ভারতকী প্রধানমন্ত্রী
চেন্নাইদা প্রধান মন্ত্রী
চেন্নাইদা প্রধান মন্ত্রীনা লুপা কোতি ২৯০০ হেনবগী প্রোজেক ৫ মীয়ামদা কৎথোক্কনি। লুপা কোতি ৫০০ হেন্না চংবা পায়খৎপা কিলোমিতর ৭৫ শাংবা মদুরাই-তেনি(রেলৱেজ গেজ ওনখৎপগী প্রোজেক) প্রোজেক অসিনা লমদম অসিদা তুরিজমদা ইনোৎ অমা পীগনি। লুপা কোতি ৫৯০গী প্রোজেক অমগী মখাদা শেমগৎপা কিলোমিতর ৩০ শাংবা তাম্বরাম-চেঙ্গালপাত্তু মরক্তা লৈবা অহুমশুবা রেলৱে অসিনা সবঅর্বান্দা অহেনবা ত্রেন চেনবদা মতেং পাংগনি অমসুং মীয়ামদা অহেনবা খুদোংচাবা কয়া ফংহনবা ঙমগনি।
মথংশিৎনা লুপা কোতি ৮৫০ অমসুং লুপা কোতি ৯১০ রোম চঙনা পায়খৎখিবা ই.তি.বি.পি.এন.এম.তি নেচরেল গ্যাস পাইপলাইনগী কিলোমিতর ১১৫ শাংবা ইন্নোর-চেঙ্গালপাত্তু সেক্সন অমসুং কিলোমিতর ২৭১ শাংবা তিরুভাল্লুর-বেঙ্গালুরু সেক্সন অসিনা তামিল নাদু, কর্নাতকা অমসুং অন্ধ্র প্রদেসকী মীয়াম অমসুং উদোগশিংদা নেচরেল গ্যাস ফংহল্লগনি।
থৌরম অদুদা প্রধান মন্ত্রী অৱাজ য়োজনা-সহরগী মখাদা লাইত হাওস প্রোজেক-চেন্নাইগী শরুক অমা ওইনা লুপা কোতি ১১৬ চংনা শাবা য়ুম ১১৫২ শঙ্গাগনি।
প্রধান মন্ত্রীনা লুপা কোতি ২৮,৫০০ হেনবগী প্রোজেক ৬কী উরেপ-উয়ুংশু তমগনি।
লুপা কোতি ১৪,৮৭০ চংনা কিলোমিতর ২৬২ শাংবা বেঙ্গালুরু-চেন্নাই এক্সপ্রেসৱে শেমগৎলগনি। লম্বী অসিনা কর্নাতকা, অন্ধ্র প্রদেস অমসুং তামিল নাদু রাজ্যশিং ফাউদুনা চৎকনি অমসুং বেঙ্গালুরু অমসুং চেন্নাইগী মরক্তা চৎথোক-চৎশিন্দা চংবা মতম পুং ২-৩দা হন্থরগনি। চাউরাক্না কিলোমিতর ২১ রোম শাংবা চেন্নাই হিথাংফমদগী মদুরাভোয়াল ফাওবা য়ৌবা লেন ৪গী দবল দেক্কর ইলাবেতেদ রোদ লুপা কোতি ৫৮৫০ হেন্না চংনা শারগনি। লম্বী অসিনা মতম চুপ্পা চেন্নাই হিথাংফমদা পোৎ-চৈ পুবা গারিশিং চংলকপদা য়াহনগনি। লুপা কোতি ৩৮৭০ অমসুং লুপা কোতি ৭২০ চংনা শাগদবা এন.ঐচ-৮৪৪গী নিরালুরুদগী ধর্মাপুরি ফাওবগী কিলোমিতর ৯৪ শাংবা লেন ৪গী লম্বী অমসুং এন.ঐচ-২২৭গী মিনসুরুতিদগী চিদম্বরম ফাওবগী কিলোমিতর ৩১ শাংবা লম্বী পেপ সোলজরগা লোয়্ন্না লেন ২ গী লম্বী শেমগৎকদবা অসিনা লমদম অসিদা চৎথোক-চৎশিন্দা নুংঙাইহল্লগনি।
থৌরম অদুদা রেলৱেজ স্তেসন মঙা হায়বদি চেন্নাই ইগমোর, রামেশ্বরম, মদুরাই, কাতপরি অমসুং কন্নিয়াকুমারি অমুক হন্না শেমগৎনবা উরেপ-উয়ুং তমগনি। প্রোজেক অসি লুপা কোতি ১৮০০ হেন্না পায়খৎকদবনি অমসুং মসিনা পেসেঞ্জরশিংদা মতমগা চুনবা অনৌবা খুদোংচাবা কয়া ফংহনবা ঙম্লগনি।
প্রধান মন্ত্রীনা চেন্নাইদা লুপা কোতি ১৪০০ হেনবগী মল্তি মোদাল লোজিস্তিক পার্ক অমা উরেপ-উয়ুং তমগনি। মসিনা ইন্তরমোদাল ফ্রেদশিং পুথোক-পুশিন্দা খুদোংচাবা কয়া ফংহনগনি।
হায়দ্রবাত্তা প্রধান মন্ত্রী
ইন্দিয়ান স্কুল ওফ বিজিনেস(আই এস বি) হায়দ্রবাদনা চহি ২০ মপুংফারকপগী থৌরমদা প্রধান মন্ত্রী শরুক য়াগনি অমসুং ২০২২গী পোস্ত গ্রেজুএদ প্রোগ্রাম(পি.জি.পি) ক্লাসকী গ্রেজুএসন থৌরমদা ৱা ঙাংগনি। আই.এস.বি অসি ২০০১গী দিশেম্বর ২দা হান্নগী প্রধান মন্ত্রী শ্রী অতল বিহারি বাজপাইনা শঙ্গারম্বনি। লৈবাক অসিদা খ্বাইদগী ফবা বিজিনেস স্কুলশিংগী মনুংদা অমনি হায়না লৌনরিবা আই.এস.বিনা ত্রেনিং পীনবা অমসুং কেপাসিতি শেমগৎনবা সরকারগী মিনিস্ত্রি কয়া অমসুং দিপার্তমেন্তশিংগা পুন্না থবক তৌমিন্নরি।
