ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি পরিক্সা পে চর্চা (PPC) গী ৮শুবা তাঙ্কক্তা নই দিল্লীগী সুন্দর নর্সরীদা মহৈরোয়শিংগা ৱারী শানখ্রে‍। প্রধান মন্ত্রীনা লৈবাক্কী মফম কয়াদগী মহৈরোয়শিংগা ইচম চম্না ৱারী ৱাতায় শানবা অদুদা হীরম কয়াগী মরমদা খন্নখি‍। মহাক্না হকচাংবু লুম্না থম্নবা নিংথমথাগী মতমদা হেক হেক চানবা থোইদিংনা শাবা মিথাই য়েনখি‍।

হকচাঙ ফনা লৈনবা মচি ওইবা মচল

মচি ওইবা মচলগী হীরমদা, শ্রী মোদীনা ভারতনা হৌদোকখিবা ৱাফম অমদা য়ুনাইতেদ নেসন্সনা ২০২৩ বু ‘ইন্তরনেস্নেল ইয়র ওফ মিল্লেতস’ হায়না লাউথোকখি অমদি মালেম শিনবা থুংনা প্রমোত তৌখি হায়খি‍। মচি ওইবা চিঞ্জাক নীংথিনা চাবনা লায়না কয়াদগী ঙাকথোকপা ঙমগদবা মরম্না, ভারত লৈঙাক্না মচি ওইবা মচলগী মরমদা মীয়ামদা মরাং কায়না খঙহনগদবনি হায়বা অকনবা ৱাফম থমখি‍ হায়না মহাক্না মখা তাখি‍। চনান অসি ভারত্তা সুপরফুদনি হায়না খঙনৈ হায়না প্রধান মন্ত্রীনা হায়খি‍। ভারত্তা, মহৈ মরোং, উহৈ-ৱাহৈনচিংবা পোৎ অয়াম্বা ঐখোয়গী পারী পুরীগী লনগা মরী লৈনৈ হায়না মহাক্না মখা তাখি অমদি ভারতকী মফম অয়াম্বদা মহৈ মরোং অনৌবা খুদিং লাইগী মফমদা কৎপা নৎত্রগা থারুক খুদিং কুমহৈ পাঙথোকপবু খুদম ওইনা পীখি‍। লাইগী মফমদা কৎচবা পোৎলমশিংবু লুকমন (প্রসাদ) ওইনা য়েন্থোকই‍ হায়খি‍। শ্রী মোদীনা অঙাংশিংদা মতম মতমগী হৈ-রা চানবা হায়খি‍। মহাক্না অঙাংশিংদা জঙ্ক ফুদ, থাউদা তাউবা অমদি মোইদানা শাবা চীঞ্জাক চাদনবা ৱাফম থমখি‍। চীঞ্জাক করম্না মওং চুম্না চাগনি হায়বগী মতাঙদা, প্রধান মন্ত্রীনা অঙাংশিংদা মখোয়না চারিবদু য়োৎত্রিঙৈদা য়ামদ্রবদা ৩২ রক শায়নবা ৱাফম থমখি‍। মহাক্না অঙাংশিংদা ঈশিং থকপা মতমদা য়াউম-য়াউম ওইনা থক্নবা অমসুং মদুগী মহাউ লৌনবা ৱাফম থমখি‍। অফবা চীঞ্জাক মতম চানা চাবগী মতাঙদা, শ্রী মোদীনা লৌমীশিংবু খুদম ওইনা পীরদুনা, মখোয়না অয়ুক্তা লৌবুক্তা চৎত্রিঙৈদা হাউনা চরা ৱানগনি অমদি নুমিৎ তাদ্রিঙৈদা নুমিদাংগী চাক্লেন চাথোক্কনি হায়খি‍। মহাক্না অঙাংশিংদা মদুগা মান্নবা অফবা হৈনবীশিং ইন্নবা পুক্নিং থৌগৎখি‍।

ন্যুত্রিসন অমসুং ৱেলনেস

ৱেলনেসকী মতাঙদা খন্নরদুনা, প্রধান মন্ত্রীনা অনাবা লৈত্রগা মীওই অমা মশা মউ ফরে হায়না হেক্তা লৌবা য়াদে হায়খি অমদি অঙাংশিংদা মখোয় মশা মউ ফনা থমবদা মীৎয়েঙ থম্নবা হায়খি‍। হকচাঙ ফনা অমদি তিঞ্জং কায়জঙদনা থম্নবা মরাং কায়না তুম্বা মরুওই হায়খি‍। মীওইবনা মশা মউ ফনা লৈবদা তুম্বগী মরুওইবগী মতাঙদা থিজিন হুমজিনবগী প্রোজেক্ত কয়া লৈ হায়না মহাক্না পনখি‍। শ্রী মোদীনা মীওইবগী হকচাঙদা নুংশা মঙালগী মরুওইবা ৱাফম ফোঙদোক্লদুনা, অঙাংশিংদা নুমিৎ খুদিং অয়ুক্কী নুংশা মিনৎ খরা য়াইবগী হৈনবী থম্নবা পুক্নিং থৌগৎখি‍। মহাক্না মখোয়দা নুমিৎ থোরকপা মতমদা উ অমগী মখাদা লেপ্তুনা নীংশা শাংনা হোন্নবা ৱাফমসু থমখি‍। মীওই অমনা পুন্সিদা খুমাঙ চাওশিন্নবগীদমক, মচি ওইবা মচল চাবগী মরুওইবসি করি চাগনি, করম্বা মতমদা চাগনি, কমদৌনা চাগনি অমদি করিগীদমক চাগনি হায়বসিদা লৈ হায়না প্রধান মন্ত্রীনা শম্লপ্না ফোঙদোকখি‍।

প্রেসর থেংনবা

প্রেসরশিং থেংনবগী হীরমদা, প্রধান মন্ত্রীনা ১০শুবা অমদি ১২ শুবা ক্লাসকী চাংয়েংদা মার্ক ৱাংনা ফংদ্রগদি পুন্সি অসি মাঙ তাক্লবগুম ঐখোয়গী খুন্নাই অসিগী ৱাখলদা চুদুনা লৈখিবা অসি লাইবক থিবনি হায়না ফোঙদোকখি‍। মসিনা অঙাংশিংদা অকনবা শাফু অমা পী হায়না মহাক্না মখা তাখি‍। ক্রিকেত মশান্নদা বেতসমেন্না বোলদা পুক্নিং চঙবগী খুদম অমা পীরদুনা, শ্রী মোদীনা অঙাংশিংবু বেতসমেনগুম্না মপানগী শাফুশিং থৈদোক্নবা অমসুং মখোয়গী মহৈ মশিং তম্বদা পুক্নিং চঙনবা পুক্নিং থৌগৎলদুনা, মদুনা মখোয়বু শাফুশিং অদু নমখায়বদা মতেঙ ওইগনি হায়খি‍।

নশাবু শিংনবা

মহৈরোয়শিংগী মফমদা নীংথিনা শেম শাদুনা লৈনবা অমসুং মতম পুম্বদা মখোয় মশাবু শিংনদুনা লৈনবা হায়রদুনা, প্রধান মন্ত্রীনা মীওই কয়া অমদি মশাগী লানফমশিং মশানা থেংনজদে হায়খি‍। মশানা তৌথোরকপশিং নৈনবগী মরুওইবা ৱাফমশিং ফোঙদোক্লদুনা, মখোয় মশাদা মখোয় করি ওইবা, করি ফংবা ঙমগনি, অমদি করম্বা থবক্না মখোয়দা অপেনবা পোকহনগনি হায়বদু তত্তনা হৌজনবা ৱাফম থমখি‍। মীওই অমগী পুক্নিং চঙবদা পাউ-চে নৎত্রগা তিভিগুম্বা মপানগী ইথিলশিংনা নাথৈহল্লোইদবনি হায়রদুনা, পুক্নিং চঙবগী মতৌ অসি তপ্না তপ্না শেমগৎকদবনি হায়খি‍। মীওই কয়া অমদি মশাগী পুক্নিং ৱাখল মায়কৈ খঙদনা ককঙাউনহল্লি হায়না প্রধান মন্ত্রীনা ফোঙদোকখি‍। মখোয়না ফিরেপ লৌবা মতমদা থৌওইদবা তৌদনবা অমদি শিংনবশিংবু লাকশিনবদা মতেঙ ওইগদবা করিগুম্বা খরদা পুক্নিং ইংথনবা লৈবা ঙম্নবা লম্বী শেম্মু হায়না মহাক্না পাউতাক পীখি‍।

লীদর্সিপকী মতিং

মহৈরোয় অমনা মতিং লৈবা লুচিংবগী মরমদা পাউতাক খরা পীবিনবা হায়রকপদা, শ্রী মোদীনা মপান্থোংগী ওইবা শক্তম্না লুচিংবা অমগী মশক তাক্তে, লুচিংবা অমা হায়বসিদি অতৈগীদমক মশাবু ফিদম ওইহন্দুনা মীয়ামবু লমজিংবদুনি হায়খি‍। মসি ফংনবগীদমক, মখোয়না মশাদা অহোংবা পুরকপা তাই, অমদি মখোয়গী লমচৎ শাজত্তা অহোংবা অদু মমি তাহনগদবনি হায়না মহাক্না হায়খি‍। “লীদর্সিপ হায়বসি নমদুনা লৌগদবা নত্তে, নখোয়গী অকোয়বদা লৈরিবা ময়ামদুনা য়াজরক্কদবনি,” হায়না প্রধান মন্ত্রীনা হায়খি‍। অতৈদা পাউতাক পীবনা লুচিংবা অমগী মতিক ফংগদবা নত্তে; মহাক্কী লমচৎ শাজত্তুননি মহাকপু মীয়াম্না য়ারক্কদবদি হায়না মহাক্না ফোঙদোকখি‍। খুদম অমা পীরদুনা, কনাগুম্বা মীওই অমনা লু-নানবগী মরমদা ৱাফম অমা ফোঙদোক্ললবা, অদুগা মহাক মশানদি মদু তৌদ্রবদি মহাক লুচিংবা অমা নত্তে‍। পুন্না থবক তৌমিন্নবা অমদি খাঙবা কনবা হায়বসি লুচিংবা অমদা লৈবা তঙাই ফদে হায়না শ্রী মোদীনা হায়খি‍। থবকশিং য়েন্থোকপদা, তীম মেম্বরশিংনা থেংনগদবা শিংনবশিং খঙবা মরুওই অমদি মখোয়না খুদোংথিবা মায়োক্নরকপদা মতেং পাবিবনা লুচিংবা অদুদা থাজবা হেনগৎলক্কনি‍। প্রধান মন্ত্রীনা ৱাফম অসি শন্দোক্না তাক্লদুনা অঙাং ওইরিঙৈগী, মেলা অমদা মমা-মপাগা মখুৎ শমদুনা চৎলিবা অঙাং অমগী ৱারী লীখ‍ি‍। অঙাং অদুনা পাম্লিবদি মমা-মপা ওইবদুনা মহাক্কী মখুৎ শম্বিবদুনি, মদুনা মঙোন্দা থাজবা অমসুং অশোয় অঙাম য়াওরোই হায়না থাজহল্লি‍। অসিগুম্বা থাজবা অসিমক লুচিংবা অমগী মশক থোকপা মতিক অমনি, হায়না মহাক্না ফোঙদোকখি‍।

লাইরিক্কী ৱাংমদা – ৩৬০º গ্রোথ

হৈনবী অমদি মহৈ মশিং তম্বগী মরক্তা খল চানা থম্বগী মতাঙদা ৱাফম কয়া থম্লদুনা, মহৈ মশিং তম্বা অসিনা মায় পাক্নবগী অমত্তা ঙায়রবা লম্বীনি হায়না অয়াম্বনা লৌনৈ হায়রদুনা প্রধান মন্ত্রীনা মহৈরোয়শিং অসি রোবোত নত্তে হায়খি অমদি মায়কৈ শুনা মপুং ফাহন্বা মথৌ তাই হায়খি‍। এজুকেসন হায়বসি মথঙগী ক্লাস কানবখক্কী নত্তে মীওই অমনা হীরম শুনা মপুং মরৈ ফাহল্লক্নবা পাম্বৈনি‍ হায়খি‍। হৌখিবগী মরমদা নৈদরদুনা, মহৈ তম্বগী অঙনবা মতমদা লৈ কোইবনচিংবা পরাশিং মরুওইদবা মাল্লম্বা য়াই, অদুবু মখোয়না মীওই অমা মরম শুনা মপুং মরৈ ফাহনবদা থৌদাং য়াই‍। প্রধান মন্ত্রীনা মমা মপা অমদি ওজাশিংগী মফমদা অঙাংশিংবু অচেৎপা একাদমিক এনভাইরনমেন্ত অমদা ফাজিন পুনশিন্দুনা থমদনবা হায়রদুনা মসিনা মখোয়বু মপুং মরৈ ফাহনবা ঙমদে হায়খি‍। অঙাংশিংনা অহাংবা এনভাইরনমেন্ত অমদি মখোয়দা নুংঙাইজবা থবক থৌওংশিং মথৌ তাই, মদুনা মখোয়গী মহৈ মশিং তম্বদা কান্নবা হেনগৎহল্লি হায়না মহাক্না মখা তাখি‍। চাংয়েং হায়বসিনা পুন্সিগী মপুং ওইবা শরুক নত্তে হায়রদুনা, মহৈরোয়শিংগী মফমদা অসিগুম্বা ৱাখল্লোন চেলহনবনা ইমুং মনুং অমদি ওজাশিংদা থাজহনবদা মতেঙ ওইগনি হায়খি‍। প্রধান মন্ত্রীনা মহাক্কী ৱাফম শেংদোক্লদুনা, মহাক্না লাইরিক পাদনবা হায়বদি নত্তে; মহাক্না ফোঙদোক্নিংলিবদি ৱাখল লৌশিং হেক লৌশিনবা য়াবমখৈ লৌশিনবগী মরুওইবা ৱাফমদুনি হায়খি‍। চাংয়েংনা পুম্নমক নত্তে, ৱাখল লৌশিং অমদি চাংয়েং হায়বসি তোঙান তোঙানবা পোৎশক অনিনি হায়না মহাক্না ফোঙদোকখি‍।

অফবা ৱাখল্লোন থিদোকপা

মীয়াম্না মখোয়দা পীরকপা পাউতাক অদু করিগী হায়রক্লিবনো খন্দুনা হেক হেক লৌনিংদে অমদি মদুনা মখোয়দা লৈরিবা অশোয়বদু তাকই হায়না প্রধান মন্ত্রীনা হায়খি‍। অসিগুম্বা ৱাখল্লোন অসিনা অতোপ্পা মীওইশিংদা মতেঙ পাংবা ঙমহনদে‍। মদুগী মহুত্তা, ঈশৈ নীংথিনা শকপা নৎত্রগা মফি মরোল লু-নান্না শেৎপনচিংবা অতোপ্পা মীওইশিংদা চেল্লিবা অফবা মতিক ময়াইশিং খঙদোক্নবা, অমসুং অসিগুম্বা ফজবা, অফবা মতৌশিংগী মরমদা খন্ননবা পাউতাক পীখি‍। অসুম্না তৌবা অসিনা অশেংবা হৈনিংবা উত্তুনা থাজননা লোয়ননবা লম্বী শেম্মি‍। অতোপ্পা মীওইশিং পুন্না লাইরিক পামিন্ননবা কৌরগা মতেঙ পাংনবা ৱাফমসু মহাক্না থমখি‍। প্রধান মন্ত্রীনা ইবগী হৈনবী থম্বগী মরুওইবা ৱাফমসু ফোঙদোকখি‍। ইবগী হৈনবী থম্বা মীওইশিং অদুনা মখোয়দা ফাওরিবা ৱাখলশিং অদু মতিং লৈনা লোকশিনবা ঙমগনি হায়না মহাক্না ফোঙদোকখি‍।

নশাগী তোপ তোপ্পা মতৌ খঙদোকপা

অঙাং অমা পুক্নিং চঙবা ৱাৎপগীদমক মহৈ লোয়শঙদগী তান্থোক্কদৌরিবা অহমদবাদতা থোকখিবা অঙাং অমগী থৌদোক নীংশিংলদুনা, প্রধান মন্ত্রীনা হায়খিবদা, অঙাং অদু পুক্নিং চঙদ্রবসু তিঙ্করিং লেবতদি হৈথোই শিংথোইরম্মি অমদি রোবোতিক্স কম্পিতিসনশিংদা মনা ফংদুনা তোপ তোপ্পা মতিক উৎলম্মি‍। অঙাংশিংগী তোপ তোপ্পা হৈথোই শিংথোইবা অমদি মতিক খঙদোকপা অমদি মখোঙ শোম্বিবা হায়বসি ওজাগী থৌদাংনি হায়না প্রধান মন্ত্রীনা থমখি‍। প্রধান মন্ত্রীনা মশাগী মওং মতৌ নৈনবা অমদি লৈনরিবা মরী খঙনবা চাংয়েং অমগী মতাঙদা হৌদোকখি‍। মহাক্না অঙাংশিংদা মখোয়গী অঙাং ওইরিঙৈগী মমান্নবা ২৫-৩০ গী মমিং নীংশিংনবা অমদি মমা মপাগী মমিং য়াওনা মখোয়গী মপুং ফাবা মিং ইনবা ৱাফম থমখি‍। মসিনা ঐখোয়না নক্নবা মরুপ্নি হায়না খল্লিবা মীওইশিংদুগী মরমদা ঐখোয় য়াম্না কুপ্না খঙদে হায়বা তাক্কনি‍। প্রধান মন্ত্রীনা অঙাংশিংদা অতোপ্পা মীওইদা চেল্লিবা অফবা, ফজবা মচৎশিং খঙদোক্নবা অমদি মীওই অতৈদা অফবা মতিক থিদোকপগী হৈনবী শেমগৎনবা পুক্নিং থৌগৎখি‍। অসুম্না তৌবনা মীওই অমনা মপুং মরৈ ফারকপদা কান্নহনগনি হায়না মহাক্না ফোঙদোকখি‍।

নহাক্কী মতম, নহাক্কী পুন্সিবু খুদুম চল্লু

মতম শিন্দোক শিঞ্জিন তৌবগী মতাঙদা মহৈরোয় অমনা হংলকপা ৱাহংদা, শ্রী মোদীনা মীপুম খুদিংমক নোংমদা পুং ২৪ ফংই, অদুবু মীওই খরনা হেন্না মায় পাকপা ঙম্মি অদুগা খরনা করিগুম্বা অমত্তা ফংবা ঙমদে হায়খি‍। মহাক্না মতম শিন্দোক শিঞ্জিন তৌবগী মরুওইবা ৱাফম থম্লদুনা, মীওই কয়ানা মতম করম্না মতিং লৈনা শীজিন্নগনি হায়বা খঙদে হায়খি‍। প্রধান মন্ত্রীনা মতমবু লূম্না লৌনবা, অকক্নবা থবকশিং শিন্দোক্নবা, অমদি লৈরিবা খোঙজেল অদু নুমিৎ খুদিং য়েংশিন্নবা পাউতাক পীখি‍। মহাক্না খঙবদা ৱাবা সবজেক্তশিং নাথৈবগী মহুত্তা মদুদা হেন্না পুক্নিং চঙবগী মরুওইবা ৱাফমশিংসু থমখি‍। অহান্বদা লুনা থোক্লম্বা করম্না লৌখৎকনি অমদি মদু করম্না লাকশিনগনি হায়বগী খুদম অমা মহাক্না পীখি‍। অসিগুম্বা শিংনবশিং অসি অচেৎপা খোঙফম অমগা লোয়ননা থেংনবনা, পলশিং নমখায়বা অমদি মায় পাকপা ঙমগনি হায়খি‍। চাংয়েংগী মতমদা ৱাখল, ওইথোকপা য়াবা, অমদি ৱাহং কয়ানা পুক্নিং চঙহন্দবগী ৱাফমগী মতাঙদা হায়রদুনা, প্রধান মন্ত্রীনা মহৈরোয়শিংনা মখোয় মশাবু হেক হেক মশক খঙজদে অমদি মরূপ মপাংশিংগা ৱারী শানদুনা লাইরিক পাদনবা পাম্বৈ থিরকই হায়খ‍ি‍। মখোয়না হেক হেক শীজিন্নবা পাম্বৈশিংগী মনুংদা য়াম্না চোকথবা নৎত্রগা হৈনিংবা পোক্তবনচিংবা য়াওরি হায়খি‍। ফোন য়াওনা অসিগুম্বা পুক্নিং থৈদোক্নবা মচাকশিং অসিনা পুক্নিং চঙবা ৱাৎহল্লি অমদি একাদমিক পর্ফোর্মেন্স হন্থরকই হায়না প্রধান মন্ত্রীনা ফোঙদোকখ‍ি‍।

মীৎকুপ অসিদা হিংবা

খ্বায়দগী মমল য়াম্বা পোৎশক অমা হায়রগদি হৌজিক ওইরিবা মীৎকুপ অদুবুনি হায়না প্রধান মন্ত্রীনা ফোঙদোকখি‍। মীৎকুপ অসি হৌখ্রবদি অদুমক চৎখ্রগদবনি, অদুবু মদুদা মপুং ফানা কান্নবা লৌহৌরগদি, মদুনা পুন্সিগী শরুক অমা ওইগদৌরিবনি‍। ৱাখল খনবা অমদি লিরি হুম্বা মালংগুম্বা মীৎকুপ অদুদা থোক্লিবা ওইরিবশিং লৌশিনবগী মরুওইবা ৱাফমশিং মহাক্না থমখি‍।

তাথোক তাশিন তৌবগী মতিকয়

মহৈ মশিং তম্বগী শিন-লাংবদা থোক্লকপা পুক্নিং লাংতক্নবা অমদি পুক্নিং হন্থবা লাকশিন্নবগী মতাঙদা, শ্রী মোদীনা পুক্নিং হন্থবগী ৱাফম অসি ইমুং অদুগা মরী শম্নরক্তবা ইথিল অমদগী হেক হেক হৌরকই অমদি মদুনা তপ্না তপ্না খুন্নাইগা ওৎন-তিন্নবদগী লাপথোকহল্লকই‍ হায়খি‍। পুক্নিংদা লৈবা তৌফম খঙদবা ৱাফমশিংনা ফুনগৎলক্তনবা অরোৎপা লৈতনা ফোঙদোকপগী মরুওইবা ৱাফম মহাক্না থমখি‍। মহৌশানা লৈরকপা ইমুং মনুংগী মওং মতৌনা ইমুংদুগী মীওইশিংনা মখোয়দা ফুনগত্তুনা লৈরিবা ৱাফমশিং মনিং তম্না ফোঙদোক্নবা লম্বী অমা পীদুনা পুক্নিং ৱাখল ফুনগৎহন্দে হায়না প্রধান মন্ত্রীনা হায়খি‍। মহাক্কী ওজানা মহাক্কী খুৎই ফজহন্নবা কন্না হোৎনখিবদুনা মাগী থম্মোয়দা অচেৎপা মমি অমা তাহনখিববু নীংশিংলদুনা, তাকপি তম্বিরিবশিংদগী তশেং তশেংনা শেন্নজবগী মতৌনা পীরিবা ইথিলগী মতাঙদা মহাক্না ফোঙদোকখি‍। অসুম্না চেকশিন্না শেন্নবিবা অমদি পুক্নিং চঙবিবা অসিনা মহৈরোয় অমগী ফীভম ফগৎহনবা অমদি একাদমিক পর্ফোর্মেন্স হেনগৎহনবদা চাউনা ইথিল পীগনি হায়না প্রধান মন্ত্রীনা ফোঙদোকখি‍।

নখোয়গী পামজবদু তান্নৌ

শ্রী মোদীনা মমা মপা ওইবশিংনা অঙাংশিংদা অকক্নবা শিনফম অমা খন্নবা পীবা শাফুগী মতাঙদা ৱা ঙাংখি‍। মমা মপাশিংনা পীরিবা শাফু অসি অয়াম্বা মতমদা মখোয়গী অঙাংশিংগা অতোপ্পগা চাংদম্নবদগী থোরকই, মসিনা মখোয়গী ইহুল অমদি খুন্নাইদা লৈরিবা থাক্তা শোকহল্লি‍। মহাক্না মমা মপা ওইবশিংগী মফমদা মখোয়গী অঙাংশিংবা মফম খুদিং ফিদম্নিংঙাই ওইবা মীশক অমগুম উত্থোক্তনবা, মদুগী মহুত্তা মখোয়বু নুংশিবিনবা অমদি মখোয়দা লৈরিবা মতিক অদুবু লৌশিন্নবা পাউতাক পীখি‍। মহাক্না মমাঙদা পীখিবা খুদম, রোবোতিক্সতা হৈথোই শিংথোইবা অঙাং অমা মহৈ লোইশঙদগী তান্থোক্কদবা খজিক্তং ৱাৎলম্বগী মতাঙদাআ পল্লদুনা, অঙাঙ খুদিংদা তোপ তোপ্পা হৈ-শিংবা অমমম লৈ হায়খি‍। মহাক্না ক্রিকেত লিজেন্দ সচিন তেন্দুলকরগী খুদমসু পীখি‍। প্রধান মন্ত্রীনা মমা মপাশিংদা মখোয়গী অঙাংশিংনা মহৈ মশিংদা হন্থরক্লবসু, মখোয়গী মতিক খঙদোক্নবা অমদি মখোঙ শোম্বিনবা পুক্নিং থৌগৎখি‍। মহাক্না স্কিল দিভেলপমেন্তকী মরুওইবা ৱাফম থম্লদুনা, করিগুম্বা মহাক প্রধান মন্ত্রী ওইরমদ্রবদি স্কিল দিভেলপমেন্ত দিপার্তমেন্ত খল্লমগনি হায়খি‍। অঙাংশিংগী তৌবা ঙম্বশিংদা পুক্নিং চঙবিবনা, মমা মপা ওইবশিংনা পীবা শাফু হন্থহনগনি অমদি মখোয়বু মকা ফন্না মাঙদা চঙশিনহন্বদা মতেঙ ওইগনি‍।

পোজ, রিফ্লেক্ত, রিসেত

প্রধান মন্ত্রীনা তোঙান তোঙানবা মখলগী খোঞ্জেলশিং মীৎয়েঙ চঙবনা পুক্নিং চঙবদা কমদৌনা মতেঙ পাংই হায়বগী খুদম পীখি‍। প্রনায়মগুম্বা নীংশা শাজেলশিং তৌবনা তোঙানবা মখলগী তিং হাপ্তুনা পুক্নিং লাংতক্নবা লাকশিনবদা মতেঙ পাংই হায়খি‍। প্রধান মন্ত্রীনা মীৎকুপ খরদা হকচাঙবু লাকশিনবা ঙম্বা নাতোন মখুলদা নীংশা চাং নাইনা হোনবগী পাম্বৈ অমা পীখি‍। হীরি কোনবা অমদি নীংশা শান্নবনা কমদৌনা পুক্নিং ৱাবা হন্থহল্লি অমদি পুক্নিং চঙবা ঙমহল্লি হায়বগী মতাঙদা মহাক্না ফোঙদোকখি‍।

নখোয়গী মতিং ফুদোকপা, পান্দম ফংবা

পুক্নিং ৱাখল ফনা খনবা অমদি অপীকপা মায় পাকপশিংদা নুংঙাইবা লৌবগী মতাঙদা পল্লদুনা, শ্রী মোদীনা করিগুমবা মতমদা মীওই অমনা মশাগী ৱাখল নৎত্রগা অতোপ্পগী ইথিলনা মরম ওইরগা ফত্তবা ৱাখল খল্লকপা য়াওই হায়খি‍। ক্লাস ১০ দা ৯৫% গী পান্দম থম্লগা ৯৩% ফংলকখিবা মহৈরোয় অমগা ৱারী শারদুনা, প্রধান মন্ত্রীনা মদু মায় পাকপা অমনি হায়না লৌদুনা মহৈরোয় অদুগী মফমদা অৱাংবা পান্দম থম্বগীদমক থাগৎখি‍। পান্দম অমা হায়বসি ৱাখল চাউবা ওইগদবনি অদুগা ফংবা ঙমগদবসু ওইগদবনি‍ হায়খি‍। শ্রী মোদীনা ফংবা ঙম্লিবশিংবু অফবা মীৎয়েঙদগী য়েংনবা, মীওই অমগী মতিক খঙনবা, অমদি পান্দম অদু নক্না য়ৌনবা হোৎনখিবা অদুবু শকখঙনবা পুক্নিং থৌগৎখি‍।

অঙাং খুদিংমক তোপ তোপই

চাংয়েং মনুংদা মশা ফনা থম্বগী মতাঙদা ৱা ঙাংলদুনা, প্রধান মন্ত্রীনা হীরমসিগী মতাঙদা মরুওইবা থৌদাং অসি মহৈরোয়দুদা লৈতে মাগী ইমুং মনুংদা লৈ হায়খি‍। মমা মপা কয়ানা মখোয়গী অঙাংশিংদা, অঙাংদুনা কলাগী লমদা পামজরবসু, ইঞ্জিনিয়রিং নৎত্রগা মেদিসিনগুম্বা অকক্নবা করিয়র অমদা ইন্নবা হোৎনৈ‍। অসুম্না লেপ্পা লৈতনা শাফু পীবনা অঙাং অদু পুক্নিং ৱাবা পুন্সি অমদা হিংহল্লি‍। মহাক্না মমা মপাশিংগী মফমদা মখোয়গী অঙাংশিংগী তৌবা ঙম্বা অমদি পামজবা হীরম খঙদোকপিনবা অমসুং মমুৎ তানা খঙনবা, মখোয়গী খোঙজেল শেন্নবা, অমদি ঙাক্লৌ পীবিনবা ৱাফম থমখি‍। খুদম ওইনা করিগুম্বা অঙাং অমনা শান্ন-খোৎনবদা পাম্লবূদি, মমা মপাশিংদুনা মহাকপু শান্ন-খোৎনবগী থৌরমশিং য়েংবা পুবিদুনা মখোয়গী পুক্নিং থৌগৎপিবা তাই‍। প্রধান মন্ত্রীনা ওজাশিংগী মফমদসু মকোক থোংবা মহৈরোয়শিংখক্তদা পুক্নিং চঙলগা অতৈবু নাথৈবিবগী ফীভম অমা লৈহন্দনবা ৱাফম থমখি‍। মহাক্না মহৈরোয়শিং চাংদম্নবিদবা অমদি অঙাং খুদিংগী তোপ তোপ্পা তৌবা ঙম্বশিংবু পুক্নিং থৌগৎপিবগী মরুওইবা ৱাফমশিং থমখি‍। মহাক্না মহৈরোয়শিংগী মফমদা হেন্না ফগৎনবা অমদি নীংথিনা তৌথোরক্নবা হোৎনৌ, অদুগা লাইরিক লাইশু হায়বসিনা পুন্সিগী হীরম খুদিং নত্তে হায়বসু খঙজিন্নবা নীংশিংখি‍।

মশাবু-থৌগৎচবা

মশাবু থৌগৎচবগী মতাঙদা, প্রধান মন্ত্রীনা মশাবু কৈদৌঙৈদা ময়ামদগী তোখাইনা থম্লোইদবনি হায়বগা লোয়ননা ইমুং মনুং অমদি মথক থোংবশিংদা ৱাখলদা ফাওরকপশিং পাউদম্বা অমদি মখোয়দগী থৌগৎ ৱাহৈ লৌবগী মরুওইবা ৱাফমশিং থমখি‍। মশাবু, কিলোমিতর ১০ সাইকল থৌবনচিংবা অপীক-অপীকপা পান্দমশিং থমদুনা মশাবু থাজবা হেনগৎহন্নবা অমদি পান্দম অদু ফংবা ঙম্বগী মহাও লৌনবা পাউতাক পীখি‍। অসিগুম্বা মশাদা তৌজবা অপীকপা চাংয়েংশিং অসিনা মশাগী মতিং ফুদোকচবা ঙমদদবু লান্থোকপদা অমদি হৌখিববু মাঙলমচত্তা থম্লম্লগা হৌজিক হায়বসিদা হিংবদা মতেঙ পাংই হায়না শ্রী মোদীনা হায়খি‍। প্রধান মন্ত্রীনা মহাক্না মীয়ামদগী – ভারত মচা করোর ১৪০ দগী পুক্নিং থৌগৎনফম ওইরিবনি হায়খি‍। মহাক্না “পরিক্সা পে চর্চা” ইবা মতমদা, অজয়গুম্বা মীওইশিংনা মখোয়গী খুঙ্গংদা মখোয়গী শৈরেংশিংগী খুত্থাঙদা অওনবা পুরকই হায়খি‍। মসিনা মহাকপু অসিগুম্বা থবকশিং মখা তানা তৌনিংবা ফাওহল্লি, মরমদি মদুদগী পুক্নিং থৌগৎনবগী মচাক কয়া ফংই‍। ৱাফমশিং অদু ইশাদা অদুমক থমজিনবগীম তাঙদা হংলকপদা, শ্রী মোদীনা ইচম চম্না ঙন্না হৌগৎনবা হায়বগুম্বা পাউতাক্কী মরমদা খনবখক্তনদি থবক ওইনা তৌদনদি মপুং ফারোই হায়খি‍। তমশিল্লিবা পরমশিং থবক ওইনা তৌদুনা শীজিন্নবা অমদি মশাদা চাংয়েং তৌদুনা মশাবু হেন্না মশক থোকহনবগী মরুওইবা ৱাফমশিং মহাক্না ফোঙদোকখি‍। মশাবু লেবোরেতরী অমা ওইহন্দুনা অমদি হায়রিবা পরমশিং অসি চাংয়েং তৌগদুনা, মীওই অমনা তশেংনা লৌশিনবা অমদি মদুদগী কান্নবা লৌবা ঙমগনি হায়না প্রধান মন্ত্রীনা হায়খি‍। মী অয়াম্বনা মশাগা চাংদম্নবগী মহুত্তা অতৈগা চাংদম্নৈ, মখোয় মশাবু মখোয়দগী হন্থবা মীওইশিংগা হেক হেক চাংদম্নদুনা নীংবা থুংদবা পুরকই‍ হায়না শ্রী মোদীনা হায়খি‍। মশাগা হিদান্নবনা খোঙফম হন্দবা থাজবা পুরকই, অদুগা মশাগা অতৈগা চাংদম্নবনা পুক্নিং হন্থহল্লকই হায়না মহাক্না ফোঙদোকখি‍।

মায়থিবনা থৌদুনা চৎপা

মায়থিববু কমদৌনা লাকশিনগনি হায়বগী মতাঙদা, শ্রী মোদীনা মহৈরোয় ৩০-৪০% ফাওবনা ক্লাস ১০ নৎত্রগা ১২ তা মায় পাকত্রবসু, মখোয়গী পুন্সি মদুদা লোইদে‍। পুন্সিদা মায় পাকপদুরা নৎত্রগা লাইরিক তম্বদা মায় পাকপদুরা পাম্লিবসে হায়বসিগী মতাঙদা ফিরেপ লৌবগী মরুওইবা ৱাফম মহাক্না ফোঙদোকখি‍। মীওই অমা ওইনা মায়থিবনা ওজা ওইহন্দুনা পাউতাক পীরদুনা শান্নরোয়শিংনা মখোয়গী অশোয়বা নৈনবা অমদি হেন্না ফগৎহন্নবা হোৎনরিবা ক্রিকেত মশান্নবু খুদম ওইনা পনখি‍। প্রধান মন্ত্রীনা মহৈরোয়শিংদা পুন্সিবু মপুং ফাননা য়েংনবা, চাংয়েংগী অখুবা মীৎয়েঙখক্তদগী য়েংদনবা ৱাফম থমখি‍। মীমান্নদ্রবা মীওইশিংদা তত্তনা তোপ তোপ্পা মতিক য়াওবা থেংনৈ হায়রদুনা মীপুম খুদিংদা তোপ তোপ্পা মতিক ময়াই য়াওই হায়না মহাক্না হায়খি‍। একাদমিক ওইবা মায় পাকপশিংখক্তদা পুক্নিং চঙবগী মহুত্তা অসিগুম্বা মতিকশিংদসু থবক তৌবগী মরুওইবা ৱাফম মহাক্না থমখি‍। মমৈথংদদি মীওই অমগী পুন্সি অমদি তৌবা ঙম্বশিংদুননি মায় পাকপা পুরক্কদৌরিবসি, শুপ্নতগী লাইরিক তম্বদা ফংখিবা মার্কতুনা নত্তে হায়না মহাক্না হায়খি‍।

তেক খঙজিনবা

তেক্নোলোজী পাক শন্না শন্দোরক্লবা অমদি মসিগী ইথিল য়াম্না লৈরবা মতমসিদা ঐখোয় পুম্নমক য়াম্না লাইবক ফরবনি হায়রদুনা, প্রধান মন্ত্রীনা তেক্নোলোজীদগী নাথৈদুনা লৈবগী মথৌ তাদে, মদুগী মহুত্তা, মীয়াম্না কান্নরোইদবা থবক থৌওংশিং তৌদুনা মতম লেল্লিবরা নৎত্রগা মখোয়না পাম্বা হীরমদুদা অহেন্বা খঙনবা থিরিবরা হায়বসি লেপথোক্কদবনি হায়খি‍। অসুম্না তৌবনা, তেক্নোলোজীনা মাঙহন তাকহন্নবা শাফু ওইবগী মহুত্তা পাঙ্গল ওইগদৌরিবনি‍। রিছর্চর অমদি ইনোভেতরশিংনা তেক্নোলোজী অসি খুন্নাইগী য়াইফনবগীদমক পুথোরক্লিবনি হায়না শ্রী মোদীনা ফোঙদোকখি‍। মহাক্না মীয়ামদা তেক্নোলোজীগী মরমদা খঙননবা অমদি খ্বায়দগী ফবা মওংদা শীজিন্নবা ৱাফম থমখি‍।

কনাগুম্বা মীওই অমনা থবক অমা লোইশিন্নবা কমদৌনা মহাক্কী খ্বায়দগী ফবা মওংদা হোৎনগনি হায়না হংলকপদা, শ্রী মোদীনা লেপ্পা লৈতনা ফীভম ফগৎহনবগী মরুওইবা ৱাফমশিং থম্লগা মীওই অমনা মহাক্কী খ্বায়দগী মওংদা হোৎননবা ইহান হানবা থৌওংদি ঙরাং লৈখিবদুদগী হেন্না ফগৎহন্নবা হোৎনবনি হায়খি‍।

কমদৌনা নখোয়গী অহল লমনবু থাজহনগনি?

ইমুংগী পাউতাক ইনগদ্রা নৎত্রগা মশাগী অপাম্বদা চৎকদ্রা হায়বসিগী মরক্তা অমা খন্বদা চমম্নবা লৈবগীম তাঙদা, শ্রী মোদীনা ইমুংগী ৱাফমশিং লৌশিনবা অমদি মদুগী তুংদা মখোয়গী পাউতাক অদু করম্না থবক ওইনা পাঙথোক্কনি হংবা অমসুং মখোয়গী মতেঙ লৌবগী মরুওইবা ৱাফমশিং থমখি‍। তশেংনা হৈনিংবা উত্তুনা অমদি ইকায়খুম্নবগা লোয়ননা অতোপ্পা লম্বীশিং খন্নবনা, ইমুং মনুংদা তপ্না তপ্না ৱাখল তারক্তুনা মীওই অমগী অনিংবা অপামবদা ঙাক্লৌ পীরক্কনি হায়খি‍।

চাংয়েংগী শাফু মায়োক্নবা

চাংয়েংগী চে মতম চানা ইবা লোইশিনবা ঙমদদুনা পুক্নিং ৱাবা অমদি শাফু অমা লৈবা হায়রিবা মহৈরোয়শিংগী মান্নবা ৱাফমগী মতাঙদা পল্লদুনা, প্রধান মন্ত্রীনা চপ চাবা পাউখুম করম্না পীগনি অমদি মতম নীংথিনা শিন্দোক্কনি হায়বা খঙননবা হান্নগী চাংয়েংগী ৱাহংশিং শীজিন্নদুনা মপুং ফানা হোৎনহৌনবা পাউতাক পীখি‍। হেন্না কন্না হোৎনবা চঙবা ৱাহংশিংদা পুক্নিং চঙবা অমদি খুম্বদা ৱাগদবা নৎত্রগা লুনা থোক্কদবা ৱাহংশিংদা মতম য়াম্না মাঙহন্দবগী মরুওইবা ৱাফমশিং মহাক্না ফোঙদোকখি‍। চাং নাইনা হোনবনা চাংয়েং মনুংদা মতম শিন্দোকপদা মতেঙ ওইগনি হায়না মহাক্না ফোঙদোকখি‍।

মহৌশাবু শেন্নবা

প্রধান মন্ত্রীনা অইং-অশাগী খল হোংলকপগী মতাঙদা পল্লদুনা নহা মীরোলবু মসিগী মরমদা পুক্নিং ৱাজবগীদমক থাগৎখি‍। মালেমসিদা পায়খৎলিবা চাওখৎ থৌরাংগী থবক অয়ামবনা মহৌশাবু নৈহত্তুনা শীজিন্নবরোমদা চঙশিল্লক্তুনা মীয়াম্না অকোয়বগী ফীভম ঙাক শেনবদগী মশাগী কান্নবদনা হেন্না মরুওইনা লৌনরক‍ই হায়খি‍। শ্রী মোদীনা মহৌশাবু ঙাক শেন্দুনা শেমগৎপিবা পুন্সি মহিং অমবু প্রমোত তৌরিবা মিসন LIFE (লাইফস্তাইল ফোর এনভাইরনমেন্ত) গী মতাঙদা পনখি‍। মালেম ইমাগী মফমদা খুরুমজবা, অমদি উ-ৱা অমসুং পাৎ তুরেল লাৎচবনচিংবা মহৌশাবু ইকায়খুম্নবা উৎলিবা ভারতকী নাৎকী থৌওংশিংগী মতাঙদা মহাক্না ফোঙদোকখি‍। মীয়ামদা মখোয়গী মমাশিংগী মিংদা উ চারা থানবা পুক্নিং থৌগৎলিবা “এক পের মা কে নাম” হায়রিবা কেম্পেন অসিগী মতাঙদসু মহাক্না ফোঙদোকখি‍। থৌশিল অসিনা পুক্নিং লুপশিনবা অমদি মশাগী ওইনা খল্লকপগী ইহুল অমা ফাওহন্দুনা মহৌশা লাইরেম্বীবু ঙাক্তুনা থম্নিংবা ফাওহল্লি‍।

মশাগী অশংবা লাইরম্লেন শেমগৎপা

শ্রী মোদীনা মহৈরোয়শিংদা মখোয় মশাগী উ চারাশিং থাজনবা পুক্নিং থৌগৎকি অমদি ঈশিং চাইবগী তৌবা য়াবা মওং মতৌশিং তাকখি‍। মহাক্না উ পাম্বী অদুগী নাকলদা ঈশিং পুন অমা থম্নবা অমদি পুন অদু থা খুদিংগী অমুরক্তি ঈশিং হাপ্নবা পাউতাক পীখি‍। থৌওং অসিনা উ পাম্বী অদুনা ঈশিং য়াম্না শীজিন্নদনা থুনা চাউখৎহন্বদা মতেং পাংই‍। প্রধান মন্ত্রীনা মীপুম খুদিংমক্কী মফমদা নুংঙাইবা ফোঙদোকখি অমদি থৌরমদুদা শরুক য়াবগীদমক থাগৎপা ফোঙদোকখি‍।

***