ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি গুজরাতকী নভসারীদা তোঙান-তোঙানবা চাউখৎ-থৌরাংগী থৌশিলশিং হৌদোকখ্রে। মালেমগী নুপীশিংগী নুমিৎকী থৌরমদা তিনখিবা মীয়ামদা ৱা ঙাংলদুনা মহাক্না মশিং য়াম্না তিল্লিবা ইমাশিং, ইচে-ইচলশিং অমসুং ইচানুপীশিংদগী ফংলিবা মীনুংশি, অমসুং থৌজালশিংগীদমক মহাক্না থাগৎপা ফোংদোক্লদুনা লৈবাক অসিগী নুপী পুম্নমক্তা অখন্নবা নুমিৎ অসিগী য়াইফ-পাউজেল পীখি। মহাক্না মখা তারদুনা হায়খি মদুদি মহাক্না মহা কুম্ভদা ইমা গঙ্গাগী থৌজাল ফংখি অমরোমদনা ঙসি মাত্রুশক্তিগী মহাকুম্ভদা ঙসি থৌজাল ফংখি। প্রধান মন্ত্রীনা স্কিম অনি, G-SAFAL (গুজরাত স্কিম ফোর অন্ত্যোদয়া ফেমিলীজ ফোর ওগমেন্তিং লাইবলিহুদ) অমসুং G-MAITRI (গুজরাত মেন্তরশিপ এন্দ এক্সেলেরেসন ওফ ইন্দিভিজুএলস ফোর ত্রান্সফোর্মিং রুরেল ইনকম) ঙসি গুজরাত্তা হৌদোকখি। মহাক্না হায়খি মদুদি তোঙান-তোঙানবা স্কিমশিং অসিদগী লাকপা ফন্দশিং অসি নুপীশিংগী বেঙ্ক একাউন্তশিংদা হকথেংননা ত্রান্সফর তৌখি অমসুং মায়পাকপা অসিগীদমক মীপুম খুদিংমক্তা নুংঙাইবা ফোংদোকখি।

শ্রী মোদীনা হায়খি মদুদি ঙসি অসি নুপীশিংদা কত্থোক্লি অমসুং মীপুম খুদিংমক্তা মহাক্না তৌবিমল খঙবা উৎখি অমসুং চাউথোকপগা লোয়ননা ফোংদোকখী মদুদি মহাক্না মশাবু শেলগী ওইনা নত্তনা মালেমগী খ্বাইদগী ইনাক খুনবা মীশক ওইনা লৌই মরমদি ইমা, ইচে-ইচল অমসুং ইচানুপী করোর কয়াগী থৌজালশিং ফংলি। “মসিগী থৌজালশিং অসি ঐহাক্কী খ্বাইদগী চাউবা পাঙ্গল, লন অমসুং চুঙ্গোইনি”, হায়না মহাক্না ফোংদোকখি।

নুপীশিংবু ইকাই খুম্নবগী মরু ওই হায়না অকনবা ৱাফম থমখি মদুদি মসি খুন্নাই অমসুং লৈবাক চাউখৎহন্নবা মাইকৈদা অহানবা খোঙথাংনি হায়না ফোংদোক্লদুনা প্রধান মন্ত্রীনা হায়খি, “ভারত অসি লৈবাক অসিগী খোঙজেল য়াংনা খুমাং চাউশিন্নবগীদমক নুপীনা লমজিংবা চাউখৎ-থৌরাংগী লম্বেলদা হৌজিক চংশিল্লি”। মহাক্না হায়খি মদুদি সরকারনা নুপীশিংগী পুন্সিদা ইকাই খুম্নবা অমসুং খুদোংচাবা অনিমক অসি লুম্না লৌরি। মহাক্না নুপী করোর কয়াগীদমক ‘ইজত ঘর’ নত্ত্রগা ‘হাউস ওফ দিগনিতী’ হায়না খঙনবা তোইলেৎশিং শাবা অসিনা মখোয়গী ইকাই খুম্নবা হেনগৎহনখি, অমসুং নুপী করোর কয়াগীদমক বেঙ্ক একাউন্তশিং হাংখিবা, মখোয়বু বেঙ্কিং সিস্তেমদা ইন্তিগ্রেৎ তৌখিবা অদু পনখি। মহাক্না মৈখুগী অৱাবশিংদগী নুপীশিংবু কন্নবা উজ্জ্বলা সিলিন্দরশিংগী প্রোভিজন পীখিবা অদুসু পনখি। শ্রী মোদীনা হায়খি মদুদি সরকারনা নুপীশিংদা চয়োল 12দগী চয়োল 26 ফাওবা মেতর্নিতী লিব শাংদোকহনখি। ত্রিপল তলাক্কী মায়োক্তা আইন অমা শেম্নবা মুস্লিম ইচে-ইচলশিংগী দিমান্দ অদু খঙলদুনা সরকারনা মুস্লিম ইচে-ইচল লাখ কয়াগী পুন্সি ঙাকশেন্নবা অকনবা আইন শেমখি। মহাক্না হায়খি মদুদি জম্মু অমসুং কাশ্মিরদা আর্তিকল 370 চৎনখিবা মতমদা নুপীশিংগী হক কয়া মাংহনখি। করিগুম্বা রাজ্য অদুগী মপালদা কনাগুম্বা অমনা ময়ুম পাল্লবদি মখোয়না মপা-মপুনা পীরম্বা লমশিং অদু লৌবগী হক মাংখি অমদু আর্তিকল 370 লৌথোকখিবদগী জম্মু অমসুং কাশ্মিরদা লৈরিবা নুপীশিংনা মখোয়গী হকশিং অমুক হন্না হৌজিক্তি ফংলে।

খুন্নাই, সরকার অমসুং অচৌবা লোইশঙশিংদা লৈরিবা তোঙান-তোঙানবা থাকশিংদা নুপীশিংগীদমক হেনগৎলক্লিবা খুদোংচাবশিং অদু পল্লদুনা প্রধান মন্ত্রীনা হায়, “নুপীশিংনা সেক্তর খুদিংমক্তা, পোলিতিক্স, স্পোর্তস, জুদিসিএরী নত্ত্রগা পুলিস ওইরবসু মায়পাক্লি”। মহাক্না হায়খি মদুদি 2014দগী হৌদুনা মরু ওইবা ফমশিংদা নুপীশিংনা শরুক য়াবা চাউনা হেনগৎলক্লি, কেন্দ্র সরকারনা নুপী মন্ত্রীশিংগী খ্বাইদগী য়াম্বা মশিং উবা ফংখী অমসুং পার্লিয়ামেন্তদা নুপীশিংনা শরুক য়াবসু হেনগৎলকখি। 2019দা নুপী এম.পি. 78 কারকখি অমসুং 18শুবা লোক সভাদা হাউস অসিগী শরুক ওইনা এম.পি. নুপী 74 য়াওরি হায়না মহাক্না মখা তাখি। জুদিসিএরীদা নুপীশিংনা শরুক য়াবা হেনগৎলক্লিবা লোয়ননা মখোয়গী প্রজেন্স অসি দিস্ত্রিক্ত কোর্তশিংদা 35% হেল্লি হায়খি। রাজ্য কয়ামরুমদা সিভিল জজ ওইনা নৌনা রিক্রুৎ তৌখিবগী 50% হেনবদি নুপীশিং ওইরি হায়না শ্রী মোদীনা ফোংদোক্লদুনা হায়, “ভারত অসি মালেমগী খ্বাইদগী চাউবা অহুমশুবা স্তার্তঅপ ইকোসিস্তেম ওইরি, লোয়ননা স্তার্তঅপশিংগী তঙ্খাইগী ময়াদি নুপীশিংনা লুচিংবগী থৌদাংশিং লৌরি”। মহাক্না হায়খি নুপী সাইন্তিস্তশিংনা অচৌবা স্পেস মিসন কয়াদা অচৌবা থৌদাংশিং লৌরি। মহাক্না ভারতনা মালেমদা নুপী পাইলোৎশিংগী মশিং খ্বাইদগী ৱাংই হায়বা ৱাফম অসিদসু চাউথোকচবা ফোংদোকখি। মহাক্না নুপী পুলিস ওফিসরশিং অমসুং ওফিসিএলশিংনা সেক্যুরিতী এরেঞ্জমেন্তশিং তৌবগা লোয়ননা নভসারীদা থৌরম অসি শিনবা অমসুং ঙাকশেনবদা নুপীশিংনা লৌরিবা থৌদাং অদুসু খঙখি। প্রধান মন্ত্রীনা মমাংদা মহাক্না সেল্ফ-হেল্প গ্রুপশিংদগী নুপীশিংগা ৱারী শাখিবা অদু শেয়র তৌদুনা হায় মখোয়গী থৱায় য়াওবা অমসুং থাজবা অদু ভারতকী নুপীশিংগী শক্তিগী খুদম ওইরি। মহাক্না নৌহৌনা মহাক্কী থাজবা অদু ফোংদোক্লদুনা হায়খি মদুদি ভিক্সিৎ ভারত অমগী ফিরেপ অদু থুংলগনি লোয়ননা পান্দম অসি ফংনবা হোৎনবদা নুপীশিংনা খ্বাইদগী মরু ওইবা থৌদাং লৌগনি।

নুপীশিংনা কন্না হোৎনবা অমসুং শক্তিগী খুত্থাংদা লৈবাক অসিদা মায়পাক্লবা কোওপরেতিব মোদেল পীখিবা, চাউখৎপা ওইখিবা গুজরাত অসি নুপীনা লমজিংবা চাউখৎ-থৌরাংগী মরু ওইবা খুদম অমনি হায়না পল্লদুনা প্রধান মন্ত্রীনা অমুলবু মালেমনা মশক খঙনবা অমসুং গুজরাতকী খুঙ্গংশিংদগী নুপী লাখ কয়ানা করম্না শঙ্গোম পুথোকপা অসি রিভোল্যুসন অমদা ওন্থোকখিবগে হায়বা অদু ফোংদোকখি। মহাক্না মখা তারদুনা হায়খি মদুদি গুজরাতি নুপীশিংনা মখোয় মশাবু ইকনোমিকেল্লী শক্তি পীবা খক্তা নত্তনা রুরেল ইকনোমীদসু শক্তি পীরি। মহাক্না গুজরাতি নুপীশিংনা হৌদোকখিবা লিজ্জত পাপদ অসি করোর কয়ারোম ওইবা ব্রান্দ অমা ওইনা মায়পাক্লিবা অসি পনখি।

মহাক্না গুজরাতকী মুখ্য মন্ত্রী ওইরিঙৈ মতমদা সরকার অসিনা চিরঞ্জীবি য়োজনা, বেতি বচাও, অভিয়ান, মমতা দিবস, কন্যা কেলাবানি রাথ য়াত্রা, কুনৱারবাই নু মামেরু, সাত ফেরা সমুহ লগনা য়োজনা অমসুং অভায়ম হেল্পলাইনগুম্বা নুপীশিং অমসুং নুপীমচাশিংগী য়াইফ-থৌরাংগীদমক থৌশিল কয়া ইমপ্লিমেন্ত তৌখিবা অদু নীংশিল্লদুনা শ্রী মোদীনা হায়খি গুজরাতনা করম্না অচুম্বা পোলিসীশিংগী খুত্থাংদা নুপীগী শক্তি হেনগৎহনবগে হায়বা অদু লৈবাক পুম্বদা উৎখি। মহাক্না দাইরীগী থবক তৌবা নুপীশিংগী একাউন্তশিংদা ফন্দশিং হকথেংননা ত্রান্সফর তৌবগী থৌওং গুজরাত্তা হৌখি অমসুং হৌজিক মসি লৈবাক অসিগী বেনিফিসরী করোর কয়াদা তৌরি হায়না পনখি। মহাক্না হায়খি মদুদি দাইরেক্ত বেনিফিৎ ত্রান্সফরনা করোর লিশিং কয়াগী স্কেম থিংবা ঙমখি অমসুং লায়বশিংদা তেংবাং পীখি।

ভুজ য়ুহার হাবা মতুংদা নৌনা অমুক য়ুম শাবদা নুপীশিংগী মমিংদা য়ুমশিং শাদুনা নুপীদা শক্তি পীনবা সরকারগী খোঙথাংশিং অদু পল্লদুনা শ্রী মোদীনা চপ মান্নবা এপ্রোচ অসি পি.এম. আৱাজ য়োজনাদা পায়খৎলি লোয়ননা 2014দগী নুপী করোর 3গী ময়াদা য়ুমগী মপু ওইরি হায়না ফোংদোকখি। মহাক্না লৈবাক শিনবা থুংবদা লৈরিবা খুঙ্গংশিংদা ঈশিং য়ৌহনখিবা জল জীবন মিসনবু মালেমনা শকখঙনরি হায়না ফোংদোকখি। হৌখিবা চহি মঙা অসিদা খুঙ্গং লিশিং কয়াদা লৈবা য়ুমথোং করোর 15.5দা তোতি ঈশিং য়ৌহনখ্রে, মিসন অসি মায়পাক্নবা হোৎনবদা নুপীশিংগী ৱাতর কম্মিতীশিংগী মরু ওইবা থৌদাং লৈ। মহাক্না মখা তারদুনা হায়খি গুজরাত্তা মোদেল অসি হৌদোকখি অমসুং হৌজিকনা মসিনা লৈবাক শিনবা থুংবদা ঈশিংগী অৱাবা কোকহল্লি।

ঈশিং য়োকশিনবগী মরু ওইবা খঙবা অমরোমদনা ঈশিং তাংবগী সমস্যা কোকহনবা অসিগী মতাংদা প্রধান মন্ত্রীনা কেন্দ্রগী জল শক্তি মন্ত্রী, শ্রী. সি.আর. পতিলনা হৌদোকখিবা লৈবাক শিনবা থুংবদগী কেম্পেন “কেৎচ দি রেন” অসিনা নোং তারক্লিবা মফম অদুদা ঈশিং য়োকশিন্দুনা ঈশিং মাংহনবদগী ঙাকথোক্নবা পান্দম থমখি হায়না ফোংদোকখি। মহাক্না পুখ্রি, চেক দামশিং, বোরৱেল রিচার্চ অমসুং কম্ম্যুনিতী সোক পিৎশিং য়াওনা নোংগী ঈশিং য়োকশিন্নবা প্রোজেক্ত 5,000 হেন্না লোইশিনখিবা নভসারীগী নুপীশিংগী থৌদাং অদু থাগৎখি। মহাক্না হায়খি মদুদি ঈশিং য়োকশিনবগী প্রোজেক্ত কয়া হৌজিক চত্থরি, মসিগী পান্দম অসি নোংমদা পরকোলেসন পিৎ 1,000 শাবনি। শ্রী মোদীনা নভসারী জিলা অসি নোংগী ঈশিং য়োকশিন্নবগীদমক গুজরাতকী মাংজিল থারিবা জিলা অমা ওইরি হায়খি, লমদম অসিদা মখোয়গী মায়পাকপা অসিগীদমক নভসারীদা লৈরিবা ইমাশিং, ইচে-ইচলশিং অমসুং ইচানুপীশিংদা অখন্ননা নুংঙাইবা ফোংদোকখি।

“গুজরাত নুপীশিংগী থৌনা অমসুং মখোয়গী থৌদাং অসি সেক্তর অমা খক্তদা লোইদে” হায়না শ্রী মোদীনা ফোংদোক্লদুনা হায় গুজরাতকী পঞ্চায়ৎ মীখলশিংদা সীত 50% নুপীশিংগীদমক খাক্তুনা থম্মি। মহাক্না হায়খি দিল্লীদা মহাক্না প্রধান মন্ত্রী ওইনা চৎখিবা মতমদা  মহাক্না লৈবাক অসিদা চপ মান্নবা এক্সপরিয়েন্স অমসুং কম্মিৎমেন্ত অদু পুদুনা চৎখি। মহাক্না হায়খি মদুদি অনৌবা পার্লিয়ামেন্তদা অহানবা পাস তৌখিবা বিল অসি নুপীদা শক্তি পীনবনি, মসি নারী শক্তি ভন্দন অধিনিয়ম কৌই, মসিগী বিল অসি অচম্বা ত্রাইবেল বেকগ্রাউন্দদগী লাকখিবা নু্পী রাস্ত্রপতিনা অয়াবা পীখি। পি.এম.না শরুক য়ারিবা নুপীশিংদগী অসিগুম্বা প্লেৎফোর্ম অমদা এম.পি. নত্ত্রগা এম.এল.এ. অমা ওইনা থোরক্কদবা নুমিৎ অদু কুইদ্রে হায়না মহাক্কী থাজবা ফোংদোকখি।

মহাত্মা গান্ধী পল্লদুনা প্রধান মন্ত্রীনা হায়খি রুরেল ইন্দিয়াদা লৈবাক অসিগী থৱায় লৈ অমসুং মখা তারদুনা হায়, “রুরেল ইন্দিয়াগী থৱায় অসি খুঙ্গংগী নুপীশিংদা শক্তি পীবদা য়াওরি”। মহাক্না হায়খি মদুদি সরকার অসিনা নুপীগী হকশিং অমসুং খুদোংচাবশিং লুম্না লৌরি। মহাক্না হায় ভারত অসি মালেমগী খ্বাইদগী চাউবা মঙাশুবা ইকনোমী ওইরক্লি লোয়ননা মসিগী শেন্মীৎলোন খুমাং চাউশিন্নবা য়ুম্ফম অসি নুপীশিংনা থোনখি হায়খি। মহাক্না রুরেল ইকনোমী অমসুং নুপী সেল্ফ-হেল্প গ্রুপশিংনা মায়পাকপা অসিদা লৌরিবা অচৌবা থৌদাং অদু খঙখি। শ্রী মোদীনা হায়খি মদুদি নুপী করোর 10 হেনবনা লৈবাক অসিদা লৈরিবা সেল্ফ-হেল্প গ্রুপ লাখ 90 হেন্না চল্লাইরি, লোয়ননা সেল্ফ-হেল্প গ্রুপ লাখ 3 হেনবনা গুজরাত খক্তদা চল্লাইরি। মহাক্না সরকারনা নুপীশিংবু “লাখপতী দিদি” ওইহন্নবা পান্দম থমদুনা নুপী করোর কয়াগী ইনকম হেনগৎহন্নবা হোৎনরি। মহাক্না হায়খি মদুদি নুপী করোর 1.5রোমনা “লাখপতী দিদি” ওইখ্রে অমসুং সরকারনা মথংগী চহি মঙাদা পুন্না নুপী করোর 3 “লাখপতী দিদি” ওইহন্নবা পান্দম থম্মি।

নুপী অমনা “লাখপতী দিদি” ওইরকপা মতমদা ইমুং পুম্বগী লাইবক্তা অহোংবা লাকই হায়রদুনা শ্রী মোদীনা হায়খি নুপীশিংনা মখোয়গী থবক্তা অতোপ্পা খুঙ্গংগী নুপীশিং য়াওহন্দুনা হোম-বেজ ৱার্ক অসি ইকনোমিক মুফমেন্ত অমদা ওন্থোকই। সেল্ফ-হেল্প গ্রুপকী পোতেন্সিএল হেনগৎহন্নবা সরকারনা হৌখিবা দিকেদতা মখোয়গী বজেৎ শরুক মঙা হেনগৎহনখ্রে। প্রধান মন্ত্রীনা হায়খি মদুদি সেল্ফ-হেল্প গ্রুপশিং অসিদা লুপা লাখ 20 ফাওবগী কোল্লাতরেল ফ্রী লোনশিং ফংহল্লি। মসিগী মথক্তা সেল্ফ-হেল্প গ্রুপশিংদা নুপীশিংদা অনৌবা স্কিলশিং তমশিন্নবা অমসুং অনৌবা তেক্নোলোজীগা কন্নেক্ত তৌনবা খুদোংচাবশিং পীরি।

লৈবাক অসিগী নুপীশিংনা চীংনবা অমসুং অকিবা খুদিংমক মায়োক্নদুনা মাংদা চংশিল্লি হায়দুনা প্রধান মন্ত্রীনা ফোংদোকখি মদুদি “দ্রোন দিদি” স্কিম লোঞ্চ তৌবা মতমদা মীওই কয়ানা দ্রোনগুম্বা মোদর্ন তেক্নোলোজীশিং খুঙ্গংগী নুপীশিংনা হৈগদ্রা হায়না চীংনবা পোকখি। অদুম ওইনমক মহাক্না মহাক্কী ইচে-ইচল অমসুং ইচানুপীশিংগী তেলেন্ত অমসুং দেদিকেসনদা মপুং ফানা থাজবা থমখি। ঙসি “নমো দ্রোন দিদি” কেম্পেন অসি লৌউ-শৌংউ অমসুং রুরেল ইকনোমীদা অনৌবা অওনবা ওইরক্তুনা মসিগী অহোংবা অসি লমজিংখিবা নুপীশিংগীদমক ইনকম চাউনা লাকহল্লি, হায়না মহাক্না মখা তাখি। শ্রী মোদীনা হায়খি মদুদি “বেঙ্ক সখি” অমসুং “বিমা সখি”গুম্বা স্কিমশিংনা খুঙ্গংগী নুপীশিংদা অনৌবা খুদোংচাবশিং পীরি। খুঙ্গংগী নুপীশিংদা শক্তি পীনবা ‘কৃশী সখি’ অমসুং ‘পসু সখি’গুম্বা কেম্পেনশিং হৌদোক্তুনা নুপী লাখ কয়া কন্নেক্ত তৌরি অমসুং মখোয়গী ইনকম হেনগৎহল্লি। মহাক্না হায়খি মদুদি সরকারগী খোঙথাংশিংনা গুজরাতকী নুপী কয়াদা কান্নবা ফংহনগদবনু, মহাক্না শ্রী ভুপেন্দ্র ভাই পতেল অমসুং গুজরাত সরকারনা নুপী লাখ 10 হেন্না “লাখপতী দিদি” ওইহন্নবা কেম্পেন অমা হৌদোকপগীদমক নুংঙাইবা ফোংদোকখি।

প্রধান মন্ত্রী ওইনা লাল কিলদাদগী মহাক্কী অহানবা ৱারোল পীখিবা অদু নৌহৌনা নীংশিংলদুনা শ্রী মোদীনা নুপীশিংদা চত্থবা ক্রাইমশিংদগী ঙাকথোক্নবা অমসুং অফবা খুন্নাই অমা শেম্নবা ইচানুপীশিংদা খক্তা নত্তনা ইচানুপাশিংদা হায়বগী মরু ওইবা অদু থমখি। হৌখিবা দিকেদতা সরকারনা নুপীশিংগী ঙাকশেল লুম্না লৌদুনা মখোয়গী মায়োক্তা চত্থবা ক্রাইমশিং ঙাকথোক্নবা অকনবা আইনশিং শেম্মি হায়খি। মহাক্না লৈবাক শিনবা থুংবদা কোর্ত 800 রোম অয়াবা পীদুনা, মসিদা হৌজিক অয়াম্বা মথৌ তৌরি, নুপীশিংগী মায়োক্তা চত্থরিবা অহকপা ক্রাইমশিংগীদমক থুনা ৱায়েল পীনবা ফাস্ত-ত্রেক কোর্তশিং হাংদোক্লে হায়খি। কোর্তশিং অসিনা রেপ অমসুং পোক্সোগা মরী লৈনবা কেস লাখ অহুমরোমগী ৱারোইশিন থুনা ফংহনখি। শ্রী মোদীনা হায়খি মদুদি সরকারনা রেপগুম্বা অহকপা ক্রাইমশিংগীদমক শীবগী চৈরাক পীনবা প্রোভিজন পুথোকখি। মহাক্না হায়খি মদুদি নুপীশিংগী 24×7 হেল্পলাইন মপাঙ্গল কনখৎহল্লি অমসুং লৈবাক অসিদা হৌজিক মথৌ তৌরিবা সেন্তর 800 রোমগা লোয়ননা নুপীশিংগীদমক ৱান-স্তোপ সেন্তরশিং লিংখৎখি, মসিনা নুপী লাখ 10 হেনবদা মতেং পীরি।

“নৌনা ইমপ্লিমেন্ত তৌখিবা ভারতীয় ন্যায় সনহিতা (BNS)না কোলোনিএল লোশিং মুথৎখি, মসিনা নুপীশিংগী ঙাকশেলগা মরী লৈনবা প্রোভিজনশিং মপাঙ্গল কনখৎহনখি” হায়না ফোংদোক্লদুনা প্রধান মন্ত্রীনা হায়খি মদুদি নুপী অঙাংগী মায়োক্তা চত্থবা ক্রাইমশিং থেংননবা তোখাইবা চেপতর অমা হাপচিনখি। মহাক্না ৱায়েল থিন্থবনা মরম ওইদুনা ভিক্তিমশিংনা তোইনা মায়োক্নরিবা কম্মন গ্রিভান্স অদুসু খঙখি। মসি কোকহন্নবা ইন্দিয়ন পেনাল কোদনা রেপগুম্বা অহকপা ক্রাইমশিংগীদমক চার্জ তৌরবশিং নুমিৎ 60গী মনুংদা ফ্রেম তৌনবা অমসুং ৱায়েল নুমিৎ 45গী মনুংদা পীনবা মেন্দেৎ তৌখ্রে হায়না মহাক্না মখা তাখি। শ্রী মোদীনা হায়খি অনৌবা আইনশিংনা মফম অমা হেক্তদগী e-FIRশিং ফাইল তৌবা য়াহন্দুনা পুলিসনা খুদক্তা থবক পায়খৎপা লায়হল্লি। জিরো FIRগী প্রোভিজনগী মখাদা নুপী অমা হেক্তনা করিগুম্বা মহাক্না অৱাবা মায়োক্নরবদি পুলিস স্তেসন অমা হেক্তদা FIR ফাইল তৌবা য়াই। মসিগী মথক্তা মহাক্না হায়খি মদুদি পুলিসনা হৌজিক রেপ ভিক্সিমশিংগী স্তেৎমেন্তশিং ওদিও-ভিদিওগী পাম্বৈ শীজিন্নদুনা রেকোর্দ তৌবা য়াহনখ্রে। মসি লিগেল ওইনা রিকগনাইজ তৌখ্রে। মহাক্না হায়খি মদুদি দোক্তরশিংনা মেদিকেল রিপোর্তশিং ফোর্ৱার্দ তৌবগী মতম নুমিৎ 7দা ওইহন্দুনা ভিক্তিমশিংদা চাউনা মতেং পীরি।

BNS দা অনৌবা প্রোভিজনশিং অসিগী ফলশিং উবা ফংলে হায়দুনা শ্রী মোদীনা মমাংগী ওক্তোবরদা সুরত জিলাদা থোকখিবা লাইবক থিবা থৌদোক অদু নীংশিংখি, মসিদা গেং রেপ কেস অমা নুমিৎ 15গী মনুংদা ফ্রেম তৌখি অমসুং মরাল লৈবা মীওইশিং চয়োল খরগী মনুংদা পুন্সি চুপ্পা কৈশুমশঙদা থম্নবা ৱায়েল পীখি। মহাক্না হায়খি মদুদি BNS ইমপ্লিমেন্ত তৌবনা লৈবাক শিনবা থুংবদা নুপীগী মায়োক্তা চত্থবা ক্রাইমশিংগী হিয়রিং থুজিনহনখি। মহাক্না মখা তারদুনা হায়, উত্তর প্রদেসকী অলিগরদা কোর্তনা মাইনর অমগী রেপিস্ত চহি 20 কৈশুমশঙদা লৈনবা রাই তাখি, মসিনা চার্জ সীত ফাইল তৌবগী নুমিৎ 30গী মনুংদা BNS কী মখাদা অহানবা কনভিক্সন ওইখি। কোলকাতাদা থা তরেৎ খক্তা ঙাইরিবা অঙাং অমা রেপ তৌরুবগী শীবগী চৈরাক পীখি লোয়ননা ক্রাইম অসিগী নুমিৎ 80গী মনুংদা রাই তাখি। প্রধান মন্ত্রীনা তোঙান-তোঙানবা রাজ্যশিংদগী খুদমশিং পীদুনা করম্না BNS অমসুং অতৈ সরকারগী ৱারেপশিংনা নুপীশিংগী ঙাকশেল হেনগৎহনখিবগে অমসুং ৱায়েল পীখিবগী হায়বা অদু উৎখি।

জাতিদা নৌনা থাজবা পীরদুনা মহাক্না হায়খি মদুদি মহাক্না মখোয়গী মঙলানশিং থুংহন্নবা হোৎনবদা অপনবা অমত্তা লৈহল্লোই, প্রধান মন্ত্রীনা হায়খি মদুদি মচানুপা অমনা মহাক্কী মমাগী শেবা তৌবা অদুগুম্না মহাক্না ভারত ইমা অমসুং ভারতকী মমাশিং অমুং মচানু্পীশিংগী শেবা তৌরি। মহাক্না মীয়ামনা কন্না হোৎনবা, কত্থোকপা অমসুং থৌজালশিংনা 2047 ফাওবদা ভিক্সিৎ ভারতকী পান্দম ফংনবা হোৎনবদা মতেং পাংগনি হায়না মহাক্কী অচেৎপা থাজবা অদু থমখি অমসুং অমুক হন্না মহাক্না লৈবাক অসিগী ইমাশিং, ইচে-ইচলশিং, অমসুং ইচানুপীশিংদা নুপীশিংগী নুমিৎকী য়াইফ-পাউজেল পীখি।

থৌরম অদুদা গুজরাতকী মুখ্য মন্ত্রী, শ্রী ভুপেন্দ্র ভাই পতেল, জল শক্তিগী কেন্দ্রগী মন্ত্রী, শ্রী সি.আর. পতিল অমসুং অতৈ দিগনিতরীশিংনা শরুক য়াখি।

বেকগ্রাউন্দ

নুপীশিংগী শক্তি হেনগৎহনবা অসি সরকারনা পায়খৎলিবা থবকশিংগী মরুওইবা শরুক অমা ওইরি। প্রধান মন্ত্রীগী লমজিং মখাদা, সরকারনা মখোয়গী চাউখৎ-থৌরাংগী মায়কৈদা খোংথাং লৌখৎনবা অচেৎপা ৱাফম থম্লি। মসিগা মরী লৈননা, মার্চ 8দা, ইন্তর্নেস্নেল ৱুমেন দেনা লাকপদা, প্রধান মন্ত্রীনা নভসারী জিলাগী ভন্সি বোর্সি খুঙ্গংদা লাখপতী দিদি প্রোগ্রামদা শরুক য়াখ্রে অমসুং লাখপতী দিদিশিংগা ৱারী শাখ্রে। প্রধান মন্ত্রীনা লাখপতী দিদি 5বু লাখপতী দিদি সর্তিফিকেৎশিংসু পীদুনা ইকায় খুম্নবা উৎখ্রে।

G-MAITRI স্কিম অসিনা খুঙ্গংগী পুন্সি মহিংগীদমক খুদোংচাবা ফংবা অকোয়রোন অমা শেমগৎনবা থবক পায়খৎলিবা স্তার্ত-অপশিংদা শেলগী তেংবাং অমসুং হেন্দহোল্দিং সপ্পোর্ত পীগনি।

G-SAFALনা গুজরাতকী এস্পিরেস্নেল দিস্ত্রিক্ত অনি অমসুং এস্পিরেস্নেল ব্লোক তরাহুমদোইদা লৈবা অন্ত্যোদয়া ইমুংশিংগী SHG নুপীশিংদা শেলগী তেংবাং অমসুং ওন্তপ্রিন্যুওরিএল ত্রেনিং পীগনি।

Humbled to receive the blessings of our Nari Shakti in Navsari. Speaking at a programme during the launch of various initiatives. Do watch. https://t.co/zvrMBnB67J

— Narendra Modi (@narendramodi) March 8, 2025

Women’s blessings are my strength, wealth and shield, says PM @narendramodi. pic.twitter.com/SB6tSism8V

— PMO India (@PMOIndia) March 8, 2025

India is now walking the path of women-led development. pic.twitter.com/aCNi9pVF9c

— PMO India (@PMOIndia) March 8, 2025

Our government places utmost importance on ‘Samman’ and ‘Suvidha’ for women. pic.twitter.com/ChzQ7n3JfR

— PMO India (@PMOIndia) March 8, 2025

The soul of rural India resides in the empowerment of rural women. pic.twitter.com/qZ6EjxBAsR

— PMO India (@PMOIndia) March 8, 2025

Nari Shakti is rising, surpassing every fear and doubt. pic.twitter.com/wy0VXlj94I

— PMO India (@PMOIndia) March 8, 2025

In the past decade, we have given women’s safety the highest priority. pic.twitter.com/8CESftFlTj

— PMO India (@PMOIndia) March 8, 2025

***