ভারতকী প্রধানমন্ত্রী

ঙসি হলসস্তী নুমিৎনি, ভগবান বলরামগী মপোক নুমিৎনি।

ইরৈচা খুদিংমকপু, মরুওইনা লৌমী মরূপশিংবু হলসথ অসিগী, ময়াম্বা ইবুংঙোগী পোকপগী নুমিৎসিগী অথোইবা থৌরমসিদা হন্না-হন্না য়াইফ-পাউজেল পীজরি!!

মসিগী শেংলবা নুমিৎসিদা লৈবাকসিগী লৌউ-শিংউবগা মরী লৈনবা খুদোংচাবশিংগীদমক্তা লুপা কোতি লাখ অমগী অখন্নবা ফন্দ লোঞ্জ তৌখ্রে। মসিদগী খুঙ্গং-খুঙ্গংশিংদা অফবা স্তোরেজ, অনৌবা তেক্নোলোজীগী কোল্দ স্তোরেজগী পরিং অমা থৌরাং তৌবদা মতেং ওইরগনি অমসুং খুঙ্গংশিংদা খুদোংচাবা ময়াম অমা লৈহল্লগনি। মসিগা লোয়ননা লৌমী কোতি ৮ মখায়গী ইমুংশিংগী একাউন্তা পি.এম. কিসান সম্মান নিধীগী মওংদা লুপা কোতি লিশিং ১৭ ত্রান্সফর তৌখিবসিদা ঐহাক য়াম্না পেঞ্জৈ। পেঞ্জনীংঙাই ওইরিবা ৱাফমদি ঐখোয়না স্কীমসিগী থমখিবা পান্দম অদু ফংগদৌরে। লৌমী খুদিংগী ইমুংশিং তান্না চুমদ্রিং তেংবাং অসি ফংহন্নবা অমসুং মথৌ তাবা মতমদা য়ৌনবগী পান্দম অসিদা স্কীম অঅসি মায় পাক্কদৌরে। হৌখিবা চহি অমগা মখাইসিদা স্কীমসিদগী লুপা কোতি লিশিং ৭৫ অসি লৌমীশিংগী বেঙ্ক একাউন্তা চুমদ্রিংনা হাপখ্রে।

মসিদগী লুপা কোতি ২২দি করোনানা মরম ওইদুনা লোকদাউন তৌরিঙৈগী মনুংদা লৌমীশিংদা য়ৌহনখ্রে।

মরূপশিং,

চহি কয়াদগী করিগীদমক্তা খুঙ্গংদা ইন্দস্ত্রী লৈত্রিবনো হায়বসি মসি দিমান্দ তৌরি অমদি ৱাখল চুংশিন্নরি।

ইন্দস্ত্রীশিংনা মাগী পোত্থোক্কী মমল লেপ্পদা অমদি লৈবাক অসিগী মফম অমদা হেক্তা মনিং তম্না য়োনবদা য়াবগুম খুদোংচাবা অসি লৌমীশিংনা করিগীদমক্তা লৈত্রিবনো?

হৌজিক সাপোনগী ইন্দস্ত্রী অসি করিগুম্বা শাহর অমদা লিংবা মতমদা মফমদুখক্তদা য়োনগদবনি হায়বদি লৈতে। অদুবু লৌউ-শিংউবদদি করিগী হৌজিকফাওবা অসুম্না ওইরমদে। মহৈ-মরোংশিং অসি লোক্লকপা মতমদা মদু মফমদুগী মন্দীদা অদুম্মক য়োনবা তারম্মি। মসিগা মান্ননা অতৈ ইন্দস্ত্রীশিংদা মরক্কী মী লৈত্রগা মহৈ-মরোংশিংদা করিগী লৈগদৌরিবনো হায়বসিমসু দিমান্দ তৌনরকখি। ইন্দস্ত্রীশিং অসি শেমগৎনবা ইনফ্রাস্ত্রকচরগ শেমখিবা অদুগুম্না লৌউ-শিংউগী ওইনসু ইনফ্রাস্ত্রকচর লৈহনগদবনি।

মরূপশিং,

হৌজিক আত্মনির্ভর ভারত অভিয়ানগী মখাদা লৌমীশিং অমসুং লৌউ-শিংউগা মরী লৈনবা ৱাহং ময়াম অসিগী সোলুসন থিরি। ‘লৈবাক অমা মন্দী অমা’গী মিশন অসিনা হৌখিবা চহি ৭তগী পাংথোরক্লিবা থবক অসি মপুং ফাগদৌরে। হান্নদি ই-নামদগী তেক্নোলোজীদা য়ুম্ফম ওইবা চাউরবা সিস্তেম অমা শেমখি।

হৌজিক্তি ৱায়েল-কাংলোন শেমদুনা লৌমীশিংনা মন্দীগী ওইবা মীৎয়েংদগী অমদি মন্দীগী তেক্সকী মীৎয়েংদগী নান্থোকহনখ্রে। হৌজিক্তি লৌমীশিংগীদা ওপ্সন কয়া অমা লৈরে। করিগুম্বা মাগী লৌবুক্তা অদুম্মক য়োনবা পাম্লবসু মাগী পোত্থোক অদু য়োনবা য়ারগনি। নত্ত্রগা ৱেয়রহাউস, ই-নামগা মরী লৈনবা লল্লোন-ইতিক তৌবশিং অমসুং ওর্গনাইজেসনশিংনা মঙোন্দা মমল য়াম্না পীবা অদুদা মহৈ-মরোং অদু য়োনবা য়ারগনি। মতৌ অসিগুম্না অনৌবা ৱায়েল কাংলোন অমগা অমুক শেম্লিবা অসিদগী লৌমীশিংনা ইন্দস্ত্রীশিংদগী চুমদ্রিংনা পাউ ফাওদোক-ফাওজিন তৌবা য়ারগনি। অলু থারিবা লৌমীনা চিপ্স শাবশিংগা, উহৈ-ৱাহৈ থাবশিং হায়বদি হৈকোল শেম্বশিংনা জুইস, মুরব্বা, অচারগুম্বা পোৎলমশিং শাবা ইন্দস্ত্রীশিংনা পাউ ফাওদোক-ফাওজিন তৌবা য়ারগনি। মসিদগী লৌমীশিংনা মহৈ-মরোং অসি মরু হুনবা মতমদা লেপ্নখিবা মমল অদু ফংদুনা মদুদগী মঙোন্দা মমল তানা ফংবগী অৱাবা অদু কোক্লগনি।

মরূপশিং,

ঐখোয়গী লৌউ-শিংউদা লোকপগী খুদোংচাদবা লৈতে তৌবতবু লোক্লবা মতুংদা অরোকপা পোত্থোকশিং অসিদা অমাং-অতা থোকপগী চাউনা খুদোং চাদবা লৈরি। মসিনা লৌমীশিংদা মাংজহল্লি অদুগা লৈবাক অসিদসু য়াম্না মাংজহল্লি। মসিদগী কোক্নবগীদমক্তা মায়কৈ অমরোমদা ৱায়েল কাংলোনকী অপনবশিং অদু লৈহল্লরোই অদুগা মায়কৈ অরোমদনা অমুক লৌমীশিংদা চুমদ্রিংনা তেংবাং ফংহল্লগনি। লৈবাক অসিদা চেংগী অৱাৎপা ময়াম অমা লৈখিবা মতমদা মরু ওইনা মথৌ তাবা পোৎশিংগা মরী লৈননা ঐখোয়গীসিদা ৱায়েল কাংলোন অমা শেমখি। ঐখোয়না মালেম অসিগী খ্বাইদগী অচৌবা চেং পুথোকপা ঙম্বা অমা ওইরবা মতম অসিফাওবদা মদুগী ৱায়েল কাংলোন অসি ঙসিসু চৎনরি। খুঙ্গংদা অফবা গোদাউন শাবা ঙমখিদে, লৌউ-শিংউগী ওইবা ইন্দস্ত্রীশিংদা ফগৎহন্নবা কনাসু লৈখিদবা অসিগী মরমদি মসিগী ৱায়েল কাংলোন অসিসু ওইখি। মসিগী ৱায়েল কাংলোন অসি ফনা শিজিন্নবগী মহুত্তা লান্না শিজিন্নখি। মসিনা লৈবাকসিগী লল্লোন-ইতিক তৌবশিংদা, ইনভেস্ত তৌবশিংদা য়াম্না কিহল্লমখি। হৌজিক মসিগী অকিবগী মেকানিজম অসিদগীসু লৌউ-শিংউগা মরী লৈনবা লল্লোন-ইতিক অসি লৈহনখ্রে। মসিগী মতুংদা হৌজিক লল্লোন-ইতিক-কারবার তৌবা খুঙ্গংশিংদা স্তোরেজ শানবা অমসুং অতৈ থৌরাংশিং শেম্নবগীদমক্তা মমাং থারবা য়াই। মরূপশিং,

ঙসি এগ্রিকলচর ইনফ্রাস্ত্রকচর ফন্দ অসি লোঞ্চ তৌরে, মসিদগী লৌমীশিংনা মাগী থাক্তগীসু স্তোরেজগী অনৌবা খুদোংচানবশিংসু শেম্বা ঙম্লগনি। স্কীম অসিদগী খুঙ্গংশিংদা লৌমী কাংলুপশিংদা, লৌমীগী কমিতীশিংদা, এফ.পি.ও.শিংদা ৱেয়রহাউস শাননবা, কোল্দ স্তোরেজ শানবগীদমক্তা, ফুদ প্রোসেসিংগা মরী লৈনবা ইন্দস্ত্রীশিং লিংনবা লুপা কোতি লাখ অমগী তেংবাং ফংলগনি। লৌমীশিংনা এন্তর্প্রিন্যুর ওইনবগীদমক্তা ফংহনগদৌরিবা অসিদা চাদা ৩গী শেন্দোইসু কোক্লগনি। ঙৈহাক্কী মমাংদা অসিগুম্বা লৌমী লুপশিংগসু ঐহাক্কা ৱা খন্নখি। চহি কয়াদগী লৌমীশিংনা তেংবাং পীরি। মসিগী ফন্দ অসিদগী লৈবাক শিন-থুংনা অসিগুম্বা ওর্গনাইজেসনশিংনা মতেং য়াম্না ফংলগনি। মরূপশিং,

মসিগী অনৌবা ইনফ্রাস্ত্রকচর অসিদগী লৌউ-শিংউদা য়ুম্ফম ওইবা ইন্দস্ত্রী শেম্বদা তেংবাং য়াম্না ফংলগনি।

আত্মনির্ভর ভারত অভিয়ান্দগী জিলা খুদিংমক্কী মমিং চৎপা পোত্থোকশিং অদু মালেম অসিগী মার্কেৎ ফাওবা য়ৌহন্নবগীদমক্তা অচৌবা স্কীম অমা শেম্লে। মসিদগী তোঙান-তোঙানবা জিলাশিংদা, খুঙ্গংগী মনাক নকপদা লৌউ-শিংউগী ইন্দস্ত্রীশিংগী ক্লস্তর শেম্লি।

মরূপশিং,

হৌজিক ঐখোয় খুঙ্গংগী লৌউ-শিংউগী ইন্দস্ত্রীশিংদগী চানবগী ওইবা পোত্থোকশিং অসি শাহরদা য়ৌহন্দুনা শাহরদগী অতোপ্পা ইন্দস্ত্রীগী ওইবা পোৎলম ওইনা খুঙ্গংদা য়ৌরক্লদবা মওং অদুদা চংশিল্লক্লবনি। মসিনি আত্মনির্ভর ভারত অভিয়ানগী ৱাশক। হৌজিক লৌউ-শিংউগী য়ুম্ফম ওইবা ইন্দস্ত্রী অসি লিংলবদি কনানা থবক অদু পান্নগনি হায়বগী ৱাহং অসি লাক্লি। মসিদসু .মসিদসু ঐখোয়না এফ.পি.ও. নত্ত্রগা ফার্মর প্রদ্যুসর ওর্গনাইজেসন হায়না হায়নরিবা ঐখোয়গী অপীকপা লৌমীশিংগী চাউরবা গ্রুপশিংসিগী ওইরগনি।

মরম অসিনা হৌখিবা চহি ৭তগী এফ.পি.ও-ফার্মর প্রদ্যুসর ওর্গনাইজেসনগী অচৌবা নেতৱর্ক অমা শেম্ননবা কেম্পেন তৌখি। লাক্কদৌরিবা চহিশিং অসিদা অসিগুম্বা এফ.পি.ও.-ফার্মর প্রদ্যুসর ওর্গনাইজেসন শেম্নবা থবক চত্থরি।

মরূপশিং,

মায়কৈ অমদা এফ.পি.ও.গী নেতৱর্কী থবক চত্থরি অদুগা অতোপ্পা মায়কৈ অমদনা স্তার্ত অপশিংগা মরী লৈননা পুক্নিং থৌগৎলি। হৌজিক ফাওবদা লৌউ-শিংউগী স্তার্তঅপ চহুমগা য়াঙ্খৈদসু তেংবাং পীরি। মসি স্তার্তঅপ, ফুদ প্রোসেসিংগী মরী লৈনৈ, অর্তিফিসিএল ইন্তলিজেন্স. ইন্তর্নেতকী ওইবশিং, লৌউ-শিংউগা মরী লৈনবা স্মার্ত দিভাইসশিং শেমগৎনবা অমসুং রিন্যুএবল ইনর্জীশিংগা মরী লৈনৈ ।

মরূপশিং,

লৌমীশিংগা মরী লৈনবা লৈরিবা স্কীমশিং, য়াওনশিং শেমগৎলি, মসিগী ময়াইদা ঐখোয়গী অপীকপা লৌমীশিং লৈ। অপীকপা লৌমীশিংদা খ্বাইদগী অৱাবা কয়া লাক্লি। অপীকপা লৌমীশিং অসিদা সরকারগী ওইবা কান্নবশিং অসি মপুং ফানা য়ৌবা ঙম্লমদে। হৌখিবা চহি ৬-৭সিদা অপীকপা লৌমীশিংগী ফীভম অসি হোংহন্নবা থবক চত্থরি। অপীকপা লৌমীশিং অসি লৌউ-শিংউগী খ্বাইদগী পাঙ্গল লৈনবশিংগা শম্নহল্লগনি অমসুং মশানসু পাঙ্গল কলহন্নবা তৌরগনি। মরূপশিং,

নুমীৎ ২গী মমাংদা লৈবাক অসিগী অপীকপা লৌমীশিংগা মরী লৈনবা অচৌবা স্কীম অমা হৌদোকখ্রে, মসিদগী তুংদা লাক্কদৌরিবা মতম অসিদা লৈবাক অসিনা য়াম্না চাউনা কান্নবা ফংলগনি। মহারাস্ত্রগী বিহারফাওবগী লৈবাক অসিগী অহানবা লৌমীগী রেলগারী অসি হৌদোকখ্রে।

হৌজিক মহারাস্ত্রদগী কোমলা, অঙ্গুর, তিলহৌনচিংবা হৈ অমদি এঞ্জাংশিং পুবা রেলগারী থোকখ্রগা বিহারদগী মখানা, লেঞ্চু, ক্বা, অতেকপা এঞ্জাং-নাপীশিং, ঙাশিংনচিংবা পোৎ কয়া অমা পুদুনা হল্লক্লগনি। হায়বদি বিহারগী অপীকপা লৌমীনা মুম্বই অমসুং পুনেগুম্বা অচৌবা শাহরশিংগা চুমদ্রিং শম্নরগনি। মসিগী অহানবা রেলগারী অসিগী কান্নবা অসি য়ু.পিয়. অমসুং মধ্য প্রদেশকী লৌমীশিংনসু ফংগনি, মরমদি মফমদু ফাওরগা চৎকনি। রেলগারী অসিগী থোইদোকপা মওংদি রেলগারী অসি পুল্লপ এয়র কন্দিসন্নি। হায়বদি তালীদা চেনবা কোল্দ স্তোরেজনি। মসিদগী শঙ্গোম, হৈ-এঞ্জাং, ঙামীনচিংবা লৌমীশিংনসু কান্নবা ফংলগনি অমসুং শাহরগী মফমশিংদা মসি শিজিন্নরিবশিংনসু কান্নবা ফংলগনি।

লৌমীশিংনা মাগী মহৈ-মরোংশিং অদু মফমদুগী মন্দীশিং নত্ত্রগা হাত-বজারদা অতাবা মমলদা য়োন্দবা য়াদবা অদু লৈররোই। ত্রকশিংদা হৈ-এঞ্জাংশিং পৎ-পুমদুনা মাংলম্বা অদু কোক্লগনি অদুগা ত্রক্কী ভারা অদুগা য়েংনরুবদসু শরুক কয়া তারগনি। শাহরশিংদা লৈরিবা মরূপশিংনসু নোংজু-নুংশানা নত্ত্রগা লুরবা তানফম অসিনা মরম্না অতেকপা উহে-এঞ্জাংগী অৱাৎপা লৈররোই, মমলসু তারগনি।

মসিদা নত্তনা খুঙ্গংগী অপীকপা লৌমীশিংগী ফীভমদা অহোংবা অমা লাক্লগনি। লৈবাক অসিগী অচৌবা শাহরশিংফাওবা অপীকপা লৌমীশিংনা য়ৌরবা মতম অসিদা অতেক-অতেকপা এঞ্জাংশিং থানবগী মায়কৈরোমদা চংশিল্লগনি, শা-শন লোইরিবা অমসুং ঙা য়োক্লিবশিংনসু মায়কৈ অসিদা পুক্নিং থৌগৎলগনি। মসিদা লম য়াম্না চংদনা চাগা য়াম্না তান্নবা লম্বি ফংলগনি, থবক অমসুং ইশানা থবক পীজবগী খুদোংচাবা কয়া ফংলগনি।

মরূপশিং,

পায়খৎলিবা থৌরাংশিং অসিদগী ২১শুবা চহি চা অসিগী খুঙ্গংগী শেন্মিৎলোনগী মমি অদুসু হোংলগনি, লোউ-শিংউগী চাগাদসু শরুক কয়া অমা হেনগৎহল্লগনি। হন্দক্তা লৌখিবা ৱারেপ খুদিংদা লাক্কদৌরিবা মতম অসিদা খুঙ্গংশিগী মনাক নকপদা থবক কয়া পা-শন্না লৈহল্লগনি। খুঙ্গং অমসুং লৌমীনা লায়চৎ অসিদসু মতৌ করম্না ঙাক্লৌ পীবা ঙমখিবগে হায়বসি ঐখোয় খুদিংমক্না হৌখিবা থা ৬সিদা উরে। লোকদাউনগী মতমদসু লৈবাক অসিদা চান-থক্নবগী মথৌ তাবা পোৎলমশিংগী খুদোংচাদবা লৈহন্দ্রিবসি ঐখোয়গী লৌমীশিংননি। লৈবাক অসিদা লোকদাউন লৈরিঙৈদা ঐখোয়গী লৌমীশিংনা লৌবুক্তা লৌ খাওখি অমসুং লৌহোন হুনবগী অনৌবা রেকোর্দ শেমখি।

লোকদাউনগী অহানবা নুমিৎৃত্তগী হৌরগা দিৱালী অমসুং শথ ফাওবা থা ৮গী ওইনা কোতি ৮দগী হেনবা ইরৈচাশিংদা লেম্না চেং ফংহনবা ঙম্লিবসিদসু ঐখোয়গী অথোইবা লৌমীশিংশিননি।

মরূপশিং,

সরকারনসু লৌমীগী পোত্থোকশিংগী রেকোর্দকী মওংদা লৈনবা তৌখ্রে। মসিদা মমাংগা চাংদম্নবদা চাউরাক্না লুপা কোতি লিশিং ২৭তগী হেন্না লৌমীশিগী ফুরিৎখাউদা য়ৌখ্রে। মরুবু ওইরো নত্ত্রগা হার লুরবা তানফম অসিদসু রেকোর্দকী মওংদা পোত্থোকশিং পুথোকখ্রে অমদি দিমান্দগী মতুং ইন্না লৌমীশিংফাওবা য়ৌহনখ্রে।

মসিনা মরম ওইদুনা লুরবা তানফমসিদসু খুঙ্গংগী শেন্মিৎলোন অসি ফরি, খুঙ্গংশিংগী অৱাবা ময়েং তাহল্লি। ঐখোয়গী খুঙ্গংগী অসিগুম্বা থৌনা অসিনা লৈবাক অসি থুনা-য়াংনা চাউখৎহনবদা মাংজিল থানা থৌদাং লৌননবগী থাজবগা লোয়ননা অদোম লৌমী মরূপশিংদা হন্না-হন্না য়াইফ-পাউজেল পীজরি। কোরোনা অসি খুঙ্গংগী মপান্দা থম্বদা থাগৎনীংঙাই ওইবা থবক তৌবিরিবা অসি মখা তানা তৌবীয়ু।

গজ অনি লাপথোক্না লৈবা অমসুং মাস্ক উপ্পগী লাইশোন অসি লেংদনা পাংথোকপীয়ু।

চেকশিন্না, শোই-ঙামদনা লৈবীয়ু।

হন্না-হন্না থাগৎচরি!!