ভারতকী প্রধানমন্ত্রী

নমস্তে, ওম শান্তি!

থৌরম অসিদা লোক সভাগী স্পীকর শ্রী ওম বির্লাজী, রাজস্থানগী রাজ্যপাল শ্রী কালরাজ মিশ্রাজী, রাজস্থানগী মুখ্য মন্ত্রী শ্রী অশোক গেহলোৎজী, গুজরাতকী মুখ্য মন্ত্রী শ্রী ভুপেন্দ্র ভাই পতেলজী, কেন্দ্রগী কেবিনেত্তা লৈরিবা ঐহাক্কী মরুপ শ্রী কিশন রেদ্দীজী, ভুপেন্দ্র য়াদবজী, অর্জুন রাম মেঘ্বালজী, পর্শোত্তম রুপালাজী অমসুং শ্রী কাইলাশ চৌধরীজী, রাজস্থান লেজিস্লেতিব এসেমব্লী ওপোজিসনগী লুচিংবা শ্রী গুলাব চান্দ কতারিয়াজী, ব্রহ্ম কুমারী একজেক্যুতিব সেক্রেতরী রাজয়োগী ম্রুথ্যুঞ্জায়াজী, রাজয়োগী ইচল মোহিনিজী, ইচল চন্দ্রিকাজী, ব্রহ্ম কুমারীগী অতোপ্পা ইচলশিং, নুপা, নুপী অমসুং য়োগী পুম্নমক লেংশিনবীরি!

মশাগী তোঙানবা কন্সিয়সনেস লৈজবা মফম খরা লৈ, মশাগী ওইবা তোঙানবা শক্তি অমা চেঞ্জবা! মসিগী শক্তি অসিদি শক্নাইরবা মীওইশিংগীনি, মখোয়গী নীংজবদগী উমং, চিংজাও অমসুং চিং মচাশিংনা মিকপ থোক্লিবনি অমসুং মীওইবা খুন্নাইগী ইথিলগী খ্বাইদগী ময়াই ওইবা মফম অমা ওইরিবনি। মাউন্ত অবুগী মঙালনা দাদা লেখরাজ অমসুং মহাক্কুম্বা মঙাল ফংলবা অতোপ্পা শক্বাইরবা মীওই কয়াগী মরমদগী লেপ্পা নাইদনা ঙাল্লি।

ঙসি, ব্রহ্ম কুমারী সংস্থানা শেংলবা মফমসিদগী নীংতম্বগী অমৃত মহোৎসবকী মতমদগী ভারতকী সনাগী য়ুগ ফাওবা চঙশিনবগী চাউরবা কেম্পেন অমা হৌদোক্লি। মসিদা সনাগী য়ুগকী ভারতকী ইথিল অমসুং স্পিরিচুএল ওইবা থৌওং য়াওরি। মসিদা ব্রহ্ম কুমারীশিংগী হোৎনজমনগা লোয়ননা লৈবাক পুম্বগী ইথিলসু য়াওরি।

ঐহাক্না ব্রহ্ম কুমারী ইমুং-মনুংবু লৈবাক্কী ৱারেপ অমসুং মঙলানগা মতম চুপ্পদা নক্ননা লৈবগীদমক্তা থাগৎপা ফোংদোক্লি। দাদী জানকী অমসুং রাজয়োগীনি দাদী হ্রিদয় মোহিনিজীসু ঐখোয়গী নাক্তা লৈবীরি। মখোয়না ঐহাকপু য়াম্না চান্না লৌজৈ। ঙসিগী থৌরম অসিদা ঐহাক্না মখোয়গী য়াইফ থৌজাল ফাওবা ঙমজরি।

মরুপশিং,

 ‘সাধনা’গী ইথিল অমসুং ৱারেপ লৈবা মতম, মমা ওইবগী ৱাখল্লোনগা মীওইবা খুন্নাইগা মরী লৈনবা মতম, ইশাগী মায় পাকপদা ‘ইন্দ না মম’ (ঐহাক্কী করিমত্তা নত্তে)গী ৱাখল্লোন লৈবা মতম অসিদা ঐখোয়গী ৱারেপ্তগী অনৌবা মতম, অমা লাকপা হৌগনি, নৌনা মিৎকপ থোক্লক্কনি। ঙসিদি, অসিগুম্বা সেবা অমসুং কত্থোকপগী ইথিল অসি অনৌবা ভারত অমগীদমক্তা অমৃত মহোৎসবকী মতমসিদা লাক্লে। অসিগুম্বা কত্থোকপা অমসুং ইথৌদাংগী অনৌবা ইথিল অসিগা লোয়ননা লৈবাক মীয়াম করোর কয়ানা ঙসিদি সনাগী ভারত অমগী উরেপ উয়ুং তম্লি।

ঐখোয়গী অমসুং লৈবাক্কী মঙলান অনিসিদা খেন্নবা অমত্তা লৈতে; ইশাগী অমসুং লৈবাক্কী মায় পাকপদা খেন্নবা অমত্তা লৈতে। ঐখোয়গী চাউখৎপসি লৈবাক্কী চাউখৎপদা লৈ। লৈবাক্না ঐখোয় লৈবদগী হিংলি, ঐখোয়না লৈবাক লৈবদগী হিংলি। মসিগী ৱাখল্লোন খঙলকপা অসিনা ভারতপু অনৌবা ভারত অমা ওইহনবদা ভারত মচাশিংগী খ্বাইদগী চাউরবা মপাঙ্গল ওইরি।

ঙসি লৈবাক্না পাংথোক্লিবা খুদিংদা ‘সবকা প্রয়াস’ (মীওই খুদিংনা হোৎনমিন্নবা) য়াওরি। ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’ অসিনা ঙসিদি লৈবাক্কী মন্ত্রা ওইরক্লে। অচান-মীরাই নাইদবা পথাপ অমা ঙসি ঐখোয়না শেম্লি, মান্নবা মিৎয়েং অমসুং সোসিএল জস্তিস্তা মরা চেৎনা য়ুম্ফম ওইবা খুন্নাই অমা ঐখোয়না শেম্লি অমসুং অনৌবা ৱাখল্লোন চেনবা অমসুং চাউখৎপা ৱারেপ লৌবা অনৌবা ভারত অমা ওইরকপগী ফিভমসু ঐখোয়না ঙসি উরি।

মরুপশিং,

তাঞ্জা কয়া চাদ্রবসু অমসুং অৱাবা কয়া নংলবসু ঐখোয়না অশেংবা শক্তাক ঙাকপসিনা ভারতকী খ্বাইদগী চাউবা মপাঙ্গলনি। ঐখোয়গী চহি কয়া লিরবা পুৱারীনা মসিগী শাখিনি। মালেম্না অমম্বা মতমদা লৈরিঙৈদা নুপীশিংবু অরিবা মতমগী ৱাখল্লোন্দা য়েংখি, মতমদুদা ভারতনা নুপীগী পাঙ্গলবু লাইরেম্বীগী শক্তম ওইনা লাৎখিবনি। ঐখোয়গী লমদমসিদা, গারগী, মৈত্রেয়ী, অনুসুয়া, অরুন্ধাতী অমসুং মদালসানা খুন্নাইদা লৌশিং পীখি। খুদোংচাদবা কয়ানা থল্লবা মেদিবেল মতমদা লৈবাক অসিদা পন্নাধায় অমসুং মীরাবাইগুম্বী শক্নাইরবী নুপী লৈরমখি। অদুগা অমৃত মহোৎসব অসিদা লৈবাক অসিনা নীংশিংলিবা নীংতম ইহৌগী পুৱারী অসিদসু নুপী কয়া অমনা মশাগী মপুন্সি কত্থোকখিবনি। কিত্তুরগী মহারানী চেনম্মা, মাতঙ্গিনী হাজ্রা, রানী লক্ষমীবাই, বিরঙ্গানা ঝলকারী বাইদগী হৌদুনা আহলয়াবাই হোল্কার অমসুং সাবিত্রিবাই ফুলে ফাওবা অসিগুম্লবা নুপীশিংনা ভারতকী শক্তাক ঙাক্তুনা থম্লি।

ঙসিদি লৈবাক অসিনা নীংতম লান্মী লাখ কয়াগা লোয়ননা নীংতম ইহৌদা তেংবাংখিবা নুপীগী পাঙ্গলশিংবুসু নীংশিংলি অমসুং মখোয়গী মঙলানশিং মঙফাওনহন্নবা হোৎনরি। মরম অদুনা, ঐখোয়গী নুপীমচাশিংনা সাইনিক স্কুলদা তম্বা ফংলে অমসুং লৈবাক্কী মচানুপী অমা হেক্তনা লৈবাক ঙাক শেন্নবা আর্মীদা চঙবা য়ারে অমসুং মরু ওইবা থৌদাং কয়া লৌবা ঙম্লে। চাবোকপীগী ছুতিগী মতম শাংদোকপগী ৱারেপ্না নুপীশিংগী মপুন্সি অমসুং কেরিয়রদা অয়েৎপা লৈতনা মখা তানা চত্থবা ঙমহল্লি।

লৈবাক্কী গনতন্ত্রদা নুপীনা শরুক য়াবগী চাংসু হেনগৎলক্লি। ইং ২০১৯গী মীখলদা নুপী মশিং য়াম্বনা মতৌ করম্না ভোৎ থাদখিবগে হায়বসু ঐখোয়না উখ্রে। ঙসিদি, নুপী মন্ত্রীশিংনা লৈবাক্কী সরকারগী মনুংদা মরু ওইবা থৌদাং কয়া শেন্নরি। খ্বাইদগী মরু ওইবা অমনা, খুন্নাইমক্না মসিগী অহোংবা অসিবু লুচিংলি। খ্বাইদগী নৌবা দেতাগী মতুং ইন্না, ‘বেতি বচাও, বেতি পরহাও’ কেম্পেন্না মায় পাকপদগী লৈবাক অসিদা চহি কয়াগী মতুংদা সেক্স রেসিওসু য়াম্না ফগৎলকখ্রে। অসিগুম্বা অহোংবশিংনা অনৌবা ভারত অসিগী করি মতৌ ওইগনি অমসুং মপাঙ্গল কয়াম্না লৈগনি হায়বা তাক্লি।

মরুপশিং,

ঐখোয়গী লাইনীংবশিংনা উপানিশদকী ‘তমসো মা জ্যোতির্গময়, মৃত্যোর্মম্রিতম গময়’ চৎনহল্লম্ববু অদোম খুদিংনা খঙলি। মসিনা হায়বদি, ঐখোয়না অমম্বদগী অঙানবদা চৎলি, শিবা অমসুং খুদোংথীবা মতমদগী নুংঙাই য়াইফবা মফমদা চৎলি হায়বনি। ‘অমৃত’ অমসুং ওমোর ওইবগী লম্বীদি লৌশিং য়াওদনা ঙান্দে। মরম অদুনা, মসিগী য়াইফরবা মতমসিদি ঐখোয়গী লৌশিং, থিজিন হুমজিনবা অমসুং অনৌবা থৌওং পুথোকপগী মতম্নি। অরিবা মতমগী চৎনবী অমসুং হেরিতেজকী তৎনা থানদবা অমসুং মতমগা চুননা মাইকৈ খ্বায়দনা শন্দোকপা ভারত অমা ঐখোয়না শেমগদবনি। ঐখোয়না ইশাগী কলচর, সিভিলাইজেসন অমসুং ভেল্যুবু হিংদুনা লৈহনগদবনি, ঐখোয়গী স্পিরিচুএলিতী অমসুং দাইবর্সিতীবুসু য়োকখত্তুনা অমুক্কা হেন্না খুমাং চাউশিলহনগদবনি, অদুগা চপ মান্নবা ওইনা, তেক্নোলোজী, ইনফ্রাস্ত্রকচর, এজুকেসন অমসুং হেল্থকী পথাপ্পু লেপ্পা লৈতনা মতমগা চুনহনগদবনি।

ব্রহ্ম কুমারীগুম্বা স্পিরিচুএল ইন্সতিত্যুসনশিং অসিগী লৈবাক্কী অসিগুম্বা থৌওংদা অচৌবা থৌদাং লৈরি। অদোম্না স্পিরিচুএলিতীদগী হেন্দোক্তুনা এজুকেসন, হকশেল অমসুং লৌউ-শিংউগুম্বা অতোপ্পা হীরম কয়াদা মশক থোকপা থবক কয়া পাংথোকপা অসিদা ঐহাক্না য়াম্না নুংঙাইবা ফাওই। অদুগা ঙসি হৌদোক্লিবা কেম্পেন অসিনা মখোয়শিংবু তুংলমচত্তা পুগনি। অদোম্না অমৃত মহোৎসবকীসু পান্দম কয়া থম্লি। অদোম্না হোৎনরিবশিংনা লৈবাকপু অনৌবা শক্তি অমসুং পাঙ্গল শোইদনা পীগনি।

ঙসি, লৈবাক্না লৌমীশিংবু নুংঙাই য়াইফবা অমসুং মরোমদোম লেপচবা ঙমহন্নবা ওর্গানিক অমসুং নেচরেল ফার্মিংগী মাইকৈদা কন্না হোৎনরি। ঐখোয়গী ব্রহ্ম কুমারীগী ইচে-ইচলশিংনা চান-থক্নবগী অশেংবগী মতাংদা খুন্নাইদা খঙহন্নবা কন্না হোৎনরি। অদুবু মগুন লৈবা চিঞ্জাক্কীদমক্তা মগুন লৈবা পোত্থোক্কীসু মথৌ তাই। মরম অদুনা, নেচরেল ফার্মিংবু খুমাং চাউশিলহনবদা ব্রহ্ম কুমারীনা অচৌবা ইথিল পীবা য়াই। অসিগুম্বা মোদেল অসিদি খুঙ্গং খরদা ইথিল পীরবা মতুংদা ওইথোক্কনি।

মান্নবা ওইনা, ক্লীন ইনর্জী অমসুং ইনভাইরনমেন্তকী মতাংদা মালেম্না ভারত্তা চাউনা থাজবা থম্লি। ক্লীন ইনর্জিগী মহুৎ শিনবা য়াবা কয়া অমসু ঙসি পুথোক্লে। মসিগী মতাংদা মীয়ামদা খঙহন্নবা অচৌবা থৌরাং পাংথোকপগী মথৌ তাবসু লৈ। অদোমগী চাকখুমদা সোলার পাৱর শিজিন্নদুনা মতম কুইনদগী চাক এঞ্জাং থোংদুনা লাক্লি। মীয়াম্না সোলার পাৱর শিজিন্নবা হৌনবা অদোম্না তেংবাংবা য়াম্না য়াই। মসিগা মান্নবা ওইনা, অদোম্না ‘আত্মানির্ভর ভারত’ কেম্পেন্দা শাফু পীবসু য়াই। লোকেলগী পোত্থোকশিংদা অহানবা মিৎয়েং চঙদুনা ‘ভোকেল ফোর লোকেল’ কেম্পেন্দা তেংবাংবসু য়াগনি।

মরুপশিং,

অমৃতকী মতমসিদা তুমদুনা মঙ মঙগদবা নত্তে, মিৎকপ থোক্তুনা মখোয়শিংবু মঙফাওনহন্নবা হোৎনগদবনি। লাক্কদৌরিবা চহি ২৫ অসিদি হোৎনবা কনবা, কত্থোকপা অমসুং খোঙফম চেৎপগী চহি ২৫ ওইহনগদবনি। চহি কয়া মীখা পোনখিদুনা ঐখোয়গী লৈবাক্না মাঙজখিবা খুদিংমক চহি ২৫গী মতমসিদা মদুগী শরুক অনি থোক্না ঐখোয়না অমুক হন্না ফংগদবনি। মরম অদুনা, অসিগুম্লবা নীংতম্বগী অমৃত মহোৎসবকী মনুংদা ঐখোয়না মিৎয়েং চঙগদবদি হয়েংগী মতমদনি।

মরুপশিং,

ঐখোয়গী খুন্নাইদা তৌবগী মতিক অদুক য়াম্না লৈ। মসিগী খুন্নাই অসিদি অরিবা অমসুং লেপ্পা লৈতনা থোক্লক্লিবা অনৌবা পথাপশিংবু ইন্দুনা চৎপনি। মীওই খরগা লোয়ননা খুন্নাইগী ৱাখল্লোন্দা, লৈবাক্কী ৱাখল্লোন্দা ফাওবা মতমগী মতুং ইন্না ফত্তবা খরা চঙশিনখ্রে হায়বসিদি ঐখোয়না লাল্লি হায়বদি য়াররোই। ৱাখল খনবা থুবা অমসুং থবক পাংথোকপা থুবদগী অসিগুম্বা ফত্তবগী মতাংদা খঙহৌবশিংনা মসিদগী নান্থোক্তুনা চৎলি। মীওইশিং অসিনা মখোয়গী পুন্সিদা অপাম্বা খুদিংমক ফংগনি। ঐখোয়গী চাউরবা অমসুং দাইভর্সিতী লৈবা খুন্নাইগী মপাঙ্গল অসি মসিগুম্বনি অমসুং চহি লিশিং কয়াগী এক্সপেরিএন্সসু লৈরবনি। মরম অদুনা, মখোয়দা অতৈগা মান্নদবা শক্তি অমা লৈ, নুংগী ওইবা পাঙ্গল, ইশাবু খুন্নাইগী হোংলক্লিবা মতমগা লোয়ননা চুননবা শেমজবগী।

মতমগী মতুং ইন্না খুন্নাই শেমদোক্তুনা অমসুং খুন্নাইগী ফত্তবশিংগা মাইয়োক্ননবা মীওই কয়া ঐখোয়গী খুন্নাইদা পোকখিবসিনা ঐখোয়গী খুন্নাইগী মপাঙ্গলনি। মখোয়গুম্বা মীওইনা মথৌ পাংথোকপগী অঙনবা মতমদা খুন্নাইনা য়ানীংদবা উৎপা অমসুং হঙ্গোইনা য়েংবীবগী থৌওং কয়াসু ঐখোয়না উখ্রে। অদুবু মখোয়না খুন্নাই শেমদোকপগী থৌদাংদগী নাথৈদুনা চৎখিদে অমসুং খোঙফম চেৎনা অদুমক লৈখিবনি। মতমগী মতুং ইন্না, খুন্নাইনা মখোয়বু শকখঙলকখি, ইকায় খুম্নরকখি অমসুং মখোয়গী পাউতাক ইনখি।

মরম অদুনা মরুপশিং,

খুন্নাইবু য়ুগ খুদিংগী মতমগী ভেল্যুগী মখা পোন্না শোকহন্দনা অমসুং মিৎ-না শিংনা লৈহনবসি তঙাই ফদে অমসুং মসিদি লেপ্তনা চত্থগদবা থৌওংনি। মতমদুগী চারোন-শুরোন্না মসিগী থৌদাং অসি পাংথোক্কদবনি। মীওই মশা-মশাগা লোয়ননা ব্রহ্ম কুমারীগুম্বা লুপ লাখ কয়া কয়ানা অসিগুম্বা থবক পাংথোক্লি। মান্নবা ওইনা, নীংতম্বগী চহি ৭৫গী মতুংগী মতমশিং অসিদা ঐখোয়গী খুন্নাই, লৈবাক্তা ফত্তবা ইথিল খরনা মীওই খুদিংবু খুদুম চনখ্রে হায়বসিদা ঐখোয়না য়াগদবনি। ঐখোয়গী ইশাগী থৌদাংবু কাওথোক্লিবা, ইশাগী ইথৌবু মরু ওইনা লৌদ্রিবসি মসিগী ফত্তবা অসিননি। হৌখ্রবা চহি ৭৫ অসিদা ঐখোয়না হক্কী ৱারী খক্তমক শাখি, হক্কীদমক্তা খৎনখি, উংখৎনখি, মতম কয়া মাঙহনখি। তাঞ্জা খরগী ওইনা মতম খরা হক্কী ৱারী শাবসি চুম্মম্বা য়াই, অদুবু ইশাগী থৌদাং খুদিংমক কাওথোকপা হায়বসিনা ভারতপু মপাঙ্গল শোন্না থম্লম্বদা অচৌবা থৌদাং লৌখি।

ভারতনা মশাগী মথৌ কাওরুবদগী তাঙলবা মতম কয়া মাঙখ্রে। হক্কীদমক্তা অয়াম্বা মতমদা খন্দুনা লৈরুদুনা ইশাগী থৌদাং কাওথোক্লিঙৈদা মাঙখিবা চহি ৭৫গী মতম্বু ঐখোয়না মথংগী চহি ২৫সিদা নীংথিনা থৌদাং পাংথোক্তুনা মেনখৎপা য়াগনি।

ব্রহ্ম কুমারীগুম্বা সংস্থান্না মথংগী চহি ২৫গী মন্ত্রা ওইনা ভারতকী মীয়াম খুদিংদা মশাগী থৌদাং খঙহন্দুনা অচৌবা অহোংবা অমা পুরকপা ঙমগনি। ঐহাক্না ব্রহ্ম কুমারী অমসুং অদোমগা মান্নবা খুন্নাইগী লুপশিংনা মন্ত্রা অসিগী মখাদা থবক তৌবীদুনা লৈবাক মীয়ামদা মখোয়গী মথৌদাং খঙহনবীয়ু হায়না হায়জরি। অদোম খুদিংনা মসিগী থবক অসি পাংথোক্নবা ইশাগী পাঙ্গল অমসুং মতম খুদিংমক শিজিন্নবীয়ু। দিকেদ কয়াদা থৌদাংগী মরী লৈনবা থবক কয়া তৌদুনা লাক্লবা ব্রহ্ম কুমারীগুম্বা অদোমগী লুপনা থবক অসি পাংথোকপা ঙমগনি। মরম অদুনা, অদোম্না অদোমগী লুপ মনুংদা থবক তৌবদা ইল্লিবা থৌদাং খঙবগী ইথিলবু মীয়াম, খুন্নাই অমসুং লৈবাক্কী মফমদা পীবনা হৌজিক্কী নীংতম্বগী অমৃত মহোৎসব অসিদা লৈবাক মীয়ামদা তম্বা খ্বাইদগী মমল য়াম্লবা খুদোল ওইগনি।

অদোম্না ৱারী অমা তারম্মনি। অমম্বা কা অমা লৈরম্মি অমসুং মদুদা লৈরম্বা মীওই খুদিংনা অমম্ববু লৈহন্দনবা মখোয় মখোয়গী তোঙানবা থৌওং কয়া হোৎনরম্মি। মীওই অমনা করিগুম্বা অমা নত্ত্রগা অমদি তৌরম্মি। মদুদগী ৱাখল লৈবা মীওই অমনা অপিকপা থাউমৈ অমা থানগৎপা মতমদা কা অদুদগী অমম্বদু খুদক্তা মাঙখিরম্মি। মসিনি থৌদাংগী পাঙ্গল। অপিকপা হোৎনবগী থৌওং অমগী পাঙ্গলসু মসিনা তাক্লি। ঐখোয় খুদিংনা লৈবাক্কী প্রজা খুদিংগী থম্মোয়নুংদা থাউমৈ অমা থানগদবনি – ইশাগী থৌদাংগী থাউমৈ।

ঐখোয় পুন্দুনা লৈবাক্কী থৌদাং খঙবগী লম্বীদা মাং থানা পুরকপা ঙম্লবদি, খুন্নাই অসিদা লৈরিবা ফত্তবশিংসু মাঙখিগনি অমসুং লৈবাক্না অনৌবা থাক্তসু য়ৌবা ঙমগনি। ভারতপু নুংশিদবা অমসুং লমদম অসি মশাগী লৈবাকপু অনৌবা থাক্তা পুখৎনীংদবা মমানি খনবা মীওই অমত্তা লৈররোই, মীওই খুদিংবু নুংঙাইহনবা পামদবা মীওইসু অমত্তা লৈররোই। মরম অদুনা, ঐখোয়না ইশাগী থৌদাংদা হেন্না থৱাই চঙদবনি।

মরুপশিং,

ঐহাক্না থৌরম অসিদা অতোপ্পা হীরম অমগী মতাংদসু করিগুম্বা খরা হায়নীংই। ভারতকী মিংচৎ থীনবা তোঙান-তোঙানবা থৌওং কয়া পাংথোক্তুনা লাক্লিবসি অদোম খুদিংনা উরবনি। মালেমগী থাক্তসু অসিগুম্বা থৌওং কয়া পাংথোক্লি। মসিদি রাজনিতী খক্কী থৌওংনি হায়না ঐখোয়না তুমিন্না লৈথোক্কদবা নত্তে। মসি রাজনিতী নত্তে, মসি ঐখোয়গী লৈবাক্কী মতাংদনি। ঐখোয়না হৌজিক নীংতম্বগী অমৃত মহোৎসব পাংথোক্লিবা অসিদা মালেমদা ভারতকী অশেংবা মশক খঙহনবা অসিসু ঐখোয়গী থৌদাংনি।

মালেম শিনবা থুংবদা লৈবা অসিগুম্বা সংস্থান অসিনা অতোপ্পা লৈবাক্কী মীওইশিংদা ভারতকী অচুম্বা ৱারোল য়ৌহনগদবনি, ভারতকী মরমদা অরানবা ৱাফম কয়া শন্দোক্লিবশিংবু মফমদুগী মীয়ামদা অচুম্বা ৱারোল তমদুনা শেংদোক্কদবনি, মখোয়বু মিৎকপ থোকহনগদবনি অমসুং মসি ঐখোয়গীসু  ইথৌ অমনি। ব্রহ্ম কুমারীগুম্বা লুপ্না মসিগী থৌদাং অসি থাক হেনগৎনা পাংথোক্নবা হোৎনবা য়াই। অদোমগী ব্রাঞ্চ লৈবা লৈবাকশিংদা অদোমগী ব্রাঞ্চকী য়ামদ্রবদা মীওই ৫০০না চহি খুদিংগী ভারতপু খঙলুনবা ভারত্তা চৎলু হায়বা য়াই। মসিগী মীওই ৫০০ অসি লৈবাক্তুগী নাগ্রিক ওইগদবনি অমসুং মফমদুদা লৈবা ভারত মচাদি ওইবা য়াদে। ঐহাক্না হায়রিবসি ভারত্তা পোকপা মীওইশিংগী মতাংদা নত্তে। মখোয়না মফমসিদা লাক্তুনা লৈবাক অসিবু উদুনা পুম্নমক খঙখিবা মতমদা ভারতকী মগুন অসি মালেমদা মথন্নতা শন্দোকখ্রগদবনি। অদোমগী হোৎনবনা অচৌবা অহোংবা অমা পুরকপা ঙমগদৌরিবনি।

মরুপশিং,

মীওই খুদিংনা চেরিতী তৌবা পাম্মি। চেরিতীগা মসিগী ৱাহন্থোক্কা পুল্লকপা মতমদা মায় পাকপা পুন্সি, মায় পাকপা খুন্নাই অমসুং মায় পাকপা লৈবাক অমা মথন্নতা শেম্লক্কনি হায়বসি ঐখোয়না কৈদৌনুংদা কাওরোইদবনি। অসিগুম্বা চেরিতীগী মীনুংশিবগী থৌদাং অমসুং ৱাহন্থোক অসিনা মতম পুম্বদা ভারতকী স্পিরিচুএল ওথোরিতী ওইদুনা লাক্লিবনি। ভারতকী স্পিরিচুএল গুন চেনবী ইচে-ইচল পুম্নমক্না থৌদাং অসিবু নীংথিজনা পাংথোক্কনি হায়না ঐহাক্না থাজৈ। অতোমগী হোৎনজমন্না লৈবাক্কী অতোপ্পা লুপ অমসুং ইন্সতিত্যুসনশিংদা নীংতম্বগী অমৃত মহোৎসব অসিদা অনৌবা পান্দম থম্নবা ইথিল পীগনি। অমৃত মহোৎসবকী মপাঙ্গল অসিদি মীয়ামগী থৱাই চঙবা অমসুং খোঙফম চেৎপনি। অদোমগী হোৎনজমন্দগী ভারতনা হেন্না য়াঙবা খোঙজেলগা লোয়ননা লাক্কদৌরিবা মতমসিদা সনাগী ভারত অমগী মাইকৈদা চঙশিনগনি।

থাজবা অসিগা লোয়ননা, ঐহাক্না পুম্নমকপু থাগৎচরি!

ওম শান্তি!

***