ভারতকী প্রধানমন্ত্রী

ইকায়খুম্নরবা প্রসিদেন্ত য়োৱেরী মুসেভেনী ,

ইকায়খুম্নরবা ভাইস– প্রসিদেন্ত

ইকায়খুম্নবদা মতিক চারবা রেবেকা কাদাগা, উগানদা পর্লিয়ামেন্তগী স্পিকর ,

ইকায়খুম্নরবা মিনিস্তরশিং,

ইকায়খুম্নরবা পর্লিয়ামেন্তগী মেম্বরশিং,

নমাস্কার ।

বালামুসিজা ।

মসিগী চিংলেম্লবা হাউস অসিদা ৱা ঙাংনবা ঐঙোন্দা চেবাও পীরকপা অসি ঐহাক তশেংনা অপেনবা পোকচৈ। অতৈ পর্লিয়ামেন্তশিংদসু মসিগা মান্নবা খুদোংচাবা ঐ ফংখ্রে। মসিগী ইকায়খুম্নবা অসি ভারতকী প্রধান মন্ত্রী অমদা অহানবা ওইনা ফংবনি। মসি ভারতকী মীওই বিলিয়ন ১.২৫দা ইকায়খুম্নবা উৎপনি। মরূপ-মপাং ওইবগী মখোয়গী য়াইফ-পাউজেলশিং হাউস অসিগী অমসুং উগান্দাগী মীয়ামগী ঐনা পুদুনা লাক্লি। মেদাম স্পিকর মফম অসিদা শরুক য়াবা অসিদা, নুপীনা স্পিকর ওইরিবা ঐগী লোক সভা ঐঙোন্দা নীংশিংহল্লি। নহা ওইরিবা পর্লিয়ামেন্তগী মেম্বর কয়াসু ঐনা উরি। মসি গনতন্ত্রগী অফবা পাউ অমনি। উগান্দাদা ঐনা লাকপা মতম পুম্নমক্তা, ‘অফ্রিকাগী মুক্তা’ অসিনা ঐ শুমহৎখি। মসি ফজরবা, লন-থুম মরাং কাইনা লৈবা অমসুং ইনাক খুল্লবা চৎনবী লৈবা লৈবাক অমনি। লৈবাক অসিগী তুরেলশিং অমসুং পাৎশিংনা চাউরবা লমদম অসিগী সিবিলাইজেসন শেমগৎলকখিবনি। ঐখোয় মফম অসিদা পুলহল্লিবা পুৱারী অসিগী মরমদা ঐনা খল্লি, খ্বাইগী চাউবা গনতন্ত্র চৎপা লৈবাক অমগী প্রধান মন্ত্রীনা অতোপ্পা মনীং তম্বা লৈবাক অমগী পর্লিয়ামেন্তগী মেম্বরশিংদা ৱা ঙাংলি। মমাংঙৈদগী লৈরক্লবা ঐখোয়গী সমুদ্রগী লম্বীশিং, তমথিরবা কোলোনিয়েল মতমশিং, নীংতম্নবগী ইহৌশিং, তঙ্খাই তারবা মালেম অমদা নীংতম্বা ফংলবা লৈবাকশিংগী তম্বা ঙমদ্রবা তুংগী লম্বীশিং, অনৌবা খুদোংচাশিং ফংলকপা অমসুং নহা ওইরিবা ঐখোয়গী মীওইশিং। মসি ময়াম অসিনা ঐখোয় শম্নহল্লে।
মিস্তর প্রসিদেন্ত,

ভারত অমসুং উগান্দা শম্নহল্লিবা লংলাশিংগী মনুংদা ঐখোয়গী মীয়াম অসিসু অমনি। চহি ১০০ হেনবগী মমাংদা, রেলৱেগী খুৎথাংদা উগান্দাগা ভারতকী সমুদ্রা খোঙবালশিংগা শম্নখি। শিংনবা কয়াগী মরক্তা অদোম্না লৈবাক অসি চাউখৎপা অমসুং নুংঙাইবা পুরক্লে। অদোম্না নুপীশিং শক্তি পীরে অমসুং অদোমগী লৈবাক অসি পুন্না চাউখৎমিন্নবা লৈবাক অমা ওইহল্লে। অদোমগী লুচীং মখাদা ভারতগী হৌখিবা উগান্দা মচাশিং মখোয়গী ময়ুমদা হল্লকপা ফংহল্লে অমসুং মখোয়না তশেংনা নুংশিজবা লৈবাক অদু অমুক শেমগৎপদা মতেং পাংহল্লে। দিৱালী নুমিৎতা স্তেৎ হাউস হাংদোকপা থৌরমদা, অদোম্না ভারত অমসুং উগান্দাগী মরি কয়া শেমগৎখি। মখোয়গী মনুংদা, নাইল তুরেলগী হৌরকফম ওইরিবা, মহাত্মা গান্ধীগী উৎ খরা থাদখিবা শেংলবা মফম, জিঞ্জা য়াওরি। মহাক্কী হিংলিঙৈগী অমসুং লৈখিদ্রবা মতুংদা মহাক অফ্রিকাদা লৈখি অমসুং অফ্রিকান ওইখি। জিঞ্জাগী শেংলবা হৌজিক মহাত্মা গান্ধীগী মীতম অমা লৈরিবা মফম অসিদা ঐখোয়না গান্ধী হেরিতেজ সেন্তর অমা শারে। মহাত্মা গান্ধীগী চহি ১৫০ শুবা মপোক  কুমওন লাকপা অসিদা, অফ্রিকাগী নীংতম্বা পুরক্নবগী ইথিল পীখিবা অমসুং মুৎপা লৈত্রবা মহাক্কী পুন্সি অমসুং পাউজেলশিং ঐখোয়না নীংশিংনবা সেন্তর অমা লিংখৎপা অসিদগী হেনবা ইকায়খুম্নবা উৎপা অমা লৈত্রে।

ইকায়খুম্নরবশিং,

ভারতকী মশাগী নীংতম্বগী ইহৌগী ৱারী অসি অফ্রিকাগা নক্নবা মরি লৈনৈ। মসি মহাত্মা গান্ধীনা চহি ২১ অফ্রিকাদা লৈরকখিবা নৎত্রগা মহাক্না লুচীংখিবা অহানবা নন-কোওপরেসনগী খোঙজং অদুনা নত্তে। ভারতকী ওইনা, নীংতম ইহৌগী ৱাখল্লোনশিং নৎত্রগা মসিগী শান্তি ওইবা পাম্বৈশিং অসি ভারত খক্তদা নৈশিন্দুনা লৈখিদে নৎত্রগা ভারতমচাশিং খক্তগী ওইখিদে। মসি মীওইবা খুন্নাইগী নীংতম্বা, চিংলেম্বা, মান্নবা অমসুং খুদোংচাবা ফংনবা শীজিন্নখি। মসি অফ্রিকাদগী হেন্দোক্তুনা মফম কয়াদা শীজিন্নখি। ঐখোয়গী নীংতম্বা চহি ২০গী মমাংদা, ঐখোয়গী লৈবাক্কী খোঙজংগী লুচীংবশিংনা ভারতকী নীংতম ইহৌ অসি মরুওইনা অফ্রিকা য়াওনা মালেমদা চৎথখিবা লোইলম লৈঙাক্কী মায়োক্তা হৌবা ইহৌশিংগা শম্নহনখি। ভারতনা নীংতম্বা ফংলমদাই ফাওবদা, অফ্রিকাগী লৈবাক অসি ঐখোয়গী ৱাখলদগী লাপ্না লৈখিদে। অফ্রিকানা মীনাই ওইদুনা লৈরিবমখৈ, ভারতনা নীংতম্বা অসি মপুংফাদে হায়না মহাত্ম গান্ধীনা খনখি। নীংতম্লবা ভারতনা মশানা হায়দোকখিবা ৱা কাউখিদে। বানদুংদা ভারতনা অফ্রো–অসিয়ানগী ৱাফম পুথোকখি। অফ্রিকাদা জাৎ–কুচু খায়বগী ময়োক্তা ভারতনা লেপখি। হৌজিক্না জিম্বাবৱে হায়না খঙনরবা হান্নগী রোদেসিয়া, গুইনিয়া বাসাও, অঙ্গোলা অমসুং নামিবিয়াদা ভারতনা মাংজিল থাখি অমসুং থৌনা ফনা শরুক য়াখি। গান্ধীজিগী শান্তি ওইবা খোঙজংনা নেলসন মন্দেলা, দেসমোন্দ তুতু, অলবার্দ লুথুলি, জুলিয়স নিয়েরে অমসুং ৱামে ক্রুমাদা ইথিল পীখি। ভারত অমসুং অফ্রিকাগী মমাংঙৈগী লৌশিংনা মাইপাকপা অদু পুৱারীনা শাখি ওইখি। গান্ধীগী পাম্বৈশিং শীজিন্নদুনা অফ্রিকাদা অহোংবা খর পুরকপা ঙমখি। অফ্রিকাগী নীংতম্বগী ইহৌদা ভারতনা শৌগৎপগীদমক ঐখোয়গী লৈবাক্কী ললোন–ইতিক্কী থবক্তা মাংজবা ওইখি। অদুবু, মদু অফ্রিকাগী নীংতম্বগা চাংদম্নবদা করিশু লৈবা নত্তে।

ইকায়খুম্নরবশিং,

হৌখিবা চহি ৭০ অসিদা ঐখোয়গী লৈনরিবা শেল–থুম অমসুং মরূপ–মপাং ওইবগী মরি অসি অচুম্বা ৱাখল্লোন অমসুং থম্মোয়গী মরিনা হেন্না চেৎনা পুনশিল্লি। নিয়ম চুম্না অমসুং চাং মান্ননা কৈথেল অমসুং লন–থুমগী কান্নবশিং ফংমিন্ননবা ঐখোয়না তকশিল্লি। মালেমগী ললোন–ইতিক্কী য়ুমফম থোন্নবা ঐখোয়না পুন্না থেংনমিন্নরি। খা থংবদা লৈরিবা লৈবাকশিংগা শেল–থুমগী মরি কয়া শেমগৎনবা ঐখোয়না হোৎনরি। ঐখোয়গী দোক্তরশিং অমসুং ওজাশিংনা অফ্রিকাদা লাক্লিবসি শুপ্নবগী থবক তৌনবগী নত্তে, নীংতম্লবা লৈবাক অমা চাউখৎনবা শরুক য়াবা লাকপনি। ২০১৫দা দিল্লিদা পাংথোকখিবা ৩শুবা ইন্দিয়া–অফ্রিকা মীফমদা প্রসিদেন্ত মুসেভেনীনা হায়খিবা অদু ঐনা পল্লি– ঐখোয়না লোইলম লৈঙাক্কী ময়োক্তা পুন্না থেংনমিন্নখি। ঐখোয়না নুংঙাইনবা পুন্না থেংনমিন্নসি।

ঙসিদি, ভারত অমসুং অফ্রিকাগী তুংগী ফিবমশিং অসি অফবা তাঞ্জা অমদা লৈরি। অফ্রিকা অসি মাংলোমদা চংশিল্লি হায়বসি উগান্দানা খুদম্নি। লৈবাক অসিদা নুপা–নুপী থোংমান্নবা, লাইরিক হৈবা, হকশেলগী থাক, শেমগৎ–শাগৎপা অমসুং লম্বী–থোংগী ফিবম ফগৎলকপা কয়া মীয়াম্না উরি। লমদম অসিদা ললোন–ইতিক্কী থবক চাউখৎলক্লি। অনৌবা থবক কয়া উরি। ঐখোয়গা অচেৎপা মরি লৈনবা মরম্না, অফ্রিকাগী লৈবাক খুদিংমক্না চাউখৎলকপদা ভারতনা হরাওরি।

ইকায়খুম্নরবশিং,

অফ্রিকাগা মরূপ ওইবদা ভারতনা চাউথোকচবা পোকই। মহাদেস অসিদা ঐখোয়গা অফবা মরি লৈনবদা উগান্দানা মরুওইবা থৌদাং লৌরি। উগান্দাদা ক্রেদিৎ লাইন অনি পীনবা ঐনা ঙরাং লাওথোকখ্রে। অহানবদা, মৈগী লাইনশিং শেমগৎনবা য়ু এস দোল্লর মিলিয়ন ১৪১ পীরি।  অনিশুবদা, লৌউ–শিংউ অমসুং শঙ্গোমগী পোৎথোকশিংগী য়ু এস দোল্লর মিলিয়ন ৬৪ পীরি। মমাংদা পাংথোকপগুম ঐখোয়না মখা তানা উগান্দাগী মীয়ামগী অপাম্বা মতুংইন্না, লৌউ–শিংউ, হকশেল, মহৈ–মশিং, ত্রেনীং, ইনফ্রাস্ত্রকচর, ইনর্জী, ঙাকশেলগী ত্রেনীংদা মতেং পীগনি। ইন্তর্নেস্নেল সোলর  এলাইন্স য়াওনা ৱারেপ লৌরকপদা ঐনা প্রসিদেন্ত মুসেভেনী অমসুং হাউস অসি থাগৎচরি।

ইকায়খুম্নরবশিং,

উগান্দাগা লোয়ননা পাক-চাউরবা অফ্রিকা অসিদা ঐখোয়না অচেৎপা মরি থম্নরি। হৌখিবা চহি ৪ অসিদা ঐখোয়গী প্রসিদেন্ত, ভাইস-প্রসিদেন্ত অমসুং ঐ ইশামক অফ্রিকাগী লৈবাক ২৫দগী তাদনা চৎলে। ঐখোয়গী মন্ত্রীশিং অফ্রিকাগী লৈবাক পুম্নমক চৎলে। ২০১৫গী ওক্তোবরদা পাংথোকপা অহুমশুবা অফ্রিকা-ইন্দিয়া মীফমদা ঐখোয়না লৈবাক ৫৪গী লুচীংবা ৪০ হেন্না তরাম্না ওকখি। ইন্তর্নেস্নেল সোলর এলাইন্সগী অহানবা মীফমদসু ঐখোয়না অফ্রিকাগী লুচীংবা কয়া ওকপগী খুদোংচাবা ফংখি। পুম্নমক অসিগী মথক্তা, হৌখিবা চহি ৪ অসিদা অফ্রিকাগী সরকার নৎত্রগা লৈবাক ৩২গী লুচীংবশিং ভারত্তা লাকখি। হৌখিবা চহিদা ঐগী রাজ্য গুজরাত্তা অহানবা ওইনা অফ্রিকান দিবেলপমেন্ত বেঙ্কগী মীফম পাংথোকখি। ঐখোয়না অফ্রিকাদা অনৌবা এম্বেসী ১৮ হাংদোক্লে।

ইকায়খুম্নরবশিং,

ঐখোয়গা পুন্না পায়খৎমিন্নরিবা চাউখৎ-থৌরাংগী থবকশিংগী মনুংদা অফ্রিকাগী লৈবাক ৪০ হেনবদা য়ু এস দোল্লর বিলিয়ন ১১ হেনবগী ক্রেদিৎ লাইন ১৮০ পায়খৎপা য়াওরি। মমাংদা পাংথোকখিবা ইন্দিয়া-অফ্রিকা মীফমদা ঐখোয়না য়ু এস দোল্লর বিলিয়ন ১০গী ক্রেদিৎ লাইনশিং অমসুং দোল্লর মিলিয়ন ৬০০গী গ্রান্ত মতেং ওইনা পীখি। চহি খুদিংগী অফ্রিকাগী নহারোল ৮০০০ হেন্না হিরম কয়াদা ত্রেনীং পীরি। ভারতকী কম্পেনীশিংনা অফ্রিকাদা য়ু এস দোল্লর বিলিয়ন ৫৪ থাদরি। ঐখোয়গা অফ্রিকাগা ললোন-ইতিক তৌনরিবা অসি য়ু এস দোল্লর বিলিয়ন ৬২ হেল্লে। মসি মমাং চহিশিংদগী চাদা ২১ হেল্লবনি। অফ্রিকানা ভারত্তা পোৎ-চৈ থাদোকপগী চাংসু হেনগৎলক্লি। দিজিতেল ইকনোমীদা অনৌবা মরূপ শেমগৎলকপগা লোয়ননা ঐখোয়গী শেল-থুমগী ফিবমসু ফগৎলক্লি। পান অফ্রিকা ই-নেতৱার্কনা অফ্রিকাগী লৈবাক ৪৮গা ভারতগা শম্নহল্লি। মসি অফ্রিকাদা দিজিতেলগী অওনবা পুরক্নবগী অনৌবা য়াংলেন শরুনি। সমুদ্রা মপানদা লৈবা লৈবাকশিংগা অনৌবা মরি কয়া শেমগৎতুনা হৌজিক ব্লু ইকনোমীগী কান্নবা ফংবা হৌরে। মতম অমদা অফ্রিকাগী তুংগী ফিবমদা শিংনবা অমা ওইরম্বা লায়নাশিং ভারতকী হিদাক-লাংথকশিংনা কোকহনখ্রে। মখোয়না অনা-লায়েংগী থবকশিং অহোংবা মমলদা মীয়ামদা ফংহনবা হৌরে।

ইকায়খুম্নরবশিং,

নুংঙাইনবা ঐখোয়না পুন্না থবক তৌমিন্নরিবা অসিগুম, শান্তি থম্নবা ঐখোয়না পুন্না লেপমিন্নরি। ভারতকী লান্মীশিং থবক তৌরিবা মরম্না অফ্রিকাগী অঙাংশিং তুংদা শান্তি লৈরগনি। ১৯৬০দগী অহানবা ওইনা ঐখোয়না কোঙ্গোদা মিসন হৌখিবদগী হৌরগা ভারতকী লান্মীশিংনা অফ্রিকাদা য়ু এনগী পিছ কিপ্পিং মিসন ১২ হেনবদা শরুক য়াবদা ঐখোয়না চাউথোকচবা পোকই। মালেমগী মফম কয়াদা লৈরিবা পিছ কিপ্পিং মিসনশিংদা ভারত মচা ১৬৩ থৱায় কৎখ্রে। মসি মশিং য়াম্না লৈখিদবশিংগী মনুংদা অমনি। থৱায় কৎখিবশিংগী চাদা ৭০দি অফ্রিকাদানি। হৌজিক ভারত মচা ৬,০০০ হেন্না অফ্রিকাদা পিছ কিপ্পিং মিসন মঙাদা থবক তৌরি। য়ু এনগী অহানবা, নুপী ঙাক্তগী পুলিস য়ুনিত লিবেরিয়াদা থমদুনা ভারতকী নুপীশিংগী তৌবা ঙম্বা উৎলি। তেরোরিজম  অমসুং পাইরেসী থেংননবা অমসুং ঐখোয়গী সমুদ্রগী শরুকশিং অশোই–অঙাম থোকহন্দনবা অফ্রিকাগী লৈবাকশিংগা ঐখোয়গা ঙাক–শেলগী লমদা মতেং পীনবা হেনগৎলক্লি।

ইকায়খুম্নরবশিং,

ৱাখল্লোন ১০না লমজিংদুনা ভারতনা অফ্রিকাগা মখা তানা মরি লৈনখিগনি।

অহানবা, ঐখোয়না অফ্রিকা অসি মকোক্তা থম্লি। ঐখোয়গা অফ্রিকাগা লৈনবা মরি হেন্না চেৎশিনগনি অমসুং মখা তানা চৎথগনি। ঐখোয়না উৎলিবা অসিগুম, মরি অসি চাং নাইনা অমসুং তুংকোইনা থমগনি।

অনিশুবা, ঐখোয়গী চাউখৎ–থৌরাংগী থবকশিং অসি অদোমগী মথৌ তাবগী মতুংইন্না পায়খৎকনি। মসিনা অদোমদা অফবা ওইহনগনি, অদোমগী তৌবা ঙম্বশিং ফুদোকহনগনি অমসুং অদোমগী তুংদা অপনবা ওইহল্লোই। অফ্রিকাগী হৈশিংবনা ঐখোয়দা মতেং পাংগনি। ঐখোয়না অঙাম্বা থাক্তা মফম অসিগী শেমগৎপা য়াবশিং শেমগৎকনি।

অহূমশুবা, ভারতকা ললোন–ইতিক তৌবদা খুদোংচানবা অমসুং লাইনবা ঐখোয়গী কৈথেলশিং  ঐখোয়না থোং লাওনা হাংদোক্তুনা থমগনি। ঐখোয়গী উদোকশিংনা অফ্রিকাদা শেল থাদবদা ঐখোয়না শৌগৎকনি।

মরিশুবা, দিজিতেল রিভোলুসনগী লমদা ভারতকী লৈরিবা খুদোংচাবশিং অসি অফ্রিকাগী চাউখৎপা, মীয়ামগী থবকশিং ফগৎহনবা, মহৈ–মশিং অমসুং হকশেলগী থবকশিংদা, দিজিতেলগী থবকশিং হৈহনবা অমসুং লায়রবশিংগী শেমগৎ–শাগৎপদা শীজিন্নগনি ।

ঐখোয়গী লৈনরিবা মরি অসি শুপ্নগী য়ু এন স্তেনেবল দিবেলপমেন্ত গোলশিং ফংনবা খক নত্তে, দিজিতেলগী মতম অসিদা অফ্রিকাগী নহারোলশিং শেমগৎপনি।

মঙাশুবা, মালেমগী ওইনা লৌ উবা য়াবা লমগী চাদা ৬০ অফ্রিাকাদা লৈ অদুবু মালেমগী ওইনা অপুনবা চিঞ্জাক্কী চাদা ১০ খক পুথোক্লি। অফ্রিকাগী লৌউ–শিংউ চাউখৎনবা ঐখোয়না অদোমগা লোয়ননা থবক তৌমিন্নগনি।

তরুকশুবা, ঐখোয়গী মরূপ–মপাং ওইবগী মরি অসিনা ক্লাইমেত চেঞ্জশিং থেংনগনি। মালেমগী ক্লাইমেতকী নিয়ম অমা শেম্নবা, ঐখোয়গী অকোয়বগী ফিবম ঙাকতুনা থম্নবা অমসুং অফবা অনানবা ইনর্জী শীজিন্ননবা ঐখোয়না অফ্রিকাগা লোয়ননা থবক তৌমিন্নগনি।

তরেৎশুবা, তেরোরিজম থেংননবা, ঐখোয়গী সাইবর স্পেস ঙাকশেন্নবা অমসুং য়ু এনগী পিছ কিপ্পিংগী থবকশিং ফগৎহন্নবা ঐখোয়গী লৈনরিবা মরিশিং ফগৎহনগনি।

নিপালশুবা, লৈবাক খুদিংমক কান্নবা ফংনবা সমুদ্রগী শরুকশিং হাংদোক্তুনা থম্নবা ঐখোয়না অফ্রিকাগী লৈবাকশিংগা পুন্না থবক তৌমিন্নগনি। মালেম অসিনা মতেং পীনবা মথৌ তারি, অফ্রিকাগী নোংপোক থংবা সমুদ্রা খোঙবাল অমসুং ভারতকী নোংপোক থংবা সমুদ্রগী শরুক্তা চাংদম্নবা অদু নত্তে। মরম অদুনা ভারতনা ইন্দিয়ান ওসিন্দা লৈরিবা মীৎয়েং অসি মতেং পীনবা অমসুং পুন্না চাউখৎমিন্নবনি।

মপনশুবা, অফ্রিকানা মালেমগী লৈবাকশিংগা শম্নবা অসি হেনগৎলক্লি, মরম অদুনা অফ্রিকা অসি অমুক হন্না য়েক্নবশিংনা মুন্নবগী মফম অমা ওইহল্লোইদবনি, মসি লৈবাক অসিগী নহারোলশিং শেমগৎনবা চারা শেমফম ওইহনগদবনি।

তারাশুবা, ভারত অমসুং অফ্রিকানা লোইলম লৈঙাক পুন্না থেংনখিবগুম, মালেমগী অপুনবা মীশিংগী শরুক অহুম থোকপগী অমা অফ্রিকা অমসুং ভারত্তা লৈরিবা মরম্না মালেম অসিদা গনতন্ত্রগী নিয়ম অমা থম্নবা পুন্না থবক তৌমিন্নগনি। মালেমগী লৈবাকশিংগী অওনবা অমা পুরক্নবা ভারতনা হোৎনরিবা অসিদা অফ্রিকাগী মফম অমা ফংদ্রবদি মদু মপুং ফারোই। মসি ঐখোয়গী মপান লৈবাক্কী থৌশিলগী মরুওইবা অমনি।

ইকায়খুম্নরবশিং,

অফ্রিকা মহাদেস অসিনা মালেমগী লৈবাকশিংগা থোং মান্ননা চৎমিন্নগদবনি। মসিনা ঐখোয়গী গর্হ অসিগী তুংগী অফবা ওইগনি। ভারতনা অদোমগা লোয়ননা থবক তৌমিন্নগনি। ঐখোয়গী লৈনরিবা মরি অসিনা অফ্রিকাদা শক্তি পীগনি। ভারতকী অপুনবা মীশিংগী শরুক অহুম থোকপগী অনি অমসুং অফ্রিকাগী মীশিংগী শরুক অহুম থোকপগী অনি চহি ৩৫ মখাগী মীওই ঙাক্তনি। তুংগী লাইবক অসি নহারোলশিংগী মখুৎতা লৈরবদি, চৎলিবা চহিচা অসি ঐখোয়গী নহারোলশিংনা শেমগৎকনি। উগান্দাদা হায়নবা– “অনায়েজিতাহিদিহুফাইদি” হায়বদি, “খরা হেন্না হোৎনবা মীওই অদুনা কান্নবা ফংগনি” অসিনা লমজিংহল্লসি। ভারতনা অফ্রিকাগীদমক খর হেন্না হোৎনগনি। মতম চুপ্পদা হোৎনগনি। অফ্রিকাগী য়াইফনবা।

অদোম ময়াম থাগৎচরি।

অশান্তে শানা।