ভারতকী প্রধানমন্ত্রী

জয় জোহার !

ছতিসগরগী চীফ মিনিস্তর বিষ্ণু দেব সাই জি, ছতিসগরগী মিনিস্তরশিং, অতোপ্পা মীয়ামগী মীহুৎশিং অমসুং ছতিসগরগী মফম কয়াদগী লাক্লিবা মীওইশিং, মফম ৯০ হেনবদা মীওই লিশিং কয়া শরুক য়ারি হায়বা ঐ খঙলে। মফম কয়াদা থৌরম অসি শরুক য়ারিবা ঐগী ইমুং-মনুংগী মীওইশিং। অহানবদা, ছতিসগরগী এশেমব্লি কেন্দ্র পুম্নমক থৌরম অসি শরুক য়াবগীদমক ইমুং লাখ কয়াদা ঐগী য়াইফ-পাউজেল পীজরি। এশেমব্লি মীখলদা অদোম্না ঐখোয়দা থৌজাল উৎখ্রে। অদোমগী থৌজাল অদুনা মরম ওইদুনা ঙসি ঐখোয় ছতিসগর চাউখৎনবা ৱারেপকা লোয়ননা অদোম ময়ামগী মরক্তা তিল্লে। বি.জে.পিনা মসি শেমখিবনি, বি.জে.পিনা মসি হেন্না ফগৎহনগনি অমসুং ঙসিগী থৌরম অসিনা মখা তানা থাজবা অদু উৎলে।

মরুপশিং,

লায়রবশিং, লৌমীশিং, নহারোলশিং অমসুং নারী শক্তি চাউখৎহল্লবা মতমদা বিকসিত ছতিসগর শেমগৎকনি।  মতমগী অনৌবা ইনফ্রাস্ত্রকচরনা বিকসিত ছতিসগর অমগী য়ুম্ফম মপাঙ্গল কনখৎহনগনি। মরম অদুনা ঙসি ছতিসগরগী চাউখৎ-থৌরাংগা মরী লৈনবা লুপা করোর ৩৫,০০০ হেনবগী তোঙান-তোঙানবা প্রোজেকশিং শঙ্গাখ্রে, মীয়ামদা কৎথোকখ্রে অমসুং উরেপ-উয়ুং তমখ্রে। প্রোজেকশিংগী মনুংদা লম্বীশিং, রেলৱেশিং, কোয়লা, পৱার অমসুং সোলার ইনর্জি য়াওরি। ঙসি শঙ্গারিবা নত্ত্রগা উরেপ-উয়ুং তমখিবা প্রোজেকশিংনা ছতিসগরগী মীয়ামদা অনৌবা খুদোংচাবশিং ফংহল্লগনি। প্রোজেকশিং অসিগীদমক ছতিসগরগী ঐগী ইনাওশিং অমসুং ইচলশিংগী মফমদা হরাওবা ফোঙদোকচরি।  

মরুপশিং,

ঙসি এন.তি.পি.সিগী সুপর থর্মেল পৱার প্রোজেক মীয়ামদা কৎথোকখ্রে অমসুং মেগাৱাত ১৬০০গী স্তেজ-২গী উরেপ-উয়ুং তমখ্রে। হায়রিবা প্লান্তশিং অসিনা শেন য়াম্না চঙহন্দনা হৌজিক মীয়ামদা ইলেক্ত্রিসিতি ফংহল্লগনি। ছতিসগর সোলার ইনর্জিগী ময়োল অমা ওইহন্নবা সরকারনা থবক পায়খৎলে অমসুং রাজনন্দগাউ অমসুং ভিলাদা লৈরিবা মীয়ামদা খুৎশীন্নখ্রবা সোলার পৱার প্লান্তশিংনা নুমিদাংগী মতমদা ফাওবা অনকপা মফমশিংদা মৈ ফংহনবা ঙমগনি। কঞ্জুমরশিংগী ইলেক্ত্রিসিতি বিলশিং জিরো ওইহন্নবা সরকারনা থবক পায়খৎলে। হৌজিক লৈবাক শীনবা থুংনা য়ুম করোর ১ পি.এম সুর্য়া ঘর ফ্রি ইলেক্ত্রিসি স্কিম্না কোনশিল্লে। স্কিম অসিগী মখাদা, য়ুম মথক্তা সোলার পেনেলশিং থম্বগীদমক সরকারনা বেঙ্ক একাউন্তশিংদা হকথেংননা শেন্থং হাপচিনগনি অমসুং লেম্না ইলেক্ত্রিসিতি য়ুনিত ৩০০ পীগনি অমসুং অহেনবা পুথোরকপা মৈ সরকারনা লৈগনি অমসুং মীয়ামদা লুপা লিশিং কয়াগী অহেনবা শেনফম ফংহনগনি। শীজিন্নদবা লমহাংশিংদা অপীকপা সোলার প্লান্তশিং লিংখৎনবা লৌমীশিং মতেং পাংদুনা অন্নাদাতাদগী উর্জদাতা ওন্থোক্নবা সরকারনা থবক পায়খৎলে।

 ইনাওশিং অমসুং ইচলশিং,

ছতিসগরদা দবল ইঞ্জিন সরকারনা পীখিবা থাজবশিং থবক ওইনা পাংথোকপগীদমক থাগৎচরি। রাজ্য অসিগী লৌমী লাখ কয়া চহি অনি পন্দুনা লাক্লবা বোনস অমা ফংলে। তেন্দু মনা খোমজিনবা শিন্মীশিংগী খুৎশুমল হেনগৎহন্নবা মীখলদা ঐনা থাজবা পীখিবা অদু দবল ইঞ্জিন সরকারনা থবক ওইনা পাংথোক্লে। মমাঙদা কংগ্রেস সরকারনা লায়রবশিংগী য়ুম শাবদা অপনবা পীখি। হৌজিক বি.জে.পি সরকারনা য়াম্না য়াংনা লায়রবশিংগী য়ুম শারে। পি.এম অৱাস য়োজনা অমসুং হর ঘর নল সে জল য়োজনাগুম্বা স্কিমশিং অনৌবা খোঙজেল অমগা লোয়ননা থবক পায়খৎলি। তোঙান-তোঙানবা পরিক্ষাশিংদা অরানবা চৎথখিবশিং থিজিল্লে। মেহতারি বন্দন য়োজনাগীদমক রাজ্য অসিগী নুপীশিং ঐনা নুংঙাইবা ফোঙদোকচরি। ইচল লাখ কয়া স্কিম অসিগী কান্নবা ফংলগনি। দল অসিনা থাজবা পীখিবশিং থবক ওইনা পাংথোক্লে হায়বা ৱারেপশিং অসিনা উৎলে। মরম অদুনা মীয়াম্না হায়নরিবনি, মোদীগী গরেন্তি হায়বদি থবক ওইনা পাংথোকপা অদুবুনি।

মরুপশিং,

ছতিসগরগী থবক শুবা-নোম্বা কনবা লৌমীশিং, হৈথোই-শিংথোইবা নহারোলশিং অমসুং মহৌশাগী লনশিং লৈরি অমসুং খুদিংমক অসি বিকসিত ওইরক্নবা দরকার ওই। চাউখৎনবা দরকার ওইবা খুদিংমক, ছতিসগরগী হান্নদগী লৈজরি অমসুং ঙসিশু লৈরি। অদুবু নিংতম্বা ফংলবা মতুংদা মতম শাংনা পানখিবা সরকারনা অচৌবা পান্দম থমখিদে। মখোয়গী রাজনিতিগী খুদোংচাবশিং য়েংলগা চহি ৫ খক্তগী ওইবা ৱারেপশিং লৌখি। কংগ্রেসনা হঞ্জিন হঞ্জিন সরকারশিং শেমখি,অদুবু মখোয়না তুংগী ভারত অমা শেমগৎপা কাউখি, সরকার শেম্বা খক্তনা থবক্নি, লৈবাক অসি চাউখৎহনবা মখোয়গী পান্দমদা য়াওদে। ঙসি ফাওবা ফিবম অমসুং কংগ্রেসকী রাজনিতিগী মাইওন হোংবা লৈতে। মমাঙগী সরকারশিংগী তুংগী উবা ঙমদবা অমসুং মশাগীতা খনবা শাগৈগী রাজনিতিনা মরম ওইদুনা রাজ্য অসিগী চাউখৎপা থিন্থবনি। মোদীগী মফমদা, অদোম মহাক্কী ইমুং-মনুংগী মীওইনি অমসুং অদোমগী মঙলানশিং মহাক্কী ৱাশকশিংনি। মরম অদুনা ঙসি ঐনা বিকসিত ভারত অমসুং বিকসিত ছতিসগরগী মরমদা ৱা ঙাংলিবনি। ভারতমচা করোর ১৪০গী মীওই অমমমদা মীনাই অসিনা মহাক্কী ৱাশকশিং থবক ওইনা পাংথোক্নবা অমসুং মহাক্না মীয়াম নুংশিবগী গরেন্তি পীরি। লায়রবশিংগী য়াইফনবা থবক পায়খৎতনা তোক্লোই হায়না ২০১৪দা মোদীনা থাজবা পীখি। লায়রবা মীয়ামগী শেন হুরানবশিং লায়রবশিংগী শেন হল্লক্কদবনি। ঙসি, লায়রবশিংগী শেন হুরানখিবশিংগী মথক্তা অকনবা থবক লৌখৎলে। হায়রিবা শেনফম অদু লায়রবা মীয়ামগী য়াইফনবা স্কিমগীদমক শীজিন্নরে। লায়রবশিংদা লেম্না চেঙ, লেম্না লায়য়েংবা, মমল হোংবা হিদাক-লাংথকশিং, য়ুম, তোতি ঈশিং, গ্যাস কন্নেক্সন অমসুং তোইলেতশিং ফংহল্লে। লায়রবশিংগী য়ুমদা ফংলিবা খুদোংচাবশিং অসি ফংগনি হায়বা কৈদৌঙৈদা মঙদা ফাওবা মঙলম্বা নত্তে। মরম অদুনা বিকসিত ভারত সংকল্প যাত্রাগী মখাদা খুঙ্গং খুদিংমক্তা মোদীগী কি গরেন্তিগী গারি য়ৌরে। গরেন্তি গারিনা পাংথোকখিবা থবক মশিং হৌজিক ইকায়খুম্নরবা চীফ মিনিস্তরনা হায়রে অমসুং থবক হেন্না পাংথোক্নবা পুক্নিং থৌগৎলি।

মরুপশিং,

চহি ১০গী মমাঙদা মোদীনা অতোপ্পা গরেন্তি অমা পীখি। মালেমগী ভারতকী শক্তমগী মতাংদা ভারতমচা খুদিংমক চাউথোকচবা পোকহনগনি হায়না ঐনা ২০১৪দা থাজবা পীখি। ঐখোয়গী ইপা-ইপুশিংগী অনিংবশিং থুংহনগনি হায়না মোদীনা গরেন্তি পীখি। হৌজিক য়েংউ, মফম খুদিং, ঐখোয়গী ইপা-ইপুশিংনা মঙলম্বা মঙশিংগা চপ মান্নবা অনৌবা ভারত অমা শেমগৎলে। খুঙ্গংশিং ফাওবা দিজিতেল পেমেন্তশিং পাংথোক্কনি হায়বা চহি ১০গী মমাঙদা কনাগুম্বা অমনা খনখিবরা?  বেঙ্কগী থবক, বিলশিং পীবা নত্ত্রগা এপ্লিকেসনশিং থাবা, মসি য়ুমদগী পাংথোকপা য়াগনি হায়না খনখিবরা? মপান লমদা শিন্মী অমা ওইনা থবক শুবা চৎখিবা মচানুপা অমনা মীৎনা কুপ্পা অমদা খুঙ্গংদা মহাক্কী ইমুংদা শেন থারকপা য়াগনি হায়না কনাগুম্বা অমনা খনখিবরা ? কেন্দ্রগী বি.জে.পি সরকারনা শেন হাপচিনগনি অমসুং লায়রবা অমগী মোবাইল ফোন্দা শেন হাপচিল্লে হায়না খুদক্তা মেসেজ থারক্কনি হায়না কনাগুম্বা অমনা খনখিবা লৈবরা ? ঙসিদি মসি থবক ওইনা পাংথোক্লে। মতম অমদা, কংগ্রেসকী প্রধান মন্ত্রী অমা লৈরমখি, দিল্লিদগী খুঙ্গংদা লুপা ১ থাবা মতমদা শুপ্নগী পৈশা ১৫ খক য়ৌগনি হায়না মহাক্না ফোঙদোকখি। পৈশা ১৫ ফংখি, অদুগা পৈশা ৮৫ না লম্বীদা মাঙখি। করিগুম্বা ফিবম অসি লেংদনা লৈরবদি, হৌজিক্কী ফিবম করি ওইগনি হায়বা অদোম খন্দুনা য়েংউ। হৌজিক অদোম পারগা য়েংউ, হৌজিক পাল্লিবা সরকার অসিনা দাইরেক্ত বেনিফিদ ত্রান্সফরগী খুৎথাংদা মীয়ামগী বেঙ্ক একাউন্তশিংদা লুপা করোর লাখ ৩৪ ত্রান্সফর তৌখ্রে। হৌজিক খনসি, করিগুম্বা কংগ্রেস সরকার অমা লৈরম্লবদি অমসুং লুপা ১গী মনুংদা পৈশা ১৫ খক ফংলমগনি অমসুং লুপা করোর লাখ ৩৪গী মনুংদা, লুপা করোর লাখ ২৯ মিদলমেন খরনা ফংলমগনি। মুদ্রা য়োজনাগী মখাদা থবক ফংনবা অমসুং মশানা মশাবু থবক পীজনবা নহারোলশিংদা লুপা করোর লাখ ২৮ পীখ্রে। করিগুম্বা কংগ্রেস সরকার লৈরম্লবদি, মসিগী মিদলমেন্না লুপা করোর লাখ ২৪ ফংলমগনি। পি.এম কিষান সম্মান নিধিগী মখাদা লুপা করোর লাখ ২.৭৫গী শেন্থং পীখ্রে। করিগুম্বা কংগ্রেসগী সরকার অমা লৈরম্লবদি, মখোয়না লুপা করোর লাখ ২.২৫ ফংখিগনি, শেনফম অসি লৌমীশিংগী মখুত্তা য়ৌরম্লোই। ঙসিদি বি.জে.পি সরকারনা লায়রবশিংদা মখোয়গী হকশিং পীরে। শেঞ্জা-থুমজা তোকপা মতমদা, চাউখৎপা হৌরক্কনি অমসুং থবক ফংনবা খুদোংচাবা কয়া পীগনি। অফবা লৈঙাক লাকপদগী হকশেলগী খুদোংচাবশিং অমসুং মহৈ-মশিং তম্বগী ইনফ্রাস্ত্রকচর চাউখৎলে অমসুং অনৌবা লম্বীশিং অমসুং রেল লাইনশিং শেমগৎলে। 

মরুপশিং,

২১শুবা চহিচাগী অনৌবা দরকার ওইবশিং ফংহল্লবা মতমদা বিকসিত ছতিসগর অমা শেম্বা ঙমগনি। করিগুম্বা ছতিসগর চাউখৎলবদি, মতম অদুদা কনাগুম্বা অমনা ভারতকী চাউখৎলকপা থিংবা ঙমগদরা? মথং চহি ৫দা মালেমদা ভারতনা ৩শুবা খ্বাইদগী চাউবা ইকোনোমি ওইরকপা মতমদা, ছতিসগর চাউখৎপগী অনৌবা থাকশিং য়ৌবা ঙম্লগনি। মসি, মরুওইনা অহানবা ওইনা ভোৎ থাদগদৌরিবশিং অমসুং স্কুল অমসুং কলেজ তম্লিবা নহারোলশিংগী অচৌবা খুদোংচাবা অমনি। বিকসিত ছতিসগরনা মখোয়গী মঙলানশিং মঙফাওনহনগনি। হায়রিবা চাউখৎ-থৌরাংগী থবকশিং অসিগীদমক ময়াম পুম্নমক অমুক হন্না থাগৎপা ফোঙদোকচরি।

অদোম থাগৎচরি !

​***