ভারতকী প্রধানমন্ত্রী

সেপ্তেম্বর 10, 2023দা নই দিল্লীদা পাঙথোক্লিবা G-20 লীদর্স সম্মিৎ মনুংদা ইকাই খুম্নরবা ভারতকী প্রধান মন্ত্রী, শ্রী নরেন্দ্র মোদীনা ফ্রেঞ্চ রিপাব্লিক্কী রাস্ত্রপতি, ঐচ.ই. শ্রী ইম্মানুএল মেক্রোনগা লোয়ননা চাকলেন অমা চামিন্নদুনা বাইলেতরেল মীফম পাঙথোকখ্রে। লুচিংবা অনিনা পেরিস্তা জুলাই 2023দা মখোয়না অকোনবা ওইনা উন্নখিবা অদুদগী লৈনরিবা বাইলেতরেলগী মরীশিংদা খুমাং চাউশিল্লিবা অদু খন্নখি, এসেস তৌখি অমসুং হন্না য়েংশিনখি। মখোয়না মরু ওইবা ইন্তর্নেস্নেল অমসুং রিজনেল দিবেলপমেন্তশিংদা ৱাখল্লোনশিংসু ফোঙদোক্নখি।

ইন্দিয়া-ফ্রান্স স্ত্রেতেজিক পার্তনরশিপকী 25শুবা কুমওন পাঙথোক্লদুনা জুলাই 14, 2023দা ফ্রেঞ্চ নেস্নেল দেগী থৌরমদা অথোইবা মীথুংলেন ওইনা জুলাই 13-14, 2023দা পেরিস্তা প্রধান মন্ত্রী মোদীনা চৎখিবা পুৱারী ওইরবা খোঙচৎ অদুগী মতুংদা রাস্ত্রপতি মেক্রোন্না ভারত্তা লাকখিবনি।

অচেৎপা থাজবা, শিয়র্দ ভেল্যুশিং, সোবরেন্তী আমসুং স্ত্রেতেজিক ওতোনোমীদা থাজবা থম্বা, UN চার্তরদা য়াওরিবা ইন্তর্নেস্নেল লো অমসুং প্রিন্সিপল চেৎনা ঙাক্না চৎপা, মলতিলেতরেলিজমদা অচেৎপা থাজবা থম্বা অমসুং স্তেবল মলতি-পোলর ৱর্ল্দ অমগী অমত্তা ওইবা পান্দমদা য়ুম্ফম ওইখিবা ইন্দিয়া ফ্রান্স পার্তনরশিপকী শক্তি অদুবু খঙলদুনা লুচিংবা অনিমক্না রিজনেল অমসুং গ্লোবেলগী শীংনবশিং কোকহন্নবা মখোয়না চুংশিন্নবা হেনগৎপা মথৌ তাই হায়না ফোঙদোকখি। মখোয়না অৱাবা তারবা মতমদা গ্লোবেল ওর্দর অমুক হন্না থম্বা ঙম্নবা ‘বসুধৈব কুতুম্বকম’ হায়বদি ৱান আর্থ, ৱান ফেমিলী, ৱান ফ্যুচরগী পাউজেল পুদুনা অফবগী শক্তি অমা ওইনা পুন্না থবক তৌমিন্নীংবগী অচেৎপা ফিরেপ নৌনা ফোঙদোকখি।

‘হোরিজন 2047’ রোদমেপ, ইন্দো-পেসিফিক রোদমেপ অমসুং অতোপ্পা কান্নবশিং ফংখিবা প্রধান মন্ত্রী নরেন্দ্র মোদীগী খোঙচৎ অসিনা অনৌবা পোইন্ত ওফ রিফরেন্স ওইদুনা লুচিংবা অনিনা দিফেন্স, স্পেস, ন্যুক্লিয়র ইনর্জী, দিজিতেল পব্লিক ইনফ্রাস্ত্রকচর, ক্রিতিকেল তেক্নোলোজী, ক্লাইমেৎ চেঞ্জ, এজুকেসন, অমসুং পিপল-তু-পিপল কন্তেক্তশিং লমশিং অসিদা খুমাং চাউশিল্লিবা অমসুং কোওপরেসনগী অনৌবা অমসুং অচীবা পান্দমশিং থবক ওইনা ওন্থোক্নবা মথংগী খোঙথাংশিংগী মতাংদা খন্নখি। মখোয়না ইনফ্রাস্ত্রকচর, কন্নেক্তিবিতী, ইনর্জী, বাইওদাইভর্সিতী, সস্তেনেবিলিতী অমসুং ইন্দস্ত্রিএল প্রোজেক্তশিং য়াওনা ইন্দো পেসিফিক রিজন অমসুং অফ্রিকাদা ইন্দিয়া-ফ্রান্স পার্তনরশিপ কোনশিনহন্নবগী মতাংদা মখোয়া খন্ন-নৈনখি। মখোয়না ভারত অমসুং ফ্রান্সনা লোঞ্চ তৌখিআ ফ্রেমৱার্ক ওফ দি ইন্তর্নেস্নেল সোলর এলায়েন্স অমসুং কোলিজন ফোর দিজাস্তর রেজিলিএন্ত ইনফ্রাস্ত্রকচরদা মখোয়না মতেং পীনবগী খুত্থাংদা ইন্দো-পেসিফিক্কীদমক সোল্যুসন প্রোভাইদর ওইনা মখোয়না লৌরিবা থৌদাংগী মতাংদা ফোঙদোকখি।

রাস্ত্রপতি মেক্রোন্না প্রধান মন্ত্রী মোদীবু ভারতকী মিসন চন্দ্রয়ান 3না মাইপাকখিবগীদমক নুংঙাইবা ফোঙদোকখি। লুচিংবা আনিনা ইন্দিবা-ফ্রান্স স্পেস কোপরেসন দিকেদ তরুক চত্থরকখিবা অদুবু নীংশিংখি অমসুং জুন 2023দা অহানবা স্ত্রেতেজিক স্পেস দাইলোগ তৌখিবা অদুদগী হৌজিক ফাওবদা খুমাং চাউশিল্লিবা অদু হন্না য়েংশিনখি। মখোয়না মপাঙ্গল কনবা ইন্দিয়া-ফ্রান্স সিবিল ন্যুক্লিয়র মরীশিংগী মতাংদা ফোঙদোকখি অমসুং জাইতাপুর ন্যুক্লিয়র প্লান্ত প্রোজেক্তকীদমক খন্নবদা চাউনা খুমাং চাউশিনখিবা অদুসু পনখি অমসুং SMR অমদি AMR তেক্নোলোজীশিং কো-দিবেলপ তৌনবা পার্তনরশিপ অমা তৌনবা লোয়নমা দেদিকেতেদ দেক্লেরেসন ওফ ইন্তেন্ত অমা খুৎয়েক পীনগদৌরিবা অসিগী মতাংদা বাইলেতরেল কোওপরেসন হেনগৎহন্নবা নাকল অনিমক্না মখা তানা থবক তৌমিন্ননবা ফোঙদোকখি। ফ্রান্সনা ন্যুক্লিয়র সপ্লায়র্স গ্রুপতা ভারতকী মেম্বরশিপ সপ্পোর্ত তৌনবা খোঙফম চেৎপা ফিরেপ অদু নৌহৌনা ফোঙদোকখি।

লুচিংবা অনিমক্না দিজাইন, দিবেলপমেন্ত, তেস্তিংদা অমসুং এদভান্স দিফেন্স তেক্নোলোজীশিং অমসুং প্লেৎফোর্মশিং মেন্যুফেকচর তৌবদা অমসুং ইন্দো-পেসিফিক অমসুং অহেনবা থর্দ পার্তী ওইবা লৈবাকশিং য়াওনা ভারত্তা প্রদক্সন হেনগৎহন্নবা পার্তনরশিপকী খুত্থাংদা দিফেন্স কোওপরেসন মপাঙ্গল কনখৎহন্নবা মখোয়গী ফিরেপ নৌহৌনা ফোঙদোকখি। হীরম অসিদা মখোয়না দিফেন্স ইন্দস্ত্রিএল রোদমেপ ঙন্না ফাইনেলাইজ তৌনবসু ফোঙদোকখি।

দিজিতেল, সাইন্স, তেক্নোলোজিকেল ইন্নোবেসন, এজুকেসন, কলচর, হেল্থ অমসুং এনভাইর্নমেন্ত কোওপরেসন অসিগুম্বা লমশিংদা মীৎয়েং থম্লদুনা লুচিংবা অনিনা ইন্দো-পেসিফিক্কীদমক ইন্দো-ফ্রেঞ্চ কেম্পসকী মোদেল অমদা দোমেনশিং অসিদা ইন্সতিত্যুস্নেল লিঙ্কেজ মপাঙ্গল কনখৎহন্নবা ফোঙদোকখি। হীরম অসিদা মখোয়না কলচরেল একচেঞ্জ হেনগৎহন্নবা অমসুং ম্যুজিয়মশিং শেমগৎনবা পপুন্না থবক তৌমিন্নবগী ফিরেপ নৌহৌননা ফোঙদোকখি।

প্রধান মন্ত্রী মোদীনা রাস্ত্রপতি মেক্রোনবু ফ্রান্সনা ভারতকী G-20 প্রসিদেন্সীদা লেপ্তনা সপ্পোর্ত পীখিবগীদমক থাগৎপা ফোঙদোকখি, হায়রিবা অসিনা মালেমগী শীংনবশিং কোকহন্নবা মালেমগী থাক্তা হোৎনবদা ইনক্লুসিবনেস, য়ুনিতী অমসুং কোহেজন লৈহনখি অমসুং হেন্না স্তেবল ওইবা গ্লোবেল ওর্দর অমা থম্বা ঙমহনখি। ভারত অমসুং ফ্রান্সনা অফ্রিকন য়ুনিয়নদা G-20 মেম্বরশিপ পীখিববু তরাম্না ওকখি অমসুং AUগা লোয়ননা অফ্রিকাগী চাউখৎপা পুরক্নবা পুন্না থবক তৌনবা খৌরাংনা ঙাইরি।

*******