ভারতকী প্রধানমন্ত্রী

ঐগী নুংশিরবা ইরৈচাশং, খুরুমজরি। ঐখোয়গী লান্মীশিংগী চাউথোকচবা পোক্তবা ভারতমচা অমত্তা লৈরম্লোই। কাংলুপ, ধর্ম্ম, লোন অমসুং লৈফমগী খেন্নবা লৈতনা ঐখোয় খুদিংমক্না ঐখোয়গী লান্মীশিং শৌগৎলি। ঙরাং ভারতমচা ক্রোর ১২৫না থৌনা ফবগী কুম্মৈ পারামক্রম পর্ব পাংথোকখ্রে। ২০১৬দা চৎথখিবা সর্জিকেল স্ত্রাইক অদু ঐখোয়না নিংশিংলি। তেরোরিজম লাকশিন্নবা ঐখোয়গী লান্মশিংনা পাউখুম পীখিবনি। ঐখোয়গী লান্মশিংনা শীন্দুনা লৈবাক্কী মফম কয়াদা একজিবিসনশিং শিল্লি অমসুং ঐখোয়গী লান্মীশিংগী তৌবা ঙম্বশিং মীয়ামদা খঙহল্লি। পারাক্রম পর্ব থৌরম অসি ঐহাকসু অথৌবশিংগী লম রাজাস্থানগী জোধপুরদা শরুক য়াখি। লৈবাক অসিগী শান্তি থুগাইরকপা মতমদা ঐখোয়গী লান্মীশিংনা খুৎহনবা ঙম্মী হায়বসি হৌজিক খঙলে। লৈবাক অসিগী মনিংতম্বা অমসুং ইকায়খুম্নবা মাংহন্দনা ঐখোয়না শান্তি থম্বদা থাজবা থম্লি ।২০সুবা চহিচাদা চৎথখিবা মালেমগী লান অনিদা ঐখোয়গী লান্মী লাখ থৱায় কৎখি। ঐখোয়না কনাগুম্বা লৈবাক অমগী লম মীৎয়েং তাদে। মসি ঐখোয়গী থাজবা অমসুং শান্তিদা কৎথোকপনি। নুমিৎ খরনিগী মমাং, সেপ্তেম্বর ২৩দা ,ইজরেলগী হাইফা লানফমগী মপোক কুমওনদা হাইফা মনিং তমহনখিবা মহিসুর, হায়দ্রবাদ অমসুং জোধপুর লেন্সরগী ঐখোয়গী লান্মীশিংদা ইকায়খূম্নবা উৎখি। ঙসি ফাওবদা ভারত অসি য়ু এন পিছ কিপ্পিং ফোর্সশিংদা লান্মী মশিং খ্বাইদগী য়াম্না থাবা লৈবাক অমা ওইরি। হিগোক মচুগী হেলমেতশিং উপ্পা ঐখোয়গী লান্মীশিংনা মালেমগী শান্তি থম্বদা অচৌবা থৌদাং লৌরি।

ঐগী নুংশিরবা ইরৈচাশিং, ভারতকী এয়রফোর্সনা অতিয়াদা তৌবা ঙম্বা কয়া উৎলি। মসিনা ঐখোয়দা সেকুরিতিগী ৱাখল অমা পোকহল্লি। গনতন্ত্রগী পেরেদতা মীয়াম্না খৌরাং ঙাইনবশিংগী মরক্তা ঐখোয়গী এয়রফোর্সনা মল ওন্দুনা পাইবা অদুনি।

ওক্তোবর ৮দা ঐখোয়না এয়রফোর্স দে পাংথোকলি। ১৯৩২দা পাইলোত তরুক, এয়রমেন ১৯গা লোয়ননা পীক্না হৌখিবা ঐখোয়গী এয়রফোর্স অসি ঙসি ২১সুবা চহিচা অসিদা মালেমগী খ্বাইগী কনবা এয়রফোর্সশিংগী মরক্তা অমা ওইরি। ঐগী থম্মোয়নুংদগী, লৈবাক্কীদমক থবক তৌরিবা নোংথক্কী লান্মীশিং অমসুং মখোয়গী ইমুং-মনুংদা ঐনা থাগৎলি। ১৯৪৭দা পাকিস্থান্না লান্দারকপা মতমদা এয়রফোর্সনা ঐখোয়গী লান্মীশিং অমসুং খুৎলায়শিং লানফমদা মতম চানা য়ৌহনখি।

১৯৬৫তসু এয়রফোর্সনা ফজনা পাউখুম পীখি। ১৯৭১গী বঙ্গলাদেসকী নিংতম লান খঙদবা কনা লৈরিবগে? ১৯৯৯দা কারগিলদগী য়েক্নবশিং তকথোকপদা এয়রফোর্সনা অচৌবা থৌদাং লৌখি। এয়রফোর্সনা তাইগর হিলসতা য়েক্নবগী মফমদা এতেক তৌদুনা মাইথিবা পীখি। মী কনবা নৎত্রগা মহৌশাগী অৱাবা তারকপা মতমদা এয়রফোর্সনা শিংথানিংঙাই ওইরবা থবক তৌরি। নোংলৈ নুংশিৎ, সাইক্লোন, ঈশিং ঈচাউ অমসুং উমং মৈ চাকপা মতমদা ঐখোয়গী লৈবাক্কী মীয়ামদা মতেং পীরি। হৌজিক এয়রফোর্সনা ঐখোয়গী ইচানুপীশিংগী থোং হাংদোক্লে। চহি অসিগী অগস্ত ১৫দা রেদ ফোর্দতগী ঐনা এয়রফোর্সতা সোর্ত সর্বিস কম্মিসনগী মথক্তা পরমেনেন্ত কম্মিসন নুপীশিংদা পীরগনি হায়না লাউথোকখি।

ঐখোয়গী লান্মীদা নুপা খক্তগী পাঙ্গল নত্তনা নুপীগী শক্তি লৈ হায়বা ভারতনা চাউথোক্না লাউথোকপা ঙমগনি। মমাংদগী হৌনা নুপীশিংদা শক্তি পীদুনা লাক্লি অমসুং হৌজিক্না খুৎলায় পীরে ।

ঐগী নুংশিরবা ইরৈচাশিং, নুমিৎ খরনিগী মমাংদা ঐখোয়গী নেভিগী ওফিসার অভিলাস তোমি হিংবা অমসুং শিবগী মরক্তা লৈখি। লৈবাক পুম্বা তোমি কন্নবা হোৎনখি। অভিলাস তোমি অসি থৌনা ফবা লান্মী অমনি। মহাক অসি মতমগী অনৌবা তেক্নোলোজি য়াউদনা অপীকপা হি অমা মালেম শীনবা থুংনা কোইনবা হোৎনবা অহানবা ভারতমচানি। গোল্দন গ্লোব রেস শরুক য়ানবা হৌখিবা নুমিৎ ৮০ মহাক সাউথ ইন্দিয়ান ওসিনদা লৈরিঙৈদা শাথিরবা সাইক্লোন অমনা মহাক অৱাবা তাহনখিবনি। অদুবু, নেভিগী থৌনা ফরবা অসিনা নুমিৎ কয়ানি সমুদ্রা ময়াইদা অৱাবা মায়োক্নখি। মহাক চানবা অমসুং থক্নবা য়াউদনা তাউদুনা লৈখি। মহাক্না মাইথিবা য়াখিদে অমসুং শিদ্রিফাউবা থেংনখি। মহাক্না কনদুনা কংফালদা পুরক্লবা মতুংদা নুমিৎ খরিনগী মমাংদা তেলিফোনদা ঐনা অভিলাসকা ৱারি শানখি। মমাংদা ঐনা তোমিগা উনখ্রে, মহাক্কী থৌনা অসি হৌগৎলক্লিবা নহাশিংদা অসিগুম্বা অমা হোৎননবা থৌনা পীরে। তোমিগী হকচাং ফগৎলক্নবা ঐনা লাই খুরুমজরি অমসুং মহাক্কী থৌনা অসিনা ঐখোয়গী নহারোলশিংদা ইনোৎ অমা পীরগনি।

ঐখোয়গী লৈবাক্কী অঙাং অয়াম্বা ওক্তোবর ২গী মরুওইবা খঙই। চহি অসিগী ওক্তোবর ২ অসি অখন্নবা নুমিৎ অমনি। মহাত্মা গান্ধীগী চহি ১৫০সুবা মপোক কুমওন নুমিৎতা মালেম শীনবা থুংনা থৌরম কয়া পাংথোক্নবা ঐখোয়না চহি অনিগী মমাংদগী থৌরাং তৌদুনা লাক্লি। দোক্তর মার্তিন লুথর কিং অমসুং নেলসন মন্দেলানা গান্ধীজিগী ৱাখল্লোনদগী থৌনা ফংদুনা মীওইবগী মান্নবা অমসুং চিংলেম্না হিংনবগী হক ফংনবা শাংলবা লানফম অমা থেংনখি। ঙসিগী মন কি বাদ অসিদা ঐনা বাবুগী মরুওইবা থবকশিং মীয়াম্না খঙনবা শরুক য়াবা পাম্মী। ১৯৪১দা মহাত্মা গান্ধীনা ৱাখল্লোন খরা ইশিন্দুনা থমখি, ১৯৪৫দা নিংতম লান কনখৎলকপা মতমদা হায়রিবা ৱাখল্লোনশিং অদুগী শেমদোক্লবা কপি খরা পুথোকখি। বাবুনা মহাক্কী ৱাখল্লোনশিং অদু লৌমীশিং, খুঙ্গংশিং, শিন্মীশিংগী হক, লুবা-নানবা অমসুং লাইরিক তম্বাদা য়ুমফম ওইখি। মসি গান্ধী চারতর হায়না খঙনখি। মীয়ামগা শম্নবা নৎত্রগা মহাক্না মীয়ামদা নকশিনবা অসি বাবুগী অখন্নবা মগুন্নি মসি মহাক্কী মহৌশানি। মসি মহাক্কী তোপ-তোপ্পা মগুন অমনি হায়বসি মীয়াম্না খঙনরবনি।

নিংতম লান্দা মহাক্কী খ্বাইদগী চাউবা মতেং অসি জন-অনদোলান (মীয়ামগী ইহৌ) পুথোকখিবা অসিনি। নিংতম লান্দা কাংলুপ খুদিংমক অমসুং লমদম খুদিংমক মহাত্মা গান্ধীগী তুংইনখি। বাবুনা ঐখোয়দা পীখিবা লাইৱা অদুবু গান্ধীজিগী তালিসমান হায়না খঙনৈ। গান্ধীজিনা হায়খি, ঐনা নখোয়দা লাইৱা অমা পীগনি, নখোয়না মদু চাংয়েং তৌবা মতমদা, নহাক্না উখিবা খ্বাইদগী লায়রবা নৎত্রগা অশোনবা মীওই অমগী মমাই নিংশিংউ অমসুং নশা নথন্ত হংজৌ মদুদি মীওই অদুগীদমক নহাক্না করি তৌগদগে হায়বা। নহাক্কী খোঙথাং অদুনা মঙোন্দা কান্নবা খরা ফংগনি। মসিনা তাক্লি মদুদি নহাক্কী মতেং অদুনা মীওই মিলিয়ন কয়া শ্বারাজ ফংগনি।

ঐগী নুংশিরবা ইরৈচাশিং, গান্ধীজিগী লাইৱা অমা হৌজিক ফাউবা চুনরি। লৈবাক অসিদা মিদল ক্লাস মশিং হেনগৎলক্লে, ইকনোমিগী শক্তি হেনগৎলে, পোৎ লৈবা ঙম্বগী শক্তি হেনগৎলে, অদুবু ঐখোয়না পোৎ লৈবা মতমদা বাবু নিংশিংবরা। ঐখোয়না বাবুগী লাইৱা অদু নিংশিংবরা। মসি লৈবনা লৈবাক অসিগী কনাদা কান্নবা পীগনি হায়না ঐখোয়না খনবা য়াউবরা। নহাক্না পোৎ লৈবা মতমদা কনানা হকথেংননা নৎত্রগা নাকোইননা কান্নবা ফংগনি। ঐনা পোৎ লৈবা মতমদা খ্বাইদগী লায়রবশিংদা কান্নবা ফংলবদি ঐ হরাওগনি। গান্ধীজিগী চহি ১৫০সুবা মপোক কুমওন থৌরম মনুংদা পোৎ লৈবা মতমদা ৱাখলদা গান্ধীজিগী লাইৱা অসি থম্বীয়ু। পোৎ লৈবা মতমদা লৈবাক অসিগী মীওই অমদি কান্নবা ফংগনি, মদু কনাগুম্বা থবক সুখিবা অমা ওইবা য়াই, কনাগুম্বা শেন থাদখিবা অমা ওইবা য়াই, স্কিল থাদখিবা মীওই অমা ওইবা য়াই। মসি গান্ধীজিগী লাইৱানি অমসুং মসি গান্ধীজিগী পাউজেলনি অমসুং নহাক্কী অপীকপা থবকশিং অদুনা খ্বাইদগী লায়রবশিংগী পুন্সিদা অমসুং শোৎথরবশিংদা অচৌবা কান্নবা ফংহনগনি হায়না ঐনা চেৎনা থাজৈ।

ঐগী নুংশিরবা ইরৈচাশিং, গান্ধীজিনা হায়খি, মদুদি লু-নান্না লৈবনা নিংতমবা ফংগনি অদুবু মদু করম্না পাংথোক্কনি হায়বদি মহাক্না খঙখিদে। মসি থোকখি অমসুং ভারত নিংতম্বা ফংখি। মসিগা মান্নবা মওংদা ঐগী লৈবাক অসিগী শেন-থুমগী ফিবম ফগৎনবা অমসুং লায়রবশিংগী ফিবম ফগৎহনদুনা লায়রবগী মায়োক্তা থেংনবা লান মাইপাক্নবা ঐখোয়না মতেং পাংলি। মসি তশেংনা মমা লৈবাক নুংশিবনি অমসুং বাবুগী থবকশিংদা ইকায়খুমনবা উৎপনি ।খুদম ওইনা অখন্নবা নুমিৎতা খাদি অমসুং ইয়োংগী পোৎথোক লৈবা অসিনা ফি শাবশিংদা কান্নবা ফংহনগনি।

হায়নবা অমা লৈ মদুদি লাল বাহাদুর সাস্ত্রিজিনা অমনবা অমসুং শেগাইরবা খাদিগী ফিশিং অদু লিদুনা থমখি, মরমদি হায়রিবা ফিশিং অদু শাবদা শিন্মী অমগী অৱাবা য়াওরমগনি হায়দুনা থমজিনখিবনি। হায়রিবা খাদিগী ফিশিং অদু থবক কন্না সুদুনা শাখিবনি অমসুং ফিশিং অদুগী লংলা খুদিংমক শীজিন্নগদবনি হায়না মহাক্না হায়খি। নুমিৎ নিনিগী মতুংদা ,ঐখোয়না সাস্ত্রিজি অমসুং বাবুগী মপোক কুমওন পাংথোক্কনি। সাস্ত্রিজিগী মমিং অসি ভারতমচা খুদিংগী থম্মোয়দা থাজবা লৈরি।

সাস্ত্রিজিগী অঙকপা মগুন অমা লৈ,মদুদি মহাক মপান্দা য়েংবদা য়াম্না চম্মী অদুবু মনুংদা য়াম্না কনবা অমনি। মহাক্কী খোল্লাউ, জয় জৱান, জয় কিষান, অসি মহাক্কী মগুনগী খুদম অমনি। মহাক্না মশাগী ওইজবা থাদোকতুনা তেল্লবা চহি অমা মখাইগী মতমদা থবক তৌদুনা মহাক্না ঐখোয়গী লান্মীশিং অমসুং লৌমীশিংদা মাইপাক্নবগী লাইৱা পীরমখি।

ঐগী নুংশিরবা ইরৈচাশিং, ঙসি বাবুজি নিংশিংবা অসিদা, লু-নানবা অসি কাউথোকপা য়াদে। সেপ্তেম্বর ১৫দা স্বচ্ছতা হি সেবা খোঙজং হৌদোক্লে। মীওই ক্রোর কয়া খোংজং অসিদা শরুক য়াখি অমসুং ঐহাকসু দিল্লিগী অম্বেকার স্কুলদা অঙাংশিংগা লোয়ননা লম শেংবা য়াউখি। বাবসাহেব মশানা লিংখৎলম্বা স্কুল অদুদা ঐ চৎখি। সেপ্তেম্বর ১৫দা লৈবাক অসিগী মীওই কাংলুপ কয়া মশানা য়ানা লম শেংদোকপগী থবক অসিদা শরুক য়াখি। স্কুলগী অঙাংশিং, কোলেজগী মহৈরোইশিং, এন সি সি, এন এস এস, নহারোলশিংগী লুপশিং, মেদিয়াগী লুপশিং, কোরপোরেতশিংনা পাক-শন্না লম শেংবগী থবক্ত শরুক য়াখি। লুবা-নানবা পাম্বা লৈবাক অসিগী মীয়ামগী থবকশিং অদু ঐনা থাগৎলি। হৌজিক ঐখোয় ফোন তৌরকপা অমা তাসি।

হন্না, হন্না থাগৎচরি, মী অমগী পুন্সিদা লু-নানবা অসি তোঙানবা ৱাহন্থোক অমনি অমনি হায়না নহাক্না হায়রি অমসুং শ্বাছ ভারত অভিয়ানগী মখাদা নহাক্কী য়ুমদা তোইলেত অমা শারে হায়বা খঙবদা ঐখোয় হরাওই। ইহৌ অসিদা অফবশিং অদু নহাক্কী মীৎ উদবনা নহাক্না উবা ফংলরোই। অদুবু তোইলেত লৈতবা মতমদা নহাক্না থেংনরিবা অৱাবশিং খঙই অমসুং তোইলতে শারবা মতমদা মদু নঙোনদা বর অমা ওইগনি। মসিগী মতাংদা নহাক্না ফোন তৌরক্লমদ্রবদি, লুবা নানবগী মতাংদা লৈরিবা অসিগুম্বা অরুবা ৱাফমশিংগী মতাংদা খঙলম্লোই। নহাক্কী ফোন তৌরকপা অদুগীমক থাগৎচরি।

ঐগী নুংশিরবা ইরৈচাশিং, শ্বাছ ভারত মিসন অসি লৈবাক অসিগী ওইনা মাইপাকপা মিসন অমা ওইবতা নত্তনা মালেম পুম্নমক্কী ওইনা ঙাংনবা মিসন অমা ওইরে। মালেমদা খ্বাইদগী চাউবা সেনিতেসনগী মীফম, মহাত্মা গান্ধী ইন্তরেনেসনেল সেনিতেসন কনভেন্সন ভারতনা য়ুম্বু ওইদুনা পাংথোক্কদৌরি। মালেমগী লৈবাকশিংগী সেনিতেসন মন্ত্রীশিং অমসুং সেনিতেসনগী অখঙ-অহৈশিংনা সেনিতেসনগী মরমদা মখোয়গী খঙজবশিং পুথোকতুনা নৈনগনি। মহাত্মা গান্ধীগী চহি ১৫০সুবা মপোক কুমওন থৌরম হৌদোকপগা লোয়ননা ২০১৮গী ওক্তোবর ২দা মহাত্মা গান্ধী ইন্তরেনেসনেল সেনিতেসন কনভেন্সন লোইশিনগনি।

ঐগী নুংশিরবা ইরৈচাশিং, সংস্ক্রিতকী ৱাহৈ অমা লৈ-নয়ামুল শ্বারাজয়ম সয়দ, মসিগী ৱাহন্থোকতি শ্বারাজগী মনুংদা অচুম্বা লৈ হায়বনি। অচুম্বা ৱায়েলগী মতাংদা ঙাংনরকপা মতমদা, মদুদা মীওইবগী হকশিং য়াওদুনা লৈ। নৈহৎপীরবা অমসুং তোল্লবশিংগী মীওইবগী হক ফংনবা হোৎনবদা নিংতম্বা অমসুং শান্তি অসি য়াম্না মথৌ তাই।

দোক্তর বাবসাহেব অম্বেকারনা দ্রাফ তৌরম্বা সংবিধান অসিদা লায়রবশিংগী হক ঙাক্নবা ৱাফম কয়া হাপচিল্লমখি। মহাক্কী ৱাখল্লোনদা য়ুম্ফম ওইদুনা, ১৯৯৩গী ওক্তোবর ১২দা নেসনেল হুমেন রাইতস কম্মিসন(এন ঐচ আর সি) লিংখৎখি। নুমিৎ খরনিগী মতুংদা এন ঐচ আর সি চহি ২৫ মপুং ফারগনি। এন ঐচ আর সিনা মীওইবগী হক ঙাকপতা নত্তনা চহি কয়া চুপ্না মীওইবগী চিংলেম্বা য়োকখৎতুনা লাক্লি। ঐখোয়গী নুংশিরবা লুচিংবা, ভারতকী হান্নগী প্রধান মন্ত্রী অতল বিহারি বাজপাইনা হায়খি, হুমেন রাইতসকী ৱাখল্লোন অসি ঐখোয়দা অনৌবা অমা নত্তে ।

ঐখোয়গী নেসনেল হুমেন রাইতস কম্মিসনগী এমব্লেমদা বেদিক মতমগী লাইৱা-সরভেবভানতুসুখিনা অসি ইরি। এন ঐচ আর সিনা মীওইবগী হকগী মতাংদা পাক শন্না মীয়ামদা খঙহল্লি অমসুং মসি লান্না শীজিন্নবা থিংনবা মরুওইবা থৌদাং লৌরি। মসিগী চহি ২৫গী খোঙচৎ অসিদা মসিনা লৈবাক মীয়ামদা থাজবা অমসুং অসা পীরি। অফবা খুন্নাই অমদা, গনতন্ত্রগী মগুন ৱাংনা থম্নবা মসি মরুওইবা থবক অমনি। হৌজিক এন ঐচ আর সি অসি জাতিগী থাক্তা থবক তৌরি, স্তেদ হুমেন রাইতস কম্মিসন ২৬সু লিংখৎলে। খুন্নাই অমা ওইনা ঐখোয়না মীওইবগী হক্কী মরুওইবা খঙবা মথৌ তাই অমসুং মসি ঙাকতুনা থম্বগী হৈনবী শেমগৎকদবনি, মসি সবকা সাথ সবকা বিকাসগী য়ুম্ফম অমনি ।

ঐগী নুংশিরবা ইরৈচাশিং, ওক্তোবর থা অসিদা জয় প্রকাস নারায়ন জিগী মপোক কুমওন অমসুং রাজমাতা ভিজয়া রাজে সিন্ধিয়াজিগী মপোক কুমওন থৌরমশিং থোক্লি। হায়রিবা শক্নাইরবশিং অসিনা ঐখোয়দা ইনোৎ কয়া পীরমখি অমসুং ঐখোয়না মখোয়গী মফমদা থম্মোয় শেংনা ইকায়খুমনবা উৎচরি। ওক্তোবর ৩১দা সারদার সাহেবকী মপোক কুমওন তারি, মথংগী মন কি বাদ ইপিসোত্তা ঐনা মহাক্কী মরমদা কুপ্না হায়গনি অমসুং ঙসিদি ঐনা খরখক পনবা পাম্মী। ওক্তোবর ৩১দা থোক্লিবা সারদার সাহিবকী মপোক কুমওন অসি, অপুনবগী লমজেল, পাংথোকতুনা অপীকপা সহরশিং অমসুং জিলাশিংদা পাংথোক্কনি।

চহি খুদিংগী ঐখোয়না ঐখোয়গী খুঙ্গংশিং, সহরশিং অমসুং তাউনশিংদা, অপুনবগী লমজেল, পাংথোক্কনি। মহাক্কী পুন্সিদা ঐখোয়গী লৈবাক্কী অপুনবগী শক্তম শাগৎনবা মহাক্না থবক তৌরম্বা মরম্না মসিনা সারদার সাহেব নিংশিংনবগী খ্বাইদগী ফরবা মওংনি। থৌরম অসিনা খুন্নাই অসিগী কাংলুপা খুদিংমক অমত্তা ওইহন্নবা ঐখোয়না হোৎনরিবা অসি মপাঙ্গক কনখৎহনবা ঙমগনি। মসি সারদার সাহেবদা উৎপা অচৌবা ইকায়খুম্নবা ওইগনি ।

ঐগী নুংশিরবা ইরৈচাশিং,নবরাত্রি, দুর্গাপুজা নৎত্রগা বিজয়াদস্মি লাকপদা, শেংলবা কুম্মৈশিং অসিদা নখোয় ময়ামদা ঐগী থম্মোয়গী ওইবা য়াইফ-পাউজেল পীজরি। থাগৎচরি ।