ভারতকী প্রধানমন্ত্রী

রাজস্থানগী ঐগী ইমুং-মনুংগী মীওইশিং, তরাম্না ওকচরি রাম-রাম!

রাজস্থানগী কেন্দ্র খুদিংমক্তগী মীওই লাখ কয়া  মরুওইরবা ‘বিকসিত ভারত বিকসিত রাজস্থান’ থৌরমদা শরুক য়ারি। মখোয়গী মফমদা ঐনা থাগৎপা ফোঙদোকচরি। থৌরম অসি মীয়ামদা য়ৌহন্নবা তেক্নোলোজি মপুংফানা শীজিন্নবগীদমক ঐনা চীফ মিনিস্তরশু থাগৎপা ফোঙদোকচরি। নুমিৎ খরনিগী মমাঙদা রাজস্থান্দা ফ্রান্সকী রাস্ত্রপতি ইমানুয়েল মেক্রোন তরাম্না ওকখিবা অসি রাজস্থানগী মীয়ামগী মগুনশিংনি। মসি ভারত খক্তা নত্তনা ফ্রান্সতা মসিগী খোন্থাংনা নিনখি। মখোয়না নুংশিজবা মীওইশিংদা মখোয়গী মীনুংশিং উৎনবা ঐখোয়গী রাজস্থানগী মরুপশিংনা থবক অমতা হোৎন্দনা তোকখিদে। রাজস্থানগী বিধান সভা মীখল মনুংদা ঐনা রাজ্য অসিদা লাকপদা মীয়ামগী থৌজাল ফংখিবা অদু ঐ নিংশিংলি।

দবল-ইঞ্জিন সরকার অমা শেমদুনা ‘মোদী কি গরেন্তি’দা মীয়াম্না থাজবা অমুক হন্না উৎলে। ঙসি ঐখোয়না রাজস্থানগী দবল ইঞ্জিন সরকারন য়াংনা চাউখৎপা উরে। ঙসি ঐখোয়না রাজস্থানগী চাউখৎ-থৌরাংগী লুপা করোর লিশিং ১৭ রোমগী প্রোজেকশিং শঙ্গাবা অমসুং উরেপ-উয়ুং তম্বা উরে। প্রোজেকশিং অদুগী মনুংদা লম্বী, রেলৱেজ, সোলার ইনর্জি, পৱার ত্রান্সমিসন, থক্নবা ঈশিং অমসুং পেত্রোলিয়ম অমসুং নেচরেল গ্যাসগুম্বা মরুওইবা হিরমশিং য়াওরি। তোঙান-তোঙানবা চাউখৎ-থৌরাংগী প্রোজেকশিং অসিনা রাজস্থানগী নহারোলশিং থবক ফংহল্লগনি। হায়রিবা প্রোজেকশিং অসিদা মখোয়না মতেং পাংবগীদমক রাজস্থানগী ঐগী মরুপশিংদা ঐনা থাগৎপা ফোঙদোকচরি।

ইনাওশিং অমসুং ইচলশিং,

‘হৌজিক্কী মতম অসি-চপ চারবা মতমনি’ হায়না নিংতম্বা মতুংগী অমৃত কাল হৌরকপদা ঐনা লাল কিলাদগী ফোঙদোকখিবা ৱাফম অদোম নিংশিংলমগনি। হৌজিক হৌখিবা চহি কয়াগী নিংবা কাইবা হুন্দোক্লমদুনা থাজবগা লোয়ননা ভারত মাঙলোমদা চঙশিল্লে। ২০১৪ মমাঙগী চহিশিংদা অদোম অমুক হল্লকপা ঙমবরা? মতম অদুদা করি করি ঙাংনখি। পাউ-চেশিংদা করি হেলাইনশিংনা মরুওইনা য়াওখি? মতম অদুদা লৈবাক অসিদা পাক-শান্না শেঞ্জা-থুমজা পাংথোকপগী পাউশিংনা পীক থনখি অমসুং নুমিৎ খুদিংগী বোম্ব পোকখায়বগী থৌদোকশিং লৈখি। মীয়াম তম্বা ঙমদবা ফিবম অমদা লৈখি, মীয়ামগী মরাইবক অমসুং লৈবাক অসিগী মরাইবক ফিবম অমদা লৈখি। হিংবা অমসুং থবক অমা ফংবা হায়বসি লান্থেংনবগা মান্নখি, কংগ্রেসকী মতমদা চাউখৎপা অসি মথন্থ থাদোক্তুনা থমখি।

ঙসিগী ফিবম অসিগা খেন্নরে। হৌজিক করিদা মীৎয়েং থম্লি? ঐখোয়না হৌজিক বিকসিত ভারত অমসুং বিকসিত রাজস্থানগী পান্দমদা মীৎয়েং চঙলে। ঙসি ঐখোয়না অচৌবা অওনবশিং পুরক্লে অমসুং অচৌবা মঙলান মঙলে অমসুং মখোয় ফংনবা ঐখোয় ইশামক কৎথোক্লে।  ঐনা বিকসিত ভারতকী ৱারি শানরকপা মতমদা, মসি শুপ্নগী ৱাহৈ অমা নত্ত্রগা পুক্নিংগী ইহুল অমা নত্তে, মসি ইমুং খুদিংমক নুংঙাইহন্নবা খোঙজং অমনি অমনি। বিকসিত ভারত অসি লায়রবা কোকহন্নবা, অফবা থবকশিং ফংহন্নবা অমসুং লৈবাক অসিদা অনৌবা খুদোংচাবশিং ফংহন্নবা খোঙজং অমনি। হৌখিবা অহিংদা ঐ মপান লৈবাক্তা চৎলুবদগী হল্লক্লে, মফম অদুদা ঐনা য়ু.এ.ই অমসুং কাতরগী শক্নাইরবা লুচিংবশিংগা উনখি। মখোয় ভারতনা পায়খৎলিবা থবকশিংদা অঙকপা ফাওখি। ভারতগুম্বা অচৌবা  লৈবাক অমনা অচৌবা মঙলানশিং মঙবা ঙম্মী অমসুং হায়রিবা মঙলানশিং অসি ফংবা ঙম্মী হায়বা মালেমগী লুচিংবশিংনা য়ারে অমসুং থাজরে।

ইনাওশিং অমসুং ইচলশিং,

বিকসিত ভারত শেমগৎপদা বিকসিত রাজস্থান্না মরুওইবা থৌদাং অমা লৌগনি। তঙাইফদবা হিরমশিং হায়বদি রেল, লম্বী, মৈ অমসুং ঈশিং য়াংনা চাউখৎহনবা তঙাইফদে। হায়রিবা হিরমশিং চাউখৎহনবা অসিনা লৌমীশিং, শা-ষন লোইরিবশিং, উদোগশিং অমসুং তুরিজমদা য়াম্না কান্নবা পীগনি অমসুং রাজ্য অসিদা অনৌবা শেন থাদবা অমসুং থবক ফংনবগী খুদোংচাবশিং পীগনি। লম্বী শেম্বা, রেলৱে লাইনশিং শেম্বা, স্তেসনশিং য়ুংখৎপা, লায়রবশিংগী য়ুমশিং শাবা, ঈশিং অমসুং গ্যাসকী পাইপলাইনশিং ফুম্বানা থবক ফংবা হেনগৎহনগনি। মতুং তারকপদা, ত্রান্সপোর্তকা মরী লৈনবশিং থবক ফংগনি। চহি অসিগী কেন্দ্রগী বজেত্তা ইনফ্রাস্ত্রকচর শেমগৎনবা লুপা করোর লাখ ১১ কাইথোক্লে, মসি হান্নদগী শরুক ৬ হেল্লবনি। হায়রিবা চাদিং অসিনা সিমেন্ত, নুঙ অমসুং সেরামিক উদোগশিংদা য়াম্না চাউনা কান্নবশিং পীগনি।

ইনাওশিং অমসুং ইচলশিং,

হৌখিবা চহি ১০দা রাজস্থান্দা খুঙ্গংগী লম্বীশিং, হায়ৱেশিং অমসুং এক্সপ্রেসৱেশিংদা মমাঙদা অমুক্তা ওইখিদ্রিবা মওংদা শেন থাদবা অদোম উরম্লগনি। ঙসি রাজস্থান্না গুজরাত অমসুং মহারাস্ত্রাগী সমুদ্র মপানগী লমশিংগা শম্নরে অমসুং অপাকপা হায়ৱেশিং ফাওরগা পঞ্জাবকা শম্নরে। ঙসিগী শঙ্গারিবা লম্বীশিং অসিনা কোতা, উদয়পুর, তোক, সাৱাই মাধোপুর, বুন্দি, অজমর, ভিলৱারা অমসুং চিত্তোগর য়ৌবা লম্বীশিংগী ফিবম ফগৎহল্লগনি। হায়রিবা লম্বীশিং অসিনা দিল্লি, হরিয়ানা, গুজরাত অমসুং মহারাস্ত্রাগা চৎথোক-চৎশিনগী খুদোংচাবা হেনগৎহল্লগনি। রেলৱেদা মৈ ফংহনবা অমসুং শেমজিনবা য়াওনা তোঙান-তোঙানবা প্রোজেকশিং হৌদোক্লে। রেলৱেশিং অমুক হন্না শেমজিনবা অমসুং ফগৎহনবা অসি ঙসিগী থৌরম অসিগী শরুক অমনি। বন্দিকুই-অগ্রা ফোর্ত রেল লাইন দবল ওইহনবা অসিনা মেহনদিপুর অমসুং অগ্রা য়ৌবা নুংঙাইহল্লগনি। খাতিপুরা(জয়পুর) রেলৱেস স্তেসন্দা অহেনবা ত্রেনশিং চেনবা ঙমহল্লগনি অমসুং পেসেঞ্জরশিংদা শিংথাবা য়াবা খুদোংচাবশিং ফংহল্লগনি।

মরুপশিং,
কংগ্রেস দলগী অচৌবা অশোইবা অমনা দল অসিনা অফবা অমসুং কান্নবা থৌশিলশিং শেম্বা ঙমদবা অসিনি। কংগ্রেসতা তুংগী উবা ঙম্বা অমসুং দরকার ওইবা অরুবা থৌরাং তৌবা লৈতে। মসিগী থৌওং অসিনা, ভারতনা মশাগী ইলেক্ত্রিসিতিগী ইনফ্রাস্ত্রকচর মতিক চাখিদে। কংগ্রেসকী মতমদা, লৈবাক শীনবা থুংনা মৈ ৱাৎপা মায়োক্নখি অমসুং মতম শাংনা মৈ মমখি। করিগুম্বা মৈ ফংলবসু, মসি য়াম্না তোইনা মুৎখি। হায়রিবা মতম অসিগী মনুংদা লায়রবা ইমুং করোর কয়া মৈ ফংদনা লৈখি।

মরুপশিং,

ইলেক্ত্রিসিতি মতিক চানা ফংদনা লৈবাক অমা চাউখৎপা ওইথোক্লোই। মসিগী খুদোংচাদবা অসি কোকহন্নবা কংগ্রেসনা পায়খৎলিবা থবক্কী খোঙজেল অসিনা মৈ ৱাৎপগী অৱাবা কোকহনবদা চহি কয়া চঙগনি। ওফিস পায়বগা, লৈবাক্কী পৱারগী অৱাবশিং কোকহন্নবা ঐখোয়না মরুওইনা লৌখি। ঐখোয়না থৌশিলশিং শেমখি, মরুওইবা ৱারেপশিং লৌখি অমসুং সোলার ইনর্জিগুম্বা অনৌবা হিরমশিংদা অচৌবা মফম অমা কনখি। ঙসি ভারত সোলার ইনর্জি পুথোকপদা মালেমগী লুচিংবা অমা ওইরে, মসি ঐখোয়গী থবকশিংগী খুদম অমনি। রাজস্থান্না নুমিৎ কৌবা ঈশ্বরদগী থৌজাল মরাংকাইনা ফংলি অমসুং হিরম অসিদা খুদোংচাবা কয়া মরাংকাইনা ফংলি। রাজস্থান্না মশাগী ওক্নবা মৈ পুথোক্নবা দবল-ইঞ্জিন সরকারনা থবক মপুংফানা পায়খৎলে। ঙসি ঐখোয়না সোলার পৱার প্লান্ত অনি শঙ্গারে অমসুং প্লান্ত অনিগী উরেপ-উয়ুং তম্লে। হায়রিবা প্রোজেকশিং অসিনা মৈ ফংহনবা খক নত্তনা নহারোল লিশিং কয়া থবক ফংহনগনি।

মরুপশিং, ঐখোয়গী সরকারনা পায়খৎলিবা থবকশিং অসিনা মীয়াম্না মখোয়গী য়ুমশিংদা সোলার ইলেক্ত্রিক পুথোকপা ঙমহল্লগনি অমসুং অহেনবা মৈ য়োন্দুনা শেন তানবা য়ারগনি। পি.এম সুর্য়া ঘর য়োজনা অসিদা সরকারনা লেম্না মৈ য়ুনিত ৩০০ ফংহন্নবা থৌরাং তৌরি। অহানবা য়ুম করোর ১ দা সোলার পেনেলশিং থম্নবা সরকারনা শেন্থং পীগনি অমসুং মসিদা চাউরাক্না লুপা করোর ৭৫,০০০ রোম চঙগনি। মসিদগী মিদল-ক্লাস অমসুং লৱার-মিদল ক্লাস কাংলুপশিং কান্নবা ফংগনি। বেঙ্কশিংনা য়াম্না লাইনা লোনশিং ফংহনগনি। রাজস্থান্দা য়ুম লাখ ৫দা সোলার পেনেলশিং থম্নবা সরকারনা থৌরাং তৌরে। দবল-ইঞ্জিন সরকারনা পায়খৎলিবা থবকশিংনা লায়রবা অমসুং মিদল ক্লাসকী চাদিং হন্থহল্লে।

মরুপশিং,

চাউখৎলবা ভারত অমগী পান্দম ফংনবা, খুন্নাইগী মরুওইবা কাংলুপ মরি: নহারোল, নুপীশিং, লৌমীশিং অমসুং লায়রবশিং শক্তি পীনবা ঐখোয়না থবক পায়খৎলে। মখোয় অসি ঐখোয়গী খ্বাইদগী চাউবা ফুরুপনি।  হায়রিবা কাংলুপশিং অসিগী য়াইফনবা মোদীনা পীবা থাজবশিং দবল-ইঞ্জিন সরকারনা থবক ওইনা পাংথোকপদা ঐ হরাওই। অনৌবা রাজস্থান সরকারগী অহানবা বজেত্তা থবক লিশিং ৭০ পীনবা ৱাফম পুথোক্লে। ৱাহংশিং লিক ওইবগী থৌদোকশিং থিজিন্নবা অনৌবা রাজ্য সরকারনা এস.আই.তি শেম্লে। ৱাহং লিক ওইবা থিংনবা কেন্দ্র সরকারগী অকনবা আইন্না অসিগুম্বা থবকশিং মখা তানা থিংবা ঙমগনি।

মরুপশিং,

লায়রবা ইমুংশিংগী নুপীশিংদা লুপা ৪৫০দা গ্যাস সিলিন্দরশিং পীনবা রাজস্থান সরকারনা ৱাশকখি অমসুং ৱাশক অদু থবক ওইনা পাংথোক্লে। থবক অসিনা  রাজস্থানগী নুপী লাখ কয়া কান্নবা পীরগনি। হৌজক রাজ্য অসিদা জল জিবন মিসনগী থবকশিং য়াংনা পায়খৎলে। রাজস্থানগী ইমুং খুদিংমক ঈশিং ফংহন্নবা প্রোজেক কয়া য়াংনা পায়খৎলে। পি.এম কিষান সম্মান নিধিগী মখাদা রাজস্থানগী লৌমীশিংদা হৌজিক লুপা ৬০০০গী শেন্থং পীরিবা অসি লুপা ২০০০ হেনগৎহল্লে। ঐখোয়না ঐখোয়গী ৱাশকশিং মথং মথং থবক ওইনা পাংথোক্লে। ঐখোয়গী থাজবশিংগী মরমদা ঐখোয়না লুম্না লৌরি। মরম অদুনা মীয়াম্না হায়রি- মোদীগী থাজবা অসি থবক ওইনা পাংথোকপা অদুনি।

মরুপশিং,

বেনিফিসরি খুদিংমক চিৎথবা তৌদনা কান্নবা খুদিংমক মতম চানা ফংহনবা হায়বসি মোদীগী থবকনি। মরম অদুনা ঐখোয়না বিকসিত ভারত সংকল্প যাত্রা হৌদোক্লে। রাজস্থান্দা বিকসিত ভারত সংকল্প যাত্রা শরুক য়াখিবা মীওই করোর ৩ রোম লেম্না হকশেলগী চেকঅপশিং পাংথোকখ্রে, অনৌবা অয়ুস্মান কার্দ করোর ১ শাখ্রে, লৌমী লাখ ১৫ কিষান ক্রেদিদ কার্দ রেজিস্তার তৌখ্র, লৌমী লাখ ৬.৫ রোম পি.এম কিষান সম্মান নিধি য়োজনাগী এপ্লাই তৌরকখ্রে। নুপী লাখ ৮ রোম উজৱালা গ্যাস কন্নেক্সনগী রেজিস্তার তৌরে অমসুং হায়রিবা মতম অসিদা কন্নেক্সন লাখ ২.২৫ পীখ্রে। রাজস্থানগী মীওই লাখ ১৬ লুপা লাখ ২গী ইন্সুরেন্স স্কিমশিং শরুক য়াখি।

মরুপশিং,

অদোমদা পীখিবা থাজবশিং মোদীনা থবক ওইনা পাংথোকপা মতমদা, লনাই মীওই খর ৱারে। কংগ্রেস দলগী ফিবম য়েংসি। হন্দক, অদোম্না কংগ্রেসতা পারা অমা তম্বীরে, অদুবু মসি মখোয়না য়াবা ঙমদ্রি। মখোয়গী অমতা ঙাইরবা পান্দমদি মোদী চৈবনি। কনাগুম্বা অমনা মোদী হেন্না চৈরিবমখৈ, মখোয়না মহাক হেন্না নুংশিরে। চাউখৎলবা ভারত অমগী খন্নবা মখোয়না পামদে, মরমদি মসিগীদমক মোদীনা থবক তৌবগীনি। মোদীনা মেদ ইন ইন্দিয়া য়োকখৎপগীদমক মেদ ইন ইন্দিয়াগী মরমদা খন্নবা মখোয়না পামখিদে। মোদীনা মসি থবক ওইনা পাংথোকপগীদমক মখোয়না ভোকেল ফোর লোকেলগী মরমদা তুমিন্না লৈশিনখি। ভারতনা ৫শুবা খ্বাইদগী চাউবা ইকোনোমি ওইরকপদা, লৈবাক শীনবা থুংনা হরাওখি, অদুবু কংগ্রেসগী মেম্বরশিং থৱায় নুংঙাইখিদে। মথংগী তার্মদা ভারত মালেমদা অহুমশুবা খ্বাইদগী চাউবা ইকোনোমি ওইরগনি হায়না মোদীনা ফোঙদোকপা মতমদা, লৈবাক শীনবা থুংনা থাজখি, অদুবু মসিদা কংগ্রেসকী মেম্বরশিং নিংবা কাইখি। মোদীনা হায়বা নত্ত্রগা তৌরকপা খুদিংমক মখোয়না অথিংবা পীখি। মোদী খক অপনবা পীনবা লৈবাক্কী অচৌবা মাঙজবা কয়া মখোয়না য়ানিংখি। কংগ্রেসকী অমতা ঙাইরবা পান্দমদি-এন্তি-মোদী, মোদীগী মায়োক্তা লৈবনি।

মখোয়না মোদীগী মরমদা ওইদবা কয়া শন্দোকখি অমসুং খুন্নাই অসি খায়দোকখি। দল অমা মীচং-মীখাই নাইবা অমসুং শাগৈগী রাজনিতিনা খুরৌ থাংহল্লে। ঙসিদি মীওই খুদিংমক কংগ্রেস থাদোক্লে, ইমুং অমা খক দল অসিদা লৈহৌরি। অসিগুম্বা রাজনিতিনা নহা ওইরিবা ভারত অমা ইথিল পীবা ঙমদ্র। অহানবা ওইনা ভোৎ থাদগদৌরিবা নহারোলশিংগী অনিংবশিং অমসুং মঙলানশিং লৈরি। ঙসিগী অহানবা ওইনা ভোৎ থাদগদৌরিবা ভোত্তরশিং বিকসিত ভারতকী পান্দমগা লোয়ননা লেপ্লি। বিকসিত ভারত অমসুং বিকসিত রাজস্থানগী পান্দম অসি অহানবা ওইনা ভোৎ থাদগদৌরিবা ভোত্তরশিংগীনি।  চাউখৎলবা রাজস্থান অমসুং চাউখৎলবা ভারতকী লম্বী অসি অহানবা ভোত্তর খুদিংমক্কীনি। মরম অসিগীদমক লৈবাক শীনবা থুংনা মীয়াম্না –‘অবকি বার, এন.দি.এ ৪০০ বার(হন্দক এন.দি.এ সিত ৪০০ হেনগনি)। মোদীগী থাজবশিংদা রাজস্থান্না মপাঙ্গল হাপকনি হায়না ঐনা থাজৈ।  ঐনা অমুক হন্না অদোমগী চাউখৎ-থৌরাংগী প্রোজেকশিংগীদমক নুংঙাইবা ফোঙদোকচরি।

অদোম ঙমখৈ লৈতনা থাগৎচরি।

***