ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা ২০২১-২০২৪ মতমগী মনুংদা জি.এস.এল.ভি. ফ্লাইৎ মঙা য়াওবা হৌজিক চত্থরিবা জি.এস.এল.ভি.গী ৪শুবা ফেজ মখা চত্থবদা অয়াবা পীখ্রে।

জি.এস.এল.ভি. প্রোগ্রাম – ৪শুবা ফেজ অসিনা জিও-ইমেজিং, নেভিগেসন, দেতা রিলে কম্যুনিকেসন অমসুং স্পেস সাইন্সকীদমক তোন ২গী সেতলাইৎশিং থাগৎপা ঙমহল্লগনি।

চাদিং:

অপুনবা মথৌ তারিবা শেনফম অসি লুপা কোতি ২৭২৯.১৩নি অমদি মসিদা জি.এস.এল.ভি. ভেহিকলশিং, চংদবা য়াদবা খুদোংচাবশিং হেঙ্গৎহনবা, প্রোগ্রাম মেনেজমেন্ত, অমসুং হৌজিক চত্থরিবা জি.এস.এল.ভি. প্রোগ্রাম মখা চত্থবগী পান্দম অদু ফংনবগীদমক মথৌ তাবা অহেনবা ফন্দগা লোয়ননা লোঞ্চ কেম্পেনগী মমলশিং য়াওরি।

কান্নবশিং:

জি.এস.এল.ভি. প্রোগ্রাম মখা চত্থবা – ৪শুবা ফেজ অসিনা ক্রিতিকেল সেতলাইৎ নেভিগেসন সর্বিসেস, ইন্দিয়ন হ্যুমেন স্পেসফ্লাইৎ অমসুং মার্সতা মথংগী ইন্তর্প্লানেতরী মিসন প্রোগ্রামদা মতেং পাংনবগীদমক দেতা রিলে কম্যুনিকেসন পীনবগীদমক সেতলাইৎ থাগৎপদা মথৌ তাবশিং অদু ফংহল্লগনি। মসিনা ভারতকী ইন্দস্ত্রীদসু পোত্থোক মখা তানা পুথোকহল্লগনি।
ইমপ্লিমেন্তেসন স্ত্রাতেজী অমসুং তার্গেৎশিং:

জি.এস.এল.ভি. প্রোগ্রাম মখা চত্থবা – ৪শুবা ফেজ অসিনা ভারতকী ইন্দস্ত্রীনা চাউনা শরুক য়াবগা লোয়ননা চহী অমদা লোঞ্চ অনি ফাওবগী ফ্রিক্বেন্সী অমদা সেতলাইৎশিং থাগৎপগী তাল্লিবা দাবী অদু ফংহল্লগনি। ওপরেস্নেল ফ্লাইৎ পুম্নমক ২০২১-২৪গী মতমগী মনুংদা মপুংফানা লোইশিনগনি।

চাউনা থেংনরিবশিং:

জি.এস.এল.ভি. মথৌ পাংথোকহনবনা কম্যুনিকেসন অমসুং মেতিওরোলোজিকেল সেতলাইৎশিংগীদমক তোন অনিগী ওইবা ক্লাসকী সেতলাইৎশিং লৈবাক অসিনা মশা মথন্তা থাগৎপা ঙমহল্লগনি। জি.এস.এল.ভি. প্রোগ্রাম মখা চত্থবা অসিনা মথংগী চারোলগী নেভিগেসন সেতলাইৎশিং, দেতা রিলে কম্যুনিকেসন সেতলাইৎশিং অমসুং ইন্তর্প্লানেতরী মিসনশিং য়াওনা লৈবাক্কী মথৌ তাবশিংগীদমক মান্নবা সেতলাইৎশিং মরোমদোম থাগৎপা ঙমহল্লগনি।

য়ুম্ফম:

জি.এস.এল.ভি.না জিওসিংক্রোনস ত্রান্সফর ওর্বিৎ (জি.তি.ও.)তা তোন অনিগী ক্লাসকী সেতলাইৎশিং মনিং তম্না শিজিন্নবা ঙমহল্লগনি। মসিনা মথংগী চারোলগী লোঞ্চ ভেহিকল জি.এস.এল.ভি. এম.কে-IIIগীদমক হাই থ্রস্ত ক্রায়োজেনিক ইঞ্জিন অমসুং থাক অমা শেমগৎনবগী লম্বী অমা শেম্লগনি।

হন্দক্তা ২০১৮গী দিসেম্বর ১৯দা জি.এস.এল.ভি.-এফ ১১ মায় পাক্না থাগৎখিবগা লোয়ননা, জি.এস.এল.ভি.না নেস্নেল সেতলাইৎ ১০ মায় পাক্না মখোয়গী ওর্বিৎতা থমখ্রে। ইন্দিজেনস ক্রায়োজেনিক অপ্পর স্তেজগা লোয়ননা জি.এস.এল.ভি.না কম্যুনিকেসন, নেভিগেসন অমসুং মেতিওরোলোজিকেল সেতলাইৎশিংগীদমক মতিকচাবা লোঞ্চ ভেহিকল অমা মশা মথন্তনা পুথোকখ্রে অমদি মখা তারকপা ইন্তর্প্লেনরী মিসনগীদমকসু খোংথাং লৌখৎলি।

জি.এস.এল.ভি. প্রোগ্রাম মখা চত্থরকপা অসি ২০০৩দা অহানবা ওইনা সেঙ্কসন তৌখি, অমদি ফেজ অনি মপুং ফানা পায়খৎখ্রে। অহুমশুবা ফেজ অসি মখা চত্থরি অমদি ২০২০-২১গী মরিশুবা শরুক্তা মপুংফানা লোইশিন্নবা পান্দম থম্লি।