ভারতকী প্রধানমন্ত্রী

খুরুমজরি,

ঐগী মন্ত্রীমন্দলগী খোংলোই শ্রী রবিশঙ্কর প্রসাদজী, কর্নাতক্কী মুখ্যমন্ত্রী শ্রী বি.এস. য়েদিয়ুরপ্পাজী অমসুং তেক ৱর্ল্দগী মরূপ পুম্নমক, তেক্নোলোজীনা ঐখোয়দা মরুওইরবা তেক্নোলোজীগী সমিৎ অসি পাংথোক্নবা মতেং পাংলিবা অসি য়াম্না তাংলবা তাঞ্জা অমনি।

মরূপশা, ঐখোয়না চহি ৫গী মমাংদা দিজিতেল ইন্দিয়া মিসন হৌদোকখি। ঙসি ঐ মসি হায়বদা য়াম্না নুংঙাইবা ফাওই মদুদি দিজিতেল ইন্দিয়াবু হৌজিক সরকার অমনা মমাংঙৈগী মতৌগুম্না য়েংবা তৌদ্রে। দিজিতেল ইন্দিয়া অসি হৌজিক পুন্সি হিংননবগী থৌওং অমা ওইখ্রে, মরুওইনা লাইরবশিং হক লৈজদ্রবা মীওইশিং অমসুং সরকারদা থবক তৌরিবা মীওইশিংগীদমক্তা। দিজিতেল ইন্দিয়াবু থাগৎচরি, ঐখোয়গী লৈবাক অসি হৌজিক, চাউখৎ-থৌরাংগীদমক্তা হ্যুমেন সেন্ত্রিক এপ্রোচ অমগী শাখি ওইররে। মশিং অদুক্কী মতিক য়াম্না তেক্নোলোজী শিজিন্নবদগী ঐখোয়গী মীয়ামগী পুন্সিদা অহোংবা য়াম্না পুরক্লে। মসিগী কান্নবা ময়েক শেংনা উবা ফংলে।

ঐখোয়গী সরকারনা দিজিতেল অমসুং তেক্কী পাম্বৈশিংগীদমক্তা মায় পাক্না চাউরবা কৈথেল অমা শেম-শারে অমসুং তেক্নোলোজীবু ঐখোয়গী থৌরাং খুদিংমক্কী মরুওইবা শরুক অমা ওইহল্লে। ঐখোয়গী গোভর্নেন্স মোদেল ‘তেক্নোলোজী ফার্স্ত’নি। তেক্নোলোজীগী থোংদা মীওইবগী ইকাই খুম্নবা হেনগৎহল্লে। লৌমী লিশিং কয়া হৌজিক ক্লিক তৌদুনা শেলগী তেংবাং ফংলি। কোবিদ-১৯ লোকদাউনগী মতমদা, তেক্নোলোজী অসিননি, ভারতকী লাইরবশিংদা মতিক চাবা অমসুং খুদক্তা তেংবাং ফংহনখিবা অদু। অসিগুম্বা মতেং অসি মমাংদা য়াম্না তাংনা ফংবা ঙমখি। করিগুম্বা ভারতনা মালেমগী খ্বাইদগী চাউবা হকশেলগী ঙাক-শেলগী থৌরাং ‘আয়ুশ্মান ভারত’পু মায় পাক্না পাংথোকপা ঙমলিবসিগী মরম অসিদসু তেক্নোলোজীগী য়াম্না চাউরবা থৌদাং য়াওই। থৌরাং অসিনা মরুওইনা লৈবাক অসিগী লাইরবা কাংলুপ্তা মতেং পাংখি। হৌজিক মখোয়বু ভারতকী মফম অমা হেক্তদা অৱাংবা মখলগী অমসুং অহোংবা হেল্থকেয়র ফংবগী মতাংদা অৱাবা অমত্তা লৈত্রে।

ঐখোয়গী সরকারনা দেতা এনালাইতিক্সকী পাঙ্গল শিজিন্নদুনা হেন্না ফবা সর্বিস অমসুং খুদোংচাবা ফংহল্লি। ইন্তর্নেত অসি ভারত্তা চাউরাক্না চহি ২৫গী মমাংদা চংলকখি। রিপোর্ত অমগী মতুং ইন্না লৈবাক অসিদা হন্দক্তা ইন্তর্নেত কনেক্সনগী মশিং মিলিয়ন ৭৫০ হেনখ্রে। অদুবু অদোম মসি খঙবীবরা মদুদি মসিগী মনুংদা কনেক্সন তঙ্খাই অমরোমদি শুপ্নগী হৌখিবা চহি মরিদা তৌখিবনি। ঐখোয়গী থৌরাংশিংগী ফাইলশিংদগী থোরক্তুনা চৎনবা ঙমহনবা অমসুং মীয়ামগী পুন্সিদা অদুক্কী মতিক খোংজেল য়াংনা মশিং অদুক্কী মতিক য়াম্না অহোংবা পুরকপা ঙম্বগী মরম তেক্নোলোজীনি। ঙসি, ঐখোয়না ঐখোয়গী লাইরবশিংগীদমক্তা খোংজেল য়াংনা অমসুং মপুং ফানা নুং-পান উহনবগা লোইননা মখোয়গী য়ুম শাবদা মতেং পাংবা ঙম্লিবা অসিগী মরম অসিগীদমক্তসু তেক্নোলোজী অসিবু থাগৎফম থোকই। ঙসি, ঐখোয়না য়ুম খুদিংদা ইলেক্ত্রিক ফংহনবা ঙম্লি, মসিদসু তেক্নোলোজীগী চাউরবা থৌদাং য়াওরি। ঙসি, ঐখোয়না তোল বুথশিংবু খোংজেল য়াংনা লান্থোকপা ঙম্লি, মসিসু তেক্নোলোজীগী মতেংনা ওইথোকপা ঙম্লিবনি। ঙসি তেক্নোলোজীনা ঐখোয়দা ইশানা ইশাবু থাজবা ঙমহল্লে মদুদি ঐখোয়না ঐখোয়গী য়াম্লবা মীয়ামদা তেল্লবা মতমগী মনুংদা ভেক্সিন ফংবা ঙমহল্লগনি।

মরূপশা, তেক্নোলোজীগী মতাংদা পল্লকপা অসিদা, ঐখোয়না অমত্তা ওইনা পুন্না তম্মিন্নগদবনি অমসুং চাউখৎমিন্নগদবনি। মিৎয়েং অসিদগী ইথিল পোকচদুনা ভারত্তা মশিং য়াম্না ইনক্যুবেসন সেন্তর হাংদোক্লি। হৌখিবা চহি খরদা ভারত্তা হেকাথোনগী য়াম্না চাউবা নাৎ অমা শেমগৎখি। ঐনসু মদুদা, খরদা শরুক য়াখি। ঐখোয়গী লৈবাক অমসুং ঐখোয়গী মালেমগী মাংদা লৈরিবা মরুওইবা শিংনবশিংগী পাম্বৈ পুথোক্নবা নহা ওইরিবা কোকশিংগা লোইননা থোরক্লি অমসুং পাম্বৈ থিরি। মতৌ অসুম্না হেকাথোনগী থোংদা সিঙ্গাপুর অমসুং আসিয়ান লৈবাকশিংগা লোইননা তেংবাং পীনবদা মতেং পাংলি। ভারত সরকারনা মসিগী ভাইব্রেন্ত স্তার্তঅপ কম্যুনিতীগী মতেং পাংবা ঙম্লি, মসিগা হৈ-শিংবা অমসুং মায় পাকপাগী খুদম মালেমদা মমিং চৎখ্রে।

মরূপশা, ঐখোয়না মতম পুম্নমক্তা তারিঃ নুংতিগী হোংলিবা ফিভমনা মীওই অমগী মতিক ফোংদোক্নবগী থবক তৌই। তশেংনমক, ভারতকী তেক কম্যুনিতীগী মীওই কয়াগী মতাংদা ৱাফম অসি য়াম্না চুনৈ। কনাগুম্বনা য়াম্না ফবা থবক্কী অনীংবা অপাম্বা লৈবা কঞ্জ্যুমরনা মাংদা নত্ত্রগা করিগুম্বা থবক অমবু করিগুম্বা অকক্নবা মতমগী মনুংদা খুদক্তা মপুং ফাহন্নবগী শাফু পীরকপদা, অদোম্না উবীরমগনি মদুবু মপুং ফাহন্নবগীদমক্তা মখোয়গী মরমদা অদোম্না খল্লুবা খক তৌরুদবা অদুগুম্বা মীওই খরা থোরকই। মালেমগী থাক্তা পাংথোকখিবা লোকদাউন অমসুং অথিংবশিংনা মীয়াম্বু মখোয়গী থবক মফমদগী লাপ্না, মখোয়গী ময়ুমদা ফাজিন্দুনা থমখি। মতম অদুদা ঐখোয়গী তেক্নোলোজীগী লমদা লৈরিবা মীওইশিংগী চেকশিনবা উবা ফংখি। ঐখোয়গী তেক্নোলোজীগী লমদা চেকশিনখি অমসুং য়ুমদগী নত্ত্রগা মফম অমা হেক্তদগী থবক মখা চৎথনবগী পাম্বৈ খোমজিনবদা পুক্নীং চংখি। তেক্নোলোজীগী লমনা মীওইশিংবু অমত্তা ওইনা পুরক্নবগী থবক্তা লোৎতুনা লৈরম্বা অনৌবা তাঞ্জা অমা মশক খঙখি।

কোবিদ-১৯গী লাইচৎ অসিগী ঐখোয়গী লম্বীগী খুনীংথেক অমনি, অরোইবা নত্তে। চহি তরাগী খুজিং অমদা তেক্নোলোজীগী অদুক্কী মতিক শিজিন্নবা ঙম্লমদবা চাং অদু থা খরগী মনুংদা হৌদোকখি। মফম অমা হেক্তদগী থবক তৌবা কান্নবা অমা ওইখি, মদু হৌজিক মখা চৎথখিগনি। তুংলমচৎতা ঐখোয়না মহৈ-মশিং, হকশেল, শোপ্পিং অমসুং অতৈ লমশিংদা তেক্নোলোজী শিজিন্নবা য়াম্না হেনগৎলকপা উরগনি। হৌজিক ঐনা তেক্নোলোজী সেক্তরগী য়াম্না খঙ-হৈরবা মীওইশিংগা হকথেংননা ৱারী শানবগী তাঞ্জা ফংখি, অদুনা ঐনা মপুং ফানা থাজবগা লোইননা হায়জরি মদুদি, অদোমগী হোৎনখিবশিং অদুগীদমক অদোম্বু থাগৎচরি।

মরূপশা, ইন্দস্ত্রী মতমগী মায় পাকপশিং অদু হৌজিক হৌখ্রেবা মতমগী ৱাফম ওইখ্রে। হৌজিক ঐখোয় ইনফোর্মেসন মতমগী ময়াইদা লৈরি। তুংলমচৎ অসি খোংজেল য়াংনা ঐখোয়গী মায়কৈদা চংশিল্লক্লি মরম অসিনা ঐখোয় মমাংগী চহি চাগী ৱাখল্লোন অদু থুনা থাদোকপা তাই। ইন্দস্ত্রীগী চহি চাদা অহোংবা লাইনীয়র লৈখি। অদুবু ইনফোর্মেসনগী চহি চা অসিদা অহোংবা অসি য়াম্না চাউবা অমসুং অপনবা পীনীংঙাই ওইগনি।

ইন্দস্ত্রীগী চহি চাদা, ঙমখৈগী মগুন লৈরম্মি। অদুবু ইনফোর্মেসনগী চহি চাদা ঐখোয় ঙমখৈগী ৱাংমদা চৎলি। ইন্দস্ত্রীগী চহি চাদা রো মেতরিয়েল ফংননবা হোৎনবা অসি চাউনা শিংনবা অমা ওইরম্মি অমসুং শুপ্নগী মীওই খরতনা মসিবু ফংবা ঙম্লম্মি। ই-পাউগী মতম অসিদা রো মেতরিয়েল অদু, পাউ তাবদা, ঐখোয়গী মাংদা মফম খুদিংমক্তা লৈ অমসুং মীওই খুদিংমক্না মদু ফংবা ঙম্মি। ভারতকী লৈবাক অমগী মওংদা ফিভম অসি ইনফোর্মেসনগী চহি অসিদা য়াম্না মাংদা চখৎপা ঙমগনি। ঐখোয়দা থোইদোকপা মগুন লৈরি লোইননা চাউরবা কৈথেল অমা লৈরি।

মরূপশা, পোলিসী দিসিজনশিং অসি তেক অমসুং ইনোভেসন ইন্দস্ত্রীশিং লিবেরাইজ তৌবদা পান্দম থম্লি। হন্দক্তা অদোম্না তাবীরম্বা য়াই, ঐখোযনা ইনফোর্মেসন অমসুং তেক্নোলোজীগী ইন্দস্ত্রীদা ওইরক্কদবা পোৎলুম অদু মখল কয়াদা হন্থহল্লে অমসুং ভারতকীদমক্তা তুংলমচৎতা য়ুম্ফম ওইবা পোলিসী ফ্রেমৱর্ক অমা শেমখি। অদোম ময়াম ইন্দস্ত্রী অসিগী দ্রাইবরশিংনি। ঐখোয়না মপুং ফানা চেকশিনবগা লোইননা ঐখোয়গী পোৎথোক্কা মরী লৈনবা ইনোভেসনশিংবু অৱাংবা থাক্তা পুখৎনবা শেম-শাবা য়ারোইদ্রা?

মরূপশা, তেক্নোলোজীনা ঙাক-শেলগী লমদা হেনগৎলক্লিবা খোংথাং অসিগী মশক লেপ্লি। মমাংগী লানফমশিংদা ৱারেপ অদু কনাগী হেন্না ফবা শামু নত্ত্রগা শগোল লৈবগে হায়বদুদা লেপ্পি। মসিগী মতুংদা ফায়র-পাৱরগী মতম লাকখি। হৌজিক মালেমগী লানফমদা তেক্নোলোজী অসিনা য়াম্না মরুওইবা থৌদাং য়ারি। সোফৱেয়রদগী হৌরগা দ্রোন অমসুং য়ু.এ.ভি. ফাওবা, তেক্নোলোজীনা ঙাক-শেলগী লমদা মপুং ফানা ৱাহন্থোক পীরি।

মরূপশা, তেক্নোলোজী শিজিন্নবা হেনগৎলকপনা দেতাশিং ঙাক-শেনবা অমসুং সাইবর সেক্যুরিতীসু য়াম্না মরুওইরে। ঐখোয়গী নহা ওইরিবা অকনবা সাইবর সেক্যুরিতী অসি পাম্বৈ শেম-শাহনবগী মায়কৈদা য়াম্না চাউবা থৌদাং লৌবা য়াই। পাম্বৈশিং অসিদগী শেম-শারবা দিজিতেলগী পোৎথোকশিং অসি সাইবরগী মতাংদা তোঙান তোঙানবা ভাইরসশিংগী শাফু অদু লোইশিনবদা শিজিন্নবা য়াই। ঙসি ঐখোয়গী ফিনতেক ইন্দস্ত্রী য়াম্না ফজনা পাংথোক্লি। মীওই লাখ কয়ানা চিংনবা লৈতনা ফাইনান্সিয়েল ত্রাঞ্জেক্সন পাংথোক্লি। মসি মীয়ামগা থাজবগী মরমনা ওইথোক্লিবনি অমসুং মসিবু ঙাক্তুনা থম্বা অমসুং মপাঙ্গল কলহনবা য়াম্না মরুওই। মতিক চাবা দেতা গোভর্নেন্স ফ্রেমৱর্কসু ঐখোয়গী মরুওইবনি।

মরূপশা, মফম অসিদা ঙসি ঐনা মরুওইনা ইনফোর্মেসন তেক্নোলোজীদা ঐগী ৱাফম ফোংদোকচরিবা অসিগুম্না সাইন্সকী লমদসু ইনোবেসন পাকথোক চাউথোকহনবা মথৌ তাই। মদু বাইওসাইন্স নত্ত্রগা ইঞ্জিনীয়রিংবু ওইরো, ইনোবেসন অসি চাউখৎপগী মরুনি। ইনোভেসনগী মতাংদা পল্লকপদা, ভারত অসি ময়েকশেংনা কান্নবা ফিভমদা লৈরি, মসিদা নহা ওইরিবা তেলেন্তশিং লৈরি অমসুং ইনোভেসনগী মায়কৈদা লাংতক্নবা হেনগৎলক্লি।

মরূপশা,

মরূপশা নহা ওইরিবা শক্তিগী তেলেন্ত অমসুং তেক্নোলোজীগী ওইথোকপশিং ঙমখৈ নাইদে। মতম অসিনি, ঐখোয়না খ্বাইদগী অফবা পীগদবা অমসুং মসিগী কান্নবা লৌগদবা মতম অদু। ঐনা থাজৈ মদুদি ঐখোয়গী ইনফোর্মেসন তেক্নোলোজীগী লম্না ঐখোয়দা অসিগুম্বা ঐখোয়দা চাউথোকচবা পোকহনগদবা তাঞ্জা পীগনি।

হন্না হন্না থাগৎচরি!