ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙরাং (জানুৱারী 24, 2025) লোক কল্যান মার্গতা লৈবা মহাক্কী ময়ুমদা লাক্কদৌরিবা রিপব্লিক দে পরেদতা শরুক য়াগদৌরিবা NCC কেদেৎশিং, NSS ভোল্যুন্তিয়রশিং, ত্রাইবেল মীথুংলেনশিং অমসুং তাব্লোক্স আর্তিস্তশিংগা ৱারী শানখ্রে। ৱারী শানবদা শরুক য়ারিবা কয়া অমনা প্রধান মন্ত্রীগা হকথেংননা উনবদা নুংঙাইবা ফোংদোকখি, মসিগী পাইখুমদা প্রধান মন্ত্রীনা হায়খি মদুদি “মসিনা ভারতকী দেমোক্রেসীগী মপাঙ্গল উৎলি।”

বিহারগী মুঙ্গরদগী শরুক য়ারুবা মীওই অমগা ৱারী শানবদা, প্রধান মন্ত্রীনা মুঙ্গর অসি য়োগগীদমক মালেম পুম্বদা মমিং চৎলি অমসুং হৌজিক্তি মালেম পুম্বনা য়োগবু পাম্নরে হায়রদুনা মুঙ্গরগী লমদমদা ইকায় খুম্নবা উৎখি।

অতোপ্পা শরুক য়ারিবা অমনা হায়খি স্বচ্ছ ভারত মিসন অমসুং নেস্নেল হেল্থ মিসনগুম্বা খোংথাংশিংনা লৈবাক অসিগী চাউখৎপদা মতেং পাংবতা নত্তনা নহাশিংগীসু পুক্নিং চিংশিনখি। মহাক্না মখা তাখি মদুদি মীপুম খুদিংমক্না প্রধান মন্ত্রীদা য়োৎচাবীগুম্না চিংশিনখি অমসুং অসিগুম্বা মগুন লৈবা প্রধান মন্ত্রী অমা লৈবা অসি লৈবাক অসিগীদমক চাউথোকচনীংঙাইনি। শ্রী মোদীনা হায়খি মদুদি করিগুম্বা ভারত মচা করোর 140না লুনান্না থম্নবগীদমক ৱারেপ লৌরবদি ভারত অসি মতম পুম্নমক্তা স্বচ্ছ ওইদুনা লৈগনি।

ওরিশাগী অতোপ্পা শরুক য়ারিবা অমনা শ্রী মোদীদা মায় পাকপগী অশেংবা ৱাহন্থোক অদু হংখি। মদুগী পাউখুম ওইনা মহাক্না হায়খি মদুদি মীওই অমনা মায়থীরে হায়না কৈদৌনুংদা য়াজরোইদবনি। মহাক্না ফোংদোকখি মদুদি মায়থীবা য়াজবা মীওইশিংদি মায় পাকপা ঙমদে, অদুবু মদুদগী তমশিনবা মীওইশিংদি মায় পাকপা ঙম্মী। প্রধান মন্ত্রীনা অকনবা ৱাফম থমখি মদুদি মী অমনা মায় থীবদা কৈদৌঙৈদসু অকিবা থম্লোইদবনি, অদুবু মদুদগী তম্বগী ৱাখল্লোন লৈগদবনি অমসুং মায়থীবদগী তমশিনবা অসিনা মকোক য়ৌবা ঙমহনগনি।

শরুক য়ারিবা মীওই অমনা মহাকপু করম্না পুক্নিং থৌগৎপা অমসুং থৌনা লৈহনবগে হায়না হংবদা, প্রধান মন্ত্রীনা হায়খি, “নখোয়গুম্বা নহাশিংগা উন্নবা অসিনা ঐঙোন্দা থৌনা অমসুং ইথিল পীরি।” মহাক্না হায়খি মদুদি মহাক্না লৈবাক অসিগী লৌমীশিংগী মরমদা খল্লকপা মতমদা, মখোয়না পুং কয়া থবক তৌবগে হায়বদু মহাক্না খঙই। মহাক্না লান্মীশিংগী মরমদা খল্লকপা মতমদা, মখোয়না ঙমখৈদা ঙাকশেনবগীদমক পুং কয়া লেপ্লি হায়বদু মহাক্না খল্লকই। মীপুম খুদিংমক্না কন্না হোৎনরি হায়না প্রধান মন্ত্রীনা অকনবা ৱাফম থমখি, অমসুং ঐখোয়না মখোয়গুম্না হিংনবা হোৎনরবদি, ঐখোয়না পোত্থবগী হক লৈতে হায়না খল্লি। মহাক্না হায়খি মদুদি মখোয়না কত্থোকপগা লোয়ননা মখোয়গী থৌদাংশিং মপুং ফাহনবা অদুগুম্না লৈবাক অসিগী প্রজা করোর 140না থৌদাংশিং মপুং ফাহন্নবা থৌ মঙোন্দসু শিন্নরি।

ঙন্না হৌগৎপগী হৈনবীনা পুন্সিদা য়াম্না কান্নবা পী হায়না প্রধান মন্ত্রীনা ফোংদোকখি। মহাক্না মমাংদা NCC কেদেৎ অমা ওইখিবা অমসুং কেম্পশিংগী মনুংদা ঙন্না হৌগৎপগী হৈনবীনা মহাকপু দিসিপ্লিন তম্বদা মতেং পাংখি হায়না মহাক্না হায়খি। প্রধান মন্ত্রীনা হায়খি মদুদি ঙসিসু, ঙন্না হৌগৎপগী মহাক্কী হৈনবীগা লোয়ননা মালেম অসিনা হৌগৎলকপদা মহাক্না থবক কয়া অমা লোইশিনবা ঙমহল্লি। মহাক্না মীপুম খুদিংমকপু ঙন্না হৌগৎপগী হৈনবীবু ঙাক্না চৎনবা পুক্নিং থৌগৎখি, মরমদি মসিনা মখোয়দা য়াম্না কান্নগনি।

মমিং লৈরবা মীওইশিংদগী তমজবা য়াবা হীরমদা, প্রধান মন্ত্রীনা হায়খি মদুদি ঐখোয়না ছত্রপতি শিবাজী মহারাজ য়াওনা মীপুম খুদিংদগী তমজবা মথৌ তাই। মহাক্না মমাংঙৈগী শক্নাইরবা লুচিংবশিংদগী তমজবা অমসুং তম্বীরম্বা অদু ঙসি লৈবাক অসিগী সেবা তৌবদা শীজিন্নবগী মরুওইবা অদু পনখি।

রিপব্লিক দেগী থৌরমগী শেম-শারিঙৈদা মহাক্না অতোপ্পশিংদগী তমখিবশিং অদুগী মতাংদা প্রধান মন্ত্রীনা শরুক য়ারুবা মীওই অমবু হংখি। মদুগী পাউখুমদা মহাক্না হায়খি মদুদি মরুপ-মপাং ওইবগী মরী শেমগৎপা অমসুং তোঙান-তোঙানবা শরুক য়ারুবশিংগা ৱারী শাবা অমসুং পুন্না পুনশিন্দুনা অমত্তা ওইবা ভারত অমা শেম্বা অসিনি। মহাক্না মখা তারদুনা হায়খি মদুদি মসিনা মখল খুদিংমক্কী অহোংবা পুরকপগী মতাংদা ময়াম অমা তম্বীরম্মি। কাশ্মীরগী পন্দিৎ ইমুং অমগী নহা ওইরিবা শরুক য়ারিবা অমনা প্রোগ্রাম অসিদা য়াওবনা মহাকপু মশা-মরোমদোম লেপচবা ঙমহল্লে হায়না হায়রকপদা শ্রী মোদী নুংঙাইবা ফোংদোকখি। মহাক্না হায়খি মদুদি মমাংদা য়ুমগী থবকশিং করিগুম্বা অমত্তা তৌখিদবসু, মফম অসিদা মশাগী ওইবা মওংদা থবক খুদিংমক পাংথোকপা তম্লকপা অসি মশক থোকপা এক্সপরিয়েন্স অমনি। মহাক্না হায়খি মদুদি য়ুমদা হল্লক্লবা মতুংদা মহাক্না মহাক্কী মহৈ তম্বগা লোয়ননা য়ুমগী থবকশিংদা মহাক্কী মমাদা মতেং পাংগনি।

মফম অসিদা শরুক য়ারিবা নহা অমনা হায়খিবদা প্রধান মন্ত্রীনা থম্মোয় পেনখি মদুদি মফম অসিদা ঐখোয়না তম্বা খ্বাইদগী মরুওইবা পাউতাক অমা হায়রিবদি ইমুং অসি য়ুমদা ঐখোয়গা লোয়ননা লৈমিন্নরিবা মীওইশিং খক্তা নত্তে, মসিদা মফম অসিদা লৈরিবা মীওইশিং – মরুপশিং অমসুং অহল ওইরবা মীওইশিংসু য়াওরি। মখোয় পুম্নমক্না অচৌবা ইমুং অমা শেম্মি। শরুক য়ারিবা মীওই অদুনা হায়খি মদুদি মসি মতম পুম্নমক্তা নীংশিংদুনা লৈগদবা মমল য়াম্লবা পাউতাক অমনি। শ্রী মোদীনা হায়খি মদুদি “এক ভারত, শ্রেস্থ ভারত”গী ৱাখল্লোন অসি লৌশিনবা অসি মসিগী এক্সপরিয়েন্স অসিদগী য়াম্না মরু ওইবা তমশিনবা অমনি।

লাক্কদৌরিবা রিপব্লিক দে পেরেদতা সেলেক্সন ফংলবা নত্ত্রগা নন-সেলেক্সন অদুগী মতাংদা শ্রী মোদীনা শরুক য়ারিবশিংদা হংবদা, শরুক য়ারিবা অমনা হায়খি মদুদি খনগৎলকপা নৎত্রগা খনদবা অসি তোঙানবা ৱাফম অমনি, অদুবু হোৎনবা হায়বসি মশামক্না মশক থোকপা মায় পাকপা অমনি। শ্রী মোদীনা মখা তারদুনা হায়খি মদুদি খ্বাইদগী মরুওইবা ৱাফমদি আউৎকম ওইনীংবা ওইরবসু নহাক্কী খ্বাইদগী ফবা অদু তৌগদবনি।

মফম অসিদা থা অমা লৈখিবা শরুক য়ারিবশিংদা প্রধান মন্ত্রীনা হায়খি মদুদি তেক্নোলোজী অমসুং দিজিতেল ইন্দিয়ানা ঐখোয়বু ভিকসিৎ ভারতকী মায়কৈদা পুরক্লিবা অসিনা মরম ওইদুনা মখোয়না মখোয়গী মরুপ-মপাং অমসুং ইমুং-মনুংগা লোয়ননা ভিদিও কনফরেন্সকী খুত্থাংদা ৱারী শানবগী খুদোংচাবা ফংলি। মালেমগী লৈবাক খরখক্তদা দেতা অসি ভারতনা ফংলিবা অসিগুম্না শেল চংদনা ফংলি হায়না মহাক্না অকনবা ৱাফম থমখি। মসিনা মরম ওইদুনা, লৈবাক অসিগী খ্বাইদগী লায়রবা মীওইশিং ফাওবা ভিদিও কনফরেন্সকী খুত্থাংদা মখোয়গী নুংশিজবশিংগা নুংঙাইনা ৱারী শানবা ঙম্মি হায়না মহাক্না মখা তাখি। UPI অমসুং দিজিতেল পেমেন্ত কয়া য়াম্না শীজিন্নরিবগে হায়না প্রধান মন্ত্রী শ্রী নরেন্দ্র মোদীনা হংখি। অনৌবা মীরোলনা মখোয়গী পেকেৎতা শেল থাদবা চৎনদে হায়না মহাক্না ফোংদোকখি।

NCCদগী শরুক য়ারিবশিংনা মমাংদা ফংখিদ্রিবা কান্নরবা মগুনশিং অদুগী মতাংদা শ্রী মোদীনা হংবদা শরুক য়ারিবা মীওই অমনা মতম চানা পাংথোকপা, মতম মেনেজমেন্ত অমসুং লুচিংবা ওইবগী মগুনশিং অদুগী মতাংদা পাউখুম পীখি। অতোপ্পা শরুক য়ারিবা অমনা হায়খি মদুদি NCCদগী তম্লকপা খ্বাইদগী মরুওইবা পাউতাক অসি মীয়ামগী সেবা, হায়বদি ঈগী দোনেসন কেম্পশিং পাংথোকপা অমসুং অকোইবদা শেংদোকপা অসিনি। ভারত সরকারনা চলাইরিবা মাই ভারত নৎত্রগা মেরা য়ুভা ভারত প্লেৎফোর্মগী মতাংদা পল্লদুনা প্রধান মন্ত্রীনা হায়খি মদুদি নহা ওইরিবা নুপা অমসুং নুপী করোর অহুম হেন্না প্লেৎফোর্ম অসিদা রেজিস্তর তৌখ্রে। মহাক্না অকনবা ৱাফম থমখি মদুদি শরুক য়ারিবশিংনা চাউখৎলবা ভারতকী মতাংদা খন্ন-নৈনখিবা, ক্বিজ কম্পিতিসনশিং, এসে রাইতিং অমসুং ৱা ঙাংবগী কম্পিতিসনশিং য়াওনা মশক থোকপা থৌদাংশিং লৌখি। লৈবাক শিনবা থুংনা চাউরাক্না মীওই লাখ 30না থবকশিং অসিদা শরুক য়াখি হায়না মহাক্না ফোংদোকখি। শ্রী মোদীনা শরুক য়ারিবশিংদা মাই ভারত পোর্তেলদা অথুবা মতমদা রেজিস্তর তৌনবা হায়খি।

2047 ফাওবদা ভারতপু চাউখৎলবা লৈবাক অমা (ভিক্সিৎ ভারত) ওইহন্নবা ভারত অমসুং ভারত মচাশিংনা থম্লিবা পান্দম অদুদা ৱা ঙাংলদুনা প্রধান মন্ত্রীনা হায়খি মদুদি করিগুম্বা লৈবাক অসিগী নাগরিক কোতি 140না পোজিতিব ওইবা থবক অমা তৌনবা ৱারেপ লৌরবদি, পান্দম অসি ফংবদা অৱাবা লৈরোই। মহাক্না অকনবা ৱাফম থমখি, “ঐখোয়গী থৌদাংশিং অসি পাংথোক্তুনা, ঐখোয়না চাউখৎলবা ভারত অমা শেমগৎপদা মরুওইবা শক্তম অমা ওইহনবা ঙমগনি।”

শরুক য়ারিবশিংদা ঐখোয় মরক্তগী কনানা ঐখোয়গী ইমাশিংবু য়াম্না নুংশিজবগে অমসুং কনানা ইমা পৃথীবিবু য়াম্না নুংশিজবগে হায়না হংদুনা শ্রী মোদীনা হায়খি মদুদি “এক পের মা কে নাম” প্রোগ্রাম অসিনা ঐখোয়গী ইমাশিং অমসুং মা পৃথীবি অনিমক্কী মফমদা ইকায় খুম্নবা উৎলি। মহাক্না মীপুম খুদিংমক্তা মখোয়গী মইমাগী মিংদা পাম্বী অমা থাবা অমসুং মদু কৈদৌঙৈদসু কংহন্দনবা হায়খি। মহাক্না মখা তাখি মদুদি থৌওং অসিগী অহানবা বেনেফিসরী অসি ইমা পৃথীবি ওইগনি।

অরুনাচল প্রদেশকী শরুক য়ারিবা মীওই অমগা ৱারী শানবদা, শ্রী মোদীনা অরুনাচল প্রদেশকী অখন্নবা মশক মওং অদু হায়খি মদুদি মসিনা ভারত্তা নুমিৎকী অহানবা মঙাল ফংলি। মহাক্না অরুনাচল প্রদেশতা মীয়াম্না ‘রাম রাম’ নৎত্রগা ‘নমস্তে’ হায়বগী মহুত্তা ‘জয় হিন্দ’ হায়দুনা ইকায় খুম্নবা উৎলি হায়না পনখি। প্রধান মন্ত্রীনা অরুনাচল প্রদেশকী মখল-মখা কয়াগী মশক, কলা, মহৌশাগী ফজবা অমসুং মীয়ামগী নুংশিবা অদু থেংননবা মীপুম খুদিংমকপু পুক্নিং থৌগৎখি। মিজোরাম, মনিপুর, নাগালেন্দ, সিক্কিম, ত্রিপুরা, অসাম অমসুং মেঘালয়া য়াওনা অষ্টলক্ষ্মীগী মফম পুম্নমক চৎপীনবা মহাক্না মীয়ামদা হায়খি। মফম অসিদা য়েংবা য়াবা কয়া লৈবনা থা অনি নৎত্রগা অহুম ফাওবা চংদবা য়াই হায়না মহাক্না হায়খি।

প্রধান মন্ত্রীনা শরুক য়ারিবশিংদা NSS তীমগা থবক তৌমিন্নরিঙৈদা য়ুনিত অসিনা মখোয়গী মফমদা পাক শন্না শকখঙনখিবা থবক অমা লৈব্রা হায়না হংখি। ঝারখন্দদগী শরুক য়ারিবা মীওই অমনা মহাক্কী এক্সপরিয়েন্স অদু য়েংদুনা হায়খি মদুদি মশক থোকপা থবক অমা হায়রগদি বেম্বুগী পোৎলমশিং শাবদা মমিং চৎপা দুমকাদা লৈবা মাহিরি কম্ম্যুনিতীদা মতেং পাংবনি। মহাক্না মখা তাখি মদুদি মখোয়গী পোত্থোকশিং অসি মতমগী মতুং ইন্না য়োনবদগী কম্ম্যুনিতী অসিনা অৱাবা কয়া মায়োক্নখি। মহাক্না হায়খি মদুদি য়ুনিৎ অসিনা অসিগুম্বা আর্তিসানশিংবু মশক খঙদোকখি অমসুং মখোয়বু ধুপশিং (অগরবতী) পুথোক্লিবা ফেক্তরীশিংগা শম্নহনখি। প্রধান মন্ত্রীনা হায়খি মদুদি ত্রিপুরাগী আগরতলাদা লৈরিবা উমংশিং অসিনা অখন্নবা অমসুং নুংঙাইরবা মগুন লৈবগীদমক খঙনরিবা আগর উগী পোত্থোক পুথোকই। মহাক্না হায়খি মদুদি হায়রিবা উশিং অসিদগী লৌথোকপা ওইল অসি য়াম্না মমল য়াম্বা অমসুং মালেমদা খ্বাইদগী মমল য়াম্বা ওইলশিংগী মরক্তা অমনি। মহাক্না মখা তাখি মদুদি আগরগী মগুন লৈরবা অওনবা অসিনা মসিগী অওনবা অসিগা লোয়ননা ধুপশিং (অগরবতী) শেম্বগী চৎনবী লৈহল্লে।

শ্রী মোদীনা সরকারগী GeM (গবর্নমেন্ত ই-মার্কেৎ প্লেস) পোর্তেলগী মতাংদা পনখি। পোর্তেল অসিদা মখোয়গী পোত্থোকশিং রেজিস্তর তৌনবা লোকেল আর্তিসানশিং অমসুং প্রদ্যুসরশিংদা মতেং পাংনবা মহাক্না মহৈ-মশিং তম্লবা নহারোলশিংদা পুক্নিং থৌগৎখি। পোৎথোকশিং অমসুং মমলশিং লিস্ত তৌদুনা, সরকারনা পোৎলমশিং অদুগীদমক ওর্দরশিং থম্বা য়াবগী ওইথোকপা লৈ হায়না প্রধান মন্ত্রীনা ফোংদোকখি। মসিনা ত্রাঞ্জেক্সনশিং অথুবা মতমদা পাংথোকপা ঙমগনি।  মহাক্না খুঙ্গংগী সেল্ফ হেল্প গ্রুপ (SHG) শিংদগী নুপী করোর 3বু “লক্ষপতি দিদি” ওইহন্নবা মহাক্কী মঙলান অদু ফোংদোকখি অমসুং মখোয়গী মশিং অসি হান্ননা করোর 1.3 য়ৌখ্রে হায়না পনখি। শরুক য়ারিবা মীওই অমনা হায়খি মদুদি মহাক্কী মমানা ফী তাইবা তমখি, অমসুং হৌজিক্না নভরাত্রীগী মতমদা হাপ্লিবা ত্রেদিস্নেল চানিয়াশিং শেৎলি। মহাক্না মখা তাখি মদুদি চানিয়াশিং অসি মপান্দগীসু পুশিল্লকখি। মহাক্না হায়খি মদুদি মসিনা ইথিল পীবা খুদম অমা ওইরি অমসুং “লাখপতি দিদি” প্রোগ্রাম অসিনা চাউখৎলবা ভারত অমা শেমগৎপদা মরুওইবা থৌদাং অমা লৌবা ঙমগনি।

প্রধান মন্ত্রীনা নেপালদগী শরুক য়ারিবা মীওই অমনা ভারত্তা লাক্নবা অমসুং মহাক্কা উননবা হোৎনবদা অপেনবা ফোংদোকখিবা অদুদা নুংঙাইবা ফোংদোকখি। মহাক্না প্রধান মন্ত্রীবু মহাক্কী মফমদা পীরকখিবা মপুং ফাবা হোস্পিতালগীদমক থাগৎপা ফোংদোকখি। মোরিসিয়সতগী শরুক য়ারিবা অতোপ্পা মীওই অমনা হায়খি মদুদি মখোয়না চৎখিগদবনী নুমিৎকী মমাংদা, মোরিসিয়সতা ভারতকী হায় কম্মিস্নরনা মখোয়গা উনখি অমসুং মখোয়বু “অহানবা ময়ুম” ওইনা ইদুনা ভারত্তা চৎনবা পুক্নিং থৌগৎখি। প্রধান মন্ত্রীনা অকনবা ৱাফম থমখি মদুদি ভারত অসি মখোয়গী অনিশুবা য়ুম ওইবতা নত্তনা মখোয়গী মমা-মপাশিংগী অহানবা য়ুমসু ওইরি।

কেন্দ্রগী ঙাকশেল মন্ত্রী, শ্রী রাজনাথ সিংহ, কেন্দ্রগী য়ুথ এফিয়র্স এন্দ স্পোর্তস অমসুং লেবর অমসুং ইমপ্লোইমেন্ত মন্ত্রী, দা. মনসুখ মান্দাবিয়া অমসুং অতৈ মকোক থোংবা মীওইশিংসু থৌরম অদুদা শরুক য়াখি।

***