ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা য়ুরোপিয়ান কাউন্সিলগী প্রসিদেন্ত এন্তোনিও কোস্তাগী তেলিফোন কোল অমা ওকখ্রে।

মহাক্না য়ুরোপিয়ান কাউন্সিলগী প্রসিদেন্তগী ফম পায়রকপদা প্রধান মন্ত্রীনা প্রসিদেন্ত কোস্তা থাগৎপা ফোঙদোকখ্রে। 

হৌখিবা চহি ১০ অসিদা ইন্দিয়া-ই.য়ু স্ত্রাতেজিক পার্তনরশিপ শিংথানা য়ানা চাউখৎলকপা অসি পল্লদুনা, ললোন-ইতিক, তেক্নোলোজি, শেন থাদবা, গ্রিন ইনর্জি অমসুং দিজিতেল স্পেস য়াওনা লৈনরিবা মরীশিং মখা তানা চাউখৎনবা পুন্না থবক তৌমিন্নবা হায়না লুচিংবা অনিনা য়ানরে।

নাকল অনিমক কান্নবা ফংগদবা ইন্দিয়া-ই.য়ু এফ.তি.এ অথুবা মতমদা য়ানবা পুরকপগী দরকার ওইবা অদু মখোয়না ফোঙদোকখ্রে।

নাকল অনিনা খুদোংচাগদবা মতম অমদা ভারত্ত মথংগী ইন্দিয়া-ই.য়ু সম্মিৎ পাংথোক্নবা লুচিংবশিংনা থাজবা পীনখি।

মখোয়না নাকল অনিমক্না দরকার ওইবা রিজনেল অমসুং মালেমগী ফিবমশিংগী মতাংদা খন্নখি। মখা তানা পাউ ফাওনবা হায়না লুচিংবশিংনা য়ানখ্রে।

***