ভারতকী প্রধানমন্ত্রী

এক্সিলেন্সী,

খুরুমজরি!

অদোমগী হৌদোক ৱারোলগীদমক অদোম্বু থাগৎচরি।

অদোম্না হায়বীখিবগুম্না, কোবিদ-১৯না মরম ওইদুনা ঐনা মেদা ইতলীগী ঐগী খোংচৎ য়ৈথোকপা তাখি। নুংঙাইরিবা ৱাফমদি ঙসি ঐখোয় ভর্চুএলগী থোংদা উনবা ফংলি। ইহান হানবদা ঐ ইতলীদা কোরোনাভাইরসনা মরম ওইদুনা থোক্লিবা অমাং-অতা অদুগীদমক ঐগী মায়কৈদগী অমসুং ভারতকী মীপুম খুদিংমক্কা মায়কৈদগী অৱাবা ফংদোকচরি। মালেমগী অতৈ লৈবাকশিংনা কোরোনা ভাইরস অসি খঙবা হৌরকপদা, ৱাখল তাবা হৌরকপদদি অদোম অৱাবা অসি মায়োক্নখ্রে।

অদোম্না মপুং ফানা মায় পাকপগা লোইননা অরুবা ফিভম অমদা য়াম্না থুনা লাকশিনবা ঙমখি অমসুং লৈবাক অপুনববু পুনশিনখি। লাইচৎকী অহানবা থাবুমশিংদা ইতলীগী মায় পাকপনা ঐখোয় পুম্নমক্তা ইথিল পোকহনখি। অদোমগী খঙলু-উরুবশিং অদুনা ঐখোয় পুম্নমক্কী লমজিং-লমতাক ওইখি।

এক্সিলেন্সী,

অদোমগুম্না ঐসু ভারত অমসুং ইতলীগী মরী অসিবু হেন্না পাক-চাউবা অমসুং চেৎশিলহন্নবা ৱাফম থমজরি। ২০১৮দা তেক সমিৎকীদমক্তা অদোমগী ভারতকী খোংচৎ অমসুং ঐখোয়না উনখিবা অদুনা মখল-মখা কয়া য়ৌশিনবা ঙমখি ভারতকী মীয়ামগী পুক্নীংদসু ইতলীগী মায়কৈদা অনৌবা লাংতক্নবা অমা ফাওহনবা ওইখি। ২০১৮দা ঐখোয়না ৱারী শানখ্রবা মতুংদা অমগা অমগা পীথোক-পীশিন তৌনবদা খোংজেল য়াম্না য়াংশিনখিবা অদু হরাওনীংঙাইনি।

ইতলীগী সংসদনা হৌখিবা চহিদা ভারত-ইতলী ফ্রেন্দশিপ গ্রুপ লিংখৎখ্রে তাবদা ঐ নুংঙাইবা পোকই। ঐনা আশা তৌরি মদুদি কোবিদকী ফিভম অসি ফরবা মতুংদা ঐখোয়না ইতলিয়ন পর্লিয়ামেন্ত মেম্বরশিংবু ভারত্তা তরাম্না ওকচবগী তাঞ্জা ফংগনি।

এক্লিলেন্সী,

মসি তশেংলে মদুদি কোবিদ-১৯ লাইচৎ অসি সেকেন্দ ৱর্ল্দ ৱারগুম্না পুৱারীদা ৱাতরশেদ অমা ওইনা লৈহৌরগনি। ঐখোয় পুম্নমক্না অনৌবা মালেম অসিগীদমক্তা, পোস্ত কোরোনা ৱর্ল্দগীদমক্তা ইশাবু এদাপ্ত তৌবা তাই, মসিদগী লাক্কদবা শিংনবশিং অমসুং তাঞ্জাশিংগীদমক্তা ঐখোয় পুম্নমক অনৌবা থাক অমদা শেম-শাদুনা লৈবা তাই।

ঐনা থাজৈ মদুদি ঙসিগী ঐখোয়গী ৱারী-ৱাতাই অসিদগী ঐখোয়গী মরী অসি হেন্না চেৎশিল্লগনি, অমনা অমবু খঙবা হেনগৎলগনি অমসুং তেংবাং পীনবগী অনৌবা লমশিংগী মশক খঙদোকপদা মতেং ওইরগনি।

***