ভারতকী প্রধানমন্ত্রী
প্রধান মন্ত্রীনা ঙসি য়ুরোপিয়ন কম্মিসনগী প্রসিদেন্ত উর্সুলা বোন দের লেয়েনগা লোয়ননা তেলেফোন্দা ৱারী শানখ্রে। লুচিংবা অনিনা কোবিদ-১৯ লাইচৎকী হৌজিক ওইরক্লিবা মালেমগী ফিভমদা খন্না-নৈনখি।
প্রধান মন্ত্রীনা য়ুরোপিয়া য়ুনিয়নদা কোবিদ-১৯না মরম ওইদুনা লৈখিদ্রবশিংদা মহাক্কী ওইবা অৱাবা ফোংদোকখি। মহাক্না লাইচৎ অসি থেংনবদা লৈবাক পুম্নমক্কী মরক্তা কোওর্দিনেসন অমসুং কোওপরেসনগী মথৌ তাবদা অকনবা ৱাফম থমখি। প্রধান মন্ত্রীনা কোরোনা ভাইরস ইনফেক্সন শন্দোকপা থিংনবগীদমক ভারতনা লৌখৎলিবা খোংথাংশিংদসু অকনবা ৱাফম থমখি।
শ্রীমতী বোন দের লেয়েননা ফোংদোকখি মদুদি প্রধান মন্ত্রীগী লুচিং মখাদা ভারত্তা লাইনা অসি পাক শন্না শন্দোরকপা থিংনবগী মায়কৈদা মরুওইবা অঙনবা খোংথাং লৌখৎলে। মহাক্না ফিভম অসিদা ভারত্তা য়ুরোপকী নাগরিকশিংদা পীরিবা তেংবাং অদু থাগৎপা ফোংদোকখি।
শ্রীমতী বোন দের লেয়েননা হিদাক-লাংথক অমসুং ভেক্সিন পুথোক্নবা হোৎনরিবশিং য়াওনা চংদবা য়াদবা পোৎলমশিংগী সপ্লাই ঙাক্তুনা থম্বগী মরুওইবদসু অকনবা ৱাফম ফোংদোকখি।
লুচিংবা অনিমক্না জি-২০ ফ্রেমৱার্ক্কী মনুংদা ওইথোকপা য়াবা তেংবাং পীনবা অমসুং মসিগী মনুংদা পাংথোক্কদৌরিবা ভিদিও কনফরেন্সকী মতাংদা খন্ন-নৈনখি।
