ভারতকী প্রধানমন্ত্রী

খুরুমজরি,

মধ্য প্রদেশকী থবক কল্লবা লৌমী ইচিল-ইনাওশিংবু ঐনা হন্না হন্না খুরুমজরি! ঙসিগী অখন্নবা থৌরম অসিদা মধ্য প্রদেশকী কাচিন-কোয়াদগী লৌমী মরূপশিংনা অমত্তা ওইনা পুল্লরি। রায়সেন্দা অমুক্তদা লৌমীশিংনা অসুক য়াম্না লাক্লি। দিজিতেল ওইবা মওংদসু লৌমী ইচিল-ইনাও লিশিং কয়ানা ঐখোয়গা পুল্লরি। হৌখিবা মতমদা লেন তাবা, মহৌশাগী অমাং অতানা মরম ওইদুনা এম.পি.গী লৌমীশিংদা মাংজবা ওইখি। ঙসি থৌরম অসিদা মধ্যপ্রদেশকী অদুগুম্বা লৌমী লাখ ৩৫গী বেঙ্ক একাউন্তা লুপা করোর ১৬০০ ত্রান্সফর তৌগদৌরি। ময়াই চাবা অমত্তা য়াওদনা, কমিশন অমত্তা লৌদনা। কৎ অমত্তা তৌদনা। চুমদ্রিং লৌমীশিংগী বেঙ্ক একাউন্ততা মতেং য়ৌহনগদৌরি। তেক্নোলোজীগী মরমদগী মসি ওইবা ঙম্লিবনি। অমসুং ভারতনা হৌখিবা চহি ৫-৬ অসিদা অনৌবা থৌরাং পাইখৎলিবা অসিগী ঙসি মালেম অপুনবদা শোন্নরি অমসুং মসিদা ঐখোয়গী লৈবাক্কী নহা ওইরিবা তেলেন্তকী চাউনা থৌদাং য়াওরি।

মরূপশা,

ঙসি মফম অসিদা থৌরম অসিদসু লৌমী কয়াদা কিসান ক্রেদিৎ কার্দ শিন্নরি। অহানবদা কিসান ক্রেদিৎ কার্দ অসি কিসান পুম্নমক্না ফংলমদে। ঐখোয়গী সরকারনা কিসান ক্রেদিৎ কার্দকী খুদোংচাবা লৈবাক অসিগী লৌমী খুদিংমক্তা ফংহন্নবগীদমক ঐখোয়না কাংলোনশিংদসু অহোংবা পুরকখি। হৌজিক লৌমীশিংবু লৌউ-শিংউগা মরী লৈনবা থবক্কীদমক লাইনা মথৌ তাবা শেনগং ফংলি। মসিদা মখোয়না অতোপ্পদগী অহেনবা শেন্দোইদা শেল পুবগী অৱাবা অদুদগীসু নান্থোক্লে।

মরূপশা,

ঙসি থৌরম অসিদা স্তোরেজ-কোল্দ স্তোরেজগা মরী লৈনবা ইনফ্রাস্ত্রকচর অমসুং খুদোংচাবশিং মীয়ামদা কৎথোকখ্রে অমদি উরেপ-উয়ুংসু তমখ্রে। ৱাফম অসি অচুম্বনি মদুদি লৌমীনা অদুক্কী মতিক হোৎনজরবসু, উহৈ-মনা-মশিং-চেং-হৱাইগী মতিক চাবা স্তোরেজ লৈত্রবদি, মওং চুম্না থমদ্রবদি য়াম্না অমাং-অতা থোকই অমসুং অমাং-অতা অসি শুপ্নগী লৌমীশিংগীদা নত্তে, মসি হিন্দুস্তান অপুনবগীনি। ঐনা লৈবাক অসিগী ললোন-ইতিক তৌবশিং, ইন্দস্ত্রীলিএলিস্তশিংদা হায়জরি মদুদি স্তোরেজগী অনৌবা মওং-মতৌ শেম্বদা, ফুদ প্রোসেসিংগী অনৌবা মচাক হাপ্পদা শরুক য়াবীয়ু, ইনভেস্ত তৌবা হেনগৎহনবীয়ু। মসি অচুম্বা মায়কৈদা লৌমীশিংগী সেবা তৌবা ওইগনি, লৈবাক্কী সেবা তৌবা ওইগনি।

মরূপশা,

ভারতকী লৌউ-শিংউ, ভারতকী লৌমী, হৌজিক শোৎথনা লৈবা য়াররোই। মালেমগী অচৌ অচৌবা লৈবাকশিংগী লৌমীশিংনা হৌজিক ফংলিবা অনৌবা খুদোংচাবশিং অসি ভারতকী লৌমীশিংদসু ফংহনবা হৌজিক থেংথবা তৌররোই। মতম্না ঐখোয়বু ঙাইবীদে। খোংজেল য়াংনা হেনগৎলক্লিবা মালেমগী ওইবা শক্তম অসিদা ভারতকী লৌমীনা, খুদোংচাবশিং ফংদনা, অনৌবা মওং-মতৌ য়াওদনা তুশোন-নাশোন্না লৈবা মতৌ অদু হৌজিক য়াবা ঙম্লরোই। হান্নদগী হৌনা য়াম্না থেংমল্লবনি। চহি ২৫-৩০গী তৌবা য়ারম্বা থবকশিং অদু, হৌজিক তৌবা তারি। হৌখিবা চহি ৬তা ঐখোয়গী সরকারনা লৌমীশিংগী মথৌ-তাবা খুদিংমক্তা পুক্নীং চংদুনা থবক পাইখৎখি।  হৌখিবা নুমিৎ কয়ানি অসিদা লৈবাক অসিদা লৌমীশিংগীদমক অনৌবা কাংলোন শেম্লিবা অসিগী মতাংদা য়াম্না খন্ন-নৈনরি। মসিগী ফার্ম লোশিং অসি খঙহৌদনা শেমখিবা নত্তে। হৌখিবা চহি ২০-২২দগী সরকার খুদিংমক্না মসিদা পাক-চাউনা খন্নখি। য়ামদ্রবদা লুপ খুদিংমক্না মসিগী মতাংদা খন্ন-নৈনখি।

লৈবাক অসিগী লৌমী, লৌমীগী লুপশিং, লৌউ-শিংউগী এক্সপর্তশিং, লৌউ-শিংউগী ইকোনোমিস্তশিং, লৌউ-শিংউগী সাইন্তিস্তশিং, ঐখোয়গী মফম অসিগী প্রোগেসিব ওইবা লৌমীশিংসু লেপ্তনা লৌউ-শিংউগী লমদা রিফোর্ম তৌনবা তান্দুনা লাক্লি। হান্না মখোয়গী মেনিফেস্তোদা রিফোর্মশিং অসিগী ৱারোল ইদুনা লাকখিবা, লৌমীশিংগী ভোৎ লোক্তুনা লাকখিবা, অদুবু করিসু তৌখিদবা, শুপ্নগী মসিবু য়ৈথোক্তুনতা লাকখিবা মখোয়দগী তশেংনা লৈবাক অসিগী লৌমীশিংনা পাউখুম তানগদবনি। অমসুং লৈবাক্কী লৌমীশিংনা, ঙাইদুনতা লাকখি। ঙসি লৈবাক অসিগী রাজনীতিগী দলশিংগী হান্নগী মেনিফেস্তো য়েংলুরগদি, মখোয়গী হান্নগী ৱারোল তারগদি, হান্না লৈবাক অসিগী লৌউ-শিংউগী থৌরাং পায়রম্বশিংগী চিথীশিং য়েংলুরগদি, ঙসি তৌরিবা ফার্ম রিফোর্মশিং অসি মদুদগী তোঙানবা নত্তে। মখোয়না শকখিবা ৱাশকশিং অদুমক লৌউ-শিংউগী রিফোর্মশিং অসিদা য়াওরি। ঐনা খল্লি, মখোয়না ৱারিবা অসি লৌউ-শিংউগী কাংলোনশিংদা করিগী রিফোর্ম তৌরিবনো হায়বসিদা নত্তে। মখোয়না ৱারিবসি মসিদনি মদুদি ঐখোয়না তৌবা ঙমদবা থবক অদু মোদীনা করম্না তৌরিবা, মোদীনা করিগী তৌরিবা। মোদীনা মসিগী ক্রেদিৎ করিগী ফংগদৌরিবা? ঐনা রাজনীতিগী দল পুম্নমক্তা খুৎ লোন্নদুনা হায়জরি – অদোম ক্রেদিৎ পুম্নমক অদোমগী নাক্তা থম্বীয়ু। অদোমগী হান্নগী মেনিফেস্তো পুম্নমক অদুদা ক্রেদিৎ পীজরি। ঐ ক্রেদিৎ পাম্মি। ঐহাক লৌমীগী পুন্সি লাইহনবা পাম্মি, চাউখৎপা পাম্মি, লৌউ-শিংউদা অনৌবা মওং পাম্মি। অদোম চানবীদুনা লৈবাক্কী লৌমীশিংবু লৌনম তৌবা তোকপীরো, মখোয়গী লান্না লমজিংবা তৌকপীরো।

মরূপশা,

কাংলোন অসি চৎনখিবা থা ৬-৭ ফারক্লে। অদুবু হৌজিক খঙহৌদনা চমম্নবা অমসুং মীনম্বগী লাং থাক্তুনা, মখোয়গী রাজনীতিগী লৌবুক খোয়নবা কুম্মৈ শান্নরি। লৌমীশিংগা লেংজুমদা নোংমৈ থমদুনা লান্দারি। অদোম্না উবীরমগনি, সরকারনা হন্না হন্না হংলি, মীতিংদসু হংলি, পব্লিক্লী হংলি ঐখোয়গী লৌউ-শিংউগী মন্ত্রীনা তি.ভি.গী ইন্তর্ভ্যু অমদা হাইরি, ঐ ইশানা হায়রি মদুদি অদোম্বু কাংলোন্দা করম্বা ক্লোজদা করি নুংঙাইতবা য়াওবগে হায়বীয়ু? নুংঙাইতবশিং অদু অদোম্না হায়বীয়ু, রাজনীতি দলশিংগী মফমদা অরেপ্পা পাউখুম অমত্তা লৈতে, অমসুং মসি দলশিং অদুগী অচুম্বনি।

মরূপশা,

মশামক্কী রাজনীতিগী মফম মুনবীখ্রবা মখোয়না, লৌমীশিংগী লম লৌবীখ্রগনি, লৌমীশিংগী লম লৌবীখ্রগনি হায়না কিহন্দুনা, মখোয়গী রাজনীতিগী মফম থিরি। ঙসি লৌমীশিংগী মিংদা খোংজং চংশিন্নবা থোরক্লিবশিংগী, সরকার পায়নবগী নত্ত্রগা সরকারগী শরুক অমা ওইনবগী তাঞ্জা ফংখি, মতম অদুদা মখোয়না করি তৌখি, মসি লৈবাক অসিনা নীংশিংবা মথৌ তাই। ঐনা ঙসি লৈবাক মীয়ামগী মাংদা, লৈবাক্কী লৌমীশিংগী মাংদ, মখোয় ময়ামগী ৱারী পুম্নমকসু লৈবাক মীয়ামগী মাংদা, ঐগী লৌমী ইচিল-ইনাওশিংগী মাংদা ঙসি হাংদোকপা পাম্মি, ঐ ফোংদোকপা পাম্মি।

মরূপশা,

লৌমীশিংগী ৱা ঙাংলিবশিং কয়াদা মীনুংশি লৈত্রিবনো হায়বসিগী খ্বাইদগী চাউবা খুদম স্বামীনাথন কমিতীগী রিপোর্তনি। রিপোর্ত লাকখি, অদুবু মখোয়না স্বামীনাথন কমিতীগী রিকোমেন্দেসনশিং অদু চহি নিপাল ফাওবা নমশিন্দুনা থমখি। লৌমীশিংনা খোংজং চংশিনখি, ইরাং হৌখি অদুবু মখোয় নাচুংবীখিদে। মখোয়গী সরকারনা লৌমীশিংদা চাদিং য়াম্না তৌদনবা লেপখি। মখোয়গীদমক্তদি লৌমী অসি লৈবাক্কী চাউথোকচনীংঙাই নত্তে, মখোয়না মখোয়গী রাজনীতি হেনগৎহন্নবগীদমক লৌমীশিংবু শিজিন্নৈ। অদুগা লৌমীশিংগীদমক্তা কৎথোক্লবা ঐখোয়গী সরকারনা লৌমীশিংবু অন্নদাতা ওইনা লৌই। ঐখোয়না ফাইলগী মপৈ মরক্তা লংথোক্তুনা থমলুরবা স্বামিনাথন কমিতীগী রিপোর্ত মপান্দা পুথোকখি অমসুং মদুগী রিকোমেন্দেসন হৌখি, লৌমীশিংদা অচংবদগী শরুক অমা মখাই হেন্না এম.এস.পি. পীরে।

মরূপশা,

মীখল খুদিংমক্কী মমাংদা মখোয়না লোন কোকপীনবগী ৱা ঙাংখি। লোন কয়াম্না কোকপীগদৌরিবনো?  লৌমী লোইনমক মসিনা কভর তৌবা ঙম্বরা? বেঙ্কতা চৎতবা অপীকপা লৌমীশিং, লোন লৌদবশিং, মখোয়গী মতাংদা মখোয়না অমুক্তসু খনখিবরা? মখোয়না থাননবগী হায়দুনা লাকখিবা শেনফম অদুমক লৌমীশিংদা খক য়ৌখিদে। লৌমীনা খনখি হন্দক্তি লোন লোইনা কোক্লগনি। মদুগী মহুত্তা মখোয়না ফংখি বেঙ্কশিংগী নোতিস অমসুং ফাননবগী ৱারেন্ত। লোন কোপীবগী খ্বাইদগী চাউনা কান্নবা কনানা ফংই? মখোয়গী নক্নবশিংনা। করিগুম্বা ঐখোয়গী মীদিয়াগী মরূপশিংনা খরগা হেন্না কুপথবীরগদি পুম্নমক অসিগী চহি ৮-১০ মমাংগী রিপোর্ত্তা মখোয়না মপুং ফাবা ৱারীশিং অদু ফংগনি। মসি মখোয়গী মচৎ ওইদুনা লাক্লি।

ঐখোয়গী সরকারনা হৌদোকখিবা পি.এম.-কিসান য়োজনা অসিনা চহি খুদিংগী লৌমীশিংদা চাউরাক্না লুপা করোর লিশিং ৭৫ ফংগনি। হায়বদি চহি ১০দা চাউরাক্না লুপা করোর লাখ ৭। লৌমীশিংগী বেঙ্ক একাউন্তা দাইরেক্ত ত্রান্সফর। লীকেজ অমত্তা য়াওদনা, কনাদসু কমীশন অমত্তা পীদনা।

মরূপশা,

নীংশিংবীয়ু, চহি ৭-৮গী মমাংদা য়ুরিয়াগী করি ফিভম ওইরম্বগে? অহিং চুপ্পা লৌমীশিংনা য়ুরিয়াগীদমক্তা পরেং লেপ্নরম্বরা লেপ্নরমদবরা? মফম কয়াদা, য়ুরিয়াগীদমক্তা লৌমীশিংদা লাথীচার্জ তৌবগী পাউ লাকখিবরা নত্ত্রগা লাকখিদবরা? য়ুরিয়াগী ব্লেক মার্কেতিং তৌরম্বরা-তৌরমদবরা। লৌমীশিংগী মহৈ-মরোংশিং, হার ৱাৎপদগী মাং তাক্লমখি অদুবু মখোয়গী থোমোইদি পেৎপা লৈখিদে। মসি লৌমীশিংদা ওৎপা নত্ত্রা? ঙসি ঐ মসি উবদা অঙকপা পোকই মদুদি ফিভম অসি ওইহনখ্রিবা মখোয় ময়াম অদুনা, ঙসি রাজনীতিগী মিংদা লৌ উনবা থোরক্লি।

মরূপশা,

য়ুরিয়াগী অৱাবগী পাম্বৈ মমাংদা লৈরমদবরা? করিগুম্বা লৌমীশিংগী চৈনা, মখোয়গী অৱাবশিংদা খজিক্তা ফাওবা মীনুংশি পোকপীরম্লবদি য়ুরিয়াগী অৱাবা লৈরম্লোইদবনি। ঙসি য়ুরিয়া কোন্নদবগী পাউ লাক্ত্রে, য়ুরিয়াগীদমক্তা লৌমীশিংনা লিচৈ চানদ্রে। ঐখোয়না লৌমীশিংগী অৱাবা অসি কোকহন্নবা পুকচেল শেংনা থবক তৌখি। ঐখোয়না ব্লেক মার্কেৎ থিংখি, অচেৎপা খোংথাং লৌখৎখি, শেঞ্জা-থুমজা লাকশিনখি। ঐখোয়না য়ুরিয়া লৌমীশিংগী লৌবুক্তা য়ৌহন্নবা লেপ্নখি। ঐখোয়না লৌমীশিংগী অৱাবা কোকহন্নবা থমোই শেংনা হোৎনখি। ঐখোয়না লোন্না য়োনবা থিংখি, অচেৎপা খোংথাং লৌখৎখি, শেঞ্জা-থুমজা লাকশিনখি। ঐখোয়না লেপখি মদুদি য়ুরিদা লৌবুক খক্তদা চৎকদবনি। মখোয়গী মতমদা সবসীদীদি লৌমীশিংগী মিংদা থোকখি অদুবু মদুগী কান্নবদি অতোপ্পনা লৌখি। ঐখোয়না শেঞ্জা-থুমজাগী অসিগুম্বা পুংবা অসিবসু থিংজিনখি। ঐখোয়না য়ুরিয়াদা চাম্মদা চাম্মা নীম তোৎখি। তেক্নিক অরিবা ওইবগী মিংদা থিংজিনখ্রবা, লৈবাক্কী অচৌ অচৌবা হারগী ফেক্তরীশিং অদু ঐখোয়না অমুক হন্না হৌদোক্কদৌরি। মথংগী চহি খরা অসিদা য়ু.পি.গী গোরখপুরদা, বিহারগী বরৌনীদা, ঝারখন্দগী সিন্দরীদা, ওরিশাগী তালচেরদা, তেলঙ্গনাগী রামাগুন্দমদা অনৌবা ফর্তিলাইজর প্লান্তশিং হৌদোক্লগনি। লুপা করোর ৫০-৬০ শুপ্নগী থবক অসিদা চাদিং তৌরি। অনৌবা ফর্তিলাইজর প্লান্তশিং অসিনা থবক্কী তাঞ্জা লাখ কয়া পুথোক্কনি, ভারতকী য়ুরিয়াগী পোৎথোক্তা আত্মনির্ভর ওইহন্নবগীদমক্তা মতেং পাংগনি। অতোপ্পা লৈবাক্তগী য়ুরিয়া পুশিল্লকপদা ভারতকী লুপা করোর কয়া চাদিং তৌবা অদু, হন্থহল্লগনি।

মরূপশা,

অদুগুম্বা হারগী ফেক্তরীশিং অদু হৌবদা মখোয়বু মমাংদা কনানসু কৈদৌনুংদা থিংবা তৌখিদে। কনানসু য়াবা তৌখিদে মদুদি তেক্নোলোজী হাপকনু। অদুবু মসি অপাম্বা নত্তে, পোলিসী নত্তে, লৌমীশিংগী মফমদা থমোই শেংবা নত্তে। লৌমীশিংদা মীনম্বা ৱাশক শকপশিং লৈঙাক্তা লাকপা, মীনম্বা ৱাশক শক্তুনা লৈরগা, মপান চাদুনা লৈবা, মসি মখোয় ময়ামগী থবক্নি।

মরূপশা,

করিগুম্বা অরিবা সরকারশিংনা হোৎনরম্লবদি ঙসি লৈবাক অসিদা চাউরাক্না অচৌবা ইথৈ-লৌখোংগী প্রোজেক্ত ১০০ চহি তরাগী খুজিং কয়া পন্দুনা লৈরম্লোই। খনবীয়ু, দাম শাবা হৌখিবদুনা চহি কুনমঙা ফাওবা শারি। মসিদসু মতম অমসুং পৈশা, হাইগৎতনা মাংলি। হৌজিক ঐখোয়গী সরকারনা লুপা করোর লিশিং কয়া চাদিং তৌদুনা হায়রিবা ইথৈ-লৌখোংগী প্রোজেক্তশিং অসি মিশন মোদতা লোইশিন্নবা হোৎনরি। ঐখোয়না লৌবুক খুদিংদা ঈশিং য়ৌহন্নবা হোৎনরি।

মরূপশা,

লৌমীশিংগী ইনপুৎ কোস্ত হন্থহন্নবা, অচংবা হন্থহন্নবা, লৌ উবদা চংবা মমল হন্থহন্নবা মসিগীদমক্তসু সরকার অসিনা লেপ্তনা হোৎনরি। লৌমীশিংদা সোলর পম্প য়াম্না হোংবা মমলদা পীননবা লৈবাক অপুনবদা য়াম্না চাউবা খোংজং চৎথরি। ঐখোয়না ঐখোয়গী অন্নদাতাবু উর্জাদাতাসু ওইহন্নবগীদমক্তা থবক তৌরি। মসিদা নত্তনা ঐখোয়গী সরকারনা মহৈ-মরোং পুথোক্লিবা লৌমীশিংগা লোইননা হয়িংখোই য়োকপা, শা-শন য়োকপা অমসুং ঙা য়োকপশিংদসু অদুক্কী মতিক শৌগৎলি। হান্নগী সরকারগী মতমদা লৈবাক অসিদা খোইহীগী পোৎথোক অসি চাউরাক্না মেত্রিক তন লিশিং ৭৬ পুথোকখি। হৌজিক লৈবাক অসিদা খোইহীগী পোৎথোক মেত্রিক তন লাখ ১ লিশিং ২০দগীসু হেন্না পুথোক্লি। লৈবাক্কী লৌমীনা মমাংগী সরকারগী মতমদা পুথোক্লম্বা খোইহী অদুগী শরুক অনি ঙসি পুথোক্লি।

মরূপশা,

এক্সপর্তশিংনা হায়রি মদুদি এগ্রীকলচরদা ঙা য়োকপা অসি খ্বাইদগী মমল চংদনা খ্বাইদগী য়াম্না শেন্দোং ফংবা সেক্তর অদুনি। ঙা য়োকপদা পুক্নীং থৌগৎনবা ঐখোয়গী সরকারনা ব্লু রিবোলুশন স্কীম পায়খৎলি। মতম খরগী মমাংদা লুপা করোর লিশিং ২০গী প্রধান মন্ত্রী মৎস্য সম্পদা য়োজনাসু হৌদোক্লে। হোৎনিরিবশিং অদুগী ফলনা লৈবাক্কী ঙা পুথোকপগী মমাংগী রিকোর্দ পুম্নমক থুখাইখ্রে। হৌজিক লৈবাক অসিনা, মথংগী চহি অহুম-মরি অসিদা ঙা পুথোকপদা লুপা করোর লাখ অমদগী হেন্না ওইহন্নবগী পান্দমদা থবক পায়খৎলি।

ইচিল-ইনাওশিং,

ঐনা থাজনা হায়জরি মদুদি ঐখোয়না হন্দক্তা হৌদোকখিবা ফার্ম রিফোর্মশিং অসিদা থাজনীংঙাই ওইদবগী মরম য়াওদবতা নত্তনা মীনম্বগীসু মফম য়াওদে। ঐনা হৌজিক অদোমদা লৌউ-শিংউগী রিফোর্মশিংগী মতাংদা ঙাংলিবা অসিদা খ্বাইদগী চাউবা মীনম্বগী মতাংদা হায়জগে। হন্না হন্না মীনম্বা অসিবু পল্লি – হৌনা হৌনা ঙাংলি। তাঞ্জা হেক ফংবগা ঙাংলি। মথোং-মরম খঙদনা ঙাংনরি। ঐনা মমাংদসু হায়খ্রে, স্বামীনাথন কমিতীগী রিপোর্ত অদু হৌনবগী থবক ঐখোয়গী সরকার অসিমক্না তৌখি। ঐখোয়না এম.এস.পি. লৌথোক্কে হায়রবদি স্বামীনাথন কমিতীগী রিপোর্ত করিগী চৎনহল্লুগনি? অদুগা অমনা ঐখোয়গী সরকারনা এম.এস.পি.গী মতাংদা অদুক্কী মতিক লুম্না লৌরি মদুদি মরু হুন্দ্রিঙৈগী মমাংদগী এম.এস.পি. লাওথোকই। মসিনা লৌমীশিংদসু লাইথোকহল্লি, মখোয়সু হান্ননা লৌরোক অসিদা এম.এস.পি. অসুক ফংগনি হায়বদু খঙবা ঙম্মি। মখোয়না অহোংবা খরা পাংথোকপা পাম্লবদি মখোয়না খুদোংচাবা অদু ফংলি।

মরূপশা,

কাংলোন অসি চৎনখিবা থা ৬তগী হেন্না মতম হৌখ্রে। কাংলোন শেম্লবা মতুংদসু মমাংদা তৌরম্বা অদুগুম্না এম.এস.পি. লাওথোকখি। কোরোনা লাইচৎকী লানফম মনুংদসু থবক অসি হান্নগুম্না পাংথোকখি। এম.এস.পি.দা লৈবসু হান্ননা তৌনখিবা কৈথেলশিংদা পাংথোকখি। কাংলোন হৌদোক্লবা মতুংদসু এম.এস.পি. লাওথোক্লি, এম.এস.পি.দা সরকারনা লৈরি, অদুগুম্বা মন্দীশিং অদুদা তোরি, অদুনা কনাগুম্বা অশিংবা মীওই অমনা এম.এস.পি. থিংজিল্লগনি হায়বা ৱাফম অসি থাজগদ্রা? অমসুং মরম অসিনা ঐনা হায়জরি, মসিদগী হেনবা মীনম্বা অমমুক লৈত্রে। মসিদগী হেন্না চাউবা শারৌ অমমুক লৈররোই। অমসুং মরম অসিনা, ঐনা লৈবাক অসিগী লৌমী খুদিংমক্তা থাজবা পীজরি মদুদি হান্না পীরম্বা এম.এস.পি. অদুগুম্না অসুম্মক পীগনি, এম.এস.পি. থিংলোই, লোইরোই।

মরূপশা,

হৌজিক ঐ অদোমদা মশিং অদু পীজরি, মদুনা অশেংবা অদু খঙনরগনি। হৌখিবা সরকারগী মতমদা গেহুদা এম.এস.পি. ক্বিন্তন অমদা লুপা ১৪০০ ওইরম্মি। ঐখোয়গী সরকারনা গেহু ক্বিন্তন অমদা লুপা ১৯৭৫ এম.এস.পি. পীরি। হৌখিবা সরকারগী মতমদা চেংদা এম.এস.পি. ক্বিন্তন অমদা লুপা ১৩১০ ওইরম্মি। ঐখোয়গী সরকারনা চেং ক্বিন্তন অমদা লুপা ১৮৭০ এম.এস.পি. পীরি। হৌখিবা সরকারদা চনাল ক্বিন্তন অমদা এম.এস.পি. লুপা ১৫২০ ওইরম্মি। ঐখোয়গী সরকারনা চনাল ক্বিন্তন অমদা লুপা ২৬৪০ এম.এস.পি. পীরি। হৌখিবা সরকারগী মতমদা হৱাই মুসোরীগী এম.এস.পি. লুপা ২৯৫০ ওইরম্মি। ঐখোয়গী সরকারনা হৱাই মুসোরী ক্বিন্তন অমদা এম.এস.পি. লুপা ৫১০০ পীরি। হৌখিবা সরকারগী মতমদা চানাদা এম.এস.পি. লুপা ৩১০০ ওইরম্মি। ঐখোয়গী সরকারনা হৌজিক চানা ক্বিন্তন অমদা এম.এস.পি. লুপা ৫১০০ পীরি। হৌখিবা সরকারগী মতমদা হৱাই মাইরোংবীগী এম.এস.পি. ক্বিন্তন অমদা লুপা ৪৩০০ ওইরম্মি। ঐখোয়গী সরকারনা হৱাই মাইরোংবীগী এম.এস.পি. ক্বিন্তন অমদা লুপা ৬০০০ পীরি। হৌখিবা সরকারগী মতমদা হৱাই মুগকী এম.এস.পি. ক্বিন্তন অমদা লুপা ৪৫০০ ওইরম্মি। ঐখোয়গী সরকারনা হৱাই মুগকী এম.এস.পি. ক্বিন্তন অমদা লুপা ৭২০০ পীরি।

মরূপশা,

মসি ৱাফম অসিগী খুদম্নি মদুদি ঐখোয়গী সরকারনা এম.এস.পি.বু মতম মতমগী মতুং ইন্না হেনগৎহনবদা কয়াদা পুক্নীং চংখিবগে হায়বদু, কয়াদা লুম্না লৌখি হায়বদু। এম.এস.পি. হেনগৎহনবগা লোইননা সরকারনা ৱাফম অসিদসু শাফু পীখি মদুদি ফৌ-চেং লৈবা অদুক্কী মতিক য়াম্না এম.এস.পি.দা পাংথোক্কদবনি। মমাংগী সরকারনা মখোয়গী চহি মঙাদা লৌমীশিংদা চাউরাক্না ফৌ মেত্রিক তন লাখ ১৭০০ লৈখি। ঐখোয়গী সরকারনা মসিগী চহি মঙাদা ফৌ মেত্রিক লাখ তন ৩০০০ লৌমীশিংদগী এম.এস.পি.দা লৈখি, চাউরাক্না শরুক অনি। হৌখিবা সরকারনা মখোয়গী চহি মঙাদা চাউরাক্না মাইরোংবী মেত্রিক তন লাখ মরিরোম লৈখি। ঐখোয়গী সরকারনা মসিগী চহি মঙাদা মেত্রিক তন লাখ ৫৬তগী হেন্না এম.এস.পি.দা লৈখি। হৌজিক খনবীয়ু, কয়াদা খেন্নরিবনো!!! হায়বদি ঐখোয়গী সরকারনা শুপ্নগী এম.এস.পি.দা হেনগৎহনখি, মদুদা নত্তনা মশিং য়াম্না লৌমীশিংদগী মখোয়গী পোৎথোক এম.এস.পি.দা লৈখি. মসিগী খ্বাইদগী চাউবা কান্নবা অদু মসি ওইরে মদুদি লৌমীশিংগী লৌবুক্তা হান্নগা য়োংনরুবদা পৈশা য়াম্না য়ৌবা ঙম্লে। হৌখিবা সরকারগী চহি মঙাদা লৌমীশিংবু ফৌ অমসুং গেহুগী এম.এস.পি.দা লৈবদা লুপা লাখ ৩ লিশিং ৭৪ ফংখি। ঐখোয়গী সরকারনা অদুক্কী মতম অদুদা গেহু অমসুং ফৌ লৈদুনা লৌমীশিংদা লুপা করোর লাখ ৮ হেন্না পীখি।

মরূপশা,

রাজনীতিগীদমক্তা লৌমীশিংবু শিজিন্নবা মীয়াম্না লৌমীশিংগা লোইননা করি লমচৎ চৎখি, মসিগী অতোপ্পা খুদম অমদি, হৱাইগী লৌফমনি। ২০১৪গী মতম অদু নীংশিংবীয়ু, মতৌ করম্না লৈবাক অসিদা হৱাইগী অৱাৎপা ওইরম্বগে হায়বদো। লৈবাক অসিদা ওইখিবা অৱাবা মরক অদুদা মীরমদগী পুশিল্লক্লম্মি। চাকখুম খুদিংমক্কী চাদিং হৱাইগী হেনগৎলক্লিবা মমলগা লোইননা হেনগৎখি। মালেমদা খ্বাইদগী য়াম্না হৱাই পুথোকপা লৈবাক অদুদা, হৱাই পুথোকপা লৌমীশিংগী মাংননবা তৌবদা মখোয়না অখাকপা অমত্তা থমখিদে। লৌমীশিং ৱাখি অমসুং মখোয়না নুংঙাইনা লৈথোকখি, অতোপ্পা লৈবাক্তগী হৱাই চেনবগী থবক্তা মখোয় নুংঙাইবা পোকখি। ৱাফম অসি ঐনা য়াজৈ মদুদি করিগুম্বদা মহৌশাগী খুদোংথিবশিং লাকপদা, খঙহৌদনা খুদোং থিবশিং লাকপদা, মীরমদগী হৱাই পুশিল্লকপা য়াই লৈবাক্কী মীয়াম্বু চারা হেলহন্দুনা থম্বা য়ারোই অদুবু মতম চুপ্পা অসুম্না করিগী তৌগনি?

মরূপশা,

মখোয়না হৱাইদা এম.এস.পি.সু য়াম্না পীখিদে অমসুং মদু লৈবসু তৌখিদে। ফিভম অসি ওইখি মদুদি ২০১৪গী মমাংগী চহি ৫ মখোয়গী চহি ৫ মখোয়না শুপ্নগী হৱাই মেত্রিক তন লাখ অমা মখাইতমক লৌমীশিংদগী লৈখি। মশিং অসি নীংশিংদুনা থম্বীয়ু। শুপ্নগী হৱাই মেত্রিক তন লাখ অমা মখাইতমক। ২০১৪দা ঐখোয়গী সরকার লাকপদগীদি ঐখোয়না পোলিসীসু হোংদোকখি অমসুং অচৌবা ৱারেপসু লৌখি। ঐখোয়না লৌমীশিংবুসু হৱাই পুথোক্নবা পুক্নীংসু থৌগৎখি।

ইচিল-ইনাওশিং,

ঐখোয়গী সরকারনা হান্নগা য়েংনরুবদা হৱাই মেত্রিক তন লাখ ১১২ এম.এস.পি.দা লৈখ্রে। খনবীয়ু, মখোয়গী মতমদা লাখ অমা মখাই ওইরম্বা অদুদগী ঐখোয়না মেত্রিক তন লাখ ১১২দা পুরকপা! মখোয়না মখোয়গী চহি ৫দা হৱাই পুথোকপা লৌমীশিংদা লুপা কয়া পীখিবা? লুপা করোর ৬ মখাই পীখি, ঐখোয়গী সরকারনা করি তৌখি, ঐখোয়না চাউরাক্না লুপা করোর লিশিং ৫০ হৱাই পুথোকপা লৌমীশিংদা পীখি। ঙসি হৱাই পুথোকপা লৌমীশিংসু পৈশা হেন্না ফংলে, হৱাইগী মমলসু হন্থরে, মসিদগী লাইরবদা হকথেংননা কান্নবা ফংহল্লে। লৌমীশিংদা এম.এস.পি. পীবা ঙমদবশিং, এম.এস.পি.দা নীংথিনা লৈবা ঙমদবশিং অদুনা এম.এস.পি.দা লৌমীশিংবু লান্না লমজিংলি।

মরূপশা,

লৌউ-শিংউগী রিফোর্মশিংগা মরী লৈননা মীনম্বা অমসুং শন্দোক্লি এ.পি.এম.সি. হায়বদি ঐখোয়গী মন্দীশিংগী মতাংদা। ঐখোয়না কাংলোন্দা করি তৌই? ঐখোয়না কাংলোন্দা লৌমীশিংবু মনীং মখা তৌহল্লি, অনৌবা ওপ্সনশিং পীরি। করিগুম্বা লৈবাক অসিদা সাপোন য়োনগে হায়রবদি সরকারনা শুপ্নগী দুকান অদুখক্তদা য়োনগদবনি হায়না লেপথোক্তে। কনাগুম্বনা স্কুতর য়োনগে হায়রবদি সরকারনা মদু শুপ্নগী দীলর অদুদা য়োনগদবনি হায়না লেপথোক্তে। অদুবু হৌখিবা চহি ৭০দগী সরকারনা লৌমীশিংদা মসি শোইদনা হায়দুনা লাক্লি মদুদি অদোম্না মন্দী অসি খক্তদা অদোমগী চেং-হৱাই য়োনবা য়াগনি। মন্দীদা নত্তনা লৌমীশিংনা পাম্লবসু মখোয়গী মহৈ-মরোংশিং অদু অতৈ মফম অমত্তদা য়োনবা য়াদে। অনৌবা কাংলোন্দা ঐখোয়না শুপ্নগী মসিখক হায়খি মদুদি, করিগুম্বা মখোয়না কান্নবা উরবদি মমাংগী মতৌগুম্না চৎতুনা মন্দীদা য়োনবীয়ু অমসুং মপান্দা কান্নবা ফংলবদি, মন্দীগী মপান্দসু চৎনবগী মখোয়গী হক ফংফম থোকই। মখোয়গী অপাম্ববু, দেমোক্রেসী ঐগী লৌমী ইচিল-ইনাওশিংনা হক খরা অসি ফাওবা লৈরোইদ্রা।

হৌজিক লৌমীনা কান্নবা ফংগদবা মফমদা, মখোয়গী পোৎথোক য়োনগনি। মন্দীসু হাংলে মন্দীদা চৎতুনা চোনবা য়ারে, হান্না তৌরম্বা অদুসু তৌবা য়ারে। লৌমীশিংনা অপাম্বা মতুং ইন্না তৌগনি। অনৌবা কাংলোনগী মতুংদগীদি লৌমীশিংনা মখোয়গী কান্নবা য়েংদুনা মখোয়গী পোৎথোক য়োনবসু হৌখ্রে। হন্দক্তা মফম অমদা ফৌ থাবা লৌমীশিংনা পুনশিন্দুনা চেংগী কম্পনী অমগা য়ানবা পুরকখি। মদুদগী মখোয়গী চাগা চাদা ২০ হেনগৎখি। মফম অমদনা আলুগী লৌমী লিশিং অমনা পুনশিন্দুনা কম্পনী অমগা য়ানবা পুরকখি। কম্পনী অদুনা মখোয়দা অচংবা মমলদগী চাদা ৩৫ হেনবগী গরেন্তী পীখি। অতোপ্পা মফম অমগী পাউদা পাখি মদুদি লৌমী অমনা লৌবুক্তা হৌবা মোরোক অমসুং লফোই, হকথেংননা কৈথেলদা য়োনবদা মহাক্না শরুক অনিগী মমল ফংখি। অনৌবা কাংলোনগী মতুংদা, কাংলোন চৎনখিবা থা তরুক ফারে, হিন্দুস্তানগী কাচিন অমা হেক্তদা মফম অমা হেক্তদসু মন্দী অমত্তা থিংবা তৌদে। অদুগা করিগী মীনম্বা শন্দোক্লিবা? অশেংবদি ঐখোয়গী সরকারনা এ.পি.এম.সি. অনৌবা ওইহনবদা, মখোয়বু কম্প্যুতরাইজ তৌবদা লুপা করোর ৫০০দগী হেন্না চাদিং তৌরি। অদুগা এ.পি.এম.সি. অসি লোইশিনবগী ৱাফম কদাইদগী লাক্লিবা? করিসু খন্থবা তৌদনা, মীনম্বতা ঙাংলি, হন্না হন্না ঙাংলি।

মরূপশা,

অনৌবা লৌউ-শিংউগী রিফোর্মশিংদা ফার্মিং এগ্রীমেন্তকী মতাংদা অহুমশুবা খ্বাইদগী চাউবা মীনম্বা অমা শন্দোক্লি। লৈবাক অসিদা ফার্মিং এগ্রীমেন্ত অসি অনৌবা নত্ত্রে? অনৌবা কাংলোন শেমদুনা খঙহৌদনা ঐখোয়না ফার্মিং এগ্রীমেন্ত অসি চৎনহনবরা? নত্তে। ঐখোয়গী লৈবাক্তা মমাংঙৈদগী হৌনা ফার্মিং এগ্রীমেন্তকী থৌরাং চৎথরক্লি। অমা-অনিদা নত্তে রাজ্য কয়ামরুমদা হান্নদগী ফার্মিং এগ্রীমেন্ত লৈরক্লি। হৌজিক কনানো অমনা ঐঙোন্দা মার্চ ৮, ২০১৯গী পাউ-চে অমগী রিপোর্ত থারকখি। মদুদা পঞ্জাবকী কংগ্রেস সরকার, লৌমীশিং অমসুং মল্তীনেস্নেল কম্পনী অমগী মরক্তা লুপা করোর ৮০০গী ফার্মিং এগ্রীমেন্ত পাংথোকখি, মদুবু তরাম্না ওক্নখি। পঞ্জাবকী ঐগী লৌমী ইচিল-ইনাওশিংগী লৌবুক্তা অদুক্কী মতিক ইনভেস্তমেন্ত য়াম্না তৌবা, মসি ঐখোয়গী সরকারগীদমক্তসু হরাওনীংঙাই ৱাফম্নি।

মরূপশা,

লৈবাক অসিদা ফার্মিং এগ্রীমেন্তকা মরী লৈনবা হান্না চৎনরম্বা মওংশিং অদু, লৌমীশিংদা খুদোংথিবা য়াম্না ওইহল্লম্মি, রিস্ক য়াম্না লৈরম্মি। অনৌবা কাংলোন্দা ঐখোয়গী সরকারনা ফার্মিং এগ্রীমেন্ততা লৌমীশিংদা ঙাক-শেল পীননবা ৱারোল য়াওহল্লে। ঐখোয়না লেপ্লে মদুদি ফার্মিং এগ্রীমেন্ততা খ্বাইদগী চাউবা কান্নবা লৌমীশিংগী ওইগনি। ঐখোয়না কাংলোনগী মতুং ইন্না লেপথোক্লে মদুদি লৌমীশিংগা এগ্রীমেন্ত তৌনরিবা মখোয়গী মথৌদগী নান্থোক্তুনা চেনবা য়ারোই। লৌমীশিংদা মখোয়না শক্লম্বা ৱাশকশিং অদু, স্পোন্সর তৌরিবশিং অদুনা, শরুক য়ারিবশিং অদুনা মদু মপুং ফাহনবা তাই। অনৌবা লৌমীশিংগী কাংলোন চৎনরবা মতুংদা খুদম কয়া মাংদা চোংথোরক্লি মদুদা লৌমীশিংনা মখোয়গী মফম অদুগী এস.দি.এম.দা ৱাকৎখি অমসুং নুমিৎ খরনিগী মনুংদা, লৌমীশিংনা মখোয়গী শেন্দোনশিং ফংখি।

মরূপশা,

ফার্মিং এগ্রীমেন্ততা শুপ্নগী মহৈ-মরোং নত্ত্রগা পোৎথোকশিংগী মতাংদা য়ানবা পুরকই। লৌফমদি লৌমীশিংগী অদুম্মক ওই, এগ্রীমেন্ত অমসুং লৌফমগা করিসু মরী লৈনদে। মহৌশাগী খুদোংথিবা লাক্লবসু লৌমীশিংনা পৈশা মপুং ফানা ফংলে। অনৌবা কাংলোনগী মতুং ইন্না, করিগুম্বা খঙহৌদনা শেন্দোং হেনগৎলক্লবদি, হেনগৎলক্লিবা শেন্দোং অদুদসু লৌমীশিংগী শরুক য়াওহল্লি।

মরূপশা,

এগ্রীমেন্ত তৌগদ্রা নত্ত্রগা তৌরোইদ্রা, মসি কম্পল্সরী নত্তে। মসি লৌমীশিংগী অপাম্বনি। লৌমীশিংনা পামলবদি তৌগনি, পামদ্রবদি তৌরোই অদুবু কনাগুম্বনা লৌমীশিংদা থমোই শেংদবা তৌদনবা, লৌমীশিংগী অচম্বা মতৌ অদুগী খুদোংচাবা লৌখিদনবা মসিগীদমক্তা কাংলোন থৌরাং তৌরি। অনৌবা কাংলোন্দা চেকশিনবা খরা য়াওরিবা অসি, মদু স্পোন্সর তৌবশিংগীনি লৌমীশিংগী নত্তে। স্পোন্সর তৌবশিংনা এগ্রীমেন্ত লোইশিনবগী হক লৈতে। করিগুম্বা মখোয়না এগ্রীমেন্ত লোইশিল্লবদি মখোয়না লৌমীশিংদা চাউনা ফাইন থিগদবনি। অদুবু এগ্রীমেন্ত অদু, লৌমীশিংনা লোইশিনবা পাম্লবদি, মতম অমা হেক্তদা ফাইন অমত্তা য়াওদনা লৌমীনা মখোয়গী ৱারেপ লৌবা য়াই। রাজ্য সরকারশিংদা ঐনা ফোংদোক্লি মদুদি অরাইবা লোন্দাদা, অরাইবা মওংদা খঙবা ঙমগদবা ফার্মিং এগ্রীমেন্তকী ফোর্মেৎ অমা শেম্লগা লৌমীশিংদা পীগদবনি মরমদি কনানসু লৌমীশিংবু মীনম্বা ঙমদনবনি।

মরূপশা,

ঐহাক নুংঙাইবা পোকই মদুদি লৈবাক অপুনবা অসিদা লৌমীশিংনা অনৌবা লৌউ-শিংউগী রিফোর্মশিং অসিবু লৌশিনবতা নত্তনা অরানবা শন্দোক্লিবশিং অদুসু মকোক্তগী হৌনা য়াদ্রি। হৌজিক ফাওবা চিংনবা খরতা ওইরবসু ফাওরিবা মখোয়দা ঐনা হায়জরি মদুদি অদোম অমুক্কা হন্না খন্থবীয়ু। ওইসু ওখিদবা, ওইসু ওইররোইদবা, মদুগী অরানবা অমদি অকিবা শন্দোক্লিবা মীওইশিংদগী অদোম চেকশিন্না লৈবীয়ু, অদুগুম্বা মীওইশিং অদু ঐগী লৌমী ইচিল-ইনাওশিংনা মশক খঙদোকপীয়ু। মখোয়না মতম পুম্নমক্তা লৌমীশিংদা মীনমদুনতা লাকখি। মখোয়বু শিজিন্নখি অমসুং ঙসিসু মদু তৌরি। ঐগী ৱাফম অসিগী মতুংদসু, সরকারনা হোৎনরিবশিং অসিগী মতুংদসু, কনাগুম্বনা চিংনবীরবদি ঐনা ইকোক নোঞ্জদুনা, লৌমী ইচিল-ইনাওশিংগী মাংদা খুৎ লোন্নদুনা, য়াম্না নোল্লুক্না, লৈবাক অসিগী লৌমীশিংগী কান্ননবগীদমক, মখোয়গী অৱাবসিংগী পাম্বৈ পুথোক্নবা, হিরম খুদিংমক্তা ৱারী শাননবা শেম-শাজরি। লৈবাক অসিগী লৌমী, লৈবাক অসিগী লৌমীগী কান্নবা, ঐখোয়গীদমক্তদি খ্বাইদগী মরুওইবশিংগী মনুংদা অমনি।

মরূপশা,

ঐনা ৱাফম কয়ামরুমদা পাক-শন্না ঙাংজখ্রে। হিরম কয়ামরুমগী অচুম্বা লৈবাক্কী মাংদা থমখ্রে। হৌজিক দিসেম্বর ২৫দা, ইকাই খুম্নজরবা অতলজীগী মপোক কুমওন্দা অমুক্কা হন্না ঐনা হিম অসিদা লৈবাক অপুনবগী লৌমীশিংগা লোইননা পাক-চাউনা খন্নজগনি। নুমিৎ অদুদা পি.এম. কিসান সম্মান নিধিগী অতোপ্পা ইন্সতোলমেন্ত অমা লৌমী করোর কয়াগী বেঙ্ক একাউন্ততা অমুক্তদা ত্রান্সফর তৌগনি। ভারতকী লৌমীনা হোংলক্লিবা মতমগা লোইননা চৎননবা, আত্মনির্ভর ভারত ওইহন্নবগীদমক ঐগী লৈবাক্কী লৌমীনা চংশিল্লি।

অনৌবা ৱাশকশিংগা লোইননা, অনৌবা লম্বীদা ঐখোয়না চৎকনি অমসুং লৈবাক অসি মায় পাক্কনি লৈবাক অসিগী লৌমীসু মায় পাক্কনি। থাজবা অসিগা লোইননা ঐনা অমুক্কা হন্না মধ্য প্রদেশ সরকারবু থাগৎপা ফোংদোকচরদুনা, ঙসি মধ্য প্রদেশকী লৌমী লাখ কয়াগা লোইননা ঐনা ঐগী ৱাফম ফোংদোকচনবগী তাঞ্জা ফংজবা অসিগীদমক পুম্নমক্কী তৌবীমল খঙবা উৎচদুনা ঐনা অমুক্কা হন্না অদোম ময়াম্বু হন্না হন্না য়াইফ-পাউজেল পীজরি।

হন্না হন্না থাগৎচরি।