ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি ভারতকী জি২০ প্রসিদেন্সীগী লোগো, থীম অমসুং ৱেবসাইত মায়খুম হাংদোকখ্রে‍।

প্রধান মন্ত্রীনা ভর্চুএল ওইনা মায়খুম হাংদোকখিবা লোগো অমসুং থীম মখাদা অসিনি:

লোগো অমসুং থীম শন্দোক্না তাকপা

জি২০ লোগো অসি ভারতকী ফিরালগী মচু – গেরুৱা, অঙৌবা অমদি অশংবা, অমসুং হিগোক মচুদগী লৌরগা শেম্বনি‍। মসিদা মালেম লৈকোয়পুং অসিবু শিংনবশিংগী মরক্তা চাউখৎলকপগী মমি তারিবা ভারতকী লৈবাক্কী লৈ থম্বালগা পুন্না থম্মিন্নরি‍। মালেম লৈকোয়পুং অসিনা ভারতকী মালেমগীদমক মহৌশাগা মরী ফনা চঙশিল্লিবা পুন্সি মহিংগী মমি তারি‍। জি২০ লোগোগী মখাদা দেবনগরি ময়েক্তা “ভারত” হায়না ইরি‍।

লোগো অসি লোগো দিজাইনগী ওপন কম্পিতিসন্দা থাজিল্লকখিবা তোঙান তোঙানবা এন্ত্রীশিংদা য়াওবা মচাকশিংদগী শেম্বনি‍। মাইগোভ পোর্তেলদা পাঙথোকখিবা কন্তেস্ত অদুদা সবমিসন ২০০০ হেনবগী পাউখুম ফংখি‍। মসি ভারতকী জি২০ প্রসিদেন্সী মনুংদা মীয়াম্না শরুক য়াহনবা হায়বা প্রধান মন্ত্রীগী মীৎয়েঙ তুংইন্না পায়খৎপনি‍।

ভারতকী জি২০ প্রসিদেন্সীগী থীম – “বসুদৈব কুতুম্বকম” নৎত্রগা “ৱন আর্থ ৱন ফেমিলী ৱন ফ্যুচর” – অসি মহা উপনিসদ হায়রিবা অরিবা সংস্কৃৎ লাইরক্তগী লৌখৎপনি‍। থীম অসিনা মীওইবা, শা-ঙা, পাম্বী অমসুং মোক্রোওর্গানিজম – হায়রিবা পুন্সি মখল খুদিংমক্কী মমল অমসুং মালেম লৈকোয়পুং অমদি হেন্না পাক চারবা তাইবং মালংপানসিদা মখোয় মশেলগী মরক্তা লৈনরিবা মরী তাক্লি‍।

থীম অসিনা লাইফ (লাইফস্তাইল ফোর এনভাইরনমেন্ত), মসিগা মরী লৈনরিবা লনাইগী পুন্সি মহিং অমসুং লৈবাক্কী শেমগৎ শাগৎপা অনিমক্তা অকোয়বগী ফীভম ঙাক শেনবা অমদি থৌদাংগী লম্বীগা লোয়ননা মালেমগী ওইনা অহোংবা পুরক্কদবা থবকশিংনা হেন্না লু-নানবা, হেন্না শংবা অমদি হেন্না হিগোক মচু ওইবা তুংলমচৎ অমা পুরক্নবগী পান্দমশিং উৎলি‍।

লোগো অমদি থীম অনিসিনা পুল্লগা, চরাংনবা লৈতাদবনা থল্লবা মতমসিদা তুং কোইগদবা, পুম্নমক্কী ওইবা, থৌদাং লৈবা অমদি পুম্নমক শুপচিল্লবা মওংদা চৎপগা লোয়ননা মালেম পুম্বদা অচান মীরান নাইদনা অমদি থোং মান্ননা চাওখৎমিন্নবগী মায়কৈদা চঙশিল্লিবা ভারতকী জি২০ প্রসিদেন্সীগী মতিং লৈরবা পাউজেল পীরি‍। মখোয়না অকোয়বগী ফীভমগা পুকচেল তিন্ননা হিংমিন্নবগী ঐখোয়গী জি২০ প্রসিদেন্সীগী ভারতকী তোপ তোপ্পা লম্বী পরিং উৎলি‍।

ভারতকীদমক্তদি, জি২০ প্রেসিদেন্সী অসি ১৫ ওগস্ত ২০২২দা তাখিবা নীংতম্বগী ৭৫শুবা কুমওন থৌরমদগী হৌরগা চহি চাম্মা ফারকপা ফাওবগী তুংলমচৎকী, নুংঙাই য়াইফবা, পুন্না চৎমিন্নবা অমদি চাওখৎলবা খুন্নাই অমগা মায়কৈদা মীওইবগী মিনুংসিগী ওইবা ৱাখল্লোন্না নুংদা চেল্লিবা ঈচেলগী তোপ তোপ্পা মশক্কা লোয়ননা চঙশিল্লিবা চহি ২৫গী মতম ওইরিবা ‘অমৃৎকাল’ হৌরকপবুসু তাক্লি‍।

জি২০ ৱেবসাইত

ভারতকী জি২০ প্রেসিদেন্সীগী ৱেবসাইত www.g20.in প্রধান মন্ত্রীনা হাংদোকখি‍। ৱেবসাইত অসি ভারতনা জি২০ প্রসিদেন্সী লৌখিবা নুমিৎ দিসেম্বর ১, ২০২২দা জি২০ প্রসিদেন্সীগী ৱেবসাইত www.g20.org দা অপনবা লৈতনা মাইগ্রেৎ তৌগনি‍। জি২০গী য়াম্লবা ঈ-পাউ অমদি লোজিস্তিক এরেঞ্জমেন্তকী মথক্তা, ৱেবসাইত অসি জি২০গী ঈ-পাউ তুংশিনফম অমা ওইনসু শেমগৎকনি অমদি মথৌ তৌগনি‍। ৱেবসাইত অসিদা মীয়াম্না মখোয়গী সজেসন থাজিল্লক্নবা সেক্সন অমা য়াওরি‍।

জি২০ এপ

ৱেবসাইত অসিগী মথক্তা, “জি২০ ইন্দিয়া” হায়বা মোবাইল এপ অমসু এন্দ্রোইদ অমদি আই.ও.এস. ফম্পাক অনিমক্না ফোঙখ্রে‍।

*****