ভারতকী প্রধানমন্ত্রী

নহা ওইরিবা ইনর্জী, নহা ওইরিবা মঙলান, কয়াদা লুথরিবা, কয়াদা পাক-চাউরিবা, অদোম পুম্নমক মসিগী খ্বাইদগী ফবা খুদমনি। হৌজিক ঐনা অদোম পুম্নমকপু পুক্নীং চংনা তাখি, য়েংখি। কনফরেন্স অসি অসুম্না অসুম্মক পাংথোক্তুনা লৈহনগদবনি। অদোম খনবীয়ু, স্তার্ত অপ্সকী রেঞ্জ কয়াদা পাক-চাউরিবনো। স্তার্ত-অপ অমনা কার্বোন ফাইবর ৩দি. প্রিন্তরদা অদুগা অতোপ্পা অমনা সেতলাইৎ লোঞ্চ ভেহিকলগী মতাংদা ৱা ঙাংখি। ই-তোইলেৎতগী বাইওদিগ্রেদেবল পি.পি.ই. কিৎস ফাওবা অমসুং দাইবিতিসকী হিদাক শাবদগী হৌরগা ব্রিক লেয়িং মেচিন অমসুং দিব্যাংশিংগীদমক এ.আর. তেক্নোলোজী ফাওবা, অদোম্না অদোমগী স্তার্ত-অপ্সকী মতাংদা হায়খিবা পুম্নমক অদুনা অদোমদা তুংলমচৎ অসিবু হোংদোক্নবগী কয়াদা চাউরবা পাঙ্গল য়াওরিবনো হায়বদু তাক্লি।

অতোপ্পা অহোংবা অমগা হৌজিক উবা ফংলক্লি মদুদি, অহানবদা কনাগুম্বা নহা অমনা স্তার্ত-অপ হৌরকপা মতমদা মীয়াম্না হায়নৈ ‘করিগী থবক অমা তৌদ্রিবনো? করিগী স্তার্ত-অপ তৌগদৌরিবনো?’ অদুবু হৌজিক্তি মীয়াম্না হায়নরে – থবকপুদি ফৈ, অদুবু নশাগী স্তার্ত-অপ অমা করিগী শেমজদ্রিবনো! অদুগা হান্নদগী স্তার্ত অপ তৌরক্লবা নহা অদু উবদা অহানবা রিএক্সন অসি তৌই – ‘বাহ, অদোমগী স্তার্ত-অপ লৈনা!’ অহোংবা অসি বিমস্তেক লৈবাকশিং, হায়বদি বে ওফ বেঙ্গলদগী চাউখৎ-থৌরাংগী ইথিল লৌরিবা বঙ্গলাদেশ, ভারত, নেপাল, শ্রীলঙ্কা, ম্যানমার অমসুং থাইলেন্দগী য়াম্না চাউবা পাঙ্গলনি। ভারতকী স্তার্ত-অপ্স ওইরো, নত্ত্রগা বিমস্তেক লৈবাকশিংগী স্তার্ত-অপ্স, অমত্তা ওইবা ইনর্জী উবা ফংলি। থৌরম অসিদা ঐগা লোইনরিবা বিমস্তেক লৈবাকশিংগী মন্ত্রীশিং, বঙ্গলাদেশতগী শ্রী জুনৈদ অহমদ পলকজী, ভুতান্দগী লিনপো শ্রী লোকনাথ শর্মজী, ম্যানমারদগী উ থাউঙ্গ তুনজী, নেপালদগী শ্রী লেখরাজ ভত্তজী, শ্রীলঙ্কাদগী শ্রী নমল রাজপক্ষাজী, অমসুং বিমস্তেক্কী সেক্রেতরী জেনরেল শ্রী তেঞ্জিন লেকফেলজী, কেবিনেত্তা ঐগী খোঙলোই ওইবীরিবা শ্রী পীয়ুশ গোয়লজী, শ্রী প্রকাশ জাবরেকরজী, শ্রী হরদীপ পুরীজী, শ্রী সোমপ্রকাশজী, ইন্দস্ত্রীগী তাইবঙগী মফম অসিদা লেংশিনবীরিবা, ফিক্কীগী প্রসিদেন্ত শ্রী উদয় শঙ্করজী, শ্রী উদয় কোতকজী, শ্রী সঞ্জীব মেহতাজী, দা. সঙ্গীতা রেদ্দীজী, শ্রী সুব্রকান্ত পান্দাজী, শ্রী সন্দীপ সোমানীজী, শ্রী হর্শ মরীৱালাজী, শ্রী সিংঘানিয়াজী, অতৈ খঙ-হৈরবা পুম্নমক অমসুং স্তার্ত-অপ ৱর্ল্দগী ঐগী নহা ওইরিবা মরূপশিং!

ঙসিগী নুমিৎ অসি ঐখোয় পুম্নমক্কীদমক অমুক্তদা ‘প্রারম্ভ (অহৌবা)’ কয়াগী নুমিৎনি। ঙসি বিমস্তেক নেসন্সকী অহানবা স্তার্ত-অপ কনক্লেব পাংথোক্লি, ঙসি ‘স্তার্ত-অপ ইন্দিয়া’ মুবমেন্তনা মায় পাকপা চহি মঙা মপুং ফারে, অমসুং ঙসি অসিমক ভারতনা কোরোনাগী মায়োক্তা খ্বাইদগী পুৱারী ওইরবা, খ্বাইদগী চাউবা ভেক্সিন দ্রাইব হৌদোক্লি। নুমিৎশিং অসি ঐখোয়গী সাইন্তিস্তশিং, ঐখোয়গী নহারোলশিং অমসুং ঐখোয়গী ওন্ত্রপ্রিনরশিংগী তৌবা ঙম্বশিং অমসুং ঐখোয়গী দোক্তরশিং, নর্সশিং, হেল্থ সেক্তরগী মীয়াম্না কন্না হোৎনবা অমসুং সেবা তৌবগী ৱাখল্লোন অদুগী খুদম্নি। কোরোনাগী মায়োক্তা চৎথবা লানফমদগী হৌদুনা ভেক্সিন শাবা ফাওবা, ঐখোয় পুম্নমক্না খঙলক-উরকপশিং অদুগা লোইননা ঙসি বিমস্তেক লৈবাকশিংগী ঐখোয়গী নহাশিং অমসুং ওন্ত্রপ্রিনরশিংনা প্রারম্ভ সমিৎ অসিদা শরুক য়ারি। মরম অসিনা, সমিৎ অসি হেন্না মরুওইবা ওইরি। ঐঙোন্দা তমখি মদুদি, নুমিৎ নিনি অসিদা অদোম্না মরুওইরবা ৱারী-ৱাতাই কয়া পাংথোকখ্রে, অদোম্না স্তার্ত-অপ সক্সেস স্তোরীশিংবু শিয়র তৌরি অমসুং অমনা অমগা তেংবাং পীনবগী তাঞ্জা শেম্লে। লৈবাক অসিনা স্তার্ত-অপ এৱার্দ ১২ হৌদোক্লিবা সেক্তর ১২ অসিদা, মখোয়গী মায় পাকপশিংসু লাওথোক্লে। অদোম পুম্নমক্তা এৱার্দশিং অসিগীদমক্তা হন্না হন্না নুংঙাইবা ফোংদোকচরি।

মরূপশা,

চহি চা অসি দিজিতেল রিভোলুসন অমসুং ন্যু এজ ইনোভেসনশিংগী চহি চানি। অমসুং চহি অসি এসিয়াগী চহি চা হায়নসু কৌনৈ। অমসুং মরম অসিনা, মতম অসিনা তাল্লকপনি মদুদি তুংলমচৎকী তেক্নোলোজী অসি এসিয়াগী লেবসতগী থোরকপা, তুংলমচৎকী ওন্ত্রপ্রিনরশিং ঐখোয়গী মফম অসিদা শেম শাবা। মসিগীদমক্তা অমত্তা ওইনা পুন্না থবক তৌমিন্নবা ঙম্বা, অমনা অমগীদমক্তা থবক তৌবা ঙম্বা এসিয়াগী অদুগুম্বা লৈবাকশিংনা থোরক্তুনা থৌদাং অসি য়ামিন্নগদবনি। মখোয়দা রিসোর্সশিংসু লৈগদবনি, অমসুং তেংবাং পীবগী ৱাখল্লোনসু লৈগদবনি। মরম অসিনা থৌদাং অসি মহৌশানা ঐখোয় বিমস্তেক লৈবাকশিংদা অদুম্মক লাক্লি। ঐখোয়গী চহি চা কয়া লিরবা মপী, ঐখোয়গী চৎনবী নাৎ, সিবিলাইজেসন অমসুং মরীশিংগী শরুক য়ামিন্নরিবা লন-থুমনা ঐখোয় পুম্নমকপু অমত্তা ওইনা লেংশিন্দুনা থম্লি। ঐখোয়না ঐখোয়গী ৱাখল্লোনশিং শরুক য়ামিন্নরি, মরম অসিনা ঐখোয়না ঐখোয়গী আইদিয়াশিংসু অমুক্কা হেন্না শিয়র তৌমিন্নবা য়াগনি। ঐখোয়না অমনা অমগী অৱা-নুংঙাই শিয়র তৌনরি, মরম অদুনা ঐখোয়গী মায় পাকপসু শিয়র তৌমিন্নগনি। মসিগা লোইননা, ঐখোয় অমত্তা ওইনা মালেমগী ৱান ফিফ পোপুলেসনগীদমক্তা থবক তৌরি। ঐখোয়দা কলেক্তিবলী ৩.৮ ত্রিলিয়ন দোলর জি.দি.পি.গী পাঙ্গলসু লৈরি। ঐখোয়গী নহাশিংদা লৈরিবা ইনর্জী অসিদা, মশাগী তুংলমচৎ মশানা ইজনবগী লাংতক্নবা অসিদা, ঐনা মসিদা মালেম অপুনবা অসিগীদমক্তা অনৌবা ওইথোকপশিং উবা ফংলি।

মরূপশা,

মরম অসিনা, ঐনা ২০১৮দা বিমস্তেক সমিৎতা হায়কি মদুদি ঐখোয় লৈবাক পুম্নমক্না তেক্নোলোজী অমসুং ইনোবেসনগী লমদা অমত্তা ওইনা চংশিনমিন্নগনি। ঐনা বিমস্তেক স্তার্ত অপ কনক্লেবকীসু ৱাফম হৌদোকখি। ৱাশক অদু মপুং ফাহন্নবগীদমক ঙসি ঐখোয় লৈবাক পুম্নমক্না স্তার্ত অপ ইন্দিয়া কনক্লেবকী প্লেৎফোর্ম অসিদা অমত্তা ওইনা পুল্লরিবনি। বিমস্তেক্কী লৈবাক পুম্নমক্না অমনা অমগী কনেক্তিবিতী হেনগৎহন্নবা অমসুং বিজিনেসকী মরীশিংগী খোংজেল য়াংশিলহন্নবা হান্নদগী লেপ্তনা থবক পায়খৎতুনা লাক্লি। ২০১৮দা বিমস্তেক মন্ত্রীশিংনা দিজিতেল কনেক্তিবিতী হেনগৎহন্নবগীদমক ইন্দিয়া মোবাইল কংগ্রেসতা সরুক য়াখি। মতৌ অসুম্না, ঐখোয় ঙাক-শেলগী লমদা, দিজাস্তর মেনেজমেন্তকী লমদা, স্পেসকী লমদা, অকোইবগী ফিভমগী লমদা অমসুং লৌউ-শিংউ, বিজিনেসকী লমদসু পুন্না থবক তৌমিন্নরি। ঐখোয়গী লম পুম্নমক অসি অদুক্কী মতিক মপাঙ্গল কল্লিমখৈ, অদুক্কী মতিক নৌরিমখৈ, অদুক্কী মতিক কান্নবা ঐখোয়গী স্তার্তঅপ্সনা ফংগনি। মসি ভেল্যু ক্রিএসন সাইকল অমনি। হায়বদি, ঐখোয়না ইনফ্রাস্ত্রকচর, এগ্রিকলচর অমসুং বিজিনেস অসিনচিংবা লমশিংদা ঐখোয়গী লৈনরি মরী অসি মপাঙ্গল কনশিলহন্দুনা লাক্লি, মসিদগী ঐখোয়গী স্তার্তঅপ্সকীদমক্তা অনৌবা তাঞ্জা পোক্লক্লি। অমসুং ঐখোয়গী স্তার্তঅপ্সনা অদুক্কী মতিক মপাঙ্গল কল্লিমখৈ, ঐখোয়গী লম খুদিংমক্তা চাউখৎ-থৌরাং অদুক্কী মতিক খোংজেল য়াংশিনগনি।

মরূপশা,

লনাই ওইনা মফম অসিদা স্তার্তঅপ্স পুম্নমক্না মখোয়গী খঙ-হৈবশিং অমনা অমগী মফমদা শিয়র তৌনরি। অদুবু অহোংবগী অদুক্কী মতিক চাউরবা খোংচৎ অসিদা লৈবাক খুদিংমক্কীসু মখোয় মখোয়গী খঙ-হৈবা লৈজৈ। ভারতনা মসিগী চহি ৫গী খঙ-হৈবশিং অদু শিয়র তৌনবগীদমক্তা ‘ইভোলুসন ওফ স্তার্তঅপ ইন্দিয়া’গী মিংদা বুকলেৎ অমসুং ঙসি ফোংদোক্লে। ঐনা পাম্মি মদুদি, মসিগুম্না বিমস্তেক লৈবাক পুম্নমক্না মতম মতমগী ওইবা মখোয়গী খঙ-হৈবশিং অদু অমনা অমদা শিয়র তৌবীয়ু। অদোমগী খঙ-হৈবশিং অদু ঐখোয়না ময়াম্না তমজবদা মতেং ওইগনি। খুদম ওইনা, ভারতকী চহি ৫গী স্তার্তঅপকী খোংচৎ অসি য়েংবীয়ু। স্তার্তঅপ ইন্দিয়া মিশন হৌখিবা মতম অদুদা ঐখোয়গী মাংদসু শিংনবা কয়া লাকখি। অদুবু ঙসিদি ভারত মালেমগী খ্বাইদগী চাউবা স্তার্তঅপ ইকোসিস্তেমশিংগী মনুংদা অমা ওইরে। ঙসি লিশিং ৪১দগী হেনবা স্তার্তঅপ্সনা ঐখোয়গী লৈবাক অসিদা খোংজং অমা নত্ত্রগা অমদা শরুক য়ারি। মদুগী মনুংদা ৫৭০০দগী হেনবা স্তার্তঅপ্স আই.তি. সেক্তরদা লৈরি, ৩৬০০তগী হেনবা স্তার্তঅপ্স হেল্থ সেক্তরদা লৈরি, অদুনা চাউরাক্না স্তার্তঅপ্স ১৭০০ এগ্রিকলচরদা লাক্লি।

মরূপশা,

স্তার্তঅপ্স অসি ঙসি বিজিনেসকী দেমোগ্রেফিক কেরেক্তরিস্তিকসু হোংদোরক্লি। ঙসি ভারত্তা রিকোগনাইজ তৌরবা স্তার্তঅপ্স চাদা ৪৪, মদুদা নুপীশিংনা দাইরেক্তর ওইরি, অমসুং মশিং য়াম্না নুপীশিংনা মদুদা থবকসু তৌরি। ঙসি অচম্বা শেন্মিৎলোনগী বেকগ্রাউন্দদগী লাকপা নহাশিংসু মখোয়গী খঙ-হৈবা, মখোয়গী ৱাখল্লোন অদু ফোংদোকপা ঙম্লি। মসিগী ফলসু ঙসি ঐখোয়গী মাংদা লৈরি। ২০১৪দা ভারতকী শুপ্নগী স্তার্তঅপ ৪ খক য়ুনিকোর্ন ক্লবতা য়াওরম্মি, অদুবু ঙসি ৩০দগী হেনবা স্তার্তঅপ্স, মার্ক বিলিয়ন অমা লান্থোক্লে। অদোম অঙকপা পোকপীগনি মদুদি মসিদসু ঐখোয়গী স্তার্তঅপ্স ১১ কুমজা ২০২০দা য়ুনিকোর্ন ক্লবতা য়াওরে। হায়বদি, কোরোনাগী মতমগী লুরবা মতম অসিদা!

মরূপশা,

ভারত্তা লাইচৎকী অৱাবা মতম মক্তদা ‘আত্মনির্ভর ভারত’কী খোংজংসু হৌদোকখি। মদুদসু ঐখোয়গী স্তার্তঅপ্সনা ঙসি অচৌবা থৌদাং য়ারি। লাইচৎ মনুংদা মালেমগী অচৌ অচৌবা কম্পনীশিংনা মখোয়গী সর্বাইবেলগীদমক্তা মায়োক্নরিবা মতম অদুদা, ভারত্তা স্তার্তঅপ্সকী অনৌবা আর্মী অমা শেমখি। লৈবাক অসিদা সেনিতাইজরদগী হৌরগা পি.পি.ই. কিৎসকী তঙাইফদবা ওইখি, সপ্লাই চেঞ্জগী মথৌ তাখি, মদুদা ঐখোয়গী স্তার্তঅপ্সনা অচৌবা থৌদাং লৌখি। লোকেলগী তঙাইফদবশিংগীদমক্তা লোকেল স্তার্তঅপ্স লিংখৎখি। স্তার্তঅপ্স অমনা কঞ্জুমরশিংদা চাকখুমগী মথৌ তাবা পোৎলমশিং য়ৌহন্নবা থবক তৌখি, অদুগা কনানা হিদাক-লাংথকশিংগী দোরস্তেপ্স দেলিভরী হৌদোকখি। কনাগুম্বা স্তার্তঅপনা ফ্রন্তলাইন ৱাকরশিংগীদমক্তা ত্রান্সপোর্তেসনগী পাম্বৈ ফংহনখি, অতোপ্পা অমনা ওনলাইন স্তদী মেতরিএল শেম শাখি। হায়বদি, স্তার্তঅপ্স অসিনা ‘খুদোং থিবদা তাঞ্জা’সু থিখি, অমসুং খুদোং থিবা অসিদা থাজবসু থমখি।

মরূপশা,

ঙসি স্তার্তঅপ্সকী মায় পাকপগী ৱারীশিং অসি শুপ্নগী অচৌবা শহরশিংতদা লোইবা নত্তে। অদোম য়েংবীয়ু, ঙসি এৱার্দ ৮দি মেত্রো সিতীশিংদা লৈতবা, অপীক অপীকপা শহরশিংদা লিংখৎখিবা স্তার্তঅপ্সনা ফংলি। কনানা লখনৌদগীনি, কনানা ভোপালদগীনি, কনানা সোনীপত্তগীনি, অদুগা কনানা কোচ্চী অমসুং তিরুবনন্তপুরমদগীনি। মরমদি ঙসি ভারতকী রাজ্য পুম্নমক স্তার্তঅপ ইন্দিয়া মিসনদা শরুক য়ারি। রাজ্য খুদিংমক্না মখোয়গী লোকেলগী ওইথোকপা য়াবশিং অদুগী মতুং ইন্না স্তার্তঅপ্সতা সপোর্ত অমসুং ইনক্যুবেৎ তৌরি। অমসুং মদুগী ফল ওইনা, ঙসি ভারতকী জিলা চাদা ৮০ স্তার্তঅপ মুবমেন্তকা মরী লৈনখ্রে। ঐখোয়গী স্তার্তঅপ্স চাদা ৪৫ ঙসি তায়র-২ অমসুং তায়র-৩দা য়াওরে, মখোয়না লোকেল প্রদক্তশিংগী ব্রান্দ এম্বেসেদরগুম্না থবক তৌরি।

মরূপশা,

ঙসি মীয়ামনা হকশেল অমসুং চাবা-থকপগী মতাংদা খঙবা হেনগৎলক্লিবা অসি, হেল্দীদা অহোংবা পুরক্লিবা অসিদসু স্তার্তঅপ্সকীদমক্তা অনৌবা তাঞ্জা অমা ওইররি। অমরোমদা ঙসি ইভরগ্রীন সেক্তর অমা হায়বা তারবদি মদু ফুদ এন্দ এগ্রিকলচর সেক্তর অসিনি। ভারত্তা সেক্তরশিং অসিগী গ্রোথতা অখন্ননা মিৎয়েং চংলি। এগ্রিকলচরগা মরী লৈনবা ইনফ্রাস্ত্রকচরবু নৌথোকহন্নবগীদমক্তা লৈবাক অসিনা করোর লাখ অমগী এগ্রি ইনফ্রা ফন্দসু শেম্লে। মসিদগী ঐখোয়গী স্তার্ত-অপ্সকীদমক্তা অনৌবা লম্বী হাংলে। ঙসি স্তার্অপ্সনা লৌমীশিংগী লোইননা কোলাবোরেসন তৌরি। ফার্মদগী তেবল ফাওবা হার পুথোকপা হেন্না লাইনা, হেন্না ফবা মগুনগা লোইননা য়ৌহনবদসু স্তার্তঅপ্সনা মখোয়গী থৌদাং পাংথোক্লি।

মরূপশা,

ঐখোয়গী স্তার্ত-অপ ৱর্ল্দগী খ্বাইদগী চাউবা য়ু.এস.পি.দি – মখোয়গী দিসরপ্সন অমসুং দাইবরসিফিকেসন কেপাসিতী অসিনি। দিসরপ্সনগী মরমদি, স্তার্তঅপ্স অসিনা ঙসি অনৌবা এপ্রোচ, অনৌবা তেক্নোলোজী, অমসুং অনৌবা মওং-মতৌ পোকহল্লি। ত্রেক্ত অমত্তদা চৎপগী ৱাখল্লোন অদু ঐখোয়গী স্তার্ত-অপ্সনা হোংদোক্লি। অমসুং অতোপ্পা অমনা দাইবরসিফিকেসন। অদোম য়েংবীয়ু, ঙসি স্তার্ত-অপ্স কয়া য়াম্না থোরক্লিবনো, অমসুং মদুসু তোঙান তোঙানবা আইদিয়াশিংগা লোইননা। স্তার্ত-অপ্স অসি সেক্তর খুদিংমক্তা লৈরি, সেক্তর খুদিংমক্তা অনৌবা য়াওল অমা পুরক্লি। ঙসি ঐখোয়গী স্তার্তঅপ্সকী ওইরিবা স্কেল অসি, সবসতেন্ত অসি অমুক্তা ওইখিদ্রিবা মওংনি। অমসুং খ্বাইদগী মরু ওইরিবদি, স্তার্তঅপ্স অসিনা প্রেগমেতিজমদগী হেন্না পেসন গাইদ তৌরি। অনৌবা লম অমদা শিংনবা লাকপা খুদিংদা, স্তার্তঅপ্স অমা নত্ত্রগা অমা থোরকই অমসুং হায় মদুদি থবক অসি ঐখোয় তৌগে। ভারতসু ঙসি স্তার্ত অপ স্পিরিৎ অসিদা থবক তৌরি। মমাংদা অনৌবা ফিভম অমা হেক্তা লাকপা মতমদা, করিগুম্বা অনৌবা অমা তৌবা মতমদা হংনরম্মি মদুদি ‘হ্বু ৱিল দু ইৎ? (মসি কনানা তৌগনি?)’ অদুবু লৈবাক অসিনা মসানা মসি হায়রি মদুদি ‘ৱি ৱিল দু ইৎ। (মসি ঐখোয় তৌগে।)’ দিজিতেল পেমেন্তপু ওইরো, সোলর সেক্তর শেমগৎ-শাগৎপবু ওইরো, নত্ত্রগা এ.আই. রিভোলুসনবু ওইরো, লৈবাক অসিনা হংদ্রে মদুদি ‘হ্বু ৱিল দু ইৎ’? লৈবাক অসিনা লেপচরে – ‘ৱি ৱিল দু ইৎ’। অমসুং মদুগী রিজল্ত ঐখোয় পুম্নমক্কী মাংদা লৈরে। ঙসি ভিম য়ু.পি.আই.না পেমেন্ত সিস্তেমবু রিভোলুসনাইজ তৌরে। দিসেম্বর মক্তদা ভারত্তা লুপা করোর লাখ ৪দগী হেনবা ত্রানজেক্সন, য়ু.পি.আই.গী থোংদা তৌখ্রে। সোলর সেক্তরশিংদা ভারত মালেম্বু লমজিংনবগী মায়কৈদা চংশিল্লি। হৌজিক কুইদ্রিঙৈগী থিজিনবা অমদগী মালেমগী অচৌবা লৈবাকশিংগা চাংদম্নবদা ভারত্তা এ.আই. শিজিন্নবসু অদুক্কী মতিক খোংজেল য়াংনা হেনগৎলক্লি।

মরূপশা,

স্তার্তঅপ্সনা লম অমা হেক্তদা বেরিজ নমখাইদুনা পাম্বৈশিং ফংহনবগুম, ভারতনা ঙসি লম খুদিংমক্তা অরিবা বেরিজ নমখাইরি। ঙসি লৈবাক অসিদা লাইরবশিংবু, লৌমীশিংবু, মহৈরোইশিংবু শেনগী তেংবাং দি.বি.তি.গী থোংদা, দাইরেক্ত বেনিফিৎ ত্রান্সফরগী থোংদা হকথেংননা মখোয়গী একাউন্তা চৌহল্লে। মসিদগী মচম মীয়াম্না অৱাবশিংদগী নান্থোকপা ঙমজরে, অমসুং লৈবাক অসিগী চাউরাক্না লুপা করোর লাখ অমা মখাইরোমগী লীকেজসু থিংলে। মতৌ অসুম্না সরকারগা মরী লৈনবা, বেঙ্কিং সেক্তরগা মরী লৈনবা থবক অনম্বা দিজিতেল ইন্দিয়ানা মোবাইল মক্তদা হকথেংননা পীরে। লৈবাক অসিদা অহোংবা অসি ঐখোয়গী স্তার্তঅপ্স মশামকসু ফাওজরি।

ঙসি জেম পোর্তেলগী থোংদা সরকারগী তেন্দরশিংদা স্তার্তঅপ অমনসু অচৌবা বেঙ্ক অমনা ফংবা অদুগুম্না মতেং ফংলি। হৌজিক ফাওবদা চাউরাক্না স্তার্তঅপ্স লিশিং ৮না জেম পোর্তেলদা রেজিস্তার তৌখ্রে, অমসুং মখোয়না চাউরাক্না লুপা করোর ২৩০০ রোমগী বিজিনেসসু তৌরে। জেম পোর্তেলদা পুন্না হৌজিক চাউরাক্না বিজিনেস করোর লিশিং ৮০ য়ৌখ্রে। লাক্কদৌরিবা মতম খরা অসিদা মসিদা স্তার্তঅপ্সকী শিয়র অমমুক্কা হেনগৎলক্কনি। পৈশা অসি ঐখোয়গী স্তার্তঅপ্সকী মফমদা য়ৌরগদি লোকেল মেন্যুফেকচরিংসু হেনগৎলগনি, মশিং য়াম্না নহাশিংনা থবকসু ফংগনি, অমসুং স্তার্তঅপ্স রিসর্স অমসুং ইনোভেসনদসু হেন্না ইনভেস্ত তৌরগনি।

মরূপশা,

ঐখোয়গী স্তার্তঅপশিংগী ফাইনান্সকী অৱাৎপা লৈতনবা, মসিগীদমক লৈবাক অসিনা খোংথাং কয়া পায়খৎলি। মসিগী মনুংদা মরুওইরবা ৱাফম অমা ঙসি ঐ থৌরম অসিদা লাওথোক্কনি। স্তার্তঅপশিংদা হৌরকপগী শেনফম ফংহন্নবগীদমক্তা লুপা করোর লিশিং অমগী স্তার্তঅপ ইন্দিয়া সীদ ফন্দ লোন তৌরি। মসিদগী অনৌবা স্তার্তঅপশিং হৌবদা, অমসুং গ্রো তৌবদা মতেং ওইরগনি। ইন্দ ওফ ফন্দ স্কিমগী থোংদা স্তার্তঅপশিংদা ইক্বুইতী কেপিতেল রাইজ তৌবদা হান্নদগী মতেং পীদুনা লাক্লি। মতুংদসু, সরকার অসিনা স্তার্তঅপশিংবু গেরেন্তীগী থোংদা দেবত কেপিতেল রাইজ তৌবদসু মতেং পাংগনি।

মরূপশা,

ভারতনা ওফ দ য়ুথ, বাই দ য়ুথ, ফোর দ য়ুথকী মন্ত্রনা য়ুম্বী ওইবা স্তার্তঅপ ইকোসিস্তেম শেম্ননবা হোৎনরি। স্তার্তঅপ ইন্দিয়া খোংজংগী থোংদা ঐখোয়গী নহাশিংনা চহি ৫ অসিদা মসিগী অচেৎপা য়ুম্ফম শেম শারে। হৌজিক ঐখোয় মথংগী চহি ৫গী পান্দম থমগনি। অমসুং ঐখোয়গী স্তার্তঅপ্স, ঐখোয়গী য়ুনিকোর্ন্স হৌজিক গ্লোবেল জাইন্তস ওইনা হৌরকপা হায়বা পান্দম অসি থমগদবনি। ফ্যুচরিস্তিক তেক্নোলোজিসদা ঐখোয়গী স্তার্তঅপ্সনা লীদ তৌগনি। ৱাশক অসি ঐখোয় বিমস্তেক লৈবাক পুম্নমক্কী অপুনবা ৱাশক ওইরবদি য়াম্না য়াম্লবা মী মশিংনা মসিগী কান্নবা ফংগনি, লৈবাক পুম্নমক্কী মীয়ামগী পুন্সি হেন্না অফবা ওইগনি। ঐনা বিমস্তেক্কা মরী লৈনবা মরূপ ওইরিবা লৈবাকশিংগী স্তার্ত অপশিংগী সক্সেস স্তোরীশিং উরুবদা, তারুবদা ঐগী নুংঙাইবা অমুক্কা হেনগৎলকই। ঐগী বিমস্তেক লৈবাকশিংগী স্তার্ত-এপ্স পুম্নমক্তা হন্না হন্না নুংঙাইবা ফোংদোকচরি। ঐনা থাজৈ মদুদি, অনৌবা চহি তরাগী খুজিং অসিদা ঐখোয় পুম্নমক অমত্তা ওইনা লমদম অপুনবা অসিদা স্তার্ত অপ্স অসিগী অনৌবা মশক অমা পীগনি, বিমস্তেক লৈবাকশিংগী স্তার্ত অপ্সকী থৌনা অদু মালেম অপুনবা অসিদা খঙহনগনি। য়াইফ-পাউজেল অসিগা লোইননা, অদোম পুম্নমকপু হন্না হন্না থাগৎচরি অমসুং অদোম পুম্নমক্তা য়াইফ-পাউজেল পীজরি।