ভারতকী প্রধানমন্ত্রী

রাস্ত্রপতি মুন জে–ইনগী বার্তন ফংদুনা ঐহাক রিপব্লিক ওফ কোরিয়াদা চৎলি। রিপব্লিক ওফ কোরিয়াদা মসিনা ঐহাক্কী অনিশুবা খোংচৎনি অমসুং রাস্ত্রপতি মুনগা লোয়ননা ঐহাক্কী অনিশুবা অৱাংবা মীফম্নি।

হৌখিবা চহীগী জুলাই থাদা ঐখোয়না রাস্ত্রপতি মুন জে–ইন অমসুং ফর্স্ত লেদী শ্রীমতী কিম জুং–সুকপু ভারত্তা তরাম্না ওকচবগী খুদোংচাবা ফংজখি।

ঐখোয়না রিপব্লিক ওফ কোরিয়াবু মমল য়াম্লবা মরূপ অমগুম, ঐখোয়গী অখন্নবা স্ত্রাতেজিক পার্তনরশিপ লৈবা লৈবাক অমা ওইনা ইকায় খুম্নজৈ। দেমোক্রেসী চৎপা লৈবাকশিং ওইবনা ভারত অমসুং রিপব্লিক ওফ কোরিয়ানা রিজনেল অমসুং গ্লোবেলগী শান্তিগীদমক অপুনবা মীৎয়েং থম্লি। মার্কেৎ ইকোনোমীগী মপাং ওইনা ঐখোয়গী দরকার ওইবশিং অমসুং পাঙ্গল শক্তিশিং থাগৎনীংঙাইনি। রিপব্লিক ওফ কোরিয়া অসি ঐখোয়গী ‘মেক ইন ইন্দিয়া’ গী খোংথাং লোয়ননা ‘স্তার্ত অপ ইন্দিয়া’ অমসুং ‘ক্লিন ইন্দিয়া’ খোংথাংশিংগী মরুওইবা পার্তনর অমনি। সাইন্স অমসুং তেক্নোলোজীগী লমদা ঐখোয়না পুন্না থবক তৌমিন্নরিবা অসি পুক্নীং থৌগৎনীংঙাইনি।

ঐখোয়গী প্রজাশিংগী মরক্তা লৈনরিবা মরীশিং অমসুং পীথোক পিশিন তৌনরিবশিং অসিনা মতম পুম্নমক্তা ঐখোয়গী মরূপ ওইবগী লীপুন্দা অচেৎপা য়ুমফম পীরি। মমাং চহীগী নবেম্বর থাদা অয়োধ্যাদা পাংথোকখিবা ‘দীপোতসব’ কুমহৈদা রাস্ত্রপতি মুন্না মহাক্কী অখন্নবা মীহুৎ ওইনা ফার্স্ত লেদীবু থাবীরক্নবা লৌখিবা ৱারেপ অদুনা ঐখোয়বু অপেনবা ফাওহনখি।

ঐখোয়গী লৈনরিবা মরীদা হেন্না চেৎশিল্লিবা অসি ঐখোয়গী এক্ত ইস্ত পোলিসী অমসুং রিপব্লিক ওফ কোরিয়াগী ন্যু সাউদর্ন পোলিসীগী মরক্তা লৈরিবা ৱাখল্লোন তিন্নবা হেঙ্গৎলকপা অদুননি। পুন্না থবক তৌমিন্নদুনা ঐখোয়না ঐখোয়গী মরী অসিবু ‘প্রজা, চাউখৎপা অমসুং শান্তিগীদমক তুংগী নোংপোকলোমগী পার্তনরশিপ’ অমগুম পুক্নীংদা লেপ্লি।

খোংচৎ অসিগী মনুংদা, রাস্ত্রপতি মুনগা লোয়ননা ঐহাক্কী খন্ন–নৈনবগী মথক্তা ঐহাক্না ললোন ইতিক্কী লুচিংবশিং, ইন্দিয়ন ফুরুপকী মীহুৎশিং অমসুং শক্নাইরবা কয়াগা উনগনি।

খোংচৎ অসিনা মসিগী মরুওইবা পার্তনরশিপ অসি মখা তানা চেৎশিনহনবদা ঐখোয়দা মতেং পীরগনি হায়না ঐহাক্না থাজবা থম্লি।