ভারতকী প্রধানমন্ত্রী

ইকায় খুম্নজরিবা অধ্যক্ষজী, রাস্ত্রপতিজীগী ৱারোলদা, মোসন ওফ থেঙ্কসতা রাস্ত্রপতিগী তৌবীমল খঙবা উৎচনবগীদমক ঐহাক মফম অসিদা লাকচরি। ইকায় খুম্নজরিবা রাস্ত্রপতিজীনা অনৌবা ভারতকী মিৎয়েং মহাক্কী ৱারোলদা লান্থোকপীখি। ২১শুবা চহীচাগী অহুমশুবা দিকেদকী ওনরেবল প্রসিদেন্তকী ৱাফম অসি দিকেদ অসিগীদমক ঐখোয় পুম্নমকপু মায়কৈ পীগদবা, মোতিবেৎ তৌগদবা অমসুং লৈবাক অসিগী প্রজা কোতি-কোতি কয়াদা থাজবা পোকহনগদবা ৱারোলনি।

খন্ন-নৈনবা অসিদা সভাগী শক্নাইরবা মীহুৎশিংনা য়াম্না ফজবা মওংদা মখোয় মখোয়গী ওইবা ৱাফমশিং লান্থোকপীরি, মখোয় মখোয়গী ৱাখল্লোনশিং থম্বিরি। মহৈ-মশিংগী ফিভম ফগৎহন্নবা খুদিংমক্না মখোয়গী ওইবা মওংদা হোৎনরি। শ্রীমান অভিনন্দন চৌধরীজী, দাক্তর শশি থরুরজী, শ্রীমান ঔবেসীজী, রামপ্রতাপ য়াদবজী, প্রীতি চৌধরীজী, মিশ্রাজী, অখিলেশ য়াদবজী, মীং কয়া অমা লৈরি ঐহাক্না পুম্নমক্কী মিং পন্দুনা লৈরগদি মতম য়াম্না লৌরগনি।

অদুবু ঐহাক্না হায়জরি মদুদি খুদিংমক্না মখোয় মখোয়গী ওইবা মওংদা মখোয়গী ৱাখল্লোন লান্থোকপীরম্মি। অদুবু ৱাহং অমা লৈরি মদুদি সরকারনা থবকশিং অসি করিগীদমক খোংজাল য়াংনা পায়খৎকদৌরিবনো। থবক পুম্নমক অমুক্তদা করিগী তৌরিবনো।

ঐহাক্না অহানবদা শ্রীমান সরবেশ্বর দয়ালজীগী শৈরেং অমা থমজগে অদুগা মদুমক ঐখোয়গী সংস্কারসুনি, ঐখোয়গী সরকারগী মওং মতৌসুনি। ইন্সপেরেসন অসিনা মরম ওইদুনা ঐখোয় খোংজেল য়াংনা মাংলোমদা চংশিনবগী মায়কৈদা হোৎনরি। সরবেশ্বর দয়ালজীনা মহাক্কী শৈরেংদা ইবীরম্মি মদুদি…

লীক পর ৱে চলে জিনকে

চরন দুর্বল ঔর হারে হৈ,

হমে তো জো হমারী য়াত্রা সে বনে

এসে অনির্মিত পন্থ হী প্যারে হৈ।

ইকায় খুম্নজরিবা অধ্যক্ষজী মরম অসিনা মীয়াম্না শুপ্নতগী সরকার অমা হোংদোকপনি, সরকারসু হোংদোকপা পাম্বগী থাজবা থম্বা নত্তে। অনৌবা ৱাখল্লোন অমগী অপাম্বা অসিনা মরম ওইদুনা ঐখোয়না মফম অসিদা লাক্তুনা সেবা তৌজনবা তাঞ্জা ফংজরে। অদুবু করিগুম্বা ঐখোয়না অদোম্না হৈনরিবা লম্বী অদুদা চৎলমলগদি চহী ৭০গী মতুং ফাওবসু লৈবাক অসিদগী আর্তিকল ৩৭০ লৌথোক্লম্লোই।

অদোমগী মওং মতৌ ইন্দুনা চৎলমলবদি মুস্লিম ইচল-ইচেশিংনা তলাক অহুমলক হায়বগী অকিবা লৈরমখিগনি। করিগুম্বা অদোমগী লম্বী অদুমক্তদা চৎলগদি নুপীমচাশিংদা নমজা-নমথেক্নবগী ৱাফমদা থৌরী য়ান্দুনা হাৎপগী আইন শেমলমলোই। করিগুম্বা অদোমগী ৱাখল্লোন অদুগা লোয়ননা চৎলমলবদি রামজন্মভুমি ঙসিসু চিন্দা পাউদানদুনা খৎন-চৈনবা থোকলমখিনি। করিগুম্বা অদোমগী ৱাখল্লো অদু খল্লমলবদি কর্তাপুর কোরিদোর কৈদৌনুংদা শেমলমলোই।

করিগুম্বা অদোমগী মওং মতৌ অদু ওইরম্লবদি, অদোমগী লম্বী অদু ওইরম্লবদি ভারত বঙ্গলাদেশকী ঙমখৈগী ৱাথোক কৈদৌনুংদা য়ানবা পুরকলম্লোই।

ইকায় খুম্নজরিবা অধ্যক্ষজী,

ইকায় খুম্নজরিবা অধ্যক্ষজীবু উজরুবা মতমদা, তাজরুবা মতমদা অহানবা মক্তদা কিরন রিজিজুবু থাগৎপা ফোংদোকচরি মরমদি মহাক্না চত্থখিবা থিঙ্ক ইন্দিয়া মুবমেন্তকী পাউজেল য়াম্না নীংথিজনা চত্থরি। লৈবাক অসিনা শিংনরকপশিং মায়োক্ননবা মতম পুম্নমক্তা হোৎনরি হায়বা ৱাফম অসি কনানসু য়ানীংদবা তৌরোই। কৈদৌনুংদা শিংনরকপশিংগী মায়কৈদা য়েংদবগী হৈনবি অদুসু লৈবাক অসিনা উবা ফংখ্রে।

অদুবু ঙসিদি মালেম অসিনা ভারত্তগী থম্লিবা থাজবা অদু… করিগুম্বা ঐখোয়না শিংনরকপশিংবু শিংনদ্রগদি, করিগুম্বা ঐখোয়না থৌনা উৎত্রগদি অমসুং করিগুম্বা ঐখোয়না পুম্নমকপু পুরদুনা মাংলোমদা চংশিনবগী খোংজেল য়াংশিনদ্রগদি লৈবাক অসিনা সমস্য কয়া অমা মতম শাংনা লোয়নবা তাবনি।

অদুগা মসিগী মতুং ওনরেবল স্পীকরজী, করিগুম্বা কংগ্রেসকী লম্বীদা ঐখোয়না চৎলগদি চহী ৫০গী মতুংদসু য়েক্নবগী লনথুমগী আইন লৈবাক অসিনা ঙাইদুনা লৈবা তাবনি। চহী ৩৫গী মতুংদসু নেক্স জেনরেসনগী ফাইতর জেৎ লৈবাক অসিনা ঙাইদুনা লৈবা তাবনি। চহী ২৮গী মতুংদসু বেনামী সম্পতি কানুন চৎনরমলোয়। চহী ২০গী মতুংদসু চিফ ওফ দিফেন্সকী ফম হাপ্পা ঙমলম্লোই।

ইকায় খুম্নজরিবা অধ্যক্ষজী, ঐখোয়গী সরকারগী খোংজেল য়াংবনা মরম ওইদুনা অমসুং ঐখোয়গী পান্দমদি ঐখোয়না অনৌবা পরিং অমা শেমদুনা ত্রেক্তগী হন্দোক্তুনা চৎপা পাম্লি। মরম অদুনা ঐখোয়না ৱাফম অসি মমুৎ তানা খঙলে মদুদি নীং তম্বগী চহী ৭০ মতুংদা লৈবাক অসিনা কুইনা ঙাইনবা থৌরাং তৌদ্রে অমসুং তৌসু তৌরোইদবনি।

অদুনা ঐখোয়না হোৎনরিবা অসি স্পীদসু হেঙ্গৎহনবা, স্কেলসু হেঙ্গৎহনবনি। দিতর্মিনেসনসু ওইহনবা দিসিজনসু ওইহনবনি। সেন্সিতিবসু ওইহনবা নত্ত্রগা সোলুসনসু পরকপনি। ঐখোয়না খোংজেল য়াংনা থবক তৌরিবা অসিগী মহৈ অদু লৈবাক অসিগী মীয়াম্না চহী মঙাদা উবা ফংখঙরে অমসুং উরবা মতুংদা খোংজেল অদুদা মাংলোমদা চংশিন্নবগীদমক অহেনবা শক্তিগা লোয়ননা ঐখোয়বু অমুক হন্না লেপ্নবগী তাঞ্জা অদু পীনবিরে।

করিগুম্বা খোংজেল য়াংলমদ্রগদি মীওই কোতি ৩৭কী বেঙ্ক একাউন্ত অসুক য়াম্না তেখ্রবা মতমদা হাংলম্লোই। করিগুম্বা খোংজেল য়াংলমদ্রগদি মীওই কোতি ১১গী য়ুমশিংদা তোইলেৎকী থবক মপুং ফারম্লোই। করিগুম্বা খোংজেল য়াংলমদ্রগদি ইমুং কোতি ১৩দা গ্যাসকী লৈরং মৈ চাকলম্লোই। করিগুম্বা খোংজেল য়াংলমদ্রগদি লাইরবশিংগীদমক য়ুম কোতি ২ শারমলোয়। করিগুম্বা খোংজেল য়াংলমদ্রগদি মতম কুইনা পন্দুনা লৈরম্লবা দিল্লীগী আইন্না য়াদবা কোলোনী ১৭০০ হেনবদা, মীওই লাখ ৪০ হেনবগী পুন্সি পন্দুনা লৈরম্বগী থবক অদু মপুং ফারম্লোই। ঙসি ঐখোয়না ঐখোয়গী য়ুমদা হকসু ফংলে।

ইকায় খুম্নজরিবা অধ্যক্ষজী, মফম অসিদা অৱাং নোংপোক্কীসু খন্ন-নৈনখি। অৱাং নোংপোক অসি মীরাইবীরবা লমদম অমা ওইদ্রে। সেক্তর কয়াদা সরকারগী থবকশিং পায়খৎলিবা অদুনা ঙসিদি অৱাং নোংপোক অসি লৈবাক অসিদা অচৌবা গ্রোথ ইঞ্জিন অমা ওইরক্লে। অৱাং নোংপোক্তা লৈরিবা মীওইশিংনা হৌজিক্তি দিল্লী অসি থাপ্না লৈ হায়বা ফাওদ্রে। হৌজিক্তি মখোয়গী থোংজিলদা সরকার লৈরে। ঐখোয়গী মিনিস্তরশিং অমসুং ওফিসিয়েলশিংনা চাং নাইনা রিজন অসিদা চৎলি।

ঐহাক্কী সরকারনা রিজন অসিগী দিবেলপমেন্তকীদমক ইলেক্ত্রিসিতী ফংহনবা, রেলৱে কনেক্তিবিতী, মোবাইল কনেক্তিবিতী অমসুং তোঙান তোঙানবা অতোপ্পা এস্পেক্তশিংদা থবক তৌরি। দিকেদ কয়া কুইরবা ক্রাইসিস রিজোল্ব তৌনবগীদমক পুকচেল শেংনা হোৎনবগা লোয়ননা স্তেকহোল্দর পুম্নমকপু অমত্তা ওইনা পুরক্তুনা পাংথোকখি।

ইশু অসি য়ৈথোক্তুনা থমলম্বনা মরম ওইদুনা দিকেদ কয়া কুইরবা তংদু লৈতাদবা অদুদা য়ামদ্রবদা মীওই ৪০০০০ হেন্না শিখ্রে। অদুম ওইনমক হন্দক্তি ঐখোয়না স্তেকহোল্দর পুম্নমক অমত্তা ওইনা পুরক্লে অমসুং একোর্দ অসিনা ময়েক শেংহল্লে মদুদি ক্রাইসিসকী পন্দুনা লৈবা ইশু অমত্তা লৈত্রে।

ইকায় খুম্নজরিবা অধ্যক্ষজী, ঐহাক্কী লৌমীশিংগী হিরমদসু খন্ন-নৈনখি। থবক কয়া অমা, অমসুং অনৌবা থৌওং কয়াগা লোয়ননা, অনৌবা ৱাখল্লোনগা লোয়ননা হৌখিবা নুমিৎ খরনিদা পাংথোকখ্রে অমসুং ইকায়খুম্নরিবা রাস্ত্রপতিজীনা মহাক্কী ৱারোলদসু ফোংদোকপীখ্রে। অদুবু মফম অসিদা খন্ন-নৈননবা হোৎনরিবা হোৎনরিবা মওং মতৌ অসিদি, খঙনা তৌরিব্রা নত্ত্রগা খঙদদুনা তৌরিব্রা হায়বা ঐহাক খঙদে।

ঐখোয়না খঙলে মদুদি শরুক মা মখায় তোখায়না তৌগদবা হিরমনি। শাংলবা মতম কয়াদগী পন্দুনা লৈরক্লবনো। ঐখোয়গী মতমগী ওইরমদা হান্নগী ওইরম্মি অদুবু মসি লৌমীশিংগীদমক ঐখোয়গী তৌফম থোকপা থৌদাং ওইরম্মি মদুদি থবক অদুসু ঐখোয়না মপুং ফাহল্লে। ঐহাক অঙকপা ফাওই। ইরিগেসন প্রোজেক্তশিং, লম্বী চাদা ৮০-৯০ চহী ২০-২০দগী তাদুনা লৈরম্মি। হংবীনবা কনাসু লৈরমদে। ঐখোয়না প্রোজেক্ত ৯৯গী ৱিতনেস ওইবা তাখি। লুপা কোতি লাখ ১ হেন্না চাদিং তৌদুনা মখোয়বু মখোয়গী লোজিকেল হেন্দ ফাওবা পুদুনা চৎখি অমদি হৌজিক লৌমীশিংনা মদুগী কানবা অদু ফংবা হৌরে।

প্রধান মন্ত্রী ফসল বিমা য়োজনাগী মখাদা সিস্তেম অসিনা লৌমী খরদা লেপ্পা লৈতনা থাজবা পোকহল্লে। লৌমীশিংগী মায়কৈদগী চাউরাক্না লুপা কোতি লিশিং ১৩গী প্রিমিয়ম লাক্লে। অদুবু নেচরেল দিজাস্তরনা মরম ওইদুনা মাংহন তাকহনখিবা অদুগী মখাদা চাউরাক্না লুপা কোতি লিশিং ৫৬ লৌমীশিংনা বিমা য়োজনাদগী ফংলে। লৌমীশিংগী শেন্থোক অসি ঐখোয়গী প্রায়োরিতীনি। ইনপুত কোস্ত হন্থহনবা অসি ঐখোয়গী প্রায়োরিতীনি।

অদুগা মমাংদা এন.এস.পি.গী মিংদা করি তৌরম্বগে, ঐখোয়গী লৈবাক্তা হান্না তন লাখ ৭কী হৱাই অমসুং থাউ থোকপা মরু মরাং লৈরম্মি। ঐখোয়গী মতমদা তন লাখ ১০০ লৈরে। ৭ অমসুং ১০০গী খেৎনবা খঙবিগনি। ইনাম য়োজনা ঙসিদি দিজিবল ফোর্স ওইরে, ঐখোয়গী লৌমীশিং মোবাইল ফোন্দা মালেমগী মমল য়েংলি। খঙলি। ইনাম য়োজনাগী মিংদা লৌমীশিংনা মখোয়গী বজারদা পোৎ য়োনবা ঙম্লে। অদুগা ঐহাক নুঙাইবা ফাওই মদুদি সিস্তেম অসিনা চাউরাক্না খুঙ্গংগী লৌমী কোতি ২গী ময়া হৌজিক ফাওবদা শম্নহল্লে।

২০১৪দা ঐখোয়না লাক্ত্রিঙৈ মমাংদা এগ্রিকলচর মিনিস্ত্রীগী বজেত অসি লুপা কোতি লিশিং ২৭ ওইরম্মি। হৌজিক মসি শরুক মঙা হেঙ্গৎহন্দুনা চাউরাক্না লুপা কোতি লাখ অমা মখায় য়ৌহল্লে। প্রধান মন্ত্রী কিসান য়োজনা, লৌমীশিংগী একাউন্তদা দাইরেক্তা পৈশা য়ৌরে। হৌজিক ফাউবদা চাউরাক্না লুপা কোতি লিশিং ৪৫ লৌমীশিংগী একাউন্তদা ত্রান্সফর তৌখ্রে। মিদলমেন অমত্তা য়াওদ্রে। ফাইলশিংগী চয়েৎনবা লৈত্রে। ক্লিক অমা নম্মে পৈশা য়ৌরে। অদুবু ঐহাক্না মফম অসিদা ইকায় খুম্নরিবা মীহুৎশিংদা হায়জরি মদুদি রাজনিতী তৌদুনা লৈবিয়ু, তৌবসু তৌগদবনি… অদুবু রাজনিতী তৌনবগীদমক লৌমীশিংগী ওইজবশিংগা লোয়ননা শান্নগদ্রা।

ইকায় খুম্নজরিবা অধ্যক্ষজী, পার্তী পু্ম্নমক্কী মীফম পাংথোকখিবা মতমদুদা ঐহাক্না শন্দোক্না পুম্নমক্কী মাংদা প্রার্থনা অমসু তৌখি অমসুং ঐহাক্কী ৱাখল্লোনসু থমজখি। মদুগী মতুং মীফম হৌবা মতমদা ঐহাক্না মীদিয়াগী মীওইশিংগা ৱারী শানখিবা মতম অদুদসু ঐহাক্না হায়খ্রে মদুদি ঐখোয়না মপুং ফানা ইকোনোমিক থিম, লৈবাক্কী ইকোনোমীগী ফিভম হিরম খুদিংমক্তা ঐখোয়না কত্থোক্কদবনি।

হোয় ইকোনোমীগী হিরমদা মরুওইবা ৱাফমশিং ঐখোয় পুম্নমক্কী অপুনবা দাইত্বনি হায়না ঐহাক্না লৌই। অদুগা দাইত্ব অসিগী পোৎলুমদা অরিবা ৱাফমশিংবু ঐখোয়না কাউথোকপা ঙম্লোই। মরমদি ঙসি ঐখোয়না কদায়দা লৈরিবগে হায়দু ঙরাং ঐখোয় কদায়দা লৈরম্মি হায়বা অদুদগী খঙবা ঙম্মি। ৱাফম অস অচুম্বনি অদুবু ঐখোয়গী ইকায় খুম্নজরিবা সদস্যনা মসি হায়বীরি মদুদি মসি করিগীদমক ওইদ্রিবনো, মসি করম কান্দা ওইগনি, মসি করম্না ওইগনি, করম্বা মতম ফাউবা তৌগনি।

চিন্তা অসি খরা অমনদি ক্রিতিসিজম তৌরিবনি হায়না লৌরি অদুবু অদোম্না ক্রিতিসিজম তৌরিবনি হায়না ঐহাক্না লৌদে, অদোম্না ঐহাকপু খঙবা ঙম্লে হায়না ঐহাক নুঙাইবা ফাওই। মরমদি মহাক্তনা তৌগনি হায়না অদোম্না থাজবা থম্বিরি… মরম অদুনা অদোমগী ৱাফমশিং অসি ঐহাক্না ক্রিতিসাইজ তৌবনি হায়না লৌজদে।

জি.এস.তি.গী য়াম্না মরুওইবা ৱারেপ লৌখ্রে, কোর্পোরেত তেক্স হন্থহনবগী ৱাফম ওইগেরা, আই.বি.সি. পুরকপগী ৱাফম ওইগেরা, বেঙ্কশিংদা রিকেপিতেলাইজেসন তৌবগী ৱাফম ওইগেরা মতমগী মতুং ইন্না দরকার ওইবশিং পায়খৎলি। মতম শাংনা কন্নবগীদমক দরকার ওইবা খোংথাং পুম্নমক ঐখোয়গী সরকারনা লৌখৎসি। মদুগী কানবসু লাকপা হৌরে। অদোমগী মতমদা লৈরম্বা পন্দিৎশিং অদুনসু মসি হোৎনদুনা লৈরম্মি অদুবু তৌবা ঙমখিদে। ইনভেস্তরশিংগী থাজবা হেঙ্গৎহন্নবা, অদোমগী ইকোনোমীগী ফিভম ফগৎনবসু ঐখোয়না মরুওইবা ৱারেপ কয়াসু লৌরে।

২০১৯গী জনুৱারীদগী ২০২০গী মতুং ৬লক্কী মতুংদা জি.এস.তি. রেভেন্যু কোতি লাখ অমদগী হেল্লে। করিগুম্বা ঐহাক্না এস.বি.আই.গী ৱাফম পল্লগদি ২০১৮গী এপ্রিলদগী সেপ্তেম্বর ফাউবা এস.বি.আই. মিলিয়ন দোলর ওইরম্মি। ঙসিদি মদু এস.বি.আই. অদুদা মসি এফ.বি.আই. মিলিয়ন দোলর ২৮ হেনখ্রে।

ৱাফম অসিনা তাক্লিবদি ফোরেন ইনভেস্তমেন্তনা ভারত্তা থাজবা হেঙ্গৎলে। ভারতকী ইকোনোমীদা থাজবা হেঙ্গৎলে। অমসুং ভারত্তা ইকোনোমিক সেক্তরদা অচৌবা সেয়ার লৈরি। কনবিক্সন অসি শেম্লবা মতুংদা মীওইশিং লাক্লে। অদুগা অরানবা তোকঙা কয়া শন্দোক্লবা ফাওবসু মীয়াম্না মপান্দা থোরক্তুনা লাক্লি। মসিসু অচৌবা ৱাফম অমনি।

ঐখোয়গী মিৎয়েংদি গ্রেতর ইনভেস্তমেন্ত, গ্রেতর ইনফ্রাস্ত্রকচর ইনক্রিজ ভেল্যু এদিসন অমসুং য়ারিবা মখৈ জোব ক্রিয়েৎ তৌবনি।

ইকায় খুম্নজরিবা অধ্যক্ষজী, মুদ্রা য়োজনা, স্তার্ত-অপ ইন্দিয়া, স্তেন্দ অপ ইন্দিয়া, স্কিমশিং অসিনা লৈবাক্কী সেল্ফ-এমপ্লোইমেন্তদা য়াম্না অচৌবা শক্তি পীরি। মসিদসু নত্তনা লৈবাক অসিদা অহানবা ওইনা মুদ্রা য়োজনাদগী লৌদুনা এক্সপরিমেন্ত কোতি কোতি চত্থবনা মশামক শেল তানবা হৌরে। অদুবু কনাগুম্বা অমনা মীওই অমাঅনিদা থবক পীবদা মায় পাক্লে।

মসিদসু নত্তনা অহানবা ওইনা মুদ্রা য়োজনাগী মখাদা বেঙ্কশিংদগী শেন ফংলিবশিংগী মনুংদা চাদা ৭০দি ইকোনোমিক এক্তিবকী লমদমদা লৈরমদবা ঐখোয়গী ইমা-ইচল ইচেশিংনি। মখোয়না ঙসিদি মফম অমা নত্ত্রগা অমদা ইকোনোমী হেঙ্গৎহনবদা থৌদাং লৌরি। স্তার্ত-অপ লিশিং ২৮ হেন্না রিকগনাইজ তৌরে। অদুগা মসি ঙসিদি হরাওনিঙাই ৱাফম্নি মদুদি তায়র-২, ৩ শহরদা হায়বদি ঐখোয়গী লৈবাক্কী নহাশিং অনৌবা রিসোর্সশিংগা লোয়ননা মাংলোমদা চংশিল্লি। মুদ্র য়োজনাগী মখাদা লোন কোতি ২২ হেন্না য়াখ্রে অমসুং নহা কোতি কয়ানা থবক ফংখ্রে।

লৈবাক অসিগী খ্বাইদগী এস্পাইরেসনেল ওইবা নহাশিংনা অনৌবা ভারতকী য়ুম্ফমসু ওইরিবা শহর মচাশিংদা লৈরি। ঙসিদি লৈবাক অসিদা দিজিতেল ত্রাঞ্জেক্সনগী তঙ্খাই অমা হেন্না শহর মচাশিংদা চত্থরি। লৈবাক অসিদা রেজিস্তার তৌরবা স্তার্তঅপশিংগী তঙ্খাই অমদি তায়র-২, তায়র-৩ শহরশিংদা লৈরি। মরম অদুননি ঐখোয়না খোংজেল য়াংনা তায়র-২, তায়র-৩ শহরশিংদা মোদর্ন ইনফ্রাস্ত্রকচরগী কন্সত্রক্সনদা মিৎয়েং থম্লিবা। হায়ৱে অমসুং রেল কনেক্তিবিতী খোংজেল য়াংনা ফগৎহল্লে।

ইকায় খুম্নজরিবা অধ্যক্ষজী, ইন্দস্ত্রী ৪.০ অমসুং দিজিতেল ইকোনোমীনা অনৌবা থবক কোতি কয়াগীদমক তাঞ্জা পুদুনা লাক্লি। সরকারনা লেবর রিফোর্মসতা থবক তৌরি অমসুং মদুসু লেবর য়ুনিয়নশিংগা তান্নরবা মতুংদা। লাক্কদৌরিবা মতমশিংদা ঐখোয়না ইনফ্রাস্ত্রকচর সেক্তরদা লুপা কোতি লাখ ১০০ হেন্না ইনভেস্ত তৌগদৌরি অমসুং মসিনা গ্রোথ, ইকোনোমী অমসুং এমপ্লোইমেন্তদা ইনোৎ পীরগনি।

দোলর ত্রিলিয়ন ৫গী ইকোনোমীগী পান্দম অসি অশা চাউনা তৌবনি অদুবু ঐখোয়না চাউনা খনবা তাই অমসুং মাংলোমদা চংশিনবা তাই। ঐহাক্না ময়ামদা অমুক হন্না থাজবা পীরি মদুদি ভারতকী ইকোনোমী অসি মপাঙ্গল কল্লি। ভারতনা ফুল স্পিদ অমসুং ফুল পোতেন্সিয়েলগা লোয়ননা দোলর ত্রিলিয়ন ৫গী ইকোনোমীগী মংলান অমা তান্নরি। দোলর ত্রিলিয়ন ৫গী ইকোনোমীগী মংলান অসি মংফাওনহন্নবা সরকারনা খুঙ্গং অমসুং শহরগী ইনফ্রাস্ত্রকচর, এম.এস.এম.ই.শিং, তেক্সতাইলস, তেক্নোলোজী অমসুং তুরিজমদা মিৎয়েং থম্লি। সেক্তরশিং অসি মাংলোমদা পুখৎনবা খোংথাং কয়া অমা লৌখৎখ্রে। মেক ইন ইন্দিয়াদা মোমেন্তম পীনবা তেক্স স্ত্রকচর য়াওনা প্রোসেস পুম্নমক লাইথোকহল্লে।

ইকায় খুম্নজরিবা স্পীকরজী, কংগ্রেসকী মতমদা সংবিধানগী করি ফিভম ওইরম্বগে, মীয়ামগী অধিকারগী ফিভম করি ওইরম্বগে, মসি ঐহাক্না মখোয়দা হংজনীংলি। করিগুম্বা সংবিধান অসি অসুক য়াম্না মরু ওই হায়না ঐখোয়না লৌরিবা অসুম্না করিগুম্বা অদোম্না লৌরগদি জম্মু কশ্মীরদা হিন্দুস্তানগী সংবিধান চৎনহনবদা অদোম্বু কনানা থিংলম্বগে? সংবিধান অসিনা পীরিবা অধিকারশিংদগী জম্মু-কশ্মীরদা লৈরিবা ঐহাক্কী ইচিল-ইনাওশিং অমসুং ইচল-ইচেশিংবু তোঙান্না থম্বগী পাপ কনানা তৌরম্বগে?

মরম অদুনা ইকায় খুম্নজরিবা অধ্যক্ষজী, ইকায় খুম্নরিবা এম.পি. অমনা হায়বীরি মদুদি জম্মু-কশ্মীরনা মশাগী শক্তম মাংজরে, কনাগুম্বা অমত্তগী মিৎয়েংদা জম্মু কশ্মীরদা হৌজিক থৌনা অমত্তা লৈত্রে।

ইকায় খুম্নজরিবা অধ্যক্ষজী, কশ্মীরদা শুপ্নতংগী লৈবাক খক্তমক উবা মহাক অদুনা লৈবাক অসিগী মরমদা করি খঙলিবগে, মহাক্না মহাক্কী ইন্তেলেকচুয়েল পোবর্তী অদু তাক্লি। কশ্মীর ভারতকী লুহুপ মনিনি।

ইকায় খুম্নজরিবা অধ্যক্ষজী, কশ্মীরকী শক্তম অসি বোম-নোংমৈ অমদি তোখাই তানীংবা ওইহল্লে। ১৯ জনুৱারী, ১৯৯০, শক্তমগী ৱাফম হৌদোক্লিব মীওইশিং অদু; ১৯ জনুৱারী, ১৯৯০গী অমম্বা অহিং, নুমিৎ অদুদা মীওই খরনা কশ্মীরগী শক্তমবু নমথখি। কশ্মীরগী শক্তমদি সুফী ত্রেদিসন্নি, কশ্মীরগী শক্তমদি য়ুনিবর্সেল হার্মোনীনি। কশ্মীরগী রিপ্রজেন্তেতিব মা লালদের, নন্দরুশি, সৈদ বুলবুল শাহ, মীর সৈদ অলী হমদানী, মসি কশ্মীরগী শক্তম্নি।

ইকায় খুম্নজরিবা অধ্যক্ষজী, আর্তিকল ৩৭০ লৌথোকখ্রবা মতুংদা মৈ চাক্লগনি হায়না মীওই খরনা হায়খি, করম্বা লাইনা থারকপা মীওইনো মখোয়সি। ৩৭০ লৌথোকখ্রবা মতুংদা মৈ চাক্লগনি। অদুগা ঙসি হায়রিবা মীওইশিং অদুদা ঐহাক্না হায়জনীংবদি, মীওই খরনা হায়রি নেতা খরদি জেলদা লৈরি, অসিনচিংবা কয়া অমা হায়রি। ঐহাক্না হাউস অসিদা… মসি সংবিধানগী রক্ষা তৌরিবা হাউসনি, মসি সংবিধান্দা কত্থোক্লবা হাউসনি, মসি সংবিধানগী মীংচৎ পুরক্লিবা হাউসনি, মসি সংবিধানগীদমক দাইত্ব লৌরিবা মীহুৎশিংনা থল্লবা হাউসনি…। ঐহাক্না ইকায় খুম্নরিবা মীহুৎ পুম্নমক্কী আত্মাবু ঙসি শোকচনবা হোৎনবা পামজৈ, করিগুম্বা লৈবা তারগদি।

ইকায় খুম্নজরিবা অধ্যক্ষজী, মহবুবা মুফতীজীনা ওগস্ত ৫দা হায়খি- মহবুবা মুফতীজীনা হায়খি, অদুগা সংবিধান্দা কত্থোক্লবা মীওইশিং পুক্নিং চংনা তাবিয়ু, মহবুবা মুফতীজীনা হায়খি, ভারতনা… ৱাফম অসি য়াম্না অরুবনি, মহাক্না হায়খি- ভারতনা কশ্মীরবু মীনম্লে। ঐখোয়না লৈমিন্ননবা ৱারেপ লৌখিবা লৈবাক অদুনা ঐখোয়বু মীনম্লে। ১৯৪৭তা ঐখোয়না অরানবা মীখল পাংথোকখ্রবা মাল্লে। সংবিধানবু য়ারিবা মীওইনা অসিগুম্বা মখলগী ৱাফম অসি য়ানীংগদ্রা?

ইকায় খুম্নজরিবা অধ্যক্ষজী, ওমর অব্দুল্লাজীনা হায়বীখি মদুদি আর্তিকল ৩৭০ লৌথোকপনা অদুগুম্লবা য়ুহা হাবা অমা পুরক্কনি মদুদি কশ্মীরবু ভারত্তগী তোঙান্না তারগনি।

ইকায় খুম্নজরিবা অধ্যক্ষজী, ফরুখ অব্দুল্লাজীনা হায়বীখি- ৩৭০ লৌথোকপনা কশ্মীর মীয়ামগী নীংতম্বগী লম্বী শেম্লগনি। করিগুম্বা ৩৭০ লৌথোক্লগদি ভারতকী ফিরাল পাইহনগদবা কশ্মীরদা মীওই অমত্তা লৈররোই। ৱাফম অসিবু, ৱাখল্লোন অসিবু হিন্দুস্তানগী সংবিধান্দা কত্থোক্লবা কনাগুম্বা মীওই অমত্তনা য়াবা ঙমগদ্রা? ঐহাক্না হায়রিবা অসি অত্মা লৈবা মীওইশিং অদুগীনি।

ইকায় খুম্নজরিবা অধ্যক্ষজী, অসিগুম্লবা মীওইশিং অসি কশ্মীরগী মীয়ামদা থাজবা থমদবা মীওইশিংনি মরম অদুনা অসিগুম্লবা ৱাফম অসি হায়রিবনি। ঐখোয়দি কশ্মীরগী মীয়ামদা থাজবা থম্বা মীওইনি। ঐখোয়না থাজবা থমখি, ঐখোয়না কশ্মীরগী মীয়ামদা থাজবা থমখি অমসুং আর্তিকল ৩৭০বু লৌথোকখি। অদুগা ঙসি খোংজেল য়াংনা দিবেলপমেন্তসু পুরক্লি। করিগুম্বা লমদম অমত্তগী ফিভম শোকচিলহবদা অয়াবা পীবা ঙম্লোই, মদুনা কশ্মীর ওইগেরা, অৱাং নোংপোক ওইগেরা, কেরলা ওইগেরা, করিগুম্বা অয়াবা অমত্তা পীবা ঙম্লোই। ঐখোয়গী মন্ত্রীসু হৌখিবা মতমশিংদা লেপ্পা লৈতনা জম্মু কশ্মীরদা চৎলি, মীয়ামগা উনদুনা ৱারী শানরি। মীয়ামগা লোয়ননা ৱারী শানদুনা মফম অদুগী সমস্যাশিং লোইশিন্নবা ঐখোয়না হোৎনরি।

ইকায় খুম্নজরিবা অধ্যক্ষজী, ঐহাক্না ঙসি হাউস অসিদগী জম্মু-কশ্মীরগী মশেক মঙাল নাইরবা তুংগীদমক, জম্মু-কশ্মীরগী দিবেলপমেন্তকীদমক, জম্মু-কশ্মীরগী মীয়ামগী নীংজবশিং মপুং ফাহন্নবগীদমক ঐখোয়না ৱাশক্লি। ঐখোয়না সংবিধান্দা কত্থোক্লবা মীয়ামগীদমক ৱাশক্লি। অদুবু মসিগা লোয়ননা লদাখকী মরমদসু হায়জনীংই।

ইকায় খুম্নজরিবা অধ্যক্ষজী, ঐখোয়গী লৈবাক্তা সিক্কিম লমদম্না মশানা মশাবু ওর্গানিক স্তেতকী মওংদা মশাবু মশক তাক্লি। অদুগা অমরোমদা লৈবাক অসিগী রাজ্য কয়াবু সিকিমগুম্লবা অপিকপা রাজ্যনা ইন্সপিরেসন পীরি। সিক্কিমগী লৌমী, সিক্কিমগী প্রজাশিং মসিগীদমকতৌবীমল খঙবা উৎচরি। লদাখকী হিরমদা ঐহাক্কী পুক্নিংদা ময়েক শেংলবা পিকচর অমা লৈরি। লদাখ কার্বোন ন্যুত্রেল য়ুনিয়ন তেরিতোরী অমগুম দিবেলপ তৌরগনি। লৈবাক্কীদমক মশক নাইবা অমা ওইরগনি। অদুগা মদুগী কানবা অদু লাক্কদৌরিবা জেনরেসন্না মোদেল অমগী মওংদা ফংলগনি হায়না ঐহাক্না মপুং ফানা থাজবা থম্লি।

ইকায় খুম্নজরিবা অধ্যক্ষজী, মফম অসিদা হাউসনা পাস তৌখিবা আইন অদু, হাউস অনিমক্তা পাস তৌখিবা এমেন্দমেন্ত অদু, নোতিফাই তৌখ্রবা অদু, মদুগা মরী লৈননসু করিগুম্বা খরা নত্ত্রগা খরা হোৎনরি সি.এ.এ. পুরক্নবা। মীওই খরনা হায়রি সি.এ.এ. পুরকপদা অসুক য়াম্না থুরিবা করিগীনো? ইকায় খুম্নজরিবা এম.পি. খরনা মসি হায়রি মদুদি সরকার অসিনা অচাল মীরাই নাইরি, সরকার অসিনা হিন্দু অমসুং মুস্লিম হায়না থবক চত্থরি।

লৈবাক অসিবু মচেৎ মচেৎ থুগায়বা পাম্লি হায়না খরা অমনা হায়রি, কয়া অমা হায়খ্রে অদুগা মফম অসিগী মপান্দসু কয়া অমা হায়রি। ৱাখলগী ওইবা অকিবা পোকহন্নবগীদমক শক্তি পুম্নমক শিজিন্নরি। অদুগা মখোয়না হায়রি লৈবাকপু মচেৎ মচেৎ থুগায়রিবা মীওইগী নাকলদা লেপতুনা ফোতো নমহল্লি। লৈবাকপু মচেৎ মচেৎ থুগায়রিবা মীওইগী নাকলদা লেপতুনা ফোতো নমহল্লিবা মখোয়শিং অদু। দিকেদ কয়াদগী পাকিস্তান্না ৱাফম অসি হায়দুনা লাক্লি, পাকিস্তান্না ৱাহৈশিং অসি হায়রি।

ভারতকী মুসলমানশিংবু ইহৌ হৌহন্নবগীদমক পাকিস্তান্না হোৎনবা য়াবা হোৎনরি। ভারতকী মুসলমানশিংবু লমহাংহন্নবগীদমক পাকিস্তান্না মখল খুদিংমক্কী মশান্না শান্নরি অমসুং মচু উৎলি। অদুগা হৌজিক্তি মখোয়গী ৱাফম চৎতরে, পাকিস্তানগী ৱাফম মাংলোমদা চংশিনবা ঙমদ্রে। অদুবু ঐহাক্না ঙক্লিবদি হিন্দুস্তানগী মীয়াম্না সত্তাগী সিংহাসনগা লোয়ননা য়ুমদা থাখ্রবা মখোয়না ঙসিদি লৈবাক অসিনা খনবা ফাওবা ঙমদবা থবক অদু মখোয়না তৌরি।

ঐখোয়দা নীংশিংহল্লি মদুদি… ভারতকী মিংখৈ শোনখিবা, জয়হিন্দকী খোল্লাও লাওখিবা মখোয় অদু ঐখোয়গী মুস্লিমশিংমক্নি। ৱারিবদি কংগ্রেস অমদি মখোয়গী মিৎয়েংদা মীওইশিং অসি মতম পুম্নমক্তা শুপ্নতগী মুস্লিম খক্তমক ওইখি। ঐখোয়গী ওইনদি, ঐখোয়গী মিৎয়েংদদি মখোয় ভারত মচানি, হিন্দুস্তানিনি। খান অব্দুল গফ্ফার ওইগেরা…

ইকায় খুম্নজরিবা অধ্যক্ষজী, অঙাং ওইরিঙৈদা খান অব্দুল গফ্ফার খানগী মখোং শোকচনবা তাঞ্জা অদু ঐহাক্না ফংজখি। ঐহাক্না মসিবু ঐহাক্কী লাইবক ফবনি হায়না লৌজৈ।

ইকায় খুম্নজরিবা অধ্যক্ষজী, খান অব্দুল গফ্ফার খান ওইগেরা, অফসাদ অব্দুল্লা খান ওইগেরা, বেগম হজরত মহল ওইগেরা, থৌনা ফবা শহিদ অব্দুল করিম ওইগেরা নত্ত্রগা হান্নগী রাস্ত্রপতি শ্রীমান অব্দুল কলাম ওইগেরা, পুম্নমক ঐখোয়গী মিৎয়েংদা ভারত মচাশিংনি। হাউসকী মতম য়াম্না লৌদনবগীদমক ঐহাক্না মমিং য়াম্না লৌজদ্রে।

ইকায় খুম্নজরিবা অধ্যক্ষজী, কংগ্রেস অমসুং মখোয়গুম্বা দলশিংনা ভারতপু ভারতকী মিৎয়েংদা য়েংবা হৌবা নুমিৎ অদুদা, মখোয়না মখোয়গী অরানবশিং অদু খঙগনি। ঐহাক্না কংগ্রেস অমসুং মখোয়গী ইকোসিস্তেমগীসু তৌবীমল খঙবা উৎচরি মদুদি মখোয়না সিতিজনশিপ এমেন্দমেন্ত এক্তকী ৱাফম পুথোক্তুনা লাও খোংলি। করিগুম্বা মখোয়না মায়োক্তা লেপলমদ্রবা, লাও খোংবা তৌরমদ্রবদি মখোয়গী অশেংবা শক্তম অদু লৈবাক অসিনা খঙলমদবসু য়াই। মসি মখোয়গী লৈবাক্না উবা ফংলে মদুদি পার্তীগীদমক কনা লৈরি অমদি লৈবাক্কীদমক কনা লৈরি। অদুগা ঐহাক্না পাম্লিবা অসি, খন্ন-নৈনবা হৌখ্রবদি য়াম্না শাংনা চত্থরগনি।

ইকায় খুম্নজরিবা অধ্যক্ষজী, প্রধান মন্ত্রী ওইনীংবগী অপাম্বা মীওই অমা হেক্তগী ওইবা য়াই অদুগা মদুদা করিগুম্বা মখল অত্তগী ফত্তবা লৈতে। অদুবু কনাগুম্বা অমবু প্রধান মন্ত্রী ওইহনবা তাখি মরম অদুনা হিন্দুস্তানগী মথক্তা লৈই অমা চিংখি অমসুং লৈবাক অনি থোক্না শেগায়খি। লৈবাক অনি থোক্না শেগায়রবা মতুংদা পাকিস্তান্দা হিন্দুশিং, সিখশিং অমদি অতোপ্পা মাইনোরিতীশিংদা মীওৎ মীনৈ চত্থখিবগী মওং মতৌ অদু ভাবনা শাগৎপা ফাওবা অৱাবনি। ঐহাক্না কংগ্রেসকী মরূপশিংদা হংবা পামজৈ মদুদি অদোম্না করিগুম্বদা ভুপেন্দ্র কুমার দত্তগী মমিং তাখ্রবরা? কংগ্রেসকীদমক খঙবায়াম্না মথৌ তাই অদুগা মফম অসিদা লৈতবা মখোয়শিং অদুসু খঙবা দরকার ওই।

ভুপেন্দ্র কুমার দত্ত মতম অমদা ওল ইন্দিয়া কংগ্রেস কমিতীদা য়াওরম্মি, মদুগী মীহুৎ ওইরম্মি। নীংতম ইহৌগী মতমদা চহী ২৩ মহাক্না জেলদা লৈখি। জস্তিসকীদমক নুমিৎ ৭৮ জেলগী মনুংদা চরা হেনখিবা মহাক অদুগুম্লবা অথোইবা মীওই অমা ওইবিরম্মি অদুগা মসিসু মহাক্কী মিংদা রেকোর্দ অমনি। লৈবাক অনি থোক্না শেগায়রবা মতুংদা ভুপেন্দ্র কুমার দত্ত পাকিস্তান্দা লৈখি। মহাক মফম অদুগী সংবিধান সভাগী মীহুৎসু ওইবিরম্মি। সংবিধানগী থবক চত্থরিবা মনুংদা, সংবিধানগী থবক হৌরকপা মতম অদুদা ভুপেন্দ্র কুমার দত্তনা সংবিধান সভা অদুদা হায়খিবা অদু ঙসি ঐহাক্না অমুক হন্না হায়জগে। মরমদি ঐখোয়গী ইফমদা ইরাল শিরিবা মখোয়শিং অদুগীদমক মসি খঙবা য়াম্না মথৌ তাই।

ভুপেন্দ্র কুমার দত্তজীনা হায়বিরম্মি – পাকিস্তানগী মায়কৈ অসিদা পুম্নমক্না কনফর্ম তৌরে, মাইনোরিতীশিং তপ্না তপ্না লোইশিল্লক্লি। ঐখোয়গী মরক্তা মফম অসিদা লৈনবা হোৎনরিবা মীওই কোতি অমগী ময়া ইস্ত বেঙ্গোলদা লিফত তৌরি, নীংবা কায়বগী অপুনবা সেন্স অমদা হিংলি। মসি ভুপেন্দ্র কুমার দত্তনা লৈবাক অনি থোক্না হেক শেগায়রবা মতুংদা মফম অদুগী সংবিধান সভাদা ৱাফম অসি ফোংদোকখি। ফিভম অসি ওইরম্মি, নীং তম্লবা মতুং নুমিৎ হৌরকপদগী মাইনোরিতীশিংগী, মফম অদুগী মাইনোরিতীশিংগী। মসিগী মতুং পাকিস্তান্দা ফিভম য়াম্না শোকচিল্লকখি মদুদি ভুপেন্দ্র দত্ত মশামক ভারত্তা লাক্তুনা চংজফম লৌবা তাখি অদুগা তুংদা মহাক ভারত ইমাগী তম্পাকথক্তা নোংগাখি।

১৯৫০দা নেহরু-লিয়াকৎ এগ্রিমেন্ত পাংথোকখি। পাকিস্তান্দা লৈবা মাইনোরিতী ১২০০গীদমক এগ্রিমেন্ত অসি পাংথোকখি। এগ্রিমেন্ত অসিগী য়ুম্ফমদি পাকিস্তান্দা রিলিজিয়স মাইনোরিতীশিংগা লোয়ননা খেৎনবা থম্লোই। পাকিস্তান্দা লৈরিবা মীওইশিংদা রিলিজিয়স মাইনোরিতী ওইরিবশিং অদুগী ৱাফমনি ঐখোয়না হায়রিবা অসি, মখোয়গা মরী লৈননৈ নেহরু অমসুং লিয়াকৎকী মরক্তা এগ্রিমেন্ত অমা পাংথোকখি।

হৌজিক্তি কংগ্রেসনা পাউখুম পীগদবনি, নেহরুগুম্লবা অসুক চাউখ্রবা সেক্যুলর, নেহরুগুম্লবা অসুক চাউখ্রবা থিঙ্কর, অসুর চাউখ্রবা ভিজনরী অদুগা অদোমগীদমক পুম্নমক। মহাক্না মতম অদুদা মফম অদুগী মাইনোরিতীগী মহুৎ ‘নাগরিক পুম্নমক’ অসিগুম্লবা ৱাহৈ অসি করিগী শিজিন্নখিদ্রিবনো। করিগুম্বা অসুক য়াম্না অথোইবা ওইরগদি করিগীদমক তৌখিদ্রিবনো, মরম অমদি লৈরমগনি। অদুবু অচুম্বা ৱাফম অসিবু অদোম্না কদায় ফাওবা লালহনখিগদৌরিবগে।

ইচিল-ইনাও অমসুং ইচল-ইচেশিং, ইকায় খুম্নজরিবা অধ্যক্ষজী অমসুং ইকায় খুম্নজরিবা এম.পি.শিং, মসি মতম অদুগী ৱাফমনি, মসি ঐহাক্না মতম অদুগী ৱা হায়জবনি। নেহরুজীনা এগ্রিমেন্ততা পাকিস্তানগী মাইনোরিতী, ৱাফম অসিদা করম্না য়াখিবনো, করিগুম্বা মরম খরা নত্ত্রগা খরা শোইদনা লৈরমগনি। ঙসি ঐহাক্না হায়রিবা ৱাফম অসি মতম অদুদা নেহরুজীনা হায়বীখিবনি।

নেহরু-লিয়াকৎ এগ্রিমেন্তকী মতুং থা খরগী মনুংদা নেহরুজীনা হাউস অসিগী ফ্লোরদা ১৯৫০গী নবেম্বর ৫দা মহাক্কী ৱারোল, ১৯৫০গী নবেম্বর ৫দা নেহরুজীনা হায়বীখি – মসিদা চিংনবা অমত্তা লৈতে মদুদি ভারত্তা সেতল তৌনবা লাক্লিবা এফেক্ত তৌরবা মীওইশিং অসি সিতিজনশিপ ফংনবা হক লৈরি অমদি করিগুম্বা আইন্না মখোয়গী মায়কৈদা লৈত্রগদি আইন্দা অহোংবা পুরক্কদবনি, নবেম্বর ৫, ১৯৫০.

ঐহাক্না হাউস অসিদা খুদম চাংদমদা য়ুম্ফম ওইরগা, হৌজিক ঐহাক কংগ্রেসতা অখন্ননা হংবা পামজৈ অদুগা মখোয়গী ইকোসিস্তেমসু ঐহাক্কী ৱাহং অসি খঙগনি। ঐহাক্না হায়রিবা ৱাফম পুম্নমক অসিদা, পন্দিৎ নেহরু অসি ক্যুমিনোন ওইরম্বরা? ঐহাক্না খঙবা পাম্লি। পন্দিৎ নেহরুনা হিন্দু-মুস্লিমদা খেৎনবা থমলমব্রা? পন্দিৎ নেহরুনা হিন্দুগী লৈবাক শেম্বা পামলমব্রা, মহাক্না হায়রম্বা ৱাফম অদুনা, পন্দিৎ নেহরুনা হিন্দুগী লৈবাক শেম্বা পামলমব্রা?

ইকায় খুম্নজরিবা অধ্যক্ষজী, কংগ্রেকী অৱাবদি মখোয় ওইদবদা ৱাশকই অদুগা চহী তরাগী খুজিং কয়া ফাওবা ৱাশক অদু ওৎলৈ পালৈ তৌদুনা লৈ। ঙসি ঐখোয়গী সরকারনা নেসন বিলদিংগী ৱাখল্লোনদা চত্তুনা ৱারেপ লৌবা অসিদা কংগ্রেসতা অৱাবা ওইরি। ঐহাক্না অমুক হন্না শেংদোকপা পামজরি, হাউস অসিগী থোংদা, লৈবাক অসিগী নাগরিক কোতি ১৩০বু, অচৌবা থৌদাংগা লোয়ননা সংবিধানগী চৎন লোনচৎ খঙনা মসি হায়জনীংই, সংবিধানগীদমক কত্থোচবগা লোয়ননা হায়জনীংই, লৈবাক্কী নাগরিক কোতি ১৩০গী মফমদা হায়জনীংই- সি.এ.এ., এক্ত অসিনা হিন্দুস্তানগী নাগরিক অমত্তদা করিগুম্বা মখল অমত্তগী ইনফ্লুয়েন্স লৈরোই। মদুনা হিন্দু ওইগেরা, মুস্লিম ওইগেরা, সিখ ওইগেরা, ইসাই ওইগেরা, কনাগুম্বা অমত্তদা লৈরোই। মসিনা ভারতকী মাইনোরিতীবু করিগু্বা অমত্তা শোকহল্লোই। অদুম ওইনমক লৈবাক্কী মীয়াম্না রিজেক্ত তৌখ্রবা মীওইশিং অদুনা ভোত বেঙ্ককী রাজনিতী তৌনবগীদমক গেম অসি শান্নরি।

ঙসি ঐহাক্না হংবা পামজৈ। ঐহাক্না কংগ্রেসকী মীয়ামদা অখন্ননা হংবা পামজৈ, মাইনোরিতীগী মিংদা রাজনিতী তৌরিবা মখোয়দা হংজনীংলি, কংগ্রেসনা ৮৪গী দিল্লীগী রায়োৎ অদু নীংশিংলিব্রা, মখোয় অদু মাইনোরিতী নৎখিদব্রা? ঐখোয়গী সিখ ইচিল-ইনাওশিংগী ঙকশমদা তায়র য়ান্দুনা মখোয়বু মৈ থাখি। মসিদসু নত্তে, সিখ রায়োৎকী মরাল লৈরবশিংবু জেল ফাওবা য়ৌহনখিবগী থবক অদোম্না তৌখিব্রা নত্ত্রগা তৌখিদব্রা। মসিদসু নত্তে, ঙসি মরাল লৈরে হায়না লৌরিবা, সিখ রায়োৎ থোকহনবগী মরাল শিরিবা মহাকপু ঙসি মুখ্য মন্ত্রী ওইহল্লি। সিখ রায়োৎকী মরাল লৈরবশিংবু চৈরাক ফংহনবদা অদুগুম্লবা লুখ্রাবি ইমাশিংনা দিকেদ অহুম ফাওবা জস্তিসকীদমক ঙাইবা তাখি। মখোয় অদু মাইনোরিতী নত্তব্রা? মাইনোরিতীগীদমক অরুম্বা ওন্নবা ফলা অনি-অনি লৈগদ্রা? মসিমক অদোমগী মওং মতৌরা?

ইকায় খুম্নজরিবা অধ্যক্ষজী, লৈবাক অসিদা কুইনা পানখিবা কংগ্রেস পার্তী অদু ঙসিদি লৈবাক অসিগী লাইবক থিবনি মদুদি মখোয়বু মতিক চাবা ওপোজিসনগী মওংদা লৈবাক অসিনা আশা তৌরিবা অদু, মখোয় ঙসিদি অরানবা লম্বীদা খোংদাখ্রে। লম্বী অসি অদোমগীদমকসু খুদোং থিবা থোকহল্লগনি। অদুগা মসিগী ৱার্নিং অসি ঐহাক্না পীরিবগী মরমদি, ঐখোয় পুম্নমক্না লৈবাক্কীদমক চিন্তা তৌগদবনি, লৈবাক্কী মশেক মঙাল নায়রবা তুংলমচৎকীদমক চিন্তা তৌগদবনি।

অদোম্না অরানবা কয়া অমা তৌখ্রে মরম অদুনবু মফম অদুদা ফম্বা তারিবনি। মসি অদোম্না তৌজরুবা অদুগী মহৈনি মদুদি মীয়াম্না অদোম্বু মফম অদুদা ফমহল্লিবা। মরম অদুনা দেমোক্রেতিক ওইবা মওংদালৈবাক অসিদা লৈরিবা খুদিংমক্না মখোয়গী ওইবা ৱাফম হায়নবা হক লৈরি। অদুবু অরানবা অমসুং তোকঙা শন্দোক্তুনা মীয়াম্বু লমহাংনহন্দুনা ঐখোয়না লৈবাক্কী য়াইফনবা তৌবা ঙম্লোই।

মরম অদুনা ঐহাক্না ঙসি সংবিধানগী মতাংদা হায়রিবশিংবু অখন্ননা হায়জরি,

লাকপীরো – সংবিধানবু ইকায় খুম্নরসি।

লাকপীরো – অমত্তা ওইনা ফম্মিন্নদুনা লৈবাক অসিবু রন তৌরশি,

লাকপীরো – লৈবাক অসি মাংলোমদা পুখৎলসি। দোলর ত্রিলিয়ন ৫গী ইকোনোমীগীদমক সংকল্প পুরদুনা ঐখোয় চৎলসি।

লাকপীরো – থক্নবা অফবা ঈশিং ফংদ্রিবা লৈবাক্কী ইমুং কোতি ১৫দা থক্নবা অফবা ঈশিং য়ৌহন্নবা হোৎনরসি।

লাকপীরো – লৈবাক্কী লাইরবা খুদিংমকপু চেক্কী য়ুম ফংহন্নবা ঐখোয় অমত্তা ওইনা থবক তৌদুনা মখোয়বু চেক্কী য়ুম ফংহল্লসি।

লাকপীরো – লৈবাক্কী লৌমী ওইগেরা, ঙামী ওইগেরা, শা-শন লোইবা ওইগেরা, মখোয়গী শেন্থোক হেঙ্গৎহন্নবগীদমক ঐখোয়না থবকশিংবু মায় পাক্না মাংলোমদা পুখৎলসি।

লাকপীরো – পঞ্চায়ৎ খুদিংমক্তা ব্রোদবেন্দ কনেক্তিবিতী পীরসি।

লাকপীরো – এক ভারত-শ্রেস্থ ভারতকী সংকল্প পুরদুনা ঐখোয় মাংলোমদা চংশিল্লসি।

ইকায় খুম্নজরিবা অধ্যক্ষজী, ভারতকী মশেক মঙাল নায়রবা তুংলমচৎকীদমক ঐখোয় অমত্তা ওইনা মাংলোমদা চংশিল্লসি, ৱাখল্লোন অসিগা লোয়ননা ঐহাক্না ইকায় খুম্নজরিবা রাস্ত্রপতিজীবু হন্না-হন্না থাগৎচবগা লোয়ননা মতাং অসিদা ঐহাক্কী ৱাফম লোইশিনজরি। অদোম্বুসু অখন্ননা তৌবীমল খঙবা উৎচরি।