ভারতকী প্রধানমন্ত্রী

গঙ্গা ইমানা য়াইফরে,

যমুনা ইমানা য়াইফরে,

সরস্বতি ইমানা য়াইফরে,

প্রয়াগরাজনা য়াইফরে।

ঐহাক্কী নুংশিজরবা ইচিল–ইনাও অমসুং ইচল–ইচেশিং।

শেংলবা লমদম প্রয়াগরাজ অমসুং প্রয়াগতা লৈরিবা মীপুম খুদিংমকপু ইকোকনোন্না খুরুমজরি। প্রয়াগকী লৈপাক লৈহাও অসিদা অমুক হন্না লাকচবা অসিদা ঐহাক ইশানা ইশাবু লাইবক ফবা অমগুম খনজৈ। মমাংদা ঐহাক্না মফম অসিদা লাকচখিবা অদুদা কুম্ভ মেলাদা লাকচদুনা শেংলবা গঙ্গা–যমুনা অমসুং সরস্বতিগী তোর্বান্দা পুজা তৌজবা অমসুং শেংলবা অক্ষ্যবতপু য়েংজবা ফংজখি। হন্দক্না সংগমদা ইরু লুজবা অমদি পুজা পাংথোকপগী খুদোংচাবা অদু ফংজরে।

মরূপশিং, কুম্ভগী থৌমীশিংগী মরক্তা লু–নানবগা মরী লৈনবা থৌমীশিংশিং অমসুং স্বচ্ছাগ্রাহীশিংসু য়াওরি, মখোয়না কন্না হোৎনদুনা পাক চাউখ্রবা মফমদা পাংথোক্লিবা কুম্ভ মেলাদা পায়খৎলিবা লু–নানবগী থৌওং অসি মালেম পুম্বদা খন্ননীংঙাই ওইবা ৱাফম অমা ওইহল্লে। হৌখিবা হপ্তা মঙা–তরুক অসিদা মীওই কোতি ২০–২২ হেনবনা তিল্লরিবা মফম অসিদা সিস্তেমেতিক নাইনা লু–নান্না থম্নবা শিল লাংবা অসি য়াম্না চাউরবা থৌদাংনি। ঐহাক্কী মরূপশিং, মালেম অসিদা ওইথোক্লোয়দবা লৈতে হায়বদু নখোয়না উৎলরে।

ইচিল–ইনাও অমসুং ইচল–ইচেশিং, ঙসিদগী নুমীৎ খরনি মমাংদা ঐহাক্না অসিগুম্লবা থৌমীশিংগা উনজবগী তঞ্জা ফংজখি। মখোয়শিং অদু হৌখিবা হপ্তা কয়াদগী মেলা পাংথোক্লিবা মফম অসিদা মখোয়গী মথৌদাং পাংথোক্লিবা শিৎতোক–শেংদোকপগী থবক তৌরিবা ঐহাক্কী ইচিল–ইনাও অমসুং ইচল–ইচেশিং অদুনি। অয়ুক য়াম্না ঙন্না হৌগৎপা, নুমীদাং থেংনা তুম্বা, নুমীৎ চুপ্পা অমা ফৎত হাওদি খুঙ্গৎপা, অমোৎ অকায় শেংদোকপা, তোইলেৎ শেংদোকপা, থবকশিং অসিদা মখোয় মথৌ চিল্লম্মি। মখোয়শিং অসি থাগৎপীনবা য়াওদনা, য়েংশিনবীনবা য়াওদনা, মখোয়গী মথৌ অদু লেপ্পা নায়দনা তুমিন্না অদুমক তৌরম্মি। অদুবু থৌমীশিং অসিনা, স্বচ্ছতাগ্রহীশিং অসিনা হোৎনরিবশিং অদু দিল্লীদা ঐহাক্না লেপ্পা লৈতনা পাও ফংলম্মি। ঐহাক্না উনখিবা মীওই কয়ানা, মীদিয়াদসু ঐহাক্না তোয়না উবা ফংলে মদুদি মীয়াম্না কুম্ভগী লু–নানবা অসি হন্দক্তি য়াম্না থাগৎনরি।  থাগৎপা ফংলিবা অসিগী ফংফম থোক্লিবা অশেংবা হক্তি শিৎ–শেংবগী থবক্তা থৌদাং য়ারিবা ঐহাক্কী ইচিল–ইনাও অমসুং ইচল–ইচেশিং অদুনি।

মরূপশিং, দিব্য কুম্ভবু ভব্য কুম্ভ ওইহনবদা অদোম্না হোৎনবা য়াবা পুম্নমক হোৎনখি। অমোৎ–অকোয় হুন্দোকফম লিশিং ২০ হেন্না লৈরিবা, তোইলেৎ লাখ অমা হেন্না লৈরিবা মেলা পাংথোক্লিবা মফম অদুদা শিৎতোক–চামথোকপগী থবক তৌরিবা থৌমী ইচিল–ইনাও অমসুং ইচল–ইচেশিংনা মতৌ করম্না থবক তৌখিবা হায়বদু কনানসু খঙলমলোই। হন্দক্কী কুম্ভবু লু–নানবা কুম্ভ অমা ওইহনখিবা অসি মখোয়গী হোৎনজমন্নি। অদোমগী অসিগুম্লবা থৌদাং অসিগীদমক স্বচ্ছ সেবা সম্মান ফন্দগীসু ঙসি লাওথোকখ্রে। ফন্দ অসিনা হন্দক্কী কুম্ভ মেলাদা থবক তৌখিবশিং, ফন্দ অসিনা অদোম অমসুং অদোমগী ইমুং মনুংবু অখন্নবা ফিভমশিংদা মতেং শোয়দনা ফংলগনি। মসি অমরোমদা অদোমগী সেবা অসিগীদমক লৈবাক মীয়ামগী মায়কৈদগী ইকায় খুম্নজবনি।

মরূপশিং, স্বচ্ছ কুম্ভ অসি জাতিগী মপা মহাত্মা গান্ধীগী চহী ১৫০ শুরকপা মপোক কুমওন পাংথোক্লিবা মতম অসিদা পাংথোক্লি। গান্ধীজীনদি চহী ১০০গী মমাংদা মহাক্না হরিদ্বারদা পাংথোকপা কুম্ভদা চৎপা মতম অদুদা স্বচ্ছ কুম্ভগী অপাম্বা ফোংদোকপীখি। লৈবাক মীয়ামগী মতেংনা স্বচ্ছ ভারতকী খোংজং লেপ্নখিবা মতম অদুগী মায়কৈদা খোংজেল য়াংনা চংশিল্লি। চহী অসিগী ওক্তোবর ২ ফাওবগী মমাংদা লৈবাক পুম্বা মপান্দা খোংহাম খুৎহাম চোইদবা লৈবাক অমা লাওথোক্নবগী মায়কৈদা মাংলোমদা চংশিল্লি।

ইচিল–ইনাও অমসুং ইচল–ইচেশিং, লু–নানবগী ৱাফম লাকপা মতমদা হন্দক্কী কুম্ভদা লাক্লিবশিংদা ইমা গঙ্গাগী তরু–তনানবদসু অখন্ননা খন্ন–নৈনখি। হৌখিবা থা অমা অমমখায়দগী ঐহাক্না সোসিয়েল মীদিয়াগী থোংদা মীয়ামগী এক্সপরিয়েন্স অদু তারম্মি অদুবু ঙসি ঐহাক ইশামক্না মদুগী এক্সপরিয়েন্স অদু ফংলে। মমাংদসু ঐহাক প্রয়াগরাজদা লাকখ্রে অদুবু গঙ্গাজলদা অসুক য়াম্না তরু তনানবা ঐহাক্না মমাংদা উখিদ্রি।

মরূপশিং, গঙ্গাজীগী অসিগুম্লবা তরু–তনানবা অসি নমামী গঙ্গে মিসনগী মায়কৈদা অকনবা মওংদা হোৎনরিবা অদুগীসু খুদম্নি। কেম্পেন অসিগী মখাদা প্রয়াগরাজকী গঙ্গাদা তারিবা নালা ৩২ থিংজিনখ্রে, সিৱেজ ত্রিৎমেন্ত প্লান্তকী খুত্থাংদা অমোৎপা ঈশিং শেংদোক্লবা মতুং গঙ্গা তুরেলদা তিলহল্লে।

মরূপশিং, কেম্পেন অসি মায় পাকহন্নবগীদমক সরকারনা কন্না হোৎনরি। নমামী গঙ্গেগীদমক স্বচ্ছগ্রাহী কয়া অমনদি থৌদাং লৌরি, শেলগী তেংবাংসু পাংলক্লি। নুমীৎ নিনিগী মমাংদা ঐহাকনসু মসিদা থৌদাং মচা অমখক য়াজখি। সিওল পিছ প্রাইদা ফংলকপা চাউরাক্না লুপা কোতি অমগা লাখ ৩০গী শেনফম অদু ঐহাক্না ঐহাক্কী ওইনা থমলুবা তৌদনা, মদু ঐহাক্না নমামী গঙ্গে মিসন্দা কত্থোকচখি। হৌখিবা চহী মরিদা প্রধান মন্ত্রী ওইনা ফংখিবা খুদোলশিং অদু নীলাম লাওথোক্তুনা ফংলকপশিং অদুসু ঐহাক্না ইমা গঙ্গাগী থৌগলদা কত্থোকচখি।

ইচিল–ইনাও অমসুং ইচল–ইচেশিং, হন্দক্কী কুম্ভ অসিদা তশেংনা থবক কয়া অমা অহানবা ওইনা পাংথোক্লি। অহানবা ওইনা ভক্তশিংবু সঙ্গমদা ইরুজরবা মতুং অক্ষ্যবতপু য়েংজবগী খুদোংচাবসু ফংহল্লে। নীং তম্বা ফংলবা মতুংদগী অক্ষ্যবতপু মতম পুম্নমক্কী ওইনা লানবন্দা থোং লোন্দুনা থমলম্মি। হন্দক্তি সরকারনা অক্ষ্যবত অমসুং ভক্তশিংগী মরক্তা লৈরিবা লাপ্নরম্বা অদু কোকহল্লে। নুমীৎ খুদিংগী ভক্ত লাখ কয়ানা অক্ষ্যবত অমসুং সরস্বতি কুম্ভবু খুরুমজবা ফংজরি হায়না ইফমদা খঙহনবিরে।

মরূপশিং, প্রয়াগরাজকী থৌজাল, লাইনীংবা সাধুশিংগী থৌজাল, মওং মরিল তারবা সিস্তেম অমদি ময়াম পুম্নমক্কী হৌন লোনচৎ খঙবা অদুনা মরম ওইরগা মেলা অসি থোকহন্নীংদবা থৌদোক থোক্তনা শান্তি ওইবা মওংদা চত্থরি। ঐহাক্না উবা ফংলি মদুদি কুম্ভদা উত্তর প্রদেশ পুলিসনা লৌরিবা থৌদাং অদুসু মায়কৈ মরিদগী থাগৎপা ফোংদোনরক্লি। মসিগীদমক সেক্যুরিতীগী জৱানশিংসু হন্না–হন্না তৌবীমল খঙবা উৎচরি, নুংঙাইবা ফোংদোকচরি।

মরূপশিং, প্রয়াগরাজদা কুম্ভ পাংথোকপা মতমদা প্রয়াগ পুম্বা কুম্ভ ওইরি। প্রয়াগরাজকী নাগরিকশিংসু লাৎনীংঙাই মশক ওইরি। প্রয়াগরাজপু য়াম্না নীংথিজনা ফজরবা শহর অমগুম দিবেলপ তৌবদা অমদি কুম্ভবু মায় পাক্না পাংথোকপদা প্রয়াগতা লৈরিবা মীয়ামগী থৌদাং অসিনসু লৈবাক পুম্বদা ইনোৎ পীরি।

ইচিল–ইনাও অমসুং ইচল–ইচেশিং, চহী কয়াদগী কুম্ভগী মেলা অসি করিগুম্বা মখল অমা নত্ত্রগা অমগী সমাজগী ওইবা পাওজেল পুরদুনা মপুং ফানা পাংথোক্লম্মি, মরক্তা অসিগুম্লবা ত্রেদিসন অসি লেপখি, ধর্মগী ওইবা থৌরম খক্তমক পাংথোক্লম্মি। অদুবু হন্দক্কী কুম্ভগী মেলানা লৈবাক পুম্বগী দিব্যতা অমসুং ভব্যতাগা লোয়ননা লু–নানবগী অচেৎপা পাওজেলসু পীরি, পব্লিক এজুকেসনসু পীরি।

ঙসি ঐহাক্কী পুন্সী থৌজানবীরে। সাধু–মহাত্মাশিংগী থৌজালদি অদুমক ফংজরি, মখোয়গা অদুমক উনজবসু ফংজরি, অদুবু ঙসি ঐহাক্কী ওইনদি সন্ন্যসীসু অদোম্নি, ঐহাক্কী ওইনদি শেংলবা অশেংবা সেবকশু অদোম্নি। সাধু–মহাত্মাশিংগী থৌজালদগী, মখোয়দগী ফংজবা মহৈ–মশিংদগী, ঙসি ঐহাক্না ময়ামগী মরক্তা লেপচরিবা অদুগা ঐখোয়গী লাইরিকশিংদা অসুম্না হায়রি–

না কামে রাজ্যপম ন মোক্ষম ন পুনর্ভৱম।

কামে দুখ তপ্তোনা প্রানিনার্তশম॥

লাইরবশিংগী, অৱা অনা তারবশিংগী সেবা তৌবা, পাওজেল অসিমক মীওইবা জাতিগী য়াইফনবগীদমক ঐখোয়গী ইপা ইপুশিংনা ঐখোয়দা পীবীরম্মি। ঐহাক ইশামক নুংঙাইবা ফাওজরি, শেমগৎলিবা ফন্দ অসিনা হিহোনবশিংগী ইমুং–মনুং, লু–নানবগী মরী লৈনবা ইমুং–মনুং অমসুং মফম অসিদা অনেম্বা থাক্তা পুলিসকী সর্বিসতা থৌদাং য়ারিবা মীওইশিং মখোয়গী ইমুং–মনুংগী মীওইশিংদী কানহল্লগনি। ঐহাক্না হন্না–হন্না নুংঙাইবা ফোংদোকচরি, হন্না–হন্না য়াইফ পাওজেল পীজরি।

থাগৎচরি।