ভারতকী প্রধানমন্ত্রী

ইকায়খুম্নরবী, প্রধান মন্ত্রী সৈখ হসিনা জী, খুরুমরি!

মায়পাকপা নুমিৎনা লাকপদা নুংঙাইবা ফোঙদোকচরি অমদি পোশ পার্বোনগী য়াইফ পাউজেল পীজরি !

ঙসিদি মালেম পুম্বা ভর্চুএল সম্মিত পাঙথোক্লি‍। অদুবু অদোম অমদি ঐগীদমক্তদি থৌওং অসি অনৌবা নত্তে‍। চহী কয়াদগী ঐখোয়না ভিদিওগী খুত্থাঙদা ৱারী শানদুনা লাক্লি‍।

তাঙ্কক কয়াদা ঐখোয়না ভিদিওগী খুত্থাঙদা প্রোজেক্ত কয়া হৌদোকপা অমদি শঙ্গাবা পাঙথোকখ্রে‍‍।

ইকায়খুম্নরবী,

বিজয় দিবস হেক মতুংদা ঙসি ঐখোয়না উনরিবসি অরুবা হীরম কয়াগীদমক্তা য়াম্না মরুওইবা অমনি‍।

পুৱারী ওইবা মওংদা এন্তি-লিবরেসন ফোর্সপু বঙ্গলাদেশনা মায়থিবা পীখিববু নীংশিংদুনা বিজয় দিবস ওইনা অদোমগা লোয়ননা পাঙথোকমিন্নবা হায়বসি ঐখোয়গী চাউথোকচনিংঙাইনি‍।

ঙসিদি বঙ্গলাদেশনা নীংতম্বগী ৪৯শুবা কুমওন থৌরম পাঙথোক্লি, নুমিৎসিদা ঐনা লৈবাক অনিগী মথ্বায় কৎখ্রবা অথৌবশিংবু ইকোক নোন্না খুরুমজরি‍।

বিজয় দিবসকী তাঞ্জাসিদা ঐনা ঙরাং ভারতকী নেসনেল সমর মেমোরিএলদা শ্রদ্ধাঞ্জলি কৎখি‍ অদুগা সনা মচুগী মায় পাকপগী মৈরা অমা চুখৎখি‍।

হায়রিবা মায় পাকপগী মৈরা মরিসিনা লৈবাক শিনবা থুংনা চত্তুনা ঐখোয়গী অথৌবশিংগী খুঙ্গঙ খুঙ্গঙশিংদা ফাওদুনা পুগনি‍।

দিসেম্বর ১৬তা ঐখোয়না সনা ফুদোংবা মায় পাকপগী কুমওন থৌরম পাঙথোক্লি, মসিদা ভারত শিনবা থুংনা থৌরম কয়া পাঙথোক্কনি‍।

ইকায়খুম্নরবী,

‘মুজিব বর্সো’গী তাঞ্জা অসিদা ঐনা ভারত মচা পুম্নমক্কী মায়কৈদগী অদোমগী মফমদা য়াইফ-পাউজেল পীজরি‍।

মথংগী চহীদা বঙ্গলাদেশতা লাক্নবা পাউকৎ পীবিরকপগীদমক্তা অদোমবু থাগৎচরি‍। অদোমগা লোয়ননা বঙ্গবন্ধুগী মফমদা শ্রদ্ধাঞ্জলি কৎমিন্নবা হায়বসি ঐগীদমক্তা চাউথোকচনিংঙাই ওইবা ৱাফম্নি‍।

ইকায়খুম্নরবী,

বঙ্গলাদেশ ঐখোয়গী ‘য়ুম্লোন্নবা হান্না’ হায়বা থৌরাংগী মরুওইবা য়ুম্বীনি‍। বঙ্গলাদেশকা লৈনরিবা মরী হেন্না কনখৎহনবা অমদি চেৎশিনহনবা হায়বসি ঐগীদমক্তদি লৈঙাক পায়রকপা অহানবা নুমিত্তগী হৌনা খ্বাইদগী মরুওইবা ৱাফম অমা ওইনা লৌদুনা লাক্লি‍।

মালেমগী লাইচৎনা মরম ওইরগা হন্দক্কী চহীসিদি শিংনবনা থল্লবা চহী ওইরি হায়বা ৱাফমসি অচুমবনি‍।

অদুবু নুংঙাইরিবা ৱাফম অমদি অসিগুম্লবা লাংফমগী মতমসিদা হিদাক লাংথক অমসুং অনা লাইয়েংগী খুৎশু খুৎলায়দা ওইরবসু, নৎত্রগা হকশেলগী থৌমীশিংগা লোয়ননা থবক তৌমিন্নবদা ওইরবসু ভারত অমসুং বঙ্গলাদেশকী মরক্তা মতেং পাংনবা অসিনি‍। ভেক্সিনগী মতাঙদসু ঐখোয়গী মরক্তা মতেং পাংনরি‍। ওইরিবা ফীভমসিদা ঐখোয়না অদোমগী মথৌ তাবশিংগী মরমদা লূম্না লৌদুনা থবক পায়খৎকনি‍।

সার্ক ফ্রেমৱর্ক্কী মতাঙদা বঙ্গলাদেশনা মতেং পাংলকখিবগীমক্তা অদোমগী মফমদা তৌবিমল খঙবা উৎচরি‍।

হকশেলখক্ত নত্তনা অতৈ হীরমশিদসু চহী অসিদা ঐখোয়গী তেংবাংনবগী মরী লেপ্পা নাইদনা মাঙদা চঙশিল্লি‍।

কংফালগী ঙমখৈদা লল্লোন ইতিক তৌবদা লৈরমবা অপনবা কয়া ঐখোয়না হন্থহল্লে‍। লৈবাক অনিগী মরক্তা কন্নেক্তিবিতী ফগৎহল্লে, অনৌবা পাম্বৈ কয়া হাপচিল্লে‍।

পুম্নমক অসি ঐখোয়গী লৈনরিবা মরী অসিবু হেন্না চেৎশিনহন্নিংবগী অপামবদুগী মমিনি‍।

ইকায়খুম্নরবী,

“মুজিব চিরন্তর” – বঙ্গবন্ধুগী পাউজেল মতম পুম্নমক্তা লৈহৌরগনি‍। ৱাখল্লোন অসিদা ঐখোয়না মহাক্কী লিগেসীবু ইকায় খুম্নরি‍।

অদোমগী অথোইবা লুচিং মখাবা পায়খৎলিবা থৌরাংশিংদা বঙ্গবন্ধুগী লিগেসিগী মমি নীংথিনা তারি‍। মসিগা লোয়ননা ঐখোয়গী নাকল অনিগী ওইবা মরীদা অদোমগী খোঙফম চেৎনা লেপ্পা উরি‍।

অদোমগা লোয়ননা বঙ্গবন্ধুবু ইকায় খুম্নবা ওইনা পোস্তেল স্তাম্প অমা ফোঙদোকপা অমসুং বাপু অমদি বঙ্গবন্ধুগী মিংদা দিজিতেল একজিবিসন অমা হৌদোকমিন্নবগী তাঞ্জা ফংবসি ঐগীদমক্তা চাউথোকনচিংঙাইনি‍। কস্তুরবা গান্ধী অমসুং ইকায়খুম্নরবা বঙ্গমাতাগী মফমদা অখন্নবা সেক্সন অমা কত্থোক্লিবা একজিবিসন অসিনা ঐখোয়গী নহাশিংগী পুক্নীং শোয়দনা থৌগৎকনি হায়না ঐনা থাজৈ‍।

ইকায়খুম্নরবী,

হৌজিক ঐনা অদোমগী হৌদোকপগী ৱারোল থম্বিনবা হায়জনিংই‍।

***