ভারতকী প্রধানমন্ত্রী

হাউস অসিগী মতিক হাপ্লিবা, হাউস অসিবু থৱায় হাপ্লিবা অমদি হাউস অসিগী খুত্থাঙদা মীয়ামগী থৌগলদা পুক্নিং লুপ্লিবা ঐখোয়গী মরূপ মরিনা মখোয়গী মতম লোইদুনা অনৌবা থৌদাং অমগী মায়কৈদা খোঙ থাংজিল্লি‍।

শ্রীমান গুলান নবি অজাদ জী, শ্রীমান সমসের সিংহ জী, মীর মোহম্মদ ফিয়াজ জী, নদির অহমদ জী; ঐনা মতিক লৈরবা অদোম মরিমকপু হাউস অসিগী মতিক হাপ্লমবগীদমক, অদোমগী ৱাখলল্লোন, অদোমগী ৱাখল লৌশিংনা হাউস অসিগী অমদি লৈবাক্কী কান্নবা পুরক্লম্বগীদমক অমসুং অদোমগী লমদমগী ৱাফমশিংগী ৱারোইশিন পুরকখিবগীদমক অদোম্না লৌখিবা থৌদাংশিংগীদমক ঐনা অহানবমক্তদা অদোমবু থাগৎচরি‍।

মীর মোহম্মদ জী অমসুং নাজির অহমদ জী, হায়রিবা মরূপ অনিমক হাউস অসিদা মীওই খরখক্তনা পুক্নিং চঙবিরমগনি, অদুবু ঐগী চেম্বরদা মখোয়গা ফম্মিন্নদুনা তোঙান তোঙানবা হীরমদা তাথোক তাশিন তৌবগী খুদোংচাবা ফংখিদবা ৱাফম অমত্তা লৈরম্লোই‍। কাস্মিরগী মতাঙদসু মখোয়গা ফম্মিন্নবা মতমদা, করিগুম্বদা মখোয়গী ইমুং মনুংদা লাকমিন্নবা মতমদা ৱাফম কয়া মখোয়না ইফমদা থমখিবা ঐগীদমক্তসু পুক্নিং তেকখৎপা ফাওহনখি‍। মরম অসিনা ঐখোয়গী মরূপ অনিবু ঐগা নক্ননা মরী থম্নখিবা অমদি মখোয়দগী ঐনা খঙজিনহৌবা ৱাফম কয়াগীদমক ঐনা মখোয়বু থম্মোয়নুংদগী তৌবিমল খঙবা উৎচরি‍। মখোয়গী ফিরেপ অমসুং মখোয়গী ফিদম লৈবাক্কীদমক, মরুওইনা জম্মু অমসুং কাস্মিরগীদমক কান্নগনি হায়না ঐনা থাজৈ‍। লৈবাক্কী অপুনবগী শক্তম, লৈবাক্কী ইং চিকপগী ফীভমবু খুমাঙ চাউশিলহনবদা কান্নগনি হায়না ঐনা মপুং ফানা থাজৈ‍।

ঐখোয়গী অতোপ্পা মরূপ সমসের সিংহ জী, মহাক্কা চহী কয়া কুইনা থবক তৌমিন্নরকখিবগে হায়বা ঐদি লূপশিংগা লোয়নদুনতা লৈখিবনা নীংবু নীংশিংদ্রে‍‍। ঐনা থবক তৌরকখিবা হীরমদুদা চহী কয়া জম্মু অমসুং কাস্মিরদা থবক তৌবগী তাঞ্জা ফংখিবদা ঐগী মরুপ মপাং ওইনা থৌ পাংমিন্নরকপদা স্কুতরদা চৎমিন্নখিবগী তাঞ্জাসু ফংখি‍। চহী নৌনা ইমর্জেন্সীগী মতমদা কৈশুমশঙদা চঙখিবা মতমদা সমসের সিংহসু অমনি‍। হাউস অসিদা সমসের সিংহনা কারকখিবগী চাংসি চাদা ৯৬ ওইখি, মসিমক… হায়বদি মীয়াম্না মহাক্কী মফমদা শিন্নরকখিবা থৌদাং অদু মহাক্না চাদা চাম্মা পাঙথোক্নবা হোৎনখি‍। ৱাহৈ অকনবা ঙাঙদে, ইচম চম্বা হিংই, অমদি জম্মু-কাস্মিরদগী পোত্থারগদবা ইকায়খুম্নরবা মেম্বর মরিগীদমক মখোয়গী পুন্সিগী থৌদাং অসি খ্বাইদগী অথোইবা ওইগনি হায়না ঐনা থাজৈ মরমদি পুৱারীগী অনৌবা মাইওন অমা লাকখ্রে অমসুং মদুদা মখোয়না খুদম চাংদম ওইহৌখি‍, তেংবাংখি‍। মসি মখোয়গী পুন্সিগী খ্বাইদগী চাউবা থৌদোক্নি‍।

শ্রীমান গুলাম নবি অজাদ জী, ঐনা নুংনাংলিবদি গুলাম নবি জীগী মতুংদা ফম অসিবু কলহৌগদবা মীশক্তু গুলাম নবি জীগা লম্বা তৌবদা ৱানা থোক্কনি‍। মরমদি গুলাম নবি জীনা মহাক্কী পার্তীগীদমক খঞ্জখি অদুগা লৈবাক্কী অমসুং হাউস অসিগীদমক্তসু মহাক্না ৱাজখি‍। মসি অপীকপা ৱাফম নত্তে অচৌবা ৱাফম অমনি, মদু নৎত্রবদি ওপোজিসনগী লুচিংবা অমা ওইনা মহাক্না লৌখিবা থৌদাং কনানসু ঙমগদবা নত্তে‍। অদুবু মহাক্না হাউসতা… ঐনা সরদ পৱার জীবুসু কাঙলুপ অসিদা থমজগে, হাউসকী অমসুং লৈবাক্কী ৱাফমবু খ্বাইদগী মরুওইনা লৌখিবা লুচিংবশিংগী মরক্তা মখোয়সু ওইখি… গুলাম নবি জীনা হায়রিবা থৌদাংসিবু নীংথিনা য়াখি‍।

ঐ নীংশিংলি কোরোনাগী মতমসিদা ফ্লোরগী লুচিংবশিংগী মীফম অমা পাঙথোকখিবা নুমিত্তা গুলাম নবি জীগী ফোন লাকখি – মোদীজী অদোম্না তৌবিরিবসিবুদি ফরে অদুবু অদোম্না পার্তী পুম্নমক্কী লুচিংবশিংগীসু মীফম অমা শোয়দনা কৌবিয়ু‍। মহাক্না পার্তী লুচিংবশিংগা লোয়ননা পার্তী পুম্নমক্কী থৌবুশিংগা পুন্না ফম্মিন্ননবগী ৱাফম হৌদোরকখিবা ঐ য়াম্না নুংঙাইখি অমদি মীফমদুসু পাঙথোকখি‍। মীফম অদু গুলাম নবি জীগী পাউতাক্তগী পাঙথোকখিবনি… অদুগা ৱাফমসি হায়বদা ঐঙোন্দা…‍। হায়বদি অসুম্না পাউ ফাউনবা অমদি মদুগী মরুওইবনা মরম ওইরগা মহাক্কী ইথিল নাকল অনিমক্তা লৈখি, রুলিংদসু অমদি ওপোজিসন্দসু‍। চহী ২৮ থৌগল তৌরকখিবা হায়বসিমক অচৌবা ৱাফম অমনি‍।

চহী কয়াগী মমাঙগী ৱাফম্নি, অতলজীগী লৈঙাক লৈবা মতম ওইরমবা য়াই ঐ নীংশিংদ্রে‍, ঐনা হাউস অসিদা থবক অমগীদমক লাকখি‍। মতমদুদা ঐদি রাজনিতীদা খোঙদাদ্রি, হায়বদি ইলেক্তোরেল পোলিতিক্সতা চঙদ্রিঙৈ মতমনি, ঐ লূপকী থবক তৌরিঙৈ মতমগীনি‍। মতমদুদা ঐ অমসুং গুলাম নবি জী লোব্বিদা ৱারী ৱাতায় শারম্মি‍। পাউমীশিংনা মায় মায় ওনশিন্নদুনা ফম্লিবা অনিসিবু কমদৌনা পুনশিন্নরিবনো হায়বা ৱাখল ফাওনখি‍। ঐখোয় নোক্তুনা নুংঙাইনা ৱারী শারম্মি, অদুগা ঐখোয়না থোক্লকপা মতমদা পাউমীশিংনা কোয়শিল্লক্লম্মি‍। গুলাম নবি জীনা ফজবা পাউখুম অমা পীখি‍। পীখিবা পাউখুম অদু ঐখোয়গীদমক্তা য়াম্না কান্নরক্কদবা পাউখুম্নি‍। মহাক্না হায়খি, অদোম্না ঐখোয়বু পাউ-চেদা নৎত্রগা তি.ভি.দা নৎত্রগা মীয়ামগী মীফমদা অৱায় অখুম তৌনবা উরমগনি অদুবু তশেংবদি মফমসিদা ইমুং অমগী ফীভমগুম লৈরিবা অসি অতৈ মফমদা উরম্লোই‍। ঐখোয়দা মান্নবা, অৱাবা অমদি নুংঙাইবা কয়া লৈ‍। হায়রিবা ৱাখল্লোন অসি তশেংনমক অচৌবা ৱাফম অমনি‍।

গুলাম নবি জীগী হৈনবী অমা মী য়াম্নদি খঙলম্লোই অদুগা করিগুম্বা মহাক্কা ফম্মিন্নবগী তাঞ্জা ফংলবদি হায়রক্কনি‍। ঐখোয়না লৈঙাক্কী বঙ্গলোদা লৈবা মতমদা বঙ্গলোগী ফক্লাংশিং, ঐখোয়গী সোফা সেতকী অকোয়বগী ঐখোয়গী ৱাখল নৈশিন্দুনা লৈ‍, অদুবু গুলাম নবি জীনা হায়রিবা বঙ্গলো অদুদা লৈকোল শেম্মি, হায়বদি মওং অমদা মহাক্না কাস্মিরগী ফজববু নীংশিংহনবা লৈকোল শেম্মি‍। মসিগীদমক্তা মহাক্না চাউথোকচৈ, মহাক্না মতম কাইথোকই, অনৌ-অনৌবা পোৎলমশিং হাপচিল্লি অমদি কম্পিতিসন পাঙথোকপা খুদিং মহাক্কী বঙ্গলোনা অহানবা হেক্তা তাই‍। হায়বদি মহাক্কী লৈঙাক্কী মফমবুসু মহাক্না নুংশিনা শেমগৎলি, হায়বদি তশেংনমক পুক্নিং লূপ্তুনা শেন্নজৈ‍।

অদোম্না মুখ্য মন্ত্রী ওইরম্বা মতমদা, ঐসু স্তেত অমগী মুখ্য মন্ত্রী ওইনা থবক তৌরম্মি‍। মতমদুদা ঐখোয় য়াম্না নকশিন্নরম্মি‍। ঐখোয়গী মরক্তা ঈ-পাউ ফাওনখিদবা থৌদোক অমত্তবু লৈরম্লোই‍। নোংমা গুজরাতকী মীওইশিং, মরমদি জম্মু-কাস্মিরদা চৎপা লম কোয়বা চৎপশিংগী মরক্তা গুজরাতকী মীশিং য়াম্না য়াওখি – অদুগা তেরোরিস্তশিংনা মখোয়দা লান্দারকখি‍। মী নিপানলোম শিখি‍। ইহান হান্না ঐগী ইফমদা গুলাম নবি জীগী ফোন লাকখি‍ অমদি ফোন লাকখিবদু পাউ পীনবখক্কী নত্তে‍। ফোন্দা মহাক কপখি‍। মতমদুদা প্রনাব মুখর্জী সাহব ঙাকশেল মন্ত্রী ওইরম্মি‍। ঐনা মঙোন্দা ফোন তৌখি অদুগা হায়খি – সাহব নুমিদাংসু থেংজিল্লক্লে অশিবা হকচাঙশিং পুরক্নবা ফোর্সকী প্লেন লৈরগদি শিন্বিয়ু‍। মুখর্জী সাহবনা অদোম করিসু নুংনাংবিগনু ঐ থৌরাং তৌগে হায়না হায়বিরকখি‍। অদুবু নুমিদাংদা গুলাম নবি জীগী ফোন অমুক লাকখি – মহাক এয়রপোর্ত্তা লৈখি‍‍। মহাক্না নুমিদাং অদুদা এয়রপোর্ত্তগী ঐঙোন্দা ফোন তৌরকখি অদুগা মহাক্কী ইমুং মনুংগী মীওইগীদমক থৱায় ৱাজবগুম মহাক্না ৱাজখি‍…।

ফম অমসুং পাঙ্গল পুন্সিদা লাকখি অদুবু মদুগী কমদৌনা খাঙগদগে… মতমদু ঐ পুক্নিং য়াম্না নুংশিখি‍। মথংগী অয়ুক্তা ফোন তৌরক্তুনা হংলকখি পুম্নমক য়ৌরক্লবরা? মরম অসিনা মরূপ অমা ওইনা গুলাম নবি জীগী থৌদোক অমসুং ৱাখল্লোনবু ঐনা ইকোক নোঞ্জরি অদুগা মহাক্কী মিনুংসি, মহাক্কী অমেংবা মতৌ, লৈবাক্কীদমক করিগুম্বা খরা তৌরম্নবা মহাক্কী ইথিলনা মহাকপু কৈদৌঙৈদসু নিংঙাইদনা ফমদুনা লৈহনবা ঙম্লোই হায়না ঐনা থাজৈ‍। মফম অমা হেক্তদা মহাক্না থৌদাং য়াবা মতমদা মহাক্না শোয়দনমক্কী মদুগী মমল হেনগৎহনগনি, থৌদাং লৌগনি অমদি লৈবাকসিনা মহাক্কী মফমদগী কান্নবা ফংগনি হায়না ঐনা চপ চানা থাজৈ‍। ঐনা অমুক্কা হান্না মহাক্না পাঙথোক্লমবা থৌদাংশিংগীদমক নোল্লুক্না থাগৎচরি‍। অদুগা ঐনা লনাই ওইনা অদোমগী মফমদা হায়জনিংবদি হাউস অসিগী মেম্বর ওইদ্রে হায়বা ৱাফম কৈদৌঙৈদসু খনবিগনু‍। অদোমগীদমক্তা ঐগী থোঙ মতম পুম্নমক্তা হাংলি‍। ইকায়খুম্নরবা মেম্বর মরিমক্কীদমক থোং হাংলি‍। লৈবাক্কীদমক য়াম্না মরুওই‍বা কান্নরবা অদোমগী ৱাখল্লোনশিং, অদোমগী পাউতাকশিং মতম পুম্নমক্তা ঐনা ফংখিগনি হায়না ঐনা থাজদুনা লৈরি‍। ঐনা অদোমবু থৌদাংসিদগী পোত্থাহল্লোই‍। অমুক্কা হন্না য়াইফ-পাউজেল পীজরি‍।

থাগৎচরি‍।

***