ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা য়ু.এন. জেনরেল এসেমব্লীগী সাইদলাইনদা য়ু.এন. সেক্রেতরী জেনরেলনা শিন্দুনা পাংথোকপা ক্লাইমেৎ এক্সন মীফম হৌদোকপগী থৌরমদা ৱা ঙাংখ্রে।

থৌরম অদুদা ৱা ঙাংলদুনা প্রধান মন্ত্রীনা হায়খি মদুদি মমাং চহিদা চেম্পিয়ন ওফ আর্থ এৱার্দ ফংলবা মতুংদা য়ুনাইতেদ নেসন্সতা ৱা ঙাংবা অসি মসিনা অহানবনি। ক্লাইমেৎ চেঞ্জগুম্বা য়াম্না মরুওইবা চেলেঞ্জ অমা লাকশিন্নবা ঐখোয়না হৌজিক ঐখোয়না লৌখৎলিবা খোংথা অসি মতিক চাদে হায়না মহাক্না হায়খি। ৱাখল্লোনদা অহোংবা পুরক্নবা মালেমগী মীয়াম্না খোংজং অমা চংশিন্নবা মহাক্না ৱাফম থমখি।

মহৌশাবু ইকায়খুম্নবা, মহৌশাগী লন-থুমশিং লিক্না শীজিন্নবা, দরকার ওইবা হন্থহনবা অমসুং ঐখোয়না ঙমগদবা থাক্তা হিংনবা হোৎনবা পুম্নমক অসি ঐখোয়গী চৎন-লোনচৎশিং অমসুং হৌজিক পাংথোক্লিবা থবকশিংনি হায়না মহাক্না ফোংদোকখি। মীহৌ চাওবা নত্তে, দরকার ওইবসি ঐখোয়বু লমজিংলিবা ৱাখল্লোন্নি হায়না মহাক্না মখা তাখি। মরম অদুনা ঙসিদি ভারতনা ৱাফম অসিগী মতাংদা মরুওইনা খন্নবদা নত্তনা, থবক ওইনা পাংথোকপা য়াগদবা থৌরাং অমসুং লম্বী অমা উৎলে। ৱা শংবাই অমা ঙাংবদগী থবক মেরুক অমা পাংথোকপনা হেন্না মমল য়াম্মি হায়বা ঐখোয়না থাজৈ।
নন ফোসিল ফুয়েল শীজিন্নবা হেনগৎলগনি, অমসুং ২০২২ ফাওবদা ভারতকী রিন্যুয়েবল ইনর্জী কেপাসিতী গিগাৱাত ১৭৫দা হেঙ্গৎলগনি অমসুং তুংদা গিগাৱাত ৪৫০ ফাওবা পুথোক্নবা থৌরাং তৌরি হায়না মহাক্না ফোংদোকখি। । ই-মোবিলিতীগী খুত্থাংদা ত্রান্সপোর্ত সেক্তর মৈখু চেনহন্দনবা অমসুং পেত্রোল অমসুং দিজলদা বাইওফুয়েল য়ানবগী চাং হেনগৎহন্নবা ভারতনা থৌরাং তৌরি হায়না মহাক্না ফোংদোকখি। ভারত্তা ইমুং মিলিয়ন ১৫০দা চাক থোংনবা গ্যাস ফংহল্লে হায়না মহাক্না মখা তাখি।

শ্রী মোদীনা হায়খি মদুদি ঈশিং য়োকশিন্নবা, নোংগী ঈশিং য়োকশিন্নবা অমসুং ঈশিং ফংফমশিং শেমগৎনবা ঐখোয়না জল জীবন মিসন হৌদোক্লে অমসুং মসিদা লাক্লিবা চহি খরা অসিদা ভারতনা বিলিয়ন দোল্লর ৫০ রোম চাদিং তৌগদৌরি।

মহাক্না হায়খি মদুদি মালেমগী থাক্তা, ঐখোয়গী ইন্তর্নেস্নেল সোলর এল্লাইন্স কেম্পেন অসিদা লৈবাক ৮০ শরুক য়ারে। ভারত অমসুং স্বিদেন্না অতোপ্পা লৈবাকশিংগা লোয়ননা ইন্দস্ত্রী ত্রান্সিসন ত্রেক্কী মখাদা লিদরসিপ গ্রুপ শেমগৎলে। মসিগী থৌরাং অসিনা অনৌবা তেক্নোলোজী পুথোকপগী মতাংদা সরকারশিং অমসুং লনাই কম্পেনীশিংদা মতেং পীননবা ফিদা অমা পীগনি। মসি ইন্দস্ত্রীগী কার্বোন য়ামদনা পুথোক্নবা লম্বীশিং শেমগৎপদা মতেং পাংগনি।

মহাক্না হায়খি মদুদি ঐখোয়গী ইনফ্রাস্ত্রকচরশিং মহৌশাগী অমাং-অতাশিংদগী ঙাকথোক্নবা, ভারতনা অমাং-অতাশিংদগী ঙাকথোকপা ঙম্বা ইনফ্রাস্ত্রকচরশিং শেমগৎনবা চুংশিন্নবা অমা হৌদোক্লে। মসিগী চুংশিন্নবা অসিদা শরুক য়ানবা ঐনা মেম্বর লৈবাকশিংদা খঙহল্লি। মহাক্না মখা তাখি মদুদি অগস্ত ১৫দা পাংথোকখিবা চহি অসিগী ভারতকী নীংতম্বা নুমিৎ থৌরমদা, সিঙ্গল য়ুজ প্লাস্তিক শীজিন্নবা লেপ্নবা মীয়ামগী খোঙজং অমা হৌনবা ঐখোয়না তকশিনখি। ৱা ঙাংবগী মতম অদু লোইরে; হৌজিক মালেম অসিনা থবক পাংথোকপা মথৌ তারে হায়না মহাক্না অকনবা ৱাফম থমখি।