ভারতকী প্রধানমন্ত্রী

লৈবাক অপুনবগী আঙ্গনৱারী ৱাকর ১০০ রোম হেনবা কাংলুপ অমনা ঙসি প্রধান মন্ত্রীগা উনখ্রে অমসুং হন্দক্তা মখোয়গী অৱামন অমসুং ইন্সেন্তিব হেনগৎনবা লাওথোকখিবা অদুগীদমক নুংঙাইবা ফোংদোকখি অমসুং প্রধান মন্ত্রীবু থাগৎপা ফোংদোকখি।

আঙ্গনৱারী ৱাকরশিংগী নুংঙাই-পাউজেল অদু তরাম্না ওক্লদুনা প্রধান মন্ত্রীনা লৈবাক অসিগী শরুক খুদিংমক্তগী ঙসি মহাক্কা উননবা পুল্লরিবা অসিদা নুংঙাইবা ফোংদোকখি।

প্রধান মন্ত্রীনা অঙাংশিংগী হকচাং অমসুং ৱাখল-লৌশিং ফগৎহনবদা মচি ওইবা চিঞ্জাক্কী মরু ওইবা অদুদা শাফু পীরদুনা হায়খি মদুদি মসিগা মরি লৈননা আঙ্গনৱারী ৱাকরশিংনা মরু ওইবা থৌদাং য়াগদবনি। হৌজিক হৌজিক পাংথোক্লিবা পোশন মাহ (মচি ওইবা চিঞ্জাক্কী থা) মতাংদা পল্লদুনা প্রধান মন্ত্রীনা হায়খি মদুদি খোংজং অসিগী মনুংদা অৱাৎপা অমত্তা লৈহল্লোইদবনি। মহাক্না হায়খি মদুদি মচি ওইবা চিঞ্জাক্কীদমক্তা অচেৎপা মওংদা পুক্নীং চংবা অমসুং অফবা হৈনবী হেনগৎহনবগী মথৌ তাই, মদু ৱাকরশিংনা ফংহনবা ঙমগনি। মহাক্না আঙ্গনৱারী ৱাকরশিংদা মসি লেপথোক্নবগীদমক্তা পুক্নীং থৌগৎখি মদুদি কান্নবা ফংলবশিংদা ফংহল্লিবা মচি ওইবা মতেংশিং অসি নীয়ম চুম্না শিজিন্নহনগদবনি।

প্রধান মন্ত্রীনা হায়খি মদুদি আঙাংশিংনা আঙ্গনৱারী ৱাকরশিংগী ৱানা হেন্না পুক্নীং চংনা তাগনি। মখোয়না এৱ্যারনেস পীবদা চাউরবা থৌদাং য়াগনি।

মহাক্না হেন্না ফবা ন্যুত্রিসন কেয়র অমসুং হোৎনবশিংগীদমক পুক্নীং থৌগৎপা ওইনা তোঙান তোঙানবা আঙ্গনৱারী ৱাকরশিংগী মরক্তা হেল্দী কম্পিতিসন অমগী পুক্নীং থৌগৎখি।

থৌরম অদুদা কেন্দ্রগী নুপী অমসুং অঙাংগী চাউখৎ-থৌরাং মন্ত্রী শ্রীমতী মেনকা গান্ধীসু শরুক য়াখি।

***