচলশিংগী মফমদা থাজবা পীজরি।

সেল্ফ হেল্প গ্রুপকী ইচলশিংনা অপীকপা কারবার তৌবদগী হেন্দোক্তুনা খুঙ্গংশিংদা তোঙান-তোঙানবা থৌওং কয়া পাংথোকপগী মতৌ ঐহাক্না উবা ফংলে। শান্ন-খোৎনবগী কম্পিতিসন শীন লাঙলি, সেল্ফ হেল্প গ্রুপকী মেম্বরশিংবসু পুক্নিং থৌগৎলি। মহৈ মশিং তম্লিবী নুপীমচাশিংবু কৌদুনা ৱারী শানরি। মখোয়গী ৱারোল তারি। শান্ন-খোৎনবগী হীরমদা থৱাই য়াওবা অমসুং ফজবা পরফোর্মেন্স উৎপা খুঙ্গংগী অঙাংশিংবু মশক খঙদোক্তুনা ইকায় খুম্নবা উৎলি। মখোয়বু স্কুল, কোলেজশিংদা কৌদুনা মখোয়গী মায় পাকপগী মরম পাউদমহল্লি। স্কুলগী মহৈরোই অমসুং ওজাশিংনশু থৱাই য়াওনা তানরি। মসিদি ইহৌ অমা পুরকপগুম্বনি। ঐহাক্না সেল্ফ হেল্প গ্রুপকী মফমদা হায়জনীংবদি, দ্রোন দিদিগুম্বা অতোপ্পা স্কিম অমসু ঐহাক্না পুরক্তুনা অদোমগী খুয়াখাদা থম্লবনি। ঐহাক্না দ্রোন কয়া খুৎশিন্নখ্রবা ইচে ইচলশিংনা দ্রোনশিং অসিবু অতিয়াদা পাইহনবতা নত্তনা, লৈবাক্কী ৱারেপ কয়াবুসু মঙফাওনহন্দুনা লৈবাকপু অৱাংবা থাক্তা থমগনি।

সেল্ফ হেল্প গ্রুপকী মেম্বরশিংনা মাঙজিল থানা থোক্লক্তুনা শরুক য়াদগবা স্কিম অমা লৈ। মৈ লেম্না ফংগদবা স্কিম অমা পুরক্লবনি। ঐখোয়না পি.এম. সুর্য়ঘর কৌবা স্কিম অমা পুথোক্লে। মসিগী অখন্নবা মতৌদি করিনো হায়বদা, মসিনা মৈগী বিলবু জিরো ওইহনবা ঙম্লিবা অসিনি। অদোম্না স্কিম অসি পায়খৎপা ঙমগনি হায়রবদি, ঐহাক্না মখা তানা পাউদমগদৌরিবনি। ঙমগনিকো? হায়বীরো, ঙমগনিকো? ফরে। ইমুং খুদিংগী য়ুম্থক লৈকো, য়ুম্থোং খুদিংগী য়ুম্থক্তা সোলর পেনেল খিন্দুনা সোলর ইলেক্ত্রিসিতী পুথোকহনগদৌরিবনি। মৈ অসিমক মখোয়না শিজিন্নগদৌরিবনি। য়ুনিৎ 300তগী হেন্না শিজিন্নবা য়ুম য়াম্না লৈতে। ফেন থাবা ওইরো, এয়র কন্দিসন ওইরো, ৱাশিং মছিন ওইরো, য়ুনিৎ 300না লোয়না কোন্নবা ঙাক্তনি। মসিদগী হেন্দোক্তনা গারী ফাওবা থৌবা য়ারগনি। মসিনা হায়বদি অদোমগী য়ুমগী মৈগী বিল অসি জিরো লাক্কনি হায়বনি। মতাং অসিদা ৱাফম অমা লৈ। মৈ পুথোকপা হায়বসিদি অচৌবা ফেক্তরীনা পুথোকপনি, ঐখোয় লায়রবনা করম্না মৈ পুথোক্কনি হায়না হংনদবা নত্তে। মসিমক মোদীনা তৌগদোরিবনি। লাইরবশিংনা ময়ুমদা মৈ পুথোকহনগনি, মৈগী ফেক্তরী ময়ুমদা চলাইহনগনি। অদুগা অদোম্না য়ুনিৎ 300তগী হেন্না মৈ পুথোক্লবদি, মদু সরকারনা মশানা অদুম লৈজখ্রগনি। মসিদগী ঐখোয়গী ইচে ইচলশিংনা অহেনবা চাগা তানবা য়াগদৌরিবনি।

অদোম খুদিংনা মসিগী পি.এম. সুর্য়ঘর নত্ত্রগা অদোমগী মনাক্তা লৈবা কম্মন সেন্তরদা চত্তুনা মসিগীদমক্তা এপ্লাই তৌবা য়াগনি। সেল্ফ হেল্প গ্রুপকী নুপীশিংনা মাঙজিল থানা থোক্লক্তুনা স্কিম অসিবু মশাগী য়ুম খুদিংদা চলাইবীয়ু হায়জরি। অতোপ্পা য়ুম্থোংশিংদশু চলাইহনবদা মতেং পাংবীয়ু। মসিগী কারবার অসি ইশাগী খুত্তা পায়শিনবীরো। অদোম্না মৈগী অচৌবা কারবার অমা তৌবা য়াগনি, লোয়ননা, য়ুম খুদিংগী মৈগী বিলশু জিরো ওইরক্কনি হায়না ঐহাক্না থাজৈ। মসিগী মতেংদগী তুংশিনবা ঙমগদবা শেনফমশিং অদু য়ুমগী অতোপ্পা থবক্তা শিজিন্নবা য়াগনি। অদুনা মসিদি থৌজাল অমা নত্তবরা? সেল্ফ হেল্প গ্রুপকী নুপী মেম্বরশিংনা মসিগী থৌ পুদুনা মখোয়গী খুঙ্গংশিংদা য়াম্না চাউনা কান্নবা পীবা ঙমগনি। স্কিম অসিগী মতাংদা করিগুম্বা সেল্ফ হেল্প গ্রুপকী মীওইশিংনা মাঙজিল থানা চোংথোরক্লবদি, ঐখোয়গী অহেনবা প্রাইওরিতী অসি মখোয়গী মফমদা পীগনি। ঐখোয় পুম্নমক্না অমত্তা ওইনা পুন্দুনা মসিগুম্বা মৈগী বিল জিরো ওইহনগদবা স্কিম অসিবু তুংলমচত্তা পুবা তাবনি। ঐহাক্না পুম্নমকপু অমুক্কা হন্না থাগৎচবগা লোয়ননা য়াইফ পাউজেল পীজরি।

***