ভারতকী প্রধানমন্ত্রী

ইকায়খুম্নরবা ভারতকী চীফ জস্তিস শ্রী এন.ভি. রমন্না জী, জস্তীস শ্রী য়ু.য়ু. ললিত জী, লৈবাকসিগী লো মন্ত্রী শ্রী কিরন রিজিজু জী, রাজ্য মন্ত্রী প্রোফেসর এস.পি. সিংহ বঘেল জী, স্তেতশিংগী ইকায়খুম্নরবা মুখ্য মন্ত্রী পুম্নমক, য়ু.তি.শিংগী লেফ্তনেন্ত গভর্নরশিং, সুপ্রিম কোর্ত ওফ ইন্দিয়াগী ইকায়খুম্নরবা জজশিং, হায় কোর্তকী চীফ জস্তিসশিং, চীংলেম্লবা মীথুংশিং, মফমসিদা তিনবিরিবা মীথুং পুম্নমক, ইচে ইচল, ইচিল ইনাও পুম্নমক

স্তেতশিংগী মুখ্য মন্ত্রীশিং অমসুং হায়কোর্তকী চীফ জস্তিসশিংগী অপুনবা মীফম অসি ঐখোয়গী সংবিধানগী ফজরবা শক্তম উৎলিবা মশক অমনি‍। অসিগুম্বা তাঞ্জা অসিদা ঐনা অদোম ময়ামগী মরক্তা মীৎকুপ খরা য়াওবা ফংজবসিদা ঐ নুংঙাই‍। ঐখোয়গী লৈবাকসিদা নাকল অমদা জিদিসিয়রীনা সংবিধানবু ঙাক্তুনা থম্লি অদুগা লেজিস্লেচরনা মীয়াম্না নীংবা থুংহন্নবা থবক থৌরমশিং পায়খৎলি‍। সংবিধানগী মশা অনিগী অপুনবা অসিনা হায়রিবা খল অসিবু কায়হন্দনা লৈবাকসিগী ৱায়েল পথাপকী লম্বী পরিং শেমগনি হায়না ঐনা থাজৈ‍। ঐনা ময়াম পুম্নমকপু ঙসিগী থৌরমসিগীদমক য়াইফ-পাউজেল পীজরি‍।

মরূপশিং,

মুখ্য মন্ত্রীশিং অমসুং চীফ জস্তিসশিংগী অপুনবা মীফম অসি মমাঙদগী হৌনা পাঙথোক্তুনা লাক্লি‍। অমদি মসিদগী লৈবাক্কীদমক্তা করিগুম্বা খরা অদুমক থোরকই‍। অদুবু হন্দক্কী থৌরম অসিদি মশানা অ্তৈদগী হেন্না মরুওইবা অমা ওইরি‍। মীফম অসি লৈবাকসিনা নীংতমবগী অমৃৎ মহোৎসব পাঙথোক্লিঙৈ মতমদা পাঙথোকপনি‍। নীংতমবগী চহি ৭৫সিদা জুদিসিয়রী অমসুং একজেক্যুতিব অনিগী থৌদাংশিং লেপ্পা লৈতনা পাঙথোক্তুনা লাক্লি‍। মথৌ তারকপা খুদিং লৈবাকসিদা মায়কৈ তাক্নবগীদমক মরী অসিবু মতমগী মতুং ইন্না অহোংবা পুরক্তুনা লাক্লি‍। ঙসি নীংতমবগী অমৃৎ মহোৎসব অসিদা লৈবাকসিনা অনৌবা খোঙফম লেপ্পা মতমদা, অনৌবা মঙলান মঙবা মতমদা ঐখোয়না তুংলমচৎকী মায়কৈদা য়েংবা মথৌ তাই‍। ২০৪৭দা লৈবাকসিনা নীংতমবগী চহি ১০০ মপুং ফারকপদা ঐখোয়না লৈবাকসিদা করমবা ৱায়েল পথাপ লৈহনবা পামবগে, ২০৪৭গী ভারতকী মথৌ তাবশিং মপুং ফানা পীবা ঙম্নবা মওংদা ঐখোয়না কমদৌনা ঐখোয়গী ৱায়েল পথাপ্পু মপাঙ্গল কলহনগদগে হায়বনচিংবা ৱাহংশিংদা ঙসি ঐখোয়না মীৎয়েঙ চঙফম থোকই‍। অমৃৎকালগী ৱায়েল পথাপ অসি পুম্নমক্না ফংবা য়াবা, থুনা ফংবা য়াবা অমদি পুম্নমক্কী ৱায়েল পথাপ ওইহন্নবা ঐখোয়গী মীৎয়েঙ থমবা তাই‍।

মরূপশিং,

লৈবাকসিদা অচুমবা ৱায়েল ফংবদা থেংথরিবসি হন্থহন্নবা লৈঙাক্কী থাক্তা তৌবা য়াবা খুদিং তৌরি‍। ঐখোয়না ৱায়েল পথাপ মপাঙ্গল কলহন্নবা হোৎনরি, ৱায়েল পথাপকী মচাক মথুম ফগৎহন্নবা হোৎনরি‍। কেস মেনেজমেন্তকীদমক আই.সি.তি. শীজিন্নবসু হৌরে‍। সবওর্দিনেৎ কোর্ত অমসুং দিস্ত্রিক্ত কোর্ত্তগী হৌরগা হায় কোর্ত ফাওবদা হাঙদুনা লৈরিবা ফমশিং মেনশিন্নবা থৌরাং পায়খৎলি‍। লোয়ননা ৱায়েল পথাপকী মচাক মথুম কনখৎহন্নবগীদমক্তসু লৈবাকসিদা মপুং ফানা হোৎনরি‍। মসিদা স্তেতশিংগীসু অচৌবা থৌদাং লৈ‍।

মরূপশিং,

ঙসি মালেম পুমবদা মীয়ামগী হক্কীদমক, মখোয়বু মপাঙ্গল কলহন্নবগীদমক তেক্নোলোজী অসি মরুওইবা খুৎলায় অমা ওইরে‍। ঐখোয়গী ৱায়েল পথাপ্তসু, তেক্নোলোজীগী ওইথোকপা য়াবশিং অদোম পুম্নমক্না খঙবিরম্লগনি‍। ঐখোয়গী ইকায়খুম্নরবা জজশিং মরক মরক্তা ৱাফম অসিবু মাঙদা পুখত্তুনা লাক্লি‍। ভারত লৈঙাক্নসু ৱায়েল পথাপ্তা তেক্নোলোজী শীজিন্নববু দিজিতেল ইন্দিয়া মিসনগী মরুওইবা শরুক অমা ওইনা লৌদুনা লাক্লি‍। খুদম ওইনা ই-কোর্ত প্রোজেক্ত ঙসি মিসন মোদতা থবক ওইনা পায়খৎওই‍। সুপ্রিম কোর্ত ই-কম্মিতীগী মীৎয়েঙ মখাদা ৱায়েল পথাপ্তা তেক্নোলোজী পুশিল্লকপা অমদি দিজিতাইজেসনকী থবক খোঙজেল য়াঙনা চঙশিল্লি‍। ঐনা মফমসিদা লেঙশিনবিরিবা মুখ্য মন্ত্রী অমসুং হায় কোর্তকী চীফ জস্তিস পুম্নমক্কী মফমদা থমজনিংবা ৱাফম অমদি থৌরাং অসিদা মরুওইবা মীৎয়েঙ থমদুনা মাঙদা চঙশিনবিয়ু হায়বসিনি‍। দিজিতেল ইন্দিয়া অমসুং জিদিসিয়রী পুনশিল্লকপা অসিনা ঙসি মীচম মীয়ামকী অনীংবা অপামবা ওইরে‍। অদোমসু য়েংবিয়ু, ঙসিদগী চহি খরগী মমাঙদা দিজিতেল ত্রাঞ্জেক্সন ঐখোয়গী লৈবাকসিদা ওইথোক্লরোইদবা ৱাফম অমা ওইনা লৌনরম্মি‍। মসিবু ঐখোয়গী লৈবাকসিদা কমদৌনা ওইথোক্কদৌরিবনো হায়না মীয়াম্না খন্নরম্মি, মীয়াম্না চিংনরম্মি‍। অদুগা মসিদি শুপ্নতগী ময়োল্লমশিংদতা য়াগনি, মদুদগী হেন্দোরকপা ঙম্লোই হায়নসু খন্নরম্মি‍। অদুবু ঙসিদি লৈরক খুল্লক শিনবা থুংনা দিজিতেল ত্রাঞ্জেক্সন পুম্নমক্না শীজিন্নবা থৌওং অমা ওইরে‍। হৌখিবা চহিদা মালেম পুমবদা তৌখিবা দিজিতেল ত্রাঞ্জেক্সনগী চাদা ৪০ ভারত্তা তৌখি‍। লৈঙাক্কী স্কিম কয়াগীদমক মমাঙদা মীয়াম্না থা কয়া ওফিসশিংদা চত্তুনা লৈরমবদু হৌজিক্তি মোবাইলদা ফংলে‍। অসিগুম্বা খুদোংচাবা কয়া ওনলাইন্দা ফংলবা মীয়াম্না ৱায়েল পথাপকী ৱাফম খরসু হায়রিবা ফীভমসিদা ফংনিংবগী অপামবা লৈগনি‍।

মরূপশিং,

ঙসি ঐখোয়না তেক্নোলোজী অমসুং তুংগী ওইবা থৌওংগী মতাঙদা ৱারী শানবদা মসিগী মরুওইবা মশক অমা হায়রগদি তেক-ফ্রেন্দলী হ্যুমেন রিসোর্স অসিনি‍। তেক্নোলোজী ঙসিগী নহাশিংগী থাদোক্নবা য়াদ্রবা শরুক অমনি‍। নহাশিংগী হৈ শিংবা অসিবু মখোয়গী শিন্ফমগী থৌনা কমদৌনা ওন্থোক্কদগে হায়বসি ঐখোয়না য়েংশিনবা মথৌ তাই‍। হৌজিক্তি লৈবাক কয়াদা লো য়ুনিভর্সিতীশিংদা ব্লোক চেন, ইলেক্ত্রোনিক দিসকভরী, সাইবর সিক্যুরিতী, রোবোতিক্স, আর্তিফিসিএল ইন্তলিজেন্স অমসুং বাইও-ইথিক্সনচিংবা হীরমশিং তাকপি তম্বিরি‍। ঐখোয়গী লৈবাকসিদসু লিগেল এজুকেসন অসি হায়রিবা মালেমগী থাক অসিগা চুনবা ওইহনবা হায়বসি ঐখোয় পুম্নমক্কী থৌদাং ওইগদবনি‍। মসিগীদমক ঐখোয় পুন্না হোৎনমিন্নবা তাই‍।

মরূপশিং,

ঐখোয়গী সাস্ত্রশিংদা ‘ন্যায়মুলং সুরাজ্যং স্থাত’ হায়না হায়বিরম্মি‍। মসিগী ৱাহন্থোক্তি লৈবাক খুদিংদা ৱায়েল পথাপ্না লৈঙাক্লোনগী য়ুম্ফম ওই হায়বসিনি‍। মরম অসিনা অচুমবা ৱায়েল হায়বসি মীয়ামগা নক্না লৈহনগদবনি, মীয়ামগী ৱাহৈ ওইহনগদবনি‍। ৱায়েল পথাপকী মতাঙদা মীচম মীয়াম্না খঙদ্রিমখৈ মখোয়গী মফমদদি ৱায়েল অমসুং লৈঙাক্কী য়াথংগী মরক্তা থোইদোক্না খেন্নবা লৈরোইদৌরিবনি‍। হন্দক ঐনা লৈঙাক্কী হীরম অমদা ৱাখল থাদদুনা লৈ‍। আইন শেমবা মতমদা লিগেল তর্মিনোলোজীদা আইন অমা লৈবা অদুগা লোয়ননা আইনগী মশক অমগসু থমবা লৈবাক কয়া লৈ‍। মীচম মীয়ামগী লোন্দাদা লৈরবদি আইনগী ৱাফমশিং খঙনবগীদমক মীচম মীয়াম্না ৱায়েলশঙগী থোঙজিন্দা লেপ্লনবগী মথৌ তাদে‍। লাক্কদৌরিবা মতমসিদা ঐখোয়গী লৈবাকসিদসু আইনগী মপুং ফাবা লিগেল তর্মিনোলোজী অমা লৈহন্নবা, লোয়ননা মদুবু মীচম মীয়াম্না লায়না খঙবা ঙমহন্নবা থৌরাং পায়খৎলি‍। হায়রিবা অনিমক্তু এসেমব্লী অমসুং পার্লিয়ামেন্ত অনিমক্তা পাস তৌদুনা তুংদা মীচম মীয়াম্নসু মখোয়গী ৱারোল ইরায় লায়না ফোঙদোকচবা ঙম্নবা থৌরাংনি‍। মালেমগী মফম কয়াদা হায়রিবা চৎনবীসি লৈ‍। হৌজিক ঐনা হীরমসিগী মতাঙদা কাঙবু অমা শেম্লে অমদি মখোয়না মসিগী মতাঙদা থিজিল্লি‍।

মরূপশিং,

ঙসিসু লৈবাকসিদা হায় কোর্ত অমসুং সুপ্রিম কোর্তকী ৱায়েল পুম্নমক ইংলিস্তা তৌরি অমদি সি.জে.আই.না ৱাফম অসি পুখৎপসি ঐদি নুংঙাই, হয়েংদি পাউজেশিংদা ফোঙলক্লবদি নুংঙাইবা পাউ অমা ফংলগনি‍। অদুবু মদুগীদমক্তা মতম শাংনা ঙাইখিবা তারি‍।

মরূপশিং,

মীওই কয়া অমদি ৱায়েল পথাপকী ৱাফমশিং অমসুং ৱারেপশিং খঙবদা য়াম্না ৱানা থোকই‍। মসিগী ফীভমসিদা লায়থোকহন্নবা অমদি মীচম মীয়াম্না লায়না লৌশিনবা ঙম্নবা থবক পায়খৎপা মথৌ তাই‍। ঐখোয়না ৱায়েলশঙশিংদা লম-লমদুগী লোল য়োকখৎপা মথৌ তাই‍। মসিনা লৈবাকসিগী মীচম মীয়াম্না ৱায়েল পথাপ্তা থাজবা হেনগৎলক্কনি, মরী অমা লৈবগী ইথিল ফাওহনগনি‍। তেক্নিকেল এজুকেসন অমসুং মেদিকেল এজুকেসনসু ইমালোলদা করিগীদমক্তা পীরোইদৌরিবনো হায়বা ৱাফমসিদা ঐখোয় চঙশিল্লি‍। ঐখোয়গী অঙাঙশিংনা অতোপ্পা লৈবাক্তা মহৈ মশিং তমবা চৎপা মতমদা লমদুগী লোল হান্না তম্মি অদুগা মেদিকেল কলেজতা মিং চল্লি‍। ঐখোয়সু ঐখোয়গী লৈবাক্তা তৌবা য়াই অমদি স্তেত কয়ানা মখোয়গী মমালোলদা তেক্নিকেল এজুকেসন অমসুং মেদিকেল এজুকেসন পীনবগীদমক থৌরাং খরা পায়খৎলি হায়বা খঙবদা নুংঙাইবা ফাওই‍। অসুম্না তৌবনা খুঙ্গঙগী লায়রবা ইমুংগী অঙাঙ অমনা লোলনা মরম ওইরগা থেংনগদবা অপনবশিং লৈররোই‍। মসিমকসু অচুম্বা ৱায়েল অমনি‍। মসি খুন্নাইগী ৱায়েলনি‍। খুন্নাইগী ওইবা ৱায়েলগীদমক জুদিসিয়রীগী মফমদা অমুক চৎলুবগী মথৌ তাদে‍। খুন্নাইগী ৱায়েলগীদমক করিগুম্বা মতমদা লোলনা অচৌবা মরম অমা ওইরকপসু য়াই‍।

মরূপশিং,

অরুবা ৱাফম অমনা মীচম মীয়ামগী মফমদা লৈরিবা আইনগী লাং ময়াম অসিনি‍। ২০১৫দা ঐখোয়না মথৌ তাদ্রবা চৎন-কাঙলোন ১৮০০ হেন্না মুত্থৎখ্রে‍। মসিগী মনুংদা কেন্দ্রগী চৎন-কাঙলোন ১৪৫০রোম য়াওই‍। অদুবু স্তেতশিংগী মায়কৈদগী শুপ্নতগী চৎন-কাঙলোন ৭৫খক্তমক মুত্থৎখি‍। ঙসি মফমসিদা লেঙসিনবিরিবা মুখ্যমন্ত্রীশিংগী মফমদা হায়জনিংবদি অদোমগী স্তেতশিংগী মীয়ামগী হক্কীদমক, মখোয়না হিংবদা নুংঙাইনবগীদমক অদোমগী মফমদা লৈরিবা চৎন-কাঙলোনগী চাউরবা লাং, মীয়াম থুদুনা লৈরিবা লাং অদুবু মুত্থৎখিনবা মায়কৈদা থবক লৌখৎপিয়ু হায়বসিনি‍। মদুগীদমক্তা মীয়াম্না য়াইফরোল পীরক্কনি‍।

মরূপশিং,

চৎন-কাঙলোন শেমদোকপা হায়বসি শুপ্নতগী খুজিল থৌরাংগী ৱাফম নত্তে‍। লৈবাকসিদা পন্দুনা লৈরিবা কেস করোর কয়াগীদমক্তা য়েংলগা খুজিল থৌরাংদগী হৌরগা তেক্নোলোজী ফাওবদা তৌবা য়াবা থৌরাং কয়া লৈবাকসিদা তৌরি অমদি ঐখোয়না মসিগী মতাঙদা হঞ্জিন হঞ্জিন নৈনখ্রে‍। মীফম অসিদসু তিনবিরিবা এক্সপর্ত ময়াম্না হীরম অসিদা মচা খায়না খন্ন-নৈনগনি হায়বসি ঐগী চপ চাবা থাজবনি‍। অমদি ঐ মতম শাংনা মীফম অসিদা ফমদুনা লৈরি‍। জজশিংনা অসিগুম্বা মীফমশিংদা শরুক য়াবগী খুদোংচাবা ফংবদগী হেন্না ঐনা ফংলমগনি‍। মরমদি ঐ চহি কয়া মুখ্যমন্ত্রী ওইনা মীফম অসিদা শরুক য়াদুনা লাকখি‍। হৌজিক মফমসিদা ফম্নবগী তাঞ্জা ফংবসিদা লাক্লিবনি‍। ৱাহৈ অমরোমদা মীফম অসিগী মতাঙদদি ঐ সিনিয়র অমনি হায়রবসু য়ারবনি‍।

মরূপশিং,

হীরম অসিগী মতাঙদা ঐনা ৱা ঙাঙলিঙৈদা হায়রিবা থবক থৌরমশিংসিদা মীওইবা খুন্নাইগা মরী লৈনৈ হায়বা ৱাখল্লোন লাকখি‍। মীওইবগী ইথিলবু ঐখোয়না কেন্দ্রদসু লৈহনবা মথৌ তাই‍। ঙসি লৈবাকসিদা ৱায়েল চত্থরিবা মীফা লাখ অহুম মখায়গী ময়াদা কৈশুমশঙদা লৈরি‍। মখোয়গী মনুংদা অয়ামবদি লায়রবা ইমুং অমসুং মিদল ক্লাস ইমুংদগীনি‍। দিস্ত্রিক্ত খুদিংদা বেলদা থাদোকখিবা য়াবা কেসশিং য়েংশিন্নবা দিস্ত্রিক্ত জজকী মখাদা কম্মিতী অমমম লৈ‍। ঐনা মুখ্যমন্ত্রী অমসুং হায়কোর্তকী জস্তিস পুম্নমক্কী মফমদা হায়জনিংবদি য়ারগদি মীওইবা খুন্নাইগী কান্নগদবা য়েংলগা থবক লৌখৎপিয়ু‍। মতৌ অসুম্না ৱায়েলশঙদা অমদি মরুওইনা মফম মফমদুগী থাক্তা লৈরিবা ৱায়েৎশিংগী ৱারোইশিন পুরকপদা শন্দাইনবসু য়াম্না মরুওইবা পাম্বৈ অমনি‍। ঐখোয়গী খুন্নাইদা শন্দাইনদুনা ৱায়েৎ কয়া লোইশিন্নবগী চৎনবী চহি লিশিং কয়াগী মমাঙদগী লৈরম্মি‍। নাকল অনিগী মরক্তা য়াশিন্নবা অমদি চৎনবীগী মতুং ইন্না থৌদাং লৌবসু ৱায়েল পথাপকী অতোপ্পা শক্লোন অমনি‍। ঐখোয়না অসুম য়েংশিল্লুরবদি খুন্নাইসিদা অদুগুম্বা মওং অদু হৌজিকসু অদুমক লৈবা উগনি‍। ঐখোয়না অদুগুম্বা চৎনবীদু মাঙহনখিদ্রি‍। ঐখোয়না অদুগুম্বা মীয়ামগী লৈঙাক্কী ফীভম অদুবু মপাঙ্গল কলহনবা মথৌ তাই অমদি হৌজিক শিব হাহবনা ললীত জীবু থাগৎখি, ঐসু থাগৎচনিংই‍। মহাক্না লৈবাক শিনবা থুংনা চৎলুরে, স্তেত খুদিংদা য়ৌরুরে অমদি খ্বাইদগী হেন্না মশক থোকপদি কোরোনাগী মতমদা চৎলুবনি‍।

মরূপশিং,

ৱাথোকশিং মতম চঙদনা ৱারোইশিন পুরক্লবদি ৱায়েলশঙগী পোৎলুমসু হন্থরে অমদি খুন্নাইগী মরীসু কায়হন্দনা লৈরে‍। ঐখোয়না অসিগুম্বা ৱাখলগা লোয়ননা মেদিএসন বিলবু অমব্রেলা লেজিসলেসনগী মওংদা পুথোকখিবনি‍। ঐখোয়গী ইনাক খুল্লবা লিগেলগী হৈশিংবা অমসুং মেদিএসনগী পাম্বৈ অনিসি পুল্লগা ঐখোয় হীরম অসিদা মালেমগী লুচিংবা ওইবা ঙমগনি‍। ঐখোয়না মালেম পুমবগী মমাঙদা মোদেল অমা উৎপা ঙমগনি‍। থাইনগী মীওইবগী মমল লৈনা লৈবগী চৎনবী অমসুং অনৌবা মতমগী পাম্বৈ অনিসি পুল্লগা পায়খৎপা য়াবা হীরম খুদিংদা ময়াম পুম্নমক্না মীফম অসিদা মচা খায়না খন্নদুনা তুংগী মীরোলদসু কান্নগদবা অমৃৎ অমা পুথোকপিরক্কনি হায়না ঐনা থাজৈ‍।  মীফম অসিদা থোরকপা অনৌবা ৱাখল্লোনশিং, অনৌবা পাম্বৈশিংনা অনৌবা ভারতকী মঙলানবু মঙফাওনহনগদৌরিবনি‍। হায়রিবা থাজবসিগা লোয়ননা ঐনা অমুক্কা হন্না ময়ামগা উনবা ফংজবগী তৌবিমল খঙবা উৎচরি অমদি ঐনা লৈঙাক্কী মায়কৈদগী অচুমবা ৱায়েল ফংহন্নবগীদমক স্তেত অমসুং কেন্দ্র লৈঙাক্না তৌফম থোকপা খুদিং অমত্তা  চিত্থদনা তৌগনি হায়না থাজবা পীজরি‍। মরমদি ঐখোয় পুন্না হোৎনমিন্নরগা লৈবাক্কী মীয়াম করোর কয়াগী থাজবা অমসুং মঙলানশিং মঙফাওনহন্নবনি‍‍। ২০৪৭দা  লৈবাকসিনা নীংতমবগী ১০০শুবা চহিগী থৌরম পাঙথোকপা মতমদা ঐখোয়না ৱায়েল পথাপকী লমদসু ইখৌ পোঙনা, চাউথোকপগা লোয়ননা অমদি হরাওবগা লোয়ননা মাঙদা চঙশিনবা ঙমবা ওইরসনু হায়না ঐনা য়াইফ পাউজেল পীজরি, হন্না হন্না থাগৎচরি!

********