ভারতকী প্রধানমন্ত্রী

মনিপুরগী রাজ্যপাল শ্রীমতী নজমা হেপ্তুলাজী

মনিপুরগী মমিং চৎলবা মুখ্য মন্ত্রী এন. বিরেন সিংহজী

কেন্দ্রগী মন্ত্রীমন্দলদা ঐহাক্কী খোংলোয় ওইমিন্নরিবা শ্রী গজেন্দ্র সিংহ শেখাৱৎজী, শ্রী জিতেন্দ্র সিংহজী, রতনলাল কতারিয়াজী, মনিপুরগী সাংসদ অমসুং বিধানসভাগী মীয়ামগী মীহুৎশিং অমসুং মনিপুরগী নুংশিরবা ইচিল-ইনাও, ইচে-ইচলশিং!!

ঙসিগী থৌরমসি কোরোনাগী লুরবা তানফম অসিদসু লৈবাকসি লেপ্তনা চংশিল্লি, লৈবাকসি লেপ্ত্রি হায়বগী খুদম তাক্লি।

তীকা থোক্লক্ত্রিবা ফাওবা কোরোনাগী মায়োক্তা লান্থেংনদুনা মায় পাক্না চংশিন্নবা হোৎনগদবনি। চাউখৎনবগীদমক্তসু ঙম্লিবমখৈ হোৎনদুনা মাংলোমদা চংশিনগদবনি।

হন্দক্তি নোংপোক অমসুং অৱাং-নোংপোক ভারতনা অৱাবা অনি মায়োক্নরি। কুমসি অসিদা নোর্থইস্তা নোং কা হেন্না চুবনা অমাং-অতা কয়া থোকখ্রে। মীওই কয়া শিখ্রে, মীওই কয়ানা ময়ুম থাদোকপা তাখি। চৈথেং অসিনা শোকহল্লবা ইমুং খুদিংমক্তা নুংঙাইতবা ফোংদোকচরি। অসিগুম্বা লুরবা তানফম অসিদা লৈবাক পুম্বা অদোমগীদমক্তা লৈরি হায়না ঐহাক্না ময়ামগী মফমদা থাজবা পীজরি। ভারত সরকারনা অমগা-অমগা মতেং পাংনদুনা রাজ্য সরকারশিংগা খুৎশম্নদুনা মথৌ তাবা থবক খুদিংমক পাংথোক্নবা লেপ্তনা হোৎনরি।

মরূপশিং,

মনিপুরদা কোরোনাগী লায়চৎ হেনগৎলকপা লাকশিন্ননবা রাজ্য সরকরনা অয়ুক-নুংথিল খাক্তনা কন্না হোৎনরি। লোকদাউনগী মনুংদা মীয়ামগীদমক্তা তঙাই ফদনা চংবা পোৎলমশিং নত্ত্রগা ময়ুমদা হল্লক্নবগীদমক্তা সরকারনা অখন্নবা থৌরাং খুদিংমক পায়খৎলি। প্রধানমন্ত্রী গরীব কল্যান অন্ন য়োজনাদগী মনিপুরগী লায়রবা ইচিল-ইনাও লাখ ২৫রোমদা হায়বদি ইমুং লাখ ৬মুক্তা লেম্না চেং-হৱাই ফংহনখ্রে। মতৌ অসিগুম্না ইচে-ইচল লাখ অমা মখাই হেনবদা উজ্বলা য়োজনাদগী লেম্না সিলিন্দর ফংহনখ্রে। মসিগী য়োজনাশিং অসিনা লুরবা তানফম অসিদা মতৌ অসিগুম্না লায়রবশিংগী মতেং অদুম্মক পাংখিগনি হায়বা ঐহাক্না থাজৈ।

মরূপশিং,

ঙসি অসি ইম্ফাল য়াওনা মনিপুরগী মরূপ লাখ-লাখশিংগী ওইনা মরুওইনা ইচে-ইচলশিংগীদমক্তদি য়াম্না অথোইবা নুমিৎনি। অদুগা নুমিৎ খরনিগী মতুংদা রাখীগী কুহ্মৈগী নুমিৎশু লাক্লগনি, মসি য়াম্না অথোইবা খুদোল অমা হৌদোক্কদৌরিবনি। লুপা কোতি লিশিং ৩লোম চংগদবা ৱাতর সপ্লাই প্রোজেক্তগী মফমসিগী মীশিংদা ঈশিংগী অৱাবশিং কোক্লগনি। গ্রেতর ইম্ফালগা কোন্ননা শহর মচা-অচৌবা ২৫ অমসুং খুঙ্গং ১৭০০দগী হেনবগী ওইনা প্রোজেক্ত অসিদগী ঈশিং চেন্থরক্তুনা মসিগী ঈচেল অসিনা পুন্সিগী ঈচেলদা কান্নবা ফংহনগনি। অথোইবা ৱাফমদি মসিগী প্রোজেক্ত অসি ঙসিখক্তগী নত্তনা চহি ২০-২২ ফাওবগী ওইনা চংগদবশিং অদু য়েংদুনা শেমখিনি।

প্রোজেক্ত অসিদগী মীওই লাখ-লাখকী য়ুমদা থক্নবা অফবা ঈশিং ফংহল্লগনি, মীওই লিশিং কয়াসু থবক ফংহল্লগনি। অদুগা ময়াম্না খঙবিরি মদুদি অফবা থক্নবা ঈশিং ফংলবদি ইম্যুনিতীদসু য়াম্না মতেং ওইহল্লি। লায়না ঙাকথোক্নবগীদমক্তা পাঙ্গল লৈহল্লি। অনাবদগী থাপ্না লৈহল্লি। মরম অসিনা ঈশিং অসি শুপ্নতগী তোতীদগী ঈশিং লাকহনবগী হিরমখক্তগী নত্তে। প্রোজেক্ত অসিনা চপ চানা য়ুমথোং খুদিংদা তোতী ঈশিং ফংহনবা অসি ঐখোয়গী অচৌবা পান্দম অসিবুসু খোংজেল য়াংশিলহনগনি। ঐহাক্না মসিগী ৱাতর প্রোজেক্ত অসিগীদমক্তা মনিপুরগী মীয়াম পুম্ববু মরুওইনা ইমাশিং অমসুং ইচে-ইচলশিংগীদমক্তা য়াম্না নুংঙাইবা ফোংদোকচরি।

মরূপশিং,

লৈবাকসিদা হাকুম জল জীবন মিশন হৌদোকখিবা মতমদা হান্না পাল্লম্বা সরকারশিংগা য়েংনবদা শরুক কয়া হেন্না য়াংনা থবক তৌনবা ঐহাক্না হায়খি। য়ুম কোতি ১৫দগী হেনবদা পাইপনানঈশিং য়ৌহনগদবা ওইরবদি মীৎকুপ অমফাওবা লেপহন্নবগী খল্লোইদবনি। মরম অসিননি লোকদাউন লৈরিঙৈগী মতমদফাওবা খুঙ্গং-খুঙ্গংদা পাইপলাইন তিংদুনা অমদি চেকশিন্না লৈবা হেনগৎহন্দুনা পঞ্চায়ৎশিংবু পুনশিন্নবগী থবকসু লেপ্তনা চত্থখি। ঙসি লৈবাক অসিদা নোংমদা চাউরাক্না ঈশিংগী কনেক্সন লাখ-লাখ ফংহল্লি হায়বদি নুমিৎ খুদিংগী ইমা-ইচল লাখ অমগী পুন্সিদা ঈশিংগী অৱাবশিং কোকহন্দুনা মখোয়গী পুন্সি মহিং অদু লায়থোকহল্লি।  জল জীবন মিশন অসি খোংজং অমগী মওংদা চংশিনবনা মসি য়াম্না থুনা ওইথোকপা ঙম্লিবনি।

মসিদা খুঙ্গংগী মীশিং, ইচে-ইচলশিং, মীহুৎশিংনা কদাইদা পাইপ তিংগনি, কদাইদগী ঈশিং লৌগনি, কদায়দা তেঙ্কী শাগনি, বজেৎনা কয়া ওইগদগে হায়বসি লেপকনি।

মরূপশিং,

সরকারগী থৌশিল অসিদা অশুক চাউবা দিসেন্ত্রেলাইজেসন, অদুক্কী মতিক য়াম্বা চাংদা ‘গ্রাসরুৎ লেভেল’দা এম্পাৱরমেন্ত তৌবা হায়বসি কয়াম্মুক চাউবা থৌনা অমা ওইনা লাকপগে হায়বদু ময়াম্না খন্দুনা য়েংবীয়ু।

মরূপশিং,

ইজ ওফ দোইং, নুংঙাইনা হিংবা, হেন্না নিংথিনা হিংবা হায়বসি মথৌ তাই। শেল য়াম্না চংবা য়াই চংদবা য়াই অদুবু ইজ ওফ দোইংদা মীওই খুদিংমক্কী হক লৈ অদুগা মরুওইনা ঐখোয়গী লায়রবা ইচিল-ইনাও, ইমা, ইচে-ইচলশিং, দলিৎ, হন্থবা থাক্কী, ত্রাইবেলশিং খুদিংমক্কী হক লৈ। মরম অসিনা চহি ৬তগী ভারত্তা ইজ ওফ দোইংগীসু য়াম্না চাউবা খোংজং অমা চংশিল্লক্লি। ভারতকী নাগরিকশিংগীপুন্সিদা মথৌ তাবা খুদোংচাবা পুম্নমক ফংহন্নবা হোৎনরি। .হৌখিবা চহি ৬সিদা লায়রবা মীয়মশিংগী ফীভম খগৎহন্নবা তেংবাংনবা থাক খুদিংদা হিরম খুদিংদা থবক পায়খৎখ্রে। ঙসি মনিপুর য়াওনা ভারত্তা লমহাংদা অমাংবা তৌশিনদ্রে হায়না লাওথোকখ্রে। ঙসি ভারতকী খুঙ্গং খুদিংমক্তা মৈ ফংহল্লে, চাউরাক্না ইমুং খুদিংমক্তা মৈ ফংহনখ্রে। ঙসি এল.পি.জি. গ্যাস অসি লায়রবা ইমুংশিংগী চাকশঙ য়ৌহনখ্রে। খুঙ্গং খুদিংদা অফবা লম্বিশিংগা শম্নহল্লনি। ময়ুম লৈজদবা লায়রবা ইমুং খুদিংমক্তা ফজবা য়ুম ফংহল্লি। লায়রবা খুদিংমক্তা লৈননবা অফবা য়ুম ফংহল্লগনি। থক্নবা ঈশিংগী অৱাৎপা অমা চাউনা লৈরম্বা অদু কোকহন্নবা মিশন মোদতা থবক চত্থরি।

মরূপশিং,

হেন্না ফবা পুন্সি মহিংগী প্রোগ্রেস অমসুং প্রোসপরিতীগা হকথেংননা মরী লৈনরিবা অসি কনেক্তিবিতীগনি। নোর্থ ইস্তকী কনেক্তিবিতীনা মফম অসিগী মীশিংদা ইজ ওফ দোইংগী ওইনা মথৌ তাবনদি, শোইরোই-ঙাম্লোইদবা অমসুং আত্মনির্ভর ভারতকী পান্দম অসি মপুং ফাহন্নবগীদমক্তসু য়াম্না মরুওইবসুনি। মসি মায়কৈ অমরোমদা ম্যান্মার, ভুতান, নেপাল অমসুং বঙ্গলাদেশকা ঐখোয়গী লৈবাক্কী অমসুং লল্লোন-ইতিক্কী মরীশিং অদু ফগৎহল্লি, ভারতকী এক্ত ইস্ত পোলিসী সু মপাঙ্গল কনখৎহল্লি।

ঐখোয়গী নোর্থ ইস্ত অসি নোংপোক থংবা এসিয়াগা ঐখোয়গী মমাংঙৈগী নাৎকী ওইবা মরীশিং অমসুং তুংগী ত্রেদ, ত্রাবেল অমসুং তুরিজমগী মরীশিংগী গেৎৱেনি। মসিগী ৱাখল্লোন অসিগা মনিপুর য়াওনা নোর্থ ইস্তপুম্বদা কনেক্তিবিতীগা মরী লৈনবা ইনফ্রাস্ত্রকচরদা লেপ্পা লৈতনা ফগৎহল্লি। রোদৱেজ, হাইৱেজ, এয়রৱেজ, ৱাতরৱেজ অমসুং আই-ৱেজ গা লোয়ন-লোয়ননা গ্যাসকী পাইপলাইনগীসু অনৌবা ইনফ্রাস্ত্রকচর, ওপ্তিকল ফাইবগী ইনফ্রাস্ত্রকচর, পাৱর গ্রিদকী মওংদা শেম্বগী থবক কয়া অমা নোর্থ ইস্তদা মখল অমগী ইনফ্রাস্ত্রকচরগী লাং তিংগনি। হৌখিবা চহি ৬সিদা নোর্থ ইস্ত পুম্বগী ইনফ্রাস্ত্রকচরগী ওইনা লুপা কোতি লিশিং অমা ইনভেস্ত তৌখ্রে। নোর্থ ইস্তগী রাজ্যশিংগী কোনুংদা লেন ৪, দিস্ত্রিক্ত হেদক্বাতরশিংদা লেন ২ অমসুং খুঙ্গংশিং ওল ৱেদর রোদকা শমজিন্নহন্নবা হোৎনদুনা কিলোমীতর কোতি লিশিং ৩ শাংবা লম্বি শেমখ্রে অমসুং কিলোমীতর কোতি ৬লোমগী প্রোজেক্তশিংগী থবক চত্থরি।

মরূপশিং,

রেলৱে কনেক্তিবিতীগী লমদা নোর্থ ইস্ততা য়াম্না চাউনা অহোংবা উরি। অনৌ-অনৌবা স্তেসনশিংদা রেল য়ৌরে অদুগা নোর্থ ইস্তকী রেল নেৎৱর্ক অসি ব্রোদগেজদা ওল্লগনি। ময়াম্না অহোংবা অসি খঙবি-উবিরি। চাউরাক্না লুপা কোতি লিশিং ১৪ চংগদবা জীরীবাম-ইম্ফালগী রেল লম্বি অসি শাবা লোইবদা মনিপুরদা অহোংবা য়াম্না লাক্লগনি। মতৌ অসিগুম্না নোর্থ ইস্তকী রাজ্য খুদিংমক্কী কোনুংশিংদা লাক্কদৌরিবা চহি ২সিদা অফবা রেলৱে নেৎৱর্কা শমজিন্ননবা য়াংনা থবক চংশিল্লি।

মরূপশিং,

লম্বি অমসুং রেলৱেদা নত্তনা নোর্থ ইস্ততা এয়র কনেক্তিবিতীসু য়াম্না মরু ওই। ঙসি নোর্থ ইস্তা মথৌ তৌরিবা এয়রপোর্ত মচা-অচৌবা ১৩ লৈ। ইম্ফাল এয়রপ্রোত অসি পাকথোক-চাউথোকহন্নবা, অনৌবা খুদোংচাবশিং শেম-শানবগীদমক্তা লুপা কোতি ৩দগী হেন্না চাদিং তৌখ্রে।

মরূপশিং,

নোর্থ ইস্তকীদমক্তা ইনলেন্দ ৱাতরৱেজগী লমদা অচৌবা থবক অমা চত্থরি। অচৌবা রিভোলুসন অমা উরি। মফমসিদা হৌজিক নেস্নেল ৱাতরৱেজ ২০দগী হেনবগী থবক চত্থরি। তুংদা মসিগী কনেক্তিবিতী অসি সিলীগুরীগী কোরিদোর ফাওবদংদা লৌইশিনখিরোই। হৌজিক সমু্দ্র অমসুং তুরেলশিংগী নেৎৱর্ক্তগী সিমলেস কনেক্তিবিতীদা থবক হৌখ্রে। কনেক্তিবিতী ফগৎলকপদগী ঐখোয়গী ওন্ত্রর্প্রিনরশিং, ঐখোয়গী লৌমীশিংনা কান্নবা ফংলি। মসিনা নোর্থ ইস্তকী চত্থোক-চৎশিন্দা মতম চংহন্দ্রে। অনিশুবা কান্নবা ওইনা নোর্থ ইস্তকী খুঙ্গংশিং, লৌমীশিং, শঙ্গোম-এঞ্ছাং-নাপী অমসুং মিনরেলগী পোত্থোকশিং লৈবাক অসিগী অমসু মীরৈবাক্কী অচৌবা কৈথেলশিংদা চুমদ্রিং য়ৌহল্লি।

মরূপশিং,

নোর্থ ইস্ত ভারতকী নেচরেল অমসুং কলচরেল দাইভর্সিতীগী, কলচরেল স্ত্রেংথগী য়াম্না অচৌবা খুদম্নি। অনৌবা ইনফ্রাস্ত্রকচর শেমগৎপদা জুরিজমদসু য়াম্না চাউখৎলক্কনি। মনিপুর য়াওনা নোর্থ ইস্তকী তুরিজম পোতেন্সিয়েল অসি হৌজিকসু অনএক্সপ্লোর্দ ওইরি। হৌজিক্তি সোসিএল মেদিয়া অমসুং ভিদিও স্ত্রীমিংগী থোংদগী ইরৈবাক অমসুং মীরৈবাকফাওবা নোর্থ ইস্তকী ফোতোশিং, মতিক-ময়াইশিং য়ুমথোং-য়ুমথোং খুদিং য়ৌহনবদা ওইথোক্লগনি। অমদি নোর্থ ইস্তকী য়ৌবা ঙম্নদ্রিবা মফমশিং ময়াম্না ভিদিওদা য়েংনরি, ময়ামগী ৱাখলদা মসিবু ঐখোয়গী লৈবাকসিদরনে হায়বা মীয়ামগী ৱাখলদা ফাওই। নোর্থ ইস্তকী ঙমজবা পাঙ্গল-থৌনা অদু মপুং ওইনা কান্নহনসি, মফমসিগী নহারোলশিং থবক ফংহন্নবগী খুদোংচাবা পীনবা সরকারনা মখল কয়াগী থবক পায়খৎলি।

মরূপশিং,

নোর্থ ইস্তা লৈবাক অসিগী গ্রোথ ইঞ্জিন ওইবগী পাঙ্গল লৈ।

নোংম-নোংমগী ঐহাক্না থাজবা অসি অসুম্মক হেনগৎলক্লিবগী মরমদি নোর্থ ইস্ত নোর্থ ইস্ত পুম্বা ইং-তপ্পা ফীভমদা লাক্লে। মফম অসিদগী হান্না নেগতিব ওইবা পাওশিং লাক্লম্বা অদু হৌজিক্তি পীচ, প্রোগ্রেস অমসুং প্রোসপরিতীগী লাইশোন্না নিল্লে।

মায়কৈ অমরোমদা মনিপুরদা ব্লোকেদ অসি পুৱারীগী শরুক ওইখ্রে হায়না হৌজিক ঐখোয়গী মুখ্যমন্ত্রীজীনা হায়বিখ্রে, ঐহাক্কী মায়কৈদগীসু নোর্থ ইস্তকী মীশিংবু মরুওইনা মনিপুরগী নাগরিকশিংবু থম্মোয়নুংদগী ময়াম্না ঐখোয়গী মতেং পাংবিবগীদমক্তা হায়নীংঙাই লৈতনা থাগৎপা ফোংদোকচরি। ঐহাক্কী ৱাহৈশিংবু পাঙ্গল হাপ্পিদুনা ঙসি ব্লোকেদ অসি পুৱারীদা থোকখিবা থৌদোক ওইখ্রে অদুগা অসমদা চহি কয়াদগী লৈরম্বা হাৎন-শুনবগী মতম অদু লোইখ্রে। ত্রিপুরা অমসুং মিজোরামদসু নহারোলশিংনা হাৎন-শুনবগী থবক থাদোকখ্রে। হৌজিক ব্রু০রিয়াঙ্গদা চংজফম লৌরিবশিংনা অফবা পুন্সিগী মায়কৈরোমদা চংশিল্লি।

মরূপশিং,

হেন্না অফবা ইনফ্রাস্ত্রকচর, কনেক্তিবিতী অমসুং ইং-তপ্পা হায়বা ৱাফম অহুম অসি ফগৎলকপদা ইন্দস্ত্রীগী ওইনা, ইনভেস্তমেন্তকী ওইনা পাংথোকপা য়াবশিং অসি শরুর কয়া হেনগৎলকই। নোর্থ ইস্ততা ওর্গানিক্কী পোত্থোকশিং অমসুং ৱা, হায়রিবা পোৎশক অনিসিদগী আত্মনির্ভর ভারত অভিয়ান অসি মপাঙ্গল কনখৎহন্দুনা ঙম্বগী শক্তি লৈ। অদুগা ঙসি ঐহাক্না অদোম ময়ামগা ৱারী শান্নরিবা অসিদা নোর্থ-ইস্তকী লৌমী ইচিল-ইনাওশিংদা মরুওইবা ৱাফম অমা হায়জগে, ঐহাক্না তত্তনা হায়দুনা লাক্লি নোর্থ-ইস্ত অসি লৈবাক অসিগী ওর্গানিক কেপিতেল ওইবা য়াই। ঐহাক ঙসি ৱাফম অমগা হায়জগে, হৌখিবা নুমিৎ খরগী মমাংদা ঐহাক বৈজ্ঞানিক খরগা উন্নখি। লৌউবগী বৈজ্ঞানিকশিংগা উন্নখি। লৌউ-শিংউগী ইকোনোমিস্তশিংগা উন্নখি। মহাক্না য়াম্না নুংঙাইবা ৱাফম অমা হায়খি। মহাক্না ঐখোয়গী নোর্থ-ইস্তা লৌমীশিংনা পামোলীন গী থাফমদা চৎলুরবদি লৈবাক অসিদা অমদি নোর্থ-ইস্ততা অমসুং মফম অদুগী লৌমীশিংদা চাউরবা মতেং অমা ফংবা য়াই। ঙসি পামোলীনগী থাউ, পামোলীন ওইল অসি হিন্দুস্তান্দা এস্যুর্দ মার্কেৎনি। করিগুম্বা নোর্থ-ইস্তকী লৌমীশিংনা ওর্গানিক ফার্মিং তৌরবা অমসুং মদুদা পামোলীনগী ফার্মিংসু তৌরবা অদোম্না হিন্দুস্তান অসিগীদমক্তা কয়াদা চাউবা থৌগল অমা তৌবা ঙমগদগে হায়বদু খন্দুনা য়েংবীয়ু। ঐখোয়গী শেন্মিৎলোন অসিদা অনৌবা খোংজেল অমা পীগনি। ঐহাক্না রাজ্য সরকারশিংদসু মাগী-মাগী রাজ্যদা পামোলীন মিশন অসি শেমগৎপিয়ু। লৌমীশিং লাইরিক হৈহনশি, পুক্নিং থৌগৎসি অমসুং তুংদা লৌমীশিংদা মতেং পাংবগী মথৌ তারবদি মীফম অমা ফমদুনা য়োজনা শেম্বা য়াই, করিনো খরা খন্নবা য়াই। মরম অসিনা হৌজিক ঙসি মনিপুরগী ইচিল-ইনাওশিংদা মরুওইনা হায়জরি।

নোর্থ-ইস্তকী ইচিল-ইনাওশিংনা মতম পুম্নমক্তা লোকেলগীদমক্তা ভোকেল ওইদুনা লাক্লি। অদুগা ভোকেল খক্তা ওইহল্লোইদবনি। নোর্থ-ইস্তকী অথোইবা অমদি, মখোয়না লোকেলগীদমক্তা চাউথোকচৈ। ঐহাক নিংশিংলি, ঐহাক্না মসিগী স্কার্ফ অসি ইনবা মতমদা মফম অদুগী মীশিংনা চাউথোকচবা অমগা লোয়ননা মসিবু রিকোগনাইজ তৌখি। ইশাগী পোৎশক অমগীদমক্তা অসুক্কী মতিক চাউথোকচবা হায়বসি অচৌবা ৱাফম অমনি। মরম অসিনা নোর্থ-ইস্ততা হায়জগদবদি লোকেলগীদমক্তা ভোকেল ওইবীয়ু, ঐহাক্না তৌরোইদবনি হায়না খঞ্জৈ। মরমদি অদোমদি মদুদগী খোংকাপ মরী হেন্না চংশিল্লে। অদোমদি লোকেলগীদমক্তা য়াম্না চাউথোকচনীংঙাই ওইবা থবক তৌগদৌরি। মসি ঐখোয়গীনি হায়না অদোম্না ইশানা-ইশাগী ইকাই খুম্নবা অদু ফাওবিরি। অদুগা মসি থৌনানি।

অদুগা নোর্থ ইস্তকী প্রদক্তশিং ওইরম্বশিং অদুদগী অয়াম্বনা ভেল্যু এদিসন, প্রমোসন অমসুং মার্কেৎ এক্সেসতগী মরক-মরক্তা খঙদবা য়াওনরম্মি। হৌজিক আত্মনির্ভর ভারত অভিয়ান্দগী মফমদুগী পোত্থোকশিংদা ভেল্যু এদিসন অমসুং মাগী মার্কেত্তিংগীদমক্তা ক্লস্তর্স শেমগৎকদৌরি। মসিগী ক্লস্তর্স অসিদা এগ্রো স্তার্তঅপ্স অমসুং অতৈ ইন্দস্ত্রীশিংদা খুদোংচাবা খুদিংমক পীরগনি। অসিগুম্বসিদা নোর্থ ইস্তকী ওর্গানিক প্রদকশিং অসি লৈবাক অসিগী অমদি মীরৈবাক্কী কৈথেলশিং তান্না য়ৌহন্নবগীদমক্তা য়াম্না থুনা খুদোংচাবা ফংহল্লগনি।

মরূপশিং,

নোর্থ ইস্তকী মতিক-ময়াই অসি ভারতকী বেম্বু ইম্পোর্ত অসি লোকেল প্রদক্সন্না মহুৎ শিঞ্জিনবা ঙম্বগী মতিক ময়াই লৈ। লৈবাক অসিদা অগরবতীগী দিমান্দ অসি অসুক্কী মতিক লৈখ্রে। অদবু মসিগীদমক্তা লুপা কোতি কয়াগী ৱা ইম্পোর্ত তৌই।

মসিগী মওং অসি ওন্থোক্নবগীদমক্তা লৈবাকসিদা থবক কয়া অমা চত্থরি অমসুং মসিদগী কান্নবা কয়া অমা নোর্ত ইস্ত রাজ্যশিংনা ফংগনি।

মরূপশিং,

নোর্থ ইস্তা বেম্বু ইন্দস্ত্রী অসি ফগৎহন্নবগীদমক্তা হান্ননা বেম্বু ইন্দস্ত্রিএল পার্ক শেম্বগী অয়াবা পীখ্রে।  মসিদা নত্তনা নুমালীগরদা বেম্বুদগী বাইওফ্যুএল শুংনবা ফেক্তরীসু শারি। নেস্নেল বেম্বু মিশন্দগী লৌমীশিং, হেন্দিক্রাফকা মরী লৈনবা আর্তিস্তশিং অমসুং অতোপ্পা খুদোংচাবশিংগীদমক্তা লুপা কোতি কয়া ইনভেস্ত তৌরি। মসিদগী নোর্থ ইস্তকী নহারোলশিংদা, মফমসিগী স্তার্ত অপ্সতা কান্নহনগনি।

মরূপশিং,

নোর্থ ইস্ততা য়াংনা হোংলক্লিবা অসিদা রাজ্যশিংনা হেন্না থৱায় য়াওনা হোৎনগনি, কান্নবা লৌগনি, মনিপুরগী মমাংদা মপান নাইদ্রবা খুদোংচাবা লৈরি অমসুং মনিপুরগী খুদোংচাবা অসি লেম্না মাংহল্লোই হায়বসি ঐহাক্না চপ চানা থাজৈ। মসিদগী লৌমীশিং, হেন্দিক্রাফকা মরী লৈনবা আর্তিস্তশিং অমসুং অতোপ্পা খুদোংচাবশিংগীদমক্তা লুপা কোতি কয়া ইনভেস্ত তৌরি। মসিদগী নোর্থ ইস্তকী নহারোলশিংদা, মফমসিগী স্তার্ত অপ্সতা কান্নহনগনি। মনিপুরগী নহারোলশিংদা পরমনেন্তকী থাক্তা থবক ফংহন্নবা ঐখোয়না হোৎনগনি। হেল্থ, এজুকেসন, স্কিল দিবেলপমেন্ত, স্তার্ত-অপ্স অমসুং অতোপ্পা ত্রেদিংগীদমক্তা মফমসিদা সংস্থান কয়া অমা শারগনি। স্পোর্ত্স য়ুনিভর্সিতী অমসুং ৱর্ল্দ ক্লাস স্তেদিয়ম শাদুনা লৈবাক অসিগী স্পোর্ত তেলেন্ত অসি হেন্না ফগৎহন্নবগীদমক্তা অচৌবা হব অমা ওইরক্লি। মসিদা নত্তনা লৈবাক অসিগী অতৈ শরুকশিংদসু মনিপুর য়াওনা নোর্থ ইস্তকী নহারোলশিংদা হোস্তেলগা কোন্নবা হেন্না ফবা খুদোংচাবশিং ফংহল্লি। চাউখৎপা অমসুং থাজবগী লম্বি অসি হেন্না ফগৎহনগদবনি। অমুক্কা হন্না ময়াম পুম্নমক্তা অনৌবা ৱাতর প্রোজেক্ত অসিগীদমক্তা য়াইফ পাউজেল পীজরি।

মরুওইনা ঐখোয়গী ইমাশিং অমসুং ইচে-ইচলশিংগী য়াইফ-মঙ্গলনা য়ুমথোং-য়ুমথোং খুদিংদা ঈশিং ফংহন্নবগী মংলান অদু মপুং ফাহন্নবদা করিগুম্বা অপনবা অমত্তা লৈতনবা শক্তি পিনবীয়ু। লেপ্নখিবা মতমগী মমাংদা থবক পাংথোকপা ঙমজগে। মসিগীদমক্তা ইমাশিং অমসুং ইচে-ইচলশিংগী য়াইফ-মঙ্গল পিবীয়ু। অদোমগী য়াইফ-মঙ্গলদা শক্তি য়াম্না লৈ অমসুং রক্ষাবন্ধনগী কুহ্মৈসু ইমাংদা লৈরে অদুনা ঐহাক্না অদোম ময়ামগী য়াইফ-মঙ্গল পীবিনবা লেপ্তনা খুরুমজরি। অদোম ময়াম পুম্নমক্না নিংশিংবীয়ু। লু-নানবগী মতাংদসু নোর্থ ইস্ত অসি মতম পুম্নমক্তা লুনা লৌই, য়াম্না চেকশিল্লি। লৈবাক অসিগী মোদেল অমগী মওংদা ঐহাক্না থবক তৌজরি। অদুবু হৌজিক ঐখোয়না কোরোনাগী লান্থেং অসি থেংনদুনা গজ অনি লাপতোক্নবা, ফেস মাস্ক অমসুং হেন্দ সেনিতাইজেসন তৌবা, মপান্দা তীন শিত্তবা, মোৎহন্দবা অসিগুম্বা ৱাফমশিং অসি নীংশিংবীয়ু। ঙসি কোরোনা অসি তেংননবগী খ্বাইদগী মপাঙ্গল কনবা খুৎলাইদি মসিনি। মসিনা কোরোনা অসি লান্থেংনবদা অদুম্মক মতেং ওইদুনা লৈগনি।

হন্না-হন্না থাগৎচরি!!!