ভারতকী প্রধানমন্ত্রী

লক্ষদ্বীপগী এদমিনিস্ত্রেতর, শ্রী প্রভু পতেলজী, মফম অসিগী মেম্বর ওফ পার্লিয়ামেন্ত, অমসুং লক্ষদ্বীপকী ইমুং মনুংগী মীওই পুম্নমক! খুরুমজরি!

এল্লাবরকুম সুখম আনু এন্নু বিশ্বসিক্কুন্নু!

লক্ষদ্বীপতা অয়ুক উবা ফংবা অসিদা ঐহাক্না য়াম্না নুংঙাইবা পোকই। লক্ষদ্বীপকী ফজবা ৱাহৈদা ফোঙদোকপা অসি য়াম্না অৱাবা ওই। অগাত্তি, বঙ্গারম অমসুং কবরাত্তিদা ঐগী ইমুংগী মীওইশিংগা উনবগী খুদোংচাবা ফংজবা অসি ঐগী লাইবক ফবনি। লক্ষদ্বীপকী জিওগ্রাফিকেল এরিয়া অসি পীকচরবসু লক্ষদ্বীপকী মীয়ামগী থমোয়দি সমুদ্রগা পাঙ্খক ওই। নখোয়গী মীনুংশিং অমসুং থৌজালশিং ফংজবদা নুংঙাইবা পোকই।

ঐগী ইমুং-মনুংশিং,

নীংতম্বা ফংবগী দিকেদ কয়াদগী কেন্দ্রদা লৈরিবা সরকারশিংনা মখোয়গী রাজনিতী দলশিং চাউখৎহনবদা খক্তা মীৎয়েং চংদুনা লাকখি। থাপ্না লৈবা, ঙমখৈদা লৈবা নত্ত্রগা সমুদ্রগী মরক্তা লৈবা রাজ্যশিংদা মীৎয়েং চংলমখিদে। হৌখিবা চহি 10দা ঐখোয়গী সরকারনা ঙমখৈগী মফমশিং, সমুদ্রদা লৈরিবা মফমশিংদা ঐখোয়না মীৎয়েং চংখি। রিজন খুদিংমক অমসুং ভারতকী প্রজা খুদিংমক্কী পুন্সি লাইথোকহনবা, মখোয়গীদমক খুদোংচাবা পীবা হায়বা অসিদা কেন্দ্র সরকারনা মরু ওইবা মীৎয়েং চংখি। ঙসি মফম অসিদা লুপা করোর 1200 রোমগী প্রোজেক্তশিংগী উরেপ-উয়ুং তম্মি অমসুং শঙ্গারি। প্রোজেক্তশিং অসি ইন্তর্নেৎ, ইলেক্ত্রিসিতী, ঈশিং, হকশেল অমসুং চাইল্দ কিয়রগা মরী লৈনৈ। চাউখৎ-থৌরাংগী প্রোজেক্তশিংগীদমক পুম্নমক্তা নুংঙাইবা ফোঙদোকচরি।

ঐগী ইমুং-মনুংশিং,

হৌখিবা চহি 10 অসিদা কেন্দ্র সরকারনা লক্ষদ্বীপকী মীয়ামগীদমক ইজ ওফ লিবিং হেনগৎহন্নবা তৌবা য়াবা তৌখি। পি.এম. আৱাজ য়োজনা (গ্রামিন)গী মখাদা বেনিফিসরী 100% কবর তৌখি। বেনিফিসরী খুদিংমক্তা লেম্না রাসন য়ৌরি, অমসুং লৌমীগী ক্রেদিৎ কার্দশিং অমসুং আয়ুশ্মান কার্দশিংসু পীখি। মফম অসিদা আয়ুশ্মান আরোগ্যা মন্দির অমসুং হেল্থ এন্দ ৱেলনেস সেন্তরশিং লিংখৎখি। সরকারগী অপাম্বদি সরকারগী স্কিমশিংগী কান্নবশিং মীপুম খুদিংমক্তা ফংহনবনি। কেন্দ্র সরকারনা দাইরেক্ত বেনিফিৎ ত্রান্সফরগী খুত্থাংদা বেনিফিসরী খুদিংমক্কী বেঙ্ক একাউন্তশিংদা শেল হকথেংননা থারি। মসিনা ত্রান্সপরেন্সী পুরকখি অমসুং শেঞ্জা থুমজা হন্থহনখি। ঐহাক্না নখোয়দা থাজবা পীরি মদুদি লক্ষদ্বীপকী মীয়ামদা মখোয়গী হকশিং ফংহনদবা মীওই অমত্তা লেম্না থারোই।

ঐগী ইমুং-মনুংশিং,

2020দা ঐহাক্না নুমিৎ 1000গী মনুংদা নখোয়দা হায়-স্পীদ ইন্তর্নেৎ ফংহনগনি হায়না গরেন্তী পীখি। ঙসি কোচি-লক্ষদ্বীপ সবমেরিন ওপ্তিকেল ফাইবর প্রোজেক্ত শঙ্গাখ্রে। হৌজিক লক্ষদ্বীপনা খোঙজেল শরুক 100 হেন্না য়াংবা ইন্তর্নেৎ এক্সেস তৌবসু ফংলগনি। মসিনা সরকারগী সর্ভিসশিং, হেল্থকিয়র, এজুকেসন, দিজিতেল বেঙ্কিং, অমসুং অতৈ ফেসিলিতী কয়া ফগৎহল্লগনি। লক্ষদ্বীপতা লোজিস্তিক্স সর্ভিসেস হব অমগী ওইথোকপা য়াবা অসি শাহৌসু ফংলগনি। লক্ষদ্বীপকী য়ুমথোং খুদিংমক্তা তোতি ঈশিং পীনবা থবক খোঙজেল য়াংনা পাইখৎলি। থুমহি চেনবা ঈশিংবু থকপা য়াবা ঈশিংদা ওন্থোক্লিবা অনৌবা প্লান্ত  অসিনা মিসন অসি হেন্না খুমাং চাউশিনহল্লগনি। প্লান্ত অসিনা নোংমদা থক্নবা ঈশিং লিতর লাখ 1.5 পীরগনি। মসিগী পাইলোৎ প্লান্তশিং কবরাত্তি, অগাত্তি অমসুং মিনিকোই আইলেন্দদা হান্ননা ইনস্তোল তৌখ্রে।

ঐগী ইমুং-মনুংশিং,

মরুপশিং, ঐহাক্কী লক্ষদ্বীপ খোঙচৎ মনুংদা অলি মনিকফেন উনবগী খুদোংচাবশিং ফংখি। মহাক্কী রিসর্দ অমসুং ইন্নোভেসনশিংনা অপুনবা লমদমদা চাউনা চাউখৎপা পুরকখি। ঐখোয়গী সরকারনা অলি মনিকফেনবু 2021দা পদ্ম শ্রী পীদুনা ইকাই খুম্নখিবা অসি য়াম্না নুংঙাইবা ৱাফম অমনি। ভারত সরকারনা ইন্নোভেসন অমসুং নহারোলগী হায়র এজুকেসনগীদমক অনৌবা লমশিং ফংহল্লি। ঙসিসু মফম অসিদা নহারোলশিংদা লেপ্তোপশিং পীখি অমসুং নুপীমচাশিংদা সাইকলশিং পীখি। চহি কয়াদগী লক্ষদ্বীপতা হায়র এজুকেসন ইন্সতিত্যুসন অমত্তা লৈরমখিদে মসিনা নহারোলশিংবু মপালদা মহৈ তম্বা চৎপা তাহনখি। ঐখোয়গী সরকারনা লক্ষদ্বীপতা হায়র এজুকেসনগীদমক অনৌবা ইন্সতিত্যুসনশিং হৌজিক হাংদোকখ্রে। এন্দ্রোত্ত অমসুং কদমৎ আইলেন্দশিংদা আর্তস অমসুং সাইন্সকী অনৌবা কোলেজশিং হাংদোকখি, মিনিকোইদা অনৌবা পোলিতেক্নিক অমা শাখি, মসিনা মফম অসিগী মহৈরোয়শিংদা চাউনা কান্নবা পীখি।

ঐগী ইমুং-মনুংশিং,

মরুপশিং ঐখোয়গী সরকারনা হজ তীর্থ য়াত্রা চৎপা মীওইশিংগী খুদোংচানবা খোঙথাংশিং পাইখৎপনা লক্ষদ্বীপকী মীয়ামদসু কান্নবা ফংহনখি। হজ তীর্থ য়াত্রা চৎপা মীওইশিংগী বিজাগী কাংলোনশিং অসি কোমথোকখি অমসুং হজকা মরী লৈনবা ত্রাঞ্জেক্সনশিং অসি হৌজিক দিজিতেল ওইহনখ্রে। নুপীশিংবু মেহরম য়াওদনা হৌজিক্তি হজ চৎপা য়াহনখ্রে। খোঙথাংশিং অসিনা মরম ওইরগা উমরাহদা ভারত মচানা তীর্থ য়াত্রা চৎপগী মশিং শীংথানীংঙাই ওইনা হেনগৎহনখি।

ঐগী ইমুং-মনুংশিং,

ঙসি ভারতনা সীফুদকী গ্লোবেল মার্কেৎতা মাগী শিয়র হেনগৎহন্নবা হোৎনরি। মসিনা লক্ষদ্বীপতসু কান্নবা ফংহল্লি। মফম অসিগী তুনা ঙা অসি জাপান্দা হৌজিক পুথোক পুশিন তৌরি। মফম অসিদগী ক্বালিতী লৈয়া ঙা এক্সপোর্ত তৌবগী ওইথোকপা য়াবা কয়ামরুম লৈ, মসিনা ঙামী ফুরুপশিংগী পুন্সিদা অওনবা পুরকপা ঙমগনি। সীৱিদ কলতিবেসনগী ওইথোকপা য়াবসু মফম অসিদা থীজিল্লি। অমরোমদা লক্ষদ্বীপ চাউখৎহনবগা লোয়ননা ঐখোয়গী সরকারনা মাগী অকোইবদা অকাইবা পীদনবা মপুং ফানা মীৎয়েং চংলি। বেত্তরী ইনর্জী স্তোরেজ সিস্তেম য়াওবা সোলর পাৱর প্লান্ত শাখিবা অসি খোঙথাং অসিগী শরুক ওইরি। মসি লক্ষদ্বীপকী অহানবা বেত্তরী-বেক সোলর পাৱর প্রোজেক্ত ওইরি। মসিনা ইলেক্ত্রিসিতী জেনরেসন তৌনবগী দিজলগী মীপাল তাংবা হন্থহনগনি, মসিনা মেরিন ইকোসিস্তেমদা পোল্লুসন হন্থহনগনি অমসুং অকাইবা পীবা হন্থহনগনি।

ঐগী ইমুং-মনুংশিং,

লক্ষদ্বীপনা নীংতম্বগী ‘অমৃত কাল’দা ভিকসিৎ ভারত অমা শেমগৎপদা মরু ওইবা থৌদাং লৌরি। ভারত সরকারনা ইন্তরনেস্নেল তুরিজম মেপতা লক্ষদ্বীপ অসি মশক থোকহন্নবা হোৎনরি। মফম অসিদা হন্দক্তা পাঙথোকখিবা G20মীফম অসিনা লক্ষদ্বীপ অসি মালেমদা মশক তাকখি। স্বাদেশ দর্শন স্কিমগী মখাদা লক্ষদ্বীপকীদমক দেস্তিনেসন-স্পেসিফিক মাস্তর প্লান অমা শেমখি। হৌজিক লক্ষদ্বীপতা ব্ল্যু ফ্লেগ অনি ফংলবা বীচশিং লৈরে। ঐহাক্না খঙহল্লকখি মদুদি লৈবাক অসিগী অহানবা ৱাতর বিল্লা প্রোজেক্ত কদমৎ অমসুং সুহেলি আইলেন্দশিংদা শেমগৎলি।

লক্ষদ্বীপ অসিনা ক্রুজ তুরিজমগী মরু ওইবা দেস্তিনেসন অমসু ওইরক্লি। হৌখিবা চহি মঙাদা মফম অসিদা লআকখিবা তুরিস্তশিংগী মশিং অসি শরুক মঙাগী ময়াদা হেনগৎলকখি। লৈবাক অসিগী মীয়ামদা ঐহাক্না ফোরেন ত্রিপশিংগী প্লান তৌদ্রিঙৈ মমাংদা ভারত্তা য়ামদ্রবদা মফম 15 চৎনবা অপীল তৌখিবা লৈ। তোঙান-তোঙানবা লৈবাকশিংদা আইলেন্দশিংদা কোইবা চৎপা পাম্বা মীওইশিং অমসুং তোঙান-তোঙানবা লৈবাকশিংগী সমুদ্র পামজবা মীওইশিংদা ঐহাক্না লক্ষদ্বীপতা লাক্নবা হায়জরি। ঐহাক্না থাজৈ মদুদি ফজরবা বীচশিং অসি উবা মীওইশিংনা অতোপ্পা লৈবাকশিংদা চৎনীংবা পোক্লোই।

ঐগী ইমুং-মনুংশিং,

কেন্দ্র সরকারনা ইজ ওফ লিবিং, ইজ ওফ ত্রেবেল অমসুং ইজ ওফ দুইং বিজিনেসকীদমক ওইথোকপা য়াবা খোঙথাং মখা তানা লৌখৎকনি হায়না থাজবা পীজরি। লক্ষদ্বীপনা ‘ভিকসিৎ ভারত’ অমা শেমগৎপদা অচৌবা থৌদাং লৌগনি। থাজবা অসিগা লোয়ননা চাউখৎ থৌরাংগী প্রোজেক্তশিং  অসিগীদমক পুম্নমক্তা নুংঙাইবা ফোঙদোকচরি।

মীপুম খুদিংমকপু হন্না-হন্না থাগৎচরি!

 ****