ভারতকী প্রধানমন্ত্রী

গুজরাতকী চীফ মিনিস্তর ভুপেন্দ্র ভাই পতেল, কেন্দ্রগী মন্ত্রীমন্দলগী ঐগী মরুপ আর. পতিল, নিমুবেন, গুরাত সরকারগী মিনিস্তরশিং, এম.পিশিং, এম.এল.এশিং, লৈবাক অসিগী জিলাশিংগী দি.এমশিং, অতোপ্পা শক্নাইরবশিং অমসুং ঐগী ইনাওশিং অমসুং ইচলশিং !

ঙসি গুজরাত্তা হায়দ্রোপৱার মিনিস্ত্রিনা মরুওইবা খোঙজং অমা হৌদোক্লে। মতম খরগী মমাঙদা নোং কন্না চুবগী অৱাবা থেংনদবা লৈবাক অসিগী মফম অমতা লৈরমদে। ঐনা চহি কয়া গুজরাতকী চীফ মিনিস্তর ওইরিঙৈদা, মতম অমতদা জিলা কয়াদা অকনবা নোং চুবা কৈদৌঙৈদা থেংনখিদে। অদুবু হন্দক্কী গুজরাত্তা নোং কা হেন্না চুবগী অৱাবা মায়োক্নরে। মহৌশাগী ওইবা অৱাবা অসি থেংন্নবগী থৌনা অমতা দিপার্তমেন্তশিংগী লৈরমদে। অদুবু গুজরাতকী ওইনা অৱাবা তারকপা মতমদা মীওই খুদিংমক মতেং পাংবা ঙম্বগী মশাগী ওইবা থৌনা অমা লৈজরি। ঙসি ফাওবা লৈবাক অসিগী তোঙান-তোঙানবা মফম কয়াদা অকনবা কুমগী নোংগী চৈথেং মায়োক্নরি।

মরুপশিং,

ঈশিং তুংশিনবা অসি শুপ্নগী থৌশিল অমা খক নত্তে। মসি হোৎনবা অমনি অমসুং অফবা থবক অমনি। মসি পুকচেল চাউবা অমসুং দাইত্ব লৌবা থবক্নি। তুংগী মীরোলশিংগী ঐখোয়গী মরমদা ঙাংনবদা মতমদা, ঐখোয়না ঈশিংগীদমক পাংথোকপা থবকশিংনা মখোয়গী অহানবা নাপচৈ ওইগনি। মরমদি, মসি শুপ্নগী লন-থুমগী ৱাহং অমা নত্তে। মসি পুন্সিগী ৱাহংনি , মসি মীওইবা খুন্নাইগী তুংগী ৱাহংনি। মরম অদুনা, তুংকোইনা চৎনবা য়াবা তুংলমচৎকীদমক ঐখোয়গী মাঙদা তারিবা ৱারেপ ৯ গী মনুংদা, অহানবা ৱারেপ অসি ঈশিং তুংশিনবনি। মীয়াম শরুক য়াদুনা মাইকৈ অসিদা ঙসিদগী অতোপ্পা কান্নরবা থবক অমা হৌদোকপদা ঐ হরাওই। খোঙজং অসিদা শরুক য়ারিবা  হায়দ্রোপৱার মিনিস্ত্রি, ভারত সরকার, গুজরাত  সরকার অমসুং লৈবাক অসিগী মীয়াম ঐনা থাগৎপা ফোঙদোকচরি।

মরুপশিং,

ঙসি মহৌশাগী অকোয়বগী ফিবম অমসুং ঈশিং তুংশিনবগী মতাংদা খন্নরকপদা, খঙজিনগদবা অচুম্বা ৱাফম কয়া লৈরি। মালেমগী অপুনবা অফবা ঈশিংগী চাদা ৪ খক ভারত্তা ফংলি। ঐখোয়গী ফংলিবা ঈশিং অসি চাদা ৪ খক্তনি হায়বা গুজরাতকী মীয়াম্না খঙগদবনি। ভারত্তা অচৌবা তুরেল কয়া চেল্লি, অদুবু ঐখোয়গী লৈবাক্কী য়াম্লবা শরুক ঈশিং তাংবগী অৱাবা মায়োক্নরি। মফম কয়াদা ঈশিং ফংবগী চাং হন্থরক্লে। মসিগী অৱাবা অসি অইং-অশাগী খল হোংলকপনা থোকহনবনি।

মরুপশিং,

পুম্নমক লৈরবসু, ভারতনা মশামক্কী অমসুং মালেম শীনবা থুংবগী অৱাবশিং কোক্নবা পাম্বৈ পুথোকপা ঙম্লে। মসি ভারতকী অরিবা লৌশিংনা ঙমহনবনি। ঈশিং তুংশিনবা, মহৌশাগী অকোয়বগী ফিবম ঙাক-শেনবা হায়বসি ঐখোয়দা অনৌবা ৱাহৈ অমা নত্তে, মসি ঐখোয়গী ওইনা লাইরিক্তগী ফংবা লৌশিং নত্তে। মসি ফিবমনা মরম ওইদুনা থোকহনবা ঐখোয়গী শরুক নত্তে। মসি ভারতকী চৎনবীগী ওইবা ৱাখল তাবা অমনি। ঐখোয় ঈশিং অসি ঈশ্বর ওইনা লাৎপা, তুরেলশিং লাইরেম্বীশিং ওইনা খনবগী চৎনবী লৈবা মীয়াম্নি। পাৎশিং, পুখ্রিশিং লাইশঙশিংগী থাক্তা থম্লি। গঙ্গা ঐখোয়গী ইমানি, নর্মাদা ঐখোয়গী ইমানি। গোদাবরি অমসুং কাবেরি ঐখোয়গী ইমাশিংনি। মসিগী মরী অসি চহি লিশিং কয়া শুরে। চহি লিশিং কয়াগী মমাঙদা, ঐখোয়গী ইপা-ইপুশিংনা ঈশিং অমসুং ঈশিং তুংশিনবগী মরুওইবা খঙলমখি। চহি চা কয়া শুরবা ঐখোয়গী লাইরিকশিংদা হায়রি- সরৱানি ভুতানি জিবন্তি প্রাভৱান্তি, তসমত সর্ভেসু দানেসু, তয়োদানান বিসিসয়াত। মসিনা হায়রি মদুদি থৱায় পানবা খুদিংমক ঈশিংদগী পোক্লকপনি অমসুং ঈশিংনা হিংলি। মরম অদুনা, অতোপ্পা মীওইশিংগীদমক ঈশিং তুংশিনবা অসি খ্বাইদগী চাউবা কৎথোকপনি। ৱাফম অসি চহি চা কয়াগী মমাঙদা রহিমদাসনশু হায়রমখি। ঐখোয় খুদিংমক্না পারে। রহিমদাসনা হায়খি- রহিমান পানি রহিয়ে, বিন পানি সব সুন! তুংগী উবা ঙম্বা অমসুং পুকচেল ফাওবা লৈবাক অমনা ঈশিংগী অৱাবা কোক্নবা পাম্বৈ অমা পুথোক্নবা মালেমগী মমাঙ থাগদবনি।

মরুপশিং,

ঙসি থৌরম অসি, মীয়ামদা ঈশিং ফংহনবা অমসুং ঈশিং তুংশিনবগী লমদা মাইপাক্লবা চাংয়েং কয়া পাংথোকখ্রবা গুরাত্তগী হৌরে। চহি ২৫ রোমগী মমাঙদা সৌরাস্ত্রাগী ফিবম করি ওইরমখি, অৱাং থংবা গুজরাতকী ফিবম ঐখোয়না খঙলিবদুনি। মমাঙগী সরকারশিংদা ঈশিং তুংশিনবগী পান্দম লৈরমখিদে। ঈশিংগী অৱাবা অসি কোকহনগনি হায়না ঐনা ৱারেপ লৌখি। চহি কয়া পন্দুনা লৈরকপা সরদার সরোভর দাম ঐনা মপুংফানা লোইশিনখ্রে। গুজরাত্তা সৌনি য়োজনা হৌদোকখ্রে। ঈশিং ফংদবা মফমশিংদা ঈশিং মরাংকাইনা ফংহনখি। ঈশিং পুনবা পাইপশিংনা নুংশিৎ পীগনি হায়না ওপোজিসনগী মীওইশিংনা ঐখোয়দা নোক্নখি। অদুবু ঙসিদি গুজরাত্তা পায়খৎখিবা থবকশিং অদুগী মহৈনা মালেম শীনবা থুংবগী মমাঙদা ঐখোয়না মাঙজিল থারে। গুজরাত্তা ঐনা পাংথোকখিবা চাংয়েং অদু মাইপাকপদগী লৈবাক অসিগী ঈশিংগী অৱাবা কোকহনবা ঙমগনি হায়বগী থাজবা ঐঙোন্দা পীখি।

মরুপশিং,

ঈশিং তুংশিনবা অসি থৌশিলগী ৱাফম খক নত্তনা, মসি খুন্নাইগী থবক অমনি। মীয়াম ৱাখল তাবা, মীয়াম শরুক য়াবা অমসুং অচৌবা ইহৌ অসি খোঙজং অসিগী খ্বাইদগী চাউবা থৌনানি। চহি কয়া ঈশিংগী মিংদা, তুরেলশিংগী মিংদা লুপা করোর লিশিং কয়াগী প্রোজেকশিং পায়খৎখি। অদুবু মহৈদি হৌখিবা চহি ১০ অসি খক্তদা উবা ফংখি। ঐখোয়গী সরকারনা মীয়াম হুপ্না অমসুং সরকার হুপ্না শরুক য়াদুনা থবক তৌরে। হৌখিবা চহি ১০দা পায়খৎখিবা অচৌবা থবকশিং অদোম উরে। অহানবা ওইনা, ঈশিংগা মরী লৈনবা ৱাফমশিংদা সরকারগী দিপার্তমেন্তশিংগী মরক্তা পাউ ফাওনদবা লৈত্রে। ঐখোয়না অহানবা ওইনা হায়দ্রোপৱারগী তোখায়বা মিনিস্ত্রি অমা লিংখৎলে। লৈবাক অসিদা অহানবা ওইনা ‘হর ঘর জল’গী ৱাশক লৌরে। মমাঙদা য়ুমথোং করোর ৩ খক তোতি ঈশিং ফংখি। ঙসিদা লৈবাক অসিদা য়ুমথোং করোর ১৫ হেন্না তোতি ঈশিং ফংলে। জল জিবন মিসনগী মখাদা লৈবাক অসিগী য়ুমথোংশিংগী চাদা ৭৫ তোতিগী অফবা থক্নবা ঈশিং ফংলে। জল জিবন মিসনগী থবকশিং লোকেল ৱাতর বোদিশিংনা পাংথোক্লে। গুজরাত্তা ৱাতর কম্মিতিদা নুপীশিংনা অচৌবা থবক অমা পাংথোকপগুম, হৌজিক লৈবাক শীনবা থুংবগী ৱাতর কম্মিতিশিংগী নুপীশিংনা অচৌবা থবক পাংথোক্লে।  কম্মিতিদা চাদা ৫০ খুঙ্গংগী নুপীশিংনা ওইরি।

মরুপশিং,

ঙসিদি জলশক্তি অভিয়ান অসি লৈবাক্কী মিসন অমা ওইরে। মসি হান্নগী ঈশিং ফংফমশিং নৌনা শেমজিনবা ওইবা য়াই, অনৌবা মফমশিং শেমগৎপা ওইবা য়াই, মসিদা সিবিল সোসাইতি, পঞ্চয়াতশিং অমসুং মীওই খুদিংমক শরুক য়ারে। মীয়াম শরুক য়াদুনা ঐখোয়না অজাদি কে অমৃত মহোৎসবতা জিলা খুদিংমক্তা অমৃত সরোভর শেমগৎনবা ঐখোয়না থবক পায়খৎলে। থৌরাং অসিগী মখাদা, মীয়াম শরুক য়াদুনা লৈবাক অসিদা অমৃত সরোভর লিশিং ৬০ হেন্না শেমগৎলে। মসি লৈবাক অসিগী তুংগী মীরোলগী কয়া চাউখ্রবা থবক্নো হায়বা অদোম খন্দুনা য়েংউ। মসিগা চপ মান্ননা লৈনুংগী ঈশিং হেনগৎনবা ঐখোয়না অতল ভুজাল য়োজনা হৌদোক্লে। স্কিম অসিদা, ঈশিং ফংফম য়েংশিনবগী থবক মীয়ামদা শীন্নরে। ২০২১দা, ঐখোয়না নোংগী ঈশিং লোকশিনবগী খোঙজং হৌদোকখি। ঙসি সহরশিং অমসুং খুঙ্গংশিংগী মীয়াম্না নোংগী ঈশিং লোকশিনবগী খোঙজং অসিদা শরুক য়ারে। নমামি গঙ্গে স্কিম অসি অতোপ্পা খুদম অমনি। নমামি গঙ্গে অসি মীওই মিল্লিয়ন কয়াগী ৱাশক অমা ওইরে। মীয়াম্না অপংবা থাজবা কয়া থাদোক্লে অমসুং ঐখোয়গী তুরেলশিং লু-নান্না থম্নবা মরী লৈনদবা থবকশিং থাদোক্লে।

মরুপশিং,

মহৌশাগী ফিবম ফগৎনবা লৈবাক অসিগী মীয়ামদা এক পের মা কে নামগীদমক ঐনা হায়জবা অদু অদোম্না খঙলে। উশিং থাবা মতমদা লৈনুংগী ঈশিংগী ইমায় য়াংনা হেনগৎলকই। হৌখিবা চয়োল খর অসিদা, লৈবাক শীনবা থুংবা ইমাশিংগী মিংদা উ পাম্বী মিল্লিয়ন কয়া থাখ্রে। অসিগুম্বা খোঙজং কয়া, অসিগুম্বা ৱাশক কয়া লৈরি অমসুং ঙসিদি খোঙজংশিং অসি মীওই করোর ১৪০ শরুক য়াদুনা মীয়ামগী অচৌবা ইহৌ অমা ওইরে।

মরুপশিং,

ঈশিং তুংশিন্নবগীদমক ঐখোয়না রিদক্স, রিয়ুজ, রিচার্জ অমসুং রিসাইকলগী অচুম্বা ৱাখল্লোনশিংদা মীৎয়েং চঙবা দরকার ওইরে। অতোপ্পা ৱাহৈশিংদা, ঐখোয়না ঈশিং লান্না শীজিন্নবা থিংলবা, ঈশিং শীজিন্নবা হন্থহল্লবা মতমদা ঈশিং কনবা ঙমগনি। ঐখোয়না ঈশিং অমুক হন্না শীজিন্নবা, ঈশিং ফংফম ঈশিং হাপচিনবা অমসুং অমোৎপা ঈশিং রিসাইকল তৌবা দরকার ওই। মসি পাংথোক্নবগীদমক, ঐখোয়না অনৌবা পাম্বৈশিং শীজিন্নবা দরকার ওই। ঐখোয়না অনৌবা থবক অমসুং তেক্নোলোজি শীজিন্নবা দরকার ওই। ঐখোয়গী দরকার ওইরিবা ঈশিংগী চাদা ৮০ লৌউ-শিংউগী থবকশিংগীনি হায়বা ঐখোয় পুম্নমক্না খঙলে। মরম অদুনা, দ্রিপ ইরিগেসনগুম্বা তেক্নোলোজিশিং ঐখোয়গী সরকারনা মখা তানা পুক্নিং থৌগৎলি। ‘পর দ্রোপ মোর ক্রোপ’গুম্বা খোঙজংশিংনা ঈশিং তুংশিল্লে অমসুং ঈশিং য়াম্না ফংবদা মফমশিংদা লৌমীশিংগী শেন্থোক হেনগৎহল্লে। ঈশিং য়াম্না চঙদবা মহৈ-মরোশিং হায়বদি থাউ থোকপা মহৈ-মরোংশিং, হৱায়শিং অমসুং মিল্লেতশিং থানবা সরকারনা পুক্নিং থৌগৎলে। ঈশিং তুংশিন্নবা অতোপ্পা মহৈ-মরোং থাবগীদমক রাজ্য খরদা লৌমীশিংদা মতেং পীরে। হায়রিবা থবকশিং অসি য়াংখৎনবা অমসুং মিসনগী মওংদা পায়খৎনবা ঐনা রাজ্যশিংদা তকশিল্লি। ঐখোয়না লৌবুকশিংগী ময়াদা পুখ্রিশিং তৌবা দরকার ওই অমসুং ঈশিং অমুক লৈহন্নবা অনৌবা তেক্নোলোজিশিংগা লোয়ননা মমাংঙৈগী লৌশিং পুক্নিং থৌগৎকদবনি।

মরুপশিং,

অফবা ঈশিং ফংহনবা অমসুং ঈশিং তুংশিনবা মাইপাকপা অসি ঈশিংগী শেন্মিৎলোন অমগা মরী লৈনৈ। খুদম ওইনা, জল জিবন মিসন্না মীওই কয়া থবক পীরে অমসুং মশানা মশাবু থবক পীজনবা খুদোংচাবশিং পীরে। ইঞ্জিনয়ারশিং, প্লমবরশিং, ইলেক্ত্রিসিয়ানশিং অমসুং মেনেজরশিংদা য়াম্লবা থবকশিং ফংহল্লে। ৱার্ল্দ হেল্থ ওর্গনাইজেসনগী মতুংইন্না, য়ুমথোং খুদিংদা তোতি ঈশিং ফংহনবা অসিনা লৈবাক অসিগী মীয়ামগী পুং করোর ৫.৫ কনবা ঙমগনি হায়রি। ঐখোয়গী ইচলশিং অমসুং ইচানুপীশিংগী কনগদৌরিবা মতম অসিনা, লৈবাক্কী শেন-থুমগী ফিবম ফগৎহনবদা হকথেংননা মতেং পাংগনি। ঈশিংগী শেন্মিৎলোনগী অতোপ্পা মরুওইবা ৱাফম অমনা হকচাং ফবনি। জল জিবন মিসন্না অঙাং ১২৫,০০০ হেন্না মতম চাদনা শিবদগী কনবা ঙম্লে হায়রি। চহি খুদিংগী খোহাম্বগুম্বা লায়নাশিংদগী ঐখোয়না মীওই ৪০০,০০০ ঙাকথোকপা ঙমদুনা, মসিনা অনা-লায়য়েংবদা চঙবা শেনফম হন্থহনবা ঙমগনি।

মরুপশিং,

মসিগী জন ভাগিদারি মিসন অসিদা ঙসিদি ঐখোয়গী উদ্যগকী সেক্তরনা অচৌবা থৌদাং অমা লৌরে। অমোৎপা মহি অমতা থাদোক্তবা অমসুং ঈশিং রিসাইকল তৌবগী পান্দমশিং ফংলবা ঐখোয়গী উদ্যোগশিং থাগৎপা ফোঙদোকচরি। মখোয়গী কোর্পোরেত সোসিএল রেসপোন্সিবিলিতিস(সি এস আর)গী শরুক অমা ওইনা উদ্যোগ কয়ানা ঈশিং তুংশিনবগী থবকশিং পায়খৎপা হৌরে। ঈশিং তুংশিন্নবা সি.এস.আর শীজিন্নবদা গুজরাতনা অনৌবা চৎনবী অমা শেমগৎলে। সুরত, বালসাদ, দাং, তাপী অমসুং নাবসারিদা সি.এস.আরগী মতেংদগী গুহাদা অমুক হন্না ঈশিং লৈহন্নবা স্ত্রকচর ১০,০০০ শেমগৎলে হায়বা ঐ খঙলে। জল সঞ্জয়-জন ভাগিদারি অভিয়ানগী মখাদা অসিগুম্বা স্ত্রকচর ২৪,০০০ শেমগৎনবা হৌজিক জল শক্তি মিনিস্ত্রি অমসুং গুজরাত সরকারনা থবক পায়খৎপা হৌরে। খোঙজং অসিমক অতোপ্পা রাজ্যশিংদা মসিগা চপ মান্নবা থবকশিং পায়খৎনবা ইথিল পীনবা নমুনা অমা ওইরগনি। মীওইবা খুন্নাইগীদমক ঈশিং তুংশিন্নবা ইথিল পীনবা মৈরা অমা ভারতনা ওইবা ঙম্নবা ঐখোয় পুন্না থবক তৌমিন্নগনি হায়না ঐনা থাজবা থম্লি। মসিগী থাজবা অসিগা লোয়ননা, খোঙজং অসি মাইপাক্নবগীদমক ঐনা অদোমগী মফমদা ঐগী য়াইফ-পাউজেল পীজরি।

***