ভারতকী প্রধানমন্ত্রী

ঙসি ওরিসাগী ভুবনেশ্বরদা প্রধান মন্ত্রী শ্রী নরেন্দ্র মোদীনা ১৮শুবা প্রাভাসি ভারতিয় দিবস কনভেন্সন হৌদোকখ্রে। মালেমগী তোঙান-তোঙানবা মফমশিংদগী লাকপা দেলিগেদশিং অমসুং মপান্দা লৈবাক্তা খুন্দাদুনা লৈখ্রবা ভারতমচাশিং তরাম্না ওক্লদুনা, প্রধান মন্ত্রীনা হায়খি হৌদোকপগী ঈশৈ অসি তুংদা মালেমদা শীনবা থুংনা পাংথোকপা মপান লৈবাকশিংদা লৈখ্রবা ভারতমচাশিংগী থৌরমশিংদা শক্কনি। মপান লৈবাকশিংদা লৈখ্রবা ভারতমচাশিংগী পুক্নিং হুমহৎখিবা অঙকপা ঈশৈগীদমক গ্রাম্মি এৱার্দ ফংলবা কলাকার রিক্কি কেজ অমসুং মহাক্কী কাংবু প্রধান মন্ত্রীনা থাগৎপা ফোঙদোকখ্রে।

মহাক্কী ভিদিও মেসেজগীদমক থৌরমগী চীফ গেস্ত ওইখিবা ত্রিনিদাদ অমসুং তোবাগোগী রাস্ত্রপতি খৃস্তাইন কারলা কাঙ্গালু থাগৎলদুনা, প্রধান মন্ত্রীনা হায়খি মহাক্না ভারতকী চাউখৎপগী মতাংদা ৱাফম কয়া ফোঙদোকখি অমসুং মহাক্কী ৱাহৈশিংনা থৌরম অসিদা শরুক য়াখিবা খুদিংমক্ত ইথিল অমা পীখি। হৌজিক ভারত্তা ফজরবা কুহ্মৈশিং অমসুং মীয়াম তিনবা থৌরমশিং পাংথোকপা মতমনি অমসুং নুমিৎ খরনিগী মতুংদা প্রায়াগ্রাজদা মহা কুম্ভ হৌরগনি অমসুং মকর সংক্রান্তি, লোহরি, পোঙ্গাল অমসুং মাগ বিহুশু লাক্লে। মফম খুদিংমক্ত হরাও-তয়াম্বগী ফিবম অমা লৈরে।

মতম কুইনা মপান লৈবাক্ত লৈরুরবা মতুংদা ১৯১৫ গী নুমিৎ অসিদা মহাত্মা গান্ধী ভারত্ত হল্লকখিবা অদু নিংশিংলদুনা, প্রধান মন্ত্রী শ্রী নরেন্দ্র মোদীনা হায়খি অসিগুম্বা অঙকপা মতম অমদা মপান লৈবাকশিংদা খুন্দাখ্রবা ভারতমচাশিং শরুক য়াবা অসিনা কুহ্মৈগী মশক অমা থোকহল্লে। অতোপ্পা মরম অমগীদমক হন্দক্কী প্রাভাসি ভারতিয় দিবস অসি অখন্নবনি। থৌরম অসি প্রাভাসি ভারতিয় দিবস থবক ওইনা পায়খৎলম্বা শ্রী অতল বিহারি বাজপায়গী চহি ১০০শুবা মপোক কুমওনগী নুমিৎ খরনিগী মতুংদা পাংথোকপনি। প্রাভাসি ভারতিয় দিবস অসি ভারত অমসুং মসিগী মপান লৈবাকশিংদা লৈরিবা ভারতমচাশিংগী মরক্ত লৈনবা মরী চেৎশীনহন্নবা ইন্সতিতুসন অমনি। ঐখোয়গী হৌরকফমশিংগা শম্নহন্দুনা ঐখোয়না ভারত, ভারতকী শক্তম, ঐখোয়গী নাত অমসুং চাউখৎপা হরাওবা ফোঙদোক্লি।

প্রধান মন্ত্রী শ্রী নরেন্দ্র মোদীনা হায়খি ঐখোয় ময়াম পুল্লিবা ওরিসা অসি ভারতকী ইনাকখুল্লবা নাত অমসুং চৎনবীগী মমি অমনি। খোঙথাং খুদিংদা ঐখোয়না ওরিসাদা ঐখোয়গী নাত অমসুং চৎনবী উবা ফংগনি। কনাগুম্বা মীওই অমনা পুৱারি ওইরবা উদায়াগিরি অমসুং খান্দাগিরিগী শুরুংশিদা নত্ত্রগা চিংলেম্লবা কোনার্ককী সন তেম্পল নত্ত্রগা  তামরালিপতি, মনিকপাত্না অমসুং পালুরগী অরিবা হিথাংফমশিংদা চৎপদা মীওই খুদিংমক চাউথোকচবনা পীক থনগনি। চহি চা কয়াগী মমাঙদা, ওরিসাদগী ললোনবশিং শাংলবা সমুদ্রগী খোঙচৎশিংদা বালি, সুমাত্রা অমসুং জাবাগুম্বা মফমশিংদা চৎখি। মসি নিংশিংবা ওইনা ঙসি ফাওবা ওরিসাদা বালি যাত্রা পাংথোক্লি। ওরিসাদা মরুওইবা পুৱারিগী মফম অমা ওইরিবা ধাউলি অসি শান্তিগী খুদম অমনি। মালেমগী লৈবাকশিংনা থাংশাংগী শক্তিনা লৈবাকশিং পাকথোক-চাউথোক্লিঙৈদা সমরাত অশোকনা মফম অসিদা শান্তিগী লম্বী খনখি। মসিগী চৎনবী অসিনা ভারতনা মালেমদা হায়রি মদুদি তুংলমচৎ অসি বুদ্ধগী মখা পোল্লি, লালদা লৈতে। মরম অদুনা ওরিসাদা মীওই খুদিংমক তরাম্না ওকপা অসি মহাক্কী ওইনা য়াম্না অখন্নবনি।

প্রধান মন্ত্রীনা হায়খি মপান লৈবাকশিংদা খুন্দারিবা ভারতমচাশিং অসি ভারতকী এম্বেসেদরশিংনি হায়না মহাক্না মতম পুম্নমক্ত খল্লি। মালেম শীনবা থুংবগী ভারতমচাশিং উনবা অমসুং মখোয়গা ৱারি শানবা অসিদা হরাওই। মখোয়দগী মহাক্না ফংখিবা নুংশিবা অমসুং থৌজালশিং কাউবা ঙম্ললোই অমসুং মতম পুম্নমক্ত মহাক্না নিংশিংদুনা লৈহৌরগনি।

মালেমগী ফম্বাক্ত চাউথোকচবগা লোয়ননা মহাক্কী কোক ৱাংনা থাংগৎপা ঙম্বগী খুদোংচাবা মহাক্ত পীবগীদমক মহাক্না মপান লৈবাকশিংদা খুন্দারিবা ভারতমচাশিং থাগৎপা ফোঙদোক্লদুনা, প্রধান মন্ত্রীনা হায়খি হৌখিবা চহি ১০ দা, মহাক্না মালেমগী লুচিংবা কয়াগা উনবদা, মখোয়না লৈরিবা লৈবাকশিং অদুদা মখোয়না থবক কয়া পাংথোকপা অমসুং মখোয়গী খুন্নাইগী গুনশিং অসিগীদমক লুচিংবশিংনা মপান লৈবাকশিংদা খুন্দারিবা ভারতমচাশিং থাগৎপা ফোঙদোকখি।

প্রধান মন্ত্রীনা হায়খি ঐখোয় গনতন্ত্রগী মমা ওইবা খক নত্তনা; গনতন্ত্র অসি ঐখোয়গী পুন্সিগী তৎন-থানবা য়াদ্রবা শরুক অমনি। মহৌশানা ভারতমচাশিংনা খেন্নবশিং য়াবা ঙম্মী অমসুং মখোয়না লৈরুবা খুন্নাইশিংদা মখোয় চঙশিনখি, মফম অদুগী নিয়মশিং অমসুং চৎনবীশিং ইকায়খুম্নৈ। ভারতমচাশিংনা মখোয়না লৈরুবা লৈবাকশিংগীদমক পুকচেল শেংনা থবক তৌখি, মখোয়গী চাউখৎপা অমসুং নুংঙাই-য়াইফবদা মতেং পাংখি অমসুং লোয়ননা মখোয়গী মতম পুম্নমক্ত ভারত চেৎনা থমখি। ভারতকী হরাওবা অমসুং মাইপাকপা খুদিংমক মখোয়না হরাওবা ফোঙদোকখি।

২১শুবা চহিচাদা ভারতকী চাউখৎপগী খোঙজেল অমসুং পাক-চাউবা ফোঙদোক্লদুনা, প্রধান মন্ত্রীনা হায়খি হৌখিবা চহি ১০ অসিদা ভারতনা মীওই মিল্লিয়ন ২৫০ লায়রবা কোকহল্লে অমসুং মালেমদা ১০ শুবা খ্বাইদগী চাউবা ইকোনোমি ওইরম্বদগী ৫ শুবা খ্বাইদগী চাউবা ইকোনোমি ওইরে। ভারতনা অথুবা মতমদা ৩ শুবা খ্বাইদগী চাউবা ইকোনোমি ওইরগনি।

চন্দ্রয়ান মিসন্না সিব-শক্তি পোইন্ত য়ৌখিবা অমসুং দিজিতেল ইন্দিয়াগী মপাঙ্গল মালেম্না মশক খঙবা অসিগুম্বা ভারতকী মাইপাকপশিং পল্লদুনা, প্রধান মন্ত্রীনা হায়খি ভারত্তা হিরম খুদিংমক্ত অনৌবা থাকশিং য়ৌবা ঙম্লে, রিন্যুএবল ইনর্জি, এভিএসন, ইলেক্ত্রিক মোবিলিতি, মেত্রো নেতৱার্কশিং অমসুং বুল্লেত ত্রেনশিংদা রেকোর্দশিং থুগায়রে। হৌজিক ভারতনা “মেদ ইন ইন্দিয়া” ফাইত্তর জেতশিং অমসুং ত্রান্সপোর্ত এয়রক্রাফশিং শারে। তুংদা মীয়াম্না “মেদ ইন ইন্দিয়া” প্লেনশিংদা প্রাভাসি ভারতিয় দিবস শরুক য়ানবা ভারত্ত লাক্নবা মঙলান মঙলি।

প্রধান মন্ত্রীনা হায়খি লৈবাক অসিগী মাইপাকপশিং অমসুং তুংগী খুদোংচাবশিংনা মরম ওইদুনা মালেমদা ভারতকী থৌদাং হেনগৎলকপনি। ঙসি ভারতনা লৈবাক অসিগী মশাগী থবক ফগৎহনবা খক নত্তনা গ্লোবেল সাউথকী খোল্লাউশিং য়াম্না কন্না লাউরে। অফ্রিকান য়ুনিয়ন জি-২০গী লেংদ্রবা মেম্বর অমা ওইহন্নবা ভারতনা পুখৎলকপা ৱাফম অমতা ওইনা য়ানখি, মসিনা “মীওই খুন্নাইগী থবক্না অহানবা” হায়বা ভারতকী ফিরেপ অদু উৎলে।

প্রধান মন্ত্রী শ্রী নরেন্দ্র মোদীনা হায়খি অচৌবা কম্পেনিশিংগী খুৎথাংদা মালেমগী ওইনা চাউৎপদা শীনফমশিংদা লৈরিবা মীওইশিংনা মতেং পাংবদগী মালেম্না ভারতমচাশিংগী হৈথোই-শিংথোইবা মশক খঙলে। রাস্ত্রপতি দ্রৌপতি মুর্মুদগী প্রাভাসি ভারতিয় সম্মান ফংলবশিং মহাক্না য়াইফ-পাউজেল পীজরি। চহি কয়া ভারতনা মালেমগী খ্বাইদগী নহা ওইবা অমসুং খ্বাইদগী হৈথোই-শিংথোইবা মীওই লৈবা লৈবাক ওইগনি, মালেমগী স্কিলগী দরকার ওইবশিং ফংহনবা ঙমগনি। হৌজিক লৈবাক কয়ানা ভারতকী হৈথোই-শিংথোইবা নহারোলশিং তরাম্না ওক্লি অমসুং মখা তানা স্কিল পীদুনা, অমুক হন্না স্কিল লৈহন্দুনা অমসুং স্কিল হেনগৎহন্দুনা মপান লৈবাকশিংদা চৎখিবা ভারতমচাশিং শোইদনা অৱাংবা থাক্কী স্কিল লৈহন্নবা ভারতনা থবক পায়খৎলে।

প্রধান মন্ত্রী শ্রী নরেন্দ্র মোদীনা হায়খি মপান লৈবাকশিংদা লৈরিবা ভারতমচাশিং নুংঙাইনা লৈহনবা অসি য়াম্না মরুওই অমসুং মখোয় অশোই-অঙাম থোকহন্দবা অমসুং য়াইফ-থৌরাংশিং পায়খৎপা অসি মরুওই। অৱাবা তারকপা মনুংদা মপান লৈবাকশিংদা লৈরিবা ভারতমচাশিং মতেং পাংবা অসি ভারতকী থৌদাংনি, মসিদা ভারতকী মপান লৈবাক্কী থৌশিলগী মরুওইবা পান্দম অদুগী মমি তারে। হৌখিবা চহি ১০ হেনবা অসিদা, মালেম শীনবা থুংবগী ভারতকী এম্বেসিশিং অমসুং ওফিসশিং মীকুপ-নাহুম শিংলে অমসুং থবক ফজনা পাংথোক্লে।

কন্সুলারগী খুদোংচাবশিং লৌনবা মমাঙদা মীয়াম্না লম য়াম্না লাপ্না চৎখিবা অমসুং নুমিৎ কয়ানি ঙাইনখিবা অদু নিংশিংলদুনা, প্রধান মন্ত্রী শ্রী নরেন্দ্র মোদীনা হায়খি হৌখিবা চহি অনিদা অনৌবা এম্বেসি অমসুং কন্সুলেত ১৪ হাংদোক্তুনা হায়রিবা খুদোংচাদবশিং অসি হৌজিক কোক্লে। মাউরিসিয়সকী ৭শুবা মীরোলশিং অমসুং সুরিনাম, মাতিনিক্যু অমসুং গৌদেলোপকী ৬ শুবা মীরোলশিং পর্সন্স ওফ ইন্দিয়ান ওরিজিন (পি আই ও) গী মনুং চলহন্নবা ও.সি.আই কার্দশিংগী থবকশিং পাকথোক-চাউথোকহল্লে।

প্রধান মন্ত্রী শ্রী নরেন্দ্র মোদীনা হায়খি তোঙান-তোঙানবা লৈবাকশিংদা খুন্দারিবা ভারতমচাশিংগী শিংথানিঙাই ওইরবা পুৱারি অমসুং মখোয়গী মাইপাকপশিং অসি ভারতকী নাত অমসুং চৎনবীশিংগী মরুওইবা শরুক অমনি। ঐখোয়গী পুৱারি অমসুং নাতকী শরুক অমা ওইনা অসিগুম্বা নুংঙাইরবা অমসুং পুক্নিং থৌগৎনিঙাই ওইরবা ৱারিশিং লিগদবনি, উৎকদবনি অমসুং ঙাক-শেন্দুনা থমগদবনি। চহি চা কয়াগী মমাঙদা গুজরাত্তগী ইমুং কয়া ওমান্দা খুন্দা-লৈতাদুনা লৈখিবগী মতাংদা মহাক্না হন্দক মন কি বাত্ত ফোঙদোকখ্রে। মখোয়গী চহি ২৫০ মমাঙগী খোঙচৎ অদু পুক্নিং থৌগৎনিঙাইনি অমসুং মসিগী ফুরুপ অসিগা মরী লৈনবা চে-চাং লিশিং কয়া দিজিতেল ওন্থোক্নবা একজিবিসন অমা পাংথোক্লে। ফুরুপ অসিগী অহলশিংনা মখোয়না খঙজবশিং ৱারি লিনবা “ওরেল হিস্তরি প্রোজেক” অমা পাংথোক্লে। হায়রিবা ইমুংশিং অদু ঙসিগী থৌরম অসিদা শরুক য়াবা অসিদা অপেনবা ফাওই।

তোঙান-তোঙানবা লৈবাকশিংদা খুন্দারিবা ভারতমচাশিংগী চপ মান্নবা থবকশিং পায়খৎপগী দরকার ওইবা অদু পল্লদুনা, প্রধান মন্ত্রী মোদীনা “গিরমিতিয়া” ইনাওশিং অমসুং ইচলশিংগী খুদম পীখি। মহাক্না হায়খি মখোয়না হৌরকখিবা ভারতকী খুঙ্গংশিং অমসুং সহরশিং মশক খঙদোক্নবা অমসুং মখোয়না খুন্দারিবা মফমশিং খঙদোক্নবা দেতাবেজ অমা শেমগদবনি। মখোয়গী পুন্সি দোকুমেন্ত তৌবা, কমদৌনা মখোয়না শিংনবশিং খুদোংচাবশিং ওন্থোকখিবা, ফিল্মশিং অমসুং দোকুমেন্তরিশিংদা উৎকদবনি। গিরমিতিয়াগী মরমদা থিজিনবা, থবক অসিগীদমক য়ুনিভর্সিতি চিয়ার অমা লিংখৎপা অসি য়াম্না মরুওই। চাংনাইনা মালেমগী গিরমিতিয়া কনফরেন্সশিং পাংথোক্কদবনি অমসুং হায়রিবা থবকশিং অসি খুমাংচাউশিন্নবা থবক পায়খৎকদবনি।

প্রধান মন্ত্রী শ্রী নরেন্দ্র মোদীনা হায়খি চাউখৎপা অমসুং হেরিতেচগী লাইৱাগা লোয়ননা অনৌবা ভারত চাউখৎলক্লি। মালেমদা অহানবা ওইনা ভারতকী মরমদা খঙহন্নবা জি-২০ মীফমশিং মনুংদা লৈবাক শীনবা থুংনা সেসনশিং পাংথোকখি। কাসি-তামিল সঙ্গমম, কাসি তেলুগু সঙ্গমম অমসুং সৌরাস্ত্রা তামি সঙ্গমমগুম্বা মরুওইবা থৌরম কয়া পাংথোক্লে। হন্দক সান্তর তিরুবাল্লুবার নুমিৎ থৌরম পাংথোক্লগনি অমসুং মহাক্কী পাউজেলশিং শন্দোক্নবা তিরুবাল্লাবার কলচর সেন্তরশিং হাংদোক্লে। অহানবা সেন্তর শিঙ্গাপুরদা থবক হৌখ্রে অমসুং য়ু.এস.এদা হাওস্তোন য়ুনিভর্সিতিদা তিরুবাল্লুবার চিয়ার অমা লিংখৎলে। হায়রিবা থবকশিং অসিনা তামিল লোল অমসুং হেরিতেচ অমসুং ভারতকী হেরিতেচ মালেমগী কাচিন কোয়া শীনবা থুংনা য়ৌহন্নবা পান্দম থম্লি।

ভারতকী হেরিতেচ সাইতশিং শম্নবা পায়খৎলিবা থবকশিংগী মতাংদা, প্রধান মন্ত্রী শ্রী নরেন্দ্র মোদীনা হায়খি রামায়ন এক্সপ্রেসগুম্বা অখন্নবা ত্রেনশিংনা ভগবান রাম অমসুং মাতা সিতাগা মরী লৈনবা মফমশিং য়ৌহল্লে। ভারত গৌরব ত্রেনশিংনা লৈবাক শীনবা থুংবগী মরুওইবা হেরিতেচগী মফমশিংশু শম্নহল্লে অমসুং বন্দে ভারত ত্রেনগুম্বা সেমি-হায় স্পিৎ ত্রেনশিংনা ভারতকী মরুওইবা হেরিতেচ সেন্তরশিং শম্নরে। অখন্নবা প্রাভাসি ভারতিয় এক্সপ্রেস ত্রেন হৌদোকপা অসিনা  তুর অমদা চাউরাক্না মীওই ১৫০ রোম তুরিজম অমসুং লাইনিংগা মরী লৈনবা মফম ১৭ কোইবা পুগনি। মীয়াম্না ওরিসাদা তোঙান-তোঙানবা মফমশিং য়েংগদবনি অমসুং মীয়াম্না হন্দক প্রায়াগ্রাজদা পাংথোক্কদৌরিবা মহাকুম্ভগী তাংলবা খুদোংচাবা অসি লৌগদবনি।

প্রধান মন্ত্রী শ্রী নরেন্দ্র মোদীনা হায়খি ১৯৪৭ দা ভারতনা নিংতম্বদা মপান লৈবাকশিংদা লৈরিবা ভারতমচাশিংনা মরুওইবা থৌদাং লৌখি অমসুং ভারতকী চাউখৎপদা মপান লৈবাকশিংদা লৈরিবা ভারতমচাশিংনা মতেং পাংখি অমসুং মালেমগী ওইনা মপান লৈবাকশিংদা শেন য়াম্না থারকপা লৈবাকশিংগী মনুংদা ভারতনা মকোক্ত লৈরে। ২০৪৭ দা ভারত চাউখৎলবা লৈবাক অমা ওইহন্নবা পান্দম থম্লি। মপান লৈবাকশিংদা লৈরিবা ভারতমচাশিংগী শেন-থুমগী থবকশিং পাংথোক্নবা অমসুং শেন থাদবগী দরকার ওইবশিং ফংহন্নবা গিফ সিতি ইকোসিস্তেম্না মরুওইবা থবক পায়খৎলে। ভারতকী চাউখৎপগী খোঙচৎ হেন্না মপাঙ্গল কনখৎহন্নবা মখোয়না মসিগী কান্নবশিং লৌগদবনি। মপান লৈবাকশিংদা লৈরিবা ভারতমচাশিংনা পায়খৎলিবা থবক খুদিংমক্না ভারতকী চাউখৎপদা মতেং পাংলি।

হেরিতেচ তুরিজমগী খুদোংচাবশিংগী মতাংদা, প্রধান মন্ত্রীনা হায়খি মদুদি ভারতকী হেরিতেচশিং উৎলিবা তয়ার-২ অমসুং তয়ার-৩ সহরশিং অমসুং খুঙ্গংশিং য়াওনা লৈবাক অসিগী মেত্রো সহরশিংদা মপান নাইদবা খুদোংচাবশিং লৈরি। অপীকপা সহরশিং অমসুং খুঙ্গংশিংদা চৎতুনা অমসুং মখোয়না খঙজবশিং শরুক য়াদুনা মপান লৈবাকশিংদা লৈরিবা ভারতমচাশিংনা লৈবাক অসিগী হেরিতেচ অসি মালেমগা শম্নহনগদবনি। মখোয়গী মথংগী ভারত খোঙচত্ত, য়ামদ্রবা ভারতমচা নত্তবা মখোয়গী মরুপ মঙা পুরক্কদবনি অমসুং মখোয় ভারতকী ফজবা মশক খঙনবা পুক্নিং থৌগৎকদবনি।

প্রধান মন্ত্রীনা হায়খি নহা ওইরিবা মপান লৈবাকশিংদা লৈরিবা ভারতমচাশিংনা ভারতকী মরমদা হেন্না খঙনবা “ভারত কো জানিয়ে” কুইজ শরুক য়াগদবনি। মখোয়না “ভারত্ত লাইরিক তম্বা” থৌরমগী খুদোংচাবা লৌগদবনি অমসুং আই.সি.সি.আর স্কোলারশিপ স্কিম শরুক য়াগদবনি। মপান লৈবাকশিংদা লৈরিবা ভারতমচাশিংনা মখোয়না লৈরিবা লৈবাকশিংদা ভারতকী অশেংবা পুৱারি মশক খঙহনবা য়াম্না মরুওই। হায়রিবা লৈবাকশিং অসিগী হৌজিক্কী মীরোলশিংনা ভারতকী নুংঙাই-য়াইফবা, মতম শাংনা নমথখিবা অমসুং লান্থংনখিবা খঙলম্লোই। মপান লৈবাকশিংদা লৈরিবা ভারতমচাশিংনা ভারতকী অশেংবা পুৱারি মালেমদা খঙহনগদবনি।

প্রধান মন্ত্রীনা হায়খি হৌজিক ভারত অসি মালেমগী মরুপ ওইনা খঙনরে। মখোয়গী থবকশিং হেনগৎহন্দুনা মসিগী মালেমগী মরী অসি মপাঙ্গল কনখৎহন্নবা মপান লৈবাকশিংদা লৈরিবা ভারতমচাশিংনা হোৎনগদবনি। লমদম অদুদা লৈরিবা মীওইশিংগীদমক মখোয়না লৈরিবা লৈবাকশিং অদুদা মনা পীবগী থৌরমশিং পাংথোক্কদবনি। সাহিত্য, কলা, ক্রাফ, ফিল্ম অমসুং থিয়েতরগী লমদা মশক নাইবা মীওইশিংদা হায়রিবা মনাশিং অসি পীগদবনি। ভারতকী এম্বেসিশিং অমসুং কন্সুলেতশিংগী মতেংগা লোয়ননা মাইপাক্লবশিংদা সর্তিফিকেদশিং পীগদবনি। মসিনা মফম অদুগী মীয়ামগা লনাই ওইবা অমসুং থম্মোয়গী ওইবা মরীশিং হেনগৎহনগনি।

ভারতকী পোৎথোকশিং মালেমদা মমিং চৎহন্নবদা মপান লৈবাকশিংদা লৈরিবা ভারতমচাশিংনা লৌরিবা থৌদাং পল্লদুনা, প্রধান মন্ত্রীনা হায়খি মখোয়না “মেদ ইন ইন্দিয়া” চানবা পেকেদশিং, ফিরোলশিং অমসুং অতোপ্পা পোৎলমশিং মফম অদুদগী নত্ত্রগা ওনলাইন্দগী লৈগদবনি অমসুং হায়রিবা পোৎলমশিং অসি মখোয়গী চাকশঙশিং, দ্রোইং রুমশিংদা  থমগদবনি অমসুং খুদোলপোৎশিং ওইহনগদবনি। মসিনা বিকসিত ভারত অমা শেমগৎপদা শিংথাবা য়ানা মতেং পাংগনি।

ইমা অমসুং মালেম ইমাগা মরী লৈনবা অতোপ্পা অমা অপীল তৌরদুনা, প্রধান মন্ত্রীনা হায়খি মহাক্না হন্দক গুয়ানাদা চৎলুবদা লৈবাক অদুগী রাস্ত্রপতিগা লোয়ননা মহাকআন “এক পের মা কে নাম” থবক শরুক য়াখি। ভারত্তা লৈবা মীওই মিল্লিয়ন কয়া থবক অসি শরুক য়ারে। মপান লৈবাকশিংদা লৈরিবা ভারতমচাশিংনা মখোয়না লৈরিবা লৈবাক অদুদা মখোয়গী মমাগী মমিংদা উ চারা অমা থাগদবনি। মখোয়না ভারত্তগী হনখিবা মতমদা, মখোয়না বিকসিত ভারত অমগী ৱাশক্কা লোয়ননা মখোয় হনখিগদবনি। নুংঙাই য়াইফবা চহি ২০২৫, হকচাং ফবা অমসুং লন-থুম ফংবা চহি অমগীদমক য়াইফ-পাউজেল পীরি অমসুং মখোয় ভারত্ত অমুক লাকপদা তরাম্না ওকচরি।

থৌরম অদুদা শরুক য়াখিবা শক্নাইরবা মীওইশিংগী মনুংদা ওরিসাগী রাজ্যপাল দোক্তর হরি কামভাম্পতি, ওরিসাগী চীফ মিনিস্তর শ্রী মোহন চরন মাঝি, য়ুনিয়ন মিনিস্তরশিং শ্রী এস. জয়সঙ্কর, শ্রী অশ্বিনি বৈষ্ণব, শ্রী প্রালহাদ জোসি, শ্রী ধর্মেন্দ্র প্রধানম শ্রী জুয়াল ওরাম অমসুং  কেন্দ্রগী রাজ্য মন্ত্রীশিং সুশ্রী সোভা করান্দলাজে, শ্রী কিরতি ভর্ধন সিংহ অমসুং শ্রী পাবিত্রা মারঘেরিতা য়াওখি।

নুঙগীৱারোল

প্রাভাসি ভারতিয় দিবস (পি বি দি) কনভেন্সন অসি মপান লৈবাকশিংদা খুন্দারিবা ভারতমচাশিংগা শম্ননবা অমসুং মখোয় অমগা অমগা উনবা ফংনবা মরুওইবা মফম অমা পীরিবা ভারত সরকারগী মরুওইবা থৌরমনি। ১৮ শুবা প্রভাসি ভারতিয় দিবস কনভেন্সন অসি ওরিশা রাজ্য সরকারগা খুৎশম্নদুনা ২০২৫ গী জনুৱারী ৮-১০ ফাওবদা ভুবনেশ্বরদা পাংথোক্লি। মসিগী প্রাভাসি ভারতিয় দিবস কনভেন্সন অসিগী থিমদি “দাইস্পোরাস কন্ত্রিব্যুসন তু এ ভিকসিৎ ভারত”নি। তোঙান তোঙানবা লৈবাক ৫০ হেনবদগী ইন্দিয়ন দাইস্পোরা মেম্বর কয়া অমা প্রাভাসি ভারতিয় দিবস কনভেন্সন্দা শরুক য়ানবা রেজিস্তর তৌখ্রে।

মপান লৈবাকশিংদা খুন্দারিবা ভারতমচাশিংগীদমক অখন্নবা তুরিস্ত ত্রেন অমা, প্রাভাসি ভারতিয়া এক্সপ্রেসগী অহানবা খোঙচৎ প্রধান মন্ত্রীনা রিমোত ওইনা লমথাখ্রে, ত্রেন অসি দিল্লীগী নিজামুদ্দিন রেলৱে স্তেসনদগী হৌগনি অমসুং চয়োল অহুম তুরিজম অমসুং ধর্মগী ওইবা মরুওইবা মফম কয়াদা চৎকনি। প্রভাসি ভারতী এক্সপ্রেস অসি প্রভাসি তীর্থ দর্শন য়োজনাগী মখাদা পাংথোক্কনি।

Pleased to speak at the Pravasi Bharatiya Divas convention in Bhubaneswar. The Indian diaspora has excelled worldwide. Their accomplishments make us proud. https://t.co/dr3jarPSF4

— Narendra Modi (@narendramodi) January 9, 2025

Pravasi Bharatiya Divas has become an institution to strengthen the bond between India and its diaspora. pic.twitter.com/PgX3OtiZO0

— PMO India (@PMOIndia) January 9, 2025

भविष्य युद्ध में नहीं है, बुद्ध में है। pic.twitter.com/7dBzcnVKnS

— PMO India (@PMOIndia) January 9, 2025

We are not just the Mother of Democracy; democracy is an integral part of our lives. pic.twitter.com/oyZjOUpUhm

— PMO India (@PMOIndia) January 9, 2025

21st century India is progressing at an incredible speed and scale. pic.twitter.com/6SJGXpY7pA

— PMO India (@PMOIndia) January 9, 2025

Today’s India not only firmly asserts its own point but also strongly amplifies the voice of the Global South. pic.twitter.com/bdQJZn77Gb

— PMO India (@PMOIndia) January 9, 2025

India has the potential to fulfill the world’s demand for skilled talent. pic.twitter.com/llhwA1dTA8

— PMO India (@PMOIndia) January 9, 2025

We consider it our responsibility to help our diaspora during crisis situations, no matter where they are. pic.twitter.com/QS37yd8zYD

— PMO India (@PMOIndia) January 9, 2025

PM @narendramodi‘s requests to Indian diaspora… pic.twitter.com/XcUT7GatZ0

— PMO India (@PMOIndia) January 9, 2025

***