ভারতকী প্রধানমন্ত্রী

‘মন কী বাত ২.০’গী ৯শুবা তাঙ্কক্তা ৱা ঙাংলদুনা প্রধান মন্ত্রী শ্রী নরেন্দ্র মোদীনা বিহারদগী পুক্নিং থৌগৎনীংঙাই ওইরবা ৱারী অমা লীখি মদুনা ভারত মচা কয়াবু পুক্নিং থৌগৎলগনি। মহাক্না হায়খি মদুদি বিহারগী পুর্নিয়াগী ৱারী লৈবাক পুম্বগী মীওইশিংদা পুক্নিং থৌগৎনীংঙাই ওইরিবনি। মফম অসি দিকেদ কয়াদগী হৌনা ঈশিং ইচাউগী খুদোংথিবা মায়োক্নরি। মসিনা মফম অসিদা লৌউ-শিংউ অমদি শেন্থোক লম্বীগী মচাকশিং খোমজিনবদা ৱানা থোক্লিবনি। মহাক্না হায়খি মদুদি অহানবদা লমদম অসিগী নুপীশিং অসিনা কাব্রংচাক পাম্বীদা মুগা তিন য়োক্তুনা মহুম শেম্মি, অদুগা মদুগী মমলদি য়াম্না হোংনা ফংই। অদুগা অমরোমদা মসিবু লৈরিবা কাংবুনা হায়রিবা মহুমশিং অসিদগী মুগা লং শেম্দুনা শেন্দোং চাউনা তাল্লি। অদুবু ঙসিদি পুর্নিয়াগী নুপীশিং অসিনা থৌরাং অমা হৌদোক্তুনা শক্তম পুম্বা হোংদোক্লে। নুপীশিং অসিনা লৈঙাক্কী মতেং লৌদুনা অপুনবা কাব্রংচাক্কী পোত্থোক অমা শেমগৎলে, অদুদগী মখোয়না মহুম অদুদগী মুগা লে শেম্দুনা মখোয় মশাগী সারি ফীশিং শাবা হৌগৎখি। ময়াম্না তাবদা ঙকপীগনি, অহানবদা মহুম য়োন্দুনা শেনফম খরা খক্তা ফংলম্বা অদু হৌজিক্তি মদুনা শারি শাদুনা লুপা লিশিং কয়াদা য়োল্লি হায়না মহাক্না মখা তাখি।

মহাক্না চহী ১২দা মাউন্ত একোনকাগুৱা কাখিবী কাময়া কার্তিকেয়ানগী এচিবমেন্তকী পুক্নিং থৌগৎনীংঙাই ওইরবা ৱারীসু সেয়ার তৌখি। মসি অমেরিকাগী এন্দেস চিংশাংগী খ্বাইদগী ৱাংবা চাউরাক্না মীতর ৭০০০ ৱাংবা চিংদোলনি হায়না মহাক্না মখা তাখি। মহাক্না হায়খি, “হৌজিক মহাক অনৌবা মিসন অমদা লৈরি, মমিংনা ‘মিসন সাহস’ কৌই। মসিগী মখাদা মহাদ্বিপ পুম্নমক্কী খ্বাইদগী ৱাংবা চিংদোলশিংবু মতোল লোম্না কাননবা হোৎনরি।” মীপুম খুদিংমকপু ফিৎ ওইনা লৈনবা মোতিবেৎ তৌবদা পোজিতিব রিজল্ত পুরকপগীদমক মহাক্না কাময়াবু থাগৎপা ফোংদোকখি অমসুং ‘মিসন সাহস’কীদমক য়াইফ পাউজেল পীখি। মতৌ করম্না ভারতকী জিওগ্রাফী অসি এদবেঞ্চর স্পোর্তসকী তঞ্জা য়াম্না পীরিবা মফম অমনো হায়বদু ফোংদোক্লদুনা প্রধান মন্ত্রীনা মীয়ামদা ইশাগী অপাম্বা মফম, অপাম্বা এক্তিবিতী খন্দুনা ইশাগী পুন্সীবু এদবেঞ্চরদা শোইদনমক্কী শনজিন্ননবা অপিল তৌখি।

মখা চত্থরকপদা মহাক্না কেরলাগী কোল্লামদা লৈবী অমসুং চহী য়াম্না নৌরিঙৈদা মহাক্কী মমা অমসুং মপুরইবা কায়নখ্রবী চহী ১০৫ শুরবী ভাগিরথী অম্মাগী মায় পাকপগী ৱারী লীখি। চহী ১০৫ শুরকপদা মহাক্না অমুক স্কুল তম্বা হৌরে। চহী অসুক য়াম্লবসি ফাওবা ভগিরথী অম্মানা লেভেল ৪গী একজাম পীরিবনি, অদুগা য়াম্না লাংতক্ননা মদুগী রিজল্ত ঙাইরিবনি। পরিক্ষাদা মহাক ৭৫ পর্সেন্ত ফংই। মহাক্না হায়খি মদুদি ভগিরথী অম্মাগুম্বী প্রজাশিং অসি লৈবাক অসিগী পাঙ্গলনি; ঐখোয় পুম্নমক্কীদমক ইন্সপিরেসনগী অচৌবা সোর্স অমনি।

মহাক্না পোকপদগী শোয়নাইরক্লবা মোরাদাবাদকী হমিরপুর খুঙ্গংদা লৈরিবা সলমানগী খুদমসু পীখি। মহাক্না হায়খি মদুদি অৱাবা অসি মায়োক্নদুনসু মহাক মায়থিরে হায়না য়াবা ঙমজখিদে, অদুনা মহাক মশামক্না মশামক্কী থবক হৌজনবা ৱারেপ লৌজখি। মসিগা লোয়ননা মহাক্না মহাক্কুম্বা অতৈবুসু মতেং পাংলগে হায়না ৱারেপ লৌখি। অদুদগীদি সলমান্না মহাক্কী খুঙ্গংমক্তদা চপল অমদি দিতর্জেন্ত শাননবগী থবক হৌগৎখি। অদুদগী অথুবা মতমদা শোয়নাইরবা মীওই ৩০না মহাক্কী থবক্তা য়াওশিলকখি।

মহাক্না গুজরাতকী কচ্ছ লমদমদা লৈরিবা অজরক খুঙ্গংগী মীওইশিংগী ৱারীসু লীদুনা তাহনখি। ২০০১দা থোকখিবা মাং-তাক্নিঙাইগী মশক ওইরবা য়ুহা হাবা অদুগী মতুংদা মীপুম খুদিংমক খুঙ্গং থাদোক্তুনা চৎনরবা মতম্নি। মতমদুদা ইস্মাইল খাত্রি কৌবা মীশক অসিনা খুঙ্গংদুমক্তদা লৈদুনা অজরক প্রিন্তকী মশাগী মহৌশাদগী চৎনরকপা কালা অদুবু য়োকখৎনবা ৱারেপ লৌখি। অদুগা খুল পুম্বা অদু মহৌশাদগী লৈজরক্লবা খুৎহৈবগী কালা অদুদা য়াওশিনখি।

প্রধান মন্ত্রীনা হন্দক্তা পাংথোকখিবা মহাশিবরাত্রিগীদমক জাতিদা মহাক্কী ওইবা য়াইফ পাউজেল পীখি। মহাক্না হায়খি, “মহা শিবরাত্রিগী মতমদা মহাদেবনা পুম্নমক য়াইফ মঙ্গোল পীবিদুনা অপাম্বা অনিংবা পুম্বা থুংহনবিবা ওইসনু, পুম্নমক মশা মউ ফনা হকচাং নাদা য়েক্তনা নুঙাইবা য়াইফবা ওইদুনা ইমা লৈবাক্কীদমক্তা থৌদাং পাংথোকপা ঙম্বা ওইরসনু।”

প্রধান মন্ত্রীনা মখা তাখি, “মচুগী কুমহৈ য়াওশংসু লাক্কদৌরে। মসিগী হেক মতুংদা গুরি পর্বসু লাক্লনি লোয়ননা নবরাত্রিগী কুহৈসু লাক্লনি, রাম নবমিসু লাক্লনি। কুমহৈ ফিয়োং হায়বসি ঐখোয়গী পুন্সীগী থাদোক্নবা য়াদ্রবা অমনি। হরাউ কুমহৈগী মরুমদা পাউজেল কয়া লোত্তুনা য়াওরি। মসিনা সমাজ খক্তা নত্তনা লৈবাক পুম্ববু অমত্তা ওইনা পুন্সিল্লি।”