ভারতকী প্রধানমন্ত্রী

য়োর এক্সিলেন্সী রাস্ত্রপতি সামিয়া হসনজী,

লৈবাক অনিমক্কী দেলিগেৎশিং,

মীদিয়াগী মরুপশিং,

খুরুমজরি!

অহানবদা ঐহাক্না রাস্ত্রপতি অমসুং মাগী দেলিগেসনবু ভারত্তা তরাম্না ওকচরি।

তঞ্জানিয়াগী রাস্ত্রপতি ওইনা মসি মহাক্কী ভারত্তা লাকপা অহানবা খোঙচৎনি। অদুবু মখোয়না ভারত অমসুং মাগী মীয়ামগী মতম কয়াদগী মরী লৈনরক্তুনা লাকখি।

ভারতকীদমক মআক্না ফাওরিবা নুশিংবা অমসুং কম্মিৎমেন্ত অসিনা ঐখোয়গী মরী অসি লম খুদিংমক্তা হেন্না চেৎশিনহন্নবা ঐখোয়দা ইথিল পীরি।

অফ্রিকন য়ুনিয়ন্না G20দা পর্মিনেন্ত মেম্বর অমা ওইনা য়াওরবা মতুংদা ঐখোয়না অহানবা ওইনা ভারত্তা অফ্রিকাগী হেদ ওফ স্তেৎ অমবু তরাম্না ওকপগী খুদোংচাবা ফংজরি।

মরম অসিনা খোঙচৎ অসিগী মরু ওইবা অসি ঐখোয়গীদমক শরুক কয়া হেনগৎহনখি।

মরুপশিং,

ঙসিগী নুমিৎ অসি ভারত অমসুং তঞ্জানিয়াগী মরীশিংদা য়াম্না পুৱারী ওইরবা অদুগুম্লবা নুমিৎ অমা ওইরি।

ঙসি ঐখোয়গী চহি কয়া শরুবা মরুপ ওইবগী মরী অসিবু স্ত্রেতেজিক পার্তনরশিপ অমদা ওন্থোক্লি।

ঙসিগী মীফম অসিদা ঐখোয়না অনৌবা থৌশিল কয়ামরুম মশক খঙদোকখ্রে, মসিনা তুংলমচৎকী স্ত্রেতেজিক পার্তনরশিপকীদমক য়ুম্ফম থোল্লগনি।

ভারত অমসুং তঞ্জানিয়া অসি ম্যুচুএল ত্রেদ অমসুং ইনভেস্তমেন্তগীদমক মরু ওইবা মপাংশিং ওইরি।

নাকল অনিমক্না লোকেল করেন্সীশিংদা ললোন-ইতিক তৌবা হেনগৎহন্নবা য়ান্ন-ৱারোল অমা থমনবা থবক পাইখৎলি।

ঐখোয়না ঐখোয়গী ইকনোমিক কোওপরেসনগী মপুং ফাবা পোতেন্সিএল পুথোক্নবা অনৌবা খুদোংচাবশিং মখা তানা থীখিগনি।

তঞ্জানিয়া অসি অফ্রিকাদা ভারতকী খ্বাইদগী চাউবা অমসুং নক্নবা দিবেলপমেন্ত পার্তনর ওইরি।

ICT সেন্তরশিং, ভোকেস্নেল ত্রেনিং, দিফেন্স ত্রেনিং, ITEC অমসুং ICCR স্কোলরশিপশিংগী খুত্থাংদা ভারতনা তঞ্জানিয়াগী স্কিল দিবেলপমেন্ত অমসুং কেপাসিতী বিল্দিংদা চাউনা শরুক তমখি।

ৱাতর সপ্লাই, লৌউ-শিংউ, হকশেল, এজুকেসনগুম্বা মরু ওইবা লমশিংদা পুন্না থবক তৌদুনা ঐখোয়না তঞ্জানিয়াগী মীয়ামগী পুন্সিদা পোজিতিব ইবা অহোংবশিং পুরক্নবা হোৎনখি।

মসিগী কম্মিৎমেন্ত অসিগা লোয়ননা তুংলমচৎতসু ঐখোয়গী খোঙথাংশিং মখা চত্থখিগনি।

জাঞ্জিবারদা কেম্পস অমা হাংদোক্নবা IIT মদ্রাসকী ৱারেপ অসি ঐখোয়গী মরীদা মরু ওইবা মাইলস্তন অমনি।

তঞ্জানিয়াগীদমক হায় ক্বালিতী এজুকেসনগী হব অমা ওইবতা নত্তনা রিজনেল লৈবাকশিংগী মহৈরোয়শিংগীদমক্তসু ওইরগনি।

লৈবাক অনিমক্কী চাউখৎ-খোঙচৎতা তেক্নোলোজীনা মরু ওইবা য়ুম্ফম অমা ওইরি।

ঙসি দিজিতেল পব্লিক গুদস শিয়রিংগী য়ান্ন-ৱারোল অসিনা ঐখোয়গী পার্তনরশিপপু মপাঙ্গল কনখৎহল্লগনি।

তঞ্জানিয়াদা UPIগী মাইপাকপগী ৱারী অসি মতৌ তম্নবা খোঙথাংশিং পাইখৎলি তাবদা ঐহাক্না নুংঙাইবা পপোকই।

মরুপশিং,

ঙাকশেলগী লমদা ঐখোয়না চহি মঙাগী রোদমেপ অমদা য়ান্নবা পুরকখ্রে।

মসিগী খুত্থাংদা মিলিতরী ত্রেনিং, মেরিতাইম কোওপরেসন, কেপাসিতী বিল্দিং, দিফেন্স ইন্দস্ত্রীগুম্বা লমশিংদা অনৌবা দাইমেন্সনশিং হাপচিল্লগনি।

ভারত অমসুং তঞ্জানিয়াগী মরক্তা ইনর্জীগী লমদা অনকপা মরী লৈনরি।

ভারত্তা খোঙজেল য়াংনা হোংলক্লিবা ইনর্জী লেন্দস্কেপ অসি য়েংলগা ঐখোয়না মরু ওইবা লম অসিদসু পুন্না থবক তৌমিন্ননবা য়ান্নখি।

তঞ্জানিয়ানা G20 সম্মিৎতা ভারতনা লোঞ্চ তৌখিবা গ্লোবেল বাইওফ্যুল এলাইন্সতা য়াওনবা ৱারেপ লৌখিবদা নুংঙাইবা পোকই।

মসিগী মথক্তা তঞ্জানিয়ানা ইন্তর্নেস্নেল বিগ কেৎ এলাইন্স য়াওনবা ৱারেপ লৌখিবা অসিনা বিগ কেৎশিং কন্নবা মালেমগী খোঙথাংশিং মপাঙ্গল কনখৎহনবা ঙম্লগনি।

ঙসি ঐখোয়না মীয়ামগী য়াইফনবা স্পেস অমসুং ন্যুক্লিয়র তেক্নোলোজী শীজিন্নবদা মীৎয়েং চংখি। ঐখোয়না মরু ওইবা লমশিং অসিদা পাইখৎপা য়াবা অচৌবা ইনিসিএতিবশিং মশক খঙদোক্তুনা মাংদা চংশিন্নবা ৱারেপ লৌখি।

মরুপশিং,

ঙসি ঐখোয়না রিজনেল অমসুং গ্লোবেলগী ওইবা হীরম কয়া খন্নখ্রে।

ইন্দিয়ন ওসীনগা শম্নবা লৈবাকশিং ওইনা ঐখোয়না মেরিতাইম সেক্যুরিতী, পাইরেসী, দ্রগ ত্রাফিক্কিং অসিনচিংবা শীংনবশিং থেংনবদা অমনা অমগী  তেংবাং পীনবা হেনগৎহন্নবা ঐখোয়না মীৎয়েং চংখি।

ঐখোয়না ইন্দো-পেসিফিক্তা পাইখৎপা খোঙথাং পুম্নমক্তা তঞ্জানিয়াবু মমল য়াম্না লৈবা মপাং অমা ওইনা লৌই।

ভারত অমসুং তঞ্জানিয়ানা অমত্তা ওইনা তেরোরিজম অসি মীওইবা জাতিগী খ্বাইদগী শাথিবা সেক্যুরিতী থ্রেৎ অমনি হায়বা য়ানখি।

হীরম অসিদা ঐখোয়না কাউন্তর-তেরোরিজমগী লমদা অমনা অমদা পীবা তেংবাং হেনগৎহন্নবা ৱারেপসু লৌখি।

মরুপশিং,

ঐখোয়গী মরীশিংগী খ্বাইদগী মরু ওইবা লিঙ্ক অসি ঐখোয়গী শক্তি লৈবা অমসুং অরিবা পিল-তু-পিপল তাইশিংনা ওইরি।

গুজরাতকী মান্দবী পোর্ত অমসুং জাঞ্জিবারগী মরক্তা চহি লিশিং অনিগী মমাংদা ললোন-ইতিক্কী থবক চত্থরমখি।

ভারতকী সিদী ত্রাইবকী ওরিজিন অসি ইস্ত অফ্রিকাগী কাঞ্জ কোস্ততগী হৌরকখি।

ঙসিসু ভারত্তগী মশিং য়াম্লবা মীয়াম্না তঞ্জানিয়া অসি মখোয়গী অনিশুবা য়ুম ওইনা লৌরি।

মখোয়বু য়েংশিনবীনবা তঞ্জানিয়াদগী ফংখিবা সপ্পোর্ত অদুগীদমক রাস্ত্রপতি হসনবু থমোয় শেংনা তৌবীমল খঙবা উৎচরি।

য়োগগা লোয়ননা তঞ্জানিয়াদা কবদ্দী অমসুং ক্রেকেত পাম্নবা হেনগৎলক্লি।

লৈবাক অনিগী মরক্তা মীয়ামগী অনকপা মরী অসি হেনগৎহন্নবা ঐখোয়না মখা তানা হোৎনখিগনি।

এক্সিলেন্সী,

অমুক হন্না অদোমবু অমসুং অদোমগী দেলিগেসনবু ভারত্তা তরাম্না ওকচরি।

হন্না-হন্না থাগৎচরি।

***